ئه‌ڤرۆ نيوز:

شاندەكێ‌ پارێزگەها دهوكێ‌ كو پێكهاتیە ژ  اسماعیل محمد احمد هاریكارێ‌ پارێزگەرێ‌ دهوكێ‌ بۆ كاروبارێن ئاوارە و پەنابەران و  ادریس نبی رێڤەبەرێ‌ جێ‌ بە جێ‌ كارێ‌ بوردێ‌ كاروبارێن مروڤایەتی پشكداری د كونگرێ‌ سالانە یێ‌ رابیتا ئاڤاكرنا شیانێن حوكمه‌تێن نافخویی یا هولەندی د بەرنامێ‌ (دەستپێشخەریا ئاشتیێ‌)دا ئەوێ‌ دەستپێكری ل 11/11/2019 ل وەلاتێ‌ ژێریا ئەفریقیا دكەت.
باژێرێ‌ دهوكێ‌ ژی كو ژلایێ‌ رێكخراوا باژێرڤانێن حكومی یا هولەندی (VNG) هاتیە هەلبژارتن دگەل دەهان باژێرێن دی یێن جیهانێ‌ ژبۆ پشكداریێ‌ دڤێ‌ پێشبركیێ‌ دا بۆ بدەستڤەئینانا خەلاتێ‌ باژێرێ‌ ئاشتیێ‌، ئەو خەلاتێ‌ كو سالانە دهێتە پێشكێشكرن بۆ باژێرلاەكی ل سەرانسەری جیهانێ‌ ، باژێرێ‌ دهوكێ‌ كو دهێتە نیاسین باژێرێ‌ پێكڤەژیانیە شیایە د ماوێ‌ چەند سالێن بوری دا ب سەدان هزاران ژ ئاوارە و پەنابەران ژ هەموو  پێكهات و نەتەوە و ئاین و ئولان دسنورێ‌ پارێزگەهێ‌ دا ئاكنجی بكەت و ب رێكا بوردێ‌ كاروبارێن مروڤایەتی (BRHA) خزمەتێن مەزن پێشكشێی ئاوارە و پەنابەرو خەلكێ‌ خوجهی بكەت و ئاشتی و پێكڤەژیانێ‌ ب پارێزیت و پێشڤە ببەت ب رێیا چەندین چالاكیێن جورا و جور یێن مروڤایەتی و روشنبیری و هونەری و وەرزشی و چەندین چالاكیێن بوارێن ژیانێ‌ ب هەماهەنگی دگەل دەزگەهێن حكومی و ئێمناهیێ‌ و مروڤایەتی ل پارێزگەها دهوكێ‌ .
ئەڤ كونگرێ‌ سالانە یێ‌ كو دهێتە ئەنجامدان ب پشتەڤانیا رابیتا ئاڤاكرنا شیانێن حكومەتێن نافخویی (Local Government Capacity Program LGCP) ل وەلاتێ‌ ژێریا ئەفریقیا ، باژێرێ‌ دهوكێ‌ بۆ جارا ئێكێ‌ یە پشكداریێ‌ تێدا دكەت و هاتیە هەلبژارتن و شیایە حەتانوكە ببیتە ئێك ژ باشترین (5) باژێرێن جیهانی دناڤبەرا زێدەتر ژ (35) باژێران لسەرانسەری جیهانێ‌، و پێشبینی دهێتە كرن كو باژێرێ‌ دهوكێ‌ خەلاتێ‌ ئێكێ‌ وەربگریت وەك باژێرێ‌ باژێرێ‌ ئاشتیێ‌ لسەرانسەری جیهانێ‌ .

ئه‌ڤرۆ نيوز، نيوار محه‌مه‌د سه‌ليم:

دوهى رۆژا سێشه‌مبى ل هه‌ولێرا پايته‌خت سه‌رۆكاتيێن جڤاتێن پارێزگه‌هان ل گه‌ل مه‌سرور بارزانى سه‌رۆكێ جڤاتا وه‌زيرێن هه‌رێما كوردستانێ كۆمبوو و سه‌ره‌رايى داخوازا راستڤه‌كرنا قانوونا ژماره‌ (3)، جڤاتا پارێزگه‌ها دهۆكێ داخوازا باشتركرنا ره‌وشا كاره‌بێ ل پارێزگه‌ها دهۆكێ كر.

د گۆره‌يى نڤيساره‌كا جڤاتا وه‌زيران كو دانه‌ك ب ده‌ست ئه‌ڤرۆ نيوز كه‌فتيه‌ تێدا ته‌كست ل سه‌ر گرنگيا رۆلێ چاڤدێريێ يێ جڤاتێن پارێزگه‌ها ل سه‌ر دامه‌زراوێن حوكمه‌تا هه‌رێما كوردستانێ د چارچۆڤێ سنورێ پارێزگه‌هان دا كر. هه‌رديسا ئاماژه‌ ب گرنگيا رۆلێ جڤاتێن پارێزگه‌هان د بجهئينانا كارناما حوكمه‌تێ و ب تايبه‌ت ژى د بجهئينانا به‌رنامێ چاكسازى و دامه‌زراوه‌يكرن و رێكخستنا داهات و خه‌رجيان ب ره‌نگه‌كى كو هه‌ڤسه‌نگيێ ل به‌رچاڤ بگرن.

ئاشكه‌را ژى كريه‌ كو سه‌رۆكێ حوكمه‌تێ داخواز ژ سه‌رۆكاتيێن جڤاتێن پارێزگه‌هان كر كو هاريكاريا حوكمه‌تێ بكه‌ن د بجهئينانا پرۆژێن وان دا د چارچۆڤێ سياسه‌تا گشتى و ب ئاراسته‌كرنا نه‌هێلانا رۆتين و ئاسانكاريكرنێ د ب رێڤه‌برنا مامه‌له‌يێن وه‌لاتيان دا.

دايه‌ زانين ژى كو سه‌رۆكێ حوكمه‌تا هه‌رێما كوردستانێ ته‌كست ل سه‌ر وێ چه‌ندێ كر كو فه‌رمانبه‌رێن حوكمه‌تێ ژ سه‌رۆكێ حوكمه‌تێ و وه‌زيران هه‌تا بچووكترين فه‌رمانبه‌ر د ده‌زگه‌هێن حوكمه‌تێ دا، ئه‌ركێ وان خزمه‌تكرنا وه‌لاتيێن هه‌رێما كوردستانێ يه‌ بێ جوداهى، د هه‌مان ده‌م دا پێدڤيه‌ مافێن فه‌رمانبه‌ران ژى ل به‌رچاڤ بهێنه‌ وه‌رگرتن. گۆتژى كو پێدڤيه‌ كار بكه‌ن دا ژ كۆمه‌لگه‌هه‌كا بكارئينه‌ر بكه‌ينه‌ به‌رهه‌مئينه‌ر.

ژ لايێ خوه‌ ڤه‌، فه‌هيم عه‌بدولا حه‌مۆ، سه‌رۆكێ جڤاتا پارێزگه‌ها دهۆكێ د داخۆيانيه‌كێ دا بۆ ئه‌ڤرۆ نيوز به‌حس ل كۆمبوونا ل گه‌ل سه‌رۆكاتيا جڤاتا وه‌زيران كر و دا زانين كو سه‌ره‌رايى داخوازيێن راستڤه‌كرنا قانوونا ژماره‌ (3) ئه‌وان داخوازا خزمه‌تگۆزاريان ب ره‌نگه‌كێ گشتى بۆ پارێزگه‌ها دهۆكێ كر و ب تايبه‌ت ژى بابه‌تێ كاره‌بێ كو ره‌وشا كاره‌بێ يا پارێزگه‌ها دهۆكێ باشتر لێ بهێت و هه‌ڤسه‌نگيه‌ك د ناڤبه‌را پارێزگه‌هێن هه‌رێمێ دا هه‌بيت.

سه‌رۆكێ جڤاتا پارێزگه‌ها دهۆكێ دا زانين ژى كو سه‌رۆكێ حوكمه‌تێ ئاگه‌هدار كرن كو كار ب رژدى يێ ل سه‌ر وێ كێشێ دهێته‌ كرن و وه‌زيرێ كاره‌بێ ب خوه‌ ژى كار ل سه‌ر دكه‌ت و خه‌لكێ دهۆكێ يه‌ و كێم ته‌رخه‌ميێ د ڤى وارى دا ناكه‌ت.