ئەڤرۆ، زنار تۆڤی:

ئەڤە دەمێ چار سالانە دەرگەھێ گۆمرکا سەرزێری ل دەڤەرا بەرواری بالا یێ ھەڤسنۆر د گەل وەلاتێ تورکیا دا ھاتیە ڤەکرن، ھێشتا نەبوویە ٢٤ دەمژمێری، دیسا رۆژێن شەمبی و ئێکشەمبی ژی بھێنڤەدان بوون و خەلک نەدشیان ھاتنوچوونێ لێ بکەن، لێ ئەڤرۆ ھاتنوچوونا وەلاتیان د دەرگەھێ گۆمرکا سەرزێری ڕا بوویە رۆژانە، ھەروەسا ب مەرەما پتر خزمەتکرنا وەلاتیێن ھەرێما کوردستانێ و تورکیا ئێدی خەلک دشێن رۆژانە ھاتنوچوونێ لێ بکەن.

عرفان سلێمان ئەلکیشکی، رێڤەبەرێ دەرگەھێ گۆمرکا سەرزێری ل بەرواری بالا بۆ ئەڤرۆ نیوز دیار کر، ب مەرەما پتر خزمەتکرنا وەلاتیێن ھەرێما کوردستانێ و وەلاتێ تورکیا، ئەڤرۆ ب فەرمی بڕیار ھاتیەدان کو ھەموو رۆژێن حەفتیێ ھاتنوچوون ب رەنگەکێ ئاسایی د ئەڤێ خالا گۆمرکی ڕا ھەبیت، بەری نوکە ھەردو رۆژێن شەمبی و ئێکشەمبی بھێنڤەدانا فەرمی بوو، ئەڤ بڕیارە ھاتیەدان پشتی کو پرۆتۆکۆلەک د ناڤبەرا ھەردو قایمقامێن قەزایێن چەلێ و ئامێدیێ دا ھاتیە ئیمزا کرن و گۆت: “ئەڤ بڕیارە ئەڤرۆ ٢٩/٦/٢٠١٩ کەفتیە د قووناغا ب جھئینانێ دا و ئێدی ھاتنوچوونا وەلاتیان بوویە رۆژانە، ھەروەسا ل وەرزێ ھاڤینێ ژی ژ دەمژمێر (٨:٣٠) سپێدێ ھەتا (٦:٠٠) ئێڤاری دێ ھاتنوچوون یا بەردەوام بیت”.

رێڤەبەرێ دەرگەھێ گۆمرکا سەرزێری ئاماژە ب وێ چەندێ ژی کر کو ل وەرزێ زڤستانێ ژی ژ بەر کو دونیا زوو تاری دبیت، دێ ل ھەموو رۆژان ل دەمژمێر (٨:٣٠) سپێدێ ھەتا (٥:٠٠) ئێڤاری ھاتنوچوون ھەبیت و ئەڤ چەندە دێ بیتە ئەگەرەک کو ھاتنووچوونا زێدە د ناڤبەرا ھەردو ئالیان دا دروست بیت، لێ ھێشتا کریارا بازرگانیکرنێ د ناڤبەرا ھەرێمێ و تورکیا دا ل وی دەرگەھی نەھاتیە ئەنجامدان، لێ رۆژانە رێژەکا باش یا خەلکی ھاتنوچوونێ د ڤی دەرگەھی ڕا دکەن.

دەرگەھێ کۆمرکا سەرزێری ل دەڤەرا بەرواری بالا یێ سەر ب قەزا ئامێدیێ ڤە ل سالا (٢٠١٥) ب فەرمی د ناڤبەرا حوکمەتا ھەرێمێ و تورکیا دا ھاتیە ڤەکرن.

ئەڤرۆ نیوز، عەلی حاجی:

پشتی ھاتنا رێژەکا زۆر یا ئاواران بۆ سنوورێ قەزا زاخۆ، وەزاەرتا ناڤخوە یا عیراقێ ب ھەڤکاری دگەل حوکمەتا ھەرێما کوردستانێ بۆ جارا ئێکێ فەرمانگەھەکا بارێ شارستانی ل زاخۆ ڤەکر.

خەلات ئوسمان، بەرپرسێ ئاواران ل قایمقامیا زاخۆ بۆ ئەڤرۆ نیوز دیار کر، ھەبوونا رێژەکا زۆر یا ئاواران ل سنوورێ قەزا زاخۆ، دیسا د دەما ھاتنا تیرۆریستێن داعش دا بۆ دەڤەرێن وان، پڕانیا وان ئاواران ناسنامێن خوە بەرزەکربوون یان ژی ھێلا بوەنە د ناڤ مالێن خوە دا و بەرزەببوون یان ژناڤچوو بوون و گۆت: “ب ھاریکاریا وەزارەتا ناڤخوە یا عیراقێ و ب ھەڤکاری دگەل حوکمەتا عیراقێ و ب ئامادەبوونا نوونەرێ وەزارەتا ناڤبری، ب شێوەکێ فەرمی فەرمانگەھەکا بارێ شارستانی بۆ دروستکرنا ناسناما بۆ وان ئاواران د ناڤ کەمپا بێرسڤێ ئێک دا ھاتە ڤەکرن، ئەڤ فەرمانگەھە تایبەتە بۆ دروستکرنا ناسنامان بۆ وان ئاوارێن ناسنامێن خوە بەرزەکرین د شەرێ دژی رێکخراوا داعش دا”.

ناڤھاتی ئاماژە ب وێ چەندێ ژی کر کو تیمەک ژ باژێرێ بەغدا ھاتیە و ئەڤ تیمە مامەلێن ئاواران ب رێڤە دبەن بۆ دەرخستنا ناسنامەکا نوو یا عیراقی بۆ وان ئاوارێن ناسنامێن وان بەرزەبووین یان ژناڤچووین و گۆت: “ھەموو ئاوارێن د ناڤ کەمپێن سنوورێ قەزا زاخۆ دشێن کاروبارێن خوە بۆ دەرخستنا ناسنامێ ب رێڤەببەن، گەلەک جاران نەبوونا ناسنامان دبوو ئەگەر ئاوارە ژ گەلەک ھاریکاریان بێ بەھر ببن و نەشیان کاروبارێن خوە د ناڤ حکومەتێ ژی دا ب رێڤەببەن و ئەڤە ژی پێنگاڤەکا گرنگ بوو ژ لایێ وەزارەتا ناڤخوە یا عیراقێ ڤە ھاتیە ھاڤێتن”.

ئەڤرۆ نیوز، رێوار مزیری:
بەرپرسێ راگەھاندنێ ل رێڤەبەریا گشتی یا ساخلەمیا پارێزگەھا دھۆکێ بۆ ئەڤرۆ نیوز دیار کر کو پشتی ل رۆژا ٢٥/٦/٢٠١٩ێ ل باژێرێ ڤییەنا ل وەلاتێ نە‌مسا، د.شەونم ئەحمەد وەیس، نۆشدارا تایبەتمەند یا نەخۆشیێن ژنان و زارۆبوونێ وەغەر کری و ئەڤرۆ جەنازێ وێ ب رێیا فرۆکخانا هەولێرێ یا نێڤدەولەتی گەهشتیە هەرێما کوردستانێ ژڤانە پشتی دەمەکێ کێم ل گۆرستانا شاخکێ بهێتە ڤەشارتن.

حەمزە رەزیکی، بەرپرسێ راگەھاندنێ ل رێڤەبەریا گشتی یا ساخلەمیا پارێزگەھا دھۆکێ ئاشکرا کر کو د.شەنم ئەحمەد وەیس، ل سالا ١٩٦٥ ێ ل باژێرێ بەغدا ژدایکبوویە و ل سالا ١٩٨٨ باوەرناما بەکالوریوس ب نۆشداریا گشتی ل زانکۆیا مووسل ب دەستڤە ئینابوو.

ناڤھاتی ئاماژە دا وێ چەندێ کو دامەزراندنا وێ یا ئێکێ وەکو نۆشدار ل سەر میلاکێ رێڤەبەریا گشتی یا ساخلەمیا پارێزگەھا کەرکووکێ بوویە و پاش ل سالا ١٩٩٧ێ ھاتیە ڤەگوھاستن بۆ پارێزگەھا دھۆکێ وەکو مامۆستا ل کۆلیژا پزیشکی یا زانکۆیا دھۆک و نۆشدارا تایبەتمەند یا نەخۆشیێن ژنان و زارۆبوونێ ل نەخۆشخانا ئازادی یا گشتی یا فێرکرنێ و پشکێن نەخۆشیێن ژنان و زارۆبوونێ درێژی ب خزمەتا خوە دایە و خزمەتەکا مەزن پێشکێشی نەخۆشێن ژن ل پارێزگەھێ ب گشتی کریە.

بەرپرسێ راگەھاندنێ ل رێڤەبەریا گشتی یا ساخلەمیا پارێزگەھا دھۆکێ خویا کر کو پشتی ژ لایێ کۆمەلا جیھانی یا نەخۆشیێن ژنان و زارۆبوونێ ھاتیە داخوازکرن بۆ پشکداریکرنێ د کونفرانسەکێ نێڤدەولەتی دا ل وەلاتێ نەمسا، ل رۆژا ٢٥/٦/٢٠١٩ ب مخابنیڤە ژ نشکەکێڤە گیانێ خوە ژدەست ددەت