ئهڤرۆ نيوز:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو سوبەھی رۆژا دوشهمبى رێکەفتی 29ی چريا ئێكێ 2018ێ ئهسمان دێ ساهى بيت.
پشکا پێشبینیان ل رێڤەبەریا گشتیا کەشناسی و بیڤەلەرزێ ل ھەرێما کوردستانێ د نڤیسارەکێ دا کو دانەک بۆ ئەڤرۆ نیوز رەوانە کرینە راگەھاند کو دھێتە پێشبینیکرن ساهى بيت.
پشکا پێشبینیان دایە زایە زانین کو دێ ئلهزاتيا بايى د ناڤبەرا 5 ھەتا 10کم دا و ماوێ دیتنێ ژی دێ د ناڤبهرا 9 بۆ 10 دا بیت، پلێن گەرمێ ژی دێ د ناڤبەرا 10 بۆ 24 پلان دا بن.
ئهڤرۆ نيوز:
شڤێدى رۆژا شهمبى بيڤهلهرزهكێ ب پلهيا 3.4 پله ل سنورێ باژێرێ كهركووك دا.
رێڤهبهريا گشتى يا سهقاناسى و بيڤهلهرزێ ل ههرێما كوردستانێ راگههاند كو شڤێدى ل دهمژمێر 11:24 دهقيقه بيڤهلهرزهكێ ب 3.4 پله ب گۆرهيى پێڤهرێ ريختهر ب كووراتيا 13كم و دووراتيا 27كم ل باژێرێ كهركووك و 32كم ل قهزا چهمچهمال دا.
ئەڤرۆ نيوز:
ب بڕیارا پارێزگارێ سەپاندی یێ کەرکووکێ چەندین قوتابخانێن کوردی کرینە ئێک و سەرۆکێ لیستا برایەتی ل جڤاتا پارێزگەھا کەرکووکێ دیار کر کو خواندنا کوردی ل کەرکووکێ د مەترسیێ دایە.
محەمەد کەما، سەرۆکێ لیستا برایەتی ل جڤاتا پارێزگەھا کەرکووکێ بۆ رۆژناما ئەڤرۆ دیار کر کو خواندنا کوردی ل کەرکووکێ د مەترسیێ دایە و ب بڕیارا پارێزگارێ سەپاندی یێ کەرکووکێ چەندین قوتابخانێن کوردی ھاتینە داخستن، ژ بەر کو ھژمارەکا مەزن یا وەلاتیێن کورد پشتی روودانێن 16ی ئۆکتوبەرێ ئاوارەبووینە و نوکە ئەو قوتابی ل قوتابخانێن ھەرێما کوردستانێ د خوینن و گۆت: “پشتی پرۆسا ئازادکرنا عیراقێ حوکمەتا ھەرێما کوردستانێ چەندین قوتابخانێن خواندنا کوردی ل کەرکووکێ ڤەکربوون بۆ وێ چەندێ زارۆ ب زمانێ دایکێ بخووینن”.
ئەڤرۆ نيوز:
ب رازیبوونا نێچیرڤان بارزانی سەرۆک وەزیرێن ھەرێما کوردستانێ، وەزارەتا دارایی و ئابووری یا حوکمەتا ھەرێما کوردستانێ بڕیار دا 100 ملیۆن دۆلار ژ داھاتێ پەترۆلێ ل رۆژێن داھاتی ل سەر بەلێندەرێن ل ھەرێمێ کارکرین بھێنە بەلاڤکرن و سەرۆکێ ئێکەتیا بەلێندەرێن کوردستانێ تایێ دھۆکێ ژی دیار کر کو حوکمەتا ھەرێما کوردستانێ ھەموو دەمان غەدرێ ل بەلێندەرێن پارێزگەھا دھۆکێ دکەت.
زیرەک تاھر دۆسکی، سەرۆکێ ئێکەتیا بەلێندەران کوردستانێ تایێ دھۆکێ بۆ رۆژناما ئەڤرۆ دیار کر کو نوکە حوکمەت ب 350 ملیار دیناران قەردارا بەلێندەرێن پارێزگەھا دھۆکێ یە، لێ پشتی وەزارەتا دارایی و ئابووری یا حوکمەتا ھەرێما کوردستانێ بڕیار دای 100 ملیۆن دۆلاران ژ داھاتێ پەترۆلێ ل سەر بەلێندەرێن ل ھەرێمێ کارکرین بەلاڤ کەت ئەو دبینن کو دێ غەدر ل بەلێندەرێن پارێزگەھا دھۆکێ ھێتەکرن، چونکی ل رۆژا 10ى چريا ئێكێ 2018ێ ئەو چووبوونە کۆمبوونەکێ ل وەزارەتا پلاندانانێ یا حوکمەتا ھەرێما کوردستانێ و د وێ کۆمبوونێ دا بۆ وان دیارکربوو کو ئەڤ پارە دێ ب رێژا 23% ل سەر بەلێندەرێن پارێزگەھا دھۆکێ و 34% ل سەر بەلێندەرێن پارێزگەھا ھەولێرێ و 43% ل سەر بەلێندەرێن پارێزگەھا سلێمانیێ ھێتە بەلاڤکرن.
ناڤھاتی ئاماژە دا وێ چەندێ کو داخوازا وان ئەوە کو ئەڤ پارە ل دووڤ رێژا ئەنجامدانا پرۆژان و قەرێن بەلێندەران بھێتە بەلاڤکرن، نە ل دووڤ رێژا ئاکنجیبوونێ و گۆت: “حوکمەت ھەموو دەمان غەدرێ ل بەلێندەرێن پارێزگەھا دھۆکێ دکەت و مە نەرازیبوونا خوە ل سەر ڤێ چەندێ دیار کریە”.
ژ ئالیێ خوە ڤە رێباز حەملان، وەزیرێ دارایی و ئابووری یێ حوکمەتا ھەرێما کوردستانآ د بەیاننامەکێ دا دیار کر کو وەزارەتا دارایی و ئابووری ب ھەماھەنگی ل گەل وەزارەتا پلاندانێ یێن حوکمەتا ھەرێما کوردستانێ و ئێکەتیا بەلێندەرێن کوردستانێ دێ ڤی پارەی بەلاڤ کەن و گۆت: “سۆپاسیا خوەراگری و ھەلویستێ بەلێندەران دکەم کو بەردەوام کار دکرن و مل ب ملێ مووچەخوارن خوە دابوو بەر ھەموو بارگرانی و قەیرانان، لێ وەلاتیێن ھەرێما کوردستانێ پشتراست دکەم کو ئێدی رۆژێن دژوار بەر ب دووماھیێ دچن”.
ئەڤرۆ نيوز:
رێڤەبەرێ شوونوارێن قەزا زاخۆ بۆ رۆژناما ئەڤرۆ دیار کر کو پشتی بۆ دەمێ سێ سالان کار د نووژەنکرنا پرا دەلال دا ھاتیەکرن، نوکە پرا ناڤھاتی ژ نووژەنکرنێ ب دووماھی ھاتیە و ب تنێ ھندەک حەلان مایە کو ل رەخێن پرێ بدەین.
محەمەد ئەحمەد، رێڤەبەرێ شوونوارێن قەزا زاخۆ ئاشکرا کر کو پشتی مەترسیا ھەرفینی ل سەر پرا دەلال ل زاخۆ پەیدابووی د سێ سالێن بۆری دا دەست ب نووژەنکرنا وێ ھاتەکرن و نوکە ئەڤ پرە ژ نووژەنکرنێ ب دووماھی ھاتیە و گۆت: “580 ملیۆن دینار بۆ نووژەنکرنا پرا دەلال ھاتبوونە تەرخانکرن”.
ناڤھاتی ئاماژە دا وێ چەندێ کو نوکە چو مەترسی ل سەر پرا دەلال نەماینە و ھەکە چو روودانێن سرۆشتی پەیدا نەبن ئەڤ پرە دێ زێدەتری 50 سالێن دی ژی خوە گریت کو نەھێتە نووژەنکرن و گۆت: “ھەتا نوکە پرا دەلال چار جاران ھاتیە نووژەنکرن کو نووژەنکرنا وێ یا ئێکێ بۆ سالا 1940ێ ڤەدگەڕیت، ھەروەسا ل سالێن 1970 و 1971ێ ژی ئەڤ پرە ژ ئالیێ حوکمەتا عیراقێ یا وی سەردەمی ڤە ھاتبوو نووژەنکرن”.
ل دوماھیێ رێڤەبەرێ شوونوارێن قەزا زاخۆ خویا کر کو ئەو بەرێن د نووژەنکرنا پرا دەلال دا ھاتینە بکارئینان ھەمان جۆرێ وان بەرانە یێن کو جارا ئێکێ پر پێ ھاتیە دروستکرن”.
ئهڤرۆ نيوز:
رێڤەبەرێ پەیوەندی و راگەھاندنێ ل سەرۆکاتیا باژێرڤانیا دھۆکێ دیار کر کو ب مەرەما پاراستنا وان خانیێن ل نێزیکی رووبارێ ھشکەڕو ھاتینە ئاڤاکرن ژ مەترسیا لەھیان، ئەڤ سالە دیوارێن پالپشت بۆ رووبارێ ھشکەڕۆ دھێنە دروستکرن، داکو دەمێ ئاڤا رووباری گەلەک بلند دبیت نەچیتە د ناڤ خانیێن وەلاتیان دا.
ئيسماعیل مستەفا، رێڤەبەرێ پەیوەندی و راگەھاندنێ ل سەرۆکاتیا باژێرڤانیا دھۆکێ دیار کر کو ب کۆژمێ 253 ملیۆن دیناران دەست ب چێکرنا دێوارین پالپشت ل سەر رووبارێ ھشکەڕۆ ھاتیە کرن د ناڤ سەنتەرێ پارێزگەھا دھۆکێ دا و گۆت: “ھژمارەکا خانیان ب شێوێ زێدەگاڤی ل سەر رووبارێ ھشکەڕۆ ھاتینە ئاڤاکرن، لەو دەمێ باران گەلەک دباریت و لەھی رادبن، مەترسیا چوونا ئاڤێ بۆ ناڤ خانیێن وەلاتیان ل سەر رووباری دروست دبیت و ژیانا وان دکەڤیتە د مەترسیێ دا، نوکە ژی ب درێژاھیا 400 مەتران و ب بلنداھیا چار مەتران دیوارەکێ پالپشت ھاتیە دروستکرن و دێوارەکێ دی ژی ب بلنداھیا چار مەتران و درێژاھیا 85 مەتران نوکە یێ دھێتە دروستکرن، داکو دەمی ئاڤا رووباری بلند دبیت نەگەھیتە ناڤ مالێن وەلاتیان و ژیانا خەلکی یا پاراستی بیت ژ لەھیان”.
زێدەتر گۆت: “دەمێ باران دبارن و لەھی دروست دبن ل سەر رووبارێ ھشکەڕۆ مەترسی ل سەر ژیانا خەلکی دروست دبن، نوکە ژی ئەم دخوازی دکەین وەلاتیێن مالێن وان ل سەر رووبارێ ھشکەڕۆ دھشیاربن، دەمی کەشناسی مەترسیا باران بارینێ رادگەھینیت، ئەو خەلک پتر یێ ھشیاربیت بۆ بەرھەنگاریا ھەر روودانەکا نەچاڤەڕێکری ل سەر رووبارێ ھشکەڕۆ”.
ئيسماعیل مستەفا ئاشکرا ژی کر، رووبارێ ھشکەڕۆ ب درێژاھیا 12 کیلۆمەتران د ناڤ سەنتەرێ پارێزگەھا دھۆکێ دا دبۆریت، وەلاتیان گەلەک خانی ل نێزیک رووبارێ ھشکەڕۆ ئاڤاکرینە و دەمێ باران گەلەک دھێت و لەھی دروست دبن مەترسی ل سەر وان خانیان دروست دبیت.
ئهڤرۆ نيوز:
بڕیارە ئەڤرۆ جڤاتا پارێزگەھا ھەولێرێ ل دۆر روودانا سووتنا بازاڕێ لەنگە یێ باژێڕێ ھەولێرێ کۆمببیت و ئەندامەکێ جڤاتێ ژی ئاماژە کر، دێ ب ھویری چاڤدێریا پڕۆسا ڤەکۆلینێ بکەین، ژ بەرکو روودان ب قەبارەکێ مەزن بووینە و ب سەدان وەلاتی زەرەرمەندبووینە.
یاسین سەلیم، ئەندامێ جڤاتا پارێزگەھا ھەولێرێ بۆ رۆژناما ئەڤرۆ دیار کر، بڕیارە ئەڤرۆ رۆژا ئێک شەمبی جڤاتا پارێزگەھا ھەولێرێ ل دۆر روودانا سووتنا بازاڕێ لەنگە یێ باژێڕێ ھەولێرێ کۆمببیت و تێدا ب ھووری بەحسێ ئەگەرێن سۆتن و قەرەبوویا وەلاتیان بھێتەکرن، بەلێ چو بەرپرسەکێ پەیوەندیدار ناھێتە گازیکرن بۆ کۆمبوونا جڤاتێ، ھەتا کۆمبوون بڕیارێ ددەت دێ نڤیسار ئاراستەی لایەنێن پەیوەندیدار بھێنەکرن ل دۆر ڤەکۆلینێ ل سەر سۆتنا نێزیکی ھزار دوکانێن بازاڕێ لەنگە.
یاسین سەلیم گۆت: “دێ جڤاتا پارێزگەھا ھەولێرێ چاڤدێریا پڕۆسا ڤەکۆلینێ ل دۆر سۆتنا بازاڕێ لەنگەی بکەت و بڕیارە حوکمەتا ھەرێما کوردستانێ ھاریکاربیت بۆ سەخبێرکرنا بازاڕی و قەرەبوویا وەلاتیان، ھەروەسا دێ کۆمبوون بەحسێ زیانێن لەھیا ناحیا سمیلان بکەت کو مخابن ب ئەگەرێ بارانێن رۆژێن بۆری زیانێن زۆر ب وەلاتیان کەتینە”.
ئەڤرۆ نيوز:
ژێدەرەکێ بەرپرس ل ناڤەندا ھەماھەنگیا ھەڤپشک بۆ رزگارکرنائێزدیان خویا کر، ب دەھان کچێن رەڤاندی یێن ئێزدی ھێشتا ل نک خێزانێن باژێڕێ مووسلێ ماینە، ئەو خیچزان ژی رەت دکەن رادەستی خێزانێن وان بکەن و گەفان ژی لێ دکەن، ھەکە ڤەگەڕنە ناڤ کەسوکارێن خوە دێ ھێنە کوشتن.
وی ژێدەری ئاماژە ب وێ چەندێ ژی کریە کو پێزانین گەھشتینە وان کو ب دەھان کچێن ئێزدی ژ لایێ ھندەک خێزانێن موسلمانێن مووسلێ ب زووری ل کوڕێن خوە مارەکرینە، ھێشتا ل مووسلێ ماینە.
ژێدەری بۆ سایتێ مەعلۆمە راگەھاند، ئەو خێزانێن مووسل گەفان ل وان کچێن ئێزدی دکەن و ب وێ چەندێ دترسینن کو کەسوکارێن وان ل دووڤ وان دگەڕن و ب مەرەما پاقژکرنا نامووسێ وان بکوژن، ئەڤێ چەندێ ژی ترس ل نک وان کچان دروستکریە و ژ ترسێن کوشتنێ، نەوێرن ب رەڤن و بھێنە نک کەسوکارێن خوە.
وی ژێدەرێ بەرپرس ل ناڤەندا ھەماھەنگیا ھەڤپشک بۆ رزگارکرنا ئێزدیان داخواز ژ ھێزێن ئەمنی کریە کو ھەوەکا لێگەڕیان و پشکنینێ بۆ ناڤ مالێن خێزانێن مووسلیان ئەنجام بدەن و ل ناسنامێن وان کچان پشتڕاست ببن بۆ ھندێ رزگار بکەن.
ئەڤرۆ نيوز:
پشتی ل چەند رۆژێن بۆری رێژەکا باش یا بارانێ ل ھەریچما کوردستانێ باری و ژ ئەگەرێ وێ ل ھندەک دەڤەران لەھی دروست بووین و زیان گەھشتیە وەلاتیان و جھێن گشتی ل سنوورێ قەزایێن ئامێدیێ، چۆمان و سۆران، بڕیارە وەلاتیێن زیان گەھشتیێ بھێنە قەرەبووکرن و بزاڤ ژی دھێنە کرن کو حوکمەتا عیراقێ وان زیانڤێکەفتیان قەرەبوو بکەت، جێگرێ سەرۆکێ پەرلەمانێ عیراقێ ژی دبێژیت: حوکمەتا عیراقێ دێ پارەی بۆ قەرەبووکرنا زیانڤێکەفتیان مەزێخیت و لیژنەیەک بۆ ڤەکۆلینێ ل دۆر قەبارێ ئەڤان زیانان دێ ھێتە پێکئینان.
دکتۆر بەشیر حەداد، جێگرێ سەرۆکێ پەرلەمانێ عیراقێ دوھی 27-10-2018 د کۆنگرەکێ رۆژنامەڤانی دا گۆت: “دێ سەرەدانا ھەموو دەڤەران کەین؛ یێن ژ ئەگەرێ لەھی و بارانێن چەند رۆژێن بۆری ل ھەرێما کوردستانێ زیان ڤێکەفتی و بڕیارە لیژنەیەکا ڤەکۆلینێ ل دۆر زیانێن لەھیێ بھێتە پێکئینان، ژ بەرکو ژ ئەگەرێ باران و لەھیێ زیانێن زۆر گەھاندە وەلاتیێن ھەرێما کوردستانێ، ب تایبەتی ل دەڤەرێن چیایی رێیا چەندین گوندان ھاتیە گرتن و زیان ب مال و مۆلکێ وەلاتیێن ھەرێما کوردستانێ گەھشتیە”.
گۆتژی: “ئەنجامیچن وێ لیژنا ڤەکۆلینێ بۆ حوکمەتا عیراقێ دێ ھێنە بلندکرن، پێدڤیە حوکمەتا عیراقێ زیانڤێکەفتیێن لەھیان قەرەبوو بکەت، ژ بەرکو حوکمەتا عیراقێ بودجەکا تایبەت بۆ قەرەبووکرنا روودانێن سروشتی یا ھەی”.
دکتۆر بەشیر حەداد ئاماژە ب وێ چەندێ ژی کر، پشتی لیژنە کارێ خوە تەمام دکەت بۆ ڤەکۆلینێ ل دۆر زیانێن باران و لەھیێ ل سەر ئەرکێ حوکمەتا عیراقێ کەسێن زیانڤێکەتی دێ ھێنە قەرەبووکرن، ب تایبەتی داخوازێ ژ وەزارەتا دارایی و ئابووریا ھەرێما کوردستانێ و عیراقێ دکەین کوژمەکێ پارەی بۆ رووودانێن مینا پەیدابوونا لەھیان ب مەزێخن، ھەتا قەرەبوویا وەلاتیان بھێتەکرن یێن زیان ڤێکەفتی و گۆت: “ژ ئەنجامێ لەھیێن کوردستانێ ب تایبەتی ل قەزایێن چۆمان و سۆران پر ھەڕفینە و جاددە خراپ بوینە و زیان گەھشتینە وەلاتیان و جھێن گشتی و خزمەتگوزاریێن مینا کارەب و ئاڤ و قوتابخانە و باچخە خراب بووینە، نوکە ئەم یێ بزاڤێ دکەین ل سەر ئەوێ بودجا بۆ روودانان ل عیراقێ ھاتیە تەرخانکرن قەرەبوویا زیانڤێکەفتیێن لەھیان بکەین”.
ژ لایەکێ دیڤە شوکری حەجی، خودانێ کارگەھەکا حەسو و خیزی یە ل دێرەلوکێ بو ئەڤرۆ گۆت: “پشتی کو باران باری و لەھی ل سنوورێ ناحیا دێرەلوکێ دروست بووی و ئاستێ ئاڤا رووبارێ زێی بلند بووی، پشکەک ژ ئامیرێن کارگەھا من یا حەسو و خیزی بن ئاڤێ کەڤتینە، مینا: حەفارە و شوفەر و مالیدا کارەبای و چەند ئامیرەکێن دی، رەنگە ئەو ئامیرە ل گەل رووباری بچن”.
دیسا ھەر ژ ئەگەرێ بارینا بارانێن زۆر و رابوونا رووبارێ زێ و دروستبوونا لەھیان ل سنوورێ ناحیا دێرەلۆکێ زیان گەھشتینە پرۆژێ ھایدروپاوەرێ دێرەلۆکێ و کارکرن د پرۆژەی دا نوکە ھاتیە راوەستاندن.
سائیر ئامێدی، ئەندازیارێ سەرپەرشتێ پرۆژەی بۆ رۆژناما ئەڤرۆ دیار کر کو بارینا بارانێن زۆر بوویە ئەگەرێ بلندبوونا ئاستێ رووبارێ زێ زیان گەھشتینە پرۆژێ ھایدروپاوەری و گۆت: “لەھیێ جادەکا ھاتنوچوونا ئامیرێن کاری یێن پرۆژەی خراب کریە، دیسا ئاڤ چوویە جھێ سەبکرنێ یا کاری کو دێ بیتە ئەگەرێ گیروبوونا کاری و ئامیرەکێ کونکرنا کەڤران ژی مابوو د بن ئاڤێ ڤە، لێ زیان نەگەھشتینێ و دشیان دا یە بیننە دەر دوبارە کار پێ بھێتە کرن”.
ل گورەی پێزانینێن دەستپێکی ل سنوورێ ھەردو قەزایێن سۆران و چۆمان ھژمارەکا زۆر یا زیانان رووداینە، ژ وانان: ھەڕفینا سێ پران، ژ کارکەفتنا پێنج ترۆمبێلان، ھەڕفینا حەفت خانی و 11 باخچە و چەند جھەکێن گشتی، دیسا تێکچونا کارەبا گشتی و رێیێن سەرەکی و تێکچونا پروسا خواندنێ ل چەند قوتابخانان و ئاوارەبوونا نێزیکێ 50 خێزانان.
دیسا ھەر ژ ئەنجامێ روودانێن لەھیان ل سنوورێ ناحیا سیدەکان تەرمێ کەسەکی ھاتیە دیتن، بەلێ ھەتا نوکە ناسناما وی نەھاتیە زانین.
ژ لایەکێ دیڤە محەمەد مێرگەسووری، رێڤەبەرێ چاندنا مێرگەسوور بۆ ئەڤرۆ گۆت: “پشتی ئەو پێلا بارانێ یا ب سەر ھەرێما کوردستانێ دا ھاتی، ب تایبەتی ل دەڤەرێن چیایی، د نوکە دا دەڤەرا بارزان پلێ کەفتیە و جۆتیار دشێن چاندنێ بکەن، ژ بەرکو ئەڤ سالە زێدەتری 210ملم بارانێ بارینە، پار د ڤی دەمی دا ئێک چپکا بارانێ ژی نەباری بوو، سوپاس بۆ خودێ بەرەکەتا ئەسمانی ب سەر ھەرێما کوردستانێ دا ھات و جۆتیارێن مە دشێن دەست ب چاندنێ بکەن، ب تایبەتی گەنم و جەھی و بارانا پێدڤی یا باری”.
ب گورەی پێزانینێن رێڤەبەریا گشتی یا کەشناسی و بیڤەلەرزیان یا ھەرێما کوردستانێ ل پرانیا دەڤەرێن ھەرێما کوردستانێ بارانا پێدڤی باری یە و پلێ کەفتیە و سالا بوری دڤی دەمی دا چوو باران نەھاتبوون.
نيشاندان