ئەفرۆ نیوز:
به‌هزاد عەلى ئاده‌م جێگرێ پارێزگه‌رێ دهوكێ ئەڤرۆ سه‌رپه‌رشتیا كومبونا لیژنا هه‌وا دورینێ و وه‌رگرتنا به‌رهه‌مێ جوتیاران ژ گه‌نم وجه‌هى كر.
دكومبونێدا ب ئاماده‌بونا قایمقامێن قه‌زایێن سێمێلێ وشێخان وزاخو به‌حسێ هاتنا وه‌رزێ دورینا گه‌نم وجه‌هێ جوتیاران وبریارا وه‌رگرتنا وى به‌رهه‌مى ژلایێ سایلوێن فه‌یدیێ وشێخان وزاخو ودانانا پلانه‌كا رێكخستى بو ئه‌نجامدانا هه‌وا دورینێ ۆ وه‌رگرتنا به‌رهه‌مێ جوتیارا هاته كرن.
گرنكترین بابه‌تێن دكومبونێدا هاتینه گه‌نگه‌شه‌كرن وبریار ل سه‌ر هاتینه دان ئه‌ڤ خالێن ل خارێ بوون:
(دابینكرنا كاره‌با به‌رده‌وام بو هه‌رسێ سایلویێن زاخو وشێخان وفه‌یدیێ ودانانا تیمێن ئاگر ڤه‌مراندنێ ل جهێن تایبه‌ت یێن هه‌ر سال بو كونترولكرنا رودانێن ئاگرى دانانا میكانزمه‌كا رێك وپێك بو سرا ترومبێلێن بارهلگر ل نێزیك سایلویان كو پروسا وه‌رگرتنێ بله‌ز بهێته ئه‌نجامدان ده‌سته‌سه‌ركرنا گه‌نمێ هاورده ئه‌گه‌ر هه‌بیت ، به‌رهه‌ڤكرنا هه‌رسێ سایلوێن پارێزگه‌هێ وپاقژكرنا گورپانێن نافخو ل سالویان ، قه‌ده‌غه‌كرنا ئینانا گه‌نمى ژده‌رڤه‌ى سنورێن پارێزگه‌هێ ودانانا مه‌فره‌زێن پولیسان ل ده‌رگه‌هێن سایلویان ژبو پاراستنا پروسا وه‌رگرتنا گه‌نمى وپاراستنا ئێمناهیێ وبه‌رده‌وامیا دانا گه‌نمى بو ئاشێن ئارى دماوێ وه‌رگرتنا گه‌نمێ جوتیاران دا وگه‌له‌ك خالێن دى هاتنه په‌سه‌ندكرن بو وێ یه‌كێ پروسه برێك وپێكێ بهێته ئه‌نجامدان).
دهێته چاڤه‌رێكرن پشتى جه‌ژنا ره‌مه‌زانێ ده‌ست ب هه‌وا دورینێ و وه‌رگرتنا به‌رهه‌مێ جوتیارێن پارێزگه‌هێ بهێته كرن.
هه‌ژى گوتنێ یه حكومه‌تا ئیراقا فیدرال بریار دایه كو (340،000) سێ سه‌د وچل هزار ته‌نێن گه‌نمێ جوتیارێن كوردستانێ بهێته وه‌رگرتن وبه‌هرا پارێزگه‌ها دهوكێ ژڤێ رێژێ( 112،000)سه‌د ودازده هزار ته‌نن وبهایێ گه‌نمێ پله ئێك ب (560) هزار دینارا وپله دوو ب (480) هزار دینارا وپله سێ ب (420) هزار دیناران دێ هێته وه‌رگرتن.
ئەڤرۆ نیوز:
پەیڤدارێ وەزارەتا کارەبا حوکمەتا ھەرێما کوردستانێ ئاشکرا کر ھەتا نوکە رەوشا کارەبێ ل ئەڤ سالە باشتر بیت ژ سالێن بوری.
زێدەتر محەمەد ھەورامی دیارکر ھەتا نوکە چو زانیاریێن دروست یێن نوو نینن ل سەر قەبارەیا بەرھەم ئینانا کارەبێ ل ھەرێما کوردستانێ تایبەت ل وەرزێ ھاڤینێ لێ نزیکترین دەم دێ کومبوونەکا تایبەت ل دۆر ڤێ رەوشێ ھێتە کرن و دێ ب فەرمی راگەھینن ل دۆر شیانێن بەرھەم ئینانا کارەبا ھەرێمێ.
ناڤھاتی ئەو چەندە ژی دیارکر کو کارەبا ئەڤ سالە دێ باشتر بیت ژ سالێن بوری و دێ دەمژمێرێن زێدەتر دەنە وەلاتیان ژ بەرکو نوکە ژێدەرێن کارەبا بەنداڤا دووکان و دەربەندیخان و یێن گازێ ژی زێدەبووینە.
ئه‌ڤرۆ نيوز:
نه‌جمه‌دين كه‌ريم پارێزگارێ به‌رێ يێ كه‌ركووكێ ئه‌ڤرۆ چارشه‌مبى 22/5/2019 ل كه‌نالێ كوردستان 24 راگه‌هاند كو ئه‌و نوكه ب شێوه‌كێ ئازاد يێ ل به‌يرۆت پايته‌ختێ لوبنانێ ول نێزيك دێ ڤه‌گه‌رم بۆ كوردستانێ.
نه‌جمه‌دين كه‌ريم گۆت ژى” ئه‌و روودانا په‌يدابووى چو په‌يوه‌ندى ب پۆليسێن نێڤده‌وله‌تى( ئێنترپۆل) ڤه نينه، به‌لكو داخوازا حوكمه‌تا عه‌بادى بوو ژ وه‌لاتێن عه‌ره‌بى كو چ كاريگه‌ريا خوه نينه”.
ئەڤرۆ نیوز، نەوزاد هلوری:
پشتی 24 سالان ژ نەچاندنا برنجی ژ ئەگەرێ نەبوونا ئاڤێ و هاریکاریان، جوتیارێن گوندێ بەرچی جارەکا دی دەست ب چاندنێ کرەڤە، هەر چەندە رەمەزانە، بەلێ وەکو جوتیارێن گوندى دیار دكه‌ن کو وان ب شێوازێ زوبارە دەست پێ کریە و بزاڤێ دکەن بەری جەژنێ هەموو برنجێ خوە بچینن.
ئەڤرۆ نیوز, رەزوان رۆژبەیانی:
جوان رۆژبەیانی سەرۆكا لژنا دەڤەرێن كوردستانى یێن دەرڤە یێن ئيدارا هەرێما كوردستانێ ل پەرلەمانێ كوردستانێ ژ فراكسيۆنا پارتى ديموكراتى كوردستان، بۆ ئەڤرۆ نیوز خویاكر لژنا مه ڕاپۆرت و پێزانينێن تەمام یێن وان گوندان ئەوێن ب سەر ناحیە سەرگەڕان ڤەنە ل سنوورێ پارێزگەها كەركوكێ ب دەست مە گەهشتینە ب تایبەت گوندێ پەلكانە كو ب رۆژا رۆناهی خانی ومال وحالێ وان دهێنە داگیركرن و تێكدان ژ ئالیێ عەرەبیێن هاوردە .
جوانى گوت ژی” نوكە ب رەنگەكێ دی رێگری ل خەلكێ گوندی دهێتە كرن و ئەو دڤه‌ر دهێنه تەعریبكرن و رێ ل بەر وان دهێتە گرتن كو گەنمێ خوە ب دورن”.
دیاركر ژى” مە وەك لژنا ده‌ڤه‌رێن كوردستانى يێن دەرڤەى ئێدارا هەرێمی راپۆرتا خوە یا ئامادە كریە و مه دانوستاندن هه‌نه ل گەل فراكسیۆنێین كوردستانی ل بەغدا كو ئەف ئاریشە بهێنه چارەكرن ,بەلێ ئاريشێ باگراوەندەكێ ديرۆكه يێ هەی و تنێ ب پەرلەمانى ناهێتە چارە كرن “.
گوت ژی” ئەف ئاریشە پێدڤی ب هندێ هەیە كو هەموو حزبێن كوردستانی ب ئێك رێزی و ئێك دەنگی بێنە سەر هێل بزاڤێن رژد بكەن كو رەوشا وان دەڤەران بهێته ئاسایی كرن و پێشمەرگە ڤەگەرنە جهێ خوە یێن بەرێ “.
ئاماژه كر” پشتی كو مال و حالێ خەلكێ گوندێ پەلكانە هاتيە داگیركرن و هندەك ژوان ژی ژلایێ هێزێن عیراقی ڤە هاتنە دەستە سەر كرن , ل وی دەمێ سەرۆك بارزانی ب خوە هاتە سەر خه‌ت وئه‌و كه‌سێن هاتينه ده‌سته‌سه‌ركرن هاتنە ئازاد كرن “.
خوياكر” هه‌كه رۆل و هیمەتا سەرۆك بارزانی نەبا، نوكە رەوش خراپ تر و ئالۆزتر ببا، بەلێ هەتا نوكە ژی رەوش نەيا ئارامە و پرۆسەیا تەعریبێ ل وان دەڤەران یا بەردەوامە”.
ئه‌ڤرۆ نیوز:
جێگرێ به‌رپرسێ میحوه‌رێ رۆژئاڤایێ دیجله، هاشم سیته‌یى، راگه‌هاند، پێشمه‌رگه وهێزێن عیراقى ل سه‌ر هه‌ماهه‌نگیێ ودابینكرنا ئاسایشا رۆژئاڤایێ دیجله رێككه‌فتن.
هاشم سیتەیی بۆ مالپه‌رێ فەرمیێ پارتی دیموكراتی كوردستانی گوت: ” ب رێیا باره‌گایێ له‌شكرى یێ سه‌رۆك بارزانى ل سحێلا، سه‌رۆك عه‌شیره‌ت وكه‌سایه‌تیێن عه‌ره‌ب وكورد، چه‌ندین داخوازى گه‌هاندنه سه‌رۆك بارزانى، سه‌رۆكى ژى سۆز دایێ هه‌موو وان داخوازیان بجهبینیت وكار ژى بۆ پاراستنا خه‌لكێ وێ ده‌ڤه‌رێ بهێته كرن، وه‌كو چاوان به‌رى نوكه ژى هاریكاریا خه‌لكێ وان سنووران كریه”.
سیته‌یى گۆت ژى”هه‌ر ب بزاڤێن سه‌رۆك بارزانى، رێیا سحێلا وزومار هاته ڤه‌كرن وئه‌ڤه ژى دێ بیته ئه‌گه‌ره‌ك بۆ وێ چه‌ندێ لڤین وهاتنوچوون ل وێ ده‌ڤه‌رێ زێده‌تر ببیت”.
دیاركر” ئه‌م وفرقا 15 یا له‌شكرێ عیراقێ ل دۆر چه‌ندین خالێن له‌شكرى وگرێداى خه‌لكێ ده‌ڤه‌رێ رێككه‌فتین، گاڤا ئێكێ ژى ڤه‌كرنا رێیا سحێلا وزومار بوو، پاشى دێ هه‌ماهه‌نگیێ كه‌ین بۆ روو ب رووبوونا لڤینێن داعشێ وپركرنا هه‌ر ڤالاتیه‌كا ئه‌منى ل ڤێ ده‌ڤه‌رێ هه‌بیت”.
ئه‌ڤرۆ نيوز:
مالپه‌ره‌كێ ئيسرائيلى ئه‌ڤرۆ چارشه‌مبى 22/5/2019 به‌لاڤكر كو برياره به‌رپرسێن ئه‌مريكى وئيرانى ب شێوه‌كێ نهێنى ل عيراقێ يان قه‌ته‌ر ژبۆ كێمكرنا گرژيێ د ناڤبه‌را ئيرانێ وئه‌مريكا دا كۆمببن.
مالپه‌رێ (دێبكا) كو يێ نێزيكه ژ هه‌والگيريا ئيسرائيلى، به‌لاڤكر” وه‌لاتێ قه‌ته‌ر يان عيراق دێ مێهڤانداريا وێ كۆمبوونا د ناڤبه‌را به‌رپرسێن ئه‌مريكى وئيرانى كه‌ت ب ئارمانجا ديتنا رێ چاره‌كێ بۆ كێمكرنا گرژيان، ب جۆره‌كى هه‌ردو وه‌لات بشێن گاڤێن كريارى بۆ ب دووماهى ئينانا ناكۆكيێن درێژخايه‌ن ببينن”.
وى وى مالپه‌رێ دياركر ژى كو په‌يوه‌نديا نێڤده‌وله‌تى يا نهێنى د ناڤبه‌را ته‌هرانێ وواشنتۆن دا ده‌ستپێكر، به‌لێ هێشتا نه‌گه‌هشتينه رادا كێمكرنا گرژيێن له‌شكرى د ناڤبه‌را واندا، سه‌ره‌راى وێ چه‌ندێ كو دونالد ترامپ سه‌رۆكێ ئه‌مريكا دووپاتكر كو ناخوازيت شه‌رى ل گه‌ل ئيرانێ هه‌لكه‌ت، ب هه‌مان شێوه عه‌لى خامه‌نه‌ئى رێبه‌رێ ئيسلامى يێ ئيرانێ ژى گۆتبوو كو شه‌ر ل گه‌ل ئه‌مريكا ناهێته ئه‌نجامدان.
ئه‌ڤرۆ نيوز:
رێڤه‌به‌ريا گشتى يا هاتنوچوونێ ل هه‌رێما كوردستانێ برياره‌كا نوو بۆ ره‌نگ وتابلۆيێ وان ته‌كسيان ده‌ردكه‌ت كو ژ نوكه و وێڤه كارێ ته‌كسيان پێ ناهێته كر ودێ هێنه گوهۆرين ب ترومبێلێن تايبه‌ت ودووپات دكه‌ت كو دێ ژ هه‌موو رسوماتێن تۆماركرنێ وژنگه‌هێ و رێ وپران هێنه لێبۆرين.
رێڤه‌به‌ريا ناڤبرى د رۆهنكرنه‌كێ دا ئاماژه كر كو سه‌باره‌ت وان تاكسيێن ژ نوكه و وێڤه حه‌زا كارێ ته‌كسيان نينه، هاتيه به‌رچاڤكرن كو دشێن تابلۆيێن خوه بكه‌نه تابلۆيێن تايبه‌ت وژ هه‌موو رسوماتێن تۆماركرن وژينگه‌هێ ورێ و پران بهێنه لێبۆرين، ب ڤى شێوه‌ى:
1- ل ده‌مێ گوهۆرينا ترومبێلا تاكسى بۆ ترومبێلا تايبه‌ت، پێدڤى ب گرمركێ ناكه‌ت ژ به‌ركو ئه‌و ترومبێل به‌رى نوكه هاتينه تۆماركرن، تنێ د ده‌مه‌كى دا هه‌مه ترومبێلێ كێشه د هژمارا لاشى يان پلێتا كابينێ دا هه‌بوو، دێ هێته هنارتن بۆ گۆمركێ.
2- سه‌باره‌ت رسوماتێن تابلۆى، تنێ رسوماتێن چاپا تابلۆى دێ هێنه وه‌رگرتن كو 50 هزار دينارن.
3- سه‌باره‌ت ره‌نگێ ترومبێلان ژى، خودانێن وان د ئازادن ب ره‌نگكرنا هه‌موو ترومبێلێ بۆ ره‌نگه‌كێ دى يان تنێ سه‌قفێ ترومبێلێ بره‌نگه‌كى دى ره‌نگ بكه‌ت.
4- كار ب مادێ 8 ژ قانوونا هاتنوچوونێ يا هژمار 86 يا سالا 2004 بهێته كرن.
نيشاندان