ئه‌ڤرۆ نيوز:
پشتى عادل عه‌بدولمه‌هدى سه‌رۆك وه‌زيرێن عيراقێ به‌رى دو رۆژان هه‌موو مۆله‌تێن تايبه‌ت ب فرۆكێن له‌شكرى يێن بيانى ب سه‌ر ئه‌سمانێ عيراقێ دا هه‌لوه‌شاندين، هه‌ڤپه‌يمانيا نێڤده‌وله‌تى يا دژى داعشێ پێگيريا خوه ب وێ بريارێ راگه‌هاند .
هه‌ڤپه‌يمانيا نێڤده‌وله‌تى راگه‌هاند” چه‌ند فه‌رماندێن بلند يێن هه‌ڤپه‌يمانيێ ل گه‌ل به‌رپرسێن وه‌زاره‌تا به‌رگريا عيراقێ كۆمبوون وبه‌حسێ رێنمايێن سه‌رۆك وه‌زيرێن عيراقێ سه‌باره‌ت لڤينێن فرۆكێن هه‌ڤپه‌يمانان كر”.
دياركر ژى” وه‌كو مێهڤان د چارچۆڤێ سنوورێ سه‌روه‌ريا عيراقێ د پێگيرين ب هه‌موو بريار ورێنمايێن حوكمه‌تا عيراقێ”.
عادل عه‌بدولمه‌هدى بريار دابوو ب هه‌لوه‌شاندنا هه‌موو مۆله‌تێن تايبه‌ت ب فرۆكه‌ڤانيێ وفرينێ ژ ون فرۆكێن بێ فرۆكه‌ڤان، فرۆكێن كۆمكرنا پێزانينان، فرۆكێن كۆمكرنا پێزانينێن پرچه‌ككرنێ، فرۆكێن شه‌ركه‌ر و هه‌ليكوپتر وفرۆكێن دى ژى” كو نابيت ب سه‌ر ئه‌سمانێ عيراقێ دا بفرن تنێ ب مۆله‌تا تايبه‌ت يا سه‌رۆك وه‌زيرێن عيراقێ نه‌بيت.
بريارا عه‌بدولمه‌هدى پشتى سێ رۆژان دهێت ژ ته‌قينا سه‌ربازگه‌ها سه‌قر يا سه‌ر ب هێزێن حه‌شدا شه‌عبى ڤه ل ده‌ڤه‌را دوره ل باشوورێ به‌غدا كو د ئه‌نجامدا 30 كوشتى وبريندار كه‌فتن.
ته‌له‌ڤزيونا ( ئاي نيوز) ياعيراقى به‌لاڤكربوو” ئه‌و ته‌قين ژ ئه‌نجامێ هێرشه‌كا ئه‌سمانى بوو”.
ئه‌ڤرۆ نيوز:
ئه‌ڤرۆ رۆژا شه‌مبى 17/8/2019 ل سه‌لاحه‌دين سه‌رۆك مه‌سعود بارزانى پێشوازى ل رامۆن بليكوا باليوزێ ئێكه‌تيا ئوروپا ل عيراقێ كر.
د ديداره‌كێ دا رامۆم بليكوا باليوزێ ئێكه‌تيا ئوروپا ل عيراقێ سوپاسيا سه‌رۆك مه‌سعود بارزانى كر بۆ ڤێ هه‌ڤديتنێ ديسان ئارمانجا سه‌ره‌دانا خوه ژى بۆ ب دووماهى هاتنا ئه‌ركێ وى يێ دبلوماسى ل عيراقێ بوو و ب مه‌ره‌ما خاتر خواستنێ سه‌ره‌دانا بارزانى كريه و هيڤى خواست په‌يوه‌نديێن وى و دوستايه‌تيا وى دگه‌ل گه‌لێ كورد يێ به‌رده‌وام بيت و چو جاران ژى كوردا ژبيرناكه‌ت.
به‌رامبه‌ر سه‌رۆك مه‌سعود بارزانى داخوازا سه‌ركه‌فتنێ بۆ ئه‌ركێ نوو يێ رامۆن بليكوا خواست ديسان ئاماژه ب گرنگيا په‌يوه‌نديێن ناڤبه‌را هه‌رێما كوردستانێ و ئوروپا كر و دوپاتكر پێدڤيه هه‌ماهه‌نگيه‌كا زێده‌تره دگه‌ل ئێكه‌تيا ئوروپا.
د پشكه‌كا دى يا ڤێ ديدارێ دا به‌حس ل په‌يوه‌نديێن ناڤبه‌را هه‌ولێر و به‌غدا دا هاته‌كرن و هه‌ردولا دوپاتى ل سه‌ر چاره‌سه‌ركرنا هه‌موو كێشه‌يان برێيا ديالوگ و لێكتێگه‌هشتنێ كر.
ئەڤرۆ نیوز، عەلی حاجی :
د داخویانیەکێ دا رێڤەبەرێ ئاسایشا گومرکا ئیبراھیم خەلیل بۆ ئەڤرۆ نیوز ئاشکەرا کر ئەو قەرەبالغا ل لایێ تورکیا دروست بوویی کو بوویە ئەگەر بۆ ماوەیێ دو رۆژایە ھندەک ترۆمبێل ماینە د سرایێ دا ژ بەر رێژەیا زورا چوونا وەلاتیێن کوردستانێ بۆ وەلاتێ تورکیا .
عەبدوەلوەھاب محەمەد گۆتژی : ئەڤ قەرەبالغا نوکە ل لایێ وەلاتێ تورکیا دروست بوویی، ھەمان قەرەبالغ ل پێشیا جەژنێ د ناڤ دەرگەھێ نێڤدەولەتی یێ ئیبراھیم خەلیل ژی دروست ببوو، ژ بەر کو دڤێ جەژنێ دا رێژکا زۆر یا وەلاتیێن ھەرێما کوردستانێ قەستا وەلاتێ تورکیا کربوون ب مەرەما گەشتکرنێ، ئەم پێشبینی دکەین ھەتا دو یان سێ روژێن دی ئەو قەرەبالغ بمینیت، ژ بەر کو د نوکە دا بھێنڤەدان ل کوردستانێ ب دووماھی ھات و ئەو گەشتیار ژی ژ بەر ڤێ چەندێ ڤەدگەرنە کوردستانێ و ب چو رەنگەکێ ژی گومرگا تورکیا رانەوەستیایە و بەردەوام یێ کار کەن، بەلێ ژ بەر ب رێڤەبرنا مامەلەێن گەشتیاران کار ب گیرۆ دبیت.
دیار کر ژی کو وەکو دەرگەھێ نێڤدەولەتی یێ ئیبراھیم خەلیل د پەیوەندیێن بەردەوام داینە د گەل گومرکا وەلاتێ تورکیا بۆ چارەسەر کرنا ڤێ کێشێ و گۆتژی: دا کو چو کێشەیەک ل لایێ مە دروست نەبیت مە چەندین کومپیوتەرێن پاسەپورتان خستینە د خزمەتا خەلکی دا.
دا زانین ژی کو دبیت ھێشتا ھندەک وەلاتیێن مە ل لایێ تورکیا مابن ژ بەر ڤێ قەرەبالغێ ڤەنەگەریابنە کوردستانێ، ئەم د نوکە ژی دا بەردەوامین ل سەر ھەولێن خوە و دخوازین ژی د زووترین دەم دا ھەمی وەلاتی ڤەگەرنە کوردستانێ ب سلامەتی.
ب گورەی پێزانینێن ب دەست ب ئەڤرۆ نیوز کەفتین ل دو روژێن بەریا جەژنێ ھەتا رۆژێن جەژنێ نێزیکی 55 ھزار کەسان ب رێیا دەرگەھێ نێڤدەولەتی یێ ئیبراھیم خەلیل قەستا وەلاتێ تورکیا کر بوون.
ئەڤرۆ نیوز:
رێبەرێ 20 سالیێ زیندانکریێ پارتا کرێکارێن کوردستانێ (پەکەکە) راگەھاند کو کێشە ب رێتنا خوینا مرۆڤان ناھێنە چارەرکرن، ئەو ھەردەم بۆ ئاشتیێ ژی د ئامادەنە و تورکیا بێ ھاریکاریا ھەرێما کوردستانێ یا سەرکەفتی نابیت.
محەمەد ئۆجەلان برایێ عەبدولا ئوجەلان، رۆژا دویێ یا جەژنا قوربانێ پشتی وەرگرتنا رەزامەندیێ، سەرەدانا گرتیخانا سزایێن دژوار ل دورگا ئیمرالی کر و چاڤ ب برایێ خوە کەفت، ئەڤرۆ ژی د دەزگەھێن راگەھاندنێ دا، پەیاما برایێ خوە ئوجەلانی راگەھاند.
د پەیامێ دا، عەبدولا ئۆجەلان دەربارەی کاودانێن باکوورێ کوردستانێ و سوریا و رۆژئاڤایێ کوردستانێ راگەھاند کو کاودان ب شەری چارە نابن، ئەڤە دێ زیانێ ھەر گەھینیتە تورکیا و ھەر ژی گەلێن دەڤەرێ. پێدڤیە ئاشتی بھێتە پێشخستن، ھەکە تورکیا بچیتە ناڤ ئاخا سوریا، ئەڤە نابیتە چارەسەر، راستی ئەو کو شەر بۆ گەلان تشتەکێ باش نینە، کێشە پێدڤیە ب دیموکراسی بھێنە چارەکرن، کێشە چو دەمان ب شەری چارە نابن.
دەربارەی پرسا چارەسەریا کێشا کورد و ئۆپەراسیۆنێن تورکیا، ئۆجەلان گۆتیە: “بۆ چارەکرنا کێشا کوردان، ئەم دێ رۆل و ئەرکێ خوە ب جھـ گەھینین، ئەو کێشە ب رێتنا خوینا مرۆڤان چارە نابیت، ئەم ھەردەم بۆ ئاشتیێ د ئامادەینە و ھەردەم دژی شەری نە”.
دەربارەیی ئێکەتیا گەلێ کورد ژی ئاماژە ب وێ چەندێ کر کو تورکیا بێ ھاریکاریا ھەرێما کوردستانێ یا سەرکەفتی نابیت، بێ ھەرێما کوردستانێ دێ لڤینێن وێ ب زەحمەت بن، ئەڤ کارە دێ گورزان ل ئێکەتیا گەلێ کورد وەشینیت، پێدڤیە ھەموو کەس بۆ ئێکەتیا گەلێ کورد ل ناڤ کار و خەباتێ بیت. دا کو ئێکەتیا کورد ژ ناڤ نەچیت، فیداکاری یا پێدڤیە”.
د رێیا برایێ خوە دا پەیامەک بۆ ھەدەپێ ژی ھنارتیە و دبێژیت: “60 پەرالەمانتارێن ھەین، د ناڤ ھەلبژارتنان دا باژێرڤانی ژی یێن وەرگرتینەڤە، جارەکا دژی من یا گۆتی، ھەکە ئەز ل ژ دەرڤە بامە، دا کوچ و کۆلانا پاقژ کەم، پێدڤیە پەرلەمانتار 24 دەمژمێران ل ناڤ خەلکی بن، پێدڤیە خزمەتا خەلکی بکەن، گەلی ئیرادا خوە یا دایە دەستێ ئەوان، ئەو ژی پێدڤیە د خزمەتا گەلی دا بن”.
ئەڤرۆ نیوز، نەوزاد ھلۆری:
پشتی بجھکرنا ئەرکێن حەجێ، ئەڤرۆ سپێدێ حەجیێن کوردستانێ ب رێیا ھەردو فروکخانێن سلێمانی و ھەولێر دەست ب ڤەگەریانێ کر، گەشتا ئێکێ ب رێیا فروکخانا سلێمانیێ گەھشت، گەشتا دویێ ژی دێ ئێڤاری ب رێیا فروکخانا ھەولێرێ بیت.
نەبەز ئیسماعیل، ئاخفتنکەرێ وەزارەتا ئەوقاف و کاروبارێن ئاینی بۆ ئەڤرۆ نیوز گۆت: (پشتی بجھکرنا ھەموو ئەرکێن حەجێ ل مەککەھا پیرۆز و مەدینا مونەوەر، ئەڤرۆ رۆژا شەمبی دەمژمێر 5:00ێ سپێدێ گەشتا ئێکێ کو ژ 4117 حەجیان پێکدھات ب رێیا فروکخانا سلێمانیێ ڤەگەریان و دەمژمێر 8:00ێ سپێدێ گەھشتن کوردستانێ).
زێدەتر گۆت: (گەشتا دوویێ ھەر ئەڤرۆ دەمژمێر 4:00ێ ئێڤاری دێ دەست پێ کەت و دەمژمێر 6:30ێ ئێڤاری گەھیتە فروکخانا ھەولێر کو ئەو ژی 417 حەجیان بخوڤە دگریت، کوما ئەو حەجیێن ئەڤرۆ دێ زڤرن دبیتە 834 حەجی).
ناڤبری دیارکر ژی کو رۆژانە گەشت دێ ب رێیا ھەردوو فروکخانێن ھەولێر و سلێمانیی ھەتا روژا 29/8 بەردوام بیت و زێدەتر گوت: (کوما گشتی یا حەجیێن کوردستانێ دبیتە حەفت ھزار و 132 حەجی، ئەگەر چ کێشەیێن تەکنیکی دروست نەبن، حەجی دێ ددەما خوە دا زڤرن بو مال و ھەموو بەرھەڤی بو ڤەگەریان و سلامەتیا حەجیان ھاتینەکرن).
ئەڤرۆ نیوز، نەوزاد هلوری:
سافینا عەلی، کچە شێوەکارەکا شێلادزێ یە و دەهان تابلویێن شێوەکاری درۆستکرینە دیاردکەت کو کارێن شێوەکاری هوسا ب ساناهی نینن، بەلکو پێدڤی ب جورە شارەزایەکێ هەیە، بۆ باشترکرنا کارێن خوە دو داخوازی یێن هه‌ین، دیسان پشکداری د چەند پێشانگەهێن هەڤپشکێن شێوەکاری ل دەڤەرا ئامێدیێ ب تایبەتی شێلادزێ کرینە، نوکە کار ل سەر ڤەکرنا پێشانگەهەکا تایبەت دکەت.
ئه‌ڤرۆ نیوز، نه‌وزاد هلۆرى:
ب مه‌ره‌ما گه‌شتوگۆزار و ئه‌نجام دانا نمایشان، گرۆپه‌كێ گه‌شتیاریێ عیراقى یێ ماتورسكلان كو ل به‌سرا و به‌غدا هاتبوون ژ نێزیك سه‌ره‌دانا هاڤینگه‌هێن گه‌لیێ شێرانه ل دێره‌لوكێ كر و بریاره سه‌ره‌دانا چه‌ند جهێن دى یێن گه‌شتوگۆازارى ژى بكه‌ن.
عه‌باس هاشم، كاپتنێ ئه‌وى گرۆپى بۆ ئه‌ڤرۆ نیوز گۆت: (ب مه‌ره‌ما گه‌شتوگۆزار و نمایشان ئه‌م ژ به‌سرا و به‌غدا هاتینه كوردستان و گه‌لیێ شێرانه و دێ چه‌ند رۆژان مینین و سه‌ره‌دانا هژماره‌كا جهێن گه‌شتوگۆزارى ل كوردستان و ده‌ڤه‌رێ كه‌ین).
زێده‌تر گۆت: (گرۆپێ مه پێكدهێت ژ 33 ماتورسكلێن پێشكه‌فتى و ب بها، ئه‌م پترى 9 ده‌مژمێرێن رێ هاتینه هه‌تاكو گه‌هشتینه گه‌لیێ شێرانه، راستى كوردستان ده‌ڤه‌ره‌كا گه‌له‌ك خوه‌شه و ئارامى یا لێ هه‌ى و سرۆشته‌كێ جوان و ئاڤ و رووبار و چیا و جهێن گه‌شتوگۆزاریێن خوه‌ش یێن لێ هه‌ین).
دیاركر ژى كو ئه‌و دێ چه‌ند نمایشه‌كێن ماتورسكلان ل ده‌ڤه‌رێ و كوردستانێ كه‌ن و چه‌ند رۆژان مینن و جاره‌ك دى ڤه‌گه‌رن عیراقێ و زێده‌تر گۆت: (پێدڤیه زێده‌تر خزمه‌ت بۆ جهێن گه‌شتوگۆزارى ب تایبه‌تى د رێیێن هاتنوچوونێ دا بهێنه‌كرن، سوپاس بۆ خه‌لكێ كوردستانێ و ده‌ڤه‌رێ كو گه‌له‌ك د هاریكاربوون دگه‌ل مه دا).
ئەڤرۆ نيوز:
ئێکەتیا ئافرەتێن کوردستانێ پەیامەک ب هەلکەفتا 16 تەباخێ بەلاڤ کر کو تێدا هاتیە ب هەلکەفتا سالیادا ژ دایکبوونا ڕابەر و پێشەوایێ مە هێژا سەرۆک بارزانی و دامەزراندنا پارتی دیموکراتی کوردستان، پیرۆزباهیا ڤان دو هەلکەفتان ل خوە و هەمی خەلکێ کوردستانێ و سەربخوەخوازان و خێزانێن سەربلندێن شەهیدان دکەین.
دامەزراندنا پارتی دیموکراتی کوردستان پێدڤیەکا مێژوویی و سیاسی بوو بۆ کوردستانێ و دوزا رەوایا وێ، دامەزراندنا پارتی خالا وەرچەرخانە و گوهۆڕینا کاودانێن کوردستانێ بوو و خەباتا رزگاریخوا کوردستانێ کرە خەباتەکا گشتگیر ل بن ئێک ئارمانج کو کوردستان یاننەمان بوویە، ئەڤ گوهۆڕینە ئەگەرێ سەرەکی بوون بۆ ب دەستڤەئینانا هەمی ماف و دەستکەفتێن هەتا ئەڤرۆ بۆ مللەتێ مە ب دەستڤە هاتین.
قوربانیدانا پارتی دیموکراتی کوردستان ژ پێخەمەت ب دەستڤەئینانا هزرا نشتیمانپەروەری و کوردایەتیێ بوویە، سیاسەتکرن بۆ بەردەوامی دانێ ب ساخکرنا حەز ژێکرنا ئاخا کوردستانێ یە، بۆ ڤێ مەرەمێ ژی هەمی دەما بزاڤا پێکڤەژیانێ و ب هێزکرنا پێکڤەژیانا جڤاکی کریە خالا ستراتیژیا خەباتکرنێ.
پارتی هەمی دەمان ناسناما دیموکراسیێ و پێشکەفتنخوازیێ کریە تایبەتمەندیا کارکرنا خوە، د چارچۆڤێ بەرنامە و مۆدێلا سیاسەتکرنێ دا بزاڤ کریە پێشەنگ بیت ل سەر ئاستێ هەرێمێ و دەڤەرێ، د ڤێ چەندێ ژی دا رێکخراوا ئێکێ کو یا تایبەت ب ئافرەتان ڤە ل سەر راسپاردا بابێ روحی یێ نەتەوەیێ مە بارزانیێ نەمر دامەزراندیە ب مەرەما پشتەڤانیا ئافرەتان بۆ پشکداریکرنێ د خەباتا سیاسی یا مللەتێ مە دا.
دووبارا ڤان هەر دو هەلکەفتێن مەزن ل هەمی کوردستانیان پیرۆز دکەینو سۆزێ ددەین بەردەوام بجەئینەرێن ئەجێندا و بەرنامێ پارتی دیموکراتی کوردستان بین، دلسۆزانە پێنگاڤان بۆ کوردستانەکا ب هێزتر و ئاڤەدانتر ب هاڤێژین.
ئێکەتیا ئافرەتێن کوردستانێ
15/8/2019
نيشاندان