ئەڤرۆ نیوز ٬ عەلی حاجی :
رێڤەبەریا پشکا چالاکیێن قوتابخانەیان یا سەر ب پەروەدا قەزا زاخۆ ڤە ل ژێر درووشمێ هونەر ناسناما گەلانە فیسته‌ڤاله‌كا زانستی و هونەری بۆ قوتابیێن قوتابخانا نیلوڤ یا بنەرەتی تایبەت ساز کر و کو تێدا چەندین خوارنێن کوردی و بەرهەمێن زانستی وکارێن هونەری هاتە نیشاندان .
بۆ دیتنا ڤیدیۆیێ ڤى لینكى كلیك بكه.
ئه‌ڤرۆ نیوز، نه‌وزاد هلۆرى:
وه‌لاتیه‌كێ ئێزدى بناڤێ (فه‌رحان به‌ره‌كات) كو ل كومه‌لگه‌ها شاریا دژیت، نه‌هـ رزگاركریێن ئێزدى خودان دكه‌ت كو كه‌س و كارێن وان ژلایێ داعشێ هاتینه گرتن و چاره‌نڤیسێ وان نه‌دیاره.
فرحان به‌ركات، بۆ ئه‌ڤرۆ نیوز گۆت: (ل سالا 2014 ده‌مێ كو داعشێ ده‌ست ب سه‌ر شنگال و ده‌وروبه‌ران گرتى، ئه‌ز ژى ئێك بووم ژ وان كه‌سێن كو هاتیه گرتن، به‌لێ سوپاس بو خودێ مه شیا خوه ژ ده‌ستێ داعش رزگار بكه‌ین و خوه بگه‌هینین دهۆكێ، به‌لێ ب مخابنیڤه هژماره‌ك ژ كه‌س و كار و خه‌لكێ شنگالێ كه‌فته ده‌ست داعشێ و هنده‌ك ژ وان هاتنه شه‌هیدكرن و هنده‌ك ژى هاتنه ره‌ڤاندن ب تایبه‌تى كچ و ژن و زاروك، هژماره‌كا زور ژى ژ ئێزدیان رزگاربوون و خوه گه‌هانده دهۆك و ئاواره و په‌نابه‌ر بوون).
زێده‌تر گۆت: (پشتى كو پروسه‌یا رزگاركرنا ره‌ڤاندیان ده‌ست پێ كرى، هژماره‌ك ژ كه‌سوكارێن من ژى هاتنه رزگاركرن، به‌لێ هێشتا چاره‌نڤیسێ پشكه‌ك ژ ئێزدى و كه‌سوكارێن من ژى نه‌دیاره). فه‌رحانى ب پارێ خوه شیایه كچه‌كا ئێزدى ل قاچاخچیان ب رێیا توركیا بكریت و بگه‌هینیت دهۆكێ و زێده‌تر گۆت: (نوكه ئه‌و كچا ئێزدى ل گه‌ل هه‌شت زاروكێن دن یێن ئێزدى كو هنده‌ك ژ وان ل ڤێ دوماهیێ ده‌ڤه‌را باغووز یا سووریا هاتینه رزگاركرن ل گه‌ل من دژین چونكى كه‌س و كارێن وان ژلایێ داعش هاتینه گرتن و نه‌دیارن، پێدڤى یه جهێن شوله‌ژێ ب جدى هاریكاریا وان كه‌سان بكه‌ن كو ژلایێ داعش هاتینه رزگاركرن، چونكى ره‌فتار و تاوانێن داعشێ ژ روویێ ده‌رونى و جه‌سته‌ى گه‌له‌ك كارتێكرن ل وان كریه). ب گوره‌ى ئاخفتنێن وى هه‌یڤانه‌یا وان زاروكان كو تنێ 60 هزار دینارن تێرا دابینكرنا پێدڤیێن وان ناهێت و ئه‌و ژى هوستایێ له‌بخێ و ل گه‌ل وان زاروكان دبنه 14 كه‌س دخێزانا خوه دا.
ئه‌ڤرۆ نیوز:
وه‌زاره‌تا ئه‌وقافێ وكاروبارێن ئاینى ل هه‌رێما كوردستانێ راگه‌هاند، ل دووڤ رێنما وبریارێن وه‌زاره‌تێ كۆمكرنا پاره‌ى ژ مزگه‌فتێن كوردستانێ ب هه‌موو شێوه‌كى قه‌ده‌غه‌یه.
نه‌به‌ز ئیسماعیل، په‌یڤدارێ وه‌زاره‌تا ئه‌وقافێ وكاروبارێن ئاینى ل هه‌رێما كوردستانێ د داخۆیانیه‌كا رۆژنامه‌ڤانى دا گۆت”ئه‌وێ سه‌رپێچیا ڤێ بریارێ بكه‌ت دێ پێرابوونێن ئیدارى وقانوونى به‌رامبه‌ر هێنه وه‌رگرتن”.
ئه‌ڤرۆ نیوز:
به‌هزاد علی ئاده‌م جێگرێ پارێزگه‌رێ دهوكێ ئه‌ڤرۆ كۆمبونه‌ك دگه‌ل قایمقامێن قه‌زایێن دهوك وسێمێل وچه‌ند فه‌رمانگه‌هێن په‌یوه‌ندیدار یێن هه‌ردوو قه‌زا ئه‌نجامدا.
د كۆمبوونێ دا جێگرێ پارێزگه‌رێ دهوكێ دیاركر كو هنده‌ك ئاریشێن تایبه‌ت ل سه‌ر سنورێن كارگێری هه‌ردوو قه‌زایان هه‌نه نه‌خاسمه ل ده‌ردورێن چایێن زاوا و ماسیكێ وكێڤلا وهنده‌ك سنور نه دیار وئاشكرانه وئاریشه بو وه‌لاتیان وخودانكرنا ته‌رش وكه‌والی وگه‌هاندنا خزمه‌تكاریا وپروژێن وه‌به‌رهێنانێ دهێنه پێش وژبه‌رهه‌ڤبویێن كومبونێ خواست سنورێن كارگێری ل وان ده‌ڤه‌را بهێنه دیاركرن بو وێ یه‌كێ هه‌ر ئاریشه‌كا بهێته پێش بهێته چاره‌سه‌ركرن.
پاش به‌رهه‌ڤبویێن كومبونێ گه‌نگه‌شێن تێر وته‌سه‌ل ل سه‌ر ناڤه‌روكا بابه‌تی كرن وبریار هاته دان كو لیژنه‌كا هه‌ڤپشك ژچه‌ند فه‌رمانگه‌هێن هه‌ردوو قه‌زایان بهێته پێك ئینان و هه‌موو سنورێن كارگێری دناڤبه‌را هه‌ردوو قه‌زایان ب رێكا نه‌خشه‌یه‌كێ نوو بهێنه دیاركرن ولدویف نه‌خشێ نووی سه‌ره‌ده‌ری دگه‌ل هه‌ر ئاریشه‌كێ بهێته كرن وهه‌موو لایه‌نان به‌رهه‌ڤیا خو دیاركر بو هه‌ڤكاریكرنێ دگه‌ل وێ لیژنێ كو بزوترین ده‌م ده‌ست ب كارێن خوبكه‌ت.
ئەڤرۆ نیوز، عەلی حاجی :
ئەندامەکێ جڤاتا پارێزگەھا دھوکێ بۆ ئەڤرۆ نیوز دیار کر دنوکە دا کار بو ھندێ دکەین کومەلگەھا بێگوڤا ببیتە ناحیە و بو ڤێ چەندێ ژی مە چەندین پێنگاڤ ھاڤێژتینە و چاڤەرێ راپورتا لژنا یاسایی نە داکو ل کومبونا ئەنجومەنێ پارێزگەھێ دا بێخینە بەر دەنگدانێ .
ھشیار فەریق گوللی زێدەتر گوت : کومەلگەھا بێگوڤا یا کو دکەڤیتە سەر ب قەزا زاخۆ ڤە زێدەتری 30 گوندان سەر ب وێ کومەلگەھێ ڤەیە و وەکو ئەندامێ جڤاتا پارێزگەھا دھوکێ ژبەریا سالەکێ من کار ل سەر ڤێ چەندێ کری یە ئەڤ چەندە پشتی وێ یەکێ ھات خەلکێ دەڤەرێ و قایمقامیا زاخۆ و لقا 8 یا پارتی دیموکراتی کوردستان داخازا ناحی کرنا بێگوڤا کری و دسیستەمێ لامەرکەزی دا ھندی دەستھەلات بەرفرەھرت ببیت خزمەت زێدەتر دھێتە کرن ، دنوکە دا مە ھەمی رێکارێن گرتینە بەر و پشتی راپورتا یاسایی ب دوماھی بھێت دێ بو ئەنجومەنێ بلند کەین و ئەگەر رازیبون ل سەر ھاتە دان دێ بو جھێن پەیوەندیدار ل کوردستانێ بلند کەین .
ناڤھاتی ئەو چەندە ژی گوت : دحەفتیا دەرباز بوی دا ب رێیا نڤیسارەکێ مە داخاز ژ سەروکاتیا ئنجومەنی کر بو کو بێخیتە دبەرنامەیێ خوە دا و وان ژی داخاز ژوە کر رێکارێن یاسیی بگرینە بەر و ئەو کێماسیێن ھەیی ب رێیا یاسایێ تەمام بکەن ، دماوەیێ بوری دا مە سەرەدانا ناحیا باتیفا و قایمقامیا زاخۆ ژی کری یە و دنوکە ژی دا چاڤەرێ راپورتا لژنا یاسایی نە داکو کارێ مایی ئەنجام بدەین .
ئه‌ڤرۆ نیوز:
ب هه‌لكه‌فتا ده‌ربازبونا (104) سالا ل سه‌ر جینوسایدكرن وقركرنا گه‌لێ ئه‌رمه‌نی ژلایێ ده‌ستهه‌لادارێن ئیمبراتوریا ئوسمانی ل ئێڤاریا رۆژا 24-4-2019 ل هولا دێرا ئه‌رمه‌نان ل باژێرێ دهوكێ وب ئاماده‌بونا فه‌رهاد ئه‌مین ئه‌تروشی پارێزگه‌رێ دهوكێ وچه‌ند كه‌سایه‌تیێن ئه‌رمه‌نی ل دهوك وزاخو یادا 104سالیا جینوسایدكرنا گه‌لێ ئه‌رمه‌نی هاته ساخكرن.
لبه‌راهیێ وارتكێس موسێس ب خێر هاتنا به‌رهه‌ڤبویان كر ورونكرن دانه سه‌ر مێژویا گه‌لێ ئه‌رمه‌نستانێ وئه‌و نه‌هامه‌تیێن ب سه‌رێ وان هاتین ، هه‌روه‌سا ئاماژه دا مێژویا ئه‌نجامدانا كوشتارا ئه‌رمه‌نیا یا كو ب سێ قوناغێن رێكخستی هاتینه ئه‌نجامدان ویا دوماهیێ ل سالا 1919بوو وپتر ژملیونه‌ك وپێنچ سه‌د هزار كه‌سێن بێ گونه‌ه هاتینه كوشتن وگوت هه‌ر سال ل 24 نیسانێ ئه‌ڤ كاره‌ساته ژلایێ گه‌لێ ئه‌رمه‌نی دهێته ساخكرن وهه‌ول دهێنه دان كو دان پێدان بڤێ جینوسایدێ بهێته كرن وهه‌تا نوكه ژماره‌كا زور یا وه‌لاتێن جیهانێ دان پێدان بڤێ جینوسایدێ كریه وژماره دزێده‌بونێدایه …وسوپاسیا حكومه‌تا كوردستانێ وپارێزگه‌ها دهوكێ كر بو وێ گرنگیا ب ئه‌رمه‌نان دده‌ن كو ب ئازادی هه‌موو هه‌لكه‌فت ورێ ورسمێن خو یێن ئولی ونه‌ته‌وه‌یی ئه‌نجامده‌ن.
پاش پارێزگه‌رێ دهوكێ په‌یڤه‌ك پێشكێشكر وبناڤێ كارگێریا پارێزگه‌هێ سه‌رخوشی ل گه‌لێ ئه‌رمه‌نی كروگوت ئه‌م هه‌ست بڤێ نه‌خوشیێ دكه‌ین وبرینه‌كا كویره وناهێته ژبیركرن وته‌كه‌زكر كو هه‌رێما كوردستانێ جهێ پێكڤه‌ژیانا هه‌موو ئول ونه‌ته‌وه‌یانه وملله‌ت ب جینوساید وكیمیابارن وقركرنێ ب دوماهی ناهێن وملله‌ت هه‌ر دێ زیندی مینن وپێشكه‌ڤن ویا گرنگ ئه‌وه ئه‌م سه‌ربورا ژڤان كاره‌ساتان وه‌رگرین وپتر گیانێ پێكڤه‌ژیانێ دناڤ جڤاكیدا به‌لاڤ كه‌ین وهیڤی خاستن سالێن خوشتر ب سه‌ر هه‌موو پێكهاتێن كوردستانێ دابهێن.
پاش چه‌ند سرود وتێكستێن ئاینی ونه‌ته‌وه‌یی هاتنه پێشكێشكرن ده‌ربرین ژكاره‌ساتێ دكر.
هه‌ر بڤێ هه‌لكه‌فتێ به‌رێز (یروانت نیسان) ئه‌ندامێ به‌رێ یێ په‌رله‌مانێ كوردستانێ په‌یڤه‌ك خاند وسوپاسیا هه‌موو به‌رهه‌ڤبویان كر وته‌كه‌زكر كو گه‌لێ ئه‌رمه‌نی وگه‌لێ كوردستانێ زور نه‌هامه‌تی ونه‌خوشی یێن وه‌ك هه‌ڤ دیتی نه وسوپاسیا حكومه‌تا كوردستانێ وپارێزگه‌ها دهوكێ و كر كو هه‌رده‌م پشته‌ڤانبوینه بو گه‌لێ ئه‌رمه‌ن.
پاش قه‌شه ماسێس هاگوب ب خێرهاتنا هه‌موو مێهڤانان كر وته‌كه‌زكر كو هندی ئێك كه‌سێ ئه‌رمه‌نی مابیته ل سه‌ر رویێ ئه‌ردی دێ داخازا مافێن خو كه‌ت كوقه‌ربویا قوربانیێن جینوسایدا ئه‌رمه‌نا بهێته كرن هه‌روه‌سا دیاركر كو تا نوها پترژ 30وه‌لاتان دانپێدان ب جینوسایدا ئه‌رمه‌نیا كریه وئه‌ڤ ژماره روژ بو روژێ دزێده‌بونێ دایه ل دوماهیێ سوپاسیا حكومه‌تا كوردستانێ وپارێزگه‌ها دهوكێ كر كو به‌رده‌وام پشته‌ڤانیا وه‌لاتیێن ئه‌رمه‌نی دكه‌ن.
ل دوماهیێ به‌رهه‌ڤبویا قه‌فته گول دانانه سه‌ر مێنومینته‌كێ قوربانیێن كاره‌ساتێ كو لناڤ باخچێ دێرێ هاتیه دانان .
ئه‌ڤرۆ نيوز، عه‌زيز هه‌ورامى:
پشتى شادى نه‌وزاد په‌رله‌مانتارا نه‌وه‌ى نوێ راگه‌هاندى كو ژ لايێ كه‌سه‌كێ نێزيكى شاسوار عه‌بدولواحد گه‌فێن به‌لاڤكرنا ڤيديۆيێن سكسى ژێ هاتيه كرن، شه‌ڤا بۆرى ب بڕيارا دادوه‌رى سكرتێرێ شاسوار عه‌بدولواحد هاته ده‌سته‌سه‌ركرن.
پشتى سكالايا ئه‌ندام په‌رله‌مانا نه‌وه‌ى نوێ دادوه‌رى بڕيارا ده‌سته‌سه‌ركرنێ بۆ چه‌ند كه‌سێن نێزيك شاسوار عه‌بدولواحد ده‌ركر، كو ئێك ژ وان سكرتێرێ ناڤبرى يه.
ب گۆره‌ى ئه‌و پێزانينێن ئه‌ڤرۆ نيوز ژ ژێده‌ره‌كێ ئه‌منى وه‌رگرتين، شه‌ڤا بۆرى ب بڕيارا دادوه‌رى ژ لايێ هێزێن ئاسايشێ ڤه ئه‌و كه‌س هاتيه ده‌سته‌سه‌ركرن و ده‌ست ب سه‌ر كۆمپيۆته‌ر و مۆبايل و وان كه‌لوپه‌لێن كو گۆمان ل سه‌ر دهێته كرن هاتينه بكارئينان بۆ گه‌فێن ل په‌رله‌مانتارا نه‌وه‌ى نوێ كرين و تۆماركرنا وێنه و ڤيديۆ و ده‌نگى ل ده‌م و جهێن نه‌گۆنجاى.
پشتى كێشێن ناڤخۆ يێن نه‌وه‌ى نوێ گرۆپه‌كێ وێ، گرۆپه‌كێ وێ ڤه‌لڤينێ رابووينه ب به‌لاڤكرنا گه‌فان كو ڤيديۆيێن سكسى يێن سه‌ركرده و ئه‌ندام په‌رله‌مانتارێن وان د ده‌ستێ وان دانه و دێ به‌لاڤ كه‌ن.
هه‌ر ب گۆره‌ى هه‌مان ژێده‌ر كو داخواز كريه ناڤێ وى نه‌هێته به‌لاڤكرن، نها ئه‌و كه‌ره‌سته و سكرتێرێ شاسوار عه‌بدولواحد د ناڤ ده‌ستێ ئاسايشێ دانه.
ئه‌ڤرۆ نيوز:
پشتی ئالۆزی کەفتیە دناڤبەرا نەوەی نوێدا پەرلەمانتارەکا فڕاکسیۆنا نەوەی نوێ ئاشکرا کر کو ژلایێ شاسوار عەبدولواحد و ھەڤالێن وی گەفێن بەلاڤکرنا ڤیدیۆیێن سکسی لێ ھاتنە کرن و دەستەیا مافێ مرۆڤی ژی دبێژیت: چ کۆنتڕۆل ل سەر تۆڕێن جڤاکی نینە و رۆژانە گەفێن وەسا ل دەھان وەلاتیان دھێنە کرن.
شادی نەوزاد، پەرلەمانتارا نەوەی نوێ ل پەرلەمانێ کوردستانێ د کۆنگرەیەکێ رۆژنامەڤانی دا دیار کر پشتی ژلایێ ھژمارەکا ئەندامێن جڤاتا بلندا نەوەی نوێ و پەرلەمانتارێن ئەڤێ فڕاکسیۆنێ گەفێن ئاشکرا کرنا راستیان ل شاسوار عەبدولواحد ھاتینە کرن د ھەمبەردا بەرسڤەک بۆمە ھات کو ئەم تووشی حێبەتیێ بووین، ژبەرکو گەفێن بەلاڤکرنا ڤیدیۆیێن مە یێن سکسی ھاتنە کرن، واتە ھەر مێڤانەکێ ل گوندێ ئەلمانی کو پڕۆژێ شاسوار عەبدولواحدە ل سلێمانیێ مابیت وێنەیێن وی ب کامیرێن ڤەشارتی ھاتینە گرتن.
شادی نەوزاد گۆتژی: بەری ئەز بخوە وەک پەرلەمانتارا نەوەی نوێ ھەلویستێ خوە لدۆر کارێن شاسواری دیار بکەم نامەیەک بۆ من ھنارتیە و تێدا دبێژیت (چاڤەڕێی بەلاڤکرنا فلمێ خوە یێ سکسی بکە) ئەڤە رامانا ڤێ چەندێ یە کو کامیرەێن چاڤدێریێ بۆ کابینێن چاڤی لاند و شوقەیێن گوندێ ئەلمانی ھاتینە دانان و ھەر کەسەک ل دەرڤەی سلێمانیێ ب مەرەما پشکداریێ د چالاکیێن نەوەی نوێدا سەرەدانا سلێمانیێ کربیت ڤیدیۆیێن سکسی بۆ ھاتینە چێکرن، چونکی من بخوە چ ڤیدیۆیێن سکسی نینن ھەتا بھێنە بەلاڤکرن، بەلکۆ ژلایێ باندا شاسواری ھاتینە چێکرن بۆ مە.
ژلایێ خۆڤە محەمەد گومەشینی، پەیڤدارێ دەستەیا مافێ مرۆڤی بۆ رۆژناما ئەڤرۆ گۆت: ل گورەی دووڤچوونا مە بۆ ئەڤان داخویانیێن ئەڤێ پەرلەمانتاران نەوەی نوێ کو گەفێن ناڤبرنێ و بەلاڤکرنا ڤیدیۆیێن سکسی لێ ھاتینە کرن، مخابن ئەڤە بۆیە دیاردەکا نەشیرین ل کوردستانێ و بەری نوکە ددەمێ رێڤەچوونا پڕۆپاگندێن ھەلبژارتنان گرتەیێن سکسی یێن ھژمارەکا بەربژێرێن ژن ھاتنە بەلاڤکرن و وی دەمی ژی مە ھەلویستێ خوە دیار کر، ڤێ جارێ ژی ئەم دێ دووڤچوونا خوە کەین ل گەل لایەنێن ئەمنی بۆ زانینا راستیا ئەڤی بابەتی.
گومەشینی خویاژی کر رۆژانە گەفێن بەلاڤکرنا ناڤبرنێ ل دەھان وەلاتیێن ھەرێما کوردستانێ دھێنە کرن، ئەڤە بەرۆڤاژی قانوونێ و کەلتوورێ جڤاکێ مەیە، چونکی نابیت ببیتە دیاردە کەسەک ل پارتەکا سیاسی جودا ببیت گەفێن تولڤەکرنێ بڤی شێوەی لێ بھێنە کرن و گۆت: ژبەرکو دڤێت دادگەە ئەڤان ئاریشان ئێکلا بکەت، نوکە دەزگەھێن ئەمنی ئامیرێن پێشکەفتی ھەنە بۆ ئاشکراکرنا ئەڤان کەسێن ب رێکێن جودا و تۆڕێن جڤاکی گەفان ل وەلاتیان دکەن، ھەر بەری چەند رۆژان کەسەک ل سلێمانیێ ھاتە دەستەسەر کرن چەندین پەیج و پەڕێن جڤاکی چێکربوون و ھەمبەر وەرگرتنا پارەی گەف ل کچ و ژنا دکرن.
ئەڤرۆ، ھەرھین محەمەد:
رێڤەبەرێ قەرێن بچووک بۆ لاوان ل پارێزگەھا دھۆکێ بۆ ئەڤرۆ دیار کر کو ژ دەستپێکا سالا 2011 دەست ب دانا قەرزێن بچووک ھاتیە کرن و ھەتا سالا 2016 نێزیکی دو ھزار و 346 کەسان ل سەرانسەری پارێزگەھا دھۆکێ ئەڤ قەرە وەرگرتیە و ل سالا 2016 پشتی ھاتنا شەڕێ داعەش و بڕینا بۆدجێ و قەیرانا دارایی حکومەتا ھەرێما کوردستانێ بڕیار دا قستا ژ خەلکی وەرنەگریت و بەری بیست روژان دەست ب وەرگرتنا قستان کریە و گۆت: “د ماوێ 14 روژان دا نێزیکی 60 ملیۆن دینار بۆ حوکمەتێ ھاتینە زڤڕاندن”.
گوھدار عەبدوللا یوسف، رێڤەبەرێ قەرێن بچووک بۆ لاوان ل دھۆکێ زێدەتر گۆت: “گەلەک گەنجان قستێ خوە نەدایە و خوە ل ھیڤیا بڕیارەکێ گرتیە کو حوکمەت ل ھەموو گەنجان خوش بیت ژ ڤی قستی و ل وێ باوەرێ نینم حوکمەت ڤێ بڕیارێ بدەت، چونکو قستێ مە ژی بازرگانی یە و ئەڤ قستە نەدایە کارەکێ مرۆڤایەتی یە، ئەڤ قستەیێ دای بازرگانیێ پێ بھێتە کرن و پێدڤیە بۆ حوکمەتێ بھێتە زڤڕاندن و ئەو کەسێ قستێ خوە ل دەمێ دەستنیشانکری نەدەت و گیرۆ بکەت، ھەر رۆژ ب سێ ھزار دیناران دھێتە سزادان و 30 رۆژێن د دووڤ دا ھەر رۆژ ب پێنج ھزار دینارایە و ئەگەر ھەر قستێ خوە نە دا پرۆژێ وی دێ ھێتە ھەلوەشاندن و پارەی ھەموویێ ل سەر ئێک دێ بۆ حوکمەتێ زڤڕینیت”.
ئەڤرۆ، ئەمیر ئەترووشی:
رێڤەبەرێ سەخبێری و پاراستنا رێک و پرا ل پارێزگەھا دھۆکێ راگەھاند، ھژمارەکا رێیێن سەرەکی یێن پارێزگەھا دھۆکێ ل بەر نووژەنکرنێ نە و ئەڤ یەکە ژی پێدڤی ب 40 ملیار دیناران ھەیە و پلان بۆ نووژەنکرنا وان رێیان ھاتیە ئامادەکرن.
ئەندازیار دێوالی حەمێ بریندار، رێڤەبەرێ سەخبێری و پاراستنا رێک و پرا ل پارێزگەھا دھۆکێ بۆ ئەڤرۆ دیار کر، ھندەک رێکێن سەرەکی یێن ھاتنوچوونێ ل سنوورێ پارێزگەھا دھۆکێ وەکو رێیا سەرەکیا دێرەبوون ھەتا مووسلێ و ھندەک رێیێن دی یێن نێڤدەولەتی ل بەر مەترسیا ژناڤچوونێ نە و پێدڤی ب نووژەنکرنێ ھەنە و ڤەدیتن بۆ وان رێیان ھاتینە کرن و ئەڤ یەکە ژی پێدڤی ب 40 ملیار دیناران ھەیە.
ئاشکرا ژی کر کو ئەڤە نێزیکی پێنج سالانە پرۆسەیا سەخبێریکرنا رێک و پرا ژ ئەگەرێ قەیرانا دارایی ھاتبوو راگرتن و نھا دەم ھاتیە دووبارە دەست ب سەخبێریکرنێ بھێتە کرن و گۆت: “ئەو لەھیێن ل زڤستانا ئەڤ سالە پەیدابووین زیانێن مەزن ب جادە و پرێن پارێزگەھا دھۆکێ گەھاندینە و گەلەک رێکێن دەرەکی ھڕیاینە و چووینە خوارێ و ھندەک رێ ژی ھاتبوونە گرتن و پاشی ھاتینە ڤەکرن”.
ئەندازیار مەعسوم ئیبراھیم سەعید، رێڤەبەرێ گشتیێ رێک و پر و ئاڤەدانکرن و ئاکنجیبوونێ ل پارێزگەھا دھۆکێ دیار کر، لەھی و بارانێن ل زڤستانا ئەڤ سالە بارین، زیانێن مەزن ب جاددەیێن دھۆکێ ئێخستینە و ھژمارەکا زۆر یا جادەیان ل دەمێ باران بارینێ ھاتینە داخستن و پشتی ھینگی ژ لایێ تیمێن رێڤەبەریا وان ڤە ھاتینە ڤەکرن، بەلێ زیان ڤێ کەفتینە و ب کۆژمێ 20 ملیار دیناران زیان گەھشتینە جاددەیێن سەرانسەری پارێزگەھا دھۆکێ و نھا ھەموو ئەو جادە پێدڤی ب نووژەنکرنێ نە.
نيشاندان