ئه‌ڤرۆ نيوز:
سه‌رۆكاتيا رۆسيا راگه‌هاند كو هه‌كه چه‌كدارێن كورد ژ وان ده‌ڤه‌ران خوه ڤه‌نه‌كێشن دێ روو ب روويێ هێرشێن توركيا بن و توركيا ژى دێ ژ ناڤ به‌ت.
ديميترى بيسكۆف، ئاخفتنكه‌رێ ب ناڤێ سه‌رۆكاتيا رۆسيا ده‌رباره‌ى ڤه‌كێشانا يه‌په‌گێ ژ وان ده‌ڤه‌رێن رۆسيا رێكه‌فتن ل سه‌ر كرى، راگه‌هاند كو هه‌كه چه‌كدارێن كورد خوه ژ وان ده‌ڤه‌ران ڤه‌نه‌كێشن، دێ روو ب روويێ هێرشێن توركيا بن.
ئاخفتنكه‌رێ ب ناڤێ سه‌رۆكاتيا رۆسيا گۆتژى: “ئه‌مريكا پشتا خوه دا كوردێن سوريا، پالدان كو روو ب روويێ توركيا ببن.
ئه‌ڤرۆ نيوز:
پشتى ديدارا پۆتن و ئه‌ردوگان ل رۆسيا و ته‌مام بوونا ئاگربه‌ستا 120 ده‌مژمێرى يا سوريا، وه‌زاره‌تا به‌ره‌ڤانيا توركيا راگه‌هاند كو ئێدى د ڤێ قووناغێ دا پێدڤى ناكه‌ت ئۆپه‌راسيۆنێن نوو ئه‌نجام بده‌ن.
ئه‌ڤ داخۆيانيێن وه‌زاره‌تا به‌ره‌ڤانيا توركيا د ده‌مه‌كى دانه كو به‌رى ديدارا شه‌ش ده‌مژمێرى يا ئه‌ردوگان ل گه‌ل پۆتن، سه‌رۆك كۆمارێ توركيا راگه‌هاند بوو كو هه‌كه ل دووڤ وان خالێن وان ده‌ست نيشان كرى چێنه‌بوو، ئه‌و دێ گه‌له‌ك ب دژوارتر هێرشێ كه‌نه سه‌ر باكوورێ سوريا.
ئه‌ڤرۆ نيوز:
رێڤه‌به‌ريا گشتى يا سه‌قاناسى و ئه‌ردهه‌ژێ ل هه‌رێما كوردستانێ ره‌وشا سه‌قايێ ئه‌ڤرۆ و سوبه‌هى به‌لاڤكر و كو تێدا ديار دبيت كو ئه‌سمان دێ ئه‌ور بن.
ب گۆره‌ى نڤيساره‌كا پشكا پێشبينيان ل رێڤه‌به‌ريا گشتى يا سه‌قاناسى و ئه‌ردهه‌ژێ ل هه‌رێما كوردستانێ كو دانه‌ك ب ده‌ست ئه‌ڤرۆ نيوز كه‌فتيه، تێدا هاتيه كو ئه‌ڤرۆ رۆژا چارشه‌مبى رێكه‌فتى 23ى چريا ئێكێ 2019 ئه‌سمان دێ ئه‌وره‌كێ ناڤه‌ندى بيت. پلێن گه‌رمێ ژى دێ د ناڤبه‌را 15 بۆ 26 پله‌يان دا بيت.
هه‌ر ب گۆره‌ى وێ نڤيسارێ سوبه‌هى رۆژا پێنجشه‌مبى رێكه‌فتى 24ى چريا ئێكێ 2019ێ ژى دهێته پێشبينيكرن كو ئه‌سمان ساهى و ئه‌وره‌كێ كێم بيت ل هنده‌ك ئه‌ردان ئه‌و ئه‌ور دێ زێده‌تر بن. پلێن گه‌رمێ ژى دێ د ناڤبه‌را 16 بۆ 27 پلان دا بن.
ئه‌ڤرۆ نيوز:
لژنا دووڤچوونا بازارى ل قايمقاميا قه‌زا دهۆكێ ئه‌ڤرۆ سێشه‌مبى 22/10/2019 سه‌ره‌دانا هژماره‌كا ماركت و خوارنگه‌هان ل سه‌نته‌رێ باژيرێ دهۆكێ كر و ژبه‌ر پێگيرى نه‌كرنێ ب رێنمايێن لژنێ هنده‌ك ژ وان جهان هاتنه سزادان.
عادل ئه‌نوه‌ر، ئه‌ندامێ لژنا دووڤچوونا بازارى، ل دووڤ به‌رپه‌رێ قايمقاميا قه‌زا دهۆكێ ل سه‌ر تۆرا جڤاكى يا فه‌يسبووكى، دياركر پشتى ئه‌ڤرۆ دووڤچوونا هژماره‌كا جهێن فرۆتنا چه‌ره‌زاتان و ماركت و خوارنگه‌هان هايته كرن، بريارا سزادانا ڤان جهان هاته دان:
1- چه‌ره‌زاتێن ئازاد ب گۆژمێ 750 هزار ديناران هاته سزادان، ژ به‌ر هه‌بوونا چكلێتێن ئكسپاير و چه‌ره‌زاتێن خراب.
2- كافيتيريا كه‌ندال ب گۆژمێ 300 هزار ديناران هاته سزادان ژ به‌ر پێگيرى نه‌كرنێ ب رێنمايان.
3- خوارنگه‌ها محه‌مه‌د سيارى ب گۆژمێ 300 هزار ديناران هاته سزادان ژ به‌ر پێگيرى نه‌كرنێ ب رێنمايان.
4- چه‌ره‌زاتێن نه‌وزاد ب گۆژمێ 100 هزار ديناران هاته سزادان ژ به‌ر پێگيرى نه‌كرنێ ب رێنمايێن لژنێ و هه‌بوونا كه‌ره‌ستێن ئكسپاير.
بۆ گه‌هاندنا گازنده‌يان بۆ لژنا دووڤچوونا بازارى، وه‌لاتى دشێن په‌يوه‌نديێ ب هژمارا (07501612622) بكه‌ن.
ئه‌ڤرۆ نيوز:
ئه‌ڤ شه‌ڤه ته‌رمێ هه‌لبه‌ستڤانێ ناڤدار يێ پارێزگه‌ها سلێمانيێ( محه‌مه‌د عومه‌ر عوسمان) يێ به‌رنياس ب جه‌نه‌رالێ پايز ل باژێرێ سلێمانيێ هاته ديتن.
په‌يڤدارێ پۆليسێن سلێمانيێ ل سه‌ر زارێ برايێ هه‌لبه‌ستڤانێ ناڤبرى بۆ كوردستان 24 گۆت” به‌رى دو ده‌م هژمێران ته‌رمى هه‌لبه‌ستڤانى د مالا وى دا هاته ديتن”.
گۆت ژى” ناڤبرى خوه ب پانكا ژۆره‌كا مالا خوه هه‌لاويستبوو و ته‌رمى وى ب خه‌ندقاندى هاته ديتن”.
ل دۆر ئه‌گه‌رێن خوه خه‌ندقاندنا وى چو پێزانين نه‌هاتنه به‌لاڤكرن وپۆليسان ده‌ست ب ڤه‌كۆلينێ كريه.
ئەڤرۆ نیوز، هەرهین محەمەد
سترانبێژی گەنج نزاركوچەر بۆ ئەڤرۆ نیوز دیاركر كو نوكە ئەو مژوولی سترانەكا دو قولی یە ل گەل هونەرمەند شڤان پەروەر ب ناڤێ (هەوارە ل دنیایێ ) كو ژ پەیڤ و ئاوازێن وەلید یوسڤی نه و ل ستودیویا و مۆزیك زەمان هاتیە توماركرن و میكس و ماسترینگ فیراس لحسێنی و وێنەكرن زاخو گرۆپ و دەرهێنان شڤان و نوكە د قوناغا مونتاژێ دایە و ژڤانە ل دەمەكێ نێزیك بهێتە به‌لاڤكرن.
نزاری زێدەتر گۆت: ناڤەروكا ڤێ سترانێ ل سەر هەرچار پارچێن كوردستانێ یە ب تایبەت ل سەر رۆژئاڤایە و بۆ دەمەكی شڤان نەیێ دیاربوو ئەز گازی دكەمێ شڤانو دەنگێ تە ناهێت و هوزان و هەوارە ل دونیایێ و بەحسێ رۆژئاڤا و كوشتنا زارۆیان دكەت و ئەو زولما ل كوردان دهێتەكرن و هزرا ڤێ سترانی یا ماموستا وەلید یوسڤی يە وسوپاسیەكا تایبەت بۆ زاخو گروپ و هەروەسان سەندیكا هونەرمەندان ل زاخو.
ئه‌ڤرۆ نيوز:
به‌رپرسێ فه‌رمانگه‌ها په‌يوه‌نديێن ده‌رڤه يێن حوكمه‌تا هه‌رێما كوردستانێ، سه‌فين دزه‌يى، راگه‌هاند، خوه‌نيشاندانێن عيراقێ بوونه ئه‌گه‌ر كو حوكمه‌تا عيراقێ ل شوونا چاره‌سه‌ركرنا كێشێن د ناڤبه‌را هه‌ولێرێ و به‌غدا، نوكه مژوولى چاره‌سه‌ركرنا كێشه و داخوازيێن خوه‌نيشانده‌رايه.
سه‌فين دزه‌يى گۆت ژى” حوكمه‌تا هه‌رێما كوردستانێ پشته‌ڤانيا تمام ل كابينا عادل عه‌بدولمه‌هدى دكه‌ت و يا به‌رهه‌ڤه بۆ چاره‌سه‌ركرنا كێشان ژى ل گه‌ل به‌غدا”.
ئه‌ڤرۆ نيوز:
د كۆنفرانسه‌كێ رۆژنامه‌ڤانى دا ل كابۆل پايته‌ختێ ئه‌فغانستان، مارك ئيسپه‌ر وه‌زيرێ به‌رگريێ ئه‌مريكا، هه‌لويستێ وه‌لاتێ خوه ل دۆر ره‌وشا نوكه يا ده‌ڤه‌رێ ئاشكراكر.
وه‌زيرێ به‌رگريێ ئه‌مريكى گۆت” ئه‌مريكا ب شێوه‌كێ جودا ژ سووريێ سه‌حدكه‌ته ئه‌فغانستانێ” گۆت ژى” پرۆسا ڤه‌كێشانا هێزێن ئه‌مريكى ژ سووريێ دێ د ده‌مێ چه‌ند حه‌فتيه‌كا دا ب دووماهى هێت و ژبه‌ر شه‌رێ توركيا و كوردان هێزێن ئه‌مريكى هاتينه ڤه‌كێشان”.
ئاماژه كر ژى” هێزێن ئه‌مريكى ل وان ده‌ڤه‌ران ل سووريێ يێن په‌ترۆل لێ هه‌ى و ئه‌م كونترۆلا ئه‌سمانێ سووريێ ژى دكه‌ين”.
هه‌روه‌سا گۆت” ئه‌مريكا دێ بزاڤا چاره‌سه‌ريا كێشا توركيا و كوردان ده‌ت و دێ ل شه‌رێ دژى تيرۆرێ ژى به‌رده‌وام بين”.
ئه‌ڤرۆ نيوز:
په‌يڤدارێ وه‌زاره‌تا چاندنێ و ژێده‌رێن ئاڤێ ل هه‌رێما كوردستانێ راگه‌هاند، ژبۆ گران نه‌بوونا بهايان و هه‌ڤسه‌نگيا بازارى، دێ باج ل سه‌ر چه‌ند جۆرێن فێقىو كه‌سكاتيێ هێته راكرن.
حسێن حه‌مه كه‌ريم، په‌يڤدارێ وه‌زاره‌تا چاندنێ و ژێده‌رێن ئاڤێ گۆت” ل رۆژا 1/11/2019 و وێڤه وه‌زاره‌تا چاندنێ دێ باجێ ل سه‌ر هه‌ر ئێك ژ به‌رهه‌مێن (باجان، پتات، باجان ره‌شك، باميا، شتى و گول به‌رۆژ) راكه‌ت”.
گۆت ژى” دێ كار ب ڤێ بريارێ هێته كرن تاكو دوباره وه‌رزێ پێگه‌هه‌شتنا ڤان به‌رهه‌مان ل هه‌رێما كوردستانێ دهێت”.
گۆت ژى” ئه‌ڤ بريارا وه‌زاره‌تا چاندنێ بۆ پركرنا پێدڤيا بازارى يه و گران نه‌بوونا بهايێن ڤان به‌رهه‌مان ل بازارێن هه‌رێما كوردستانێ”.
ئه‌ڤرۆ نيوز:
ئه‌ڤرۆ د ياريێن گه‌را چارێ ژ خۆلا پلا ناياب يا عيراقى و پشتى سێ دوراندنان، يانا زاخۆ خاله‌ك ب ده‌ستڤه‌ئينا پشتى ب ئه‌نجامێ 1-1 ل گه‌ل يانا هه‌ولێرێ ل ياريگه‌ها وێ وه‌كهه‌ڤ بووى.
يانا زاخو ب خاله‌كێ ل رێزا 19 و به‌رى دووماهيێ د رێزبه‌ندا خۆلا عيراقێ دهێت و يانا هه‌ولێر ب 3 خالا ل رێزا 12 دهێت كو سێ يارى ئه‌نجامداينه و هه‌ر سێ يارى ب وه‌كهه‌ڤيێ ب دووماهى هاتينه.
نيشاندان