ئەڤرۆ نیوز، نەوزاد هلوری:
چەند سالەکە کار لسەر چێکرنا پروژێ مونومێنتا جینوسایدا بارزانیان لسەر گورستانا جینوسایدکریان ل گوندێ بارزان دهێتەکرن، نوکە پروژە بەرەڤ دوماهیێ دچیت، دچارچوڤێ چێکرنا پروژەی دا دێ 46 دارێن سروشتی هێنەبرین، بەلێ ب بریارا کەساتیەکێ جڤاکی یێ دەڤەرا بارزان دێ 4600 دارێن دى ل شوونا وان داران هێنە چاندن.
رێبوار رەمەزان، رێڤەبەرێ کاروبارێن شەهید و ئەنفالکریێن بارزان دیارکر کو ئەڤە چەند سالەکە کار لسەر چێکرنا مونومێنتا جینوسایدا بارزانیان دهێتەکرن و بۆ ئەڤرو نیوز گۆت: (ئەو جهێ کو مونومێنتا جینوسایدا بارزانیان دهێتە چێکرن جهەکێ سروشتی یە و داروبارێن زور تێدا هەنە، داکو پروژە بهێتە چێکرن دڤێت 46 دار بهێنە برین، بەلێ ب بریارا مەلا موستەفا مەسعود بارزانی کەساتیێ جڤاکی ل دەڤەرێ، ل شوونا هەر ئێک ژ وان دارێن دهێنە برین دێ 100 دارێن دی ژ جورێ دارا تویێ هێنە چاندن کو کوما هەمی ئەو دارێن ل شوونا 46 دارێن دهێنە برین دگەهیتە 4600 داران).
زێدەتر گوت: (ئەڤ هەموو دارە دێ لسەر پروژێ جینوسایدا بارزانیان هێنە چاندن ب تایبەتی ل دەردورێن جهێ ساخکرن و مەراسیما سالانەیا جینوسایدکریان، مە دڤێت پەیامەکێ بگەهینە کوردستانیان کو دەڤەرا بارزان ژینگەهەکا پاراستی هەیە و مە دڤێت ئەڤ یەک ببیتە کەلتور ل دەڤەرێ و دەڤەرێن دى ژی و زێدەتر گرنگی ب جوانی و پاراستنا ژینگەهێ بهێتەدان).
دیارکر ژی کو پروژێ چاندنا داران دێ ل هەیڤا هەشت یا ئەڤ سالە دەست پێ کەت و زێدەتر گۆت: (مونومێنتا جینوسایدا بارزانیان دێ بیتە جهەکێ هەژی بۆ پێشوازیکرنا کەسوکارێن جینوسایدکریان و مێهڤان و خەلکی کو ژ هەژی قوربانیدانا جینوسایدکریان هاتیە چێکرن، ئەڤە زێدەباری جهەک بو کومکرن و ئەرشیفکرنا وێنە و زانیاری و بەلگەنامە و پاشماوێن جینوسایدکریان، دخوازین کو پروژە ب زووترین دەم دووماهی بهێت و بکەڤیتە دخزمەتا وان دا).
نيشاندان