ئه‌ڤرۆنيوز:

سكرتێرێ مه‌كته‌با سياسى يا پارتى ديموكراتى كوردستان راگه‌هاند، كه‌س ل دووڤ داخوازيا پارتى نه‌هات بۆ پێكئينانا شانده‌كێ هه‌ڤپه‌يمان بۆ به‌غدا، له‌وما مه‌ بريار دا شاندێ پارتى سه‌ره‌دانا به‌غدا بكه‌ت ونوكه‌ ژى ل به‌غدا دێ پشته‌ڤانيێ وى لايه‌نى كه‌ين كو داخوازيێن گه‌لێ كورد بجهبينيت.

فازل ميرانى ل فرۆكخانا هه‌ولێرێ بۆ كه‌نالێن راگه‌هاندنێ گۆت” وه‌كو لايه‌نه‌كێ دياركرى، ئه‌م پشته‌ڤانيا چو لايه‌نه‌كى ناكه‌ين حوكمه‌تێ پێك بينيت، به‌لكو پشته‌ڤانيا وى لايه‌نى دكه‌ين كو داخوازيێن كوردان بجهبينيت، بۆ ڤێ چه‌ندێ داخوازا ميكانيزمێ دكه‌ين”.

سكرتێرێ مەكتەبا سیاسی يا پارتى دياركر” بێ پارتى، حوكمه‌تا نوو يا عيراقي ناهێته‌ پێكئينان وكوردان پێگه‌هه‌كێ ب هێز ل عيراقێ يێ هه‌ى، ئه‌م وه‌كو كورد نه‌ته‌وێ دوێ نه‌ ل عيراقێ وهه‌ڤپشكين دڤى وه‌لاتى دا، وه‌كو پارتى ژى حزبا ئێكێ نه‌ ل كوردستانێ ويا چارێ نه‌ ل سه‌ر ئاستێ عيراقێ وبێ پارتى ژى حوكمه‌ت ناهێته‌ پێكئينان، ئه‌م دێ چين دا وێ حوكمه‌تێ پێكبينين”.

گۆت ژى” به‌رى هه‌لبژارتنان، پارتى ئێكه‌م لايه‌ن بوو دخوازت هه‌موو لايه‌نێن كوردى ب ئێك ليست پشكداريێ دهه‌لبژارتنان دا بكه‌ن وبه‌رى هه‌فتيه‌كێ ژى ژ هه‌لبژارتنان، سه‌رۆك بارزانى به‌ياننامه‌ك به‌لاڤكر، به‌لێ لايه‌نێن دى ب ليستێن سه‌ربخوه‌ پشكداربوون”.

فازل ميرانى خوياكر ژى” پێدڤيه‌ پۆستێ سه‌رۆك كۆمارا عيراقێ بۆ كوردان بيت، راسته‌ ئه‌و پۆسته‌ يێ پرۆتوكۆلى يه‌، به‌لێ سه‌رۆك كۆمار ره‌مزێ عيراقێ يه‌ وبۆ كوردان باشه‌ ئه‌و پۆست دده‌ستێ وان دابيت، هه‌روه‌سا سه‌رۆك وه‌زيران ناده‌نه‌ مه‌، سه‌رۆكێ جڤاتا نوونه‌ران ژى هه‌كه‌ فراكسيۆنه‌كا مه‌زن ل پشت نه‌بيت، وه‌كو سه‌رۆك كۆمار دێ يێ لاواز بيت، له‌وما باشتره‌ كورده‌ك ره‌مزێ عيراقێ بيت”.

ئه‌ڤرۆنيوز:

شاندێ بلندێ پارتى ديموكراتى كوردستان كو ئه‌ڤرۆ سێشه‌مبى 22/5/2018 گه‌هشتيه‌ به‌غدا، دێ ل گه‌ل موقته‌دا سه‌در رێبه‌رێ ره‌وتێ سه‌درى وهژماره‌كا سه‌ركردێن عيراقێ كۆمبيت.

شاندێ پارتى ب سه‌رۆكاتيا فازل ميرانى سكرتێرێ مه‌كته‌با سياسى وئه‌ندامه‌تيا خسرۆ گۆران، ئومێد سه‌باح، شوان محه‌مه‌د تاها وبه‌نگين رێكانى پێك دهێت.

برياره‌ شاندێ ناڤبرى كۆمبوونان بكه‌ت ل گه‌ل موقته‌دا سه‌در رێبه‌رێ ره‌وتێ سه‌در كو پشته‌ڤانيا ليستا سائيرون دكه‌ت ئه‌وا رێزا ئێكێ ل هه‌لبژارتنان بده‌ستڤه‌ئيناى ب 54 كورسيان وحه‌يده‌ر عه‌بادى سه‌رۆك وه‌زيرێن عيراقێ وسه‌رۆكێ ليستا نه‌سر كو 42 كورسى بده‌ستڤه‌ئيناين و نورى مالكى جێگرێ سه‌رۆك كۆمارى وسه‌رۆكێ ليستا ده‌وله‌تا قانوونێ كو 26 كورسى بده‌ستڤه‌ئيناين ئه‌ياد عه‌لاوى سه‌رۆكێ هه‌ڤپه‌يمانيا نيشتمانى  (21) كورسى ئوسامه‌ نوجێفى سه‌رۆكێ ليستا قه‌رار (11) كورسى وعه‌مار حه‌كيم سه‌رۆكێ ليستا حيكمه‌ (19) كورسى.

دوان كۆمبوونان دا، شاندێ پارتى دێ دانوستاندنان ل دۆر پێكئينانا حوكمه‌تا نوو يا عيراقێ وگره‌نتيكرنا مافێن دستوورى يێن گه‌لێ كوردستانێ كه‌ت.

ئه‌ڤرۆ نيوز:

کۆمپانیێن راپرسیێ ل تورکیا رادگەھینن کو دەنگێ کوردان دێ سەرکەڤتیێن ھەلبژارتنان دیار کەت ‏و پارت و ئالیێن سیاسی یێن تورک بووینە دو بەرە و پارتێن کورد ژی وەک ھەر جارێ دیسان پارچە ‏پارچەنە و نەشیان بەرەکی نوو بۆ ھەلبژارتنان دروست بکەن.‏

کۆمپانیا سۆنار یا راپرسیان ل ٢١ باژێرێن تورکیا و پێنج باژێرێن باکورێ کوردستانێ راپرسیەکا ‏بەرفرەە سازکریە و ژ سێ ھزار و پێنج سەد وەلاتیان پرسیارا ھەلبژارتنێن سەرۆک کۆماریێ و ‏پەرلەمانێ کریە و کۆمپانیا ناڤھاتی ل سەر ئەنجامێن راپرسیا خوە راگەھاند کو ل دووڤ ئەنجامێن ‏راپرسیا وان ھەڤپەیمانیا مللەت و ھەدەپە پرانیا کورسیێن پەرلەمانی ب دەست دئینن و ھەڤپەیمانیا ‏جمھور یا کو ئاکپارتی سەرکێشیا وێ دکەت ل پرانیا باژێران دەنگێ وێ کێم دبیت و ئەڤە ژی دھێتە ‏ڤێ واتەیێ کو ئەردۆگان و ئاکپارتی بەر ب یەکەم شکەستنێ ڤە دچن.‏

کۆمپانیا سۆنار ھەروەسا راگەھاند ژی کو دەنگێ ھەڤپەیمانیا جمھور نھا نێزیکی ٤٢% و دەنگێ ‏ھەڤپەیمانیا مللەت ژی ٤٣% و دەنگێ ھەدەپێ ژی نێزیکی ١٣% و ل دۆر سەرۆک کۆماریێ ژی دەنگێ ‏رەجەب تەیب ئەردۆگان ٤٢%، موحەرەم ئینجە ٢٢%، مەرال ئاکشەنەر ٢١% و سەلاحەدین دەمیرتاش ‏‏١٣% و ل دووڤ ڤان ئەنجامان سەرۆک کۆمار د گەرا یەکێ یا ھەلبژارتنێ دا ناھێتە ھەلبژارتن و دێ ‏رۆژا ھەشتێ تیرمەھێ د گەرا دویێ دا سەرۆک کۆمار بھێتە ھەلبژارتن.‏

ھەر د ڤێ مژارێ دا ل باژێرێن باکورێ کوردستانێ و باژێرێن مەزنێن تورکیا وەلاتیێن کورد ل ‏چاڤەرێ ڤێ یەکێ بوون کو پارت و ئالیێن سیاسی ھەڤپەیمانیەکێ دروست بکەن، لێ پارتێن کورد ‏پشتی گەنگەشێن نێزیکی ٢٠ رۆژان نەشیان بەرەیەکێ نانکۆ ھەڤپەیمانیەکێ دروست بکەن، ژ ئالیێ ‏خوە ڤە ھەدەپێ راگەھاند کو پارتێن کوردی داخوازا کورسیێن زێدە دکەن و ئەو ژی نەشێن زێدە ‏کورسیان بۆ وان تەرخان بکەن و پارتێن کوردی ژی راگەھاندن کو ناکۆکیا د ناڤبەرا وان و ھەدەپێ ‏دا نە ھژمارا کورسیانە و ھەدەپە داخوازێن نەتەوی یێن پارتێن کوردی نەکریە د ناڤا بەرنامێ خوە ‏یێ ھەلبژارتنان دا.‏

ل ئالیێ دی چەندین دەزگەھێن راگەھاندنێ ل تەرکیا ژی دیارکرن کو ڤێجارێ کەسێن وەکو لەیلا ‏زانا و دەنگیر میر محەمەد فرات ژ ھەدەپێ نابنە بەربژار چونکو ھەتا نھا ژی وان داخوازەکا وەسا ‏نەکرینە و دھێتە چاڤەرێکرن کو ڤێجارێ گەلەک کەسێن نوو ژ ھەدەپێ ببنە بەربژار و ھەڤڕکیێ ‏بۆ چوونا پەرلەمانێ تورکیا بکەن.‏

ل گۆر راپۆرتەکا رۆژنانا حوڕیەت یا تورکیا چەندین رۆژنامەڤان و نڤیسەرێن تورک یێن کو ب ‏سالانە دژبەریا ئەردۆگانی دکەن دێ ببنە بەربژارێ ھەدەپێ بۆ پەرلەمانێ تورکیا و ئەو یەک دێ ‏کارتێکرنەکا باش بۆ بدەستڤەئینانا دەنگێ ئالیێن چەپ و دژبەرێن ئەردۆگانی ھەبیت.‏

ئەڤرۆ نیوز ، زنار تۆڤی :

بریارە ئەڤرۆ سێشەمبی 22 گولانا 2018 شاندەکێ بلند یێ پارتی دیموکراتی کوردستان سەرەدانا بەغدا بکەت و ل گەل لایەنێن سەرکەفتی یێن عێراقی کۆم بیت.

ئەحمەد مایی بەرپرسێ راگەهاندنا مەکتەبا سیاسی یا پارتی دیمۆکراتی کوردستان راگەهاندیە:کو ئەڤرۆ شاندەکێ بلند یێ پارتی، ب سەرپەرشتیا فازل میرانی، سکرتێرێ مەکتەبا سیاسی یا پارتی ب سەرەدانەکا ئێک رۆژی دێ چیتە بەغدا و دێ ل گەل هەموو لیستێن سەرکەفتی یێن عێراقی یێن د هەلبژارتنێن پەرلەمانێ عێراقێ ل دۆر پێکئینانا حکومەتا نوو کۆم بیت.

هەروەسا گوت ژی ، شاندێ پارتی دێ رۆلێ گشتی یێ پشکداریا کوردان و ب تایبەتی یێ پارتی دیموکراتی کوردستان د پرۆسا سیاسی یا عێراقی ل گەل وان لایەنان گۆتوبێژ کەت.