ئەڤرۆ نیوز:
ل گۆر دەزگەهێن راگەهاندنا ئەمریکا هێزێن سووریێ ب پشتەڤانیا فرۆکێن شەری یێن روسیا شیاینە گەلەک دەڤەرێن ستراتیژی ل ئدلبێ کۆنترۆل بکەن و نها چەندین خالێن چاڤدێریێ یێن تورکیا ژناڤ چووینە و تورکیا تەنگاڤ بوویە، رەنگە بۆ سەرکەفتا ئێکجاری شام داخوازا هاریکاریێ ژ کوردان بکەت.
دەزگەهێن راگەهاندنێ هەروەسا ئاماژە ب هندێ دکەن کو کوردێن سووریێ ل هەمبەر هاریکاریا شامێ ل ئدلبێ داخوازا دەرکرنا هێزێن تورکیا ژ عەفرینێ دکەن.
ئه‌ڤرۆ نيوز:
زانكۆيا دهۆكێ ده‌مێ خواندنێ ل پشك و كوليژێن خوه بۆ سالا 2019 – 2020 ئاشكه‌را كر.
د نڤيساره‌كێ دا كو ل مالپه‌رێ خوه يێ فه‌رمى به‌لاڤكريه؛ هه‌موو قوتابى ئاگه‌هداركرينه كو ئه‌و دێ ل دووڤ سالناما وه‌زاره‌تا خواندنا بلند و ڤه‌كۆلينێن زانستى ل 1ى ئيلۆنا 2019ێ ده‌ست ب ده‌واما فه‌رمى كه‌ن.
ئاشكه‌را ژى كر كو ژ وێ رێكه‌فتێ دێ وه‌رزێ نوو يێ سالا خواندنێ 2019 – 2020 ده‌ست پێ كه‌ت و وانه دێ هێنه گۆتن و نه‌هاتيێن قوتابيان دێ هێنه تۆماركرن.
ئەڤرۆ نیوز، نەوزاد ھلۆری:
دەستەیا پاراستن و چاککرنا ژینگەھێ یا ھەرێما کوردستانێ نوترین رێنمایی و سزایێ کوشتنا کوڤیان راگەیاند کو ئەو ژی ژ 100 ھزار دیناران دەست پێ دکەت و ھەتا 10 ملیون دیناران دچیت، رێڤەبەرێ فەرمانگەھا ژینگەھا دھۆکێ ژی بۆ ئەڤرۆ دیارکر کو پێدڤی یە ھێزێن پاراستنا ژینگەھێ زێدەتر دوڤچونێ ل سەر زێدەگاڤیێن ل سەر ژینگەھێ بکەن.
محەمەد تاھر بریفکانی، رێڤەبەرێ فەرمانگەھا ژینگەھا دھۆک بۆ ئەڤرۆ گۆت: (ب مەرەما زێدەتر پاراستنا ژینگەھێ ب تایبەتی ئاژەلێن کوڤی، دەستەیا پاراستن و چاککرنا ژینگەھێ یا ھەرێما کوردستانێ، سالانە یان چەند سالان جارەکێ پێداچۆنێ د رێنمایی و سزایێن ل سەر زێدەگاڤیێن کوشتنا کوڤیان دکەت کو بگورەی قانونا ھژمار ھەشت یا سالا 2008 دەرچویە، دوماھی جار ژی ئەڤ لیستا ل خوارێ یە کو بھایێ وان ژ 100 ھزار دیناران دەست پێ دکەت و ھەتا 10 ملیون دیناران ژی دچیت).
زێدەتر گۆت: (پێدڤی یە پولیسێن، دارستان و ژینگەە و پێشمەرگێن ژینگەھێ زێدەتر رولێ خوە د سزادانا وان کەسان ببینن کو دەستدرێژی و زێدەگاڤیان لسەر ژینگەھێ دکەن ب تایبەتی کوشتنا بالندە و ئاژەلێن کوڤی، نوکە سزایێ کوشتنا پلنگی و بزنێن کوڤی و یێن وەکو وان ھەتا 10 ملیون دینارایە، ژبەرڤێ پێدڤی یە وەلاتی زێدەتر ھوشیارێ خوە بن و نەچنە چ نێچیران، گرنگە ل ھەرێما کوردستانێ و پارێزگەھا دھۆکێ نێچیرڤانی بھێتە رێکخستن و نابیت ھەر کەس بچیتە نێچیرا بەلکو دڤێت ب گورەی ھندەک رێنمایان بیت کو ژلایێ ژینگەھێ ھاتینە دیارکرن بو کوشتنا ھندەک جورێن بالندە و کوڤیان).
ناڤبری دیارکر ژی کو ئەوان بەری چەندەکێ ل سەر پرسا زێدەتر پاراستنا ژینگەھێ چەندین کومبوون و دانوستاندن لسەر نێچیر و سزا و رێنمایێن ژینگەھێ کریە و زێدەتر گۆت: (ل سنورێ پارێزگەھا دھۆک ھیچ کەسەکێ مافێ نێچیرێ نینە، ژبەرکو ل دھۆکێ سەندیکا نێچیرڤانان نینە کو رێنمایان بو نێچیرڤانان بدانیت، ژبەرڤێ ھەر کەسێ بچیتە نێچیرێ پێدڤی یە بھێتە سزادان).
ئه‌ڤرۆ نيوز، نيوار محه‌مه‌د سه‌ليم:
د شه‌ش هه‌يڤێن بۆرى دا ل هه‌رێما كوردستانێ 211 ژن ب ئه‌گه‌رێن جودا هاتينه كوشتن يان سۆتن.
رێڤه‌به‌ريا گشتى يا به‌رسينگگرتنا تۆندوتيژيێ ل دژى ژنان و خێزانێ يا سه‌ر ب وه‌زاره‌تا ناڤخۆ يا حوكمه‌تا هه‌رێما كوردستانێ ئامارا شه‌ش هه‌يڤێن بۆرى يا خوه به‌لاڤكر.
ب گۆره‌ى ئاماران، 22 ژن هاتينه كوشتن، 32 ژنان خوه كوشتيه، 99 ژن هاتينه سۆتن و 58 ژنان ژى هاتينه سۆتن. ديسا 47 ژنان ژى تووشى ده‌ستدرێژيا سكسى بووينه.
هه‌ر د راپۆرتا ناڤبرى دا ئاماژه ب وێ چه‌ندێ ژى كريه كو چار هزار و 972 سكالا ده‌رباره‌ى تۆندوتيژيا دژى ژنان هاتينه تۆماركرن.
ئەڤرۆ نیوز؍عەلی حاجی :
د ده‌مێ دو رۆژان دا ل زاخۆ ژئەگەرێ مەلەڤانی کرنێ سێ کەس دهێنە قورتال کرن و ئاگر بەر ب سێ شوقەیان و مارکێتەکێ و کابینەیەکا جلكان دکەڤیت.
بێوار عەبدولعەزیز ؍بەرپرسێ بەرەڤانیا باژێری ل پارێزگەها دهوکێ بۆ ئەڤرۆ نیوز گۆت” دوهی ل ئێڤاریا رۆژا پێنچ شەمبێ ل دەمژمێر ۵:۰۰ ئێڤاری گەنجەکێ خەلکێ بەغدا ل نێزیک پرا دەلال ژئەگەرێ مەلەڤانی کرنێ ل ئاڤا خابیری دا مەترسیا خەندقینێ دکەڤیتە سەر ؍تیمێن مەیێن نقومەڤانی ل زاخۆ هه‌ر زوو شیان وی گەنجی ژخەندقینێ قورتال بکەن؍ئەڤرۆ ئەینیێ ژى تیمێن مەیێن نقومەڤانی ل دەمژمێر ٦:۰۰ێ ئێڤاری شیان دو کچێن خەلکێ دهوکێ ژ خەندقینێ قورتال بکەن؍پشتی کچەکا بچووک یا پێنچ سالی دکەڤیتە ئاڤێ دا و خووشکا وێ یا ۱۸ سالی دچیت بۆ رزگارکرنا وێ، بەلێ ئەو ژی دکەڤیتە د ناڤ ئاڤێ دا؍ هەردو کچ ژلایێ تیمێن ڤە دهێنە رزگارکرن”.
گوت ژی ” هەر ئەڤرۆ ئەینیێ ل دەمژمێر ۱:۵۰ ئاگر بەر دبیتە کوگەهەکا بچووک یا جلكێن بالا؍پشتی دەمەکێ کورت تیمێن مەێین بەرەڤانیا باژێری ل ناحیا رزگاری شیان وی ئاگری کونترول بکەن و زیانێن مادی مەزنتر لێ نەهێن؍هەروه‌سا ئەڤرۆ ل دەمژمێر ۵:۰۰ ئێڤاری ل تاخێ شقا ژئەگەرەکێ نەدیار ئاگر بەر دبیتە مارکێتەکێ و سێ شوقەیان؍پشتی تیمێن مە گەهشتینە جهێ روودانێ شیان کونترولا وی ئاگری بکەن؍ل گورەی وێ ئامارا بەر دەست زیانێن مادی یێن مەزن بەر ب وان شوقەیان کەفتن و چەندین کەلوپەلێن وان ژناڤ چوون ؍بەلێ د وان رودانان دا چو زیانێن گیانی نەبوون”.
ئه‌ڤرۆ نیوز:
سه‌رۆك وه‌زیرێن ئیسرائیلێ بنیامین ناتانیاهۆ، ره‌ت نه‌كر، كو وه‌لاتێ وى ل پشت وان زنجیره هێرشێن ئه‌سمانى بیت كو ل ڤێ دووماهیێ هاتینه كرن ل سه‌ر چه‌ك وته‌قه‌مه‌نیێن حه‌شدا شه‌عبى ل چه‌ندین ده‌ڤه‌ران ل عیراقێ.
د داخۆیانیه‌كێ دا بۆ كه‌نالێ 9 یێ ئیسرائیلى، ناتانیاهۆى گۆت” ئیران كار دكه‌ت بۆ ژناڤبرنا ئیسرائیلێ وبزاڤێ دكه‌ت بۆ دژایه‌تیا ئیسرائیلێ بنگه‌هان ل لوبنانێ وسووریێ وعیراقێ ویه‌مه‌نێ ڤه‌كه‌ت”.
ل دۆر لێدانا به‌رژه‌وه‌ندیێن ئیرانێ ل عیراقێ، ناتانیاهۆ دبێژیت” ئه‌م ل هه‌موو به‌ره‌یێن جودا دژى ئیرانێ شه‌رى دكه‌ین و مه ئازادى ژى یا دایه هێزێن خوه كا چ یا پێدڤیه بكه‌ن بۆ ژناڤبرنا پیلانێن ئیرانێ”.
ئه‌ڤ چاخڤتنێن ناتانیاهۆى د ده‌مه‌كى دا دهێن كو ل ڤێ دووماهیێ كۆگایه‌كا مه‌زن یا چه‌ك وته‌قه‌مه‌نیێن حه‌شدا شه‌عبى ل نێزیك به‌غدا هاتنه په‌قاندن وپاشى ئه‌بو مه‌هدى ئه‌لموهه‌ندس جێگرێ سه‌رۆكێ حه‌شدا شه‌عبى راگه‌هاندبوو كو ئه‌و روودانه ژ ئه‌نجامێ هێرشه‌كا ئه‌سمانى یا ئیسرائیلى بوو.
ئه‌ڤرۆ نیوز:
یانه‌كا نه‌رویجی ڤه‌گوهاستنا یاریكه‌ر (دانیێل نوتسێن) بۆ ناڤ رێزێن خوه راگه‌هاند كو وى یاریكه‌رى ناڤێ خوه بۆ (لیۆنێل میسى) گوهۆریه.
یانا (ئه‌نكێرنى) یا نه‌رویجى د به‌ربه‌رێ خوه یێ فه‌رمى ل تویته‌رى ڤه‌گوهاستنا ( دانیێل نوتسێن) یێ 16 سالى راگه‌هاند كو ئه‌و یاریكه‌ره ژبه‌ر خوه‌شتڤیا وى بۆ یاریكه‌رێ به‌رشه‌لونا وهه‌لبژارتیێ ئه‌رجه‌نتینێ ناڤێ خوه كریه لیونێل میسى.
دانیێل ل به‌رپه‌رێ فه‌رمى یێ یانا خوه یا نوو دبێژیت” د ژیێ گه‌له‌ك بچووك دا ئه‌ز ب میسى مه‌نده‌هوش بووم، له‌وما هه‌ر زوو من پلان بۆ گوهۆرینا ناڤێ خوه دانا.
ئه‌ڤرۆ نيوز:
رێڤه‌به‌ريا گشتى يا ره‌گه‌زنامێ ل هه‌رێما كوردستانێ وه‌لاتيان ل دۆر داگرتنا فۆرما كارتا نيشتمانى ب شێوێ ئۆنلاين ئاگه‌هدار دكه‌ت.
رێڤه‌به‌ريا ناڤبرى ئه‌ڤرۆ ئه‌ينيێ 23/8/2019 د به‌ياننامه‌كێ دا به‌لاڤكر” وه‌لاتيان ل دۆر داگرتنا فۆرما كارتا نيشتمانى ب شێوێ ئۆنلاين ئاگه‌هدار دكه‌ين كو نوكه دشێن ب شێوێ (ئۆنلاين) راسته‌وخوه ب رێيا ڤى لينكى (www.nid-moi.gov.iq) ل سه‌ر كۆمپیۆته‌رى ل مالا خوه فۆرما كارتا نیشتمانى داگرى وببه‌یه فه‌رمانگه‌ها كارتا نیشتمانى ومامه‌لێ پێ بكه‌ى”.
ره‌گه‌زناما هه‌رێمێ پێزانینێن زێده‌تر ل سه‌ر وێ پرۆسێ به‌رچاڤكرن ودیاركر”بۆ داگرتنا وێ فۆرمێ پێدڤیه به‌رنامێ (acrobetpro) د كومپیۆته‌رێ ته دا هه‌بیت، یان ژى ژ گۆگلى دانلۆند بكه‌ى تاكو باركۆدێ فۆرمێ بخوینیت”.
ئه‌ڤرۆ نيوز:
ئه‌ڤرۆ ئه‌ينيێ 23/8/2019 سه‌رۆكێ هه‌رێما كوردستانێ د په‌يامه‌كێ دا راگه‌هاند، دێ د به‌رده‌وام بين ل سه‌ر پێشڤه‌برن وپاراستنا ئازاديێن ئايينى ل هه‌رێما كوردستانێ.
نێچيرڤان بارزانى، سه‌رۆكێ هه‌رێما كوردستانێ د به‌په‌رێ خوه ل سه‌ر تۆرا جڤاكى يا فه‌يسبووكى ب زمانێ ئينگليزى ب هه‌لكه‌فتا رۆژا جيهانى يا قوربانيێن توندوتيژيا ئايينى وهزرى په‌يامه‌ك به‌لاڤكر وتێدا راگه‌هاند” كوردستان وه‌كو په‌ناگه‌هه‌ك دێ مينيت بۆ وان كه‌سێن ژ ده‌ستێ سته‌مێ وتوندره‌ويێ د ره‌ڤن، دێ د به‌رده‌وام بين ل سه‌ر پێشڤبرن وپاراستنا ئازاديێن ئايينى ل هه‌رێما كوردستانێ”.
ئه‌ڤرۆ نيوز:
راگه‌هاندنا رێڤه‌به‌ريا هاتنوچوونا پارێزگه‌ها دهۆكێ به‌لاڤكر ل ئێڤاريا دره‌نگ يا ئه‌ڤرۆ ئه‌ينيێ ٢٠١٩/٨/٢٣ ل سه‌ر جادا سه‌ره‌كی دهوك – شێخان ل نێزیك بریفكا روودانه‌ك ژ جۆرێ لێگدان دناڤبه‌را دو ترومبێلان دا بارهه‌لگر پیكپ تویوتا دگه‌ل تایبه‌ت هيونداى ئه‌كسینت روودا و د ئه‌نجامدا 11 كه‌س بریندار بوون و زیانێن مه‌زن گه‌هشتنه هه‌ردو ترومبێلان.
نيشاندان