ئه‌ڤرۆ نيوز:
جڤاتا پارێزگه‌ها به‌غدا د كۆمبوونا خوه يا ئه‌ڤرۆ رۆژا ئێكشه‌مبى 6ى چريا ئێكێ 2019 ده‌ست ژ كاركێشانا پارێزگارێ به‌غدا، فه‌لاح جه‌زائيرى په‌سه‌ند كر.
جڤاتا پارێزگه‌هێ ده‌ست ژكاركێشانا پارێزگارێ به‌غدا په‌سه‌ندكر
نووترين نووچه
- سەرۆك بارزانی و قونسلێ گشتیێ توركیا رەوشا سیاسییا ئیراقێ و پرۆسەیا ئاشتیێ گەنگەشە كرن
- سەرۆك بارزانی و قونسلێ رووسیا دوپاتیێ ل پێشڤەبرنا هەڤبەندییان دكەن
- بجهئینانا دەستووری كلیلا چارەسەرییا كێشەیێن هەولێرێ و بەغدایێ یە
- شاسوار عەبدولواحد ب فەرمانا دادوەری هاتیە دەستەسەركرن
- كۆمسیۆن: هیچ نیازەك بۆ پاشئێخستنا هەلبژارتنان نینە
- داهاتێ پەترۆلێ دێ بیتە مووچەیێ فەرمانبەرێن هەرێمێ
- تێكچوونا سیستەمێ كارەبێ ل ئیراقێ ئاماژەیا سەركەفتنا پڕۆژەیێ رۆناهییە ل هەرێمێ
- هاریكاریێن هەڤپەیمانان ناهێنە بڕین
- شوان كەلاری: پەسەندكرنا پرۆژە قانوونا حەشدا شەعبی د بەرژەوەندییا ئیراقێ دا نینە
- سەركردەیەكێ رێكخراوا بەدر: پرسا مووچەی سیاسییە و سوودانی دخوازیت جهێ سەدری بگریت
سه‌ره‌كى نووترين نووچه
كێشا ئاڤا دهۆكێ نه‌هاتيه چاره‌كرن
ئه‌ڤرۆ نيوز، نيوار محه‌مه‌د سه‌ليم:
ئه‌ڤرۆ رۆژا ئێكشه‌مبى رێكه‌فتى 6ى چريا ئێكێ 2019 لژنا باژێرڤانى و خزمه‌تگۆزاريێن گشتى و گه‌شتوگۆزا جڤاتا پارێزگه‌ها دهۆكێ ل گه‌ل هه‌رسێ رێڤه‌به‌ريێن (خوپاراستنا ساخله‌ميێ، ئاڤا دهۆكێ و ژينگه‌هێ) كۆمبوو، ب مه‌ره‌ما دووڤچوونێن به‌رده‌وام ل سه‌ر ئاريشا ئاڤێ ل پارێزگه‌ها دهۆكێ.
د كۆمبوونێ دا، ئه‌ندازيار فارس حاجى ژ رێڤه‌به‌ريا ئاڤا دهۆكێ بۆ ئه‌ڤرۆ نيوز دياركر كو كارمه‌ندێن وان بۆ سه‌ر كارى د كێمن، گه‌له‌ك خانه‌نشين بووينه و كه‌سێ دى ل جهێ وان نه‌هاتيه دامه‌زراندن و گۆتژى: “ب گۆره‌يى رێنمايان پێدڤيه 20% ژ پارێ بۆ ئاڤێ ژ وه‌لاتيان دهێته وه‌رگرتن بۆ چاره‌كرنا كێشێن ئاڤێ يێن رێڤه‌به‌ريێ بيت، به‌لێ د راستى دا، ئه‌و پاره ناگه‌هيته مه و ئاريشێن مه ژى هه‌ر د هه‌لاويستى نه”.
كه‌ريم چه‌مانكى، سه‌رۆكێ لژنا باژێرڤانى و خزمه‌تگۆزاريێن گشتى و گه‌شتوگۆزار ل جڤاتا پارێزگه‌ها دهۆكێ راگه‌هاند كو ب ئاماده‌بوونا سكرتێرێ جڤاتێ و هه‌رسێ رێڤه‌به‌ريێن (خوپاراستنا ساخله‌ميێ، ئاڤا دهۆكێ و ژينگه‌هێ) كۆمبوونه‌كا به‌رفرهـ ل سه‌ر ره‌وشا ئاڤێ ل پارێزگه‌ها دهۆكێ هاته كرن.
سه‌رۆكێ لژنا باژێرڤانى و خزمه‌تگۆزاريێن گشتى و گه‌شتوگۆزار ل جڤاتا پارێزگه‌ها دهۆكێ زێده‌تر گۆت: “دياربوو كو هێشتا كێشه نه‌هاتيه چارسه‌ركرن و ژ دو روويان ڤه يا مايه هه‌لاويستى؛ ماددێن پاقژكرنا ئاڤێ وه‌كو پێدڤى ل به‌ر ده‌ست نينن و ستافێ كارى ژى وه‌كو پێدڤى نينه، ژ لايه‌كێ دى ڤه پشته‌ڤانيا ماددى يا ڤى پرۆژه‌يى ناهێته كرن”.
كه‌ريم چه‌مانكى ئاشكه‌را ژى كر كو بزاڤێن وان وه‌كو لژنا باژێرڤانى و خزمه‌تگۆزاريێن گشتى و گه‌شتوگۆزار ل جڤاتا پارێزگه‌ها دهۆكێ جڤاتا پارێزگه‌ها دهۆكێ دێ د به‌رده‌وام بن هه‌تا كێشا ئاڤێ ب ته‌مامى دهێته چاره‌كرن.
ب وێنه – به‌رهه‌مێ پتری 50 گوندان ل ڤێ دوكانێ دهێته فرۆتن
ئه‌ڤرۆ نیوز، نه‌وزاد هلۆری:
ل گوندێ بازێ یا سه‌ر ب ده‌ڤه‌را به‌رواری بالا دوكانه‌ك هه‌یه، به‌رهه‌مێ هه‌موو گوندێن به‌رواری بالا ل وێ دوكانێ دهێنه فروتن، موختارێ ئه‌وی گوندی ژی دیاركر كو ئه‌گه‌ر حوكمه‌ت گرنگیێ ب گوندان بده‌ت دێ دوكان و بازارێن زێده‌تر هێنه‌دانان.
حسێن سه‌عید بازی جوتیار و موختارێ گوندێ بازێ بۆ ئه‌ڤرۆ نیوز گۆت: (ل هه‌موو گوندێن ده‌ڤه‌را به‌رواری بالا چاندن و ده‌رامه‌ت و فێقی هه‌یه، به‌لێ ئاریشا سه‌ره‌كی یا هه‌موو گوندان ژی ئه‌وه كو دوكان و بازار نینن بۆ فرۆتنا به‌رهه‌مێ وان، پشكه‌ك ژ جوتیاران به‌رهه‌مێن خوه بو باژێرا دبه‌ن و پشكه‌كا دن ژی ل بازارێ گوندێ بازێ دفروشن كو ئه‌و ژی تنێ دوكانه‌كه، ئانكو ل هه‌موو ده‌ڤه‌را به‌رواری بالا ب تنێ دوكانه‌ك هه‌یه بۆ فرۆتنا ده‌رامه‌ت و فێقیێ جوتیاران، ئه‌و ژی دكه‌ڤیته گوندێ بازێ و خه‌لك ل هه‌موو گوندان به‌رهه‌مێن خوه دئینن وی بازاری و دفروشن).
زێده‌تر گۆت: (نوكه به‌رهه‌مێ گوندێن ده‌ڤه‌رێ گه‌هشتیه وه‌كو تری، هژیر، هنار، سێڤ، گیز، كولند و هه‌موو جورێن دن یێن فێقی و ده‌رامه‌تی، روژانێن ئه‌ینی بازارێ گوندێ بازێ گه‌رمه ژبه‌ركو خه‌لكه‌كێ زور ل باژێرا دهێنه سه‌ر گوندان ب مه‌ره‌ما گه‌ریان و گه‌شتوگۆزار و ل گه‌ل خوه به‌رهه‌مێ خومالی دكرن).
ناڤبری دیاركر ژی كو ئه‌گه‌ر جهێن شوله‌ژێ كار بكه‌ن بۆ باشتركرنا گوندان دێ خه‌لك زێده‌تر گرنگیێ ب چاندنێ ده‌ت و زێده‌تر گۆت: (پشكه‌ك ژ خه‌لكێ گوندان ژ ئه‌گه‌رێ به‌ردوامبوونا بوردومانێن توركیا، پشكه‌ك ژی ژ ئه‌گه‌رێ نه‌بوونا خزمه‌تگوزاریێن پێدڤی قه‌ستا باژێران كریه، ئه‌ڤێ یه‌كێ ژی جوتیار دلگرانكریه و به‌رهه‌مێ وان وه‌كو پێدڤی ناهێته فرۆتن).
زاخۆ: 16 جهێن بازرگانى هاتنه سزادان
ئه‌ڤرۆ نیوز،عه‌لی حاجی:
د داخویانیه‌كێ دا ئه‌ندامه‌كێ لژنا تایبه‌ت یا دیفچونا بازاری ل زاخۆ بۆ ئه‌ڤرۆ نیوز دیار كر د ماوه‌یێ هه‌یڤا نه‌ه دا نێزیكی 16 جهێن بازرگانی هاتینه سزا دان ژئه‌گه‌رێ نه‌پێگیاریا وان ب رێنمایێن ساخله‌میێ و پرانیا سزادانا وان جهان ژبه‌ر هه‌بونا كه‌ره‌سته‌یێن ئێكسپاپه‌ر بون .
دكتور لاوین هابیل ئه‌و چه‌نده ژی گوت : پشتی دیفچوونه‌كا به‌رده‌وام یا لژنا تایبه‌ت ل زاخۆ ژلایێ ساخله‌میا زاخۆ ڤه 16 جهێن بازرگانی ب كوژمه‌یه‌كێ پاره‌یی هاتنه سزادان و كو چار ژ وان ژی بۆ ماوه‌یێ حه‌فتیه‌كێ هاتنه دائێخستن و پرانیا جهان ژی ژبه‌ر هه‌بونا مادده‌یێن ئێكسپایه‌ر بون و هه ردیسان بتنێ جهه‌ك تێنه‌بیت كو جهه‌كێ فروتنا شریناهیان بون بێ هه‌بونا مێژوویێ ل سه‌ر سارده‌مه‌نیێت وان رادبون ب به‌لاڤ كرنا وان سارده‌مه‌نیا ل سه‌ر دوكانداران و ئه‌ڤه ژی به‌روڤاژی رێنمایێن ساخله‌میێ یه ژبه‌ر كو نابیت دوكانه‌كا شریناهیان ب ڤی كاری رابیت كو بتنێ كارگه‌ه دشێن ب ڤی كاری رابن له‌ورا ئه‌م نه‌چار بوین وی جهی بگرین و ب كوژمه‌یه‌كێ پاره‌یی ژی سزا بده‌ین .
گوت ژی: هه‌ر دماوه‌یێ وێ هه‌یڤێ دا مه شیا ده‌ست ب سه‌ر زێده‌تر 8 ته‌ن و 725 كێلوگرامێن كه‌ره‌سته‌یێن جورا و جور دا بگرین ژئه‌گه‌رێ ده‌م ب سه‌رڤه چوونا وان كه‌ره‌سته‌یان و ل دووڤ رێنمایێن ساخله‌میا زاخۆ ژی ئه‌و كه‌ره‌سته ب ئێكجاری هاتنه ژناڤ برن و زێده‌باری وێ چه‌ندێ ژی نێزیكی ته‌نه‌كا ده‌رمانێن ده‌م ب سه‌رڤه‌چووی ژی هاتنه ژناڤبرن كو ده‌مێ وان ب سه‌رڤه چوو ، لێگه‌ریانا مه به‌رده‌وامه دناڤ باژارێ زاخۆ دا و روژنه ئه‌م دیفچوونا كه‌ره‌سته‌یێن ده‌م ب سه‌رڤه چویویی دكه‌ین .
چه‌ند روژه فروكێن توركیا به‌رده‌وام گوندێن ده‌ڤه‌را نه‌هلێ توپباران دكه‌ن
ئه‌ڤرۆ نیوز، سه‌باح زێبارى:
هیشام دودى جوتیاره‌كێ وێ ده‌ڤه‌رێ یه دبێژیت چه‌ندین روژه به‌رده‌وام فروكێن توركیا گوندێ هیزانكێ ل ده‌ڤه‌را نه‌هلێ توپباران دكه‌ن دوهى ئه‌ڤرۆ ژى شه‌ش جاران ئه‌و گوند كرینه ئارمانج،هه‌تا نوكه زیانێن گیانى و ماددى نه‌بوویه، لێ ئه‌ڤ گونده ژى هاولاتى و خودانێن په‌ز و به‌رهه‌مێ جوتیاران لێ یه له‌وا ئه‌ڤ چه‌نده یا مه‌ترسی یه بۆ خه‌لكێ وان گوندان و دێ زیانێن خوه هه‌بن.
ناڤهاتى زێده‌تر گۆت كو رێژه‌كا زور یا خه‌لكى ل وێ ده‌ڤه‌رێ به‌رهه‌مێ برنج و كونجیا كرینه و نوكه ژى ده‌مێ دورینا به‌رهه‌مى یه و ئه‌م قه‌ستا ناڤ به‌رهه‌مێ خوه دكه‌ین، لێ مه‌ترسیه‌كا زور یا ل سه‌ر مه و ئه‌م هیڤیا خوه نینه ده‌مێ چینه ناڤ به‌رهه‌مێ خودا ترسه‌ك بۆ هه‌مى خه‌لكێ وێرێ دروست بوویه، چونكى بوردومانا فروكان گه‌له‌ك یا نزیكى وان گوندایه، هیڤیدارین ئه‌ڤ چه‌نده نه‌مینیت داكو خه‌لك ب دروستى بشێت قه‌ستا ناڤ به‌رهه‌مێن خوه بكه‌ت.
ئه‌ڤرۆ رێوره‌سمێن جه‌ژنا جه‌مایێ ل په‌رستگه‌ها لالش دێ هێنه گێڕان
ئه‌ڤرۆ، له‌زگین، بارزان:
جه‌ژنا جه‌مایێ ئێكه ژ جه‌ژنێن هه‌ره مه‌زن و دیرێن د ناڤ ملله‌تی ئێزدی دا رێوره‌سمێن جه‌ژنا جه‌مایێ بۆ ده‌مێ حه‌فت رۆژان ل په‌رستگه‌ها لالش دهێنه گێران ئه‌ڤ ساله ل رۆژا 6/10/2019 دێ دیندار و مجیور و سه‌رده‌ری هه‌موو خاسا قه‌ستا په‌رستگه‌ها لالش كه‌ن بۆ گێڕانا جه‌ژنا جه‌مایێ.
خواجه خه‌تاری، ئولدارێ ئێزدیان دیار كر كو ئه‌ڤ ساله رێوره‌سمێن جه‌ژنا جه‌مایێ ل سپێده‌هیا رۆژا 6/10 دێ ده‌ست پێ كه‌ن و هه‌تا رۆژا 13/10/2019 دێ د به‌رده‌وام بن كو ئێزدی ژ دێ ژ هه‌موو جه و ده‌ڤه‌ران قه‌ستا په‌رستگه‌ها لالش كه‌ن و چه‌ندین رێورسمێن جودا یێن ئاینێ د ڤێ جه‌ژنێ دا دهێنه گێران وه‌كو هه‌ر ئێزدیه‌كێ بچیته په‌رستگه‌ها لالش پێدڤیه د سه‌رپرا سه‌لاتێرا ده‌ربازبیت و بچیته سه‌ر حه‌ودا كانیا سپی و ده‌ست و چاڤێن خوه ب ئاڤا وێ ته‌میز و پاقژ بكه‌ت هه‌روه‌سا ژی پێدڤیه كانیا سپی و ده‌رێ قاپیێ و زمزمێ و سندرووكا شێخادی و به‌رێ شباكێ و نیشانگه‌هێن شێخ فه‌خر و مه‌زارگه‌هێ شیشمس و شێخ و پێرێن خوه زیاره‌تی بكه‌ت كو ده‌ربازبوون ل سه‌ر پرا سه‌لاتێرا ڕا نیشانا پاقژكرنا نه‌فس و جانی یه ژ گوننه‌هان.
ناڤهاتی ئاماژه دا وێ چه‌ندێ كو ل هه‌موو ئێڤاریێن رێوره‌سمێن جه‌ژنا جه‌مایێ ژی چرایێن نیشانگه‌هێن خاسا هه‌لدكه‌ن ئه‌ڤه نیشانا پیرۆزیا روناهیێ و ئاگریه و سه‌ما ژی ئێكه ژ پیروزیێن د ناڤ ئێزدیان دا ب قه‌ول و به‌یت و قه‌سیده و قه‌وال ده‌ف و شبابا لێده‌ن بۆ كێشانا سه‌مایێ و گۆت: “كێشانا سه‌مایێ رێوره‌سمه‌كێ دێرینه د ناڤ پرانیا ملله‌تێن كه‌ڤن دا هه‌بوو”.
هه‌مان ئولدارێ ئێزدیان خویا كر كو ل هه‌موو رۆژان سپێده‌هیان پشتی به‌یتا سپێدی و ئێڤاریان ژی به‌ری به‌یتا ئێڤاری رێوره‌سمێن قنتارێ دهێته گێران كو قنتار رێوره‌سمێ هه‌ڤكاری و دلخوه‌شبوونێ یه د ناڤبه‌را شه‌مسانیا و ئادانیان دا و گۆت: “ل رۆژا چارێ ژ جه‌ژنا جه‌مایێ ژی په‌ری دهێته سواركرن ل رۆژا پێنجێ ژ جه‌ژنێ رێوره‌سمێن قه‌پاغێ دهێنه گێران كو قه‌پاغ رێوره‌سمه‌كێ كه‌ڤنه نیشانا پێشكێشكرنا قوربانیه بۆ خودایێ رۆژێ ب هیڤیا هاتنا ساله‌كا پر خێر و به‌ره‌كه‌ت و خوه‌شی یه، ل رۆژا شه‌شێ ژ جه‌ژنا جه‌مایێ ژی په‌ری ل شباكێ دهێته سواركرن هه‌ر كه‌سه‌كێ نه مۆركری بیت ب ئاڤا كانیا سپی ل جه‌ژنا جه‌مایێ دهێته مۆركرن كو مۆركرن ئێكه ژ فه‌رزێن ته‌ریقه‌تێ د ناڤ ئێزدیان دا نیشانا وێ ژی ئه‌وه بۆ پاقژكرن و حه‌لالكرنا كه‌سێ ئێزدی دهێته‌كرن هه‌روه‌سا ژی هه‌موو سه‌رده‌رێن خاسا ل په‌رستگه‌ها لالش سماتێ دروست دكه‌ن ل رۆژا دووماهیێ ژ جه‌ژنا جه‌مایێ تاووس دهێته جوانكرن.
ئێكه‌تیا قوتابیان دێ پڕۆژه‌كی ل دۆر ده‌رماله‌ی به‌لاڤ كه‌ت
هه‌ولێر، قائید میرۆ:
ئێكه‌تیا قوتابیێن كوردستانێ ڤه‌كۆلینه‌ك ل دۆر به‌لاڤكرنا ده‌رمالێ قوتابیێن زانكۆ و په‌یمانگه‌هان ئه‌نجامدایه و سكرتێرێ ئێكه‌تیا قوتابیان ژی ئاشكرا كر كو ل ده‌مه‌كێ نێزیك دێ ڤه‌كۆلین ل دۆر داخوازیێن قوتابیان هێته به‌لاڤكرن.
نێچیرڤان كه‌لاری، سكرتێرێ ئێكه‌تیا قوتابیێن كوردستانێ بۆ رۆژناما ئه‌ڤرۆ دیار كر كو زێده‌تری ساله‌كێ یه ئێكه‌تیا قوتابیان بزاڤێن ڤه‌گه‌ڕاندنا ده‌رمالێ قوتابیێن زانكۆ و په‌یمانگه‌هان دكه‌ت و دگه‌ل سه‌رۆكاتیا جڤاتا وه‌زیران و لایه‌نێن په‌یوه‌ندیدار به‌رده‌وام كار بۆ ڤه‌گه‌ڕاندنا مافێن قوتابیان كریه، ڤه‌كۆلینه‌ك بۆ ڤێ مه‌ره‌مێ ژ لایێ پشكا قوتابیان ڤه هاتیه ئه‌نجامدان و بڕیاره ل ڕۆژێن داهاتی بهێته به‌لاڤكرن، كو تێدا چاوانیا ڤه‌گه‌ڕاندنا ده‌رمالێ قوتابیان و شێوه‌یێ مه‌زاختنێ هاتیه دیاركرن.
ناڤهاتی ئاماژه دا وێ چه‌ندێ كو د ڤه‌كۆلینی دا چه‌ندین راپرسی هاتینه‌كرن و بۆچوونا قوتابی و كه‌سێن شاره‌زا هاتیه وه‌رگرتن، بڕیاره ئه‌ڤ جاره ده‌مێ مه‌زاختنا ده‌رماله‌ی بهێته رێكخستن و ب سیسته‌مه‌كێ نوو بهێته به‌لاڤكرن، داكو قوتابی بهێته راهێنانێ پشتی ده‌رچوونێ ل كۆلیژێ یان په‌یمانگه‌هێ بشێت كاری ب ده‌ستڤه بینیت و زێده‌تر پشت گرێدانێ ل سه‌ر خوه بكه‌ت بۆ په‌یداكرنا داهاته‌كی، ب تایبه‌تی نوكه دامه‌زراندن هاتیه ڕاگرتن و ده‌رچوویان پێدڤی ب ده‌لیڤا كاری و خوه رێڤه‌برنێ هه‌یه.
سەرۆک بارزانی پەیامەکێ بەلاڤ دکەت
ئەڤرۆ نیوز:
سەرۆک مەسعود بارزانی ب هەلکەفتنا هاتنا جەژنا جەمایێ یا خووشک و برایێن ئێزی پەیامەکێ بەلاڤ دکەت و د پەیاما خوە دا سەرۆک بارزانی دیار دکەت کو ب هەلکەفتا هاتنا جەژنا جەمایێ یا خووشک و برایێن ئێزدی پیرۆزباهیەکا گەرم ل هەموو خووشک و برایێن ئێزدی ل کوردستانێ و جیهانێ دکەم و هیڤیدارم جەژنا وان د سەقایەکێ ئارام و خوەش دا برێڤە بچیت.
سەرۆک بارزانی د پشکەکا دی یا پەیاما خوە دا ئاماژە ب هندێ ژی دکەت کو هێڤیدارم ئەو ئێش و ئازارێن چەند سالێن بۆری ژ بەر زۆرداری و تیرۆرێ هاتیە سەرێ خووشک و برایێن مە یێن ئێزدی ژی ب دووماهی بهێت.
جارا ئێكێ يه ده‌ست بسه‌ر ڤى جورێ مه‌ترسيدار يێ ماددێن هوشبه‌ر دهێته گرتن
ئه‌ڤرۆ نيوز:
ل ده‌رگه‌هێ حاجى عمران يێ سنورى ده‌ست ب سه‌ر جوره‌كێ مه‌ترسيدار يێ مادده‌ێن هوشبه‌ر دا هاته گرتن كو جارا ئێكێ يه ئه‌ڤ جوره دئينه كوردستانێ.
رێڤه‌به‌ريا نه‌هێلانا مادهێن هوشبه‌ر دياركر ئه‌ڤ جورێ مادده‌يێ هوشبه‌ر ئه‌وێ هاتيه ده‌سته‌سه‌ر كرن ژ جورێ كيتامينه و مادده‌يه‌كێ هوشبه‌رێ مه‌ترسيداره كو شه‌ش كه‌سێن ئيرانى بزاڤ كربوون بينه هه‌رێما كوردستانێ كو ئێك ژوان ئافره‌ته و وه‌ك گروپه‌ك كار دكر.
هه‌مان ژێده‌ر ئه‌و چه‌نده ژى دياركر ئه‌ڤ ماده‌يێ هوشبه‌ر د ناف چنتايێن جلوبه‌رگان هاتبوونه ڤه‌شارتن لێ ئاسايشا كومه‌لگه‌ها ده‌رگه‌هێ سنورى يێ حاجى عمران شيان ڤان كه‌سان ب مادده‌يێن هوشبه‌ر ڤه ده‌سته‌سه‌ر بكه‌ن و ره‌وانه‌ى دادگه‌هێ بكه‌ن و نوكه لژێر ڤه‌كولينێ نه.
هه‌ژى گۆتنێ يه ئه‌ڤ جورێ مادده‌يێ هوشبه‌ر كيتامين د بنه‌ره‌ت دا جوره ده‌رمانه‌كه ل سالا 1960 به‌ربه‌لاڤ بوويه تايبه‌ت د بوارى زانستێ پزيشكى دا و هاتيه بكارئينان و تايبه‌ت ل ده‌مێ ئه‌نجامدانا نشته‌گه‌ريان، لێ ژلايێ خه‌لكى ڤه بشێوه‌كێ نه زانستى دهێته بكارئنان برێيا ده‌رزى لێدانێ و مه‌ترسيداره بۆ سه‌ر ژيانا كه‌سان لده‌مێ بكارئينانێ له‌ورا هاتيه قه‌ده‌غه‌كرن.
سه‌رۆكێ حوكمه‌تا هه‌رێمێ جه‌ژنا جه‌مايێ ل كوردێن ئێزدى پيروز دكه‌ت
ئه‌ڤرۆ نيوز:
سه‌رۆكێ حوكمه‌تا هه‌رێما كوردستانێ مه‌سرور بارزانى بهه‌لكه‌فتا هاتنا جه‌ژنا جه‌مايێ ل كوردێن ئێزدى پيروزدكه‌ت و ب ڤێ هه‌لكه‌فتێ ژى په‌يامه‌كێ به‌لاڤ دكه‌ت.
د ڤێ په‌يامێ دا مه‌سرور بارزانى سه‌رۆكێ حوكمه‌تا هه‌رێما كوردستانێ گه‌رمترين پيروزباهى ل خويشك وبرايێن كوردێن ئێزدى يێن كوردستانێ و جيهانێ دكه‌ت و هيڤى خواست لژێر سيبه‌را پێكڤه ژيانێ ب ئاشتيانه ل هه‌رێما كوردستانێ باشتر به‌رده‌وام بن پشتى وان رۆژێن سه‌خت ده‌ربازكرين و سوزێ ده‌ين كه‌مترخه‌ميێ نه‌كه‌ين بۆ كێمكرنا ئێش و ئازارێن خه‌لكێ كوردێن ئێزدى.
نيشاندان
WP Facebook Auto Publish Powered By : XYZScripts.com