ئه‌ڤرۆنیوز:

شیره‌تكارێ جڤاتا ئاسایشا هه‌رێما كوردستانێ، مه‌سرور بارزانى، ئه‌ڤرۆ چارشه‌مبى 13/3/2019 پێشوازى ل سداد ئونال جێگرێ وه‌زیرێ ده‌رڤه‌یێ توركیا وشاندێ دگه‌لدا كر.

ددیداره‌كێ دا دوماهى پێشهاتین ده‌ڤه‌رێ وپه‌یوه‌ندیێن دوقۆلى وبزاڤ وگاڤێن پێكئینانا كابینا نوو یا حوكمه‌تا هه‌رێما كوردستانێ وپرسێن هه‌ڤپشك هاتن‌ به‌حسكرن.

مه‌سرور بارزانى، خواستا هه‌رێما كوردستانێ بۆ پێشڤه‌برنا په‌یوه‌ندیێن دناڤبه‌را توركیا وهه‌رێما كوردستانێ دهه‌موو بواران دا دووپاتكر. ب شێوه‌كى دبه‌رژه‌وه‌ندیا هه‌ردو لایه‌نان دا بیت وخزمه‌تا ئاشتیێ وسه‌قامگیریێ وهه‌ڤسنوریا باش بكه‌ت.

جێگرێ وه‌زیرێ ده‌رڤه‌یێ توركیا هیڤیا سه‌ركه‌فتنێ بۆ مه‌سرور بارزانى خواست دسه‌رۆكاتى كرنا كابینا داهاتى یا حوكمه‌تا هه‌رێما كوردستانێ وحه‌زا وه‌لاتێ خوه‌ بۆ پێشخستنا په‌یوه‌ندیێن ئابوورى وبازرگانى ل گه‌ل هه‌رێما كوردستانێ وه‌كو هه‌ڤسنور وده‌رگه‌هه‌ك بۆ ده‌ڤه‌رێن دى یێن عیراقێ ده‌ربرى.

دانوستاندن ل دۆر پێشهاتێن ده‌ڤه‌رێ وره‌وشا ئاسایشا ده‌ڤه‌رێن سنورى ورۆلێ كۆمپانیێن توركى ل هه‌رێما كوردستانێ ته‌وه‌ره‌كێ دى یێ دیدارێ بوو.

 ئه‌ڤرۆ نیوز، نه‌وزاد هلۆرى:

ده‌مه‌كێ كێم به‌رى نوكه‌ فروكێن شه‌رى یێن توركیا ئه‌سمانێ ده‌ڤه‌را ئامێدیێ به‌زاند و ب دژوارى ده‌ڤه‌را نهێل توپبارانكر، به‌لێ هه‌تا نوكه‌ زیان نه‌هاتینه‌ زانین.

مشیر كركوى، وه‌لاتیه‌كێ ده‌ڤه‌رێ یه‌ بۆ ئه‌ڤرۆ نیوز گۆت: (ده‌مه‌كێ كێم به‌رى نوكه‌ فرۆكێن توركیا ئاسمانێ ده‌ڤه‌رێ به‌زاند و ب دژوارى ده‌ڤه‌را نهێل ل سنوورێ ناحیا دێره‌لوكێ توپبارانكر).

 زێده‌تر گۆت: (توپبارانكرن ل نێزیك هه‌ردو گوندێن گوهه‌رز و بلاڤه‌بوو كو دو گوندێن ئاڤه‌دانن و خه‌لك تێدا دژیت، پێشتر ژى چه‌ندین جاران ئه‌و جهه‌ ژلایێ فروكێن توركیا هاتیه‌ توپبارانكرن ب بهانه‌یا هه‌بوونا باره‌گایێن پارتا كرێكارێن كوردستانێ یه‌).

ناڤبرى ئاماژه‌ ب وێ یه‌كێ كر ژى كو نوكه‌ وه‌رزێ بهارێ هاتیه‌ و خه‌لك به‌رده‌وام قه‌ستا چیای و ناڤا ره‌زێن خوه‌ دكه‌ت و ئه‌و دخوازن كو جهێن شوله‌ژێ ب جدى كار لسه‌ر هندێ بكه‌ن ب زووترین ده‌م توپبارانكرن بهێته‌ راگرتن دا كو خه‌لك نه‌بیته‌ قوربانى.

ئه‌ڤرۆنیوز:

به‌رپرسێ په‌یوه‌ندیێن حوكمه‌تا هه‌رێما كوردستانێ وكۆمارا ئیسلامى یا ئیرانێ ئاشكراكر كو وه‌زاره‌تا ناڤخوه‌ ب هه‌لكه‌فتا جه‌ژنا نه‌ورۆزێ بریاره‌ك بۆ گه‌شتیارێن ئیرانى ده‌ركریه‌.

عەبدولا ئاکرەیی، به‌رپرسێ په‌یوه‌ندیێن حوكمه‌تا هه‌رێما كوردستانێ وكۆمارا ئیسلامى یا ئیرانێ گۆت” ب هه‌لكه‌فتا جه‌ژنا نه‌ورزێ هه‌ر ژ 15/3/2019 وهه‌تا 25/3/2019 ئه‌و وه‌لاتیێن ژئیرانێ دهێنه‌ هه‌رێما كوردستانێ، باج ورسۆمات ژێ ناهێنه‌ وه‌رگرتن”.

ناڤبرى دداخۆیانیه‌كا رۆژنامه‌ڤانى دا دیاركر ژى كو دسالا بۆرى دا هه‌مان بریار هاتبوو ده‌ركرن وئارمانجا وان ئه‌وه‌ خه‌لكێ ئیرانێ سه‌ره‌دانا هه‌رێما كوردستانێ بكه‌ن.

دیاركر ژى كو دوهى كه‌ریم شنگالى وه‌زیرێ ناڤخوه‌ ل هه‌رێما كوردستانێ ئه‌و بریاره‌ ده‌ركریه‌.