ئه‌ڤرۆنيوز:
ئێڤاريا ئه‌ڤرۆ ئێكشه‌مبى 25/3/2018، هژماره‌كا خودان پشكێن پرۆژێ گه‌شتياريێ چاڤيلاند، ل به‌رده‌م ئيدارا چاڤيلاند خوه‌نيشادانه‌كا نه‌رازيبوونێ ئه‌نجامدا، پارێزه‌رێ خودان پشكێن پرۆژێ چاڤيلاند ژى رادگه‌هينيت كو شاسوار عه‌بدولواحدى پارێ 10 هزار خێزانان يێ خوارى وپێدڤيه بهێته ده‌سته‌سه‌ركرن.
دانا محه‌مه‌د، پارێزه‌رێ خودان پشكێن پرۆژێ چاڤيلاند دكۆنگره‌كێ رۆژنامه‌ڤانى دا راگه‌هاند” ده‌مێ چه‌ند هه‌يڤانه شاسوار عه‌بدولواحدى پشكێن چاڤيلاندێ يێن فرۆتينه كۆمپانيه‌كا وه‌همى، بێ كو ئه‌م بزانين ئه‌و كۆمپانيه كيه وپێگه‌هێ وێ ل كيرێ يه، دده‌مه‌كى دا ئه‌و ستافێ نوكه چاڤيلاند ب رێڤه دبه‌ت، هه‌مان ئه‌و ستافه يێ كو پێشتر شاسوارى دامه‌زراندين”.
هه‌روه‌سا گۆت” مه گۆمان يا هه‌ى شاسوار عه‌بدولواحد وه‌كو چاوان فێل وسه‌خته‌يى ل گه‌ل مه كريه، نوكه ژى دڤێت ب فێل وسه‌خته‌يى بێژيت وى كۆمپانيا وپشكێن خوه يێن فرۆتين بۆ وێ چه‌ندێ خوه ژ خودانێن پشكان ڤه‌دزيت”.
وى پارێزه‌رى زێده‌تر گۆت” ده‌مێ پێنج سالانه خودانێن پشكێن چاڤيلاند ب كوژمه‌كێ مه‌زن يێ پاره‌ى پشكێن خوه دوى پرۆژه‌ى دا يێن كرين، به‌لێ چو مفايه‌ك ژداهاتێ پرۆژه‌ى دا نه‌كريه، دده‌مه‌كى دا ئه‌و پرۆژه‌يه مفايه‌كێ مه‌زن يێ هه‌ى”.
ئاماژه دا ژى كو شاسوارى به‌رده‌وام فێل ل خودانێن پِكێن چاڤيلاند كرينه وده‌ستێ هزاران وه‌لاتيان يێ برى، هه‌روه‌سا ب پارێ وى خه‌لكى چه‌ند كه‌نالێن ئه‌سمانى وحزبه‌كا سياسى يا دروست كرين، له‌وما ئه‌م قه‌بوول ناكه‌ين ب چو شێوه‌كى پارێن مه بهێنه خوارن وبۆ پاشه‌رۆژێ ژى دێ مه هه‌لويستێ توند هه‌بيت.
پارێزه‌رێ خودانێن پشكێن چاڤيلاند به‌حسێ وێ چه‌ندێ كر كو ل گۆره‌ى هه‌موو قانوونان پێدڤيه شاسوار عه‌بدولواحد بهێته ده‌سته‌سه‌ركرن، چونكى ب بهانه‌يا مفاى پشكان خه‌لكه‌كێ زۆر يێ دسه‌ردابرى وپارێ گه‌له‌ك وه‌لاتيان يێ خوارى، له‌وما ئه‌م دخوه‌نيشادان ونه‌رازيبوونێن خوه دێ دبه‌رده‌وام بين هه‌تاكو شاسوار پارێن مه بده‌ت.
دچارچۆڤێ خوه‌نيشادانێ دا، خودانێن پشكێن چاڤيلاند راگه‌هاند كو شاسوارى ده‌مێ پێنج سالانه پارێ 10 هزار خودان پشكێن چاڤيلاند يێ خوارى وخوه ب كه‌سه‌كێ پاقژ دياردكه‌ت.
خودانێن پشكێن چاڤيلاند گۆت ژى” هه‌كه چو كه‌سه‌ك شاسوار عه‌بدولواحدى نه‌نياسيت، ئه‌م دنياسين ودزانين كا ئه‌و چه‌ند كه‌سه‌كێ فێلباز وپاره‌خۆره، شاسوار خوه ژ خودانێن پشكێن چاڤيلاند ڤه‌دزيت وهه‌كه راست دبێژيت بلا كۆر وسميناران بۆ خودانێن پشكێن چاڤيلاند يێ سته‌ملێكرى بكه‌ت، به‌لێ وى ترسه‌كا مه‌زن يا ژ مه هه‌ى، له‌وما نه‌شێت خوه نيشا مه بده‌ت”.
نه‌به‌ز عه‌لى، خودانێ پشكا پرۆژێ گه‌شتيارێ چاڤيلاند بۆ باسنيوز دبێژيت” ده‌مێ پێنج سالانه من كوژمێ هه‌شت مليۆن ديناران دايه پشكێن چاڤيلاند، به‌لێ من چو مفا ژداهات ومفايێ دراڤى يێ وى پرۆژه‌ى نه‌ديتيه ومه چه‌ندين جاران خوه‌نيشادانێن نه‌رازيبوونێ دژى شاسوارى يێن ئه‌نجامداين، چونكى ئه‌م وى ب خودانێ پرۆژه‌ى دزانين، به‌لێ هه‌تا نوكه يێ به‌رهه‌ڤ نينه مافێن مه بزڤرينيت، به‌لكو گوه ل داخوازيێن نێزيكى 10 هزار خودان پشكێن چاڤيلاند ناگريت”.
گۆت ژى” پاره‌كێ خه‌يالى يێ خه‌لكێ سڤيل يێ ل ده‌ف شاسوار عه‌بدولواحد، نوكه ژى ده‌مێ حزبه‌ك دروستكرى، ئه‌م گومانێ دبه‌ين كو ب پارێ مه ئه‌و حزبه دروست كربيت، بێگومان پێشتر ژى شاسوارى ب پارێ خه‌لكى كه‌ناله‌كێ ئه‌سمانى يێ مه‌زن ڤه‌كربوو، له‌وما نوكه ژى ئه‌م گومانا دكه‌ين كو پارێ مه خستبيته دخزمه‌تا حزبا خوه دا”.
ژئاليێ خوه‌ڤه، شێروان كه‌ريم خودان پشك ل چاڤيلاند گۆت” خوه‌نيشادان دژى شاسارى چو رۆله‌ك نينه، چونكى ئه‌م دزانين ده‌سته‌كێ مه‌زن يێ ل پشت وى، به‌لێ ئه‌م وى پشت راست دكه‌ين دێ فلس ب فلس پارێن خوه ژێ وه‌رگرين وئه‌م قه‌بوول ناكه‌ين مافێن مه بهێنه خوارن”.
نيشاندان
