ئه‌ڤرۆ نيوز:
د گه‌را 31 ژ خۆلا ناياب يا ته‌پا پێى ل عيراقێ، يانا شورته ب سه‌ركه‌فت ل سه‌ر مێهڤانا خوه يانا هه‌ولێر ب ئه‌نجامێ 2-1.
هه‌ردوگۆلێن يانا شورته ل خۆله‌كێن 12 و 34 هاتن تۆماركرن وگۆلا ئێكانه يا يانا هه‌ولێر ل خۆله‌كا 73 هاته تۆماركرن.
ب ڤى ئه‌نجامى يانا شورته ب 76 خالان ل رێزا ئێكێ ل رێزبه‌ندا خۆلا عيراقێ دهێت ويانا هه‌ولێرب ب 39 خالان ل رێزا 10 دهێت.
ئه‌ڤرۆ نیوز، نه‌وزاد هلۆرى:
ب مه‌ره‌ما پشكداريێ د كه‌رنه‌ڤالا پارێزگه‌ها دهۆكێ، تیپه‌كا هونه‌رێ مللى يا سلێمانیێ بۆ ده‌مێ نێزیكێ سێ روژایه ل پارێزگه‌ها دهۆكێ و پشتى ب چه‌ند چاڵاكیه‌كا پشكدارى دكه‌رنه‌ڤالێ دهۆكێ دا كرى، ئه‌ڤرۆ ئه‌ينيێ 14/6/2019 د رێيا زڤرينێ بۆ سلێمانيێ ئاگر به‌ردبيته ترومبێلا وان و قوربانى يێن هه‌ين.
ئه‌حمه‌د مشه‌ختى، سه‌رۆكێ تیپا هونه‌رێ مللى ل دهۆكێ بۆ ئه‌ڤرۆ نیوز گۆت: (ب مه‌ره‌ما پشكداربوون د كه‌رنه‌ڤالێ پارێزگه‌ها دهۆكێ دا ، تیپا هونه‌رێ ملى ل سلێمانیێ هاتبوو دهۆكێ، پشتى كو چالاكیێن وان ب دوماهى هاتینه، ئه‌ڤرۆ ئێڤارى زڤرین ڤه، به‌لێ توشى روودانه‌كا هاتنوچوونێ بوون).
زێده‌تر گۆت: (ژئه‌نجامێ روودانێ دو هونه‌رمه‌ند ل گه‌ل شوفێرى ب گرانى بریندار بووینه، ژبه‌ركو ژ ئه‌نجامێ شورته‌كێ میكانیكى ئاگر به‌ربوویه ترومبێلێ و ئه‌و ژى نه‌چاربوون خوه د ترومبێلێ دا ب هاڤێژن و د ئه‌نجامدا بریندار بووینه).
ئه‌ڤرۆ نیوز، نه‌وزاد هلۆرى:
هاڤینگه‌ها گوندێ خرابینێ كو دكه‌ڤیته گوندێ خرابینێ ل سنوورێ ناحیا دێرالوك ل ده‌ڤه‌را زێبارێ، ئێكه ژ هاڤینگه‌هێن هه‌رى خوه‌ش ل پارێزگه‌ها دهۆك و قه‌زا ئامێدیێ، رۆژانه هژماره‌كا زور ژ گه‌شتیار و خه‌لكێ ده‌ڤه‌رێ ب مه‌ره‌ما گه‌شتوگۆزار قه‌ست دكه‌تێ، به‌لێ هه‌تا نوكه چو خزمه‌تگوزاریێن سه‌ره‌تاىى و گه‌شتیارى لێ نینن، ئه‌ڤ یه‌ك ژى بویه جهێ دلگرانیا گه‌شتیار و خه‌لكى.
دیمه‌نێن سرۆشتیێن هاڤینگه‌ها خرابینێ ره‌نگڤه‌دانێن گه‌له‌ك جوان ل سه‌ر دل و ده‌رونێ گه‌شتیاران دروستكریه، دخوازن ب زووترین ده‌م خزمه‌تگوزارى لێ بهێنه دروستكرن.
ئه‌ڤرۆ نيوز، نه‌وزاد هلۆرى
رێڤه‌به‌رێ به‌رگريا شارستانى ل قه‌زا سۆران عه‌ميد ( عيماد رێكانى) بۆ ئه‌ڤرۆ نيوز راگه‌هاند ” شه‌ڤا بورى پترى 130 چیاڤانێن كوردستانێ، كو هنده‌ك ژ وان ژ سلێمانیێ هاتبوون قه‌ستا چیایێ هه‌لگورد ل سنوورێ ده‌ڤه‌را چومان كر، ئێك ژ وان چیاڤانان بناڤێ (عومه‌ر حه‌مه سالح) دچياى دا د فريت، ب هه‌ول و بزاڤێن به‌ره‌ڤانیا چومان و ب پشكداریا تیما فروكڤانیا هه‌ولێرێ شیان ئه‌وى چیاڤانى رزگار بكه‌ن، دیسان چاره‌سه‌ریا ره‌وشا ساخله‌میا چیاڤانێ دى ژى بكه‌ین كو توشى ماندوبوون و تێكچونه‌كا ده‌روونى و گیانى یا زور ببوو، كو هه‌ردو ژى خه‌لكێ پارێزگه‌ها سلێمانیێ بوون”.
ئه‌ڤرۆ نیوز، نه‌وزاد هلۆرى:
هژماره‌كا گه‌شتیارێن سنوورێ پارێزگه‌ها سلێمانیێ ئه‌ڤرۆ ئه‌ينيێ 14/6/2019 ب مه‌ره‌ما گه‌شتوگۆزار قه‌ستا هاڤینگه‌هێن سنوورێ قه‌زا چومان كر، زاروكه‌كێ ئێك ژ وان گه‌شتیارن دئاڤا سه‌كران دا لقه‌زا چومان خه‌ندقى.
عه‌ميد (عیماد رێكانى)، رێڤه‌به‌رێ به‌ره‌ڤانیا باژێرى ل سوران بۆ ئه‌ڤرۆ نیوز گۆت: (ئه‌ڤرۆ هژماره‌كا گه‌شتیارێن قه‌زا چه‌مچه‌مال ل سنوورێ پارێزگه‌ها سلێمانیێ ب مه‌ره‌ما گه‌شتوگۆزار قه‌ستا هاڤینگه‌ها سه‌كران ل سنوورێ قه‌زا چومان كر، به‌لێ ب مخابنی ڤه زاروكه‌كێ ئێك ژ وان گه‌شتیاران كو ژيێ وى چار سال بوون د ئاڤێ دا خه‌ندقى، ته‌رمێ وى زاروكى هاته ده‌رئینان ژلایێ تیمێن نقومزانێن چومان).
ئه‌ڤرۆ نيوز:
له‌شكرێ ئه‌مريكى ئه‌ڤرۆ ئه‌ينيێ 14/6/2019 ئاشكراكر كو فرۆكه هه‌لگره‌كا ئه‌مريكى به‌ر ب ده‌ريا عومان كه‌فتيه رێ، ب مه‌ره‌ما ئه‌نجامدانا ڤه‌كۆلينێ ل روودانا دوهى پێنجشه‌مبى يا هێرشكرنا سه‌ر دو باپۆرێن ڤه‌گوهاستنا په‌ترۆلى.
ئەڤرۆ نیوز؍عەلی حاجی : د
ل دره‌نگیا شه‌ڤا بۆرى ل سەر رێیا زاخۆ بۆ گوندێ حەسەن ئاڤا ژئەگەرێ لێکدانێ د ناڤـبەرا دو ترومبێلان دا حەفت کەس بریندار بوون كوزارۆك ژى د ناڤ برینداران دا هەبوون .
بەشیر یوسف؍ ژ راگەهاندنا هاتنوچوونا قەزا زاخۆ بۆ ئەڤرۆ نیوزگۆت” ل دره‌نگیا شه‌ڤا بۆرى ل سەر رێیا زاخۆ بۆ گوندێ حەسەن ئاڤا ژ ئەگەرێ روودانەکێ د ناڤبەرا دو ترومبێلان دا ژ جورێ تەکسی و پیک ئاپ، حەفت کەس ژ ئێک خێزان بریندار بوون و ژ وان ژی زارۆك و ژن هەبوون و برینێن برینداران ژی سفک بوون ؍زیانێن مەزنێن مادی ژی بەر ب هەردو ترومبێلان کەفتن”.
ناڤهاتی گوت ژی : ئەگەرێ روودانێ ترومبێلا پیک ئاپ ل لایەکێ جادێ یا راوەستیای بوو و ترومبێلا ژ جورێ تەکسی ژپشتێ ڤە خوە لێدایه.
ئەڤرۆ نیوز،بارزان مزووری:
ژێدەرەك ژ كومپانیا “كار “یا بەرهەمئینانا په‌ترۆلێ ل دەڤەرا ئەترۆش بۆ ئەڤرۆ نیوز گوت:ل چیایێ مغارا بەرامبەری پەرستگەها لالش شەفەلەك خو ل دو ئەندازیارێن میكانیكی یێن كومپانیا كار د دەت د ئەنجام دا كەسەك بناڤێ”حسێن حەسەن كاكە” ب رەگەز ئیرانی گیانێ خوه ژ دەست دا و كەسەك ژی بریندار دبیت كو خەلكێ هەولێرێ یە و بۆ نەخوشخانا تەنگاڤیا قەزا شێخان هاته ڤەگوهاستن.
ناڤهاتی خویاكر” شوفێرێ شەفەلێ ژلایێ پولیسان ڤە هاتە دەستەسەركرن وڤه‌كۆلین ل دۆر روودانێ یا به‌رده‌وامه”.
گوت ژى” ل دووڤ پێزانینێن دەسپێكێ شەفەلێ ستوب نه‌مابوو و هورێن ژی نەبوو كو لێ بدەت وئەو ئەندازیار ل سەر رێكێ دچوون وتایرێ شەفەلێ ل سەردا دبوریت وئەو كەسێ بریندار پییەكێ خوه ژ دەست دا”.
زێدەتر گوت” دڤێ حەفتیێ دا ئەڤە دووەم كارمەندێ كومپانیا كار یا راكێشانا بوریا په‌ترولێ گیانێ خوه ژ دەست د ده‌ت”.
ئەڤرۆ نیوز؍عەلی حاجی :
ل گورەی ئامارەکا رێڤەبەریا گەشتوگوزارێ ل زاخۆ ؍ د ماوەیێ ۱۰ روژان دا رێژەیا هاتنا گەشتیارێن دەڤەرێن ناڤەراست وباشورێن عێراقێ ۳۰٪ بۆ زاخۆ و هاڤینگەهێن وێ زێدەتر بوینە.
بێوار سندى، بەرپرسێ راگەهاندنا رێڤەبەریا گەشتوگوزارێ ل زاخۆ بۆ ئەڤرۆ نیوز دیار کر ژ ئێکێ ڤێ مەهێ هەتا دەهی مەهێ زێدەتر ۱۸ هزار و ٦۲۲ گەشتیار ژدەڤەرێن ناڤەراست و باشورێ عێراقێ قەستا باژێرێ زاخۆ و هاڤینگەهێن دەوروبەرێن وێ کرینە و ئەڤە ژی رێژەیەکا باشە و رێژەیا گەشتیاران ژ سالا بوری باشتر بویە؍هاتنا ڤان گەشتیاران د دەمەکێ دا بو کو دخواستن جەژنا خوە یا رەمەزانا پیروز ل دەڤەرێن زاخۆ بگێرن و مەهەمی ئەو بەرهەڤی ژی کربوون بۆ وەرگرتنا وێ رێژەیا گەشتیاران.
گوت ژی : ئاریشەیا سەرەکی د رێیا مەدا کو هەژمارەکا رێکێن سەرەکیێن هاڤینگەهێن گەشتیاری ل زاخۆ ژناڤ چووینە و پێتڤی ب نووژەنکرنێ نە ؍ ژبەر ڤێ چەندێ مە پروژەیەک پێشکێشی لایەنێن پەیوەندیدار کرینە داکو دنێزیکترین دەم دا رازی بون ل سەر بهێتە دان و یا پێدڤى بۆ بهێتە تەرخان کرن؍هەر دیسان نەبوونا خوارنگەهان ل جهێن گەشتیاریێن دەرڤەی باژێری بوویە جهێ گازندا گەشتیاران و پێدڤیه ئەڤ چەندە بهێتە چارەسەرکرن؍ ژلایەکێ دی ڤە بابەتێ بەردەوامیا بومبەرانکرنا دەڤەرێن سەر سنوری بوویە جهێ مەترسیا گەشتیاران و هژمارەیەکا جادان ژی ژکارئێخستینە .
ئه‌ڤرۆ نیوز، نه‌وزاد هلورى:
ب مه‌ره‌ما پاراستنا ماسیان و دانا خه‌رزى، سالانه بۆ چه‌ند هه‌یڤان نێچیرا ماسیان ل هه‌رێما كوردستانێ دهێته قه‌ده‌غه‌كرن، فه‌رمانگه‌ها ژینگه‌ها دهۆكێ ژى ژڤانێ راكرنا قه‌ده‌غه‌كرنا نێچیرا ماسیان بۆ ئه‌ڤ ساله دیاركر.
محه‌مه‌د تاهیر بریفكانى، رێڤه‌به‌رێ فه‌رمانگه‌ها ژینگه‌ها دهۆك بۆ ئه‌ڤرۆ نیوز گۆت: (هه‌رسال ل رێكه‌فتى 15/3هه‌تا 14/6 نێچیرا ماسیان دهێته قه‌ده‌غه‌كرن، ژبه‌ركو دڤى ماوه‌ى دا ماسى خه‌رزێ خوه ددانن و وه‌رزێ زێده‌بوونا ماسیانه، دیسان پشتى داوى هاتنا وى ماوه‌ى جاره‌كا دى رێیا نێچیرا ماسیان دهێته ڤه‌كرن، رێكه‌فتى ئانكو روژا ئه‌ینى یا بهێت 14/6ده‌ستپێكرنا نێچیرا ماسیان يا دروسته هه‌تا رێكه‌فتى 15/3/2020).
زێده‌تر گۆت: (ژبه‌ركو چو سه‌ندیكایێن نێچیرى ل سنوورێ پارێزگه‌ها دهۆك نینه، چو ئامار ژى نینن ل دۆر زێده‌گاڤیێن ل سه‌ر چون و نێچیرا ماسیان و بكارئینانا مادێن قه‌ده‌غه‌كرى بۆ گرتنا ماسیان، هه‌تا نوكه چو بزاڤ ژى نه‌هاتینه كرن كو سه‌ندیكایه‌ك ل دهوكێ بهێته ڤه‌كرن ، نابیت بێ په‌سه‌ندا سه‌ندیكایێ هيچ كه‌سه‌ك وه‌كو نێچیرڤان بچیته ماسیان و هه‌ر جوره كیڤى و بالنده و تشته‌كێ دى).
نيشاندان