ل بەغدایێ شاندەكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ سەرەدانا نووری مالكی، سەرۆكێ هەڤپەیمانییا دەولەتا یاسا كر، د كۆمبوونەكێ دا پێشڤەبرنا دیالۆگا نیشتمانی، پشتەڤانییا كەمپینا حوكمەتێ یا دژی گەندەلیێ و چڕكرنا رۆلێ چاڤدێریێ یێ جڤاتا نوونەران هاتنە گەنگەشەكرن.
نڤیسینگەها راگەهاندنا نووری مالكی، سەرۆكێ هەڤپەیمانییا دەولەتا یاسا د بەیاننامەیەكێ دا بەلاڤكر، مالكی ل بەغدا پێشوازی ل شاندەكێ فەرمی یێ فراكسیۆنا پارتی دیموكراتی كوردستان ل جڤاتا نوونەرێن ئیراقێ ب سەرۆكایەتییا فەرهاد ئەترووشی، جێگرێ سەرۆكێ جڤاتا نوونەران كر.
د دیدارێ دا دووماهی پێشهاتێن سیاسی یێن ئیراقێ و كۆمەكا دۆسییێن جهێ گرنگییا هەڤپشك هاتنە باسكرن.
د بەیاننامەیێ دا هاتییە ژی، هەردو ئالی ل سەر گرنگییا بهێزكرنا تێكگەهشتن و دیالۆگا د ناڤبەرا هێزێن سیاسی هەڤڕا بوون ب ئارمانجا چەسپاندنا ئارامیێ وپشتە ڤانیكرنا دەزگەهێن دەولەتێ و هەڤكارییا هەڤپشك بۆ دەربازبوونێ ژ ئاستەنگان د چارچۆڤەیێ دەستوور و یاسایێ دا.
ئاماژە ب وێ ژی دایە، بابەتەكێ دی یێ سەرەكی یێ دیدارێ تایبەت بوو ب گەنگەشەكرنا وان رێكارێن حوكمەتا فیدرال د چارچۆڤەیێ كەمپینا بەرهنگاربوونا گەندەلیێ دا دگریتە بەر. نووری مالكی گرنگییا بەردەوامبوونا ڤێ پێنگاڤا یاسایی بلند هەلسەنگاند و دووپات كر كو بەرهنگاربوونا گەندەلیێ دكەڤیتە د چارچۆڤەیێ كارێن لەزگین یێن نیشتمانی دا، كو پێدڤی ب ئێكگرتنا هەموو دەستهەلات و دەزگەهێن دەولەتێ هەیە.
د هەمان دەم دا سەرۆكێ هەڤپەیمانییا دەولەتا یاسا دووپاتی ل سەر پێدڤییا چالاككرنا رۆلێ چاڤدێری و یاسادانانێ یێ جڤاتا نوونەرێن ئیراقێ كر، ب رێیا چاڤدێریكرنا هوور یا كارێن دەزگەهێن حكومی، چەسپاندنا بهاێن زەلالیێ و لێپرسینێ، ب شێوازەكێ كو ببیتە ئەگەر بۆ پاراستنا سامانێ گشتی و بهێزكرنا باوەرییا وەلاتییان ب دەزگەهێن فەرمی.
هەروەسا هەردو ئالییان دووپاتی ل سەر بەردەوامییا هەماهەنگی و پەیوەندییا نێزیك یا د ناڤبەرا هێزێن سیاسی دا كرن بۆ خزمەتكرنا بەرژەوەندیێن بلند یێن نیشتمانی و بلندكرنا دەرفەتێن ئاڤەدانیێ و گەشەپێدانێ ل ئیراقێ.

پەیمانگەها رۆژهەلاتا ناڤین یا ئەمریكی د راپۆرتەكێ دا ئاشكەرا دكەت، ئیدارەیا دۆنالد ترەمپی بەرهەڤە چاڤپۆشیێ ژ هەلوەستێن نها یێن ئیراقێ بەرانبەر ئیرانێ بكەت، ب وی مەرجی كو بەغدا ب تەمامی روو بكەتە رۆژئاڤای و پەیوەندیێن خۆ ل گەل ئەمریكا و وەلاتێن عەرەبی بهێزتر بكەت.
ل گورەی راپۆرتێ، واشنتۆن چاڤەڕێی گوڕانكاریێن مەزن د شێوازێ حوكمڕانییا ئیراقێ دا دكەت، بڕیارە د ناڤەڕاستا مەها بهێت دا، عەلی ئەلزەیدی، سەرۆك وەزیرانێ ئیراقێ سەرەدانا واشنتۆنێ بكەت، ئەمریكی وەك «زەلامێ كاری و پۆزەتیڤ» ل ئەلزەیدی دنیڕن، لێ هۆشداریێ ددەن كو نابیت چاڤەڕێبوویێن وان ل دۆر سەرۆك وەزیرێن نوو یێ ئیراقێ نەرێنی بن، ژ بەر كو ئەزموونا وان یا بۆری ل گەل سەرۆك وەزیرێن پێشتر نائومێدكەر بوویە.
ئیدارەیا ترەمپی ب رێیا «تۆم بەڕاك»ی هنارتیێ تایبەت یێ سەرۆكێ ئەمریكی ، نەخشەرێكەك بۆ ئەلزەیدی دیار كرییە كو سێ تەوەرێن سەرەكی د ناڤ خۆ دا دگریت:
هەلوەشاندنا حەشدا شەعبی و ژچەككرنا گرۆپێن دی، كو ئەڤە ژی پێدڤی ب بڕیارا جڤاتا نوونەران و بوێرییا سیاسی یە.
واشنتۆنێ دڤێت سەقایەكێ ئارام بۆ كۆمپانیێن پەترۆلێ و وەبەرهێنانێ ل بەسرایێ و هەرێما كوردستانێ دابین بیت و ژ هێرشێن میلیشیایان بهێنە پاراستن.
گوهۆڕینا ئاراستێ سیاسی و ئابۆری یێ ئیراقێ بەرەڤ وەلاتێن كەنداڤێ و رۆژئاڤای، هەڤشێوەی وێ گوڕانكارییا كو واشنتۆنێ دڤێت ل سووریێ ببینیت.
راپۆرت ئاماژەی ب وێ دكەت كو ئەلزەیدی ل بەر دەستێ ئەزموونەكا گران دایە، ژ ئالییەكی ڤە دڤێت هێلێن سوور یێن ئەمریكا د دیاركرنا وەزیرێن ناڤخۆ و بەرگریێ دا ل بەرچاڤ بگریت، ژ ئالییەكێ دی ڤە نەچارە بۆ رازیكرنا ئالیێن چارچوڤەیا هەماهەنگی هندەك داگیرانێن سیاسی بكەت، مەزنترین ئاستەنگ ژی ئەو دەستێوەردانا كوور یا ئیرانێ یە د ناڤ وەزارەت و كەرتێ ئابۆری یێ ئیراقێ دا كو چەندین سالە ریهوریشالێن خۆ داكووتینە.
پەیمانگەهـ پێشنیازەكێ دكەت كو واشنتۆن سیاسەتەكێ پەیرەو بكەت، ئەو گرۆپێن چەكی ددانن و دبنە حزبێن سیاسی، سزایێن وان بهێنە راكرن، لێ ئەوێن رەت دكەن بهێنە ژێر ركێفییا دەولەتێ.
د راپۆرتێ دا دوپاتی هاتییە كرن كو ئیدارەیا ترەمپی ئێدی وێ سیاسەتا پێشتر یا بەغدا قەبوول ناكەت كو دڤیا د ناڤبەرا واشنتۆن و تەهرانێ دا هەڤسەنگیێ راگریت، بۆ ترەمپی، ئەڤ تەمومژە ب دوماهی هاتییە و دڤێت ئیراق ب تەمامی لایەنگرییا خۆ بۆ رۆژئاڤای ئێكلا بكەت.

رێبەر ئەحمەد، وەزیرێ ناڤخۆیێ حوكمەتا هەرێما كوردستانێ، ل باژێڕێ بەغدا ل گەل هەژمارەكا بەرپرسێن لەشكەری و ئەمنی یێن ئیراقی كۆمبوو و د وان كۆمبوونان دا چەندین دۆسییێن ئەمنی یێن گرنگ هاتنە باسكرن.
د كۆمبوونا د ناڤبەرا رێبەر ئەحمەد، وەزیرێ ناڤخۆ و فەریقێ ئێكێ روكن عەبدولئەمیر رەشید یارەللا، سەرۆك ئەركانێ لەشكەرێ ئیراقێ چەندین دۆسییێن ئەمنی و سەربازی یێن هەڤپشك هاتنە گەنگەشەكرن.
هەر د كۆمبوونێ دا، پێداچوون ب رەوشا ئەمنییا نوكە یا وەلاتێ دا هاتە كرن و باس ل رێكێن بهێزكرنا هەماهنگییا مەیدانی یا د ناڤبەرا هێزێن فیدرال و هێزێن پێشمەرگەیێ كوردستانێ هاتە كرن، ب تایبەت ل وان دەڤەرێن خودان گرنگییا ئەمنی یا هەڤپشك، ئەڤە ژی ب ئارمانجا پركرنا ڤالاهیێن ئەمنی و پاراستنا سنۆران.
هەردو ئالییان دووپاتی ل سەر گرنگییا بەردەوامبوون و پێشئێخستنا ئۆپەراسیۆنێن هەڤپشك و لێكگۆهارتنا پێزانینێن هەواڵگری كر بۆ دووڤچوونا پاشمایێن تیرۆرێ و رووبڕووبوونا تاوانێن رێكخستی، ب شێوەیەكی كو ئارامی و سەروەرییا یاسایێ ل هەموو دەڤەرێن وەلاتێ بهێتە چەسپاندن.
هەروەسا هەردو ئالییان ئاستێ هەڤكارییا نوكە یا د ناڤبەرا دەزگەهێن ئەمنی و سەربازی یێن حوكمەتا فیدرال و هەرێما كوردستانێ بلند هەلسەگاند و دووپاتی ل سەر پێدڤییا ئێكگرتنا بزاڤان كر بۆ رووبڕووبوونا ئاستەنگێن ئەمنی و پاراستنا وان دەستكەفتێن كو ب قوربانیێن هەڤپشك هاتینە بدەستڤە ئینان.
هەر ل بەغدا شاندەكێ بلندێ ئەمنی یێ هەرێما كوردستانێ ب سەرۆكاتییا رێبەر ئەحمەد، وەزیرێ ناڤخۆ، ل گەل قاسم عەبوودی، شیرەتكارێ ئاسایشا نەتەوەییا ئیراقێ كۆمبوو. د وێ دیدارێ دا، رەوشا گشتییا ئاسایشا وەلاتی و ئاستەنگێن ئەمنی یێن ل هەمبەر دەڤەرێ هاتنە گەنگەشەكرن. تەوەرەكێ سەرەكی یێ وێ كۆمبوونێ بۆ بهێزكرنا هەڤكارییا هەڤپشك یا د ناڤبەرا دەزگەهێن ئەمنی یێن حوكمەتا فیدرال و حوكەتا هەرێما كوردستانێ دا هاتییە تەرخانكرن، ئەڤە ژی ب ئارمانجا پاراستنا ئارامیێ و رووبڕووبوونا مەترسییان.
هەروەسا هەردو ئالییان دوپاتی ل سەر میكانیزم و رێكارێن بجهئینانا رێككەفتننامەیا ئەمنییا هەڤپشك یا د ناڤبەرا ئیراقێ و كۆمارا ئیسلامییا ئیرانێ دا كر. د ڤی چارچۆڤەی دا، دووپاتی ل سەر پیگیریبوونا هەموو ئالییان ب برگەیێن رێككەفتنێ هاتە كرن، ب تایبەت د پرسا پاراستنا سنۆرێن هەڤپشك و رێگریكرن ژ هەر بنپێكرنەكا ئەمنی كو كارتێكرنا نەرێنی ل سەر ئاسایشا هەرێما كوردستانێ و ئیراقێ هەبیت.
هەر ل بەغدایێ، رێبەر ئەحمەد ل گەل باسم بەدری، سەرۆكێ دەزگەهێ ئاسایشا نیشتمانییا ئیراقێ كۆمبوو. د دیدارەكێ دا وەزیرێ ناڤخۆ پیرۆزباهی ل باسم بەدری كر ب هەلكەفتا دەست ب كاربوونا وی د وی پۆستێ دا و هیڤیا سەركەفتنێ بۆ خواست د ئەركێن وی یێن ئەمنی و نیشتمانی دا. هەردو ئالییان گەنگەشە ل سەر رێكێن بهێزكرنا هەماهنگییا هەڤپشك و بەرفرەهكرنا هاریكاریێن ئەمنی یێن د ناڤبەرا دەزگەهێن ئەمنی یێن حوكمەتا فیدرال و هەرێما كوردستانێ دا كر. هەروەسا دوپاتی ل سەر گرنگییا ئێكگرتنا بزاڤان كر بۆ رووبڕووبوونا ئاستەنگێن ئەمنی یێن هەڤپشك ل سەرانسەری وەلاتی.

شاندەكێ پارتی دیموكراتی كوردستان ب سەرۆكاتییا هشیار زێباری، ئەندامێ دەستەیا كارگێڕییا مەكتەبا سیاسی یا پارتی ، ل گەل نوری مالكی، سەرۆكێ هەڤپەیمانییا دەولەتا یاسایێ كۆمبوو.
د وێ كۆمبوونێ دا، كو ب بەرهەڤبوونا فارس عیسا، سەرۆكێ نوونەراتییا حوكمەتا هەرێما كوردستانێ ل بەغدا هاتە ئەنجامدان، تەوەرێن سیاسی یێن ئیراقێ و دەڤەرێ و چەندین پرسێن هەڤپشك هاتنە گەنگەشەكرن.
هەردو ئالییان دووپاتی ل سەر گرنگییا ب دووماهیئینانا پێكهاتنا كابینەیا حوكمەتا سەرۆك وەزیران «عەلی ئەلزێدی» كر، ل گەل وێ چەندێ كو پشتەڤانییا بەرنامەیێ حوكمەتا نوو بهێتە كرن بۆ وێ چەندێ ئارامیو تەناهی ل وەلاتێ بهێتە چەسپاندن.
هەروەسا هەردو ئالییان دووپاتی ل سەر وێ چەندێ كر كو دڤێت دیالۆگێن د ناڤبەرا هێزێن سیاسی دا بەردەوام بن، داكو پرۆسەیا سیاسی بهێز بكەڤیت و سەقایەكێ ئەرێنی و ئاڤاكەر بۆ بەرژەوەندییا گشتی پەیدا بیت.

شیرەتكارێ دارایی یێ سەرۆك وەزیرێن ئیراقێ راگەهاند، پاشكەفتنا بەلاڤكرنا مووچەیێ فەرمانبەران ب تنێ ڤەدگەریتە ئەگەرێن تەكنیكی، هەروەسا پشتڕاستبوون دا كو شایستەیێن دارایی یێن وەلاتیان ل ئیراقێ و هەرێما كوردستانێ ب تەمامی پاراستینە و گەرەنتی كرینە.
مەزهەر محەمەد، شیرەتكارێ سەرۆك وەزیرێن ئیراقێ بۆ كاروبارێن دارایی، د داخۆیانییەكا رۆژنامەڤانی دا پشتڕاستبوون دا فەرمانبەران و راگەهاند، مووچەیێ فەرمانبەرێن ئیراقێ و هەرێما كوردستانێ ب تەماوی هاتییە گەرەنتیكرن و چو ئاریشەیێن بنەڕەتی د ڤەگوهاستنا شایستەیێن دارایی دا نینن.
شیرەتكارێ سەرۆك وەزیرێن ئیراقێ دەربارەی ئەگەرێن پاشكەفتنا بەلاڤكرنا مووچەیێ ڤێ دووماهیێ گۆت «ئەڤ بابەتە ب تنێ پەیوەندی ب هەبوونا چەند تێبینی و ئاریشەیێن تەكنیكی د ناڤبەرا فەرمانگەهێن دارایی دا هەیە».
ئەڤە د دەمەكێ دایە كو د حەفتییا بۆری دا، شاندێ دانوستاندكارێ حوكمەتا هەرێما كوردستانێ بۆ وەزیرێ دارایی یێ ئیراقێ راگەهاندبوو كو ژ بەر كێمبوونا داهاتێن وان، نەشێن كۆژمێ 120 ملیار دینارێن مەهانە (تایبەت ب پشكێ داهاتێ نەپەترۆلی) رادەستی بەغدا بكەن.
ل بەرامبەر، وەزیرێ داراییا ئیراقێ ئاماژە ب وێ چەندێ كربوو كو بڕیاردان ل سەر كێمكرنا وی كۆژمێ پارەی د دەرڤەی دەستهەلاتا كارگێری یا وی دایە و ب تنێ د تایبەتمەندییا جڤاتا وەزیران دایە، لەورا چاڤەڕێ دكر د كۆمبوونا شەڤا ئێكشەمبی دا بڕیارا دووماهیێ ل سەر بهێتە دان، لێ ئەڤ تەوەرە د بەرنامەیێ كارێ گەنگەشەیان دا نەهاتە دانان.
هەمان دەم، دەربارەی شایستەیێن دارایی یێن فەرمانبەرێن هەرێما كوردستانێ، وەزیرێ داراییا ئیراقێ پشتڕاستبوون دایە شاندێ هەرێمێ كو ب چ رەنگەكێ پرۆسەیا هنارتنا مووچەیێ فەرمانبەرێن هەرێمێ پاشنائێخیت و مەهانە پشكێ د هنێریت، چ ب رێیا ئەنجامدانا (مەقاسە) بیت یان ب هنارتنا تەمامییا كۆژمێ پێدڤی.
پێشبینی دهێتە كرن د ڤێ حەفتیێ دا پارێ پێدڤی بۆ خەرجكرنا مووچەیێ مەها خزیرانێ بهێتە سەر هەژمارا بانكی یا هەرێما كوردستانێ.

شیرەتكارێ وەزارەتا دارایی و ئابۆری یا حوكمەتا هەرێما كوردستانێ راگەهاند، پرسا هنارتنا 120 ملیار دیناران ژ داهاتێ ناڤخۆ بۆ بەغدایێ «نەڕەوایە» و دووپاتیێ ل سەر وێ چەندێ دكەت كو ئەگەرێ پاشكەفتنا مووچەی ب تنێ «سیاسییە» نەك تەكنیكی.
هاوڕێ كەمال، شیرەتكارێ وەزارەتا دارایی و ئابۆری گۆت»ل دووڤ وان یاسایێن حوكمەتا فیدرال كاری پێ دكەت، دڤێت 50%ێ ژ داهاتێن فیدرالی بۆ گەنجینەیا دەولەتێ بزڤڕیت، لێ دیاركرنا كوژمێ 120 ملیار دیناران وەك پشكا ناڤخۆ بابەتەكێ نەڕەوایە و چو بنەمایەكێ یاسایی نینە».
هەروەسا شیرەتكارێ وەزارەتا دارایی و ئابۆری ئاماژە ب وێ چەندێ كر، د ڤان سالێن دووماهیێ دا هەموو بابەتێن تەكنیكی د ناڤبەرا هەولێرێ و بەغدایێ دا هاتینە ئێكخستن و چو بەربەستێن تەكنیكی ل پێشییا هنارتنا شایستەیێن دارایی نەماینە.
هاوڕێ كەمال گۆت ژی «چو ئەگەرێن تەكنیكی نەماینە كو مووچە بهێتە پاشكەفتن، بەلكو ئەگەر پتر سیاسی نە».
ئەڤ ئاخڤتنێن شیرەتكارێ وەزارەتا دارایی و ئابۆری د دەمەكێ دانە، كو دانوستاندنێن د ناڤبەرا هەرێما كوردستانێ و حوكمەتا فیدرال دا ل سەر پرسا بودجەی و مووچەی و داهاتێن نە پەترۆلی بەردەوامن و هەرێما كوردستانێ دووپاتیێ ل سەر بجهئینانا یاسایا بودجەی وەك خوە دكەتەڤە.

سەرۆكێ حوكمەتا هەرێما كوردستانێ ب هەلكەفتا سالڤەگەڕا 250 یا ئیمزاكرنا راگەهاندنا سەربخۆیا ئەمریكا، پیرۆزباهییەكا گەرم ئاراستەی گەلێ ئەمریكا كر و راگەهاند، ب شانازی ڤە ل هەڤكاریێن دیرۆكی یێن د ناڤبەرا هەولێرێ و واشنتۆنێ دا دنێڕن د تێكشكاندنا تیرۆرێ دا و چاڤەڕێی ب هێزكرنا پەیوەندییانە بۆ نڤشێن بهێت.
مەسرور بارزانی، سەرۆكێ حوكمەتا هەرێما كوردستانێ د هەژمارا خۆ یا تۆڕا جڤاكییا (ئێكس) دا پەیامەك ب هەلكەفتا سالڤەگەڕا250 یا راگەهاندنا سەربخۆیا وەلاتیێن ئێكگرتی یێن ئەمریكا بەلاڤ كریە.
مەسرور بارزانی د پەیاما خۆ دا نڤیسییە: «پیرۆزباهیێ ل گەلێ ئەمریكا دكەین ب هەلكەفتا ڤێ دیرۆكی و دەربازبوونا 250 سالان ب سەر ئیمزاكرنا بەیاننامەیا سەربخۆیا وان».
سەرۆكێ حوكمەتا هەرێما كوردستانێ راگەهاند ژی: «هەڤپشكییا ستراتیژی و دۆستایەتییا مە ل گەل ئەمریكا ب بلند دهەلسەنگینین».
مەسرور بارزانی گۆت ژی: «شانازیێ ب دیرۆكا هەڤكاری و كارێن مە یێن هەڤپشك د شكاندنا تیرۆرێ دا دكەین و ب پەرۆش ڤە چاڤەڕێی ب هێزكرنا هەڤپشكییا مەینە بۆ نڤشێن بهێت».

پارتی دیموكراتی كوردستان، ب هەلكەفتا سالڤەگەڕا 250 یا سەربخۆیا ئەمریكا، پەیامەكا پیرۆزباهیێ ئاراستەی نوونەرایەتیێن دیپلۆماسیێن ئەمریكا ل ئیراقێ و هەرێما كوردستانێ كر.
د پەیامێ دا دوپاتی ل سەر بلند هەلسەنگاندنا بهایێن دیموكراسیێن هەڤپشك و بهێزكرنا هەڤالینییا د ناڤبەرا هەرێما كوردستانێ و ئەمریكا دا هاتییە كرن.
مەكتەبا پەیوەندیێن دەرڤە یا پارتی دیموكراتی كوردستان ب هەلكەفتا سالڤەگەڕا 250 یا راگەهاندنا سەربخۆیا ویلایەتێن ئێكگرتیێن ئەمریكا راگەهاندنەك بەلاڤ كر و تێدا هاتییە: «گەرمترین پیرۆزباهی و باشترین هیڤیێن خۆ ئاراستەی بالیۆزخانا ئەمریكا، قونسلخانەیا گشتی ل هەولێرێ و هەموو گەلێ ئەمریكا دكەین ب ڤێ هەلكەفتا دیرۆكی «.
د بەیاننامەیێ دا ئاماژە ب وێ هاتییە كرن، ئەڤ وەستگەها دیرۆكی، دەرفەتەكا گرنگە بۆ بیرئینانا وان بهایێن بنەرەتی یێن ئەمریكا ل سەر هاتییە دامەزراندن ، ژ وان ژی: ئازادی، دیموكراسی، حوكمڕانییا دەستووری، دەرفەتێن هەڤسەنگ، و پاراستنا كەرامەتا مرۆڤی.
دوپاتی ژی ل سەر وێ هاتییە كرن، ئەڤ پرەنسیپە د دەمێ 250 سالێن بۆری دا وەك ژێدەرێ ئیلهامێ بۆ گەلێن جیهانێ مایە و رۆلێ دیرۆكیێ ئەمریكا د پشتەڤانیكرنا ئاشتیێ، ئارامیێ، و گەشەپێدانا دیموكراسیێ دا ل جیهانێ نەخشاندیە.
سەبارەت ب پەیوەندیێن د ناڤبەرا هەولێرێ و واشنتۆنێ دا، پارتی دوپات كر، ئەڤ هەلكەفتە رامان و گرنگییا تایبەت بۆ گەلێ كوردستانێ هەیە. پارتی هەڤپشكاتی و هەڤالینییا دیرۆكی یا د ناڤبەرا هەرێما كوردستانێ و ئەمریكا دا بلند هەلسەنگاند، و سوپاسییا خۆ بۆ پشتەڤانیێن بەردەوامێن واشنتۆنێ و رۆلێ دیپلۆماتكار و بەرپرسێن ئەمریكی ل دەڤەرێ دەربڕی كو هاریكار بوون د بهێزكرنا پەیوەندیێن دوو قۆلی دا.
د پەیامێ دا، پارتی دیموكراتی كوردستان دووبارە پیگیریبوونا خۆ بۆ پێشڤەبرنا پتر یا هەڤالینیێ، رێزگرتنا هەڤپشك و هەڤكارییا د ناڤبەرا پارتی، هەرێما كوردستانێ و ئەمریكا نیشادا، هەروەسا، هیڤییا بەردەوامییا ئاشتیێ، گەشەكرن و سەركەفتنێ بۆ حوكمەت و گەلێ ئەمریكا دخوازین، و پێزانینا خۆ یا كوور ئاراستەی بالیۆزخانەیا ئەمریكا و قونسلخانەیا گشتی یا ئەمریكا ل هەولێرێ دكەین ژ بۆ بەردەوامییا هەڤپشكاتی و هەڤالینییا وان».

شاندەكێ پارتی دیموكراتی كوردستان ل بەغدایێ ل گەل سەركردایەتییا هەڤپەیمانییا (عەزم) كۆمبوو، تێدا دووماهی پێشهاتێن سیاسی یێن ئیراقێ و كۆمەكا دۆسییێن هەڤپشك گەنگەشە كرن.
ل رۆژا ئێكشەمبی، 5 تەممووزا 2026، شاندەكێ پارتی دیموكراتی كوردستان ب سەرۆكاتییا هشیار زێباری، ئەندامێ دەستەیا كارگێرییا مەكتەبا سیاسی ، سەرەدانا بارەگەهێ هەڤپەیمانیا عەزم ل بەغدا كر و ژ ئالیێ ئەندامێن دەستەیا سەركردایەتییا هەڤپەیمانییا ناڤبری ڤە پێشوازی لێ هاتە كرن.
فارس عیسا، سەرۆكێ نوونەرایەتییا حوكمەتا هەرێما كوردستانێ ل بەغدایێ، د بەیاننامەیەكێ دا ئاماژە ب وێ چەندێ كر كو د كۆمبوونێ دا، دووماهی پێشهاتێن گۆڕەپانا سیاسی یا وەلاتی ل گەل كۆمەكا دۆسییێن هەڤپشك هاتنە گەنگەشە كرن.
ل گۆرەی بەیاننامەیێ، هەردو ئالییان دوپاتی ل سەر گرنگییا بهێزكرنا پەیوەندیێن دووقۆلی و چەسپاندنا دیالۆگێ د ناڤبەرا هێزێن سیاسی یێن ئیراقێ دا كر، ب ئارمانجا پشتەڤانیكرنا ئارامییا سیاسی و دروستكرنا سەقایەكێ ئەرێنی د ناڤبەرا ئالیێن جودا دا، ب شێوازەكێ كو خزمەتا پرۆسەیا سیاسی یا وەلاتی بكەت.
بەرهەڤبوویێن كۆمبوونێ هەڤڕا بوون ل سەر گرنگییا پاراستنا هەڤسەنگیێن نیشتمانی و چەسپاندنا بنەمایێ هەڤپشكییا راستەقینە د رێڤەبرنا دەزگەهێن فیدرالی دا، ب جۆرەكێ كو بەرژەوەندییا گشتی و ئارامییا گشتگیر ل ئیراقێ گەرەنتی بكەت.