ئه‌ڤرۆ نيوز:

جڤاتا وه‌زيرێن هه‌رێما كوردستانێ گرێبه‌ستا چار هزار مامۆستا بۆ ساله‌كا دى نووكر، جێگرێ سه‌رۆكێ ئێكه‌تيا مامۆستايێن كوردستانێ ژى دبێژيت، مه‌ داخواز كريه‌ ئه‌و مامۆستا بهێنه‌ دامه‌زراندن ودێ دبزاڤێن خوه‌ دا د به‌رده‌وامبين، چونكى ده‌مێ شه‌ش سالانه‌ ئه‌و گرێبه‌ستن وپێدڤيه‌ بهێنه‌ دامه‌زراندن.

ل دووڤ نڤيساره‌كا سه‌رۆكاتيا جڤاتا وه‌زيرێن هه‌رێما كوردستانێ، رازيبوون ل سه‌ر نووكرنا گرێبه‌ستا چار هزار مامۆستا بۆ سالا خواندنێ 2019-2020 هاته‌ دان، كو ژ 22/7/2019 هه‌تاكو 30/9/2020 دێ گرێبه‌ستا وان به‌رده‌وامبيت.

ئه‌حمه‌د گه‌رميانى، جێگرێ سه‌رۆكێ ئێكه‌تيا مامۆستايێن كوردستانێ د داخۆيانيه‌كا رۆژنامه‌ڤانى دا گۆت” وه‌زاره‌تا په‌روه‌ردێ ل سه‌ر داخوازا ئێكه‌تيا مامۆستايان ومامۆستايێن گرێبه‌ست، داخوازه‌ك ژ جڤاتا وه‌زيران كريه‌ كو مامۆستايێن گرێبه‌ست بهێنه‌ دامه‌زراندن وبزاڤێن به‌رده‌وام ژى دێ هێنه‌ دان كو هه‌موو مامۆستايێن گرێبه‌ست بهێنه‌ دامه‌زراندن، به‌لێ د نوك دا گرێبه‌ستا وان بۆ ده‌مێ ساله‌كێ هاته‌ نووكرن”.

گۆت ژى” ده‌مێ شه‌ش سالانه‌ ئه‌و مامۆستا گرێبه‌ستن، داخوازێ ژ حوكمه‌تا هه‌رێمێ ووزاره‌تا دارايى دكه‌ين وان ب دامه‌زرينن، چونكى د هه‌مووره‌وشان دا ئه‌و مامۆستا د به‌رده‌وام بوون ل سه‌ر كارێ خوه‌ ونوكه‌ ده‌م يێ هاتى بهێنه‌ دامه‌زراندن”.

ئه‌ڤرۆ نیوز:

پارێزگارێ شه‌رعى یێ كه‌ركووكێ نووچه‌یێ دروستكرنا لیسته‌كا سه‌ربه‌خو بۆ پشكدارى كرن د هه‌لبژارتنێن ئه‌نجوومه‌نێ پارێزگه‌ها كه‌ركووكێ پشت راستكر و زانیاریێن زێده‌تر ژى به‌لاڤ دكه‌ت.

زێده‌تر نه‌جمه‌دین كه‌ریم دیاركر د به‌رنامێ وان دایه‌ بزاڤێن دروستكرنا لیسته‌كا سه‌ربه‌خو بۆ هه‌موو پێكهاتێن كورد، عه‌ره‌ب، توركمان و كلدان و ئاشوریان هه‌بیت و دێ به‌رنامه‌كێ روون و ئاشكرا ژى بۆ پارێزگه‌ها كه‌ركووكێ دێ وان هه‌بیت.

ناڤهاتى ئه‌و چه‌نده‌ ژى دیاركر نوكه‌ ره‌وشا ئێمناهى و سیاسى و جڤاكى باش نینه‌ و پێدڤیه‌ هه‌موو پێكهاتێن ڤى باژێرى پێكڤه‌ نوونه‌ر هه‌بن و لیسته‌ك هه‌بیت جهێ باوه‌ریێ بیت و دگه‌ل لایه‌نێن دى یێن ژبلى كوردان د گوتوبێژان داینه‌ و ئه‌و ده‌مێ گونجاى به‌رده‌ست هه‌یه‌ لیسته‌كا بهێز دروستبكه‌ین و ئه‌ڤێ لیستێ چو په‌یوه‌ندى ب لیستا به‌رى نوكه‌ یا برایتى یا جڤاتا پارێزگه‌هێ نینه‌، هیڤى خواست به‌رى هه‌لبژارتنان ره‌وشا كه‌ركووكێ ئاسایى بیت و هه‌لبژارتنێن بێ سه‌خته‌ تێدا بهێنه‌ ئه‌نجامدان.

ئەڤرۆ نیوز، نەوزاد ھلوری:

وەکو رێزگرتن ل خەبات و قوربانیدانا جینوسایدا بارزانیان، بریارە د سالروژا جینوسایکرنا 8000 بارزانیان دا رێورسمەکێ تایبەت ل سەر گورستانا جینوسایدا بارزان ل گوندێ بارزان ئەڤ رۆژ بھێتە ساخکرن.

رێبوار رەمەزان بارزانی، رێڤەبەرێ رێڤەبەریا گشتی یا کاروبارێن شەھید و ئەنفالکریێن بارزان بۆ ئەڤرۆ نیوز گۆت: (وەکو رێزگرتن ل خەبات و قوربانیدانا 8000 بارزانیان بو بزاڤا رزگاریخوازیا کوردستانێ کو ب بریارا رژێما بەعس 36 سال بەری نوکە ب ساخی ھاتینە بن ئاخکرن، رێڤەبەریا مە ب ھەڤکاری ل گە دام و دەزگەھێن دن یێن دەڤەرێ دێ رابییت ب دانانا رێورسمەکێ تایبەت بو کەسوکارێن جینوسایدکری و مێھڤانان دەما کو سەرەدانا گورستانا جینوسایدکریان دکەن).

زێدەتر گۆت: (رێورسم دێ ئێڤاریا رۆژا 31/7/2019 لسەر گورستانا جینوسایدکریان ب چەند چالاکیەکان ب رێڤەچیت و نوکە ئەم یێ بەرھەڤیان دکەین و ب ئانەھیا خودێ ئەگەر چ کێشە نەبن رێورسم دێ ددەما خوە دا وەکو ھەر سال ب رێڤەچن).

ناڤبری دیارکر ژی کو بو زێدەتر گرنگیدان ب جینوسایدا بارزانیان مونومێنتەکا تایبەت بو جینوسایدا بارزانیان دھێتە چێکرن و زێدەتر گۆت: (مونومێنتا جینوسایدا بارزانیان ھەر لسەر گورستانا وان دھێتەچێکرن و دێ بیتە جھێ ھەلگرتنا بەرمایک و وێنە و دیکومیێنت و ئەرشیفێ جینوسسایدکریان کو ب ھەول و بزاڤێن مە و خەلکی و کەسوکارێن وان ھاتینە کومکرن داکو جیلێ نوو بزانن کوردان گەلەک قوربانی داینە ھەتاکو ئەڤ ئازادیە ب دەستڤە ھاتی).

دھێتە زانین کو بەری 36 سالان رژێما بەعس 8000 توخمێ نێرینەیێ بارزانی گرتن و پاشان ل بیابانێن نوگرە سەلمان ل باشورێ عیراقێ ب ساخی بن ئاخکرن، ب ھەول و بزاڤێن حوکمەتا ھەرێما کوردستانێ ھژمارەکا روفاتێن وان ھاتینە زڤراندن و ل گوندێ بارزان ھاتینە ڤەشارتن، ھەر سال د سالروژا جینوسایدکرنا وان دا رێورسمێن تایبەت وەکو رێزگرتن بو خوینا وان دھێتە ساخکرن.