ئه‌ڤرۆ نيوز:
پشتى چه‌ندين وه‌زاره‌ت وده‌زگه‌هێن حوكمه‌تا عيراقێ پاداشتا جه‌ژنێ بۆ فه‌رمانبه‌رێن خوه مه‌زاختين، سه‌رۆك وه‌زيرێن عيراقێ برياردا ئه‌و پاداشته دوباره ژ وان فه‌رمانبه‌ران بهێنه ستاندن.
ل دووڤ نڤيساره‌كا فه‌رمى يا ئه‌مينداريا گشتى يا جڤاتا وه‌زيرێن عيراقێ” سه‌رۆك وه‌زيرێن عيراقێ برياردا هه‌ر وه‌زاره‌ته‌ك وده‌زگه‌هه‌كێ حكومى يێ گۆژمه‌كێ پاره‌ى ب ناڤێ (پاداشتا جه‌ژنێ) ل سه‌ر فه‌رمانبه‌رێن خوه به‌لاڤكرين، دوباره ژێ بهێنه ستاندن، يان ژ مووچێن وان بهێنه برين”.
ئه‌ڤرۆ نیوز:
ده‌زگه‌هێ سه‌قاناسیێ ل عیراقێ به‌لاڤكر كو پێله‌كا گه‌رمێ دێ به‌ر ب عیراقێ ڤه هێت وپلێن گه‌رمێ دێ ب شێوه‌كێ به‌رچاڤ بلند بن.
ده‌زگه‌هێ ناڤبرى دیاركر” ل دووڤ پێشبینیان ل دووماهیا ڤێ هه‌فتیێ پلێن گه‌رمێ ل هه‌موو ده‌ڤه‌رێن عیراقێ ب شێوه‌كێ دێ بلند بن كو ل هنده‌ك ده‌ڤه‌ران دێ گه‌هنه پلا 51″.
ئاماژه كر ژى” رۆژێن ئه‌ینیێ وشه‌مبیێ 7 و 8/6/2019 دێ بلندترین پلا گه‌رمێ ل باشوورێ عیراقێ هێته تۆماركرن ئه‌وژى 51 پله‌یه”.
به‌لاڤكر ژى”ب شێوه‌كێ گشتى ل ده‌ڤه‌رێن ناڤه‌راست وباشوورێ عیراقێ پلێن گه‌رمێ دێ د ناڤبه‌را 48 بۆ 50 دا بن وئه‌گه‌رێ وێ ژى ئه‌و نزمه پاله‌په‌ستویا گه‌رما وه‌رزى یه كو دێ كاریگه‌ریا وێ ب درێژیا وه‌رزێ هاڤینێ ل سه‌ر عیراقێ هه‌بیت”.
ئه‌ڤرۆ نیوز:
سه‌رۆكێ لژنا بلند یا ئه‌زموونان ل وه‌زاره‌تا په‌روه‌ردێ ئه‌ڤرۆ دوشه‌مبى 3/6/2019 رۆهنكرنه‌ك بۆ هه‌موو قوتابیێن رێزا 12 ئاماده‌یى به‌لاڤكر.
كه‌ریم ئیسماعیل، سه‌رۆكێ لژنا بلند یا ئه‌زموونان ل وه‌زاره‌تا په‌روه‌ردێ به‌لاڤكر”ل دووڤ وان داتا وئامارێن ل به‌رده‌ستێ مه، ئاماژێ دكه‌ن كو ئه‌زموونێن وه‌زارى یێن ڤێ سالا خواندنێ 2018 – 2019 ل دووڤ پیڤه‌رێن په‌روه‌رده‌یى دهێنه ئه‌نجامدان، ب جۆره‌كێ گه‌له‌ك باشتر ژ سالێن بۆرى، ل گه‌ل وان گوهۆرینێن د پرۆسێ دا هاتینه ئه‌نجامدان”.
دیاركر ژى” ل دووڤ هه‌لسه‌نگاندنا مه، چو كێماسیێن دیار نینن كو ببنه جهێ گرفتێ، هه‌كه هه‌بیت ژى، ب پشت راستى ڤه دێ ل ئه‌زموونێن داهتى هێنه چاره‌سه‌ركرن”.
ئه‌ڤرۆ نیوز:
ناڤه‌ندا فه‌له‌كناسیێ نێڤده‌وله‌تى پێشبینیێن خوه بۆ دیاركرنا رۆژا ئێكێ ژ جه‌ژنا ره‌مه‌زانا پیرۆز ئاشكراكرن.
محه‌مه‌د عوده، رێڤه‌به‌رێ ناڤه‌ندا فه‌له‌كناسیا نێڤده‌وله‌تى بۆ مالپه‌رێ (سكاى نیوز) راگه‌هاند” هه‌موو ده‌زگه‌هێن فه‌له‌كناسى وتایبه‌تمه‌ندێن وى وارى د هه‌ڤرانه ل سه‌ر وێ چه‌ندێ كو ئه‌سته‌مه ئه‌ڤرۆ دوشه‌مبى 3/6/2019 ل كێشوه‌رێن ئوسترالیا، ئاسیا، ئه‌فریقیا وئورۆپا هه‌یڤ ناهێته دیتن، له‌وما رۆژا چارشه‌مبى 5/6/2019 رۆژا ئێكێ یا جه‌ژنا ره‌مه‌زانێ یه ل وان كێشوه‌ران”.
دیاركر ژى” ئه‌ڤرۆ دوشه‌مبى ل پتریا وه‌لاتێن عه‌ره‌بى هه‌یڤ ب دو خۆله‌كان به‌رى رۆژئاڤابوونێ به‌رزه‌بوو، له‌وما دیتنا هه‌یڤێ پشتى رۆژئاڤابوونێ دێ ئه‌سته‌م بیت ول رۆژا پاشتر دا دێ هێته دیتن”.
ئاشكراكر ژى” رۆژئاڤایێ كێشوه‌رێ ئه‌مریكا باكوور تاكه جهێ هه‌سارێ ئه‌ردى یه كو دشیان دایه ئه‌ڤرۆهه‌یڤ لێ بهێته دیتن، له‌وما ژ روویێ فه‌له‌كى ڤه سوبه‌هى سێشه‌مبى دێ رۆژا ئێكێ ژ جه‌ژنا ره‌مه‌زانێ بیت”.
ئه‌ڤرۆ نیوز:
شیره‌تكارێ جڤاتا ئاسایشا هه‌رێما كوردستانێ، مه‌سرور بارزانى ئه‌ڤرۆ دوشه‌مبى 3/6/2019 ب هه‌لكه‌فتا جه‌ژنا ره‌مه‌زانێ، په‌یامه‌كا پیرۆزباهیێ به‌لاڤكر وتێدا دبێژیت، ئومێده‌وارم ئه‌ڤ جه‌ژنه هانده‌ر بیت بۆ ب هێزكرنا پێكڤه كاركرنێ ژبۆ كوردستانه‌كا ب هێز.
مه‌سرور بارزانى د په‌یاما خوه دا گۆت” ب هه‌لكه‌فتا جه‌ژنا ره‌مه‌زانا پیرۆز، پیرۆزباهیێ ل كه‌سوكارێن سه‌ربلندێن شه‌هیدان وپێشمه‌رگێ قه‌هره‌مان وكارمه‌ندێن جڤاتا ئاسایش وهه‌موو ده‌زگه‌هێن ئه‌منى وپۆلیسان وموسلمانێن كوردستانێ وجیهانێ دكه‌م”.
گۆت ژى” زێده‌بارى ل به‌رچاڤ وه‌رگرتنا خه‌باتا به‌رده‌وام وقوربانیدانا گه‌لێ مه بۆ گه‌هشتن ب ئارمانجێن خوه، ئومێده‌وارم ئه‌ڤ جه‌ژنه هانده‌ره‌ك بیت بۆ ب هێزكرنا پێكڤه‌كاركرنێ ژبۆ كوردستانه‌كا ب هێز كو ل ئاستێ خواست وچاڤه‌رێ وپێشبینیێن وه‌لاتیێن كوردستانێ بیت”.
ئەڤرۆ نیوز،بارزان مزووری:
بارزان محەمەد، رێڤەبەرێ گەشتوگوزارێ ل قەزا سۆران ئەڤرۆ نیوز گوت:دگەل دەزگەهێن ئێمناهیێ و كەرتێ ساخله‌مى ل دەڤەرێ پلانەكا باش هاتیە دارێژتن بۆ رۆژانێن جەژنا رەمەزانێ كۆ پێشوازیا گەشتیاران بهێته كرن بۆ جهێن گەشتیاری ژبەركو د رۆژانێن جەژنێ دا پێشبینی دهێته كرن زێدەتری 25 هزار گەشتیار سەرەدانا جهێن گەشتیاری ل سنورێ قه‌زا سۆران بكەن.
خویاكر ژى” ئەڤ ساله ئەزمونێن قوتابیێن بەغدا وباشور و ناڤەراستا عێراقێ نە و زیانێن مەزن ب كەرتێ گەشتیاری ل هەرێمێ هێنه كرن كۆ د نها دا ئەزمونێن قوتابیانن ودیاره دێ رێژا گەشتیاران كێم بیت، بەلێ پشتی ئەزموون ب دوماهی بهێن، دێ رێژا گەشتیاران بۆ سۆران زێدەبیت ودێ قەرەبوویا رۆژانێن جەژنێ هێته كرن”.
زێده‌تر گۆت” د رۆژانێن جەژنێ دا ل سنورێ قەزا سۆران وجهێن گەشتیاری زێدەتری 35 خارنگەه دێ د ڤه‌كرى ین بۆ پێشوازیا گەشتیاران ،مە گرێبەست دگەل 80 كومپانیێن گەشتیاری یێن ناڤەراستا عێراقێ و نافخۆ ئیمزا كرینه”.
ئەڤرۆ نیوز،بارزان مزووری:
پیر ئاودی سلێمان ،جێگرێ رێكخراوا ئێسڤنێ یا گەشەپێدانا جڤاكی بۆ ئەڤرۆ نیوز گوت:رێكخراوەكا ئیتالی ب هەماهەنگی دگەل حوكمەتا هەرێما كوردستانێ و ئیدارا قەزا شێخان ب سەرپەرشتیا دەرهێنەرێ سینەمایی “جوون ماكرۆ روزی” دێ قوتابخانه‌كا تایبەت بۆ كەسێن خودان پێدڤیێن
تایبەت وئەو كەسێن بووینە قوربانی ل شەرێ داعشێ ئەوێن ماینە بێ دایك و باب دناڤ سەنتەرێ شێخان دا ئاڤاكەت.
خویاكر ژى” بەری ده‌مه‌كى وی دەرهێنەرێ بیانی سەرەدانا مالا هێلینا سێویان دا وبریاردا كۆ قوتابخانه‌كا تایبەت ل سەر كیستێ خوه ئاڤاكەت ب گۆژمێ 36 هزار یورۆیان”.
دیسا گوت” رێكخراوا ئێسڤنێ یا گەشەپێدانا جڤاكی دێ سەرپەرشتیا ڤێ قوتابخانێ كەت كو 75% كار ل سەر هاتیە ئەنجام دا”.
ئه‌ڤرۆ نیوز:
ب هه‌لكه‌فتا جه‌ژنا ره‌مه‌زانێ، سه‌رۆك مه‌سعود بارزانى ئه‌ڤرۆ دو شه‌مبى 3/6/2019 په‌یامه‌ك به‌لاڤكر.
سه‌رۆك بارزانى د په‌یاما خوه دا گۆت”ب هه‌لكه‌فتا هاتنا جه‌ژنا ره‌مه‌زانا پیرۆز، گه‌رمترین پیرۆزباهیان ئاراسته‌ى موسلمانێن جیهانێ ب گشتى وكوردستانێ وعیراقێ ب تایبه‌تى دكه‌م، پیرۆزباهیێن گه‌رم ل كه‌سوكارێن سه‌ربلندێن شه‌هیدان وپێشمه‌رگێ قه‌هره‌مانێ كوردستانێ وهه‌روه‌سا هه‌موو كارمه‌ندێن ده‌زگه‌هێن ئه‌منى یێن كوردستانێ دكه‌م”.
ل دووماهیا په‌یاما خوه، سه‌رۆك بارزانى دبێژیت” ژ خودێ مه‌زن دخوازم رۆژى وعیباده‌تێ هه‌یڤا پیرۆزا ره‌مه‌زانێ ژ هه‌موو موسلمانان وه‌رگرتبیت وئه‌ڤ جه‌ژنه ببیته ده‌ستپێكا ب دووماهى هاتنا نه‌خوه‌شى وكاڤلكاریێ وزڤراندنا ئارامیێ بۆ هه‌موو مرۆڤایه‌تیێ”.
ئەڤرۆ نیوز،رەمەزان هەرنی:
ل ئاكرێ روژانە چەندین بەرهەمێن خومالیێن خوارنێ دهێنە فروتن كو بەرهەمێ ئاژەلێن دەڤەرێ یە، سالانە رێژا ئاژەلدارێن شیردەر ل دەڤەرێ زێدە دبن تایبەت پشتی سالا 2014 ێ رێژا ب خودانكرنا تەرش و كەوالی و ئاژەلداریێ بەرەڤ زێدەبۆنێ ڤە چۆیە.
عیماد ئەحمەد، بەرپرسێ پشكا ئاژەلداریێ ل رێڤەبەریا چاندنا ئاكرێ بۆ ئەڤرۆ نیوز گۆت :روژانە بەرهەمێن سپیاتیێ خومالی ل ئاكرێ دهێتە فروتن وەك (ماست ، پەنیرێ كوردی ، ژاژی ،نیڤشك ، سەرتی، كەشك)پتری هەمیا ل بەرهەمێ ئاژەلداری (هێك ، گوشت ، شیر) دهێنە فروتن ژبەركو خارنێن روژانەیا مروڤانە، بەرهەمێ خومالیێ ماستێ دەڤەرێ یێ چێل و مەرو بزانا پتر هەمی بەرهەمێن سپیاتی دهێتە فروتن بهایێ وێ گەلەك یێ ئەرزانەو خەلك ب ساناهی دشێن ب دەست خوڤەبینین تایبەت ل هەیڤا رەمەزانێدا خواستەكا زورتر لسەر بەرهەمێ سپیاتی زێدە دبیت.
گۆت ژى : ل ئاكرێ 32 هزار 709 سەرێن چێلا هەنە ، ژوانا 10 هزارو 876 چێل روژانە شیری بەرهەم دئینین ، ل وەرزێ شیر دانێ روژانە 21 هزارو 752 كغم شیرێ چیڵا دهێتە بەرهەم ئینان و نزیكی 60% ئەڤ شیرە دهێتە ب كارئینان بۆ بەرهەمێن سپیاتی، 8 هزارو 828 كغم شیرێ بزنا روژانە ل ئاكرێ دهێتە بەرهەم ئینان و روژانە 4 هزارو 264 كیلو دهێنە فروتن ، روژانە 4 هزارو 51 كیلو شیر دگەهیتە كەرگەهان و ناڤ بازارێ فروتنێ ،رێژا مەروبزانا ل ئاكرێ دگەهیتە 410 هزارو 929 سەرێن مەرو بزانا ، 51 هزارو 302 مەرو بزن رێژا 35% شیری بەرهەم دئینین .
ئەڤرۆ نیوز ،رەمەزان هەرنی:
جوتیارێن كوردستانێ دەست ب چاندن و بەرهەمئینانا تڤرا كریە و دیاردكەن كو بەرهەمەكێ پر فروشە و خواستەكا باش ل سەر یا هەی ژلایێ وه‌لاتیان ڤە و جوتیار ژی سال بۆ سالێ زێدەتر بەرهەمدئینن.
سەعدی ئەحمەد، جوتیارەكێ بەرهەمئینانا تڤرایە بۆ ئەڤرۆ نیوز راگەهاند : سالانە چەندین روبەرەكێ ئەردی تڤرا دچینم و ژبەركو ل كوردستانێ خواستەكا باش لسەر بەرهەمێ تڤرا هەیە و ب ساناهی دهێنە بەرهەمئینان و ل دەمێ فروتنێ ب ساناهی دهێتە فروتن ل دووڤ بهایێ رۆژێ .
گوت ژی : هه‌كه ل دەمێ چاندنێ ئەردێ تڤرێ زور كور نەكەن دێ بنكێ وێ مەزن بیت و تڤر هه‌بوویه گەهشتیە پێنچ كیلویان ، هه‌كه تڤر باش بهێتە ئاڤدان، دێ تاما وێ یا شرین بیت ل ناڤ بازاری دەسكێ تڤرا ب 500 دینارا دفروشین و كیلو ژی ب چار هزارایە ، ئەڤ سالە بارانێن باش هاتینە دێ بەرهەمێ تڤرا ل هەموسالا باشتر بیت ، ل دەمێ پێگەهشتنی بازارەكێ خوەش یا هه‌ى و خواستەكا باش یا ل سه‌ر هه‌ى ژلایێ كریاراڤە.
نيشاندان