ئه‌ڤرۆ نيوز:
نڤيسينگه‌ها مه‌سرور بارزانى راسپارديێ پێكئينانا كابينا نوو يا حوكمه‌تا هه‌رێما كوردستانێ ئه‌ڤرۆ دوشه‌مبى 24/6/2019 رۆهنكرنه‌ك به‌لاڤكر.
د وێ رۆهنكرنێ دا هاتيه”ده‌مه‌كه هنده‌ك كه‌نالێن راگه‌هاندنا لوكالى، ل دۆر پێكهاتا كابينا نه‌هێ يا حوكمه‌تا هه‌رێما كوردستانێ، ئاماژه ب هنده‌ك ناڤان دكه‌ن وبه‌رچاڤ دكه‌ن كو يێن هاتينه ئێكلاكرن”.
نڤيسينگه‌ها مه‌سرور بارزانى دياركر كو ئه‌و ده‌نگوباس، هه‌ر نيازه‌كا ل پشت بيت، د چارچۆڤێ مه‌زنده‌كرنێ دا ده‌رناكه‌ڤن.
دياركر ژى” تاكو راده‌ستكرنا ئێكجارى يا ناڤێن به‌ربژاران بۆ راسپارديێ پێكئينانا كابينا نوو وهنارتنا وان بۆ په‌رله‌مانێ كوردستانێ و ب فه‌رمى دانه‌نياسينا وان، چو به‌ربژار ب ئێكلابووى ناهێنه هژمارتن”.
ئەڤرۆ نیوز، بارزان مزووری:
سەرۆکێ لژنا سۆتەمەنیێ ل جڤاتا پارێزگەھا نەینەوا بۆ ئەڤرۆ نیوز دیار کر کو بڕیار ھاتیەدان ل نێزیک وەرگرتنا پانزینا ٤٥٠ دیناری، ئەوا حوکمەتا بەغدا ددەتە پانزینخانان ل پارێزگەھا نەینەوا و ئەو دەڤەرێن دەرڤەی ئیدارا ھەرێما کوردستانێ ببیتە کۆبوون و دبێژیت: ھەر شۆفێرەکێ کۆبوون نەبیت، نەشێت وێ پانزینێ وەربگریت.
ھاشم بریفکانی، سەرۆکێ لژنا سۆتەمەنیێ ل جڤاتا پارێزگەھا نەینەوا ئاشکرا ژی کر، پێدڤیە ئەو شۆفێرێن کۆبوون دروست نەکرین، سەرەدانا وێستگەھێن دەڤەرا خوە بکەن و کۆبوونێن وەرگرتنا پانزینێ بۆ خوە دروست بکەن، ژ بەرکو د دەمەکێ نێزیک دا ئەو کۆبوونا ھاتیە دروستکرن ل دووڤ رێنمایێن رێڤەبەریا گشتی یا سۆتەمەنیێ یا پارێزگەھا نەینەوا دێ ھێتە بکارئینان و بەھرا شۆفێرا یا حەفتیەکێ دێ ھێتە دەستنیشانکرن.
ناڤھاتی ئاماژە ب وێ چەندێ ژی کر کو زێدەتری ١٥٠ ھزار کەسان ل سنووری پارێزگەھا نەینەوا ئەو کۆبوون دروست کریە و ھەتا نھا نەھاتیە بکارئینان و گۆت: “ھەتا نھا رێژا زێدەتر یا شۆفێران کۆبوون دروست نەکریە، ئەوێن کۆبوون ژی دروست کرین و ھەتا نھا وەرنەگرتین، دڤێت سەرەدانا وێستگەھێن لێ دروست کرین بکەن، داکو کۆبوونێن خوە وەربگرن و ئەوێن دروست نەکرین ژی پێدڤیە دروست بکەن”.
ھاشم بریفکانی خویا ژی کر کو زێدەتری ١٩٦ پانزینخانە ل سنوورێ پارێزگەھا نەینەوا یێن ھەین، ٣٠ ژ وانا یێن حکومی نە و یێن دی ئەھلینە، بەلێ ل دووڤ رێنمایێن حوکمەتێ کارێ خوە دکەن، ئەو پانزینخانە ھەموو دێ بنە کۆبوون و ھەر کەسێ کۆبوون نەبیت نەشێت پانزینێ وەربگریت.
ئه‌ڤرۆ نيوز:
سه‌رۆك مه‌سعود بارزانى ئه‌ڤرۆ دوشه‌مبى 24/6/2019 ل گه‌ل هژماره‌كا كچ وژنێن رزگاركرى ژ ده‌ستێ تيرۆرستێن داعشێ كۆمبوو.
ل ده‌ستپێكا كۆمبوونێ هه‌ر ئێك ژ سكرتێرا ئێكه‌تيا ئافره‌تێن كوردستانێ ورێڤه‌به‌رێ گشتى يێ كاروبارێن ئێزديان ل وه‌زاره‌تا ئه‌وقافا هه‌رێمێ وبه‌رپرسێ نڤيسينگه‌ها رزگاركرنا ره‌ڤانديێن ئێزدى ل پارێزگه‌ها دهۆكێ وهه‌ديا موراد په‌رله‌مانتارا ئێزدى ل په‌رله‌مانێ كوردستانێ، كورتيه‌ك ل سه‌ر بزاڤێن رزگاركرنا كچ وژنێن ئێزدى ژ ده‌ستێ تيرۆرستێن داعشێ وره‌وشا نوكه يا ژيانا وان رزگاركريان وبزاڤێن ڤه‌گه‌راندنا وان بۆ ژيانه‌كا ئاسايى به‌رچاڤكر.
ل دووڤ وان ئامارێن د كۆمبوونێ دا هاتينه پێشكێشكرن، ژ سه‌رجه‌مێ 6417 كه‌سێن ژ ده‌ستپێكا هێرشا تيرۆرستان بۆ سه‌ر ده‌ڤه‌را شنگالێ كه‌فتينه ده‌ستێ داعشێ، 3476 كه‌س هاتينه رزگاركرن وهه‌تا نوكه 2941 كه‌س د بێ سه‌ر و شوينن، هه‌روه‌سا ئه‌وژى هاته به‌رچاڤكرن كو پشتى سه‌رۆكێ حوكمه‌تا هه‌رێمێ نڤيسينگه‌هه‌كا تايبه‌ت ب دووڤچوون وئازادكرنا ئێزديێن كه‌فتينه ده‌ستێ داعشێ دامه‌زراندى، ژ سه‌رجه‌مێ 3548 كچ وژنێن ژلايێ تيرۆرندستێن داعشێ ڤه هاتينه ره‌ڤاندن، هه‌تا نوكه 1184 كه‌س ژوان هاتينه رزگاركرن وبزاڤ بۆ ديتن وڤه‌گه‌راندنا يێن دى د به‌رده‌وامن
د كۆمبوونێ د، سه‌رۆك بارزانى راگه‌هاند” ئه‌وا ب سه‌رێ خوشك وبرايێن ئێزدى دا هاتى درێژيا وان كاره‌ساتن بوو كو پێشتر ب سه‌ر گه‌لێ مه هاتين، د ئه‌نفالان دا 183 هزار ژن وزه‌لام وزارۆك وپير وگه‌نجێن گه‌لێ مه وكيميابارانا هه‌له‌بجه وده‌ڤه‌رێن دى يێن كوردستانێ وبێسه‌روشوينكرنا 12 هزار گه‌نجێن فه‌يلى و8 هزار بارزانى وده‌هان بزاڤێن دى بۆ ژناڤبرنا گه‌لێ مه، ءه‌و كاره‌ساته ب سه‌ر هه‌وه ژى هاتى هه‌موو برينێن پێشتر يێن د له‌شێ گه‌لێ مه دا ئينانه ژان”.
سه‌رۆك بارزانى گۆت ژى” گه‌له‌ك ب باشى ل ئازار ومه‌ينه‌تێن هه‌وه دگه‌هم وجاره‌كادى دى ژى دپات دكه‌م هوون هێمايێ شه‌ره‌فا گه‌لێ مه‌نه وعه‌زيزێن مه‌نه”. هه‌روه‌سا ته‌ئكيد كر” تيرۆرست ب وێ ره‌فتارێ نه‌مه‌ردى به‌رامبه‌ر هه‌وه وهه‌م ژى دره‌ندايه‌تيا خوه به‌رچاڤكر وهه‌م مه‌زلوميه‌تا هه‌وه سه‌لماند، به‌لێ خوه‌شبه‌ختانه ب بزاڤ وگيانفيداييا پێشمه‌رگێن قه‌هره‌مان، گه‌له‌ك ب مه‌ردانه تولا هه‌وه هاته ڤه‌كرن وتيرۆرست هاتنه شكاندن وكه‌فتنه بن پێ هه‌وه”.
هه‌روه‌سا سه‌رۆك بارزانى دووپاتكر كو ب رێيا په‌رله‌مانێ كوردستانێ وحوكمه‌تا هه‌رێمێ دێ بزاڤێ كه‌ين هه‌ر چ پێدڤيه بۆ هه‌وه بهێته كرن تاكو ب ژيانه‌كا ئاسايى بژين.
سه‌رۆك بارزانى راگه‌هاند ژى”نابيت ره‌وشا شنگالێ ب ڤى شێوه‌ى بمينيت وپێدڤيه ئيدارا شنگالێ د ده‌ستێ خه‌لكێ شنگالێ دا بيت وئاواره شێن بزڤرن جهێن خوه”.
ئەڤرۆ نیوز:
بەرپرسێ راگەھاندنا چاکسازیا مەزنا ل پارێزگەھا دھۆکێ راگەھاند، د ئەزموونێن نشتیمانی یێن پۆلا ١٢ دا، ١٠ قوتابیێن چاکسازیێ پشکداری کربوون و ژ ڤی سەرجەمی ژی ھەشت قوتابی دەرچوون و ئێک ژ وان ب رێژا ٧٧%ێ دەرچوویە.
عرفان محەمەد ئەمین، بەرپرسێ راگەھاندنا چاکسازیا مەزنا ل پارێزگەھا دھۆکێ بو باسنيوز دیار کر کو پیرۆزباھیێ ل دادگەھکریێن قوتابخانا رێڤەبەریا چاکسازیا مەزنا ل دھۆکێ دکەن کو ژ سەرجەمێ (١٠) قوتابیان ل پۆلا ١٢ ئامادەیی بەشێ وێژەیی ھەموو قوتابی دەرچووینە و پلێن باش بدەستڤە ئیناینە و پیرۆزباھیێ لێ دکەین و دەست خۆشیێ ل رێڤەبەریا چاکسازیێ و ماموستا و کارمەندێن چاکسازیێ دکەین بۆ ھاریکاریا وان دگەل ڤان قوتابیان و دخوازین ل کولیژان بھێنە وەرگرتن.
ئاشکرا ژی کر کو ئێک ژ وان قوتابیان کو دادگەھکریە ب ناڤێ (ش) ب رێژا ٥٢٢ کو دبیتە ٧٧%ێ دەرچوویە و شیان ھەنە ل کۆلیژەکێ بھێتە وەرگرتن.
ئەڤرۆ نیوز، لەزگین جوقی:
رێڤەبەرێ شوونوارێن پارێزگەھا دھۆکێ دیار کر کو ژ ئەنجامێ وان پشکنین و کارێن ھەڤپشک یێن بەردەوام دگەل رێکخراو و زانکۆیێن بیانێ ل سنوورێ پارێزگەھا دھۆکێ دھێنە ئەنجامدان وان چەندین تێکستێن بسماری دیتبوون پشتی ئەو تێکست ھاتینە وەرگێران وەسا دیاربوو کو ئەو جھێ تێکست تێدا ھاتینە دیتن مەلبەندەکێ ئەمبراتوریا میتانی بوویە و گۆت: “زانایێن شوونواران پێزانینێن ھەرە کێم ل سەر ڤی دەمێ دێرۆکی یێ میتانی ھەنە پشتی دیتنا ڤان تبلیتان دێ گەلەک پێزانینێن گرنگ ل سەر دەولەتا میتانی د وارێ رامیاری و ھۆنەری و گەلەک وارێن دی دا ب دەست مە کەڤن”.
د. حەسەن ئەحمەد قاسم، رێڤەبەرێ شوونوارێن پارێزگەھا دھۆکێ بۆ ئەڤرۆ نیوز دیار کر کو وان ل بەرە ل رۆژا پێنج شەمبیا بھێت ڤان ھەموو پێزانیان د پرێس کۆنفرانسەکی دا ئاشکرا بکەن کو ئەڤ پرێس کۆنفرانسە دێ ل باژێرێ دھۆکێ ھێتە ئەنجام دان و دھەمان دەم دا پرێس کۆنفرانس دێ ل وەلاتێ ئەلمانیا ژی ل سەر ڤان شوونوارێن ل دھۆکێ ھاتینە دیتن ھێتە ئەنجامدان و گۆت: “مە و وەلاتێ ئەلمانیا پێکڤە کار ل سەر مەلبەندێ شارستانی یێ دەولەتا میتانی کریە کو دیرۆکا وێ ڤەدگەریت بۆ ١٦٠٠ ھەتا ١٤٠٠ سالان حوکم کریە مە بزاڤ کرینە پێزانینێن نووتر ب دەست خوەڤە بینین ل دۆر ڤێ دیرۆکێ، لێ تشتێ ھەرە باش ئەو بوویە کەسەکێ ھزر نەدکر سەنتەرێ دەولەتا میتانی ل سنوورێ پارێزگەھا دھۆکێ ھەیە ئەڤە دێ بیتە سپرایز بۆ زانایێن شوونواران و ھەموو خەلکی”.
ناڤھاتی ئاماژە دا وێ چەندێ کو تبلیت و پارچێن فخارە و بالەخانا و گەلەک تشتێن دی ھاتینە دیتن ئێکەمین جارە تشتێن وەسا یێن شوونواری دھێنە راگەھاندن، ھندەک ژی یێن ھاتینە د ناڤ مۆزەخانا دھۆکێ دا و ھندەک ژی ل جھی خوە دا ماینە و د پاراستی نە و گۆت: “د ناڤ مۆزەخانا دھۆکێ دا پتر ژ چار ھزار پارچێن شوونواری ھەنە تشتێ بالکێش ئەوە گەلەک ژ پارچێن شوونواری یێن دھۆکێ دەکمەنن ل سەر ئاستێ ھەموو جیھانێ ل دھۆکێ ھەنە ل ڤێ دووماھیی ژی مە گەلەک تێکستێن بسماری دیتن ل گەلەک جھێن دھۆکێ د پاشەرۆژی دا دێ گەلەک پرتووک ل سەر ھێنە دروستکرن و پێزانیێن گەلەک گرنگ تێدا ھەنە”.
رێڤەبەرێ شوونوارێن پارێزگەھا دھۆکێ خویا کر کو ب دیتنا وی چێکرنا مۆزەخانەکا نێڤدەولەتی بۆ پارێزگەھا دھۆکێ گەلەک یا گرنگە، چونکو دھۆک خالەکا ستراتیژی یە ھەر د چاخێن کەڤنار دا ل سەر ئاستێ ھەموو جیھانێ و پتریا شوونواران ل دھۆکێ نە، ھەکە مۆزەخانا نێڤدەولەتی ل دھۆکێ بھێتە دانان دێ گەشبوونەکێ ئێخیتە ژێرخانا ئابووری یا دھۆکێ دا.
ئەڤرۆ نیوز:
ئەڤرۆ رۆژا دوشەمبی ٢٤-٦-٢٠١٩ لژنا رێکخستنا رێورەسمێن راگەھاندنا ئەنجامێن ئەزموونێن گشتی یا سەر ب وەزارەتا پەروەردەیا حوکمەتا ھەرێما کوردستانێ، روونکرەکێ ل سەر وێ کچا بالا پوش بەلاڤ دکەت.
د ڤێ روونکرنێ دا ھاتیە جھێ داخێ یە ھندەک کەسان ل تورێن جڤاکی پێخەمەت ھندەک مەرەمێن دیارکری چەندین شروڤە و گۆتنێن نە دروست ل سەر دیمەنێن وان رێورەسمان به‌لاڤ كرينه کو ئەو کچا قوتابیا بالاپوش ب ئەنقەست بریە رێزێن پشتێ.
لەورا یا فەرە ب راگەھینن کو ئەو کچا بریە رێزێن پشتێ چ پەیوەندی ب بابەتێ جلوبەرگێن وێ ڤە نەبوو بەلکو د رێکخستنا قوتابیێ، رێزێن ئێکێ و دویێ و سیێ ڤە ھەبوو ئەو ئەو کچا بالاپوش ل رێزا دویێ ھاتیە و رێزا پێشیێ تنێ بۆ قوتابیێن رێزا ئێکێ ھاتین ھاتبوو تەرخانکرن لەورا داخواز ژ وێ ھاتیە کرن بەر ب جھێ خوە یێ دروست براوستیت، دیسان ئەگەر ھەر بوچوونەکا دی ل پشت ڤێ چەندێ بایە رێ ب وێ نە دھاتە دان ل وی ھولێ ھەمیێ ئامادە بیت، لەورا وەزارەتا پەروەردێ وەک مافێ خوە یێ قانوونی دێ ھەموو رێکارێن قانوونی دەرھەقێ وان کەسان وەرگریت یێ ناڤزراندنا وان بکەت.
ئه‌ڤرۆ نيوز:
ب تۆمه‌تا گه‌نده‌ليێ حوكمێ 18 سالان زيندانى بۆ سه‌رۆكێ به‌رێترێ يێ زانكۆيا نه‌ورۆز ده‌رچوويه، به‌لێ هه‌تا نها نه‌هاتيه ده‌سته‌سه‌ركرن.
مالپه‌رێ رووداو ل سه‌ر زارێ په‌يامنێرێ خوه ل دهۆكێ به‌لاڤكريه: ب گۆره‌ى ئه‌و پێزانينێن ب ده‌ست رووداو كه‌فتين، سێ تاوان خستينه پال د. ئازاد سه‌عدون، سه‌رۆكێ به‌رێترێ يێ زانكۆيا نه‌ورۆز، پشكه‌ك ژ وان تۆمه‌تا په‌يوه‌ندى ب بابه‌تێ گه‌نده‌ليێ ڤه هه‌يه و ل سه‌ر وان سێ تۆمه‌تا بێ ئاماده‌بوونا وى هاتيه دادگه‌هكرن و حوكمێ 18 سالان زيندانى بۆ ده‌ركه‌فتيه.
ل دووڤ گۆتنا دادوه‌ر عه‌بدولره‌حمان، سه‌رۆكێ دادگه‌ها تاوانێن 2 ل دادگه‌ها دهۆكێ، ل سه‌ر هه‌رسێ تۆمه‌تان سێ جاران هاتيه دادگه‌هكرن و بۆ هه‌ر ئێك ژ وان تاوانان حوكمێ شه‌ش سال زيندانى بۆ ده‌ركه‌فتيه.
په‌يامنێرێ رووداو دبێژيت: “سه‌ره‌راى بڕيارا ده‌سته‌سه‌ركرنێ ژ لايێ دادگه‌هێ ڤه، به‌لێ هه‌تا نها نه‌هاتيه ده‌سته‌سه‌ركرن، ژ ئه‌گه‌رێ ديار نه‌مانا وى، ب گۆره‌ى پێزانينێن رووداو نها ئه‌و ژ ده‌رڤه‌يى وه‌لاتى يه. د هه‌ر حاله‌ته‌كى دا هه‌كه ب ڤه‌گه‌ريته هه‌رێما كوردستانێ ب گۆره‌ى قانوونێ دێ مافێ وێ چه‌ندێ هه‌بيت ل دادگه‌هێ به‌ره‌ڤانيێ ژ خوه بكه‌ت”.
ئه‌ڤرۆ نيوز:
سه‌رۆكێ فراكسيۆنا پارتى ديموكراتى كوردستان ل په‌رله‌مانێ كوردستانێ راگه‌هاند كو بنكێ جه‌ماوه‌رى يێ حزبا وى پێ خۆش نينه كۆمه‌لا ئيسلامى پشكداريێ د كابينا نوو يا حوكمه‌تا هه‌رێما كوردستانێ دا بكه‌ت.
ئۆمێد خۆشناو، سه‌رۆكێ فراكسيۆنا پارتى ديموكراتى كوردستان ل په‌رله‌مانێ كوردستانێ و ئه‌ندامێ شاندێ بلندێ پێكئينانا كابينا نوو، بۆ مالپه‌رێ فه‌رمى يێ پارتى ديموكراتى كوردستان راگه‌هاند كو دانوستاندن ل گه‌ل وان لايه‌نێن بڕيار داى پشكداريێ د كابينا نوو دا بكه‌ن، نها مه‌سرور بارزانى يێ راسپارتى بۆ پێكئينانا كابينا نوو “چاڤه‌رێ ناڤێن به‌ربژارێن لايه‌نان دكه‌ت”.
ئۆمێد خۆشناو راگه‌هاند ژى هه‌ر لايه‌نه‌كێ ناڤێ به‌ربژاران ل ده‌مێ دياركرى يێ خوه دا ناڤان پێش كێش نه‌كه‌ت، “پرۆسا پێكئينانا حوكمه‌تێ ژ به‌ر وان ناهێته پاشخستن و د ده‌مێ خوه دا دێ ب رێڤه چيت”.
سه‌رۆكێ فراكسيۆنا پارتى ديموكراتى كوردستان ل په‌رله‌مانێ كوردستانێ ئاماژه ب وێ چه‌ندێ ژى كر كو به‌رى ده‌ستپێكرنا بهێنڤه‌دانا هاڤينێ يا په‌رله‌مانى (1ى تيرمه‌هێ هه‌تا 1ى ئيلۆنێ) په‌رله‌مانێ دێ كۆم بيت و باوه‌ريێ ب كابينا نوو يا حوكمه‌تا هه‌رێما كوردستانێ ده‌ت، “چو رێگريه‌ك ل هه‌مبه‌ر پێكئينانا حوكمه‌تا هه‌رێما كوردستانێ دا نينه”.
ده‌رباه‌رى بۆچوونا پارتى ل سه‌ر پشكداريكرنا كۆمه‌لێ د كابينا نوو يا حوكمه‌تێ دا، ئومێد خۆشناو گۆت: “من چو بابه‌تێن ژ وى ره‌نگى ژ سه‌ركرداتيا سياسى نه‌زانينه كو پێ خۆش بيت يان نا كۆمه‌ل پشكدارى كابينا نوو بكه‌ت، به‌لێ بنكێ جه‌ماوه‌رى يێ پارتى و ئه‌ندام و ده‌نگده‌رێن وێ پێ خۆش نينه كۆمه‌ل پشكدارى د كابينا نوو يا حوكمه‌تا هه‌رێمێ دا بكه‌ت”.
ئه‌ڤرۆ نيوز:
ئه‌ڤرۆ جڤاتا نوونه‌رێن عيراقێ دێ ده‌نگى ل سه‌ر ته‌مامكرنا پێكهاتێ حوكمه‌تێ ده‌ت.
ب گۆره‌ى به‌رنامێ كارێ كۆمبوونێ كو ده‌سته‌يا سه‌رۆكاتيا جڤاتا نوونه‌ران به‌لاڤكريه، بڕياره ئه‌ڤرۆ په‌رله‌مان كۆم ببيت و برگا ئێكێ ژى ده‌نگدانه ل سه‌ر ئه‌و ناڤێن بۆ وه‌زاره‌تا ناڤخۆ و به‌ره‌ڤانيێ هاتينه پێشكێشكرن ب مه‌ره‌ما ته‌مامكرنا پێكهاتا كابينا عادل عه‌بدولمه‌هدى.
هه‌روه‌سا بڕياره د كۆمبوونێ دا، ده‌نگ ل سه‌ر راستڤه‌كرنا قانوونا ده‌ست ب سه‌رداگرتن و به‌ردانێ دا بده‌ت، هه‌رديسا خواندنا ئێكێ بۆ پرۆژێ قانوونا ئازاديا بيروبۆچوونان و پرۆژێ قانوونا ئۆلۆمپيا نشتيمانى بهێته كرن. ژبلى وێ چه‌ندێ ژى دێ دانوستاندنێ ل سه‌ر پرۆژێ قانوونا دادگه‌ها فيدرال ته‌مام كه‌ن.
ئه‌ڤه دده‌مه‌كى دايه كو هێشتا وه‌زاره‌تێن ناڤخۆ و به‌ره‌ڤانى و داد و په‌روه‌رده ل به‌غدا دبێ وه‌زيرن، چه‌ند جاران ژى په‌رله‌مان بۆ ئێكلاكرنا ناڤێن به‌ربژاران بزاڤێن كۆمبوونێ داينه، به‌لێ ژ ئه‌گه‌رێ هه‌ڤركيێن لايه‌نێن سياسى شكه‌ستن ئينايه.
نيشاندان