ئه‌ڤرۆ نيوز:
جوتيار عادل، په‌يڤدارێ حوكمه‌تا هه‌رێما كوردستانێ راگه‌هاند، ب هه‌لكه‌فتا ژ دايكبوونا پێغمبه‌رێ ئيسلامێ محه‌مه‌د، پيرۆزباهيێ ل هه‌موو موسلمانێن كوردستانێ و عيراقێ و جيهانێ دكه‌ين و ب ڤێ هه‌لكه‌فتێ رادگه‌هينين كو رۆژا شه‌مبيێ 9/11/2019 بهێنڤه‌دانا فه‌رمى يه”.
گۆت ژى” ل رۆژا ئێكشه‌مبى 10/11/2019 ل هه‌موو داموده‌زگه‌هێن حوكمه‌تێ ده‌واما فه‌رمى يه”.
مه‌سرور بارزانى گۆت ژى” سه‌رۆكايه‌تيا حوكمه‌تێ وه‌كو ئه‌رك و ئه‌مانه‌ت من وه‌رگرتيه نه‌كو بۆ ده‌ستكه‌فتێ كه‌سايه‌تى”.
هه‌روه‌سا راگه‌هاند” دژى گه‌نده‌ليێ مه و ب هه‌موو شيانين خوه دێ بزاڤا بنبركرنا وێ كه‌م”.
سه‌باره‌ت كۆمپانێن په‌ترۆلێ و غازێ راگه‌هاند” حوكمه‌ت دێ كۆمپانيان نه‌چار كه‌ت ژينگه‌هێ بپارێزن و پێدڤيه وه‌لاتيان ژى رۆل هه‌بيت”.
ل دۆر كه‌رتێ وه‌به‌رئينانێ ژى، سه‌رۆكێ حوكمه‌تێ گۆت” هه‌موو بزاڤان دێ كه‌ين بۆ راكێشانا وه‌به‌رهێنه‌رێن بيانى، د هه‌مان ده‌م دا وه‌به‌رئێنه‌رێن ناڤخوه ژى ب هێز بكه‌ين”.
خوياكر ژى” ژ نوكه و وێڤه دڤێت حوكمه‌ت بريارێ بده‌ت چ پرۆژه‌كێ پێدڤيه نه‌كو وه‌به‌رئێنه‌ر ب خوه ب دلێ خوه برۆژان ئه‌نجام بده‌ت”.
ئه‌ڤرۆ، نیوار محه‌مه‌د سه‌لیم:
جڤاتا پارێزگه‌ها دهۆكێ هنده‌ك رێنمایێن تایبه‌ت بۆ ب كرێ گرتنا فرۆشگه‌هێن قوتابخانان ده‌ركرن و ئاشكه‌را كریه كو بۆ سالا نوو یا خواندنێ 2019-2020 كار پێ بهێته كرن.
جمبه‌د شوكری، سه‌رۆكا لژنا په‌روه‌رده و خواندن و ئه‌وقاف و كاروبارێن ئاینی ل جڤاتا پارێزگه‌ها دهۆكێ د داخۆیانیه‌كێ دا بۆ رۆژناما ئه‌ڤرۆ دیاركر كو ب مه‌ره‌ما به‌رژه‌وه‌ندیا گشتی و ل دووڤ بڕگا (8) یا ماددێ (6) ژ قانوونا ژماره (3) یا سالا (2009) و ژ پێخه‌مه‌ت رێكخستن و باشتركرنا كارێ ب رێڤه‌برنا فرۆشگه‌هێن قوتابخانان و پاراستنا ساخله‌میا قوتابیان چه‌ندین رێنمایێن تایبه‌ت ب كرێكرنا فرۆشگه‌هێن قوتابخانان ده‌ركرن.
ب گۆره‌ی نڤیساره‌كا جڤاتا پارێزگه‌ها دهۆكێ كو دانه‌ك ب ده‌ست رۆژناما ئه‌ڤرۆ كه‌فتیه چه‌ندین رێنمایێن تایبه‌ت بۆ ب كرێكرنا فرۆشگه‌هێن قوتابخانان ده‌ركرینه.
ب گۆره‌یی ڤان رێنمایان، پێدڤیه كارێ سه‌رزێده‌كرنا ئاشكه‌را بۆ كرێكرنا فرۆشگه‌هێن قوتابخان ل دووڤ قانوونا ژماره (32) یا سالا (1986)ێ بهێته كرن و ژبلی ڤێ قانوونێ چ رێ بۆ كرێكرنا فرۆشگه‌هێن قوتابخانا نه‌هێنه كرن و رێڤه‌به‌رێ قوتابخانێ ئه‌ندامێ لژنا خه‌ملاندنا كریا فرۆشگه‌هان بیت. دیسا بجهئینانا خالا ئێكێ ژ ئیمزاكرنا گرێبه‌ستا هه‌تا 1ی ته‌باخێ ل هه‌موو سالان بهێته بجهئینان.
هه‌ر د ڤان رێنمایان دا هاتیه كو هه‌رسال پشتی ب دووماهی هاتنا سالا خواندنێ و ب پشكداریا لایه‌نێن په‌یوه‌ندیدار و ل گه‌ل لژنا په‌روره‌ده و فێركرنێ ل جڤاتا پارێزگه‌ها دهۆكێ پێشنیازێن نوو بهێنه بلندكرن بۆ وه‌زاره‌تێ دا كو ئاشنا بیت ب تایبه‌تمه‌ندیا پارێزگه‌ها دهۆكێ به‌ری یێن دی ده‌ركه‌ڤن.
هه‌ر د وێ نڤیسارێ دا ئاماژه ب وێ چه‌ندێ ژی كریه كو هه‌كه ل سه‌ر كه‌سه‌كی دیار ببیت كو فرۆشگه‌هـ یا فرۆتیه كه‌سه‌كێ دی، رێكارێن قانوونی بهێنه وه‌رگرتن و فرۆشگه‌هـ ژێ بهێته وه‌رگرتن و دوسالان ماف نه‌بیت پشكداریێ د ته‌نده‌ران دا بكه‌ت. داخواز ژی كریه كو هه‌ر كه‌سێ ته‌نده‌ر بۆ دكه‌ڤیت ژی پێدڤیه پشته‌ڤانیا ده‌زگه‌هێن ئه‌منی ل گه‌ل خوه ببه‌ت.
دایه زانین ژی كو دڤێت پتر راگه‌هاندن بۆ سه‌رزێده‌كرنێن فرۆشگه‌هان بهێته كرن و د پتر ژ ده‌زگه‌هه‌كێ راگه‌هاندنێ دا بهێنه به‌لاڤكرن دا كو ئه‌وێن حه‌ز هه‌یین پشكدار ببن زووتر بهێنه ئاگه‌هدار كرن.
ته‌كست ل سه‌ر وێ چه‌ندێ ژی هاتیه كرن كو ئه‌ڤ رێنمایه ل جهێن دیار بهێنه هه‌لاویستن دا كو بۆ قوتابیان روون و ئاشكه‌را بیت. دایه دیاركرن ژی كو بۆ سالا خواندنێ یا 2019- 2020 دێ كار پێ هێته كرن.
جمبه‌د شوكری، سه‌رۆكا لژنا په‌روه‌رده و خواندن و ئه‌وقاف و كاروبارێن ئاینی ل جڤاتا پارێزگه‌ها دهۆكێ، داخواز ژ په‌روه‌رده‌یێن پارێزگه‌ها دهۆكێ كر كو پێگریێ ب ڤان رێنمایان بكه‌ن ژ بۆ به‌رژه‌وه‌ندیا گشتی و قوتابیان.
ئه‌ڤرۆ نيوز:
قه‌ده‌غه‌يا هاتنوچوونێ ل به‌غدا هاته راكرن و خوه‌نيشانده‌ر ژى بزاڤا ده‌ربازبوونێ ژ پرا ئه‌حرار يا كۆمارى دده‌ن.
ب فه‌رمانا قه‌يس محه‌مه‌داوى، فه‌رماندێ ئۆپه‌راسيۆنێن به‌غدا، قه‌ده‌غه‌يا هاتنوچوونێ ل هه‌موو ده‌ڤه‌رێن باژێرى هاته هه‌لبژارتن، هه‌رچه‌نده قه‌ده‌غه‌يێ كار ل سه‌ر به‌رفره‌هكرنا خوه‌نيشاندانان نه‌كريه.
هه‌ڤده‌م ژماره‌كا زۆر يا خوه‌نيشانده‌ران بزاڤا ده‌ربازبوونێ ژ هه‌ردو پرێن ئه‌حرار و كۆمارى دا به‌ر ب ده‌ڤه‌را كه‌سك، بولێ هێزێن ئه‌منى روو ب روويێ وان بوون و ژ ئه‌گه‌رێ گازا رۆندكرێژ خوه‌نيشانده‌ره‌كى گيانێ خوه ژ ده‌ست دا و ژماره‌ك ژێ تووشى بهێن ته‌نگيێ بووينه.
ئەڤرۆ نیوز،عەلی حاجی :
رێڤەبەرێ ناحیا دەرکارێ د داخویانیەکێ دا بۆ ئەڤرۆ نیوز دیار کر ماوەیێ حەفتیەکێ یە لوفێن شه‌رانشێ ژلایێ کەرتێ تایبەت ڤە دهێتە سەخبێریکرن و پێدڤی ییە جاددەیێن گوندان ژی بهێنە سەخبێریکرن ژبەر کو هاولاتی گازندەیان ل سەر خرابیا رێکێن گوندێن خوە دکەن .
زێدەتر زێرەڤان موسا گوت : پشتی حکومەتا هەرێما کوردستانێ ١٠ ملیار دینار بۆ وان رێکێن ژئەگەرێ لافاو و بارانێن زور ژناڤ چووین یان ژی زیان ڤێ گەهشتین تەرخان کرین،چەپێن شه‌رانشێ ئێک ژ وان رێکێن سەرەکی یە ژئەگەرێ بارانێن زور ل سالا بوری توشی زیانان بوی،ب رێیا رێڤەبەریا گشتی یا رێک و پران ل پارێزگەها دهوکێ کومژمێ زێدەتری ٨١ ملیون دیناران تەرخان کرینە بۆ سەخبێریکرنا وێ رێیا سەرەکی و پارەیێ تەرخان کری دێ بتمیتە دوو پشک و و پشکەک هاتیە وەرگرتن و د دەمەکێ نێزیک دا پشکا دووێ ژی دێ هێتە وەرگرتن و نوکە دا سەخبێریکرنا وێ رێکێ بۆ ماوەیێ حەفتیەکێ دەست پێکری یە و ژلایێ وەبەرهێنەرەکێ ڤە کار ل سەر وێ جاددەیێ دهێتە کرن و بریارە د دەمەکێ کورت دا سەخبێریکرنا وێ ب دوماهی بهێت،هەلە ئەو جاددەیە ب ئێکجاری هاتبایە دروست کرن دا باشتر بیت بەلێ ژئەگەرێ قەیرانا دارایی دشیان دا نینە ئەو جاددەیە ب ئێکجاری بهێتە دروست کرن.
ناڤهاتی گوت ژی : ژبەر خرابیا رێکێن گوندان گەلەک جاران هاولاتی گازندەیان دکەن لەورا هەکە جاددەیێن لایێ راستێ و چەپێ ل نێزیک زالگەها شەرانشێ ژی هاتبانە سەخبێریکرن ئێدی دا رێیا هاتن و چوونا هاولاتیان و گەشتیاران ژی خوەش بیت .
ئه‌ڤرۆ نيوز:
نوونه‌راتيا نه‌ته‌وێن ئێكگرتى ل عيراقێ راگه‌هاند كو ژ 25ى چريا ئێكێ و هه‌تا نها ژ ئه‌گه‌رێ خوه‌نيشاندانان 97 كه‌سان گيانێ خوه ژ ده‌ست دايه.
د به‌لاڤكريه‌كا خوه دا، نه‌ته‌وێن ئێكگرتى ئيدانا كوشتنا ڤان كه‌سان ژى كر و دا زانين ژى كو وه‌كو هه‌ڤبه‌ركى ل گه‌ل ده‌ستپێكا خوه‌نيشاندانان سه‌ره‌ده‌ريا هێزێن ئه‌منى ل گه‌ل وان به‌ر ب باشتر چوويه.
جینین هینیس بلاسخارت ته‌كستێ ل سه‌ر وێ چه‌ندێ ژى دكه‌ت كو پێدڤيه رێيێن ب له‌ز بگرنه به‌ر دا رێ ل هه‌مبه‌ر ڤان تۆندوتيژيێن د ناڤ خوه‌نيشانده‌ران دا بگرن و هيڤى خواست كو له‌ز د بجهئينانا داخوازيێن خوه‌نيشانده‌ران دا بهێته كرن.
ئه‌ڤرۆ نیوز:
ژێده‌ره‌كى ژ وه‌زاره‌تا دارایى و ئابوورى ل هه‌رێما كوردستانێ ژڤانێ ده‌ستپێكرن ب به‌لاڤكرنا مووچێ هه‌یڤا هه‌شت یێ فه‌رمانبه‌رێن هه‌رێمێ دیاركر.
وى ژێده‌رى زێده‌تر بۆ باسنیوز گۆت” چو گرفت د به‌لاڤكرنا مووچێ فه‌رمانبه‌رێن هه‌رێما كوردستانێ دا نینه و بریاره رۆژا پێنجشه‌مبى 7/11/2019 ده‌ست ب به‌لاڤكرنا مووچێ هه‌یڤا 8 بهێته كرن”.
ل دووڤ پێزانینان ل رۆژا پێنجشه‌مبى دێ مووچێ پشكه‌ك ژ هێزێن وه‌زاره‌تا پێشمه‌رگه هێته به‌لاڤكرن.
ئەڤرۆ نیۆز، رێوار محەمەد رەشید:
فیستەڤالا دانیکا یا دویێ دێ ل رۆژا ئەینی 8/11/2019 ل دەمژمێر 2:00 نیڤرۆ ل کانیا قەشیلۆ ل ناحیا بامەرنێ یا سەر ب قەزا ئامێدیێ ڤە هێتە گێڕان، سەرپەرشتێ فیستەڤالا ناڤهاتی ژی دیار کر هەر کەسەکێ حەز هەبیت دشێت پشکداریێ د ڤێ فیستەڤالێ دا بکەت.
دلشاد ئەحمەد بامەرنی، سەرپەرشێ فیستەڤالا دانیکا یا دویێ بۆ ئەڤرۆ نیوز دیار کر کو دەستپێشخەریا فیستەڤالا دانیکا ل ناحیا بامەرنێ یا وی بوو و فیستەڤالا ئێکێ یا دانیکا ژ لایێ لژنا سەرپەرشت ڤە ب شێوەیەکێ سەرکەفتیانە ل ناحیا بامەرنێ هاتبوو گێڕان و ئەڤ سالە ژی ل رۆژا ئەیینی دێ فیستەڤالا دویێ یا دانیکا ل هەمان جه هێتە گێڕان و گۆت: “مە دڤێت ب رێیا گێڕانا ڤێ فیستەڤالێ پەیوەندیێن جڤاکی خورتر لێ بهێن و کەلتۆرێ خوە یێ کوردی ژی نوو بکەین و چێکرنا دانیکا هەر د ناڤ مللەتێ مەدا بمینیت، چونکو بەری نوکە گەلەک تشت د ناڤ ژیانا کوردەواریێ دا دهاتنە ئەنجامدان، بەلێ نوکە ئەو تشت نەماینە و ناهێنە ئەنجامدان ژ بەر هەر ئەگەرەکێ هەبیت”.
ناڤهاتی ئاماژە دا وێ چەندێ کو د ژیانا بەرێ یا کوردەواریێ دا دانیک ئێک ژ وان بەرهەمان بوو کو گەلەک خوارن بۆ خەلکی ژێ دهاتە دروستکرن وەکو (ساڤار، دانهێرک، دانقۆت، سمیتک) سەرەرایی ڤێ چەندێ دەمێ دانیک دهاتنە چێکرن خەلکی کەیف پێ دبر و گۆت: “ئەڤ فیستەڤالە دێ یا تایبەت بیت ب چێکرنا دانیکا ڤە بۆ وێ چەندێ خەلک دەمێن خوەش د ناڤ دا ببوورینیت و رەنگە برگەکا هونەری ژی د ناڤ فیستەڤالێ دا بهێتە ئەنجامدان و سەرەرایی ڤێ چەندێ د ناڤ هەمان فیستەڤال دا جهەکێ تایبەت بۆ جۆتیارێن دەڤەرێ هاتیە تەرخانکرن و دشێن بەرهەمێ خوە وەکو گیز و باهیڤ و مێویژان لێ ب فرۆشن”.
ئه‌ڤرۆ نیوز:
لیژنا هەفپشک یا دووڤچوونا بازاری ل قایمقامیا قەزا دهوکێ ئەڤرۆ سێشه‌مبى 5/11/2019 دووڤچوونا هژمارەکا نڤێسنگەهێن فروتنا بەرهەمێن ئاژەلی ومارکت ونانپێژیا ل سەنتەرێ باژێرێ دهۆکێ کر.
عادل ئەنوەر، ئەندامێ لیژنا دووڤچوونا بازاری، ل دووڤ به‌په‌رێ قایمقامیا قه‌زا دهۆكێ ل سه‌ر فه‌یسبووكى، دیارکر” دڤێ سه ردانێ دا۹٥۰ كارتونێن هێكێن مريشكا یێن بيانى هاتنه دەستەسەرکرن ،كو ب شێویەکێ نه دورست هاتبوونە عومباراکرن وبوويه ئه گەرێ وێ چەندێ (فطريات) ل سه ر هێكێ شين ببن، كو ئەڤ هێكە د ناڤ بازارى دا بەلاف بووينە ول چه ندين جهان هاتينه ديتن و چه ندين نموونه ژێ هاتنه ره وانه كرن بۆ تاقيگه هێ ب مه‌ره‌ما دلنيابون ل سه ر ئه نجامان”.
عادلى خویا كر ژى” نانپيژيا نيولاند 2 هاته داخستن ژبه ر نه بوونا مۆله تا ساخلەمیێ، هه‌روه‌سا ماركت (محه‌مه‌د) ب گۆژمه‌كێ پاه‌ى هاته سزادان ژبه‌ر هه‌بوونا چه‌ندین كه‌ره‌ستێن ئكسپایر”.
نيشاندان