ئەڤرۆ نیوز، عەلی حاجی:

رێڤەبەریا رەوشەنبیری و ھونەری ل زاخۆ دێ ب شوونوار و ھێمایێن باژێرێ زاخۆ پشکداریێ د رۆژا پارێزگەھبوونا دھۆکێ دا کەت کو بڕیار ئەڤرۆ رێورەسمێن وێ دەست پێ بکەن.

شێوەکار موسلم ئەحمەد، بۆ ئەڤرۆ نیوز دیار کر کو ئەو کەڤالێ ھاتیە دروستکرن دەربڕینێ ژ دو جھێن شوونواریێن باژێرێ زاخۆ دکەت، ئێک ژ وان پرا دەلالە و یا دیتر ژی قشلا زاخۆیە و گۆت: “مە ھێمایێ جاددەیێ دانایە سەر پرا دەلال کو ئەو دەربڕینێ ژ جاددا نێڤدەولەتیا ئیبراھیم خەلیل، دیسا بۆریێن پترۆلێ ژی د ناڤ وی کەڤالی دا ھەنە، مەرەما مە یا سەرەکی ژ وی کەڤالی ئەوە کو ئەم زەنگینیا باژێرێ زاخۆ نیشا بدەین، ئەڤ ھزرە یا من و شێوەکار فارس تەمەری یە و ھەر چەندە ماوەیێ وێ یێ کورت بوو، بەلێ مە شیا د ماوەیێ ١٢ رۆژان دا ڤی کاری ئەنجام بدەین”.

ناڤھاتی ئاماژە ب وێ چەندێ ژی کر کو ب پارەکێ کێم ئەڤ کارە ھاتیە ئەنجامدان و زێدەباری وێ چەندێ ژی جھێ وان یێ تەنگ بوو و ئەڤ کارە ھەموو ل بەرھەتاڤێ ھاتیە کرن و گۆت: “دەمێ ئاگەھدارکرنا مە نەیێ گونجایی بوو درەنگ ئەم ھاتینە ئاگەھدارکرن، قەیرانا دارایی کارتێکرنەکا نەرێنی ل سەر کارێ مە کری یە و ئەگەر پارەکێ باشتر بۆ مە ھاتبا تەرخانکرن دا کارەکێ باشتر ئەنجام دەین”.

ئەڤرۆ نیوز، ئەمیر ئەترووشی:

بەرپرسێ راگەھاندنا لقێ شنگال یێ پارتی دیموکراتی کوردستان راگەھاند، عەرەبێن ١٠ گوندێن شنگالێ یێن بەری نوکە ل گەل داعش، ب ھاریکاری و پشتەڤانیا حوکمەتا عیراقێ جارەکا دی ڤەگەڕیاینە سەر گوندێن خوە.

ئدریس زۆزانی، بەرپرسێ راگەھاندنا لقێ شنگال یێ پارتی دیموکراتی کوردستان بۆ ئەڤرۆ نیوز دیار کر، رەوشا شنگالێ رۆژ بۆ رۆژێ یا خراپتر لێ دھێت و نھا ژی ئەم ل سەر رەوشێ د ئاگەھدارین کو نێزیکی ١٠ گوندێن شنگالێ کو بەری نھا عەرەب تێدابوون و دەست ل گەل داعشێ و کارەساتا شنگالێ ھەی جارەکا دی ڤەگەڕیاینە سەر گوندێن خوە و حوکمەتا عیراقێ ژی ل شوونا رێگریێ لێ بکەت و لێپرسینێ د گەل دا بکەت، پشتەڤانی و ھاریکاریا وان دکەت ژ بۆ ڤەگەڕیانا وان.

ناڤھاتی ئاشکرا ژی کر کو ئەو عەرەبێن ڤەگەڕیاینە ڤە ھەموو سەر ب رێکخراوا تیرۆرستی یا داعشێ ڤەنە و ژ لایێ حوکمەتا عیراقێ ڤە ژ سووریا ڤەگەڕیاینە گوندێن خوە ل شنگالێ و مە زانیاریێن پشتراستکری ھەنە کو خەلکێ وان گوندان بەری نھا ھەموو د گەل داعشێ دا بوون.

ئەڤرۆ نیوز، مەحمود نھێلی:

بەرپرسێ بنگەھێ بەرەڤانیا باژێری ل ناحیا دێرەلۆکێ بۆ ئەڤرۆ نیوز دیار کر کو د حەفتیا پشتی جەژنا رەمەزانێ دا ھەتا نوکە پێنج روودانێن ئاگربەربوونێ ل سنوورێ ناحیا دێرەلۆکێ چێبووینە.

جیدارێ ئێکێ ئیحسان سەنعان، بەرپرسێ بنگەھێ بەرەڤانیا باژێری ل ناحیا دێرەلۆکێ خویا کر، ژ بەر کو نوکە بەرەڤ وەرزێ ھاڤینێ ڤە دچن و رۆژ بۆ رۆژێ روودانێن ئاگربەربوونێ ژی زێدە دبن و گۆت: “د رۆژانێن پشتی جەژنا رەمەزانێ دا ھەتا نوکە پێج روودانێن ئاگربەربوونێ ل سنوورێ ناحیا دێرەلۆکێ چێبووینە، چار ژ وان روودانان یێن پیش و پەلەخی و گیایێ ئالفێ تەرش و کەوالی بووینە و ئێک ژی پەنزینخانەک بوویە، لێ سوپاس بۆ خودێ ئەم شیاین زوو بگەھینە جھێ روودانێ و کونترۆلێ ل سەر ئاگری بکەین”.

ناڤھاتی ئاماژە ب وێ چەندێ ژی کر کو د ڤان روودانێن ئاگربەربوونێ دا سوپاس بۆ خودێ چ زیانێن گیانی نەبووینە، لێ زوورترین زیانێن مالی گەھشتینە پەنزیخانێ کو تێدا دو موەلیدێن بچیکێن کارەبێ و موەلیدەکا مەزنا ٣٠ کەیڤی و دو موەلیدێن دی یێن ئەکسا و تورا کارەبێ ھاتیە سۆتن و نێزیکی سێ ملیۆن دیناران زیان گەھشتینە خودانێ وێ و گۆت: “پشتی تیمێن مە گەھشتینە جھێ روودانێ و شیان ب زووترین دەم کونترۆلێ ل سەر ئاگری بکەن و نەھێلن ئاگر بگەھیتە تانکێن عمبارکرنا سۆتەمەنیێ و زیانێن مەزنتر بگەھیننێ”.

ئەڤرۆ نیوز، بارزان مزووری:

دو رزگاربوویێن دەستێ داعش سەرھاتیێن خوە یێن ل گەل تیرۆرستێن داعش د تابلۆیێن ھونەری دا و د پێشانگەھەکێ دا نمایشکرن.

د رێورەسمەکی دا ئەڤرۆ ١١/٦/٢٠١٩ و ل ژێرچاڤدێریا سەردار یەحیا عەبدولعەزیز، قایمقامێ قەزا شێخان بنگەھێ لالش/ تایێ شێخان ب ھەڤکاری دگەل کارگێریا کەمپا ئێسیان پیشانگەھەکا شێوەکاری بۆ دو کچێن رزگاربوویێن دەستێ داعش ھاتە ڤەکرن و وان ھەردو کچان سەرھاتیێن خوە یێن ل گەل تیرۆرستێن داعش د زێدەتری ٤٥ تابلۆیێن ھونەری دا نمایشکرن.

دیار بیبۆ، رێڤەبەرێ کەمپا ئێسیان یا ئاواران بۆ ئەڤرۆ نیوز گۆت: “ئەڤ پیشانگەھە بناڤێ (دونیا و دەلال) ئەو ھەردو کچێن ژ دەستێ داعش ل ١٥/١١/٢٠١٧ رزگاربووین، خێزانا وان ژ شەش و خووشک و ھەشت برایان پێک دھات، ھەتا نھا پێنج خووشک و سێ برا ژ خێزانا وان رزگاربووینە، بەلێ سێ خووشک و برایەک چارەنڤیسێ وان یێ بەرزەیە”.

ناڤھاتی خویا ژی کر، ھەر رزگاربوویەکێ دەستێ داعش سەرھاتیێن دژوار یێن ھەین، وان ھەردو کچان ژی ب وان سەرھاتیا پەرتووکەک چاپکریە یان ژی چیرۆکا خوە کریە کورتە فلمەک، دیسا وان ھەردو کچان ب رێکا فلچە و رەنگان چیرۆکێن خوە ل سەر ٤٥ تابلۆیێن مەزن نەخشاندینە و ئێش و ئازارێن وان رۆژان نیشا داینە.

رێڤەبەرێ کەمپا ئێسیان یا ئاواران ئاشکرا ژی کر، وان کچان ئەو تابلۆیە ب چەندین قووناغا دروستکرینە، قووناغا ئێکێ: ژیانا خوە یا بەری شەڕێ داعش نیشا دایە، قووناغا دویێ: ژیانا خوە یا د دەستێ داعش دا و قووناغا سیێ: ژیانا خوە یا پشتی رزگاربووین نیشا دایە و د قووناغا چارێ ژی دا قووناغا ھیڤی و باوەریێ بەرەڤ ژیانەکا گەش نیشا دایە و گۆت: “گەلەک ژ وان تابلۆیێن ھاتینە نمایشکرن ب بھایەکێ گران ھاتنە فرۆتن”.

ئەڤرۆ نیوز، بارزان مزووری:

بۆ جارا ئێکێ سەنتەرەکێ گەشەپێدانا جڤاکی د ناڤ سەنتەرێ قەزا شێخان دا ھاتە ڤەکرن و بەرپرسا سەنتەری ژی دبێژیت: ئەم دێ خزمەتێن جڤاکی بێ بەرامبەر و بێ جوداھیا ئایین و نەتەوا پێشکێشی وەلاتیان کەین.

د رێورەسمەکی دا ئەڤرۆ ١١/٦/٢٠١٩ و ب بەرھەڤبوونا قایمقامێ قەزا شێخان و نوونەرێ لقێ ٢٠ پارتی دیموکراتی کوردستان ل شێخان و رێڤەبەرێن میری یێن قەزایێ سەنتەرێ (ئێمە) یێ گەشەپێدانا جڤاکی د ناڤ سەنتەرێ قەزا شێخان دا ژ لایێ رێکخراوەکا ئەلمانی ڤە ب ھەماھەنگی دگەل ئیدارا قەزا شێخان ھاتە ڤەکرن.

ئەڤین حەمید، بەرپرسا سەنتەرێ (ئێمە) یێ گەشەپێدانا جڤاکی ل شێخان بۆ ئەڤرۆ نیوز گۆت: “ئەڤە سەنتەرێ ئێکێ یێ گەشەپێدانا جڤاکی یە ل شێخان دھێتە ڤەکرن ب ھاریکاریا رێکخراوەکا ئەلمانی و ب ھەماھەنگی دگەل ئیدارا قەزا شێخان بۆ وان ئایینێن جودا یێن ل شێخان دژین”.

ئەڤین خانێ خویا ژی کر کو ئەڤ سەنتەرە د ناڤ سەنتەرێ شێخان دا ھاتیە ڤەکرن، ل تاخەکی کو ھەموو ئایین تێدا دژین و گۆت: “ئەڤ سەنتەرە دێ خزمەتا ئافرەتێن قەزا شێخان بێ جوداھی کەت، دیسا ب سەدان خولێن جوراوجور بۆ بھێزکرنا قوتابیان و کەسێن نەخواندەوار ڤەکەین، ھەموو خۆل ژی بێ بەرامبەر بۆ وان وەلاتیان دێ ھێنە ڤەکرن، دیسا دێ مە بەرنامێن تایبەت بۆ کارمەندێن فەرمانگەھێن میری، ب تایبەت پۆلیس و ئاسایش و کارمەندێن ساخلەمیێ یێن قەزا شێخان ھەبن”.