ئه‌ڤرۆ نيوز:

سه‌نته‌رێ فه‌له‌كناسيێ جيهانى راگه‌هاند رۆژا دوشه‌مبى 6/5/2019 رۆژا ئێكێ ژ هه‌يڤا ره‌مه‌زانێ يه‌.

سه‌نته‌رێ ناڤبرى كو باره‌گايێ وى ل وه‌لاتێ ئيماراتێ يه‌ دياركر” ل پتريا وه‌لاتێن ئيسلامى، ده‌ستپێكا هه‌يڤا شه‌عبانێ رۆژا ئێكشه‌مبى 7/4/2019 بوو، ئانكو ل رۆژا ئێكشه‌مبيا داهاتى كو دبيته‌ 5/5/2019  دێ هه‌يڤا شه‌عبانێ ب دووماهى هێت ورۆژا پاشتر ئێكه‌م رۆژا هه‌يڤا ره‌مه‌زانێ يه‌”.

ژ لايه‌كێ دى ڤه‌ وه‌زاره‌تا ئه‌وقافێ وكاروبارێن ئاينى ل هه‌رێما كوردستانێ راگه‌هاند كو ل ئێڤاريا رۆژا 4/5/2019 لژنا ديتنا هه‌يڤێ ل هه‌رێما كوردستانێ دێ كۆمبيت وبريارێ ل سه‌ر دياركرنا رۆژا ئێكێ ژ هه‌يڤا ره‌مه‌زانێ ده‌ت.

ئه‌ڤرۆ نيوز:

وه‌زيرێ ده‌رڤه‌يێ توركيا مه‌ولود چاوش ئوگلۆ ئه‌ڤ شه‌ڤه‌ ب رێيا فرۆكخانا هه‌ولێر يانێڤده‌وله‌تى گه‌هشته‌ هه‌رێما كوردستانێ وژ لايێ نێچيرڤان بارزانى سه‌رۆك وه‌زيرێن هه‌رێمێ هاته‌ پێشوازيكرن.

چاوش ئوگلۆ د سه‌ره‌دانا خوه‌ دا دێ ل گه‌ل به‌رپرسێن بلند يێن سياسى ل هه‌رێما كوردستانێ كۆمبيت ل دۆرپه‌يوه‌نديێن د ناڤبه‌را ئه‌نقه‌ره‌ وهه‌ولێرێ وره‌وشا عيراقێ وده‌ڤه‌رێ.

شه‌ڤا بۆرى وه‌زيرێ ده‌رڤه‌يێ توركى گه‌هشته‌ به‌غدا وئه‌ڤرۆ ل گه‌ل وه‌زيرێ ده‌رڤه‌يێ عيراقێ كۆمبوو.

چاوش ئوڤلۆ د كۆنگره‌كێ رۆژنامه‌ڤانى دا ئه‌ڤرۆ ل به‌غدا راگه‌هاند” دێ سه‌ره‌دانا به‌سرا وهه‌ولێرێ كه‌ين و ل به‌سرا دێ كونسۆلخانا توركى ڤه‌كه‌ين وژبه‌ر شه‌رێ داعشێ نه‌چار بووين كونسۆلخانا خوه‌ ل مووسلێ دائێخين، له‌وما پشتى به‌سرا دێ بزاڤێ كه‌ين بۆ ڤه‌كرنا كونسۆلخانا توركى ل مووسلێ و مه‌ پێرابوونێن قانوونى ژى پێشكێش كرينه‌ بۆ ڤه‌كرنا كونسولخانێن توركى ل هه‌ردو پارێزگه‌هێن نه‌جه‌ف وكه‌ركووك”.

ئه‌ڤرۆ نيوز:

جێگرێ سه‌رۆكێ په‌رله‌مانێ عيراقێ راگه‌هاند، حوكمه‌تا عيراقێ بودجا گه‌شه‌پێدانا پارێزگه‌هان دێ بۆ هه‌رێما كوردستانێ هنێريت.

به‌شير حه‌داد، جێگرێ سه‌رۆكێ په‌رله‌مانێ عيراقێ گۆت” چو رێگريه‌ك ل به‌رده‌م هنارتنا بۆدجێ گه‌شه‌پێدانا پارێزگه‌هان بۆ هه‌رێما كوردستانێ نينه‌، هه‌ر ده‌مه‌كى ئه‌و بودجه‌ بۆ پارێزگه‌هێن ناڤه‌راست وباشوورێ عيراقێ هاته‌ هنارتن، بۆ هه‌رێما كوردستانێ ژى دێ هێته‌ هنارتن”.

گۆت ژى” بودجا گه‌شه‌پێدانا پارێزگه‌هان نه‌هاتيه‌ گرێدان ب راده‌ستكرنا په‌ترۆلێ ژ لايێ هه‌رێما كوردستانێ ڤه‌، تنێ بودجا وه‌به‌رهێنانێ يا ب راده‌ستكرنا په‌ترۆلێ ڤه‌ گرێداى”.

ئەڤرۆ نیوز، نەوزاد ھلۆری:

ناحیا شێلادزێ ژ روویێ رووبەر و ھژمارا رونشتڤانان مەزنترین ناحیا پارێزگەھا دھۆکێ یە، دکەڤیتە رۆژھەلاتێ قەزا ئامێدیێ ب دوراتیا 30کم، ژ 92 گوندان پێکدھێت، بتنێ حەفت گوند ژ وانان ئاڤەدانن و خەلک لسەر گوندێن خوەیە، 85 گوند ژی ب چولکری ماینە، بەردەوامبوونا بوردومانا فرۆکێن تورکیا ژیانا خەلکی َدەڤەرێ ئێخستیە د مەترسیێ دا.

مێھڤان بێزەلی، وەلاتیەکێ ناحیا شێلادزێ یە دیارکر کو بوردومانکرن و زڤرینا فروکێن تورکیا ل ئەسمانێ شێلادزێ بویە ئاوازەکا رۆژانە و بۆ ئەڤرۆ نیوز گۆت: (ناحیا شێلادزێ ژبلی سەنتەری و ئەو چەند گوندێن ب شێلادزێ ڤە گرێدای, وەکو دی ھەموو مەترسیەکا ئێکسەر بو سەر گیانێ وەلاتیان دروستکریە ئەگەر قەست بکەنێ، ئەڤە زێدەباری وێ یەکێ خوە د سەنتەرێ ناحیێ ژی دا خەلک نەشێت ب ئازادانە بژیت و رۆژانە دەردورێن شێلادزێ و کورەژار دھێتە بوردومانکرن و ل نیڤا شەڤێ خەلک ژ خەو ھوشیار دبن).

زێدەتر گۆت: (ئەم داخوازێ ل ھەر کەس و لایەنەکێ دکەین کو ھاریکاربن بو ھندێ بوردومان بھێنە راگرتن، چونکی مەترسیەکا ئێکسەر بو سەر گیانێ وەلاتیان دروستکریە، پێشتر ژی پتری 20 کەس ل شێلادزێ و دێرەلووک ھاتینە شەھیدکرن و ھندەک ژی ھەتا نوکە چارەنڤیسێ وان نەدیارە).

عسمەت رێکانی، ئەو ژی وەلاتیەکێ دەڤەرێ یە دیارکر کو ژئەگەرێ فروکێن تورکیا ئەو نەشێن د مالێن خوە دا دەرکەڤن و زێدەتر گۆت: (نوکە شێلادزێ و دێرەلووک کەفتیە د چارچوڤەکێ گرتی دا و دەرکەڤن ژ وی چارچوڤی مەترسیەکا ئێسکەر بو سەر گیانێ وەلاتیان دروست دکەت، ژبەرڤی َداخوازێ ل دەستھەلاتدارێن عیراق و کوردستانێ دکەین کو ب جدی کار بکەن بو راگرتنا بوردومانان ل ھەموو گوندێن دەڤەرا نێروەورێکان و دوسکی و بەرواری و بارزان و ھەموو کوردستانێ، چونکی خەلکی تێرا خوە نەخوشی و قوربانی دان و پێدڤی یە ئەڤرۆ وێڤە ب دلەکێ خوش بژین).

ب گورەی نڤیسارا ھژمار ئێک یا سالا 2005 یا سەروکاتیا ھەرێما کوردستانێ یا راستڤەکری، لژێر نڤیسارا سەروکاتیا جڤاتا وەزیران یا ھژمار 846 یا رێکەفتی 7/7/2013 کو ئیمزا سەروک بارزانی لسەر ھەیە و ل رۆژناما وقایعی کوردستان ھاتیە بەلاڤکرن، ناحیا شێلادزێ ھاتیە دامەزراندن و ژ 91 گوندان پێکدھێت و ژ وانان 85 گوند نەئاڤەدانن و حەفت ژی ئاڤەدانن.