ئەڤرۆ نیوز:
شیرەتکارێ جڤاتا ئاسایشا هەرێما کوردستانێ مەسرور بارزانی د پەیامەکێ دا هێرشا ئەڤرۆ یا تیرۆرستی ل وەلاتێ سریلانکا شەرمزار کر و راگەهاند کو هێرشا تیرۆرستی یا ل باژێرێ کۆلۆمبۆی کو تێدا گەلەک وەلاتیێن سڤیل بووینە قوربانی جهێ داخێ یە و ڤێ هێرشێ ب توندی شەرمزار دکەم.
مەسرور بارزانی هەروەسا راگەهاند کو شەرێ تیرۆرێ و تیرۆرستان ئەركێ جڤاکێ نێڤدوەلەتی یە و پێدڤیە ل هەموو جهەکێ ل ڤێ جیهانێ بۆ ئارامی و ئاشتیێ و هەروەسا بۆ پاراستنا وەلاتیێن سڤیل شەرێ تیرۆرێ و تیرۆرستان بهێتە کرن.
ئه‌ڤرۆ نيوز، نيوار محه‌مه‌د سه‌ليم:
بڕياره سوبه‌هى رۆژا رۆژنامه‌ڤانيا كوردى ژ لايێ پشكا رۆژنامه‌ڤانى و رۆژنامه‌ڤانيا ئه‌لكترۆنى ل زانكۆيا پۆليته‌كنينك دهۆك بهێته ساخكرن.
ره‌وان سوبحى، به‌رپرسێ پشكا رۆژنامه‌ڤانى ل په‌يمانگه‌ها ته‌كنيكى كارگێرى دهۆك بۆ ئه‌ڤرۆ نيوز گۆت: “ب هه‌لكه‌فتا 121 ساليا رۆژنامه‌ڤانيا كوردى پشكا رۆژنامه‌ڤانيا ئه‌لكترۆنى و رۆژنامه‌ڤانى ل زانكۆيا پۆليته‌كنيك دهۆك دێ رابن ب ساخكرنا ئه‌ڤێ رۆژێ كو سالانه فيستڤاله‌ك دهێته ئه‌نجام دان”.
ئاشكه‌را ژى كر كو ئه‌ڤه سالا نه‌هێ يه ڤێ سالێ ئه‌نجام دده‌ين و ئه‌ڤ فيستڤاله هه‌موو ژ به‌رهه‌مێن قوتابيانه و گۆت: “دێ رێوره‌سمێن ئيمزاكرنا پرتووكه‌كێ ل دۆر مێژوويا رۆژنامه‌ڤانيێ يا موسه‌دق تۆڤى هێنه ئه‌نجام دان”.
ئه‌ڤرۆ نيوز، نيوار محه‌مه‌د سه‌ليم:
كۆمسيۆنا هه‌لبژارتن و راپرسيێ ل هه‌رێما كوردستانێ راگه‌هاند كو وه‌زاره‌تا دارايى و ئابوورى ره‌زامه‌ندى ل سه‌ر مه‌زاختنا پاداشتێ كارمه‌ندێن سه‌ر سندوقێن ده‌نگدانێ ده‌ربڕيه و بزاڤێ دكه‌ن به‌رى ره‌مه‌زانێ ئه‌و پاداشت بهێنه به‌لاڤكرن.
شێروان زرار، ئاخفتنكه‌رێ ب ناڤێ كۆمسيۆنا بلندا سه‌ربه‌خۆيا هه‌لبژارتن و راپرسيێ ل هه‌رێما كوردستانێ بۆ ئه‌ڤرۆ نيوز گۆت: “ئه‌و كێشێن پێشتر هه‌بوون هاتنه چاره كرن و وه‌زيرێ دارايى و ئابوورى ل حوكمه‌تا هه‌رێما كوردستانێ ره‌زامه‌نديا مه‌زاختنا پاداشتێ كارمه‌ندان ده‌ربڕى”.
زێده‌تر گۆت: “مه داخواز ژ كۆمسيۆنێن هه‌رسێ پارێزگه‌هێن هه‌ولێر، دهۆك و سلێمانى كربوو كو ژمارێن به‌نكى بۆ خوه ڤه‌كه‌ن و وان ژى ڤه‌كرينه و پێزانين ل ده‌ف مه‌نه و گه‌هشتينه به‌نكان”.
ئاخفتنكه‌رێ ب ناڤێ كۆمسيۆنا بلندا سه‌ربه‌خۆيا هه‌لبژارتن و راپرسيێ ل هه‌رێما كوردستانێ دا زانين ژى كو ل سه‌رانسه‌رى پارێزگه‌ها دهۆكێ 11 به‌نك هاتينه راسپاردن بۆ به‌لاڤكرنا ڤان پاداشات و گۆت: “بزاڤێ دكه‌ين ل به‌رى هاتنا هه‌يڤا ره‌مه‌زانێ ڤان پاداشتان به‌لاڤ بكه‌ن، به‌لێ دێ چاڤه‌رێ به‌نكان كه‌ين هه‌تا ڤى پاره‌ى به‌رهه‌ڤ دكه‌ن”.
د هه‌رلبژارتنێن 30ى ئيلۆنا 2018ێ دا ل پارێزگه‌ها دهۆكێ هه‌شت هزار و 887 كه‌سان ل سه‌ر سندوقێن ده‌نگدانێ و ل بنگه‌هان كار كربوو و كۆژمێ ملياره‌ك و 432 مليۆن و 400 هزار دينار بۆ هاتيه دابينكرن و دێ ب رێيا به‌نكان هێته به‌لاڤكرن.
ئه‌ڤرۆ نيوز:
سپێده‌هيا ئه‌ڤرۆ ئێكشه‌مبى 21ى نيسانا 2019 زنجيره‌كا په‌قينان ل كۆلۆمپۆ يا پايته‌خت و چه‌ند باژێرێن دى ل سريلانكا روودا، ب گۆره‌ى پێزانينێن ده‌سپێكى ب كێمى 150 كه‌سان گيانێ خوه ژ ده‌ست دايه و زێده‌تر ژ 400 كه‌سان بريندار بووينه.
ته‌قين ل ده‌مێ ب رێڤه‌چوونا رێوره‌سمێن جه‌ژنا قيامه رووداينه كو سێ كه‌نيسه كرينه ئارمانج ل گه‌ل سێ ئۆتێلان. پۆليسێن سريلانكا راگه‌هاند “ته‌قين د ئێك ده‌م دا رووداينه”.
سريلانكا دورگه‌يه‌كه دكه‌ڤيته باشوورێ ئاسيا و وه‌لاتيێن وێ 70% ئاينێ بودى نه و 12%ژى هندوس و 10% موسلمان و 08% ژى مه‌سيحى نه.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا راگه‌هاندن و چاپ و به‌لاڤكرنا راگه‌هاند كو ب هه‌لكه‌فتا رۆژا جيهانى يا پرتووكێ، رێڤه‌به‌ريا وان ب پشكداريا هه‌موو پرتووكخانێن پارێزگه‌ها دهۆكێ دێ پێشانگه‌هه‌كا پرتووكان يا سێ رۆژى ڤه‌كه‌ن.
بورهان يه‌حيا، په‌يڤدارێ رێڤه‌به‌ريا راگه‌هاندن و چاپ و به‌لاڤكرنێ ل دهۆكێ بۆ ئه‌ڤرۆ نيوز گۆت: “ب هه‌لكه‌فتنا رۆژا جيهانى يا پرتووكێ كو دبيته 23ى نيسانێ ل هه‌رسال ل سه‌ر ئاستێ جيهانێ، دێ پێشانگه‌هه‌كا پرتووكان ل پارێزگه‌هان دهۆكێ ڤه‌كه‌ين”.
زێده‌تر گۆت: “ژماره‌كا زۆر يا پترووكان ژ لايێ هه‌موو پرتووكخانێن پارێزگه‌ها دهۆكێ ل گه‌ل يێن رێڤه‌به‌ريێ دێ د پشكدار بن و بۆ ماوێ سێ رۆژان ل ناڤه‌ندا قوتابيان ل گوندێ زانكۆ دێ يا به‌رده‌وام بيت”.
ئه‌ڤرۆ نیوز، نه‌وزاد هلۆرى:
پترى 40 سالایه وه‌لاتیێن گوندێ هلورا و گوندێ بالندا، و پشكه‌كا مه‌زن ژ خه‌لكێ كومه‌گه‌ها سیریێ، بۆ ده‌ربازبوون ژ ئاڤا رووبارێ زێ مه‌زن، داڤه‌رستێ بكاردئینن، به‌لێ بلندبوونا ئاستێ ئاڤێ دنوكه دا مه‌ترسى بۆ سه‌ر گیانێ وه‌لاتیان دروستكریه.
بۆ ديتنا ڤيديۆيێ ڤى لينكى كليك بكه.
ئه‌ڤرۆ نيوز:
وه‌زاره‌تا دارايى وئابوورى ل هه‌رێما كوردستانێ برياره‌كا نوو بۆ فه‌رمانبه‌رێن هه‌رێما كوردستانێ ده‌ركر.
ل دووڤ نڤيسارا وه‌زاره‌تا دارايى يا هژمار 3909 ل 16/4/2019 ده‌مێ ته‌نسيكرنا فه‌رمانبه‌ران ئێك ساله ودشيان دايه بۆ ساله‌كا دى بهێته نووكرن.
د وێ نڤيسارا وه‌زاره‌تا دارايى دا هاتيه” ل ده‌مێ ته‌نسيبكرنا فه‌رمانبه‌رى بۆ فه‌رمانگه‌هه‌كا دى، هه‌تاكو دووماهيا سالا دارايى كو دبيته هه‌يڤا (12) هه‌موو مووچه وده‌رمالێن خوه ل فه‌رمانگه‌ها وى يا سه‌ره‌كى دێ هێنه مه‌زاختن”.
دياركريه ژى” بۆ سالا دارايى يا نوو، ئه‌و فه‌رمانگه‌ها فه‌رمانبه‌ر بۆ هاتيه ته‌نسيبكرن ل سه‌ر بنه‌مايێ دووماهى مووچه، دێ مووچه‌ى بۆ مه‌زێخيت ئانكو تنێ شايستێ وى مووچه‌ى وده‌رمالان دبيت كو د باوه‌رناما دووماهى مووچه‌ى دا هاتى، نه‌كو وان مووچه وده‌رمالێن ل فه‌رمانگه‌ها بۆ هاتيه ته‌نسيبكرن بهێته مه‌زاختن.
ئەڤرۆ نیوز:
سەرۆک مەسعود بارزانی ب هەلکەفتا جەژنا قیامە یا حەزرەتێ مەسیح (سلاڤێن خودێ ل سەر بن) پیرۆزباهی ل خووشک و برایێن مەسیحی ل کوردستانێ و جیهانێ کر و پەیامەک بەلاڤکر کو ئەڤە ژی دەقێ پەیامێ یە:
ب ناڤێ خودایێ مەزن و دلۆڤان
ب هەلکەفتا جەژنا قیامە یا حەزرەتێ مەسیح (سلاڤێن خودێ ل سەر بن)، پیرۆزباهیێ ل هەموو خووشک و برایێن مەسیحی ل کوردستانێ، عیراقێ و هەموو جیهانێ دکەم، هێڤیدارم ڤێ جەژنێ د ناڤا خوشیێ دا دەرباز بکەن.
هەلکەفت و جەژنێن پێکهاتێن ل کوردستانێ دەلیڤێن باشن بۆ دوپاتکرنا براتی، ئاشتی و پێکڤەژیانێ، جهێ شانازیێ یە کو کەلتورێ پێکڤەژیانێ ل وەلاتێ مە دیرۆکەکا خوە یا کەڤن هەیە و ژ بەر ڤێ کەلتورێ ژی ئەڤرۆکە کوردستان ل جیهانێ بوویە نموونەکا بەرچاڤ یا پێکڤەژیانا هەموو پێکهاتە، ئایین و نەتەوێن جودا.
ب ڤێ هەلکەفتا پیرۆز هێڤیا بەختەوەری و خوشیێ بۆ هەموو خووشک و برایێن مە یێن مەسیحی دخوازم و هێڤیدارم ئەڤ هەلکەفتە ببیتە دەستپێکەک بۆ نەمانا توندرەویێ و زۆرداریێ و ئاشتی ل هەموو دەڤەرێ و جیهانێ بەلاڤ ببیت.
مەسعود بارزانی
٢٠/٤/٢٠١٩
ئەڤرۆ نیوز:
ب چاڤدێریا فرهاد ئه‌مین ئه‌تروشى پارێزگه‌رێ دهوكێ وئاماده‌بونا چه‌ند به‌رپرسێن حزبى وئیدارى وله‌شكرى ئەڤرۆ ل دەڤەرا کێڤلا ل دھۆکێ نه‌خوشخانا كوردستان یا ئافره‌ت وزاروكبونێ یا كه‌رتێ تایبه‌ت هاته ڤه‌كرن.
به‌راهیێ خودانێ پروژه‌ى حكمت توفیق سه‌یداڤایى په‌یڤه‌ك پێشکێشکر و سوپاسیا وان هه‌موو لایه‌ن وكه‌سان كر یێن بوینه هاریكار بو ئاڤاكرنا نه‌خوشخانا كوردستان یا ئافره‌ت وزاروكبونێ وخواست كو وه‌به‌رهێنه‌ر وكه‌سانێن ده‌وله‌مه‌ند چاڤ ل وان بكه‌ن وپروژێن خزمه‌تكارى مل بملێ كه‌رتێ گشتى ئاڤاكه‌ن بو خزمه‌تكرنا گه‌ل وه‌لاتى.
پاش په‌یڤا رێڤه‌به‌ریا نه‌خوشخانێ ژلایێ (د.رمه‌زان) هاته خاندن وچه‌ند رونكرن دانه سه‌رنه‌خوشخانێ وپشكێن خزمه‌تكرنا زاروك و ئافره‌ت وزاروكبونێ وگوت: ئه‌ڤ نه‌خوشخانه دێ مل بملێ نه‌خوشخانێن كه‌رتێ گشتى كار وخزمه‌تێ پێشكێشكه‌ت وبارێ نه‌خوشخانێن حكومه‌تێ كه‌رتێ گشتى سڤككه‌ت .
هه‌روه‌سا ئاماژه دا گرنگیا نه‌خوشخانێ كو ب كوالیتیه‌كا باش هاتیه ئاڤاكرن وهه‌ڤالا ژینگه‌هێ یه وئامیرێن خزمه‌تكرنێ یێن پێشكه‌فتى لێ هاتینه دانان وب بهایه‌كێ ئه‌رزان دێ خزمه‌تێن ساخلەمى پێشكێشى زاروك وئافره‌ت وزاروكبونێ كه‌ت .
هه‌روه‌سا گوت: نه‌خوشخانێ ده‌لیڤێن كارى بو (150) كارمه‌ندێن جودا جودا په‌یداكرینه ولنه‌خوشخانێ چه‌ندین هولێن زاروكبونێ هه‌نه وبیست و چار ده‌مژمێرا دێ پێشوازیا ئافره‌تا كه‌ن زێده‌بارى هه‌بونا ژورێن چاڤدێریا چر ونوشدارێن نوبه‌دار وهه‌بونا پشكا چاندنا زاروكێن بوریا وهه‌بونا كلینیكێن نوشدارا وژورێن نشته‌رگه‌ریا وتیشكێن میفراز وسونه‌ر وتاقیگه‌هه‌كا سه‌رده‌میانه وده‌رمانخانه‌كا رێك وپێك وچه‌ندین خزمه‌تكاریێن دن.
پاش رێڤه‌به‌رێ گشتى یێ ساخله‌میێ ل پارێزگه‌هێ په‌یڤه‌ك پێشكێشكر وخوشحالیا خو ب ڤه‌كرنا نه‌خوشخانێ دیاركر وته‌كه‌زكر كو هه‌رده‌م حكومه‌تا هه‌رێما كوردستانێ پشته‌ڤانیا ڤان جوره پروژێن ساخلەمیێ كریه وسه‌ركه‌فتن بو خودانێن پروژه‌ى خواست.
پاش نه‌خوشخانا كوردستان یا ئافره‌ت وزاروكبونێ یا كه‌رتێ تایبه‌ت ب شێوه‌كێ فه‌رمى هاته ڤه‌كرن وبه‌رهه‌ڤبویان گه‌ریانه‌ك ل ناڤ ژور وهولێن نه‌خوشخانێ كر وژنێزیك سه‌حكره به‌رهه‌ڤیا وێ بو خزمه‌تكرنا زاروك وئافره‌تان.
نيشاندان