ئه‌ڤرۆ نیوز:
ئه‌ڤرۆ سێشه‌مبى 5/11/2019 نێچیرڤان بارزانى، سه‌رۆكێ هه‌رێما كوردستانێ، مه‌سرور بارزانى، سه‌رۆكێ حوكمه‌تا هه‌رێما كوردستانێ و رێواز فایق، سه‌رۆكا په‌رله‌مانێ كوردستانێ و به‌رپرسێن بلند یێن هه‌رسێ سه‌رۆكایه‌تیان كۆمبوون.
د وێ كۆمبوونێ دا بریار هاته دان، د حاله‌تا راستڤه‌كرنا دستوورێ عیراقێ، نابیت د هیچ برگه و ماده‌كێ دا ده‌ستكارى د مافێن كوردان و هه‌رێما كوردستانێ بهێته كرن.
ئەڤرۆ نیوز،عەلی حاجی :
رێڤەبەرێ بەلاڤکرنا کارەبێ ل زاخۆ بۆ ئەڤرۆ نیوز دیار کر بریارا سەرۆکێ حوكمه‌تا هەرێما کورسستانێ بۆ راکێشانا هێلەکا دی یا کارەبێ ژ بریارێن گرنگە و ل گورەی بەرهەمئینانا کارەبێ دێ شێن کارەبەکا باشتر دەینە وه‌لاتیان.
خالد سالح، رێڤەبەرێ بەلاڤکرنا کارەبێ ل زاخۆ زێدەتر گوت : ئەو هێلا ئێکانە یا کارەب دگەهشتە زاخۆ هێلەکا کەڤن بوو ل سالا ١٩٨٠ هات بوو دانان لەورا گەلەک جاران بەرهەمئینانا کاره‌بێ زێدەتر بۆمه نەدشیا زێدەتری ١٥٠ـ٢٠٠ مێگایێن کارەبێ وەربگرین و گەلەک جاران د وەرزێ زڤستانێ دا ئەڤ کێشەیە بۆمه دروست دبوو، بەلێ پشتی هێلەکا دی یا ١٣٢ کەیڤی ل زاخۆ بهێتە دانان، ئەم دشێن ل گورەی بەرهەمئینانا کارەبێ کارەبەکا باشتر بدەینە وه‌لاتیان و ئەو هێلا نوو ب هێتە دانان دێ ژ وێستگەها کواشێ هێت بۆ ویێستگەها تاخێ تلکەبەرێ ل زاخۆ و دێ شێن ب رێیا وێ هێلێ کارەبەکا زێدەتر وەرگرین.
ناڤهاتی گوت ژی : ل زاخۆ نێزیکی ٦٠ هزار پشكدار مه یێن هه‌ین کو هەیڤانە پارێ خوەیێ کارەبێ د دەن و زاخۆ ئێك ژ وان باژێرێن مەزنە کو بتنێ ب هێڤیا هێلەکا کارەبێ ڤە کارەب وەکو پێدڤی ناگەهیتە وه‌لاتیان و ئێدی ئەو گڤاشتن ژی ناکەڤیتە سەر هێلا کەڤن یا کارەبێ.
ئه‌ڤرۆ نیوز:
سەرۆكێ هەرێما كوردستانێ پشتی كۆمبوونا ل گەل سەركردایه‌تیێن لایه‌نێن سیاسی یێن كوردستانێ د كۆنگرەكێ رۆژنامەڤانی دا راگەهاند، هەكە ئارمانج ژ راستڤەكرنا دستوورێ عیراقێ سەقامگیریە، دڤێت بزانن ب دەست لێدانا مافێن گەلێ كوردستانێ سەقامگیری پەیدا نابیت.
نێچیرڤان بارزانی گۆت ژی” مە كۆمبوونەكا گرنگ ئەنجامدا، مە دوپاتی ل وێ چەندێ كر كو پشتەڤانیا داخوازێن خوەنشادەران دكەین و هەر گاڤەكا عیراق بۆ چاكسازیێ بهاڤێت پشتەڤانیێ لێ دكەین و ئەم ب تێكچوونا رەوشا عیراقێ ژی د خوەشحال نینین”
سەرۆكێ هەرێما كوردستانێ گۆت” باوەرناكەم هێزێن عیراقی بخوازن دەستكەفتێن هەرێما كوردستانێ كێم بكەن”.
سەرۆكێ هەرێمێ ئاماژە ب وێ چەندێ ژی كر كو مەترسی ل سەر هەرێما كوردستانێ یا هەی و ئێكرێزی مەرجێ سەرەكی یێ دەرچوونێ یە ژ رەوشا نوكە و كۆمبوونا مە ژی رەنگڤەدانا وێ ئێكهەلویستیێ یە.
نێچیرڤان بارزانی راگەهاند، پەیاما خەلكێ عیراقێ و خۆنیشادەران گەهشتە سەركردێن عیراقێ كو داخوازا ژیانەكا باشتر و خزمەتكاریێن زێدەتر دكەن، هەموو بزاڤێن هەرێما كوردستانێ و سەركرداتیا سیاسی یا هەرێمێ ژی بۆ ئاسایكرنا ڤێ رەوشێ و بجهئینانا داخوازیێن خوەنیشادەرانە.
ئەڤرۆ نیوز،عەلی حاجی :
بەرپرسێ گروپێ هێڤی یێ خوەبەخش د داخویانیەكێ دا بۆ ئەڤرۆ نیوز دیار كر ئەو كەسێن د ناڤ كەمپان دا ل زاخۆ توشی نەخوەشیێن گران دبن ئەم ڤرێدكەینە ژدەرڤەیی عێراقێ و هەتا ڤرێدكەینە بەغدا و هەولێرێ ب مەرەما چارەسەر كرنا وان.
زێدەتر فەیسەل عەلی گوت : ب رێیا خێرخواز و حوكمه‌ت و رێكخراوان مە داخواز كریە هاریكاری دگەل نەخوه‌شێن ئێزدی بیت ب تایبەتی توشبویێن نەخوەشیێن گران ، د قوناغا ئێكێ یا ئەڤ سالە دا 40 نەخوەش هاتنە هنارتن بۆ بەغدا، هەروه‌سا 20 كچێن رزگاربویێن دەستێ داعشێ يێن هاتينه هنارتن بۆ نەخوه‌شخانەكا هەولێرا پایتەخت و ب رێیا نوشدارەكێ ئەمریكی چارەسەریا وان هاتە كرن و زێدەباری وێ چەندێ دو زاروویێن توشبویێن ئێشا گران مە هنارتينه ئیتالیا و كەسەكێ دی ژی هاتە هنارتن بۆ وەلاتێ ئەلمانیا وژنه‌ك و گەنجەك هاتنە هنارتن بۆ وەلاتێ هندستانێ و نوكە دا زارویەكا هاتیە هنارتن بۆ وەلاتێ كوریا باشور كو دلێ وێ هاتیە ڤەكرن و ل بن چاڤێدریا نوشدارێن وی وەلاتی دایە .
ناڤهاتی ئەو چەندە ژی گوت : نوكە سێ ناڤێن دی ژی ل بەر دەستێن مەنە هەتا رەزامەندی ژی هاتیە وەرگرتن ب وێ مەرەمێ وان سێ كەسان ژی ڤرێكەینە وەلاتێ كوریا باشور،ئەم دێ بەردەوام بین ل سەر هنارتنا نەخوەشان تا كو چارەسەری بۆ وان دهێتە دیتن و ئەوێن هاتینە هنارتن بۆ نەخوه‌شخانەیێن ناڤخوه و ژدرەڤە پتريا وان هاتینە چارەسەر كرن وتنێ كەسەكێ گیانێ خوە ژدەست دایە .
ئه‌ڤرۆ نيوز، نيوار محه‌مه‌د سه‌ليم:
وه‌زاره‌تا پێشمه‌رگه‌ى داخوازێ ژ وان قوتابيان دكه‌ت يێن حه‌ز هه‌ين ل خولا 80ێ يا كوليژا هێزێن ئه‌سمانى يا عيراقى درێژيێ بده‌نه خواندنا خوه ناڤێن خوه تۆمار بكه‌ن ب گۆره‌يى وان مه‌رجێن هاتينه دياركرن.
وه‌زاره‌تا پێشمه‌رگه‌ى د نڤيساره‌كێ دا، داخوازێ ژ وان قوتابيان دكه‌ت يێن حه‌ز هه‌ين ل خولا 80ێ يا كوليژا هێزێن ئه‌سمانى يا عيراقى تۆمار بكه‌ن ب مه‌ره‌ما خواندن وه‌كو ئه‌فسه‌رێن فرۆكه‌ڤانى كو دشێن ب رێيا بنكێن خۆبه‌خشينێ يێن سه‌ر ب وه‌زاره‌تا پێشمه‌رگه‌ى ناڤێن خوه تۆمار بكه‌ن.
ژڤانێ تۆماركرنا ناڤان ب گۆره‌ى نڤيسارا وه‌زاره‌تێ ژ 5ى چريا دويێ ده‌ست پێ دكه‌ت و هه‌تا 14ى چريا دويێ 2019 دێ يا به‌رده‌وام بيت.
ل دۆر مه‌رجێن وه‌رگرتنێ ئاشكه‌را كريه كو پێدڤيه پێشكێشكار خودان ره‌گه‌زناما عيراقى بيت و دايك و باب عيراقى بن. ژ دايكبوويێن 1/1/1997 هه‌تا 31/12/2001 دهێنه وه‌رگرتن. ده‌رچوويێ سالا خواندنێ يێ د ناڤبه‌را 2004 هه‌تا 2019 دا بيت. ده‌رچوويێ ئاماده‌يى پشكا زانستى بيت و رێژا نمرێن وى ژ 65% كێمتر نه‌بيت. كه‌سوكارێن شه‌هيدان مه‌رجێ نمرێ ناگريت. پێدڤيه ب خوه‌به‌خشتى پێش كێش بكه‌ت و د تاقيكرنێن نوشدارى و له‌شى و شيانێن هزرى دا ده‌ربچيت. پێدڤيه پێشكێشكارى ئنتيما بۆ گه‌ل و نشتيمانى هه‌بيت.
نه‌هاتبيته سزادان ل سه‌ر چ كه‌فتن و تاوانه‌كا روومه‌تيێ و تاوانێن تيرۆرێ تايبه‌ت ب ئاسايشا ناڤخۆ و ده‌رڤه يا وه‌لاتى. خودان ره‌وشته‌كێ بلند و ره‌فتار باش بيت. پێشتر ل چو خولێن ئه‌كاديميا و كوليژێن له‌شكرى نه‌هاتبيته ده‌ركرن يان خوه ڤه نه‌كێشا بيت. پێدڤيه د چاڤپێكه‌فتنێ دا ده‌ربچيت.
ئه‌و ده‌رچوويێن پارێزگه‌ها دهۆكێ دشێن ل وه‌زاره‌تا پێشمه‌رگه رێڤه‌به‌ريا گشتى يا تاكه‌كان و خۆبه‌خشان ل كۆمه‌لگه‌ها ده‌رگه‌هێ هه‌ولێر ل سه‌ر رێيا هه‌ولێر بۆ شه‌قلاوا ناڤێن خوه تۆمار بكه‌ن.
ئه‌ڤرۆ نيوز، نيوار محه‌مه‌د سه‌ليم:
ل سه‌ر راسپاردا د. ئارام محه‌مه‌د قادر، وه‌زيرێ خواندنا بلند و ڤه‌كۆلينێن زانستى، ره‌زامه‌ندى نيشان دا ل سه‌ر وه‌رگرتنا 533 قوتابيێن ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ ل زانكۆيێن هه‌رێمێ.
عه‌باس ئه‌كره‌م ئاخفتنكه‌رێ ب ناڤێ وه‌زاره‌تا خواندنا بلند و ڤه‌كۆلينێن زانستى بۆ ئه‌ڤرۆ نيوز گۆت: “وه‌زاره‌تا مه ل سه‌ر راسپاردا وه‌زيرێ خواندنا بلند و ڤه‌كۆلينێن زانستى كارئاسانى بۆ قوتابيێن ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ ب تايبه‌ت ئه‌و قوتابيێن ل خواندنگه‌هێن كوردى د خوينن.
ئاخفتنكه‌رێ ب ناڤێ وه‌زاره‌تا خواندنا بلند و ڤه‌كۆلينێن زاسنتى گۆتژى: “پشتى وه‌زاره‌تا مه ده‌رگه‌هێ پێشكێشكرنێ بۆ ده‌رچوويێن 12 ئاماده‌يى ل پشكا خواندنا كوردى ل ده‌ڤه‌رێن كوردستانى يێن ده‌رڤه ئيدارا هه‌رێما كوردستانێ ڤه‌كرى، د رێيا نڤيسينگه‌ها كه‌ركووكێ ژماره‌ك ژ ده‌رچوويان داخواز پێش كێش كرن. ب گه‌هشتنا ليستا ناڤێن پێشكێشكاران، ژ لايێ رێڤه‌به‌ريا ناڤه‌ندى يا وه‌رگرتنێ هووربينيا ته‌مام ل سه‌ر داخوازيێن وان هاته كرن و د ئه‌نجام دا ئه‌ڤ ساله ژى ب ئيمزا وه‌زيرى ره‌زامه‌ندى ل سه‌ر 533 قوتابيێن باژێرێ كه‌ركووك و ده‌ڤه‌رێن كوردستانى يێن ده‌رڤه ئيدارا هه‌رێما كوردستانێ هاته كرن كو ل زانكۆ و په‌يمانگه‌هێن هه‌رێما كوردستانێ ب هه‌مان پيڤه‌ر و كۆنمره بهێنه وه‌رگرتن يێن بۆ سالا خواندنێ يا 2019-2020 هاتينه په‌يره‌وكرن.
ئەڤرۆ نیوز، زنار تۆڤی:
ئەڤرۆ سێشەمبی گازا سپی ل سەر وەلاتیێن ناحیا کانی ماسێ هاتە دابەشکرن و رۆژانە دو تانکێن گازێ دێ گازێ دابەشکەن.
سەربەست سەبری ئاکرەیی رێڤەبەرێ ناحیا کانی ماسێ بۆ رۆژناما ئەڤرۆ دیار کر: ئەڤرۆ سێشەمبی گازا سپی ل سەر وەلاتیێن ناحیا کانی ماسێ هاتە دابەشکرن و رۆژانە دێ دو تانکێن گازێ ل سەر وەلاتیان هێنە دابەشکرن و د نوکە دا 1585 سەرۆک خێزان ل ناحیا کانی ماسێ هەنە و بهایێ هەر پلێتەکا گازێ 41 هزار دینارن و ل رۆژانێن بهێن، هەموو خێزانێن ڤێ دەڤەرێ دێ گازا سپی وەرگرن و هەر خێزانەک دێ 200 لیتران وەرگریت.
ئه‌ڤرۆ نيوز، نيوار محه‌مه‌د سه‌ليم:
كۆمبوونا ئێكێ يا لژنا راستڤه‌كرنا دستوورێ عيراقێ ئه‌ڤرۆ ل به‌غدا هاته ئه‌نجام دان.
لژنه‌كا تايبه‌ت يا جڤاتا نوونه‌رێن عيراقێ بۆ راستڤه‌كرنا دستوورى هاتيه پێكئينان و ئه‌ڤرۆ ل به‌غدا كۆمبوونا خوه يا ئێكێ ئه‌نجام دا وه‌كو ره‌نگڤه‌دان هه‌مبه‌ر داخوازيێن خوه‌نيشانده‌ران.
ئه‌ڤ لژنا راستڤه‌كرنا دستوورێ عيراقێ ژ 18 ئه‌ندامێن جڤاتا نوونه‌رێن عيراقێ ب خوه ڤه دگريت و سێ كورد و نوونه‌رێن كه‌مينان ژى تێدانه.
بڕياره د ماوێ كێمتر ژ چار هه‌يڤان دا ئه‌ڤ لژنه تێبينيێن خوه ل سه‌ر راستڤه‌كرنا دستوورى بده‌ته جڤاتا نوونه‌ران و ب ئێك جار و ده‌نگدان ب ئێك گه‌ر بۆ بهێته كرن و پاشان ژى ئه‌ڤ خاله ژ لايێ وه‌لاتيان ڤه بكه‌ڤنه به‌ر ده‌نگدانێ.
ئه‌ڤرۆ نيوز:
چه‌نده‌كێ به‌رى نها كۆمبوونا هه‌رسێ سه‌رۆكاتيێن هه‌رێما كوردستانێ و كه‌سێن ئێكێ يێن لايه‌نێن سياسى ب پشكداريا سه‌رۆك كۆمارێ عيراقێ ل هه‌ولێر ده‌ستپێكر.
ب گۆره‌ى پێزانينان ته‌وه‌رێ سه‌ره‌كى يێ كۆمبوونێ دانوستاندنه ل سه‌ر كاودانێن نها يێن عيراقێ و چاوانيا سه‌ره‌ده‌ريكرن ل گه‌ل پێشهاتێن عيراقێ و ده‌ڤه‌رێ.
كۆمبوونا به‌رپرسێن بلندێن هه‌رێما كوردستانێ و سه‌رۆك كۆمارێ عيراقێ و كه‌ساتيێن ئێكێ يێن لايه‌نێن سيساى يا هه‌ڤده‌م ل گه‌ل وان كاودانێن ل به‌غدا هه‌ين ژ ئه‌گه‌رێ خوه‌نيشاندانان و بزاڤێن گوهۆڕينا حوكمه‌تا عيراقێ و راستڤه‌كرنا دستوورى.
د دووماهى كۆمبوون دا ژماره‌كا هێز و لايه‌نێن سياسى ل عيراقێ ب سه‌رپه‌رشتيا به‌رهه‌م سالح سه‌رۆك كۆمارێ عيراقێ، ل سه‌ر چه‌ند خالان رێ كه‌فتينه و ئێك ژ وان خالان ژى راستڤه‌كرنا چه‌ند برگێن دستوورى يه.
ئەڤرۆ نیوز، مەحمود نهێلی:
رێڤەبەرێ ناحیا دێرەلۆک بۆ ئەڤرۆ نیوز دیار کر، کو وان ڤەدیتن بۆ وان جهان کریە یێن ژ ئەنجامێ لەهیان زیان گەهشتیێ و داخواز کریە بهێنە نووژەنکرن.
سامی ئوشانە، رێڤەبەرێ ناحیا دێرەلۆک دیار کر، کو ژ ئەنجامێ بارینا بارانێن زۆر یێن بهارا ئەڤ ساله زیان گەهشتبوونە چەندین جهان ژ وان ژی دو پرێن سەر سپنه ى و جویەکا ئاڤدانێ ل گوندێ گەلەکا و جویا ئاڤدانێ ل چەمێ رەشاڤە.
گۆت ژى : ڤەدیتن بۆ وان جهان هاتینە کرن کو زیانێن هەموویان دبنە دورێن ٦۰ ملیون دیناران و ب نڤیسار ببۆ قایمقامیا قەزا ئامێدیێ هاتیە شاندن و ئەم چاڤەرێ دكه‌ین کو ئەڤ جهە بهێنە نووژەنکرن ب تایبەتی پرێن سەر سپنه‌ى چونکە رێیا هاتن و چوونا دو گوندایە و رۆژانە هاتن و چوونەکا زۆر ل سەرە.
نيشاندان