ئەڤرۆ نیۆز:
ئه‌ڤرو 3-7-2019ل رێڤه‌به‌ریا كوچ وكوچبه‌ران ل دهوكێ ب ئاماده‌بونا ئیسماعیل محەمەد ئەحمەد هاریكارێ پارێزگه‌رێ دهوكێ بو كاروبارێن مروڤایه‌تى وحسێن قایدى به‌رپرسێ نڤێسینگه‌ها رزگاركرنا كچ وژنێن ئێزدى ل دهوكێ وئدریس مسته‌فا نونه‌رێ وه‌زاره‌تا كوچ وكوچبه‌رێن ئیراقا فیدرال وچه‌ند به‌رپرسێن ئیدارى ، كونگره‌كێ روژنامه‌ڤانى بو به‌رپرسا نڤێسینگه‌ها به‌رسڤ دانا قه‌یرانان هاته ل دارخستن ژبو راگه‌هاندنا به‌لافكرنا هاریكاریێن وه‌زاره‌تا كوچ وكوچبه‌رێن ئیراقا فیدرال لسه‌ر كچ وژنێن ئێزدى یێن ژ ده‌ستێن تیرورستێن داعش هاتینه رزگاركرن.
ل ده‌ستپێكا كونگره‌ى مه‌نال محمد به‌رپرسا نڤێسینگه‌ها به‌رسڤدانا قه‌یرانان( JCC)په‌یڤه‌ك خاندن وگوت: ئه‌ڤرو ئه‌م دێ گه‌را دووێ `هاریكاریێن دراڤى یێن وه‌زاره‌تا كوچ وكوچبه‌رێن ئیراقێ ل سه‌ر(899) رزگاربویێن ژده‌ستێ داعش به‌لاڤكه‌ین وبو هه‌ر رزگاربویه‌كى كوژمێ (2) ملیون دینار هاتینه ته‌رخانكرن وته‌كه‌زكر كو ئه‌ڤ به‌رنامه ب هه‌ڤكاریا وه‌زره‌تا نافخویا هه‌رێما كوردستانێ و وه‌زاره‌تا كوچ وكوچبه‌رێن ئیراقێ دێ ئه‌نجامدان و وپشتى ڤێ گه‌رێ به‌رنامه دێ به‌رده‌وامبیت.
پاش هاریكارێ پارێزگه‌رى بو كاروبارێن ئاواره وپه‌نابه‌ران دپه‌یڤه‌كێدا سوپاسیا وان هه‌موو لایه‌نان كر یێن ئه‌ڤ به‌رنامه رێكخستى هه‌روه‌سا سوپاسیا به‌رێز نیچیرڤان بارزانى سه‌روكێ هه‌رێما كوردستانێ كر كو هه‌ر ژسالا 2014ێ وده‌مێ كچ وژنێن ئێزدى هاتینه ره‌ڤاندن زور هاریكاربویه بو رزگاركرنا ره‌ڤاندیا وئه‌ڤرو (899) ژكچ وژنێن ئێزدى یێن هاتینه رزگاركرن دێ هاریكاریه‌كا دراڤى وه‌رگرن ئه‌وژى مه‌بله‌غێ دوو ملیون دینارایه وبه‌رى نوكه ژى ئه‌ڤ هاریكاریه ل سه‌ر (77) رزگاربویێن دن هاتیه به‌لافكرن .
هاریكارێ پارێزگه‌رى بو كاروبارێن ئاواره وپه‌نابه‌ران ته‌كه‌زكر كو ئه‌ڤ كوژمێ پاره‌ى یێ كێمه ورزگاربویێن ژده‌ستێ تیرورستێن داعش پێدڤى بهاریكاریێن ده‌رونى وته‌ندورستى وخزمه‌تكاریێن دى هه‌یه وهیڤى خاستن هه‌موو رزگاربویێن ماین ڤێ هاریكاریێ وه‌رگرن وسوپاسیا هه‌موو لایه‌نان كر یێن ئه‌ڤ هاریكاریه دابینكرین تایبه‌تى وه‌زاره‌تا كوچ وكوچبه‌رێن ئیراقێ وبه‌رهه‌ڤیا پارێزگه‌هێ نیشان دا بو هه‌ر هه‌ڤكاریه‌كێ.
پاش حسێن قایدى به‌رپرسێ نڤێسینگه‌ها رزگاركرنا كچ وژنێن ئێزدى ل دهوكێ دپه‌یڤه‌كێدا ته‌كه‌زكر كو ئه‌ڤ پروژه به‌رى ساله‌كێ هاتبو پێشنیاركرن وئه‌م دگه‌ل لایه‌نێن په‌یوه‌ندیدار گه‌هشتینه وێ چه‌ندێ كو بو هه‌ر رزگاربویه‌كى دوو ملیون دینار بهێنه دابینكرن وئه‌ڤرو ئه‌و به‌رنامه كه‌ته دوارێ بجهئینانێ دا و هاریكارى ل سه‌ر (899) رزگاربویان دێ هێنه به‌لاڤكرن ژوانا 12زاروكن.
قایدى ته‌كه‌زكر كو هه‌تا نوكه ب پشته‌ڤانیا نڤێسینگه‌ها نێچیرڤان بارزانى ئه‌م شیاینه (2964) كچ وژن وكورێن ئێزدى رزگاركه‌ین وهێشتا پترى (3746) كه‌سێن دن دبێ سه‌روشوینن یان ماینه دده‌ستێن تیرورستان دا وكارێ به‌رده‌وامه بو رزگاركرنا وان.
هه‌روه‌سا نوینه‌رێ وه‌زاره‌تا كوچ وكوچبه‌رێن ئیراقا فیدرال ته‌كه‌زكر كو ئه‌ڤ هاریكاریه دێ به‌رده‌وام هێته دان وب قوناغ قوناغ هه‌تا هه‌موو رزگاربویى مفاى ژێ وه‌ردگرن.
نيشاندان
