ئه‌ڤرۆ نيوز:
په‌يڤدارێ وه‌زاره‌تا ئه‌وقاف وكاروبارێن ئاينى ل هه‌رێما كوردستانێ، نه‌به‌ز ئيسماعيل د داخۆيانيه‌كێ دا راگه‌هاند” ل رۆژا چارشه‌مبى 10/7/2019 گه‌را ئێكێ يێ حه‌جيێن هه‌رێما كوردستانێ به‌ر ب وه‌لاتێ سعوديێ دێ ب رێكه‌ڤيت وچوونا حه‌جيان ل گه‌رێن دى دێ هه‌تا 15/7/2019 به‌رده‌وامبيت”.
گۆت ژى” بۆ ئه‌ڤ ساله زێده‌تر ژ حه‌فت هزار حه‌جيان دێ به‌ر ب سعوديێ ب رێكه‌ڤن كو 6200 كه‌س ژ وان ب حه‌جا ئاسايى دێ چن، به‌لێ 802 كه‌س ژ وان ب گۆژمێ شه‌ش هزار و 300 دۆلاران دێ ب رێكه‌ڤن”.
ئەڤرۆ نیوز، عەلی حاجی :
دداخویانیەكێ دا سەروكێ باژێرڤانیا زاخۆ بۆ ئه‌ڤرۆنیوز دیار كر زێدەتری 60% جادەیێن باژێرێ زاخۆ نەهاتینە قیركرن و خەلكەك یێ گازندەیان دكەن و ئەو خەلكێ سەرەدانا مە دكەن پتریا وان گازندەیا نەقیركرنا جادەیێن تاخێن خوە دكەن و ئەڤ چەندە ژی دبیتە ئاریشە بۆمە .
بژار مونیب، سه‌رۆكێ باژێرڤانیا زاخۆ زێدەتر گوت : ل سالا بۆرى ب پێشینەیا باژێرڤانیا زاخۆ ب گۆژمێ سێ ملیار دیناران مە شیابوو 70 جادەیێن تاخێن زاخۆ قیربكەین، بەلێ ژ سالا 2001 هەتا 2012 دو جاركی پارچە زەڤی ب سەر وه‌لاتیان دا هاتنە بەلاڤكرن ، بەلێ هیچ خزمەتگوزارییەك بۆ وان دەڤەران نەهاتیە دابینكرن ، لەورا هەتا نوكە 442 كیلۆمەتران جادەیێن ناڤ باژێرێ زاخۆ دا نەهاتینە قیر كرن ، رۆژانە ژی خەلكەك یێ سەرەدانا مە دكەت و گازندەیا قیرنه‌كرنا جادەیێن خوە دكەت ، قیركرنا وان هەمی جادەیان پێتڤی ب گۆژمەكێ مەزن یێ پارەی یا هه‌ى، ئەم ب مافێ وى خەلكێ ژی دزانین گازندەیان بكە ن دا كو جادەیێن وان بهێنە قیركرن ژبەر كو ل زڤستانێ دناڤ هەریێ دانە و ل هاڤینا ژی دناڤ توزێ دانه”.
خویاكر ژى” بۆ ده‌مێ سێ سالانه چه‌ندین جاره مه داخوازى ژ لایه‌نێن د سه‌ر خوه‌دا كریه بۆ چاره‌سه‌ركرنا ڤێ ئاریشێ، به‌لێ هه‌تا نوكه چو به‌رسڤه‌ك نه‌دایه مه، لەورا ئەم پێشنیار دكەین هەیڤانە حوكمه‌تا هه‌رێمێ ملیۆن دۆلاران رادەستی قایمقامیێ بكەت كو ب وی گۆژمی هەیڤانە پشكەكا جادەیان بهێنە دروستكرن، ب وی رەنگی بارگرانی ژی ناكەڤیتە سەر ملێ حوكمه‌تێ و ئەو پارە ژی گەلەك نینە هه‌كه حوكمه‌تێ بڤێت ب مه‌زێخیت، ئەز نابێژم دڤێت ئەڤ كارە ب رێیا باژێرڤانیا زاخۆ بهێتە كرن ، هەر لایەنەكێ بشێت ب وی پارەی كار بكەت، بلا بهێت و دێ بیتە جهێ دلخوەشیا مە ، ژبەر كو ئاریشا مەزن ل زاخۆ قیرنه‌كرنا وان جادایه.
ئەڤرۆ نیوز ، عەلی حاجی :
د دو روودانێن جودا دا ل باژێرێ زاخۆ ، ئاگر بەر دبیتە دو ترومبێلێن بارهەلگر و شوفێرەك ژی بریندار دبیت.
بێوار عەبدولعەزیز ، بەرپرسێ راگەهاندنا بەرەڤانیا باژێری ل پارێزگەها دهوكێ بۆ ئەڤرۆ نیوز گۆت” د دو روودانێن جودا یێن ئاگر بەربونێ دا ل سنورێ دەڤەرا زاخۆ زیانێن دراڤى بەر ب دو ترمبێلێن بارهەلگرێن بیانی دكەڤیت ، روودانا ئێكێ ل روژا دوشەمبێ 8/7/2019 ل دەمژمێر 7ی شەڤ ل نێزیك دەڤەرا شیناڤا ل زاخۆ ژ ئەگەرێ شورتەكێ دناڤ ترومبێلەكا بارهەلگرا توركی ، پشتی تیمێن مە گەهشتینە جهێ روودانێ شیان ئاگری كونترول بكەن ، بەلێ شوفێرێ وێ ترومبێلێ دوێ روودانێ دا بریندار بو و ئێكسەر هاتە رەوانەكرن بۆ نەخوه‌شخانەیا هاوارهاتنێ ل زاخۆ و ترومبێل ژی ب ئێكجار هاتە سوتن و ژناڤ چوو”.
گوت ژی : روودانا دوویێ هەر ل هەمان روژ ل دەمژمێر 9ی شەڤ هاتە روودان ، دەما ئاگر بەردبیتە ترومبێلەكا دی یا بارهەلگرا توركی دناڤ كومەلگەها ئیبرایهم خەلیل ، تیمێن مە ل پیشابیرێ هەر زوو شیان كونترولێ ل سەر ئاگری بكەن و زیانێن زێدەتر بەر ب ترومبێلێ نەكەڤیت ، تیمێن مە شیان شوفیِری ژی قورتال بكەن و بتنێ زیانێن دراڤى بەر ب ترومبێلێ كەڤتن و هەتا نوكە ئەگەرێن وێ روودانا ئاگر بەربونێ نەهاتینە زانین”.
ئەڤرۆ نیوز ، عەلی حاجی :
دەزگایێ بارزانی د هەوەكێ دا چەندین ئامیرە ل سەر پەككەڤتیێن دەڤەرا زاخۆ بەلاڤكرن و بریارە د دەمەكێ نێزیك دا گەرا دويێ یا وان هاریكاریان ل سەر پەككەڤتیان بهێنە بەلاڤكرن .
محەمەد مەهدی، بەرپرسێ ئوفیسا دەزگایێ بارزانی ل زاخۆ بۆ ئەڤرۆ نیوز ئاشكەرا كر دەزگایێ بارزانیێ نەمر ب هەڤكاری دگەل رێكخراوا LDS یا ئەمریكی ، دقوناغا ئێكێ دا مە 15 ئامیرە ژ 5 جوران ل سەر 15 پەكەڤتیێن دەڤەرا زاخۆ بەلاڤكرن و بریارە د دەمەكێ نێزیك دا قوناغا دويێ یا وان ئامیران بهێنە بەلاڤكرن ل سەر پەككەڤتیێن سنورێ دەڤەرا زاخۆ ، بریارە 90 پەككەڤتێ ژ زارۆك و كەسانێن دانعەمر و گەنج و ژن هاریكاریێن ب ڤی رەنگی ل سەر وان بەلاڤ بكەین و دێ ب چەندین قوناغان ئەو هاریكاری گەهنە دەستێ وان پەككەڤتیان .
گوت ژی : پشتی 90 ئامیرە بهێنە بەلاڤكرن، دێ بەردەوامین ل سەر بەلاڤكرنا زێدەتر یا ئامیران بۆ پەككەڤتیێن دەڤەرێ ، ئەو ئامیرەێن هاتینە بەلاڤكرن هەموو پێشتر بۆ وان كەسان هاتینە پیڤان و ژ نوو ئەو ئامیرە گەهشتینە دەستێ مە .
ئه‌ڤرۆ نیوز:
ده‌سته‌یا ده‌ستپاكیێ دۆسێیا پله بلندكرنا نه قانوونى یا هزاران فه‌رمانبه‌ران دێ ده‌ته كابینا نوو یا حوكمه‌تا هه‌رێما كوردستانێ.
د وێ دۆسێیێ دا 1557 فه‌رمانبه‌ر ب شێوه‌كێ نه قانوونى هاتینه پله بلندكرن بۆ پلێن بلند كو د ناڤ وان دا نه خوینده‌وار وبێ باوه‌رنامه یێن هه‌ین، به‌لێ یێن بووینه راوێژكار.
هه‌روه‌سا 1077 فه‌رمانبه‌رێن ده‌رچوویێن قۆناغا سه‌ره‌تایى وبێ باوه‌رنامه یێن هه‌ین ول ده‌زگه‌هێن حوكمه‌تێ پله‌یا(رێڤه‌به‌رێ پێشكه‌فتى) پێ هاتیه دان.
دیسا 470 كه‌س كو ده‌رچوویێن قۆناغێن ئاماده‌یى وناڤه‌ندى وسه‌ره‌تایى وبێ باوه‌رنامه نه وپلێن (شاره‌زا، جێگرێ رێڤه‌به‌رێ گشتى) پێ هاتینه دان.
مشیر رەشید ئیبراهیم، رێڤه‌به‌رێ گشتیێ فه‌رمانگه‌ها كاروبارێن قانوونى وڤه‌كۆلینێ ل ده‌سته‌یا ده‌ستپاكیێ ل هه‌رێما كوردستانێ بۆ باس راگه‌هاند كو ئێكه‌م كارێ ده‌سته‌یا ده‌ستپاكیێ ل گه‌ل كابینا نوو یا حوكمه‌تێ، دێ تایبه‌ت بیت ب دۆسێیا نه قانوونى یا پله بلندكرنا فه‌رمانبه‌ران وگۆت” پێدڤیه پێداچوون ب دۆسێیا هه‌موو فه‌رمانبه‌ران دا بهێته كرن وئێك ب ئێك بهێنه سه‌حكرن، كا چاوان خزمه‌ت بۆ هاتیه هژماركرن وچاوان پله پێ هاتیه دان وهه‌ر كه‌س مافێ وى پێ بهێته دان”.
گۆت ژى” ب به‌لگه ل ده‌ف مه یا هه‌ى كو چه‌ندین هزار فه‌رمانبه‌ر بێ ل به‌رچاڤ وه‌رگرتنا باوه‌رنامێ، ناڤونیشانێ نه قانوونى و 3 بۆ 5 پله‌یان ب جاره‌كێ بۆ هاتینه دان و نه دادپه‌روه‌ریه‌كا زۆر هاتیه كرن”.
زێده‌تر گۆت” ل ناڤ په‌رله‌مانێ كوردستانێ وده‌زگه‌هێن حوكمه‌تا هه‌رێما كوردستانێ، هزار و 557 كه‌س مووچێ پله سێ هه‌تا پلا بلند ئه‌لیف وه‌ردگرن وباوه‌رنامێن وان د گونجاى نینن، زێده‌بارى وێ چه‌ندێ 9 كه‌سان پله بلند پێ هاتیه دان وچو باوه‌رنامه نینن، د ده‌مه‌كى دا نابیت هه‌لگرێ باوه‌رناما ئاماده‌یى ژى بچیته پلا بلند
ئاشكراكر ژى” هه‌كه حوكمه‌ت وێ دۆسییێئێكلا بكه‌ت، ژ لایه‌كى دێ پاره‌كێ مه‌زن بۆ ڤه‌گه‌ریت، ژ لایه‌كێ دى ژى دێ بنه‌مایێ دادپه‌روه‌ریێ د ناڤ فه‌رمانبه‌ران دا زڤریت و مه ئومێد یا ب كابینا نوو هه‌ى”.
ئەڤرۆ نیوز:
د کومبوونا لیژنا بلند یا ساخلەمیا گشتی دا ل پارێزگەھا دھۆکێ بڕیار ھاتیە دان ھەموو مۆلەتێن ترۆمبێلێن ماسیان د فرۆشن بھێنە ھەلوەشاندن، ھەروەسا ب چو رەنگەکی نابیت دەستووری ب فرۆتنا گۆشتێ جەمەدگرتی، ژبلی یێ بەرازیلی بھێتە دان و پێدڤیە دووڤچوونا بۆریێن شکەستی یێن ئاڤێ بھێتە کرن.
ب سەرپەرشتیا جەھوەر عەلی عەزیز، قایمقامێ دھۆکێ و ب ئامادەبوونا د. نزار عسمەت، رێڤەبەرێ گشتیێ ساخلەمیا پارێزگەھا دھۆکێ، کۆمبوونا ھەیڤانە یا لیژنا بلند یا ساخلەمیێ ل دھۆکێ ھاتە ئەنجامدان.
د کومبوونێ دا کو نوونەرێن ھەموو رێڤەبەریێن پەیوەندیدار ل پارێزگەھا دھۆکێ ئامادەبوون، قایمقامێ دھۆکێ دیار کر کو پشتی زێرەڤانیا بازاری ھاتیە گڤاشتن، رەوش بەر ب باشتر چوویە و گۆت: ئارمانجا مە ئەوە خرابیان کێم بکەین و باشیان زێدە بکەین.
د کومبوونێ دا تەوەرێن خوپاراستن ژ نەخۆشیێن ھاڤینێ، ئامارێن ھەیڤێن بۆری، چاوانیا پاراستنا ژینگەھێ و ژناڤبرنا بەرمایکێن نۆشداری و چاندنێ و ڤیتەرنەریێ و رەوشا مەلەڤانگەھان، ھاتنە گەنگەشەکرن و بڕیار ھاتە دان کو پێدڤیە ب زووترین دەم کارێ ژناڤبرنا بەرمایکان بھێتە رێکخستن و ل سۆتنگەھان بھێنە کۆمکرن و ژناڤبرن.
ھەروەسا ئەندامێن لیژنێ دیار کر کو دەستووریێن ترۆمبێلێن ماسیان د فرۆشن ھەموو ھاتینە ڤەکێشان و ھەلوەشاندن و ل ھەر جھەکێ ترۆمبێلێن فرۆشیارێن ماسیان بھێنە دیتن دێ پێرابوون دگەل دا ھێنە وەرگرتن.
ئەڤرۆ نیوز:
جڤاتا ئاسایشا هەرێما کوردستانێ د راگەهاندنەکێ دا دیار کریە کو هندەک دەزگەهێن راگەهاندنا سەر ب پەکەکێ وەسا دیار کرینە کو جڤاتا ئاسایشا هەرێما کوردستانێ دەست د کوشتنا هندەک سەرکردێن پەکەکێ دا هەبوویە، ئەم ڤێ یەکێ ب توندی رەت دکەین و دیار دکەین کو چو راستی بۆ هندێ نینن.
د بەردەوامیا داخۆیانیێ دا ئاماژە ب هندێ ژی هاتیە کرن کو دەزگەهێن ئێمناهیێ یێن هەرێما کوردستانێ بەرپرسیارن ژ دابینکرنا ئاسایشێ بۆ وەلاتیان و کوردستانا ئازاد پێدڤی ب هندێ نینە کو جارەکا دی بهێتە ئازادکرن.
هەر د راگەهاندنا جڤاتا ئاسایشێ دا داخواز ژ پەکەکێ ژی هاتیە کرن کو هەرێما کوردستانێ نەکەتە مەیدانا شەرێ خوە ل گەل تورکیا دا زیان نەگەهیتە وەلاتیێن هەرێما کوردستانێ.
ئەڤرۆ نیوز:
فه‌رهاد ئه‌مین ئه‌تروشى پارێزگه‌رێ دهوكێ پێشوازیا خانم ( كلارێس ) كونسلا ئێكه‌تیا ئه‌ورپا ل هه‌رێما كوردستانێ وشاندێ دگه‌لدا كر.
د هه‌ڤدیتنه‌كێ دا ب ئاماده‌بونا ئیسماعیل محەمەد هاریكارێ پارێزگه‌رى بو كاره‌وبارێن ئاواره وپه‌نابه‌ران به‌حسێ ره‌وشا پارێزگه‌ها دهوكێ وره‌وشا ئاواره وپه‌نابه‌ران ل ناڤ وده‌رڤه‌ى كه‌مپان ل سنورێ پارێزگه‌هێ وئه‌و كار وخزمه‌تا بو دهێته پێشكێشكرن ب رێكا پارێزگه‌هێ وجڤاكێ ده‌وله‌تى هاته كرن.
دته‌وه‌ره‌كێ دن دا به‌حسێ به‌رنامێن ئێكه‌تیا ئه‌ورپى یێن پێشئێخستنا كه‌رتێ ساخله‌میێ وگه‌شه‌پێدانا جڤاكى تایبه‌تى ئه‌و پشته‌ڤانیا ئێكه‌تیا ئه‌روپى ب رێكا به‌رنامێن مه‌داد بو كه‌رتێ ساخله‌میێ پێشكێش دكه‌ت هاته كرن .
كونسلا ئێكه‌تیا ئه‌ورپا ته‌كه‌زكر كو به‌رنامێن وان ماوێ دوو سالێن دن دێ هێته كاراكرن.
پارێزگه‌رێ دهوكێ خوشحالیا خو ب سه‌ره‌دانا شاندێ ناڤبرى دیاركر وسوپاسیا ئێكه‌تیا ئه‌وپى كر كو ل سالێن بورى پشته‌ڤانیا چه‌ندین پروژێن گه‌شه‌پێدانا جڤاكى وكه‌رتێ ساخله‌میێ كریه وخواست كو ئێكه‌تیا ئه‌روپى به‌رده‌وامیێ بده‌ته به‌رنامێن خو بو ئاواره وپه‌نابه‌ران وخوجهێن ده‌ڤه‌رێ وبه‌رهه‌ڤیا پارێزگه‌هێ نیشان دا بو هه‌ر هه‌ڤكاریه‌كێ.
هه‌ژى گوتنێ یه ئێكه‌تیا ئه‌ورپى ب رێكا به‌رنامێن (مه‌داد) پشته‌ڤانیا چه‌ندین پروژێن گه‌شه‌پێدانا جڤاكى وكه‌رتێ ساخله‌میێ ل دهوك وئاكرێ وچه‌ند كه‌مپان وجهێن دى كریه وبریاره بو ماوێ دوو سالێن دن به‌رده‌وامیێ بده‌ته وان به‌رنامه‌یان.
ئەڤرۆ نیوز، رێوار مزیری:
بەرپرسێ پشکا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ دیار کر کو چار کەس د روودانەکا هاتنوچوونێ دا ل شەڤا ۸ ل سەر ۹/۷/۲۰۱۹ ل سەر جادا کومەلگەها باگێرا برینداربوون.
موقەدمێ مافپەروەر ئازاد تەها، بەرپرسێ پشکا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز ئاشکرا کر کو ژ ئەگەرێ پەیدابوونا روودانەکا هاتنوچوونێ دناڤبەرا دو ترۆمبێلان دا ژ جورێن (هوندای تکسون) و (شۆفرلێت ئوبترا) ل سەر جادا کومەلگەها باگێرا چار کەس برینداربوون و بۆ نەخۆشخانا تەنگاڤیان ل دهۆکێ هاتنە ڤەگوهاستن.
ئه‌ڤرۆ نیوز:
وه‌زاره‌تا په‌روه‌ردێ ل هه‌رێما كوردستانێ راگه‌هاند، بۆ ب ده‌ستڤه‌ئینانا سیسته‌مه‌كێ هاریكار بۆ بریاردان وب هیزكرنا چاوانى وچه‌ندایه‌تیا خواندنێ ل هه‌رێما كوردستانێ، دێ ب رێیا سیسته‌مێ parwardaـ e چار هزار قوتابخانه هێنه ئه‌لكترۆنیكرن.
ئاماژه‌كر ژى كو سیسته‌مێ نوو دێ پشكێن (مامۆستایان وفه‌رمانبه‌ران، قوتابیان، قوتابخانه، مووچه، گۆكا، ده‌رچوو و هاتوو) ڤه‌گریت.
ل دووڤ رۆهنكرنه‌كا وه‌زاره‌تا په‌روه‌ردێ، ژ 12/6/2019 هه‌تا 27/6/2019 فه‌رمانبه‌رێن وه‌زاره‌تێ وپه‌روه‌ردێن پارێزگه‌هان وپه‌روه‌ردێن قه‌زایان پشك\دار بوون د خۆلا راهێنانێ ل سه‌ر ڤى سیسته‌مى ول 30/6/2019 ده‌ست ب خۆلێن راهێنانێ بۆ قوتابخانان هاتیه كرن كو هه‌ر قوتابخانه‌یه‌ك بۆ ده‌مێ 8 رۆژان دێ پشكداریێ د خۆلێ دا كه‌ت كو تاكو 7/8/2019 دێ به‌رده‌وامبیت.
نيشاندان