ئەڤرۆ نیوز ، زنار تۆڤی:
وەسا بریارە پێشانگەها حەفتێ یا پەرتۆکێ ل پارێزگەها دهۆکێ بهێتە ڤەکرن و بۆ دەمێ شەش رۆژان دێ یا بەردەوام بیت.
د ڤی واری دا بورهان یەحیا پەیڤدارێ رێڤەبەریا راگەهاندن و چاپ و بەلاڤکرنێ ل پارێزگەها دهۆکێ بۆ ئەڤرۆ نیوز گۆت: وەزارەتا رەوشەنبیری و لاوان، رێڤەبەریا گشتی یا راگەهاندن و چاپ و بەلاڤکرنێ، رێڤەبەریا راگەهاندن و چاپ و بەلاڤکرنێ ل دهۆکێ دێ پێشانگەها حەفتێ یا پەرتۆکێ دێ ل دهۆکێ هێتە ڤەکرن ل رۆژا 9/12 هەتا 14/12/2019 دێ یا بەردەوام بیت، هەروەسا دێ پێشانگەهـ ل دەمژمێر 9 سپێدێ هەتە 6 مەغرەب یا بەردەوام بیت و دێ پێشانگەهـ ل سەنتەرێ قوتابیان ل زانکۆیا دهۆکێ هێتە ڤەکرن.
ناڤهاتی گۆت ژی: د ڤێ پێشانگەهێ دا دێ 12 پەرتووکخانێن دهۆکێ، کو پشکەک ژ وان پەرتۆکخانان دێ نوونەراتیا هەولێرێ و سلێمانیێ و دەرڤەی وەلاتی ژی کەن، هەروەسا دێ شەش هزار ناڤ و نیشانێن پەرتۆکان هێنە نیشادان و ئەڤ سالە هندەک پەرتۆکێن نووتر دێ پشکدار بن، دیسان پەرتوکخانێن کەرتێ تایبەت شیاینە چەندین پەرتۆکێن نوو بکەنە دناڤا بازاری دا، هەروەسا داشکاندن دێ ل سەر هەموو پەرتوکان هەبیت و داشکاندن دێ 10% هەتا 30% د هندەک پەرتووکان دا هەبیت، هەروەسا دێ پەرتۆک ب زمانێن کوردی و عەرەبی و ئنگلیزی و هندەک زمانێن دیتر ژی پشکداریێ تێدا کەن.
نيشاندان
