ئه‌ڤرۆنیوز:
سه‌رۆكێ پشكا ڤه‌كۆلینێن زانستێن سروشتی ل زانكۆیا (ته‌كنیك یلدز) ل توركیا بۆ ده‌زگه‌هێن راگه‌هاندنێ یێن وه‌لاتێ خوه راگه‌هاند، مه‌ترسیا روودانا بیڤه‌له‌رزه‌كا ب هێز ب گۆره‌ی 7 پلێن ریخته‌ری یا ل سه‌ر ده‌ڤه‌را مه‌رمه‌ره هه‌ی.
هه‌رێما مه‌رمه‌ره دكه‌ڤیته باكوورێ رۆژئاڤایێ توركیا وژ چه‌ندین باژێرێن گه‌شتیاری وپیشه‌سازی پێك دهێت ئه‌وژی ستانبۆل، بورسا، ئه‌درنه، كیركلاره‌لی، ته‌كیرداغ، چانكاله، كوچا ئه‌لی، یالۆڤا، ساكاریا، بیله‌جیك وبالك ئه‌سیر وهژمارا ئاكنجیێن وان ده‌ڤه‌را نێزیكی 26 ملیۆن كه‌سن.
شوكری ئارسۆی، سه‌رۆكێ پشكا ڤه‌كۆلینێن زانستێن سروشتی ل زانكۆیا (ته‌كنیك یلدز) یا توركی، بێ كو ئاماژێ ب ده‌مێ پێشبینی كری بۆ روودانا بیڤه‌له‌رزێ بكه‌ت، پێشبینی كریه ل گه‌ل روودانا بیڤه‌له‌رزێ، تسۆنامیه‌ك ژی ل ده‌ریا مه‌رمه‌ره ل وێ هه‌رێمێ بده‌ت وئه‌گه‌رێ گیان ژده‌ستدانا 450 هزار كه‌سان وبرینداربوونا سێ جاركیا وێ هژمارێ یا هه‌ی.
دهێته زانین ل سالا 1999 بیڤه‌له‌رزه‌كا ب هێز ل وێ هه‌رێمێ دابوو وببوو ئه‌گه‌رێ گیان ژده‌ستدانا زێده‌تر ژ 50 هزار كه‌سان.
ئه‌ڤرۆنیوز:
جێگرێ سه‌رۆكێ په‌رله‌مانێ عیراقێ، به‌شیر حه‌داد، ل دۆر هنارتنا مووچێ فه‌رمانبه‌رێن هه‌رێما كوردستانێ ژلایێ به‌غدا ڤه، دداخۆیانیه‌كا رۆژنامه‌ڤانی دا كو ل سه‌ر به‌رپه‌رێ خوه ل فه‌یسبووكی به‌لاڤكری راگه‌هاند، هه‌كه حوكمه‌تا هه‌رێمێ 250 هزار به‌رمیلێن په‌ترۆلێ رۆژانه راده‌ستی به‌غدا نه‌كه‌ت، دێ حوكمه‌تا عیراقێ ژ به‌هرا هه‌رێمێ داهاتێ وان 250 هزار به‌رمیلان ژپشكا بودجا هه‌رێمێ بریت وئه‌وا دمینیت دێ بۆ مووچێ فه‌رمانبه‌ران وپێشمه‌رگه‌ی هێته هنارتن.
به‌شیر حه‌داد گۆت ژی” هه‌كه هه‌رێما كوردستانێ پێگیر بوو ب راده‌ستكرنێ، دێ پشكا هه‌رێمێ وه‌كو خوه هێته هنارتن، ئه‌و دو ئه‌گه‌رێن دقانوونا بودجه‌یا 2019 ئاماژه پێ هاتیه كرن هه‌كه هه‌رێم پێگیری راده‌ستكرنا په‌ترۆلا خوه بۆ به‌غدا بیت یان نه‌بیت، له‌وما مه‌ترسی ل سه‌ر هه‌رێما كوردستانێ نینه”.
ئاماژه كر ژی” هه‌كه هه‌رێما كوردستانێ 250 هزار به‌رمیلێن په‌ترۆلێ راده‌ست نه‌كه‌ت، به‌غدا ب گۆره‌ی قانوونا بودجێ ئه‌و ئه‌گه‌رێ دانای ووێ رێژێ دێ ژێ وه‌رگریت كو دبیته داهاتێ 250 هزار به‌رمیلان وئه‌وا دمینیت بۆ مووچێ فه‌رمانبه‌ران وپێشمه‌رگه‌ی دێ هێته هنارتن”.
ئه‌ڤرۆ نيوز:
ئه‌ڤرۆ سپێدێ ل پيرمام سه‌رۆك بارزانى ل گه‌ل شانده‌كێ بلندێ ئێكه‌تيێ ب سه‌رۆكاتيا كوسره‌ت ره‌سۆل كۆمبوو و به‌ياننامه‌ك ل دۆر ناڤه‌رۆكا كۆمبوونێ به‌لاڤكر كو ئه‌ڤا ل خوارێ ده‌قێ وێ يه:
راگه‌هاندنا كۆمبوونا سه‌رۆك بارزانى و شاندێ بلندێ ئێكه‌تى نشتيمانى كوردستان
رۆژا ئێكشه‌مبى 3ى ئادارا 2019ێ ل سه‌لاحه‌دين سه‌رۆك مه‌سعود بارزانى و به‌رێز كوسره‌ت ره‌سۆل عه‌لى جێگرێ سكرتێرێ گشتى يێ ئێكه‌تى نشتيمانى كوردستان و شاندێ ل گه‌ل دا كو پێكهاتبوون ژ ئه‌رسه‌لان پاييز و عيما ئه‌حمه‌د ئه‌ندامێن مه‌كته‌با سياسى يا ئێكه‌تى نشتيمانى كوردستان كۆمبوون.
د ديدارێ دا پرۆسا سياسى يا هه‌رێما كوردستانێ و ئاسته‌نگێن به‌ر سينگێ پرۆسا سياسى گه‌نگه‌شه كر و ته‌كست ل سه‌ر وێ چه‌ندێ كر كو كارێ رژد بهێته كرن و به‌رده‌وامى ب رێكه‌فتنا هه‌ردولا بده‌ن بۆ دامه‌زراندن و موكمكرنا داموده‌زگه‌هێن هه‌رێما كوردستانێ و ل به‌رچاڤگرتنا به‌رژه‌وه‌نديێن گه‌لێ كوردستانێ و گيانێ براتيێ و ب به‌رپرساتيا هه‌موولايه‌كى، ب ره‌نگه‌كى كو د ئاستێ داخوازيێن خواستێن وه‌لاتيێن هه‌رێما كوردستانێ دا بيت.
ئه‌ڤرۆ نيوز:
سه‌فين دزه‌ى ئاخفتنكه‌رێ ب ناڤێ حوكمه‌تا هه‌رێما كوردستانێ بۆ مالپه‌رێ فه‌رميێ حوكمه‌تا هه‌رێما كوردستانێ بهێنڤه‌دانێن فه‌رمى ب گۆره‌ى قانوونا په‌رله‌مانێ كوردستانێ ده‌رباره‌ى بهێنڤه‌دانێن فه‌رمى ئاشكه‌را كرن كو ئه‌ڤه ژى ده‌قێ وێ يه:
بۆ وه‌لاتيێن خۆشتڤى يێن هه‌رێما كوردستانێ ئاشكه‌را دكه‌ين كو ب گۆره‌ى قانوونا په‌رله‌مانێ كوردستانێ ده‌رباره‌ى بهێنڤه‌دانێن فه‌رمى، بهێنڤه‌دانێن هه‌يڤا ئادارێ دێ ب ڤى ره‌نگى بن:
رۆژا سێشه‌مبى 5ى ئادارا 2019ێ، رۆژا ده‌سپێكرنا سه‌رهلدانا گه‌لێ كوردستانێ ل دژى رژێما دكتاتۆرى يا سه‌دام حسێن ل رانيه و ده‌رگه‌هێن سه‌رهلدانێ.
رۆژا سێشه‌مبى 11ى ئادارا 2019ێ سالرۆژا ئيمزاكرنا رێكه‌فتناما 11ى ئادارا 1970ێ و سالرۆژا رزگاركرنا باژێرێ هه‌ولێر ل سه‌رهلدانا سالا 1991ێ.
رۆژا پێنجشه‌مبى 14ى ئادارا 2019ێ رۆژا ژ دايكبوونا بارزانيێ نه‌مر.
بهێنڤه‌دانا نه‌ورۆزێ ژى بۆ ئه‌ڤ ساله ل رۆژا چارشه‌مبى 20ى ئادارا 2019ێ ده‌ست پێ دكه‌ت و هه‌تا رۆژا شه‌مبى 24ى ئادارا 2019ێ دێ يا به‌رده‌وام بيت ئانكو رۆژێن 20، 21، 22 و 23ى ئادارێ دێ بۆ بهێنڤه‌دانێن فه‌رمى بن و رۆژا ئێكشه‌مبى 24ى ئادارا 2019ێ دێ ده‌واما فه‌رمى ل داموده‌زگه‌هێن حكۆمى يێن هه‌رێما كوردستانێ ده‌ست پێ كه‌ت.
سەفین محسین دزەیی
ئاخفتنكه‌رێ ب ناڤێ حكومەتا هەرێما كوردستانێ
2019/3/3
ئه‌ڤرۆ نيوز:
هه‌ر چه‌نده بڕيار بوو ئه‌ڤرۆ رۆژا ئێكشه‌مبى 4ى ئادارا 2019ێ شاندێ دانوستاندكارێ پارتى و ئێكه‌تى ل هه‌ولێر كۆمببان، به‌لێ بۆ سوبه‌هى هاته پاشخستن و نها شانده‌كێ ئێكه‌تيێ ب سه‌رۆكاتيا كوسره‌ت ره‌سۆل ل گه‌ل سه‌رۆك بارزانى د كۆمبوونێ دانه.
ب گۆره‌ى ژێده‌رێن ل به‌ر ده‌ست ئه‌ڤ كۆمبوونه ب مه‌ره‌ما دانوستاندنێ يه ل سه‌ر پێكئينانا كابينا نوو يا حوكمه‌تا هه‌رێما كوردستانێ و پشكدايكرنه‌كرنا ئێكه‌تيێ د ناڤا ڤان كۆمبوونان دا.
پارتى و ئێكه‌تى ل سه‌ر چه‌ند پرسان د نه‌رێكن و ل 5ى شوباتا 2019ێ دووماهى كۆمبوونا فه‌رمى ئه‌نجام دايه، راوه‌ستيانا كۆمبوونان ژى كارتێكرن ل سه‌ر داكه‌فتنا پێكئينانا حوكمه‌تا هه‌رێما كوردستانێ هه‌بوويه.
ئه‌ڤرۆ نيوز، نيوار محه‌مه‌د سه‌ليم:
سه‌رۆكاتيا په‌رله‌مانێ كوردستانێ و سه‌رۆكێ فراكسيۆنان دێ پێكئينانا لژنێن هه‌رده‌مى گه‌نگه‌شه كه‌ن و ب گۆره‌ى به‌ركه‌فتێ هه‌لبژارتنان، سه‌رۆكاتيا حه‌فت لژنان ب به‌ر پارتى دكه‌ڤيت.
ب گۆره‌ى ئه‌و پێزانينێن ل به‌ر ده‌ست ئه‌ڤرۆ ده‌سته‌يا سه‌رۆكاتيا په‌رله‌مانێ كوردستانێ و سه‌رۆكێن فراكسيۆنان بۆ پێكئينانا لژنێن هه‌رده‌مى يێن ناڤ په‌رله‌مانێ كوردستانێ و دياركرنا ئه‌ندامێن لژنان كۆم بن كو ژمارا وان 15 لژنه‌نه.
ئه‌ڤه پشتى وێ چه‌ندێ دهێت كو ل رۆژا سێشه‌مبيا بۆرى په‌رله‌مانێ كوردستانێ بێ پشكداريا فراكسيۆنا ئێكه‌تيێ ئه‌ندامێن لژنا قانوونى يێن په‌رله‌مانى هه‌لبژارتن.
رێڤينگ هرۆرى، ئه‌ندامێ فراكسيۆنا پارتى ديموكراتى كوردستان ل په‌رله‌مانێ كوردستانێ د داخۆيانيه‌كێ دا بۆ ئه‌ڤرۆ نيوز دا گۆت: “بۆ هه‌لبژارتنا په‌رله‌مانتاران بۆ لژنان، فورمه‌ك دايه په‌رله‌مانتاران و ل دووڤ حه‌ز و تايبه‌تمه‌ندى و پێدڤيا فراكسيۆنان، په‌رله‌مانتاران دو لژنه هه‌لبژارتينه كو ببنه ئه‌ندام تێدا”.
زێده‌تر گۆت: “په‌رله‌مانتاران لژنێن خوه ده‌ست نيشان كرينه و دبيت ئه‌ڤرۆ د كۆمبوونا سه‌رۆك فراكسيۆنان دا ل گه‌ل ده‌سته‌يا سه‌رۆكاتيا په‌رله‌مانى ئه‌ڤ ناڤه بۆ سه‌رۆكاتيا په‌رله‌مانى بهێنه راده‌ستكرن”.
رێڤينگ هرۆرى نه‌ڤه‌شارت ژى كو ب گۆره‌ى به‌ركه‌فتێ هه‌لبژارتنان سه‌رۆكاتيا حه‌فت لژنێن هه‌رده‌مى ب به‌ر پارتى دكه‌ڤيت و گۆت: “دڤێت ئه‌و حه‌فت لژنێن پارتى سه‌رۆكاتيا وان دكه‌ت ئه‌و نه‌بن يێن وێ وه‌زاره‌تێ وه‌ردگريت، بۆ نمۆنه هه‌كه وه‌زاره‌تا پێشمه‌رگه وه‌رنه‌گريت، دێ سه‌رۆكاتيا وێ لژنێ وه‌رگريت و يێن دژى هه‌روه‌سان”.
ئه‌ندامێ فراكسيۆنا پارتى ديموكراتى كوردستان ل په‌رله‌مانێ كوردستانێ ئاماژه ب وێ چه‌ندێ ژى كر كو دهێته پێشبينيكرن كو د ڤێ حه‌فتيێ دا په‌رله‌مانێ كوردستانێ ل دۆر باوه‌رى دان ب لژنێن هه‌رده‌مى يێن په‌رله‌مانێ كوردستانێ كۆم ببيت و گۆت: “دهێته پێشبينيكرن هه‌ر 14 لژنێن مايين ب ئێك پاكێچ بكه‌ڤنه به‌ر ده‌نگدانێ ژ به‌ر كو به‌رى وى ده‌مى رێكه‌فتن ل سه‌ر هاتيه كرن”.
لژنێن هه‌رده‌مى يێن په‌رله‌مانێ كوردستانێ 15 لژنه‌نه و ئێك لژنه هاتيه هه‌لبژارتن كو لژنا قانوونى يه، ئه‌ندامێن هه‌ر لژنه‌كێ نابيت ژ 11 كه‌سان زێده‌تر بن و ژ پێنج كه‌سان كێمتر بن.
بڕياره د ڤێ حه‌فتيێ په‌رله‌مان باوه‌ريێ ب لژنان بده‌ت و فراكسيۆن ژى ل سه‌ر سه‌رۆك و جێگر و بڕياده‌رێن لژنان بگه‌هنه رێكه‌فتنێ و ده‌ستكه‌فتێ هه‌لبژارتنان ئێك ژ پيڤه‌رايه.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ جوداهيا رێژا باران بارينێ ئاشكه‌را كر و دا زانين كو زێده‌ترين رێژا جوداهيا باران بارينێ ل پارێزگه‌ها دهۆك هاتيه تۆماركرن.
ب گۆره‌ى ئاماره‌كێ كو پشكا ئامارێ ل رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ به‌لاڤكريه ئاماژه ب وێ چه‌ندێ كريه كو ل پارێزگه‌ها دهۆكێ ل ئه‌ڤ ساله هه‌تا نها 721.3ملم بارانێ باريبوون و ل سالا بۆرى هه‌تا ڤى ده‌مى 259.5ملم بارانێ باريبوون ئانكو جوداهيا باران بارينێ دبيته 461.8ملم بارانێ.
هه‌ر ل دۆر وێ راپۆرتێ پارێزگه‌ها هه‌له‌بچه ل رێزا دويێ دهێت كو جوداهيا باران بارينێ 365.5ملم بارانێ بوويه، هه‌ولێر ژى ل رێزا سيێ دهێت ب جوداهيا 270.9ملم و سلێمانى ل رێزا چارێ هاتيه ب تۆماركرنا جوداهيا 217.2ملم بارانێ و ل رێزا دووماهيێ ژى ل كه‌ركووك كو جوداهيا 82.2ملم هاتيه تۆماركرن.
ئومێد مايى، رێڤه‌به‌رێ كه‌شناسێ ل پارێزگه‌ها دهۆكێ د داخويانيه‌كێ دا بۆ ئه‌ڤرۆ نيوز گۆت: “وه‌رزێ باران بارينێ ل هه‌رێما كوردستانێ و پارێزگه‌ها دهۆكێ بۆ ماوه‌كێ درێژ ڤه‌دكێشيت”.
زێده‌تر گۆت: “سالانه ل پارێزگه‌ها دهۆكێ هه‌يڤێن ئادار و نيسان و گۆلان بارينه و هنده‌ك جاران ل پارێزگه‌ها دهۆكێ هه‌يڤا تيرمه‌هێ ژى بارانێن باش هاتينه وه‌كو به‌رى دو سالان، به‌لێ چو تشته‌كێ دياركرى نينه كا ئه‌ڤ ساله هه‌تا چو ده‌م باران بارين دێ يا به‌رده‌وام بيت”.
ئه‌ڤرۆ نيوز:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو سوبەھی رۆژا دوشه‌مبى رێکەفتی 4ى ئادارا 2019ێ ئەسمان دێ باران بارين بيت و ل ده‌ڤه‌رێن چيايى رێژا ڤێ باران بارينێ دێ زێده‌تر بيت و ل پتريا ده‌ڤه‌رێن چيايى يێن سنورى به‌فر دێ باريت و كارتێكرنا ڤێ به‌فر و بارانێ دێ ل دانێ ئێڤارى ب دووماهى هێت.
پشکا پێشبینیان ل رێڤەبەریا گشتیا کەشناسی و بیڤەلەرزێ ل ھەرێما کوردستانێ د نڤیسارەکێ دا کو دانەک بۆ ئەڤرۆ نیوز رەوانە کرینە راگەھاند کو دهێته پشبينيكرن ئه‌سمان باران بارين بيت و ل ده‌ڤه‌رێن چيايى رێژا ڤێ باران بارينێ دێ زێده‌تر بيت و ل پتريا ده‌ڤه‌رێن چيايى يێن سنورى به‌فر دێ باريت و كارتێكرنا ڤێ به‌فر و بارانێ دێ ل دانێ ئێڤارى ب دووماهى هێت.
پشکا پێشبینیان دایە زایە زانین کو دێ لەزاتیا بایی د ناڤبەرا 5 ھەتا 10کم دا و ماوێ دیتنێ ژی دێ د ناڤبه‌را 9 بۆ 10کم دا بیت، پلێن گەرمێ ژی دێ د ناڤبەرا 5 بۆ 11 پلان دا بن.
نيشاندان