ئەڤرۆ نیوز:
بەری دەمەکێ سێ پەقینێن ئێک ل دووڤ ئێک ل باژێرێ قامشلۆ یێ رۆژئاڤایێ کوردستانێ روو دان کو د ئەنجام دا هەتا نها سێ کەسان جانێ خوە ژ دەست داینە و گەلەک کەس ژی بریندارن.
ل گۆر زانیاریان دو پەقین ب رێیا ترۆمبێلێن بۆمبرێژکری بووینە و ئێک ژی بۆمب بوویە و ئاگرەکێ مەزن بەربوویە ناڤ بازارێ قامشلۆ و هێزێن هەوارهاتنێ ژی هەر بلەز گەهشتینە جهێ روودانێ.
ئه‌ڤرۆ نيوز، نيوار محه‌مه‌د سه‌ليم:
بڕياره پاسپۆرتا عيراقى بهێته گوهۆڕين و ب گۆره‌ى وان گوهۆڕينێن نوو ئێدى پێدڤى ب مۆرێ نابن ژ به‌ر هه‌بوونا سيمكارتى تێدا.
عه‌ميد دلدار نورى، رێڤه‌به‌رێ پاسپۆرتان ل پارێزگه‌ها دهۆكێ د داخۆيانيه‌كێ دا بۆ ئه‌ڤرۆ نيوز ئاشكه‌را كر كو ئه‌وان پێزانين ل سه‌ر وێ چهندێ هه‌نه كو پاسپۆرت دێ هێنه گوهۆڕين، به‌لێ هێشتا چو نڤيسارێن فه‌رمى نه‌گه‌هشتينه ده‌ستێ وان.
عه‌ميد دلدار گۆت: “ب گۆره‌ى پێزانينێن وان گوهۆڕينا پاسپۆرتان دێ ب ره‌نگه‌كى بيت كو سيمكارته‌ك ل سه‌ر په‌رێ وێ يێ ده‌ستپێكى بيت و ئه‌و سيمكارت دێ هه‌موو پێزانين تێدا بن و خواندنا سه‌روچاڤان ژى كه‌ت و ئێدى پێدڤى ب مۆرێ نابن”.
ب گۆره‌ى ئه‌و پێزانينێن ل به‌ر ده‌ستێ ئه‌ڤرۆ نيوز دێ وێنه وه‌كو هێما بۆ پارێزگه‌هان ل سه‌ر پاسپۆرتان هێنه دانان كو هه‌ر وێنه‌ك ده‌ربڕينێ ژ پارێزگه‌هه‌كێ بكه‌ت، د ڤێ ده‌ربارێ دا رێڤه‌به‌رێ پاسپۆرتان گۆت: “چو پێزانينێن ژ ڤى ره‌نگى نه‌گه‌هشتينه مه”.
ئه‌ڤرۆ نيوز، نيوار محه‌مه‌د سه‌ليم:
وه‌زاره‌تا كار و كاروبارێن جڤاكى ل حوكمه‌تا هه‌رێما كوردستانێ راسپارده‌ك ده‌رباره‌ى قه‌رێن بچووك دايه په‌رله‌مانى و داخوازا راستڤه‌كرنا قانوونا پێدانا قه‌رێن بچووك، بۆ ده‌ستپێكرنا پرۆژه‌ى ژى داخوازيه‌ك ئاراسته‌ى جڤاتا وه‌زيران دهێته كرن.
كوێستان محه‌مه‌د، وه‌زيرا كار و كاروبارێن جڤاكى ل حوكمه‌تا هه‌رێما كوردستانێ د كۆنگره‌كێ رۆژنامه‌ڤانى دا راگه‌هاند كو پێداچوون ب پرۆژێ قه‌رێن بچووك دا دهێته كرن بۆ راستڤه‌كرنێ راسپارده‌ك ئاراسته‌ى په‌رله‌مانى هاتيه كرن. پاشان پشتى په‌سه‌ندكر‌نا رێنمايان دێ داخوازێ ژ جڤاتا وه‌زيران كه‌ين كو رێ بده‌نه مه ده‌ست ب پێدانا قه‌رێن بچووك بكه‌ين، “ب ڤێ چهندێ دێ كۆمه‌كا ده‌رفه‌تێن كارى بۆ گه‌نجان هێنه ديتن و هه‌ر ژى دێ بيته ئه‌گه‌ره‌ك بۆ ڤه‌ژاندنا ئابوورێ”.
گۆتژى: “ل سه‌ر شێوازێ به‌رێ قه‌رێن بچووك ناده‌ين، به‌لكو دێ ب ره‌نگه‌كێ نوو ده‌ست ب دانا قه‌ران ب گه‌نجان كه‌ين، چونكو پشكه‌ك ژ پرۆژێن به‌رى نها شكه‌ستن ئينايه”.
ئه‌ڤرۆ نيوز:
كۆچكا سپى داخواز دكه‌ت دووماهى ب توندوتيژى و ئالوزيێن عيراقێ بهێت و وه‌لات به‌ر ب هه‌لبژارتنێن پێشوه‌خت پێنگاڤێ ب هاڤێژيت.
د راگه‌هاندنه‌كێ دا كوچكا سپى راگه‌هاند كو عيراقى ده‌ست به‌ستى نامينن به‌رامبه‌ر ب هه‌ده‌ردانا سامانێن عيراقێ ژ لايێ ئيرانێ و بكارئينانا گرۆپێن چه‌كدار بۆ رێگريكرن ل ئازاديا راده‌ربڕينێ و بۆچوونێن وان ب ئاشتيانه.
دايه زانين ژى كو ئه‌مريكا ژى هه‌روه‌كو به‌رنامێ هاريكاريێ يێ “يو ئێن”ێ داخواز ژ عيراقێ دكه‌ين توندوتيژيێ دژى خونيشانده‌ران ب راوه‌ستينن.
ئه‌ڤرۆ نیوز، عه‌لی حاجی :
نوونه‌رێ چاڤدێریا بازرگانی دلنا هه‌پشك دا ل زاخۆ د داخویانیه‌كێ دا بۆ ئه‌ڤرۆ نیوز دیار كر ماوه‌یێ چار هه‌یڤایه دیارده‌یا ئینانا مریشكێن فرێشكری ژتوركیا بۆ كوردستانێ ب شێوه‌یه‌كێ نه‌یاسایی ده‌ست پێكری یه و پێدڤی یه رێكارێن توندێن یاسایی بهێنه گرتن به‌رامبه‌ر ڤێ دیاردێ .
زێده‌تر داخاز حسێن گوت : ماوه‌یێ چار هه‌یڤایه ب شێوه‌یه‌كێ نه‌یاسایی ئینانا مریشكێن فرێشكری ژ توركیا بۆ كوردستانێ به‌ره‌ڤ زێده‌بونێ ڤه چوویه ژلایێ هاولاتیان ڤه و ئه‌ڤ چه‌نده پشتی وێ یه‌كێ یه كو ئینانا مریشكێن فرێشكری بۆ ناڤ ئاخا كوردستانێ هاتیه قه‌ده‌غه كرن و ئه‌ڤ مریشكه سه‌ره‌رای هندێ كو ب شێوه‌یه‌كێ نه‌دروست دهێته كوردستانێ بتنێ ماوه‌یێ ب كارئینانا وان ژ چار روژان هه‌تا پێنچ روژایه،له‌ورا ئه‌م هاولاتیێن خوه ئاگه‌هدار دكه‌ین كو هه‌ر مریشكه‌كا فریَِشكری ژبه‌ریا بكرن بلا سه‌حكه‌نه مێژوویا وێ و هه‌ر ده‌ما ژ پێنچ روژان زێده‌تر بوری بیت مێژوویا وێ ئه‌و ب كێر خوارنێ ناهێت و زیانێن خوه هه‌نه و په‌یدا بونا ڤێ دیاردێ ژی ژبه‌ر وێ چهندێ یه كو بهایێ مریشكا فرێشكری ل وه‌لاتی ئه‌رزانتره و خه‌لكه‌ك ژبه‌ر بهایێ وێ دكریت .
ناڤهاتی گوت ژی : مه هه‌وه‌كا ده‌ست ب سه‌ر وان مریشكان دا ده‌ست پێكری یه و دماوه‌یێ 10 روژان دا نێزیكی 1190 مریشكان دناڤ ماركێتان دا ده‌ست ب سه‌ر دا هاتینه گرتن و هاتینه ژناڤبرن و ئه‌و مریشك هه‌می ژی به‌رهه‌مێن توركی بوون ،زێده‌بار وێ چهندێ ژی ئینانا مێلاكا توركی ژی ب رێكێن نه‌یاسایی دهێته ناڤ كوردستانێ دا و مه شیایه 210 كێلویێن مێلاكێ ده‌ست ب سه‌ردا بگرین و ژناڤ ببه‌ین و فروتنا وێ مێلاكێ دناڤ ماركێتان دا وه‌كو بازرگانیه‌كێ لێهاتی یه و پێدڤی یه هاولاتی هوشیار بن ل سه‌ر ب كارئینانا وێ مێلاكێ .
ئه‌ڤرۆ نيوز:
سه‌رۆكێ هه‌رێما كوردستانێ نێچيرڤان بارزانى ل گه‌ل شێخ محه‌مه‌د بن زايد جهنشينێ ئه‌بو زه‌بى و جێگرێ فه‌رماندێ گشتيێ هێزێن چه‌كدار ل وه‌لاتێ ئێمارات و سه‌رۆكێ جڤاتا راپه‌راندنا ئيماره‌تا ئه‌بو زه‌بى، دووماهى پێشهاتێن ره‌وشا عيراقێ به‌حسكر و دووپاتى ل گرنگيا پاراستنا ئارامى و سه‌قامگيريا سياسى و ئه‌منى ل عيراقێ و ده‌ڤه‌رێ به‌حسكر.
ل ئێڤاريا ئه‌ڤرۆ ئێكشه‌مبى 10/11/2019 ل ئه‌بو زه‌بى پايته‌ختێ وه‌لاتێ ئيمارات، د كۆمبوونه‌كێ دا نێچيرڤان بارزانى و شێخ محه‌مه‌د بن زايد، په‌يوه‌نديێن هه‌ولێرێ و به‌غدا و دانوستاندنێن چاره‌سه‌ركرنا كێشان، خواستا هه‌ردولا بۆ چاوانيا پێشڤه‌برنا زێده‌تر يا په‌يوه‌نديان، ده‌ليڤێن كارى و وه‌به‌رئێنان بۆ كه‌رتێ تايبه‌ت يێ ئيماراتى ل هه‌رێما كوردستانێ و ژ وێرێ بۆ هه‌موو عيراقێ، په‌يوه‌نديێن هه‌رێما كوردستانێ و عيراقێ ل گه‌ل وه‌لاتێن جيران و ده‌ڤه‌رێ، گفتۆگو ل سه‌ر هاته كرن.
پێشهاتێن ده‌ڤه‌رێ ب گشتى، مه‌ترسيێن ئه‌گه‌رێ دووپاره دياربوونا تيرۆرێ و گرنگيا هه‌ماهه‌نگيا بۆ روو ب رووبوونا وێ و چه‌ند پرس و بابه‌تێن دى يێن جهێ گرنگيا هه‌ردولا، ته‌وه‌ره‌كێ دى يێ كۆمبوونێ بوون.
ئه‌ڤرۆ نيوز:
سه‌رۆك مه‌سعود بارزانى ئه‌ڤرۆ 10/11/2019 پێشوازى ل ئالبێرتۆ مارتين ئۆرتێگا باليۆزێ فاتيكان ل عيراقێ كر.
د ديداره‌كێ دا باليۆزێ فاتيكان ل عيراقێ سوپاسيا رۆلێ سه‌رۆك بارزانى و هێزا پێشمه‌رگێ كوردستانێ كر د شكاندنا تيرۆرستێن داعشێ دا و راگه‌هاند، ئه‌وا پێشمه‌رگه ئه‌نجامداى كاره‌ك بوو بۆ هه‌موو مرۆڤايه‌تيێ، هه‌روه‌سا پێزانين ژى هه‌بوو بۆ خه‌لك و حوكمه‌تا هه‌رێما كوردستانێ كو د رۆژێن ته‌نگ دا ئاواره و پێكهاتێن ئايينى و نه‌ته‌وى پاراستين و ده‌رگه‌هێن خوه بۆ ڤه‌كرين.
د پشكه‌كا دى يا كۆمبوونێ دا ره‌وشا سياسى و دووماهى پێشهات و نه‌رازيبوون و خوه‌نيشادانێن خه‌لكى ل به‌غدا و پارێزگه‌هێن باشوورێ عيراقێ هاته به‌حسكرن و دووپاتى ل ره‌وايه‌تيا داخوازيێن وه‌لاتيان و خوه‌نيشادانێن ئاشتيانه هاته كرن و هه‌ردو لا د هه‌ڤرا بوون كو توندوتيژى ژ هه‌ر لايه‌كى بيت، دێ كێشێن عيراقێ كووتر لێكه‌ت.
هه‌روه‌سا پێشڤه‌برنا په‌يوه‌نديێن د ناڤبه‌را هه‌رێما كوردستانێ و فاتيكانێ ته‌وه‌ره‌كێ دى يێ وێ كۆمبوونێ بوو.
ئەڤرۆ نیوز،عەلی حاجی
ئێڤاريا دره‌نگ يا ئه‌ڤرۆ ئێكشه‌مبى 10/11/2019 ژئەگەرێ کێشەکا جڤاکی ل تاخێ ئاشتی ل باژێرێ زاخۆ زەلامەک دهێتە کوشتن و ل گورەی رۆهنكرنه‌كا پولیسێن پارێزگەها دهوکێ بکوژ هاتیە ئاشکەرا کرن .
ئەمیر عەلی، بەرپرسێ راگەهاندنا ساخلەمیا زاخۆ بۆ ئەڤرۆ نیوز گوت : ئەو روودان ئەڤرۆ ل تاخێ ئاشتی ل باژێرێ زاخۆ دروست بوو ژ ئەگەرێ کێشەیەکا جڤاکی زەلامەک ٣٢ سالی ب دەستێ کەسەکى هاتە کوشتن كو زێدەتری ١٠ فیشەکێن چەکی لێداين و پشتی تەرمێ وی هاتیە هنارتن بۆ نوشداريا داد دیار بوو هە ر ل جهێ روودانێ گیانێ خوە ژ دەست دایە.
ل گورەی راگەهاندنەکا پولیسێن پارێزگەها دهوکێ، بکوژ يێ هاتیە ئاشکەرا کرن و ل دووڤ بەندێ ٤٠٦ بریارا دەستە سەرکرنێ بۆ کەسێ بکوژ دەرکەڤتیە .
ئه‌ڤرۆ نيوز، نيوار محه‌مه‌د سه‌ليم:
د هه‌يڤا 12 يا ئه‌ڤ ساله دا، ماوێ قانوونى يێ كۆمسيۆنا بلندا سه‌ربه‌خۆيا هه‌لبژارتن و راپرسيێ ل هه‌رێما كوردستانێ دێ ب دووماهى هێت و بۆ ڤێ مه‌ره‌مێ ژى داخوازا چاره‌سه‌ريان ژ حوكمه‌تێ دهێته كرن.
سه‌باح كوره‌چى، ئه‌ندامێ جڤاتا كۆميساران بۆ باسنيوز گۆت: “ب گۆره‌ى وێ قانوونى كۆمسيۆن پێ هاتيه دامه‌زراندن، پێنج سالان جاره‌كێ دڤێت سه‌رۆك و ئه‌ندامێن جڤاتا كۆميساران بهێنه هه‌لبژارتن، كۆمسيۆنێ نها نێزيكى هه‌يڤه‌كێ ل به‌ره و پاشان ماوێ وێ يێ قانوونى دێ ب دووماهى هێت.
روون ژى كر كو ماوه‌كى به‌رى نها ب نڤيسار په‌رله‌مانێ كوردستانێ ئاگه‌هدار كريه كو چاره‌سه‌ريا كێشا قانوونى يا كۆمسيۆنێ بكه‌ن، به‌لێ هه‌تا نها به‌رسڤا نڤيسارا وان نه‌هاتيه دان.
ب گۆره‌ى قانوونێ، رۆژا 23ى كانوونا ئێكێ 2019 دێ ماوێ قانوونى يێ كۆمسيۆنا بلندا سه‌ربه‌خۆيا هه‌لبژارتن و راپرسيێ ل هه‌رێما كوردستانێ ب دووماهى هێت كو پێشتر سه‌رۆك و جڤاتا كۆميساران ب گۆره‌ى رێكه‌فتنه‌كێ د ناڤبه‌را (پارتى، ئێكه‌تى، گۆڕان، ئێكگرتوو و كۆمه‌ل) دا هاتبوو پارڤه‌كرن.
نيشاندان