ئەڤرۆ نیوز، نەوزاد هلۆری:
پەیکەرسازەکێ باژێرێ دهوکێ گروپەکێ 12 کەسی کو ژ پەیکەرسازێن هەر چار پارچێن کوردستانێ ب خوه‌ڤە دگرن پێکئینایە و چەندین پەیکەر و کارێن جوان ل کوردستان و دهۆکێ دروستکرینە، ب گورەی وی پەیکەرسازی، وان پەیکەرێ مەزنترین دیکلێ کوردی ل عیراق و کوردستانێ ل دهۆكێ چێکریە و بهایێ وی پێنج هزار دۆلارە، کەره‌ستەیێ چێکرنا دیکلی ژی هەموو ئاسنە.
ئه‌ڤرۆ نیوز:
به‌رپرسێ ده‌زگه‌هێ هه‌لبژارتن یێ پارتى دیموكراتى كوردستان راگه‌هاند، ل دادگه‌ها فیدرالى یا عیراقێ سكالا تۆماركریه، پشتى كو جڤاتا نوونه‌رێن عیراقێ بریار داى ل ده‌مێ ئه‌نجامدانا هه‌لبژارتنێن جڤاتێن پاریزگه‌هێن عیراقێ،ئه‌و هه‌لبژارتنه ل كه‌ركووكێ ژى بهێنه ئه‌نجامدان.
جڤاتا نوونه‌رێن عیراقێ ب پتریا ده‌نگدان بریار دابوو ل ده‌مێ ئه‌نجامدانا هه‌لبژارتنێن جڤاتێن پارێزگه‌هان، پرۆسا هه‌لبژارتنان ل پارێزگه‌ها كه‌ركووكێ ڤه‌گریت، پارتى دیموكراتى كوردستان ب فه‌رمى سكالا ل دادگه‌ها فیدرالى یا عیراقێ تۆماركریه.
خسرۆ گۆران، به‌رپرسێ ده‌زگه‌هێ هه‌لبژارتن یێ پارتى دیموكراتى كوردستان د داخۆیانیه‌كێ دا بۆ مالپه‌رێ فه‌رمى یێ پارتى گۆت” پارتى ب فه‌رمى سكالا ل دادگه‌ها فیدرالى یا عیراقى تۆماركریه”. هه‌ڤده‌م ئه‌و ده‌نگوباس ژى ره‌تكرن یێن به‌حسێ دیاركرنا پارتى بۆ به‌ربژاران بۆ جڤاتا پارێزگه‌ها كه‌ركووكێ.
بریاره ل هه‌یڤا نیسانا 2020 هه‌لبژارتنێن جڤاتێن پارێزگه‌هێن عیراقێ ب كه‌ركووكێ ژى ڤه بهێنه ئه‌نجامدان.
ئه‌ڤرۆ نيوز:
ئه‌ڤرۆ رۆژا چارشه‌مبى رێكه‌فتى 7/8/2019 هه‌ردو سه‌رۆكاتيێن په‌رله‌مانێ كوردستانێ ز جڤاتا وه‌زيران كومبوونه‌ك ئه‌نجامدا و دوپاتى ل وێ چه‌ندێ كر پێخه‌مه‌ت خزمه‌تا وه‌لاتيان پێدڤيه هه‌ماهه‌نگى و هاريكارى ل ناڤبه‌را هه‌ردولايان دا هه‌بيت.
د ڤێ كومبوونێ دا رێواز فايه‌ق سه‌رۆكا په‌رله‌مانێ كوردستانێ ئاماژه دا گرنگيا هه‌ماهه‌نگيا ناڤبه‌را ده‌ستهه‌لاتا په‌رله‌مانى و حوكمه‌تا هه‌رێما كوردستانێ هه‌بيت بۆ جێبه‌جێكرنا ئه‌و قانونێن دهێنه ده‌ركرن و بريار له‌سه‌ر دهێنه ده‌ركرن.
سه‌رۆكێ حوكمه‌تا هه‌رێمێ ژى ئاماژه دا گرنگى و رێزگرتن ل هه‌رسێ ده‌ستهه‌لاتێن ياسادانان و جێبه‌جێكرن و دادوه‌رى هه‌بيت پێخه‌مه‌ت گه‌شه‌پێدانا زێده‌تر يا پروسا ديموكراسى ل هه‌رێما كوردستانێ.
ئەڤرۆ نیوز:
بالیۆزخانا ئەمریکا ل ئەنقەرە د داخۆیانیەکێ دا دیار کریە کو ژ ئەنجاما دانوستاندنێن چەند رۆژێن بۆری ل گەل تورکیا گەهشتینە وێ ئەنجامێ کو پێکڤە دەڤەرا ئارام ل سووریێ دروست بکەن، ئەو دەڤەر ژی دێ بیتە ژێدەرێ ئاشتیێ بۆ سووریێ.
ل ئالیێ دی وەزیرێ بەرەڤانیێ یێ تورکیا هولوسی ئاکار ژی دیار کر کو ل گەل ئەمریکا گەهشتینە رێککەفتنێ کو پێکڤە بۆ دروستکرنا دەڤەرا ئارام ل سووریێ کار بکەن.
ئه‌ڤرۆ نیوز، عه‌لى حاجى :
ژ ئه‌گه‌رێ شه‌ره‌كى دناڤبه‌را دو بنه‌مالان دا ل گوندێ متیفێ سه‌ر ب قه‌زا زاخۆ ڤه، دو كه‌سان گیانێ خوه ژده‌ست دایه و سێ كه‌سێن دیتر ژى بریندار بوینه و برینا كه‌سه‌ك ژوان یا گرانه .
ل گور ژێده‌ره‌كێ تایبه‌ت یێ ئه‌ڤرۆ نیوز دیار كر ئه‌ڤ روودانه ل ده‌مژمێر 3:00ى پشتى نیڤرو روودایه ل گوندێ متیفا ، ئه‌ڤ شه‌ره دناڤبه‌را دو بنه‌مالا دابویه و كه‌س و كارێن ئێكن و ژئه‌گه‌رێ ئه‌ردى ئه‌ڤ ئاریشه مه‌زنتر بویه و هه‌تا گه‌هشتیه وى راده‌یى چه‌ك بهێته بكار ئینان،ژئه‌گه‌رێ وى شه‌رى ژى هه‌تا نوكه دو كه‌سان گیانێ خوه ژده‌ستدایه و سێ كه‌س ژى بریندار بوینه و برینا كه‌سه‌ك ژوان یا كویره و د نوكه دا دبن چاڤدێریا نوشدارێن نه‌خوشخانا هاوار هاتنێ نه ل زاخۆ.
ئەڤرۆ نیوز:
ئەڤرۆ سەرۆکێ هەرێما کوردستانێ نێچیرڤان بارزانی پێشوازی ل لۆیس رافائێل ساکۆ سەرۆکێ کەنیسا کلدانی ل عیراقێ و جیهانێ کر و د هەڤدیتنێ دا سەرۆکێ کەنیسا کلدانی پیرۆزباهی ل نێچیرڤان بارزانی کر کو وەکو سەرۆکێ هەرێما کوردستانێ دەست بکار بوویە و هێڤیا سەرکەفتنێ بۆ خواست.
ژ ئالیێ خوە ڤە سەرۆکێ هەرێما کوردستانێ ژی کەیفخوەشیا خوە بۆ سەرەدانا سەرۆکێ کەنیسا کلدانی ل عیراقێ و جیهانێ دیار کر و دۆپاتی ل پێکڤەژیانا هەموو ئایین و نەتەوان ل عیراقێ و هەرێما کوردستانێ هاتە کرن.
ئەڤرۆ نیوز،عەلی حاجی :
رێڤەبەرێ بەرەڤانیا باژێری ل زاخۆ بۆ ئه‌ڤرۆ نیوز ئاشكرا كر ژبەر كێمیا میلاكی هەتا نوكە د شیاندا نینە كو ترومبێلێن ئاگر ڤەمراندنێ بۆ چار كەمپێن ئاواران ل سنورێ دەڤەرا زاخۆ دانین و مە پێدڤی ب زێدەكرنا میلاكی یا هه‌ى.
خالد دوسكی، زێدەتر گوت: راستە هەتا نوكە چو ترومبێلێن ئاگر ڤەمراندنێ د ناڤ كەمپێن ئاواران ل زاخۆ نینن،ژبه‌ركو میلاكێ پولیسێن مە ل بەرەڤانیا باژێری ل زاخۆ یێ كێمه و مە پێدڤی ب زێدەكرنا میلاكی هەیە، پێشتر ژی مە داخواز كریە ب رێیا رێڤەبەریا بەرەڤانیا باژێری ل پارێزگەها دهوكێ،وان ژی ب رێیا خوە جهێن بلند ئاگەهدار كرینە،هەر چەندە ڤەكرنا بنگەهێن ئاگر ڤه‌مراندنێ ل وان كه‌مپان یا گرنگە ژی، بەلێ‌مە داخواز ژ رێكخراوان ژى كریە ترومبێلان بۆ وان كەمپان دابین بكەن،زێدەباری وێ چەندێ ژی مە داخواز ژ رێڤەبەریێن كەمپان كرینە كو هندەك كەسان به‌رهه‌ڤ بكه‌ن داكو ترومبێلێن نوو بهێنە دابین كرن بۆ وان كەمپان و ئەم ژی ژلایێ خوەڤە خولان بۆ وان كەسان ڤەكەین هەتا كو فێر دبن و وەكو پولیسێن بەرەڤانیا باژیّری د ناڤ كەمپان دا كار بكەن .
گوت ژی : ئەڤ چەندە ژی پێدڤی ب ترومبێلێن نووتر هەیە هەتا كار ب دروستی ب رێڤە بچیت، دیسان مە ئامیرەیێن ئاگر ڤەمراندنێ بۆ هه‌موو كەمپ و خیڤەتگەهێن د ناڤ كەمپێ دا بەرهەڤ كرینە بۆ هەر روودانەكا بچووك یا ئاگر بەربونێ،بەلێ ئەز نوزانم بوچی بۆ هەر روودانەكا بچووك ب كار نائینن .
ئەڤرۆ نیوز ، عەلی حاجی :
رێڤەبەرێ كەمپا مەشكو بۆ ئەڤرۆ نیوز دیاركر پێنگاڤێن باش هاتینە هاڤێژتن داكو د دەمەكێ نێزیك دا نڤێسینگەها ناسنامەێن عێراقی د ناڤ كەمپا چەمكشو بهێتە دانان.
مەئمون یەحیا، ئەو چەندە ژی گوت : هەر چەندە د نوكە دا نڤێسینگەها دەرئینانا ناسنامەیان ل كەمپێن بێرسڤێ و دەركارێ هاتینە ڤەكرن،مە كۆمبوونه‌ك ل گەل رێكخراوا هاریكار و UNCHR ئەنجامدایە و ڤان هەردو رێكخراوان بەرهەڤی كرینە بۆ وەرگرتنا فایلێن وه‌لاتیێن د ناڤ كەمپێ دا و ئەڤە نێزیكی دو روژایە دەستپێكری،هەر دیسان رێكخراوەكا دی ژی تایبەت ل دۆر وێ چەندێ كو خەلكێ ئاگەهدار دكەت ل سه‌ر چاوانیا بەرهەڤكرنا فایلان و كا چ پێدڤیە بكەن و هەتا دو جۆرێن فایلان ژی هاتینە دروستكرن داكو جوداهى هەبیت ب دروستكرن و ب رێڤەبرنا مامەلەێن وه‌لاتیان ب ناسنامەێن عێراقی، ئەڤ پێنگاڤە ژبەر وێ چەندێ مە هاڤێتی داكو پێشوەخت هەمی مامەلەێن وه‌لاتیان بەرهەڤ ببن و ل دووڤ را لژنە د ناڤ كەمپێ دا دەست ب كار بیت و كار ب دروستی ب رێڤە بچیت.
گوت ژی : ژبەر كو كەمپ یا مەزنە و هەتاكو هەمی مامەلە بهێنە كۆمكرن و د ئامادەبن، د وی دەمی دا لژنە دێ یا بەرهەڤ بیت و دەست ب كار بیت و ل گورەی پێزانینان ژی ئەڤ لژنه پتر ژ هەیڤەكێ دێ د ناڤ كەمپا مەدا بیت و هەماهەنگیا مە وەكو كارگێریا كەمپێ ل گەل لژنا دەرئینانا ناسنامەیان ب رێیا بوردێ پارێزگەها دهوكێ یە .
ئەڤرۆ نیۆز:
ل ئێڤاریا رۆژا 6\8\2019 ل سه‌یرانگه‌ها مالتایێ فه‌رهاد ئه‌مین ئه‌تروشى پارێزگه‌رێ دهوكێ ل سه‌ر شه‌ره‌فا میر حازم ته‌حسین به‌گ میرێ نوو یێ ئێزدییان شیڤ خارنه‌ك بو كه‌سایه‌تیێن جڤاكى و روى سپى و ماقیل و سیاسه‌مه‌دارێن ده‌ڤه‌رێ به‌رهه‌ڤكر.
ل به‌راهیێ پاریزگه‌رێ دهوكێ په‌یڤه‌ك خاند وبخێرهاتنا هه‌موو به‌رهه‌ڤبوویان كر و گوت : مه وه‌كو پاریزگه‌ها دهوكێ و حكومه‌تا هه‌رێما كوردستانێ ب فه‌ر دیت ڤێ مێهڤانداریێ به‌رهه‌ڤكه‌ین ب هه‌لكه‌فتا هه‌لبژارتنا میرێ نوو یێ ئێزدییان میر حازم ته‌حسین به‌گ و ب ناڤێ خه‌لكێ پارێزگه‌هێ پیروزباهیا میر حازم به‌گ كر و سه‌ركه‌فتن بو خواست .
پاریزگه‌رێ دهوكێ ته‌كه‌ز كر كو كارگێریا پاریزگه‌هێ و حكومه‌تا هه‌رێما كوردستانێ دێ به‌رده‌وام هاریكاریا میرێ نوو یێ ئێزدیان و ته‌ڤایا ئێزدیان كه‌ن. . هه‌روه‌سا گوت : ئه‌م دێ پشته‌ڤانییا خه‌لكێ شنگالێ كه‌ین چونكو تاوانێن مه‌زن و كێم وێنه دژى وان ژ لایێ تیرورستێن داعش ڤه هاتینه ئه‌نجامدان .
ل دوماهیێ ژى پارێزگه‌رێ دهوكێ دا خویاكرن كو دڤێت خه‌لكێ كوردستانێ هه‌موو ب هه‌ڤرا د ئێكگرتى بن بو پشته‌ڤانیكرنا حكومه‌تا هه‌رێما كوردستانێ ومیرێ نوو یێ ئێزدییان بو هندێ به‌رهنگارى هه‌موو ئاریشه‌كێ ببین و ب باشترین شێوه خزمه‌تا خه‌لكێ كوردستانێ و ئێزدیان بكه‌ین .
پاشى شێخ شاموو سه‌روكێ بنگه‌هێ لالش یێ ره‌وشه‌نبیرى وكومه‌لایه‌تى نونه‌رێ میر حازم ته‌حسین به‌گ په‌یڤه‌ك خاند و ب ناڤێ میر حازم به‌گ و جڤاتا روحانى و كه‌سایه‌تیێن جڤاكى یێن ئێزدیان سوپاسیا پاریزگه‌رێ دهوكێ و حكومه‌تا هه‌رێما كوردستانێ كر كو ئه‌ڤ مێهڤاندارییه ل سه‌ر شه‌ره‌فا میرێ نوو یێ ئێزدییان به‌رهه‌ڤكریه و گوت : ئه‌ڤ خرڤه‌بونا جڤاكى وێ چه‌ندێ د گه‌هینیت كو پێكڤه ژیان ل ڤێ هه‌رێمێ د ناڤبه‌را هه‌موو پێكهاته‌یان دا یا موكومه و ژیان ب خوشى و ته‌ڤایى دهێته ده‌ربازكرن .
هه‌روه‌سا گوت: ئه‌ڤ مێهڤانداریه رێزگرتنه ل هه‌موو ئێزدیان و ده‌ربرینا وێ گرنگیێ یه یا كو سه‌روك بارزانى و رێزدار نێچیرڤان بارزانى به‌رده‌وام دایه ئێزدیان وپه‌سنا رولێ پارێزگه‌رێ دهوكێ و هه‌موو خه‌لكێ پارێزگه‌هێ كر هه‌مبه‌ر حه‌واندنا وێ ژمارا زور یا ئاوارێن ده‌ڤه‌را شنگالێ وهیڤى خاستن هه‌موو لایه‌نێن كوردستانى پشته‌ڤانیا میر حازم ته‌حسین به‌گ بكه ن دا بشێت باشتر خزمه‌تا هه‌موو ئێزدیان بكه‌ت .
ل دوماهیا رێ و ره‌سمێن مێهڤانداریێ هه‌ردوو هونه‌رمه‌ندێن مللى ( ته‌حسین و عه‌لى كورێن فه‌قیر خدر) چه‌ند سترانێن فلكلورى پێشكێشكرن .
نيشاندان