ئه‌ڤرۆ نيوز:
پشتى چه‌ندين سالان هه‌رێما كوردستانێ بودجا خه‌ملاندى يا 2020ێ ره‌وانه‌ى به‌غدا دكه‌ت و به‌رپرسێ نوونه‌راتيا حوكمه‌تا هه‌رێما كوردستانێ ل به‌غدا ديار دكه‌ت كو ئه‌ڤرۆ يا سوبه‌هى دێ راده‌ستى حوكمه‌تا عيراقێ كه‌ن.
فارس عيسا، به‌پرسێ نوونه‌راتيا حوكمه‌تا هه‌رێما كوردستانێ ل به‌غدا، راگه‌هاند كو بودجا خه‌ملاندى چه‌ند رۆژه‌كه گه‌هشتيه ده‌ستێ وان و گۆت: “ئه‌ڤرۆ يان سوبه‌هى دێ راده‌ستى حوكمه‌تا عيراقێ كه‌ين”.
به‌رپرسێ نوونه‌راتيا حوكمه‌تا هه‌رێما كوردستانێ ل به‌غدا زێده‌تر گۆت: “د بودجا خه‌ملاندى دا، هه‌موو هوورده‌كاريێن خه‌رج و داهاتێن جودا تێدا هه‌نه”.
ئه‌ڤرۆ نيوز:
رێڤه‌به‌ريا گشتى يا ئه‌زموونان ل وه‌زاره‌تا په‌روه‌ردێ ل هه‌رێما كوردستانێ ب نڤيساره‌كا فه‌رمى كو ئاراسته‌ى رێڤه‌به‌ريێن گشتى ل پارێزگه‌هێن هه‌رێمێ كريه دياركريه كو ب بريارا وه‌زيرێ په‌روه‌ردێ ئه‌و قوتابيێن كو دو سالان ل سه‌ر ئێك د پۆله‌كێ دا ده‌رنه‌چووين، دشێن بۆ سالا سيێ ل قوتابخانێن ده‌واما وان ب رۆژێ به‌رده‌واميێ ب ده‌واما خوه بده‌ن.
د وێ نڤيسارێ دا هاتيه ژى، هه‌كه قوتابى ئاكنجيێ وان جهان بيت كو قوتابخانا ئێڤاران لێ نينه، ماف يێ هه‌ى تنێ بۆ سالا سيێ ل قوتابخانا خوه بمينيت، ئانكو ل خواندنا ب رۆژێ به‌رده‌وام بيت.
ئه‌ڤرۆ نيوز:
برياره په‌رله‌مانێ كوردستانێ ل رۆژا سێشه‌مبيا داهاتى 15/10/2019 ل دۆر ره‌وشا رۆژئاڤايێ كوردستانێ كۆم ببيت.
ئه‌و كۆمبوون ل سه‌ر داخوازيا پتريا فراكسيۆنێن په‌رله‌مانى يه، پێشتر ژى د به‌ياننامه‌كێ دا په‌رله‌مانێ كوردستانێ هێرشێن توركيا بۆ سه‌ر رۆژئاڤايێ كوردستانێ شه‌رمزاركر و داخواز ژ جڤاكێ نێڤده‌وله‌تى كر كار بكه‌ت بۆ راگرتنا هێرشێن توركيا بۆ سه‌ر رۆژئاڤايێ كوردستانێ.
ئه‌ڤرۆ نيوز:
هێزێن سووريا ديموكرات (هه‌سه‌ده) و رووسيا رێككه‌فتن ل سه‌ر چوونا له‌شكرێ رژێما به‌شار ئه‌سه‌د بۆ باژێرێ كۆبانى.
هه‌سه‌ده و رووسيا، ل دووڤ كوردستان 24، رێككه‌فتن ل سه‌ر راده‌ستكرنا باژێرێ كۆبانى بۆ هێزێن رژێما به‌شار ئه‌سه‌د، ئه‌ڤ چه‌نده ژى بۆ پاراستنا وێ يه ژ له‌شكركێشيا توركيا و رێ گرتن ل ئه‌نجامدانا كۆمه‌لكوژيێن زێده‌تر دژى وه‌لاتيێن سڤيل.
ژ لايێ خوه‌ڤه به‌رپرسێن ئيدارا باكوور و رۆژهه‌لاتا سووريێ راگه‌هاند كو ل گه‌ل حوكمه‌تا سووريێ رێككه‌فتنيه كو له‌شكرێ سوورى بزڤريت بۆ كۆبانى.
ل دووڤ پێزانينان نوكه هێزێن رژێما ئه‌سه‌د ل ناڤ باژێرێ منبج دانه.
هه‌ر ل ئێڤاريا ئه‌ڤرۆ دوشه‌مبى ئه‌مركيا راگه‌هاند كو يا ئاگه‌هداره ل سه‌ر رێككه‌فتنا كوردان ل گه‌ل رووسيا و سووريێ، له‌وما هێزێن خوه ل وان ده‌ڤه‌ران ڤه‌كێشا.
ئه‌ڤرۆ نيوز:
ئێڤاريا ئه‌ڤرۆ ئێكشه‌مبى 13/10/2019 سه‌رۆكێ ئه‌مريكى دونالد ترامپ د به‌رپه‌رێ خوه ل سه‌ر تۆرا جڤاكى يا تويته‌رى به‌لاڤكر كو ل گه‌ل سيناتۆر ليندسى گراهام و چه‌ند ئه‌ندامێن دى يێ كۆنگرێسێ ئه‌مريكى، ب ديموكراتيان ژى ڤه، مژوولى به‌حسكرنا سه‌پاندنا سزايه‌كێ گران ل سه‌ر توركيا نه.
ترامپى دياركر ژى” ئه‌ز يێ ل سه‌ر هێلێ بۆ به‌حسكرنا ده‌ركرنا بريارا دۆرپێچه‌كا گران ل سه‌ر توركيا، وه‌زاره‌تا گه‌نجينێ يا به‌رهه‌ڤه بۆ ڤێ چه‌ندێ، لايه‌نێن قانوون دانانێ يێن دى ژى دبيت پێدڤى بكه‌ت ئه‌وژى بهێنه سه‌ر هێلێ، ل سه‌ر ڤى بابه‌تى كوده‌نگيه‌كا باش يا هه‌ى، توركيا داخواز كريه كو كاره‌كێ ب ڤى شێوه‌ى نه‌كه‌ين” گۆت ژى “چاڤه‌رێ بن”.
ئه‌ڤرۆ نيوز:
ليندسى گراهام مه‌زنه سيناتۆرێ كۆمارى ل كۆنگرێسێ ئه‌مريكى راگه‌هاند، ئه‌و هێرشێن توركيا ل باكوورێ سووريێ (رۆژئاڤايێ كوردستانێ) ئه‌نجام دده‌ت، تنێ مفا بۆ داعش، ئيران و رووسيا هه‌يه.
گراهام د زنجيره تويته‌كێ دا، نووترين هه‌لويستێ خوه ل دۆر ره‌وشا رۆژئاڤا به‌رچاڤكر و پێشوازى ل دووماهى داخۆيانيا دونالد ترامپ سه‌رۆكێ ئه‌مريكا دكه‌ت، كو بۆ سه‌پاندنا سزايان ل سه‌ر توركيا، كارى ل گه‌ل كۆنگرێسى دكه‌ت.
گۆت ژى” سه‌رۆك ترامپ برياره‌كا باش دايه بۆ كاركرنێ ل گه‌ل كۆنگرێسى بۆ سه‌پاندنا سزايان ل سه‌ر توركيا ژبه‌ر هێرش و داگيركارى و تاوانێن شه‌رى كو ل سووريێ ئه‌نجام دده‌ت”.
ل دۆر سزايێن چاڤه‌رێكرى ل سه‌ر توركيا، دبێژيت” ره‌شنڤيسێ سزايان ل سه‌ر ئاستێ هه‌ردو پارتێن كۆمارى و ديموكراتى پشته‌ڤانيا باش لێ دهێته كرن”.
خوياكر ژى”پێدڤيه رێ ب وێ چه‌ندێ نه‌ده‌ين هێرشێن توركيا ببنه ئه‌گه‌رێ شكاندنا هه‌ڤپه‌يمانه‌كێ بهادار وه‌كو كوردان و نه‌بيته ئه‌گه‌رێ دووباره په‌يدابوونا داعشێ”.
ئەڤرۆ نیوز:
وەزارەتا بەرەڤانیێ یا ئەمریکا ئەڤرۆ راگەهاند کو دێ د پێنگاڤا ئێکێ دا هزار سەربازێن خوە ژ رۆژهەلاتێ فراتێ ڤەکێشن و پاشی ژی دەست ب قۆناغا دویێ دکەین و دێ هەموو هێزێن خوە ژ سووریێ ڤەکێشن.
ل ئالیێ دی سەرۆکێ ئەمریکا دۆنالد ترامپ ژی راگەهاند کو دەمێ هندێ یێ هاتی شەرێ بێ بنەما یێن رۆژهەلاتا ناڤین ب دووماهی بینین.
نيشاندان