ئه‌ڤرۆ نيوز:

سه‌ركردێ ره‌وتێ سه‌درى و ليستا سائيرون (موقته‌دا سه‌در) راگه‌هاند، هه‌كه‌ به‌رپرسێن عيراقى دخوازن كوشتن و سوتن روو نه‌ده‌ت، پێدڤيه‌ ده‌ست ژ كارى به‌رده‌ن به‌رى ئه‌م وان ژ كارى دووربێخين.

موقته‌دا سه‌در د پۆسته‌كێ ئه‌لكترونى دا ل تۆرا جڤاكى يا فه‌يسبووكى به‌لاڤكر” هه‌كه‌ ب بۆچوونا هنده‌كان خوه‌نيشادان چاره‌سه‌ر نه‌بيت، مانگرتن و گردبوون چاره‌سه‌ر نه‌بيت، پا بجه هێلانا ده‌ستهه‌لاتێ چاره‌سه‌ره‌؟ د ده‌مه‌كى دا كو ده‌ستهه‌لاتداران ئه‌و شيانه‌ نينن دووماهيێ ب نه‌هامه‌تێن وه‌لاتيان بينن و گه‌نده‌لكاران بنبر بكه‌ن و ژيانه‌كا ئاسووده‌ بۆ وه‌لاتيان دابين بكه‌ن”.

سه‌در داخوازا ده‌ست ژ كاركێشانێ ژ حوكمه‌تێ كر و گۆت” هه‌كه‌ نه‌شێن وێ چه‌ندێ راست بكه‌ن ئه‌وا حوكمه‌تێن پێشتر ژناڤبرى، ده‌ست ژ كار بكێشن”.

گۆت ژى” چو خێره‌ك د ده‌ستهه‌لاتدارێن نوكه‌ و يێن به‌رى وان دا نه‌بوو”.

ئه‌ڤرۆ نيوز:

كۆمسيۆنا مافێن مرۆڤى ل عيراقێ بلندبوونا هژمارا كوشتيان د خوه‌نيشادانێن ئه‌ڤرۆ ل عيراقى د پێكدادانێن د ناڤبه‌را هێزێن ئه‌منى و زێره‌ڤانێن باره‌گه‌هێن حزبى و خوه‌نيشانده‌ران راگه‌هاند.

كۆمسيۆنا ناڤبرى دياركر كو هژمارا كوشتيان گه‌هشتيه‌ 30 كه‌سان كو 8 ل به‌غدا و 9 ل ميسان و 9 ل زيقار و 3 ل به‌سرا و 1 ل موسه‌نا.

هه‌روه‌سا دياركر ژى كو هژمارا برينداران گه‌هشته‌ 2312 كه‌سان ژ هێزێن ئه‌منى و خوه‌نيشانده‌ران كو 1493 كه‌س ل به‌غدا برينداربوون و 90 كه‌س ل زيقار و 151 كه‌س ل موسه‌نا و 301 كه‌س ل به‌سرا و 112 كه‌س ل ديوانيه‌ و 105 كه‌س ل ميسان و 50 كه‌س ل كه‌ربه‌لا و 10 كه‌س ل واست.

ئه‌ڤرۆ نيوز:

ويسام عه‌لياوى كو سه‌ركرده‌كێ ديار يێ ميليشيێن عه‌سائيب ئه‌هلولحه‌قه‌، د خوه‌نيشادانێن ئه‌ڤرۆ ل پارێزگه‌ها ميسان ل باشوورێ عيراقێ وبرايه‌كێ خوه‌ هاتنه‌ كوشتن.

 گرۆپێ عه‌سائب ئه‌هلولحه‌ق د  به‌ياننامه‌كێ دا راگه‌هاند ” هنده‌ك (تێكده‌رێن) د ناڤ خوه‌نيشانده‌رێن پارێزگه‌ها ميسان هێرش كره‌ سه‌ر باره‌گه‌هێ وى گرۆپى و هنده‌ك ژ وان نارنجۆكه‌كا ده‌ستى خسته‌ د ناڤ باره‌گه‌هى ڤه‌، د ئه‌نجامدا ئه‌و سه‌ركردێ گرۆپێ عه‌سائيب ئه‌هلولحه‌ق و برايه‌كێ وى بريندار بوون و هاتنه‌ ڤه‌گوهاستن بۆ نه‌خوه‌شخانێ، به‌لێ وان (تێكده‌ران) كو د رێزا خوه‌نيشانده‌ران دا بوون خوه‌ گه‌هانده‌ نه‌خوه‌شخانێ و ل وێرێ ئه‌و سه‌ركردێ عه‌سائيب ئه‌هلولحه‌ق و برايێ وى كوشتن”.

ل دووڤ كۆمسيۆنا مافێن مرۆڤى ل عيراقێ، د خوه‌نيشادانێن ئه‌ڤرۆ  ل عيراقێ 21 كه‌س هاتينه‌ كوشتن.

ئه‌ڤرۆ نيوز:

سه‌رۆك وه‌زيرێن عيراقێ، عادل عه‌بدولمه‌هدى، ئه‌ڤرۆ ئه‌ينيێ 25/10/2019 راگه‌هاند، دێ رێ ل گه‌نده‌ليێ گرين و به‌رپرسان ژى دێ ئێخينه‌ د بن چاڤدێريا قانوونێ ونابيت گرۆپێن چه‌كدار حزبێن سياسى هه‌بن.

عه‌بدولمه‌هدى گۆت ژى”مووچێ خودان پلێن بلند دێ بۆ نيڤێ كێم كه‌ين، ئاستێ مووچان ژى دێ لێك نێزيك كه‌ين و ب رێيا چه‌ند پرۆژان دێ ده‌ليڤێن كارى دابين كه‌ين و مووچێ 130 هزار دينارى دێ بۆ هه‌ر بێكاره‌كێ مه‌زێخين”.

هه‌روه‌سا گۆت” رێ ب وان كه‌سان ناهێته‌ دان كو په‌يوه‌ندى ب هێزێن ئه‌منى ڤ هه‌ى، حزبان پێكبينن و دڤێت هه‌موو لايه‌نێن كو په‌يوه‌دنى ب پاره‌ و پرۆپاگندان ڤه‌ هه‌ى ئاشكرا بكه‌ن و نابيت گرۆپێن چه‌كدار حزبێن سياسى هه‌بن و دڤێت ئه‌و گرۆپێن چه‌كدارى كو ل ده‌مێ بۆرى ب هه‌ر ئه‌گه‌ره‌كى دروست بووين، چه‌كێن خوه‌ پاڤێژن و ببنه‌ حزبين سياسى يان ژى ببنه‌ پشكه‌ك ژ هێزێن ئه‌منى”.