نڤیسینگەها سەرۆكێ حوكمەتا هەرێما كوردستانێ راگەهاند كو د چارچۆڤەیا هەماهەنگییا د ناڤبەرا مەسرور بارزانی، سەرۆكێ حوكمەتا هەرێما كوردستانێ و عەلی زەیدی، سەرۆك وەزیرێن ئیراقێ دا بۆ رووبڕووبوونا گەندەلیێ رێژەیا 358 كیلۆگرامێن زێڕێ دەستبسەرداگرتی رادەستی حوكمەتا فیدرال هاتە كرن.
نڤیسینگەها سەرۆكێ حوكمەتا هەرێما كوردستانێ بەیاننامەیەك ل دۆر هاریكاری و هەماهەنگییا د ناڤبەرا مەسرور بارزانی سەرۆكێ حوكمەتا هەرێمێ و عەلی زەیدی سەرۆك وەزیرێن ئیراقێ بەلاڤ كر و تێدا هاتییە كو د چارچۆڤەیا وێ هاریكاری و هەماهەنگییا بهێز و بەردەوام دا سەرۆكێ حوكمەتا هەرێمێ وەزارەتا ناڤخۆ و دەزگەهێن جڤاتا ئاسایشێ راسپاردن كو ل گەل ئالیێن پەیوەندیدارێن حوكمەتا فیدرال بۆ رووبڕووبوونا گەندەلیێ و لێپرسینێ ژ گەندەلكاران كار بكەن.
نڤیسینگەها سەرۆكێ حوكمەتا هەرێما كوردستانێ ئاماژە ب وێ چەندێ دا كو د دەمێ بۆری دا ژی د ئەنجامێ وێ هەماهەنگییا د ناڤبەرا هەردو ئالییان دا د چارچۆڤەیا هەوا رووبڕووبوونا گەندەلیێ و پاراستنا سامانێ گشتی دا شیان پێرابوونێن پێدڤی بەرامبەر گەندەلكاران وەربگرن و دەستەسەر بكەن و رێژەیەكا مەزن یا پارە و زێڕ و مولك و سامانان بزڤڕینن بۆ گەنجینەیا گشتی و هەروەسا دووپاتی ل سەر وێ چەندێ كر كو د ڤی چارچۆڤەی دا و د دوماهییا كارێ خۆ دا ئالیێن پەیوەندیدارێن حوكمەتا هەرێمێ رێژەیا 358 كیلۆگرامێن زێڕێ دەستبسەرداگرتی رادەستی دەستەیا دەسپاكییا ئیراقا فیدرال كر.
نڤیسینگەها سەرۆكێ حوكمەتا هەرێمێ راگەهاند كو حوكمەتا هەرێما كوردستانێ دێ بەردەوام بیت ل سەر هاریكاری و هەماهەنگیێ ل گەل حوكمەتا فیدرال بۆ رووبڕووبوونا گەندەلكاران و سنۆر دانان بۆ ب هەدەردانا سامانێ گشتی و پێشئێخستنا دەسپاكیێ و سەروەرییا یاسایێ.

ئەندامەكێ مەكتەبا سیاسی یا پارتی دیموكراتی كوردستان دیار دكەت كو پشتی دەربازبوونا 20 مەهان ل سەر هەلبژارتنان چو ئەگەرێن سیاسی بۆ راگرتنا پەرلەمانی نەماینە لەوما بەرهەڤن پەرلەمانێ كوردستانێ ب زووترین دەم كارا ببیت و پێنگاڤێن یاسایی و دەستووری دەست پێ بكەن.
هێمن هەورامی، ئەندامێ مەكتەبا سیاسی یا پارتی دیموكراتی كوردستان د چارچۆڤەیا پێشوازیێ ل جانێت ئەلبێردا، بالیۆزا هۆلەندا ل ئیراقێ و بێرتێل سنوێر، جێگرێ قونسلێ گشتیێ هۆلەندا ل هەرێما كوردستانێ دا هەلوەستێ رۆهن و ئاشكرایێ پارتی دیموكراتی كوردستان ل سەر رەوشا سیاسی و پرۆسەیا پەرلەمانی بەرچاڤكر.
هێمن هەورامی رۆهن كر كو پشتی 20 مەهان ل سەر ئەنجامدانا هەلبژارتنێن پەرلەمانێ كوردستانێ و ئەنجامدانا دەهان كۆمبوونان ل گەل ئێكەتی نیشتمانی كوردستان و ئالیێن دی هەروەسا ئیمزاكرنا رێككەفتنا سیاسی ل سەر بنەمایێ چەسپاندنا هەڤپشكییا راستەقینە و لهەڤهاتنێ نوكە چو ئەگەرێن سیاسی بۆ راگرتنا پرۆسەیا سیاسی نەماینە.
وی ئەندامێ مەكتەبا سیاسی یا پارتی دووپاتی ل وێ چەندێ كر كو بەرهەڤن ب زووترین دەم پەرلەمانێ كوردستانێ كارا ببیت و داخاز ژی كر روونشتنێن پەرلەمانی دەست پێ بكەن هەروەسا پەیامەك ئاراستەی هەموو وان ئالییان كر كو خودانێن كورسیێن پەرلەمانی نە داكو بچنە بن بارێ بەرپرسیارییا سیاسی و یاسایی و نیشتمانی و د ناڤ پەرلەمانی دا دانوستاندن بۆ پێنگاڤێن یاسایی و دەستووری بهێنە كرن.
د پشكەكا دی یا دیدارێ دا هووكاری و بەرچاڤڕوهنیێن پتر ل دۆر دیتن و هەلوەستێ پارتی دیموكراتی كوردستان بەرامبەر دووماهی پێشهاتێن ناڤخۆییا هەرێما كوردستانێ بۆ شاندێ مێهڤان هاتنە باسكرن و هێمن هەورامی سوپاسسیا بالیۆزا هۆلەندا كر بۆ رۆلێ وێ یێ دۆستانە ل گەل هەرێما كوردستانێ ب تایبەتی ل وێ دەمێ ل سالا 2016ێ قونسلا وەلاتێ هۆلەندا بوویە ل هەولێرێ و ل وان دو سالێن بۆری دا وەك بالیۆز ل ئیراقێ كاری كریە هەروەسا رۆلێ وێ بلند هەلسەنگاند د پێشئێخستنا پەیوەندیێن دناڤبەرا هەرێما كوردستانێ و هۆلەندایێ دا.
پشتی هەلبژارتنێن پەرلەمانێ كوردستانێ و دەربازبوونا نێزیكی 20 مەهان ئالیێن سیاسی د زنجیرەیەكا دانوستاندنێن درێژخایەن دا بوونە لێ هەتا نهۆ روونشتنێن پەرلەمانی ب شێوەیەكێ ئاسایی دەست پێ نەكرینە و كابینەیا دەهێ ژی نەهاتییە پێكئینان.

سەرۆك بارزانی بۆ مالئاڤاهییا شێخ حەمەد بن خەلیفە ئال سانی پەیامەكا هەڤخەمیێ ئاراستەی میری قەتەرێ و حوكمەت و گەلێ وی وەلاتی كر.
سەرۆك بارزانی د پەیاما خۆ دا دبێژیت» جەنابێ شێخ تەمیم بن حەمەد ئال سانی میرێ دەولەتا قەتەرێ ب خەمەكا مەزن ڤە دەنگوباسێ مالئاڤاهییا خودێ ژێ رازی بابێ هەوە جەنابێ میرێ باب شێخ حەمەد بن خەلیفە ئال سانی ب مە گەهشت ئەو سەركردەیێ كو هەموو ژیێ خۆ بۆ خزمەتكرنا دەولەتا قەتەرێ و گەلێ وێ تەرخان كری.
د پەیاما سەرۆك بارزانی دا هاتییە د دەمەكێ دا بەهیداری هەڤخەمییا خۆ ئاراستەی هەوە و خێزانا هەوە یا بەرێز و حوكمەت و گەلێ برایێ قەتەرێ دكەین ژ خودایێ مەزن داخوازكارین رەحمەتی بێخیتە بەر میهرەبانییا بەرفرهە یا خۆ و ب بەهەشتێ شاد بكەت هەروەسا ئارامیێ ب هەوە ب بەخشیت.
هەر ب هەمان هەلكەفت، مەسرور بارزانی، سەرۆكێ حوكمەتا هەرێما كوردستانێ د پەیامەكێ دا ل تۆڕا جڤاكییا (ئێكس) راگەهاند» ب داخ ڤە دەنگوباسێ مالئاڤاهییا میرێ باب شێخ حەمەد بن خەلیفە ئال سانی ب مە گەهشت و ب ڤێ هەلكەفتا خەمگین بەهیدارییا خۆ ئاراستەی برایێ مە شێخ تەمیم بن حەمەد ئال سانی میرێ دەولەتا قەتەرێ و بنەمالا بەرێزا ئال سانی و گەلێ برایێ قەتەرێ دكەین».
د پەیاما سەرۆكێ حوكمەتێ دا هاتیی» ژ خودایێ مەزن داخوازكارین رەحمەتی بێخیتە بەر میهرەبانییا خۆ و ب بەهەشتێ شاد بكەت و پاداشتێ خێر و چاكییا هەموو وان خزمەتان بدەت یێن پێشكێشی وەلات و گەلێ خۆ كرین و هەدار و ئارامیێ ب خێزان و كەسوكار و گەلێ بەرێزێ قەتەرێ ب بەخشیت».

سەرۆك بارزانی و نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ، ب هەلكەفتا وەغەرا دووماهیێ یا لیندزی گراهام، سیناتۆرێ ئەمریكی پەیامێن جودا جودا یێن بەهیداریێ بەلاڤكرن.
سەرۆك بارزانی بۆ وەغەرا دووماهیێ یا سیناتۆر لیندزی گراهام پەیامەكا هەڤخەمیێ د تورا جڤاكییا (ئێكس) دا بەلاڤكر و تێدا دبێژیت «ناڤ و هەلوەستێن وی وەك پشتەڤانەكێ وەفادارێ مافێن رەوا یێن گەلێ كوردستانێ دێ بەردەوام د بیرەوەرییا خەلكێ كوردستانێ دا ب بلندی مینن».
سەرۆك بارزانی د پەیاما خۆ دا گۆت ژی «ب داخەكا مەزن ڤە دەنگوباسێ وەغەرا دووماهیێ یا دۆستێ گەلێ كورد سیناتۆر لیندزی گراهام گەهشتە من. ناڤ و هەلوەستێن لیندزی گراهامی وەك پشتەڤانەكێ وەفادارێ مافێن رەوا یێن گەلێ كوردستانێ دێ بەردەوام د بیرەوەرییا خەلكێ كوردستانێ دا ب بلندی مینن».
هەڤدەم سەرۆك بارزانی بەهیداری پێشكێشی مالباتا لیندزی گراهام و هەموو دۆست و هەڤالێن وی كرن و دبێژیت «ئەز هەڤپشكێ خەما وانم. گیانێ وی شاد بیت و هیڤییا ئارامیێ بۆ خێزان و كەسوكارێن وی دخوازم».
ژ ئالیێ خۆڤە، نێچیرڤان بارزانی، سەرۆكێ هەرێما كوردستانێ د پەیامەكێ دا ل سەر تۆرا جڤاكییا (ئێكس)دا نڤیسی»زۆر خەمبارم بە مالئاڤاهیكرنا سیناتۆر لیندزی گراهام، كە دۆستەكێ ب بهایێ گەلی كوردستان بوو».
سەرۆكێ هەرێمێ ئاماژە ب ڕۆلێ وی سیناتۆری كر د پاراستنا مافێن گەلێ كورد دا و راگەهاند»بەردەوام دێ ب رێز ڤە بیرئینانا بەرگریكرن و پشتەڤانیێن وی یێن نەگوهۆڕ بۆ كوردستانێ هێتە ساحكرن».
د دووماهیا پەیاما خۆ دا، نێچیرڤان بارزانی بەهیداری ل مالبات، هەڤال و هەڤكارێن وی كرن.
مەسرور بارزانی، سەرۆكێ حوكمەتا هەرێما كوردستانێ ژی د پەیامەكێ دا دیار كر، كو ب خەم و كۆڤانەكا مەزن ڤە دەنگوباسێ مالئاڤاهیكرنا سیناتۆر لیندزی گراهام بهیستییە. مەسرور بارزانی بەهیداری ل مالبات و كەسوكارێن وی و سەرۆكایەتی و ئەندامێن جڤاتا پیران یێ ئەمریكا كر. هەروەسا ئاماژە ب وێ چەندێ كر كو گەلێ كوردستانێ چو جاران دۆستینی و پشتەڤانیێن بەردەوام یێن گراهامی ژ بیر ناكەت.
دهێتە زانین، سیناتۆر لیندزی گراهام، پشتەڤانەكێ بەردەوامێ حوكمەتا هەرێما كوردستانێ بوو.
ل سالا 2015ێ، ل گەل پێشڕەویێن داعشێ، گراهامی پڕۆژەیاسایەكا هەڤپشك یا هەردوو پارتێن سەرەكی یێن ئەمریكی پێشكێش كر بۆ دانا دەسهەلاتا ب لەز ب مەرەما پڕچەكداركرنا هێزێن پێشمەرگەی د شەڕێ دژی داعشێ دا.
هەروەسا چەندین جاران ل گەل بەرپرسێن حوكمەتا هەرێما كوردستانێ كۆمبوویە و بەرگری ژ هەبوونا پەیوەندییەكا ب هێز د ناڤبەرا ئەمریكا و كوردان ل ئیراقێ دا دكر. بۆچوونا گراهامی ئەوببوو كو كورد ل ئیراقێ هەڤپشكەكێ گرنگن بۆ بجهئینانا ئارامیێ د دەڤەرێ دا، هەروەسا بۆ هەماهەنگییا بەرهنگاربوونا گرۆپێن توندڕەو و بهایێن دیمۆكراتی یێن هەڤپشك.

بەری حەفت سالان كابینەیا نەهێ یا حوكمەتا هەرێما كوردستانێ ب سەرۆكاتییا مەسرور بارزانی پشتی كو پێكهاتەیا حوكمەتێ و كارنامەیا وێ ژ ئالیێ پەرلەمانێ كوردستانێ ڤە هاتییە پەسەندكرن دەست ب كار بوو، د وی دەمی دا سەرۆكێ حوكمەتێ راگەهاند كو ئەو و حوكمەتا خۆ دێ پێگیر و بەرپرسیار بن بەرامبەر گەلێ كوردستانێ ب ڤێ چەندێ كو ب هەموو شیانان ڤە و ب بەرپرسانە كار بكەن ژ پێخەمەت بجهئینانا هەموو خالێن كارنامەیا حوكمەتێ.
عارف روشدی، شیرەتكارێ مەكتەبا سیاسیا پارتی دیموكراتی كوردستان ل دۆر رۆلێ كابینەیا نەهێ بۆ رۆژنامەیا (ئەڤرۆ) گۆت» د راستی دا سەرەڕای ئالۆزی و رێگرییان سەرۆكێ حوكمەتا هەرێمێ پشتی بەلاڤكرنا ئەركێن هەر وەزارەتەكێ وەك چەوا د كارنامەیێ دا هاتییە ب راستگۆیی سەركردایەتی و سەرپەرشتییا پرۆسەیا حوكمڕانییەكا پاقژ كر و دكەت وبەری هەر پێنگاڤەكا دی ب یاسا و رێنما و پلانان وەك چەوا د چارچۆڤەیا كارنامەیێ دا دووپات ل سەر هاتبوو كرن رێگری ل گەندەلیێ ب هەموو شێوەیێن وێ ڤە گرت د دەمەكێ دا كو باش دزانی و چەندین جاران ژی ئاماژە پێ دكر كو د ئەنجامێ ڤی ئەركی دا یێ پشتڕاستە دێ رووبڕووی ئاستەنگان بیت ژ ئالیێ وان كەس و ئالیێن بەرژەوەندیێن وان تێك دچن».
پتر گۆت»ژ بەر ڤێ چەندێ ئالیێن زیانڤەكەفتی ب هەموو شێوەیان دەست كر ب داڕشتنا پلان و پیلانان كر ب مەرەما دروستكرنا ئاستەنگان و راگرتنا كاركرنا نیشتیمانپەروەرانە یا سەرۆكێ حوكمەتا هەرێمێ و كابینەیا وی و ئەڤ پلان و پیلانە ل سەر ئاستێ هەرێما كوردستانێ و حوكمەتا فیدرالا ئیراقێ هاتنە داڕشتن. ل سەر ئاستێ هەرێما كوردستانێ رێگری ل جهئینانا یاسا و فەرمان و پرۆژەیێن خزمەتگوزاری یێن حوكمەتێ وەك پێدڤی ل هندەك دەڤەران كرن و ل سەر ئاستێ حوكمەتا فیدرال ژی هاریكار نەبوون د چارەسەركرنا كێشە و ئاریشەیێن دروستكری دژی بەرژەوەندیێن گەلێ مە دا بەلكو سەرەڕای نەدادپەروەری و زۆردارییا دامودەزگەهێن بەغدایێ بەردەوام لایەنگری دكرن یان ژی بێدەنگی هەلدەبژارت، بەلێ حوكمەتا هەرێما كوردستانێ ژ بەر كو بەرهەمێ خەباتا نیشتیمانپەروەرانە یا گەلێ مە یە ب سەرۆكاتییا مەسرور بارزانی و پشتەڤانییا پترییا هەرە مەزنا تەخ و چینێن خەلكێ كوردستانێ و نێچیرڤان بارزانی، سەرۆكێ هەرێما كوردستانێ و پارتی دیموكراتی كوردستان پەرە ب ئەركێن خۆ دا و شییا ل سەر پترییا ئالۆزیان زال بیت و خۆڕاگرانە بەردەوامیێ بدەتە كاروانێ ئاڤەدانیێ و پاراستنا خواست و مافێن رەوا یێن گەلێ مە».

جێگرێ سەرۆكێ جڤاتا نوونەرێن ئیراقێ راگەهاند كو ل حەفتییا بۆری نڤیسارەكا فەرمی ئاراستەی جڤاتا وەزیرێن ئیراقێ كریە ب مەرەما ب هەمیشەییكرنا فەرمانبەرێن گرێبەست ل هەرێما كوردستانێ.
فەرهاد ئەترووشی، جێگرێ سەرۆكێ جڤاتا نوونەرێن ئیراقێ گۆت» نێزیكی 70 هزار فەرمانبەرێن گرێبەست ل هەرێما كوردستانێ هەنە كو د كەرتێن جودا وەك ساخلەمی و پەروەردێ و سێكتەرێن دی دا خزمەت دكەن و مە د نڤیسارەكێدا داخواز كریە ئەو فەرمانبەرە بهێنە سەر میلاكێ هەمیشەیی ژبەر كو ئەڤە مافەكێ یاسایی یێ خۆ وانە و ل گەل بڕیارێن دادگەها فیدرال ژی دگونجیت».
ل دۆر ناڤەڕۆكا نڤیسارێ، جێگرێ سەرۆكێ جڤاتا نوونەرێن ئیراقێ ئاماژە ب وێ كر كو نڤیسار رەوانەی جڤاتا وەزیران كریە داكو گەنگەشە ل سەر بهێتە كرن ژ بلی پرسا فەرمانبەرێن گرێبەست، فەرهاد ئەترووشی باسی دۆسێیەكا دی یا گرێدای ب مامۆستایێن زانكۆ و فەرمانبەرێن خانەنشینكری كر و گۆت» هەژمارەكا مەزن ژ مامۆستایێن زانكۆیێ و فەرمانبەران پشتی خانەنشینبوونا وان پاداشتێ دووماهییا خزمەتێ وەرنەگرتییە و بۆ ڤێ مەرەمێ ژی مە نڤیسارەكا دی بەرهەڤ كریە و دێ رەوانە كەین داكو ئەو مافێ دارایی یێ وان بهێتە خەرجكرن».
فەرهاد ئەترووشی رۆهنكر ژی وەك جێگرێ سەرۆكێ جڤاتا نوونەران دێ بەردەوام بیت ل سەر دووڤچوونا ڤان كێشەیان تاكو دگەهنە ئەنجامەكێ دووماهیێ و مافێ فەرمانبەر و خانەنشینێن هەرێما كوردستانێ ل بەغدا دهێتە بنەجهكرن.

بەرپرسێ پەیوەندیێن گشتی یێن پارتی دیموكراتی كوردستان رەخنەیێن توند ل وان پەرلەمانتاران دگریت یێن بایكۆتا روونشتنێن پەرلەمانی كرین و داخازێ ژێ دكەت ب زڤڕنە پەرلەمانی داكو رێكارێن پێكئینانا حوكمەتێ دەست پێ بكەن .
كەمال كەركووكی، بەرپرسێ پەیوەندیێن گشتی یێن پارتی دیموكراتی كوردستان د كۆنگرەیەكێ رۆژنامەڤانی دا راگەهاند» پشكەك ژ پەرلەمانتاران سووندا یاسایی خوارینە لێ نوكە دەوامێ ناكەن و ئەڤە بەرۆڤاژی سووندا وانە و د بەرامبەر خودێ و گەلێ كوردستانێ دا ب تاوانبار دهێنە هەژمارتن».
بەرپرسێ پەیوەندیێن گشتی یێن پارتی داخازێ ژ وان پەرلەمانتاران دكەت كو ئەو قەیدێن حزبێن وان ب سەر وان دا سەپاندین بشكێنن و ب زڤڕنە هۆلا پەرلەمانی بێ كو مەرج ل سەر وان بهێنە سەپاندن و ب گۆرەی خواست و باوەرییا خۆ كار بكەن.
سەبارەت ب پرۆسەیا سیاسی و پێكئینانا كابینەیا نوو یا حوكمەتا هەرێما كوردستانێ، كەركووكی دوپاتی ل وێ چەندێ كر كو نابیت پێنگاڤ بەرۆڤاژی ببن و عەرەبانە ل پێش هەسپان بهێنە دانان.
رۆهنكر ژی كو ئەركێ ئێكێ كاراكارنا پەرلەمانێ كوردستانێ یە و پاشی ب گۆری نەریتێ دیموكراسیێ جیهانی ئەو ئالیێ زۆرینەیا دەنگان ب دەستڤەئینای جارا ئێكێ دهێتە راسپاردن بۆ پێكئینانا حوكمەتێ و هەكە ب گۆرەی یاسایا سەرۆكاتییا هەرێما كوردستانێ ئەو ئالییە د دەمێ ئێك مەهێ دا نەشییا كابینەیێ پێك بینیت دێ ئالییەكێ دی هێتە راسپاردن.
ئەڤە د دەمەكێ دایە كو نێزیكی دو سالانە هەلبژارتنێن پەرلەمانێ كوردستانێ هاتینە كرن لێ تا نهۆ ئالیێن سیاسی ب تایبەت پارتی و ئێكەتی ل سەر پێكئینانا حوكمەتا نوو رێك نەكەفتینە و پارتی وەك سەركەفتییا ئێكێ دووپاتیێ ل سەر مافێ خۆ یێ دەستووری دكەت بۆ پێكئینانا كابینەیێ.

قونسلێ گشتی یێ توركیا ل هەرێما كوردستانێ دووپاتی ل بهێزییا پەیوەندیێن د ناڤبەرا هەولێرێ و ئەنقەرەیێ دا دكەت و رادگەهینیت، كۆمپانیاێن توركی رۆلەكێ سەرەكی د ئاڤەدانكرن و پێشكەفتنا هەرێما كوردستانێ دا هەبوویە.
ئێرمان تۆپچو، قونسلێ گشتی یێ توركیا ل هەرێما كوردستانێ، د داخۆیانییەكا رۆژنامەڤانیدا گۆت» پەیوەندیێن د ناڤبەرا توركیا و هەرێما كوردستانێ دا گشتگیرن و هەموو بوارێن ئابۆری، ئێمناهی، سیاسی و كولتووری ڤەدگرن، لێ گرنگترین رەهەندێ ڤان پەیوەندییان، ئەو پەیوەندییا مرۆڤی یە یا د ناڤبەرا هەردو ئالییان دا كو وەكریە بناغەیێ وێ گەلەك بهێز بیت».
تۆپچوی ئاماژە ب وێ دا كو توركیا ژ ئالیێ ئابۆری ڤە هەڤپشكەكا سەرەكی یێ هەرێما كوردستانێ یە و گۆت «كۆمپانیێن توركی د رێزا ئێكێ دا نە د ناڤ وەبەرهێنەرێن بیانی ل هەرێما كوردستانێ، هەروەسا زۆرترین هەژمارا كۆمپانیاێن بیانی ل هەرێمێ ژی، یێن توركی نە».
قونسلێ گشتی یێ توركیا باس ل دیرۆكا كاركرنا كۆمپانیێن وەلاتێ خۆ كر و گۆت «ئەڤ كۆمپانییە پشكەكا دانەبڕی یا وێ پێشكەفتن و سەركەفتنانە یا كو هەرێما كوردستانێ د دەمێ30 سالێن بۆری دا ب دەست ڤە ئیناین».
ئێرمان تۆپچوی دووپات كر كو وەلاتێ وی دخوازیت پەیوەندییان د هەموو بواران دا ل گەل هەرێما كوردستانێ پتر پێش بێخیت و ئاستێ هەڤكاریێن ئابۆری و بازرگانی بەرفرەهتر بكەت.

نێچیرڤان بارزانی سەرۆكێ هەرێما كوردستانێ پێشوازی ل نیكۆلۆ فۆنتانا، بالیۆزێ ئیتالیایێ ل ئیراقێ و شاندەكێ دگەلدا كر د وێ كۆمبوونێ دا سەرۆكێ هەرێما كوردستانێ سوپاس و پێزانینێن خۆ ئاراستەی سەرۆككۆمار و حوكمەت و گەلێ ئیتالیا كر بۆ پێبەخشینا مێدالیا رێزلێنانا سڤیل و ئەڤ پێنگاڤە وەك نیشانا دۆستینییا راستگۆیانە و پێشئێخستنا پەیوەندیێن هەردوو ئالییان هەلسەنگاند.
هەردوو ئالییان دوپاتی ل سەر پێشئێخستنا پتر یا پەیوەندیێن ئیراقێ و هەرێما كوردستانێ ل گەل وەلاتێ ئیتالیایێ كر و بیروڕا ل دۆر چەوانییا بەرفرەهكرنا هەڤكاریێن هەڤپشك د بوارێن جودا جودا دا لێكگۆهارتن. تەوەرەكێ دی یێ كۆمبوونێ كو تایبەت بوو ب رەوشا ناڤخۆ یا هەرێمێ و ئەنجامێن سەرەدانا حەفتییا بۆری یا نێچیرڤان بارزانی بۆ ئیرانێ و دیدارێن وی ل تەهرانێ هەروەسا دووماهی پێشهاتێن دەڤەرێ و چەند پرسێن جهێ گرنگییا هەڤپشك هاتنە گەنگەشەكرن.

نێچیرڤان بارزانی سەرۆكێ هەرێما كوردستانێ ب هەلكەفتا ب دووماهیهاتنا ئەركێ وی پێشوازی ل (پاتریك دۆرێل) بالیۆزێ فەرەنسا ل ئیراقێ كر د دیدارەكێ دا سەرۆكێ هەرێما كوردستانێ سوپاسییا بالیۆزێ فەرەنسا كر بۆ بزاڤ و كارێن وی د پێناڤی پێشئێخستنا پەیوەندیێن فەرەنسا ل گەل ئیراقێ و هەرێما كوردستانێ و هیڤییا سەركەفتنێ د ئەركێ وی یێ داهاتی دا بۆ خواست.
ژ ئالیێ خۆ ڤە بالیۆزێ فەرەنسا سوپاسییا نێچیرڤان بارزانی و ئالیێن پەیوەندیدارێن هەرێما كوردستانێ كر كو هەردەم هاریكار بوون بۆ سەرئێخستنا ئەركێ وی هەروەسا دووپاتی ل سەر خواستا وەلاتێ خۆ بۆ پێشئێخستنا پتر یا پەیوەندییان و بەرفرەهكرنا هەڤكاریێن هەڤپشك ل تەمامییا بواران دا كر. د وێ دیدارێ دا (یان برێم) قونسلێ گشتیێ فەرەنسا ل هەرێما كوردستانێ بەرهەڤ بوو.