ئه‌ڤرۆنيوز:
دچارچۆڤێ گه‌را 16 ژ خۆلا پلا ناياب يا عيراقێ، ئه‌ڤرۆ يانا هه‌ولێر شيا ل به‌غدا سه‌ركه‌فتنه‌كا گرنك ل سه‌ر يانا كه‌رخ خودانا رێزا دويێ درێزبه‌ندا خۆلێ دا ب ئه‌نجامێ 1-0 تۆمار بكه‌ت.
ب ڤى ئه‌نجامێ يانا هه‌ولێر خالين خوه گه‌هاندنه 22 خالان وپێشڤه هاته رێزا 9 درێزبه‌ندا خۆلێ دا، يانا كه‌رخ ژى ب 33 خالان ل رێزا دويێ دهێت.
ئه‌ڤرۆنیوز:
یانا مانشسته‌ر سیتی ئه‌ڤرۆ دوشه‌مبی 10/2/2019 سه‌ركه‌فتنه‌كا مه‌زن د خۆلا ئینگلیزی دا ل سه‌ر مێهڤانا خوه یانا شیلسی ب ئه‌نجامێ 6-0
تۆماركر وسه‌ركێشیا خۆلێ ژ لێڤه‌رپۆل ب شێوه‌كێ به‌روه‌خت وه‌رگرت.
هه‌ر شه‌ش گۆلێن یانا مانشسته‌ر سیتی ل خۆله‌كێن 4 و 13 و 19 و 25 و56 و 80 ژلایێ یاریكه‌ران ره‌حیم ستیرلینگ (2 گۆل) و ئه‌گوێرۆ (3 گۆل) وجوندوجان.
ب ڤی ئه‌نجامی مانشسته‌ر سیتی خالێن خوه گه‌هاندنه 65 خالان وب شێوه‌كێ به‌روه‌خت سه‌ركێشیا خۆلێ ژ لێڤه‌رپۆل وه‌رگرت كو هه‌مان خال یێن هه‌ین به‌لێ یاریه‌ك كێمتر ژ مانشسته‌ر سیتی یا هه‌ی. یانا شیلسی ژی ب 50 خالان ل رێزا شه‌شێ دهێت.
دهێته زانین یاریا قۆناغا ئێكێ ب سه‌ركه‌فتنا شیلسێ ل سه‌ر ماشسته‌ر سیتی ب ئه‌نجامێ 2-0 ب دووماهی هاتبوو.
ئه‌ڤرۆنیوز:
هادی عامری سه‌رۆكێ لیستا فه‌تح یا سه‌ر ب حه‌شدا شه‌عبی ڤه هێرشه‌كا توند دكه‌ته سه‌ر له‌شكرێ ئه‌مریكی و ب ترسنۆك ناڤ دكه‌ت ودبێژیت كو ئه‌و نه‌شێت دناڤ باژێرێن عیراقێ دا هاتنوچوونێ بكه‌ن و ب هه‌موو شێوه‌كی بزاڤێ دكه‌ن وان بنگه وباره‌گا ل عیراقێ نه‌مینن.
هادی عامری دچارچۆڤێ كۆمبوونه‌كا جه‌ماوه‌ری دا ل به‌غدا، گوتاره‌ك پێشكێشكر وگۆت” له‌شكرێ ئه‌مریكی ژ وێ چه‌ندێ ترسنوكترن ل عیراقێ هاتنوچوونێ بكه‌ن”.
گۆت ژی” ب چو شێوه‌كێ رێ ناده‌ین له‌شكرێ ئه‌مریكی هه‌بوون ل ئه‌سمان وئاڤ وئاخا عیراقێ دا هه‌بیت، ئه‌ڤ چه‌نده ژی دێ ل په‌رله‌مانی هێته ئێكلاكرن”.
ئەڤرۆ نیوز ٬ عەلی حاجی
هونەرمەندێ شانوڤانێ زاخۆ (شەعبان دوسکی) پشتی زێدەتری ۳ سالان توشی نەخوەشیەکا گران بووی ئەڤرۆ روژا ئێک شەمبێ ۱۰/۲/۲۰۱۹ ل نەخوشخانەکا باژێرێ سلێمانیێ وه‌غه‌ركر .
مەهدی مونیر، بەرپرسێ نڤسینگەها زاخۆ یا سەندیکا هونەرمەندێن کوردستانێ بۆ ئەڤرۆ نیوز گوت : هونەرمەند شەعبان دوسکی ئێک ژهونەرمەندێن باژێرێ زاخۆ بوو ٬ پشکداریەکا کارا هەبوو ل هەموو بزاڤێن شانویێ دا ل زاخۆ و پشکداری دچەندین فلمان دا کریە و رۆله‌كێ به‌رچاڤ ل هەموو بزاڤێن هونەری دا هەبوو ٬ زێدەتری سێ سالایە تووشی نەخوەشیەکا گران ببوو و ئەڤرۆ ده‌نگوباسێ وه‌غه‌ركرنا وی گەهشتەمە.
ئەڤرۆ نیوز:
حوکمەتا ھەرێما کوردستانێ ئەڤرۆ رۆژا ئێکشەمبی ١٠/٢/٢٠١٩ بەیانەک ب ئیمزایا کەریم شنگاری وەزیرێ نافخو چەند دەرکر بۆ نەھێلانا چەکێ بێ مولەت د دەستێ خەلکی دا ل سەرانسەری باژێرێن ھەرێما کوردستانێ و رێنمایێن ئەڤێن خوارێ نە.
١.رامالینا و نەھێلانا ھەموو جورێن چەک و تەقەمەنیا ژبلی دەمانجە و کلاشینکوف.
٢. دەست ب سەرداگرتنا ھەموو ئەو چەکێن بێ مولەت ئەوێ خەلکێ ھەرێمێ د ھەلگریت جێبەجێکرنا رێکارێن قانوونی بەرامبەر وان کەسان.
٣. ل سەنتەرێ ھەر پارێزگەە،قەزا و ناحیا رێڤەبەریا پولیس و ئاسایش دێ بنە بنگەھێن کومکرنا ئەو چەکێن دھێنە کومکرن یان دەستەسەرکرن و برێکا لژنەیەکا تایبەت دێ ھێنە ھنارتن بۆ وەزارەتا پێشمەرگەی.
٤. ب رێیا ھەموو دەزگایێن راگەھاندنێ ھەموو خەلکێ ھەرێما کوردستانێ بھێنە ئاگەھدارکرن کو ئەو چەکێن بێ مولەت یێن برگا ئێکێ دا ھاتین بھێنە رادەستکرن.
٥. ئەڤ رێنمایە ژ رۆژا دەرکەفتنا وێ دێ کارپێ ھێتەکرن بۆ ماوێ شەش ھەیڤان.
٦. پشتی ب دووماھی ھاتنا ماوێ د برگەیا پێنج دا ھاتیە دیارکرن ھەر چەکەکێ دەستێ کەسەکی دا بھێتە گرتن دێ ل دووڤ یاسایێ ھێتە رەوانەکرن بۆ دادگەھێ.
٧. ئەڤ رێنمایە دێ ل رۆژنامەیا وەقائع کوردستان دا ھێنە بەلاڤ کرن.
ئه‌ڤرۆ نيوز:
حوكمه‌تا توركيا راگه‌هاند كو ژمارا قوربانيێن ئاڤاهيێ هه‌شت قاتى يێ ل سته‌مبۆل كه‌فتى، د زێده‌بوونێ دايه و د دووماهى ئامار دا، ڤه‌ديتنا 21 حاله‌تێن گيان ژ ده‌ستدانێ و 14 بريندار راگه‌هانديه.
سلێمان سۆيلۆ، وه‌زيرێ ناڤخۆ يێ توركيا راگه‌هاند كو ئه‌و پێشبينى دكه‌ن 35 كه‌س د بن وان داروبه‌رێن وى ئاڤاهى دا هه‌بن و هه‌تا نها ژى تۆمێن هاوارهاتنێ به‌رده‌وام يێ ل وان دگه‌ريێن.
موراد كورۆم وه‌زيرێ ژينگه‌ها توركيا ژى ئاشكه‌را كر كو ب مه‌ره‌ما سلامه‌تيێ، ب ده‌هان ئاڤاهيێن ده‌روبه‌رێن ئاڤاهيێ ژناڤچوويى هاتيه چولكرن.
رۆژا چارشه‌مبى ل ده‌ڤه‌رێ كرتل يا پشكا ئاسيا يا سته‌مبۆلێ، ئاڤاهيه‌كێ هه‌شت قاتى كه‌فته خوار كو ژ 14 يه‌كه‌يێن نه‌جهكرنێ پێكهاتبوو. لايه‌نێن په‌يوه‌نديدار ژى ئاشكه‌را كربوو كو ئه‌و سێ قاتێن ڤێ دووماهيێ ب ره‌نگه‌كێ نه‌يێ قانوونى ئاڤاكربوون.
ئه‌ڤرۆ نيوز:
ئه‌ميندارێ گشتى يێ ژوورا بازرگانيا هه‌ڤپشكا ئيران و عيراقێ راگه‌هاند ل سالا 2018ێ قه‌بارێ هنارتنا كه‌لوپه‌لێن ئيرانێ بۆ عيراقێ ژ قه‌بارێ هنارتنا كه‌لوپه‌لێن توركيا بۆ عيراقێ زێده‌تر لێ هاتيه.
حه‌ميد حسێن ئه‌ميندارێ گشتى يێ ژوورا بازرگانيا هه‌ڤپشكا ئيران و عيراقێ بۆ ميديايێن ئيرانێ راگه‌هاند كو د سالا 2018ێ دا، قه‌بارێ هنارتنا كه‌لوپه‌لێن ئيرانێ بۆ عيراقێ هه‌شت مليار و 750 مليۆن دۆلار بوويه.
ئاماژه ب وێ چه‌ندێ ژى كر كو هنارتنا كه‌لوپه‌لێن ئيرانێ بۆ عيراقێ د هه‌يڤه‌كێ دا، نێزيكى 750 مليۆن دۆلارن.
ئه‌ميندارێ گشتى يێ ژوورا بازرگانيا هه‌ڤپشكا ئيرانى و عيراقى دا زانين ژى كو بازرگانیا د ناڤبەرا ئیران و عيراقێ ب رێژا ٣٠% زێدە بوویە.
ئەڤرۆ نیوز، نەوزاد ھلۆری:
ب مەرەما راکێشان و ئینانا گەشتیاران بو ھەرێما کوردستانێ، ئەڤرۆ ل ھەولێر 40 کومپانیێن عیراقی کومبوون و لسەر چەوانیا میکانیزما ھەماھەنگی و ئینانا گەشتیاران بو ناڤا ھەرێما کوردستانێ و دەڤەرێن بەفرین.
نادر روستایی، پەیڤدارێ دەستەیا گەشتوگۆزار یا ھەرێما کوردستانێ بۆ ئەڤرۆ نیوز گۆت: (ب مەرەما زێدەتر بەر ب پێشڤەبرنا کەرتێ گەشتوگۆزار ل ھەموو وەرزێن سالێ ئەڤرۆ 40 کومپانیێن گەشتیاریێن عیراقی ل ھەولێر کومبوون و تێدا بەحسا چەوانیا ھەماھەنگی و میکانیزما ئینان و خزمەتکرنا وان ھاتەکرن).
زێدەتر گۆت: (ھاتنا وان گەشتیاران دێ زێدەتر بو دەڤەرێن بەفرین بیت ب تایبەتی بو دەڤەرا سوران و چومان چونکی ھژمارەکا زور یا بەفرێ ل وی َدەڤەرێ ھەیە، ھەڤدەم جھێن تایبەت ژی بو یاریێن سکێ بەفرێ ھەنە ب تایبەتی بو چیایێ کورەک، دیسان ئەڤرۆ دێ ل چیایێ کورەک یاریا خلیشانا بەفرێ ژی ھێتەکرن کو ژلایێ رێڤەبەریا گەشتوگۆزارا سوران و سپونسەریا چیایێ کورەک ھاتیە ئەنجامدان).
ئه‌ڤرۆنيوز:
ميليشيێن حه‌شدا شه‌عبى ل باژێرێ مووسلێ هێرشێ دكه‌نه سه‌ر دادوه‌ره‌كێ كورد ل وى باژێرى، په‌رله‌مانێ عيراقێ ژى لژنه‌كێ بۆ ڤه‌كۆلينێ ل دۆر وێ روودانێ پێك دئينيت، ئه‌و دادوه‌ره ژى رادگه‌هينيت كو دێ سكالايا قانوونى ل سه‌ر چه‌كدارێن هێرش كريه سه‌ر وى تۆمار كه‌ت.
شيروان دوبه‌ردانى، ئه‌ندامێ په‌رله‌مانێ عيراقێ ژ فراكسيۆنا پارتى ديموكراتى كوردستان كو نوونه‌رێ پارێزگه‌ها نه‌ينه‌وا دپه‌رله‌مانێ عيراقێ دا دبه‌ياننامه‌كێ دا به‌لاڤكر” هێرشكرن ل سه‌ر وى دادوه‌رى ريسوا دكه‌ين، هيڤيدارين روودانێن ب وى شێوه‌ى دوباره نه‌بن، چونكه ئه‌و دهێته هژمارتن ده‌ست درێژى ل سه‌ر ده‌ستهه‌لاتا دادوه‌رى”.
پێشتر ميليشيێن ليوايا 40 يا سه‌ر ب حه‌شدا شه‌عبى ڤه هێرش كربوو سه‌ر دادوه‌ر سه‌مير به‌روارى، دادوه‌رێ دادگه‌ها مووسلێ ل لايێ راستێ يێ وى باژێرى وداواكارێ گشتى ل باژێركێ ته‌ل عه‌بته.
ده‌به‌ردانى دووپاتكر كو لژنا ڤه‌كۆلينێ يا په‌رله‌مانێ عيراقێ، دێ ڤه‌كۆلينێ ل دۆر وێ روودانێ كه‌ت وراپۆرتا خوه بلند كه‌ت.
ژلايێ خوه‌ڤه دادوه‌ر سه‌مير به‌روارى راگه‌هاند كو ئه‌و دێ سكالايا قانوونى دێ ل سه‌ر وان چه‌كدارێن ميليشيا حه‌شدا شه‌عبى تۆماركه‌ت بۆ وێ چه‌ندێ سزايێ خوه وه‌رگرن وهێرشێن ب وى شێوه‌ى ئێدى دووباره نه‌بن.
ئه‌ڤرۆنيوز:
ژێده‌ره‌كى ئه‌منى ل پارێزگه‌ها ئه‌نبار ئه‌ڤرۆ شه‌مبيێ 9/2/2019 ئاشكراكر كو كاروانه‌كێ هێزێن له‌شكرێ ئه‌مريكى چوويه دناڤ پارێزگه‌ها ئه‌نبار دا.
وى ژێده‌رى بۆ مالپه‌رێ (بغداد اليوم) گۆت” سپێده‌يا ئه‌ڤرۆ شه‌مبيێ كاروانه‌كێ له‌شكرێ ئه‌مريكى هاته ديتن كو چه‌ند جۆرێن ترومبێلێن له‌شكرى ژ جۆرێ هه‌مه‌ر وتوپێن هه‌لگرتى چوويه ده‌ڤه‌را رۆژئاڤايێ پارێزگه‌ها ئه‌نبار”.
رۆهنكر ژى” پشكه‌كا وى كاروانێ له‌شكرێ ئه‌مريكى ل سه‌ربازگه‌ها وه‌ليد هاته جهگيركرن وپشكه‌كا دى ژى هاته هنارتن بۆ بنگه‌هێ (عين الاسد) كو هێزێن ئه‌مريكى تێدا دجهگيرن”.
نيشاندان