ئەڤرۆ نیوز، عەلی حاجی:

بەربەلاڤبوونا چێلان د ناڤ سەنتەرێ باژێڕێ زاخۆ دا بەر ب زێدەبوونێ ڤە دچیت و یا بوویە دیاردە، ب تایبەتی ژی د ناڤ پارک و باغچەیان دا و ئەڤ چەندە ژی بوویە جھێ دل نەرەحەتیا وەلاتیان.

سەرمەد زاخۆیی ل دۆر ڤێ چەندێ بۆ ئەڤرۆ نیوز دیار کر، ئێدی بەردانا چێلان د ناڤ پارک و باغچەیان دا ل باژێرێ زاخۆ ئەو دل نەرەحەت کرینە، ژ بەر کو ئێدی ل شوونا مرۆڤان چێل د ناڤ پارکان دا پەیاسا دکەن و گۆت: “پێدڤی یە جھێن پەیوەندیدار زوو ڤێ ئاریشێ چارەسەر بکەن و مە بەرەڤ سالێننوتانڤە نەبەن، دیسا ئەڤ چەندە ژی دیمەنەکێ نەجوان و نەشارستانی ددەتە روویێ باژێرێ زاخۆ و زێدەباری ھندێ ژی زیانێ دگەھیننە جھێن گشتی و ھەتا دبیتە ئەگەر ترس ژی ل دەڤ زارۆیان پەیدا ببیت”.

بژار مونیب، سەرۆکێ باژێرڤانیا زاخۆ بۆ ئەڤرۆ نیوز خویا کر، گۆت: “بەری نوکە وان دەست ب سەر چەندین چێلان دا گرتیە، ل دووڤڕا ژی سۆزنامە ژ خودانێن وان چێلان ھاتینە وەرگرتن و چەندین جاران ژی ھندەک کەس ھاتینە گرتن و بەری نوکە ژی سۆزنامە ژ وان ھاتبوو وەرگرتن، بەلێ ھەر ب ڤی کاری رادبن و گۆت: “ب رێیا قانوونێ ژی ھەکە رەوانەی دادگەھێ بکەین، کۆژمەکێ کێمێ پارەی ژێ دێ ھێتە وەرگرتن و دبیت چو کارتێکرنێ لێ نەکەت، دڤێت دەسەلاتەکا زێدەتر ب مە بھێتە دان، داکو وان چێلان د ناڤ باژێڕی دا نەھێلین، ژ بەر کو دبنە ئەگەرێ پیسکرنا باژێری و زیانێ ژی دگەھیننە پارکان”.

ئەڤرۆ نیوز، عەلی حاجی:

گەنجەکێ زاخۆ بناڤێ (کاروان جمعە) ل رۆژا ١٧/٥/٢٠١٩ ل پرا دەلال خوە ھاڤێتبوو د خابیری دا و خەندقی بوو، ئەڤرۆ ١٨/٦/٢٠١٩ لاشێ وی د خابیری دا ھاتە دیتن.

رائید بێوار عەبدولعەزیز، بەرپرسێ راگەھاندنا بەرەڤانیا باژێری ل پارێزگەھا دھوکێ بۆ ئەڤرۆ نیوز دیار کر، ئەڤرۆ ئێڤاری پەیوەندی ب تیمێن وان یێن نقۆمڤانی ل زاخۆ ھاتە کرن کو لاشێ وەلاتیەکێ ل بەر لیڤێن ئاڤا خابیری ل بەرامبەر کۆمەلگەھا بازرگانیا ئبیراھیم خەلیل ھاتیە دیتن و گۆت: “پشتی تیمێن مە گەھشتینە جھێ دەستنیشان کری، شیان وی لاشی ژ ناڤ ئاڤێ بیننە دەر و ب رێیا ئامبۆلانسەکێ رەوانەی نۆشداریا داد ل دھۆکێ ھاتە کرن”.

رائید بێوار عەبدولعەزیز گۆتژی: “ل گورەی پێزانینان ئەو لاشێ ھاتیە دیتن یێ وەلاتیەکێ دەڤەرا زاخۆیە بناڤێ (کاروان جمعە) ئەوێ ل رۆژا ١٧/٥/٢٠١٩ ژ ئەگەرەکێ نەدیار خوە ھاڤێتیە د خابیری د”ا.

ئەڤرۆ نیوز، لەزگین جوقی:

بەرپرسێ راگەھاندنێ ل بۆردی کاروبارێن مرۆڤایەتی ل پارێزگەھا دھۆکێ دیار کر کو ژ بەر نەبوونا ھاریکاریان گەلەک پرۆژێن خزمەتگوزاری بۆ پەنابەر و ئاواران ژی ھاتینە راوەستاندن و ناھێنە ئەنجامدان.

سالم سەعید، بەرپرسێ راگەھاندنێ ل بۆردی کاروبارێن مرۆڤایەتی ل پارێزگەھا دھۆکێ بۆ ئەڤرۆ نیوز دیار کر کو ئەڤ سالە ژی وەکو سالێن بۆری ب چالاکیەکا مەزن دێ د ناڤ پارکا نەورۆز دا ل سەنتەرێ پارێزگەھا دھۆکێ رۆژا جیھانیا پەنابەران ب چەندین چالاکیان ھێتە ساخکرن، نوکە دەست ب بەرھەڤیان ھاتیە کرن و ل رۆژا ٢٠/٦/٢٠١٩ ل دەمژمێر ٦:٠٠ ئێڤاری دێ دەست ب چالاکیان ھێتە کرن دگەل رێکخراوێن نەتەوێن ئێکگرتی بۆ ساخکرنا رۆژا جیھانیا پەنابەران ل دھۆکێ و گۆت: “زێدەتری ٨٠ ھزار پەنابەران ل سنوورێ پارێزگەھا دھۆکێ د ناڤ چار کەمپان دا دژین ئەو ژی کەمپێن دومیز ئێک و دومیز دوو و گەویلان و کەلھا ئاکرێ، راستی ژی ئەو ھاریکاریێن جاران دھاتنە پێشکیشکرن بۆ پەنابەران وەکو بەرێ نەماینە و گەلەک کێمبووینە، چونکو رێکخراوان ھاریکاری کێمکرینە و ئەو وەکو جاران پشتەڤانی و ھاریکاریا پەنابەران ناکەن”.

ناڤھاتی ئاماژە دا وێ چەندێ کو نوکە ل سنوورێ پارێزگەھا دھۆکێ پتر ژ ٥٠٠ ھزار پەنابەر و ئاواران ھەنە و بەردەوام پێدڤی ب پشتەڤانی و ھاریکاریێ نە و گۆت: “بەری نوکە ٣٠ دولار بۆ ھەر کەسەکێ دھاتنە دان پاشی بوونە ٢٤ دولار و ھێشتا کێمتر لێ کرن بوونە ١٢ دولار و جارەکا دی کرنە ٢٠ ھزار دینار بۆ ھەر کەسەکی و پاشی کرنە ١٧ ھزار دینارێن عیراقی ئەو ژی ھەر شەش حەفتیان جارەکێ دھێنە دان، راستی ژی ھەموو روویەکێ ڤە ھاریکاری و پشتەڤانی کێم بووینە”.