گۆپيتكا سێ قولى يا رۆسيا، توركيا و ئيران ئه‌ڤرۆ دێ ل ته‌هران هێته ئه‌نجام دان
ئه‌ڤرۆ نيوز:
هه‌ردو وه‌زێن ژ ده‌رڤه يێ توركيا و ئيرانێ رۆژه‌كێ به‌رى گۆپيتكا سێقولى يا توركيا، ئيران و رۆسيا كۆمبوون.
د هژمارا تايبه‌تا خوه يا تويته‌رى دا ل تۆڕا جڤاكيا تويته‌رى مه‌ولۆد چاوشئۆغلۆ وه‌زيرێ ده‌رڤه يێ توركيا راگه‌هاند كو ل گه‌ل محه‌مه‌د جه‌وام زه‌ريف هه‌ڤپيشه‌يێ خوه يێ ئيرانى ل ته‌هران به‌رى گۆپيتكێ سێ قولى يا توركيا، ئيران و رۆسيا كۆمبوو.
چاوشئۆغلۆ نڤيسيه: “پشكداريا سه‌رۆك كۆمارێ مه، ره‌جه‌ب ته‌يب ئه‌ردۆگان ل گۆتيكا سێ قولى يا ئيران، رۆسيا و توركيا ل دۆر پرسا سوريا سوبه‌هى دێ هێته ئه‌نجام دان، ل باژێرێ ته‌هران و ل گه‌ل هه‌ڤپيشه‌يێ خوه يێ ئيرانى محه‌مه‌د جه‌واد زه‌ريف كۆمبووم”.
گۆپيتكا ئێكێ يا سێقولى د ناڤبه‌را رۆسيا، توركيا و ئيرانێ دا ل 22ى چريا دويێ 2017 ل سوچى ب رێڤه چوو. گۆپيتكا دويێ ل 4ى نيسانا 2018ێ ب رێڤه چوو. گۆپيتكا سيێ ژى بڕياره ئه‌ڤرۆ ل ته‌هران ب رێڤه بچيت.
بڕيار بوو گۆپيتكا سيێ سه‌ركردێن وه‌لاتێن گره‌نتيكار ل ته‌برێز كو پارێزگه‌هه‌كا ئازه‌رى زمانێ ئيرانێ بهێته ئه‌نجان دان، به‌لێ چه‌ند رۆژان به‌رى كۆمبوونێ بڕيار هاته گوهۆڕين و كۆمبوون دێ ل ته‌هران هێته ئه‌نجام دان.
ئه‌ڤرۆنيوز:
ژێده‌ره‌كێ رۆژنامه‌ڤانى ل پارێزگه‌ها به‌سرا راگه‌هاند، ئهڤ شه‌ڤه چه‌ندين باره‌گايێن حزبى وراگه‌هاندنێ وجهێن جودا جودا هاتينه سوتن.
عه‌لى سارى بۆ ئه‌ڤرۆنيوز گۆت” باره‌گايێن حزبى يێن ڤان لايه‌نان يێن هاتينه سوتن حزبا ده‌عوه – رێكخراوا به‌در – عه‌سائب ئه‌هلولحه‌ق- جڤاتا بلند يا ئيسلامى- ئيراده ( حه‌نان فه‌تلاوى) – حزبا فه‌زيله – ئۆفيسا په‌رله‌مانتار فالح خه‌زعه‌لى”.
ئاماژه دا” باره‌گايێن بزاڤا نوجه‌با وحزبوللا ژى هاتينه سوتن”.
ناڤبرى دياركر كو كۆچكا مێهڤانداريێ يا پارێزگه‌رێ به‌سرا ئه‌سعه‌د ئه‌لعيدانى ژى هاتيه سوتن.
ل دۆر باره‌گايێن ده‌زگه‌هێن راگه‌هاندنێ ئه‌وێن هاتينه سوتن، عه‌لى سارى گۆت” باره‌گايێ ئوفيسا كه‌نالێ العراقيه يا حكومى وكه‌نالێ الغدير يا رێكخراوا به‌در وراديوا نه‌خيل يا جڤاتا بلند يا ئيسلامى يێن هاتينه سوتن”.
ئاشكراكر ژى” دو وه‌لاتيێن خوه‌نيشانده‌ر ل به‌رده‌م باره‌گايێ بزاڤا نوجه‌با هاتينه كوشتن”.
دياركر ژى” پشتى به‌رزه‌بوونا پۆليسێن هاتنوچوونێ ونه‌مانا وان ل سه‌ر جاده‌يان، نوكه وه‌لاتى ل شوينا وان هاتنوچوونا ترومبێلان ل سه‌ر جادێن گشتى رێك دئێخن”.
ئه‌ڤرۆنيوز:
ژێده‌ره‌كى ژ به‌سرا دياركر كو ئه‌ڤرۆ پێنجشه‌مبى 6/9/2018 خوه‌نيشانده‌رێن به‌سرا باره‌گايێن چه‌ندين گرۆپێن حه‌شدا شه‌عبى وحزبان سوتينه.
حه‌سه‌ن داوود، لارۆژنامه‌ڤان ژ به‌سرا بۆ ئه‌ڤرۆ نيوز گۆت” خوه‌نيشانده‌ران باره‌گايێن گرۆپێن نوجه‌با وئه‌نسارالله وحزبوللا وبوده‌لا وئه‌وفيا سوتينه”.
دياركر ژى” باره‌گايێ حزبا فه‌زيله ژى يێ هاتيه سوتن”
خوياكر ژى” به‌حس ل سوتنا باره‌گايێ رێكخراوا به‌در وجڤاتا بلن\ يا ئيسلامى ژى دهێته كرن، به‌لێ يێ پشت راست نينم ژ راستيا وى ده‌نگوباسى”.
داوود ئاماژه دا كو چه‌ندين بريندار دناڤ خوه‌نيشانده‌ران دا كه‌فتينه.
ئه‌ڤرۆنيوز:
خوه‌نيشانده‌رێن به‌سرا ئه‌ڤرۆ پێنجشه‌مبى 6/9/2018 ئاگر به‌ردا كۆچكا مێهڤانداريا يا پارێزگه‌رێ به‌سرا ئه‌سعه‌د ئه‌لعيدانى.
عه‌لى سارى، رۆژنامه‌ڤان ژ به‌سرا بۆ ئه‌ڤرۆ نيوز گۆت” ئه‌ڤرۆ خوه‌نيشانده‌رێن به‌سرا كۆچكا پارێزگه‌رێ به‌سرا ئه‌سعود ئه‌لعيدانى ل باژێرێ به‌سرا سوت پشتى هێزێن ئه‌منى يێن دناڤ وێ كۆچكێ دا خوه ڤه‌كێشاى”.
سارى زێده‌تر گۆت” به‌لێ ژێده‌رێن حكومى ل به‌سرا دبێژن كو سوتنا كۆچكا مێهڤانداريا ژ ئه‌گه‌رێ شورته‌كێ كاره‌بێ بوو”.
ئه‌ڤرۆنيوز:
كۆمسيۆنا بلند يا هه‌لبژارتنان وراپرسيێ ل هه‌رێما كوردستانێ وان جهان ديار دكه‌ت كو بانگه‌شا لايه‌نان يا هه‌لبژارتنێ تێدا قه‌ده‌غه‌يه.
كۆمسيۆنێ د رۆهنكرنه‌كێ دا كو ئه‌ڤرۆ پێنجشه‌مبى 6/9/2018 به‌لاڤكرى ئاماژێ ب وێ چه‌ندێ دكه‌ت كو ل رۆژێن بانگه‌شا هه‌لبژارتنێن په‌رله‌مانێ كوردستانێ، جهێن گشتى وناڤه‌ندێن ده‌نگدانێ وتابلۆيێن هاتنوچوونێ وكه‌لوپه‌لێن حوكمه‌تێ وجادێن ب قه‌ره‌بالغ بانگه‌شه تێدا يا قه‌ده‌غه‌يه.
دياركر ژى كو بانگه‌شا هه‌لبژارتنان ل ڤان جهان قه‌ده‌غه‌يه:
2- ناڤه‌ندێن ده‌نگدانێ.
4- کەلوپەلێن حوكمەتێ و ترومبێل و کەرەستێن حکومی.
5- تابلۆيێن هاتنوچوونێ.
6- ژروويێ ژينگه‌هێ ڤه، قه‌ده‌غه‌يه مادێن لكێنه‌ر بهێنه بكارئينان بۆ هه‌لاويستنا پۆسته‌ر وئالايێن ليست وبه‌ربژاران، هه‌روه‌سا نڤيسين ل سه‌ر ديواران.
7- جادێن ب قه‌ره‌بالغ وجادێن گشتى.
برياره هه‌لبژارتنێن په‌رله‌مانێ كوردستانێ ل 30/9/2018 بهێنه ئه‌نجامدان وبانگه‌شا هه‌لبژارتنان ل 11/9/2018 ده‌ستپێ بكه‌ت.
ئه‌ڤرۆنيوز:
ژێده‌ره‌كى ژ به‌سرا بۆ ئه‌ڤرۆنيوز دياركر كو خوه‌نيشانده‌رێن به‌سرا ئه‌ڤرۆ پێنجشه‌مبى 6/9/2018 شيان ئاڤاهيێ جڤاتا پارێزگه‌ها به‌سرا كونترۆل بكه‌ن.
حه‌سه‌ن داوود، رۆژنامه‌ڤان ژ به‌سرا بۆ ئه‌ڤرۆنيوز گۆت” ئه‌ڤرۆ پێنجشه‌مبى خوه‌نيشانده‌رێن به‌سرا شيان ئاڤاهيێ جڤاتا پارێزگه‌هێ كونترۆل بكه‌ن وبچنه دناڤدا وئالايێ عيراقێ ل سه‌ر بانێ وي بلند بكه‌ن”.
گۆت ژى” خوه‌نيشانده‌ران داخوازا سزادانا فه‌رماندێ ئۆپه‌راسيۆنێن به‌سرا كربوو ژبه‌ركو وى تۆمه‌تبار دكه‌ن ب ده‌ركرنا فه‌رمانا ته‌قه‌كرنێ ل خوه‌نيشانده‌ران ل رۆژا بۆرى كو تێدا چه‌ندين خوه‌نيشانده‌ر هاتينه كه‌شتن وبرينداركرن”.
ئه‌ڤرۆنيوز:
كۆمسيۆنا بلند يا هه‌لبژارتنان وراپرسيێ ل هه‌رێما كوردستانێ، ئه‌ڤرۆ پێنجشه‌مبى 6/9/2018 نموونه‌ك ژ فۆرما ده‌نگدانا هه‌لبژارتنێن په‌رله‌مانێ كوردستانێ به‌لاڤكر كو ئه‌و فۆرم ناڤ وهژمارا ليست وقه‌وارێن سياسى بخوه‌ڤه دگريت.
برياره هه‌لبژارتنێن په‌رله‌مانێ كوردستانێ ل 30/9/2018 بهێنه ئه‌نجامدان وتێدا زێده‌تر ژ 20 قه‌واره وهه‌ڤپه‌يمانى دێ پشكداريێ تێدا كه‌ن ونێزيكى 777 به‌ربژار هه‌ڤركيێ ل سه‌ر ب ده‌ستڤه‌ئينانا 111 كورسيێن په‌رله‌مانى دكه‌ن.
ئه‌ڤرۆنيوز:
وه‌زاره‌تا په‌روه‌ردێ ل هه‌رێما كوردستانێ ب نڤيساره‌كا فه‌رمى هوشداريێ دده‌ته هه‌موو قوتابخانه وپه‌يمانگه‌هێن نه حكومى كو پێدڤيه ل گه‌ل سالنامه وپرۆگرامێ وه‌زاره‌تا په‌روه‌ردێ ده‌وامێ بكه‌ن.
وه‌زاره‌تا په‌روه‌ردێ ب نڤيسارا خوه يا هژمار 10735 ل 29/8/2018 ب ئيمزايا (عيسام عسمه‌ت يونس) رێڤه‌به‌رێ قاتابخانه وپه‌يمانگه‌هێن نه حكومى، تێدا داخوازێ ژ رێڤه‌به‌ريێن گشتى يێن پارێزگه‌هێن هه‌رێمێ دكه‌ت سه‌باره‌ت ده‌واما فه‌رمى بۆ ئهڤ سالا خواندنێ 2018 – 2019 يا هه‌موو باخچه وقوتابخانه وپه‌يمانگه‌هێن نه حكومى كو پێدڤيه ب پرۆگرامێن وه‌زاره‌تا په‌روه‌ردێ دپێگير بن.
د وێ نڤيسارێ دا هاتيه ژى كو پێدڤيه هه‌موو پێگيريێ ب په‌يره‌و وپرۆگرام وخشته وسالناما وه‌زاره‌تێ بن، سه‌باره‌ت ده‌ستپێكا ده‌واما فه‌رمى ورۆژێن بێهنڤه‌دانێن فه‌رمى ل هه‌مان رۆژ وديرۆكا ده‌ستنيشانكرى.
دياركريه ژى كو ب چو جۆره‌كى نابيت گوهۆرين تێدا بهێته كرن ئانكو زووتر يان دره‌نگتر ده‌ست ب ده‌وامێ بكه‌ن، به‌روڤاژى ڤێ چه‌ندێ ئه‌و دێ به‌رپرسيار بن وپێرابوونێن قانوونى دگه‌لدا دێ هينه وه‌رگرتن.
ئه‌ڤرۆنيوز:
به‌رپرسێن بزاڤا گۆران دووپات دكه‌ن كو حزبا وان ل گه‌ل ئه‌نجامدانا هه‌لبژارتنێن په‌رله‌مانێ كوردستانێ نينه، ئه‌گه‌رى ژى بۆ پاقژنه‌بوونا تۆمارا ده‌نگده‌ران دزڤرينن.
ژێده‌ره‌كێ بلند ژى ل كۆمسيۆنا هه‌لبژارتنان ل هه‌رێمێ دياردكه‌ت كو تۆمارا ده‌نگده‌ران يا نوكه گه‌له‌ك ژ تۆمارا ده‌نگده‌ران يا هه‌لبژارتنێن 2009 و2013 پاقژتره.
نزار مەحمود، ئه‌ندامێ جڤاتا نيشتمانى يا بزاڤا گۆران بۆ (وشه) گۆت” دكۆمبوونا بزاڤا گۆران ل گه‌ل شاندێ بلند يێ پارتى ديموكراتى كوردستان، هاته راگه‌هاندن كو پێدڤيه هه‌لبژارتن بهێنه پاشخستن، تاكو وى ده‌مێ تۆمارا ده‌نگده‌ران دهێته پاقژكرن”.
گۆت ژى” ب تنێ ئه‌م نينين، لايه‌نێن دى ژه يێن گه‌هشتينه وێ باوه‌ريێ كو هه‌لبژارتن بهێنه پاشخستن ول ده‌مێ خوه يێ دياركرى دا نه‌هێنه ئه‌نجامدان، ئهڤ چه‌نده ژى پێدڤى ب رێككه‌فتنا مه هه‌موويانه، هه‌كه هه‌ر هه‌لبژارتن ژى بهێنه ئه‌نجامدان، جڤاتا نيشتمانى يا بزاڤا گۆران دێ كۆمبيت وبريارا خوه ده‌ت وپێشبينى دهێته كرن كو پتريا ئه‌ندامێن جڤاتێ بريارێ بۆ پشكدارى نه‌كرنا گۆران دهه‌لبژارتنان دا بده‌ن وپايكۆتا پرۆسێ بكه‌ن”.
جه‌بار جه‌لال، ئه‌ندامێ جڤاتا نيشتمانى يا گۆران بۆ وشه گۆت” جڤاتا نيشتمانى ل ده‌ستپێكا حه‌فتيا داهاتى دێ كۆمبيت وبريارێ ل سه‌ر ئه‌نجامدانا هه‌لبژارتنان ده‌ت”.
ژێده‌ره‌كێ بلند ل كۆمسيۆنا بلند يا هه‌لبژارتنان وراپرسى ل هه‌رێما كوردستانێ بۆ وشه گۆت” هێجه‌تا حزبان بۆ پاقژنه‌بوونا تۆمارا ده‌نگده‌ران، تنێ ره‌ڤينى ژ به‌رپرسياره‌تيێ وخوه دوورخستنه ل هۆكارێن راسته‌قينه كو وان نه‌ڤێت هه‌لبژارتن بهێنه ئه‌نجامدان، ئه‌گه‌ر نه، تۆمارا ده‌نگده‌ران يا نوكه گه‌له‌ك پاقژتره وپتريا ناڤێن مريان ژێ هاتينه ده‌رئينان، هه‌كه بهێته به‌راوردكرن ب تۆمارێن ده‌نگده‌ران يێن هه‌لبژارتنێن 2009 و2013، تۆمارا ده‌نگده‌ران يا نوكه بێ سنور پاقژتر وباشتره”.
پێشتر په‌يڤدارێ فه‌رمى يێ بزاڤا گۆران، شوره‌ش حاجى راگه‌هاندبوو” نوكه ره‌وش يا گونجاى نينه بۆ ئه‌نجامدانا هه‌لبژارتنان، خه‌لكى كێشێن دارايى يێن هه‌ين وره‌وش يا گرانه”.
نيشاندان