جڤاتا وەزیرێن هەرێما كوردستانێ دەستكاریكرنا رێژەیا ئاكنجیێن هەرێما كوردستانێ ل سەرژمێرییا ئاكنجیێن ئیراقێ ژ ئالیێ وەزارەتا پلاندانانا فیدرالی ڤە رەت دكەت و پێنگاڤێن پێدڤی ژی دێ هاڤێتن.
ل رۆژا چارشەمبی 11/2/2026، ب سەرپەرشتییا مەسرور بارزانی، سەرۆكێ حوكمەتا هەرێمێ، جڤاتا وەزیرێن هەرێما كوردستانێ كۆمبوو.
ل بڕگەیا ئێكێ یا كۆمبوونێ، دارا رەشید، وەزیرێ پلاندانانێ، راپۆرتەكا تیر و تەسەلی ب داتا و هەژمارێن هوور ل سەر سەرژمێرییا ئاكنجیێن ئیراقێ بەرچاڤكر كو ل مەها 11 سالا 2024 هاتبوو ئەنجامدان و ب گۆرەی راگەهاندنا فەرمی یا ئەنجامێ سەرژمێریێ، رێژەیا ئاكنجیێن هەرێما كوردستانێ( ژ بلی دەڤەرێن كوردستانی یێن دەرڤەی ئیدارەیا هەرێمێ) ب 14،1% هاتە دەستنیشانكرن.
ئەڤ سەرژمێرییە ژی، پێشوەخت د چارچۆڤەیێ رێككەفتنا د ناڤبەرا هەردو ئالییان هاتە ئەنجامدان كو ب چەند بڕیارەكێن جڤاتا وەزیرێن فیدرال هاتە پەسەندكرن و حوكمەتا فیدرال پێگیر دكەت ب جهئینانا رێككەفتنێ و بڕیارێن جڤاتا وەزیرێن فیدرال ب خوە، كو مخابن وەزارەتا پلاندانانا فیدرال، ژ دەرڤەی وان بڕیاران و بەرۆڤاژی رێككەفتنا هەڤپشك یا هەردو حوكمەتێن هەرێمێ و فیدرال، رەفتار كریە ل گەل ئەنجامێن فەرمی یێن سەرژمێریێ، كو ئەڤێ چەندێ ژی دێ كاریگەرییا ئەرێنی ل سەر مافێن شایستەیێن هەرێما كوردستانێ هەبیت و پێدڤی ب پێرابوونێن ب لەز هەیە بۆ راستڤەكرنێ.
پشتی گەنگەشێ و لێكگۆهارتنا بۆچۆنان و بەرچاڤكرنا چەند سەرنج و تێبینییان ل سەر بابەتێ سەرژمێریێ و ئەنجامێن وێ، جڤاتا وەزیران، سەرەرای دەستخوەشیێ ل وەزیرێ پلاندانانێ بۆ بەرهەڤكرنا راپۆرتێ، دەستكاریكرنا رێژەیا ئامنجیێن هەرێما كوردستانێ ژ ئالیێ وەزارەتا پلاندانانا فیدرال ڤە رەت دكەت و پێنگاڤێن پێدڤی ژی دێ وەرگریت بۆ راستڤەكرنا شاشی و دەستكارییان و داخوازێ ژی ژ حوكمەتا فیدرال دكەت پێگیر بیت ب رێككەفتنێن هەڤپشك و ئەنجامێ فەرمیێ راگەهاندیێ سەرژمێریێ كو رێژەیا هەرێما كوردستانێ 14،1% یە.
د هەمان وەختدا، جڤاتا وەزیرێن هەرێمێ داخواز ژ سەرۆكایەتییا كۆمارێ و فراكسیۆنێن كوردستانی ل جڤاتا نوونەرێن ئیراقێ دكەت، وەك ئەركەكێ دەستووری و قانوونی و نیشتمانیێ خوە، بەرگریێ ژ مافێن خەلكێ كوردستانێ بكەن و رێكێ نەدەن دەستكارییا ئەنجامێن ڤێ سەرژمێریێ بهێتە كرن ونابیت قبوول بكەن رێژەیا ئاكنجیێن هەرێما كوردستانێ ژ رێژەیا فەرمییا راگەهاندی بهێتە كێمكرن.
جڤاتا وەزیرێن هەرێما كوردستانێ، هەروەسا داخواز ژ حوكمەتا فیدرال كر پێگیر بیت ب ئەنجامێ سەرژمێریێ و رێژەیا ئاكنجیێن هەرێما كوردستانێ كو 14،1% و ئەو رێژەیە ببیتە بنەما بۆ دەستنیشانكرنا بەهرا بودجەیا هەرێما كوردستانێ و شایستەیێن دەستووری.
پاشی ل بڕگەیا دوویێ یا كارنامەیا كۆمبوونێ، گەنگەشە ل دۆر بابەتێ پەسەندكرنا كۆنووسێ تێكگەهشتنیا هەڤپشك د ناڤبەرا وەزارەتا كاروبارێن شەهید و ئەنفالكرییان و دەزگەهێ زیندانیێن سیاسی یێن ئیراقی هاتە كرن كو تایبەت بوو ب ئێكگرتنا ئیمتیازات و شایستەیێن دارایی یێن زیندانی و گرتیێن سیاسی ل هەرێما كوردستانێ ل گەل وەكهەڤكرنا وان ل دەڤەرێن دی یێن ئیراقێ، پشتبەستن ب مادەیا 132 یا دەستووری و قانوونا هەژمار 10 یا سالا 2025 یا راستڤەكری یا قانوونا زیندانیێن سیاسی یێن ئیراقی، ل دۆر ڤێ چەندێ عەبدوللا حاجی مەحموود، وەزیرێ كاروبارێن شەهید و ئەنفالكرییان، پۆختەك بۆ جڤاتا وەزیران بەرچاڤكر و پاشی ئارمانج رەحیم، سكرتێرێ جڤاتا وەزیران هووركاریێن دەستووری و قانوونی وئالیێ داراییێ بابەت بەرچاڤكر.
جڤاتا وەزیران پشتەڤانییا خوە بۆ هەر پێنگاڤەكێ دیاركر ب ئاراستەیا زێدەرت خزمەتكرنا زیندانی و راگرتیێن سیاسی ل هەرێما كوردستانێ و مفابوونا وان ژ هەمان شایستەیێن دارایی و ئیمتیازاتێن هەڤشێوەیێن وان ل دەڤەرێن دی یێن ئیراقێ، د هەمان وەختدا دووپاتی هاتە كرن ل بەرچاڤوەرگرتنا تایبەتمەندیێن دەستووری یێن هەرێما كوردستانێ و داڕێشتنا میكانیزمێن پێدڤی بۆ گرەنتیكرنا خەرجكرنا وان شایستەیێن دارایی بۆ زیندانی و گرتیێن سیاسی كو ب گۆرەی مادەیا 132 ژ دەستووری، ئەرك و بەرپرسیارییا دەستوورییا حوكمەتا فیدرالە ب ئێك چاڤ بنێڕیتە هەموو زیندانیێن سیاسی ل سەرانسەری ئیراقێ ب هەرێما كوردستانێ ژی ڤە، بۆ ڤێ مەبەستێ، وەزارەتا كاروبارێن شەهید و ئەنفالكرییان هاتە راسپاردن كو درێژیێ ب دانوستاندنان و كۆمبوونان ل گەل دەزگەهێ زیندانیێن سیاسی ل ئیراقێ بدەت بۆ دەستنیشانكرنا میكانیزم و چارچۆڤەیێ رۆهن و دیار بۆ بجهئینانا ڤی بابەتی ب بەرچاڤوەرگرتنا وان سەرنج و تێبینیێن ل كۆمبوونێ هاتینە بەرچاڤكرن.

ل رۆژا چارشەمبی 11/2/2026، مەسرور بارزانی، سەرۆكێ حوكمەتا هەرێما كوردستانێ پێشوازی ل حەسەن محەمەد ئەلزەمان، بالیۆزێ كوەیتێ ل ئیراقێ كر.
حوكمەتا هەرێما كوردستانێ د بەیانانامەیەكێدا بەلاڤكر» د دیدارەكێدا كو عوسمان ئەلداوود، قونسلێ گشتیێ كوەیتێ ل هەرێما كوردستانێ بەرهەڤبووی، بالیۆزێ كوەیتێ ل ئیراقێ سلاڤ و رێزێن میر و جهنشینێ كوەیتێ گەهاندنە سەرۆكێ حوكمەتا هەرێما كوردستانێ و دووپاتی ل گرنگییا ب هێزكرنا هەڤبەندیێن دووقۆلی د وارێن جۆراوجۆردا كر».
حوكمەتا هەرێمێ د بەیاننامەیا خوە دا دیاركر ژی» سەرۆكێ حوكمەتا هەرێما كوردستانێ ئاماژە ب پێدڤییا پێشئێخستنا هەڤبەندیێن هەرێما كوردستانێ و دەولەتا كوەیتێ كر و خواستا حوكمەتا هەرێما كوردستانێ بۆ زێدەتر پێشڤەبرنا هەڤبەندییان د ناڤبەرا هەردو ئالییاندا دوپاتكر».
رەوشا گشتییا ئیراقێ و بزاڤ و دانوستاندنێن هەلبژارتنا سەرۆككۆمارێ نوو یێ ئیراقێ و پێكئینانا كابینەیا نوو یا حوكمەتا، پشكەكا دی یا دانوستاندنان بوو.

شیرەتكارێ سەرۆكێ هەرێما كوردستانێ بۆ كاروبارێن سەربازی، راگەهاند، هەبوونا داعشێ ل دەڤەرێ و ب تایبەتی ل ئیراقێ و سووریێ رێخوەشكەرە بۆ دووبارە پەیدابوونا وێ رێكخستییا تیرۆرستی.
بابەكر زێباری، شیرەتكارێ سەرۆكێ هەرێما كوردستانێ بۆ كاروبارێن سەربازی گوت» ئەو داعشێن ژ ئەگەرێ شەڕێ د ناڤبەرا هێزێن سووریا دیموكرات (هەسەدە) و لەشكرێ سووری ژ زیندانان رەڤین مەترسینە ل سەر دەڤەرێ و ئەگەرێ پەیدابوونا داعشێ ل ئیراقێ و سووریێ پەیداكریە».
گوت ژی» ناكۆكی د ناڤبەرا ئیراقێ و سووریێ دا ل خالێن سنووری رێخوەشكەرە بۆ وێ چەندێ ئەو داعشێن ژ زیندانان رەڤین بهێنە د ناڤ ئاخا ئیراقێدا، هەڤدەم ئەو داعشە ل دەلیڤەیەكێ د گەریێن بۆ وێ چەندێ دووبارە دەست ب چالاكیێن خوە یێن تیرۆرستی ل ئیراقێ و سووریێ بكەن».
بابەكر زێباری رۆهنكر ژی» مەترسییا دوبارە پەیدابوونا داعشێ ل سەر هەرێما كوردستانێ نینە، چونكە حوكمەتا هەرێما كوردستانێ گەلەك ب باشی سنوورێن خوە كۆنترۆلكرینە و داعش نەشێت ژ سنوورێن كوردستانێ دەرباز بیت و مەترسیێ دروست بكەت».
ل دۆر رەوشا سووریێ، شیرەتكارێ سەرۆكێ هەرێما كوردستانێ بۆ كاروبارێن سەربازی، ئاماژەكر» ئەو رەوشا نوكە ل سووریێ یا رێكخستی نینە، حوكمەتا سووریێ شیانێن كۆنترۆلكرنا گرۆپێن چەكدار نینە، هەتاكو سۆز و رێككەفتنان ژی بجهنائینن، ئەو ژ بن دەستهەلاتا حوكمەتا سووریێ دەرچووینە و ئەحمەد شەرع كۆنترۆلا هێزا خوە ژ دەستدایە، بەلێ نەشێن بچن ناڤ ئاخا كوردان ل رۆژئاڤایێ كوردستانێ».

بارەگەهێ بارزانی د بەیاننامەیەكێدا بەلاڤكر» پەیوەندییەكا تەلەفۆنی د ناڤبەرا سەرۆك مەسعود بارزانی و تۆم باڕاك هنارتیێ تایبەتێ سەرۆكێ ئەمریكا بۆ كاروبارێن سووریێ و بالیۆزێ ئەمریكا ل توركیا هاتە ئەنجامدان و تێدا بیر و بۆچۆن ل دۆر رەوشا سیاسییا دەڤەرێ ب گشتی و دووماهی پێشهات و گوهۆڕینێن سووریێ هاتنە لێكگۆهارتن».
بارەگەهێ بارزانی دیاركر ژی» هەردو ئالی هەڤڕابوون ل پێدڤییا بەردەوامییا هاڤێتنا هەر پێنگاڤەكێ بۆ وێ چەندێ رێك ل ئالۆزی و شەڕی بهێتە گرتن و ئاشتی و ئارامی ل دەڤەرێ جهگیر ببیت».
هەر د وێ پەیوەندییا تەلەفۆنیدا هەردو ئالییان دەستخوەشی ل هەڤدوو كر بۆ وی رۆلێ كاریگەر كو ل بەرقەراربوونا ئاشتیێ و ئارامیێ ل دەڤەرێ گێراین.
هەروەسا سەرۆك بارزانی سەرەرای دەربڕینا سوپاسیێ بۆ رۆلێ ئەمریكا، دوپاتی ل بەردەوامییا هەڤپەیمانیێ د ناڤبەرا گەلێ كوردستانێ و ئەمریكا دا كر.

نێچیرڤان بارزانی، سەرۆكێ هەرێما كوردستانێ، ل گەل گویندەلن گرین، قونسلا گشتییا ئەمریكا ل هەرێما كوردستانێ پێنگاڤێن پێكئینانا كابینەیا نوو یا حوكمەتا هەرێما كوردستانێ و پێشهاتێن هەلبژارتنا سەرۆككۆمار و حوكمەتا نوو یا ئیراقێ گەنگەشەكر.
سەرۆكایەتییا هەرێما كوردستانێ بەلاڤكر» ل رۆژا دوشەمبی 9/2/2026، نێچیرڤان بارزانی، سەرۆكێ هەرێما كوردستانێ ل گەل گویندەلن گرین، قونسلا گشتییا ئەمریكا ل هەرێما كوردستانێ، رەوشا سیاسییا هەرێما كوردستانێ وپێنگاڤێن پێكئینانا كابینەیا نوو یا حوكمەتا هەرێما كوردستانێ گەنگەشەكر. سەبارەت ڤێ چەندێ هەردو ئالییان دووپاتی ل گرنگییا تێكگەهشتن و هاریكاریێ د ناڤبەرا ئالیێن سیاسی كر بۆ سەرئێخستنا پرۆسەیا سیاسی».
هەر د وێ دیدارێدا، باس ل هەڤبەندیێن هەولێرێ و بەغدایێ و دووماهی پێشهاتێن پرۆسەیا سیاسی ل ئیراقێ بۆ هەلبژارتنا سەرۆككۆماری و پێكئینانا حوكمەتا نوو یا فیدرالی، هاتە كرن و هەردو ئالی هەڤڕابوون ل سەر گرنگییا سەرئێخستنا پرۆسەیا سیاسی و پاراستنا ئارامییا سیاسی ل وەلاتی.
د پشكەكا دی یا دیدارێدا سەرۆكێ هەرێما كوردستانێ و قونسلا گشتییا ئەمریكا دانوستاندن ل دۆر رەوشا سووریێ و دووماهی پێشهاتێن دەڤەرێ ب گشتی كر.

سەرۆكێ حوكمەتا هەرێما كوردستانێ پیرۆزباهی ل دیلان یەشیلگۆز كر ب هەلكەفتا وەرگرتنا پۆستێ جێگرا سەرۆك وەزیران و وەزیرا بەرگرییا هۆلەندا.
مەسرور بارزانی، سەرۆكێ حوكمەتا هەرێما كوردستانێ د پەیامەكێدا ل تۆرا جڤاكییا ئێكس راگەهاند» ب گەرمی پیرۆزباهیێ ل دیلان یەشیلگۆز دكەم ب هەلكەفتا وەرگرتنا پۆستێ جێگرا سەرۆك وەزیران و وەزیرا بەرگرییا هۆلەندا».
مەسرور بارزانی د پەیاما خوەدا گوت ژی» هەڤبەندیێن مە ل گەل هۆلەندا بلند د هەلسەنگینین و دخوازین هەماهەنگییا د ناڤبەرا مە دا بەردەوام بیت».
ل رۆژا 6 ڤێ مەهێ، دیلان یەشیلگۆز، سیاسەتمەدارا كورد، وەك جێگرا سەرۆك وەزیران و وەزیرا بەرگرییا هۆلەندا هاتە دیاركرن.
دیلان یەشیلگۆز ل سالا 1977 ل ئەنقەرەیا پایتەختێ توركیا ژ خێزانەكا كورد ژ دایكبوویە و د ژیێ زارۆكینیێدا ل گەل خێزانا خوە وەك پەناهەند چوویە هۆلەندا پشتی تمامكرنا خواندنا بلند ل زانكۆیسا ئەمستردام چەندین پلە وەرگرتینە وەك ئەنداما جڤاتا باژێرڤانیێ و پەرلەمانتار و پاشی بوویە بوویە وەزیرا وزەیێ و وەزیرا داد، تاكو ل دووماهیێ بوویە ئێكەمین ئافرەت سەرۆكایەتییا پارتا خوە ( پارتا گەل ژبۆ ئازادیێ و دیموكراسیێ) بكەت.

فەرمانگەها میدیا و پێزانینان ل حوكمەتا هەرێما كوردستانێ ئاشكراكر كو ل 20 سالێن بۆری ئیراقێ ب چەندین بەربەستێن دارایی بەهرا هەرێما كوردستانێ كێمكریە و داتایێن دارایی یێن بودجەیا گشتییا ئیراقێ د 20 سالێن بۆریدا ژ 2005 هەتاكو 2025، هەبوونا شاشییەكا مەزن و سیستەماتیك د سەلمینن، كو ئارمانج ژێ كێمكرنا شایستەیێن دارایی یێن هەرێما كوردستانێیە.
فەرمانگەها میدیا و پێزانینان ل حوكمەتا هەرێما كوردستانێ ل رۆژا دوشەمبی 9/2/2026 بەلاڤكر» حوكمەتا ئیراقا فیدرال ب رێكا بەرفرەهكرنا بێ پێشینەیا (خەرجیێن سیادی) و بجهئینانا میكانیزما (خەرجیێن فعلی)، شایستەیێن دەستووری یێن هەرێما كوردستانێ ژ مافەكێ جهگیر بۆ تنێ هەمژارەك ل سەر كاغەزێ گوهۆرییە».
فەرمانگەها میدیا وپێزانینان دیاركر ژی» خەرجیێن سیادی كو ل سالا 2005 تنێ د چارچۆڤەیێ (سەرۆكایەتییان، وەزارەتێن دەرڤە و بەرگریێ) كورت دبوو، ل بودجەیا سالێن (2023- 2024-2025) دا هاتنە زێدەكرن و گەهشتنە نێزیكی 47،4 ترلیۆن دینار سالانە و ئەڤ مەزنبوونە ب رێكا تێهەلككێشكرنا چەندین بڕگەیێن قەبە وەك (تێچوویێ بەرهەمئینانا پەترۆلێ، بودجەیا حەشدا شەعبی و قەران بوو ل بن ناڤێ (سیادی) تنێ بۆ وێ چەندێ پێشوەخت و بەری گەهشتنا پارەی بۆ هەرێما كوردستانێ، ژ بەهرا وێ بهێتە كێمكرن «.
دیاركر ژی» ژ ئەگەرێ ڤێ سیاسەتێ، هەرێما كوردستانێ سالانە ب گۆژمەیێ 8،7 ترلیۆن دینار ژ بەهرا خوە، پشكدارە د دابینكرنا وان خەرجییاندا».
سەبارەت دۆسێییا قەرێن نێڤدەولەتی و ناڤخوەیی، فەرمانگەها میدیا و پێزانینان ل حوكمەتا هەرێما كوردستانێ دیاركر» ستەمەكا داراییا ئاشكرا بەرامبەر هەرێما كوردستانێ دهێتە كرن. د وەختەكیدا هەرێما كوردستانێ هاتیە پێگیركرن ب دانا 1،6 ترلیۆن دیناران سالانە وەك بەهرا وێ ژ دانا قەرێن سیادی یێن ئیراقێ، بەلێ د بەرامبەردا تنێ 62،4 ملیار دینار ژ وان قەران وەك بەهر دهێتە وەرگرتن. ب ڤێ چەندێ ژی هەرێما كوردستانێ ل بەرامبەر هەر ئێك دۆلاری كو وەك قەر دهێتە وەرگرتن، گۆژمەیێ 26 دۆلاران بۆ دانا وان قەران ددەت كو حوكمەتا فیدرال ژ دەڤەرێن دی یێن ئیراقێ خەرج كرینە».
فەرمانگەها میدیا و پێزانینان رۆهنكر ژی» ب چەسپاندنا میكانیزما (خەرجیێن فعلی) ل شوونا (ترخانكرنا پەسەندكری)، بودجە و مووچەیێ فەرمانبەرێن هەرێما كوردستانێ گرێدایە ب ئاستێ بجهئینانا پرۆژەیان ل پارێزگەهێن ناڤەڕاست و باشوورێ ئیراقێ, ئەڤە سزایەكێ داراییێ ب كۆمە، چونكە ب گۆرەی مادەیا (121/سێ) ژ دەستوورێ بەردەوامێ ئیراقێ، بەهرا هەرێما كوردستانێ ل سەر بنەمایێ (پێدڤی) و ( رێژەیا ئاكنجییان) بیت، نەك ل سەر بنەمایێ وێ چەندێ وەزارەتێن بەغدا چەند پارەی خەرج دكەن. ڤێ پێرابوونێ وەكریە هەر وەختەكی پرۆژەیەك ل باژێرێن دی یێن ئیراقێ ئیفلیج ببیت، بەهرا هەرێما كوردستانێ ب شێوەیەكێ ئۆتۆماتیكی كێم ببیت».

ب مەبەستا گەنگەشەكرنا دووماهی پێشهاتێن سیاسی، هێمن هەورامی، ئەندامێ مەكتەبا سیاسی یا پارتی دیموكراتی كوردستان، ل ویلایەتا ڤێرجینیا ئەمریكی ل گەل هەڤالێن لقێ 7 یێ پارتی و نوونەرێن رەڤەندا كوردستانێ كۆمبوو.
هێمن هەورامی د كۆمبوونەكێدا ب هووری رۆناهی ئێخستە سەر ستراتیژییەت و هەلوەستێن نیشتمانی یێن سەرۆك بارزانی و پارتی سەبارەت ب رەوشا سیاسییا هەرێما كوردستانێ، هۆكارێن بابەتی یێن پێكنەئینانا كابینەیا دەهێ یا حوكمەتا هەرێمێ و ئەو ئاستەنگێن روو ب روویێ قەوارەیێ هەرێما كوردستانێ بووین.
هەورامی ئاماژە ب سەركەفتنا مەزن یا پارتی دا د هەلبژارتنێن هەرێمێ و ئیراقێ، كو تێدا باوەرییا پتر ژ ملیۆنەك و 100 هزار دەنگدەران ب دەستڤەئینا، ئەڤە ژی وەك بەلگەیەك بۆ رەوایی و پێگەهێ ب هێز یێ جەماوەریێ پارتی هەژمارت.
د تەوەرەكێ دی یێ كۆمبوونێدا، شرۆڤەكرنەكا هەمەلایەنە بۆ هەڤكێشەیێن سیاسی یێن بەغدا و پێگەهێ هەرێما كوردستانێ د ناڤ گوهۆڕینێن دەڤەرێدا پێشكێشكر.
هەڤدەم دوپاتی ل هەلوەستێ نەگوهۆڕێ سەرۆك بارزانی كر د پشتەڤانیكرنا مللەتێ كورد ل رۆژئاڤایێ كوردستانێ، ل رێككەفتنێن هەولێر و هنارتنا پێشمەرگەی بۆ كۆبانی هەتا دگەهیتە بزاڤێن دیپلۆماسی یێن نوكە.
كۆمبوون ب دانوستاندنەكا ڤەكری و بەرسڤدانا سەرنج و پرسیارێن بەرهەڤبوویان سەبارەت ب پاشەڕۆژا پرۆسەیا سیاسی ب دووماهی هات.

سەرۆكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند: چەندین كۆمبوون بۆ ئێكلاكرنا هەردو پۆستێن سەرۆككۆمارێ ئیراقێ و سەرۆك وەزیرێن ئیراقێ دێ هێنە ئەنجامدان. دووپات كر ژی، بێی رێككەفتنا سیاسی، جڤاتا نوونەران ژی كۆم نابیت و دشیاندا نابیت سەرۆككۆمار بهێتە هەلبژارتن.
شاخەوان عەبدوللا، سەرۆكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ، د داخۆیانییەكا رۆژنامەڤانیدا د بەرسڤا پرسیارا (ئایا راستە ل رۆژا پێنجشەمبی 12/2/2026، جڤاتا نوونەرێن ئیراقێ بۆ هەلبژارتنا سەرۆككۆمارێ ئیراقێ دێ كۆمبیت؟) رۆهنكر
« ژ دەرڤەی جڤاتا نوونەران بڕیار ل سەر وەخت و شێوازێ روونشتنا جڤاتا نوونەران بۆ هەلبژارتنا سەرۆككۆماری و سەرۆك وەزیران دێ هێتە دان».
سەرۆكێ فراكسیۆنا پارتی رەتكر كێشەیا نوكە یا پرۆسەیا سیاسییا ئیراقێ، تنێ پۆستێ سەرۆككۆماری و ناكۆكیێن د ناڤبەرا پارتی دیموكراتی كوردستان و ئێكەتی نیشتمان كوردستان بیت و گوت» ئالیێن شیعی ژی ناكۆكی ل دۆر پۆستێ سەرۆك وەزیران هەنە».
شاخەوان عەبدوللای ئاماژی ب وێ چەندێ ژی كر» بۆ گەهشتن ب رێككەفتنێ ل سەر هەردو پۆستان، د وەختێ بۆریدا، كۆمبوونا هەڤپەیمانییا ئیدارەیا دەولەتێ هەبوو، كۆمبوونا پارتی دیموكراتی كوردستان و ئێكەتی نیشتمانی كوردستان هەبوو، كۆمبوونەكا دی ژی یا پارتی و ئێكەتیێ دێ هێتە ئەنجامدان، هەروەسا كۆمبوونا پارتی و ئێكەتیێ و ئالیێن ئیراقی ژی دێ هێتە كرن».
سەرۆكێ فراكسیۆنا پارتی ل جڤاتا نوونەرێن ئیراقێ دیاركر ژی» ئالیێن سیاسی دخوازن بەری بڕێڤەچوونا روونشتنا جڤاتا نوونەرێن ئیراقێ رێككەفتن ل سەر هەردو پۆستان بهێتە كرن، چونكە هەكە روونشتنا جڤاتا نوونەران ژی بڕێڤەچوو، بێی رێككەفتن د شیاندا نابیت سەرۆككۆمار بهێتە هەلبژارتن».
هەڤدەم شێروان دووبەردانی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند» هەیبەت حەلبووسی، سەرۆكێ جڤاتا نوونەرێن ئیراقێ زانییە ئەگەر هەیە هەتا رۆا چارشەمبی 11/2/2026، ئالیێن سیاسی ل سەر هەردو پۆستێن سەرۆككۆماری و سەرۆك وەزیران بگەهنە رێككەفتنێ، لەوما دبیت رۆژا پێنجشەمبی 12/2/2026 بۆ هەلبژارتنا سەرۆككۆماری بهێتە دیاركرن».
دووبەردانی دووپاتی ل وێ چەندێ كر» كێشە تنێ د ناڤمالا كوردیدا نینن، بەلكو د ناڤ چارچۆڤەیێ هەماهەنگیێ ئالیێن شیعی دا ژی كێشەیا جدی ل سەر بەربژاركرنا نووری مالكی بۆ پۆستێ سەرۆك وەزیران هەیە».
رۆهنكر ژی» ئەڤ ناكۆكیێن شیعەیان دێ كاریگەرییا راستەوخوە ل سەر پرۆسەیا هەلبژارتنا سەرۆككۆماری هەبیت، چونكە ب گۆرەی دەستووری، پشتی هەلبژارتنا سەرۆككۆماری، تنێ 15 رۆژ مۆلەت هەیە بۆ راسپاردنا مەزنترین فراكسیۆن بۆ پێكئینانا حوكمەتێ».

هەولێر، قائید میرۆ

ئەندامەكا جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند، هەژمارەكا چەكدارێن داعشێ بەری نوكە ل سووریێ هاتینە ڤەگوهاستن بۆ ئیراقێ و دبێژیت، ڤەگوهاستنا چەكدارێن داعشێ یێن د ناڤا زیندانێن سووریێ دا بۆ ئیراقێ دێ بارگرانییا ئەمنی ودارایی بۆ ئیراقێ پەیداكەت.
د. چیمەن بارزانی، ئەنداما جڤاتا نوونەرێن ئیراقێ ژ فراكسیۆنا پارتی دیموكراتی كوردستان بۆ رۆژنامەیا (ئەڤرۆ) گوت» ئالۆزیێن سووریێ ترس بۆ ئیراقێ پەیداكریە و كاریگەری ل سەر ئیراقێ هەبوویە، لەوڕا هەر ژ دەستپێكا ئالۆزیێن سووریێ، ئیراقێ هێزەكا لەشكرییا مەزن ل سەر سنوورێ خوە ل گەل سووریێ جهگیركریە، چونكە بەربوونا ڤان تیرۆرستان مەترسیێن ئەمنی بۆ ئیراقێ و هەرێما كوردستانێ ژی پەیداكرینە».
د. چیمەن بارزانی گوت ژی» نێزیكی 26 زیندان ل بن كۆنتڕۆلا هێزێن سووریا دیموكرات (هەسەدە) بوون، نوكە ئەو زیندان كەفتینە بن دەستێ هێزێن سەر ب حوكمەتا سووریێ، نێزیكی 130 زیندانی شیاینە ب رەڤن و خوە رزگار بكەن و د وەختیدا شیان 80 ژوان كەسێن رەڤی دەستەسەر بكەن، بەلێ زیندانا مەزن ل باژێڕێ حەسەكەیە و نێزیكی پێنج هزار زیندانی تێدانە، پترییا وان ژی مەزنە سەركردەیێن گرۆپا تیرۆرستییا داعشێ نە، هەكە شەڕەك دەڤەرێ ڤەگریت دێ مەترسیێن مەزن پەیدابن، نوكە رێككەفتن هەیە د ناڤبەرا هەسەدە و حوكمەتا سووریێ، هەكە بهێت و ئەو سەركردەیێن داعشێ ب هەر ئەگەرەكێ هەبیت دەركەڤن، بێگومان دێ بنە مەترسی ل سەر سووریێ و ئیراقێ و دەڤەرێ ب گشتی، بهزاران ئیراقی د ناڤا زیندانێن سووریێ دا هەنە پترییا وان ژی تیرۆرستێن مەترسیدارن، هندەك ژوان سەركردەنە و هندەكێن دی چەكێ كیمیاوی و درۆنان بكار دئینن، ل تەنشت وان ئیراقیان زیندانێن دیژی هەنە كو تیرۆرستێن بیانی تێدا هەنە».
ل دۆر ڤەگوهاستنا زیندانیێن داعشێ بۆ ئیراقێ، د.چیمەن بارزانی گوت» بەری نوكە هەژمارەك ژوان زیندانییان كو 150 كەس بوون رادەستی هێزێن ئەمنی یێن ئیراقی هاتینە كرن، بەلێ هەكە نێزیكی هەشت هزار زیندانی بهێنە ڤەگوهاستن بۆ ئیراقێ دێ بیتە بارگرانی ل سەر چاوانییا ئینانا وان بۆ ناڤا ئیراقێ و بابەتێ رێكخستنا زیندانییان، ب تایبەتی ڤێ هەژمارا مەزن ودبیت هندەك ژوان بۆ وەختەكێ درێژ دناڤا زیندانان بمینن، پرسیار ئەوە ئایا دێ شێت ژئالیێ ئەمنی و دارایی ئەڤی بارێ گران ب ستویێ خوەڤە بگریت؟، سەبارەت داعشێن بیانی ژی پێدڤییە دگەل وان وەلاتان دانوستاندن بهێنەكرن ژبۆی چاوانییا رادەستكرنا داعشێن هەلگرێن ناسنامەیێن وان وەلاتان، بەلێ دیار نینە وەلاتێن دی د بەرهەڤن وەلاتیێن خوە یێن داعش وەربگرن یان نە».