ئه‌ڤرۆنيوز:
رێڤه‌به‌ريا هاتنوچونێ ل پارێزگه‌ها دهۆكێ ئامارێن روودانێن ترافيكى يێن هه‌رسێ رۆژێن جه‌ژنا نه‌ورۆزێ به‌لاڤكرن.
رێڤه‌به‌ريا ناڤبرى ل به‌رپه‌رێ خوه ل سه‌ر تۆرا فه‌يسبووكێ به‌لاڤكر كو دهه‌رسێ رۆژێن جه‌ژنا نه‌ورۆزێ دا 13 روودانێن ترافيكى يێن جۆراوجور يێن په‌دابووين وژئه‌نجامێ وان روودانان، كه‌سه‌كى ب تنێ گيانێ خوه ژ ده‌ستدايه وسێ كه‌س ژى ب گرانى برينداربووينه و37 كه‌س ژى ب سڤكى برينداربووينه.
ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزا ل هه‌رێما كوردستانێ ئه‌ڤرۆ شه‌مبيێ 24/3/2018پێشبينيێن سه‌قاى بۆ دو رۆژێن بهێت به‌لاڤكرن وتێدا ئاماژه ب وێ چه‌ندێ كر كو ئه‌ڤرۆ ل هه‌موو پارێزگه‌هێن هه‌رێما كوردستانێ ئه‌سمان دێ عه‌ور بيت ول ده‌ڤه‌رێن چيايى ل هه‌ولێرێ ودهۆكێ دێ باران باريت.
ل دۆر ره‌وشا سه‌قايێ ئه‌ڤرۆ، كه‌شناسيا هه‌رێمێ وه‌لاتيان ئاگه‌هدار دكه‌ت كو ئه‌ڤرۆ پشتى نيڤرۆ با دێ زێده‌تر بيت وبيته ئه‌گه‌رێ بلندبوونا رێژا تۆزێ ل هه‌رێمێ ومه‌ودايێ ديتنێ ژى دێ ژ 100 متران كێمتر بيت.
دياركر ژى كو سوباهى ئێكشه‌مبى 25/3/2018 ل هه‌موو پارێزگه‌هێن هه‌رێما كوردستانێ دێ ئه‌سمان عه‌ور بيت وباران دێ باريت.
ئه‌ڤرۆو نیوز ، نه‌وزاد هلۆرى:
ئه‌ڤرۆ ئێڤارى ترومبێله‌ك ب چوار كه‌س ڤه چوو د رووبارێ شین دا ل سنوورێ ناحیا شێلادزێ یا سه‌ر ب قه‌زا ئامێدیێ. عه‌بدوللا سلێمان ئێكه ژ وه‌لاتیێن ناحیا شێلادزێ بو ئه‌ڤرۆ نیوز گۆت: ( ئه‌ڤرۆ ئێڤارى ده‌ما كو ئه‌م ل سه‌یرانێن نه‌ورۆزێ ل ده‌ڤه‌را نێروه رێكان دزڤرین ل نێزیك گوندێ سیدان ترومبێله‌ك ب چوار كه‌س ڤه چو بوویه د رووبارى دا و هه‌ر چوار كه‌س ژى برینداربووینه كو برینا دوو ژ وان كه‌سان گرانه و هاتینه ره‌وانه‌كرن بو نه‌خوشخانێ)
زێده‌تر گۆت: ( ترومبێل ژ بن كونترولا شوفێرى ده‌ركه‌فت بوو ، و دخوازین كو وه‌لاتى و شوفێر هوشیارى خوه بن ژ به‌ركو قه‌ره‌بالغه و خه‌لكه‌كێ زور ده‌ردكه‌ڤیت ب مه‌ره‌ما سه‌یران و گه‌شتان)
ئه‌ڤرۆ نیۆز، ئه‌میر ئه‌ترووشی:
به‌شداربوویه‌كێ كۆنفرانسێ جنێف ل وه‌لاتێ سویسرا دیاردكه‌ت كو د ناڤا كۆنفرانسی دا راپۆرته‌كا ب تێر و ته‌سه‌ل ل دۆر عفرینێ و ره‌وشا ئێزدیان ژ ئالیێ رێكخراوا جیهانی (UN) هاته پێشكێشكرن و ئه‌ڤ كۆنفرانسه دێ هه‌تا 24/3 یێ به‌رده‌وام بیت.
ئازاد گۆله‌یی، گه‌نجه‌كێ پارێزگه‌ها دهۆكێ یه ل وه‌لاتێ سویسرا دژیت، بۆ ئه‌ڤرۆنیۆز دیار كر، ل هولا سه‌ره‌كی یا باره‌گایێ UN ل جنێف مه گوهێ خوه دا راپۆرتێن چه‌ندین وه‌لاتان لدور مافێ مرۆڤان، مینا ئه‌مریكا و فره‌نسا و بۆلگاریا و چه‌ندین وه‌لاتێن دی، پاشی مه پشكداری د كونفرانسه‌كێ تایبه‌ت ل دور مافێ زارۆكان ل ده‌مێ شه‌ران دا كر كو ژلایێ چه‌ند رێكخراوێن جڤاكێ سڤیل یێن ده‌ولی هاتبوو سازدان.
ئازاد گۆله‌یی ئه‌و یه‌ك ژی دیار كر كو ئه‌ڤ وه‌رزێ روونشتنێن مافێ مرۆڤان هه‌تا 23-3ی دێ به‌رده‌وام بن و دێ ل هه‌ردوو روژێن ماین ژی چه‌ندین چالاكی هه‌بن و د دوو روژێن بوری دا چه‌ندین پانێل ژلایێ رێكخراو و چالاكڤانێن كورد ڤه بۆ ئێزدیان و عفرینێ هاتنه ئه‌نجام دان.
ئاشكرا ژی كر، جهێ حێبه‌تیێ یه كو باشورێ كوردستانێ ئێك رێكخراو نینه دا كو چالاكڤانێن كورد برێكا وێ پشكداریێ د ڤان چالاكیان دا بكه‌ن و ئه‌و چوار كوردێن باشور كو ئێك ژ وان ئه‌زم پشكداریێ د ڤان روینشتنا دا دكه‌ین برێكا چه‌ند رێكخراوێن تامیلیانه به‌شداربووینه.
گۆله‌یی زێده‌تر دبێژیت: د ڤی كۆنفرانسی دا ژنشكه‌كێ ڤه مه چاڤ ب ستیڤان دیمستورای كه‌فت، ده‌مێ ئه‌ز ب جل وبه‌رگێن كوردی دیتیم ژ پێشمن ڤه رابوو ژ جهێ خوه و سلاڤی من كر و جه‌ژنا نه‌وروزێ لمن پیروز كر و گۆتی كو ئه‌وی زۆر حه‌ز ژ كارێ منێ كوردی كر.
ئه‌ڤرۆنيوز:
ئه‌ڤرۆ پێنج شه‌مبى 22/3/2018 ب بيانوويا هه‌بوونا چه‌كدارێن پارتيا كاركه‌رێن كوردستانێ (په‌كه‌كێ)، له‌شكرێ توركى ده‌ڤه‌رێن گه‌لى ره‌ش وكانيه ره‌شيان ل ده‌ڤه‌رێن سنورى ل سيده‌كان توپبارانكرن.
ئيحسان چه‌له‌بى، رێڤه‌به‌رێ ناحيا سيده‌كان راگه‌هاند” ل شه‌ڤا بۆرى تاكو سپێده‌يا ئه‌ڤرۆ، ب بيانوويا هه‌بوونا په‌كه‌كێ، له‌شكرێ توركى ب فرۆكێن شه‌رى، ده‌ڤه‌رێن گه‌لى ره‌ش وكانيه ره‌شيان ل ده‌ڤه‌رێن سنورى ل سيده‌كان توپبارانكرن، ديسا شه‌ر دناڤبه‌را له‌شكرێ توركى وپه‌كه‌كێ هه‌بوو”.
رێڤه‌به‌رێ ناحيا سيده‌كان زێده‌تر بۆ باسنيوز گۆت ژى” وێ توپبارانێ وشه‌رى ترس خستيه دناڤ وه‌لاتيێن وێ ده‌ڤه‌رێ دا وددلته‌نگن ژ ره‌وشا نوكه ل ده‌ڤه‌را وان هه‌ى”.
شه‌ڤا بۆرى، فرۆكێن توركى چه‌ند ده‌ڤه‌ر ل دولى باله‌يان ل سنورێ قه‌زا چۆمان توپبارانكرن ودئه‌نجامدا چار گه‌نج شه‌هيد بوون.
ئه‌ڤرۆ نیوز ، نه‌وزاد هلۆرى:
سپێده‌هیا ئه‌ڤرۆ ، رۆژا دوویێ یا جه‌ژنا نه‌ورۆزێ هژماره‌كا زور ژ وه‌لاتیێن سنوورێ باله‌كایه‌تى دچنه سه‌ر گوندێن خوه ب مه‌ره‌ما سه‌یرانان دناڤ سرۆشتى ، به‌لێ بونه ئارمانجا فروكێن توركیا و چوار ژ وان هاتنه شه‌هیدكرن.
ب گوره‌ى زانیاریێن ئه‌ڤرۆ نیوز ئه‌ڤرۆ فروكێن توركیا هه‌ر ئێك ژ گوندێن ماونان ، وه‌سان ، سه‌ركان ل سنوورێ قه‌زا چومان بوردومان كرینه كو باره‌گایێن چه‌كدارێن په‌كه‌كێ ل وان گوندان هه‌نه.
ئه‌ڤه د ده‌مه‌كێ دایه كو دوهى ژى فروكێن توركیا پرا دوكه‌را مازیێ ل ده‌ڤه‌را نێروه‌ورێكان بوردومانكر و ته‌قاند و رێیا زێده‌ترى 20 گوندان ژى هاتیه قه‌تاندن.
ئەڤرۆ نیوز:
د.نەجیب سەعید سپینداری، رێڤەبەرێ ساخلەمیا ئامێدیێ بو نۆش نیوز دیارکر ئەڤرۆ رۆژا ئێکێ یا نەوروزێ 443 نەخۆشان سەرەدانا تیمێن گەرۆک و نەخۆشخانە و بنگەهێن سەر ب ئامێدیێ دایە و ل دور گرنگترین روودانان گۆت: ژئەنجامێ شەرەکی ب چەڤویان دناڤبەرا پێنج کەسان دا ل دەڤەرا بامەرنتێ دو کەس ب سڤکی برینداربوون و گەهاندنە ئامێدیێ، دیسا زارویەکا هەشت سالی ژی ب روودانەکا ترۆمبێلێ بریندارببوو و هاتە چارەسەرکرن.
دیارکر ژی دو زارۆیێن کچ ژی دداران دا فریبوون و چارەسەریا پێدڤی بو هاتە کرن.
ئەڤرۆ نیوز:
د.عەبدوللا ئیبراهیم، رێڤەبەرێ نەخۆشخانا تەنگاڤییان ل دهۆکێ بو نۆش نیوز دیارکر ئەڤرۆ هژمارەکا کەسان ژئەگەرێ تووشبوونێ ب روودانان سەرەدانا نەخۆشخانێ کریە و گۆت: ژئەنجامێ هاڤێتنا گۆلەیان ب شێوێن عشوائی دو کەس برینداربووینە و بریندارەک ژی ژئەنجامێ شەرەدەڤەکی گولەیەک ڤێ کەفتیە و گەهاندیە نەخۆشخانێ.
دیارکر ژی کو پێنج کەس ژئەنجامێ هنگافتنا ترومبێلان برینداربووینە و دئەنجامێ چار لێکدانان ژی 16کەس گەهاندینە نەخۆشخانێ کو رەوشا ئێک ژوان یا باش نینە و گۆتژی: ل نەخۆشخانێ نوبەداری هەنە و نوژدار و کارمەندێن ساخلەمیێ ب شەڤ و رۆژ پێشوازیێ ل نەخۆشان دکەن.
ئەڤرۆ نیوز ، زنار تۆڤی :
رۆژنامه‌کا عه‌ره‌بی ئاشكرا كریە،کو زۆرینه‌یا هێز و لایه‌نه‌نێن سیاسی یێن كوردستانی دڤێت پشتی هه‌لبژارتنێن 12 گولانا ئه‌ڤ سالە یێن پەرلەمانێ عێراقێ،ل جهێ پۆستێ سه‌رۆک کۆماری، پۆستێ سه‌رۆكێ پەرلەمانی به‌ر ب كوردان بكەڤیت،نوکە كورد تێگه‌هشتینە کو پۆستێ سه‌رۆک کۆماری هیچ بۆ ده‌سته‌به‌ر ناكەت و د خولا داهاتی ژی دا دێ قانوون و بریارێن گرنگ و چاره‌نڤیسساز هه‌بن و هەموو دێ ب رێیا په‌رله‌مانی تێپه‌ر بن.
رۆژناما ئەلعەرەبی ئەلجەدید د راپۆرتەكێدا ب پشت به‌ستن ب كۆمەکا ژێدەران بەلاڤکریە و تێدا هاتیه، كورد بۆ پشتی هه‌لبژارتنان دێ ب سه‌ر دوو لایان دابه‌شبن، لایه‌نێ ئێکێ یێ بهێزە و دڤێت پۆستێ سه‌رۆكێ په‌رله‌مانی به‌ر ب كوردان بکەڤیت و لایه‌نێ دویێ كو گۆران و كۆمه‌لا ئیسلامی و هەڤپه‌یمانێن وێنە،وان دڤێت سه‌رۆک كۆمار بۆ كوردان بهێتەدان و به‌رهه‌م سالح وی پۆستی وەربگریت.
به‌رپرسەکێ بلند یێ پارتی دیموكراتی كوردستان بۆ وی رۆژنامێ راگه‌هاندیه،ل ڤێ دوماهیێ كۆمبوونه‌کا بەرفرەه ل پیرمام ب سه‌رۆكاتیا سه‌رۆك بارزانی دناڤبەرا حزب و لایه‌نان هاتیە ئه‌نجام دان،دوێ كۆمبوونێدا سه‌رۆك بارزانی دووپاتی ل هندێ كریە و حزبێن کوردی راسپاردینە كو داخوازا پۆستێ سه‌رۆك په‌رله‌مانی بكه‌ن، نه‌كو پۆستێ سه‌رۆک کۆماری و گوتیە،کو مه‌رجێ وه‌رگرتنا پۆستێ سه‌رۆكێ په‌رله‌مانی بكه‌نە بنه‌مایێ دانوستاندنێ ل گه‌ل لایه‌نێ سەرکەفتی د هەلبژارتنان دا.
ژێدەرەکێ ژ كوردستانێ گوتیە،گەلەک بریار و قانوونێن گرنگ و هه‌ستیار و گرێدایی ب هه‌رێما كوردستانێ ڤە د خولا بهێت یا په‌رله‌مانی دێ ده‌ر‌چن، لەورا كوردان دڤێت پۆستێ سه‌رۆكێ په‌رله‌مانی وه‌ربگرن، چونكی هیچ د پۆستێ سه‌رۆک كۆماری ب ده‌ست نه‌كه‌فتیه،سەرۆک کۆمار نەشیا رێگریێ ل سزایان بكەت و قانوونا بودجه‌ی هه‌موار بكەت و نەشیا رێکێ ل پێشرەویا سه‌ربازێن به‌غدا بۆ سه‌ر كه‌ركووكێ بكەت.
عه‌لی ناجی شارەزایەکە د وارێ كوردان دا ل عێراقێ بۆ وێ رۆژنامێ گوتیه، دوو بۆچوون د گۆره‌پانا سیاسیا هه‌رێما كوردستانێ دا هه‌نه و ئێک ژ وان یا ب هێزە و دڤێت پۆستێ سه‌رۆكێ په‌رله‌مانی بدەنە كوردان، یا دی ژی دڤێت پۆستێ سه‌رۆک كۆماری بدەنە کوردان و به‌رهه‌م سالح ببیتە سەرۆک کۆمار،ژێدەرەکێ نێزیك ل سه‌رۆك وه‌زیرێن عێراقێ گوتیە، ئه‌ڤ زانیاریە هەموو د راستن و گفتوگۆ ل سه‌ر ڤان پرسان دناڤ مالا كوردان دا هاتینە كرن، هەتا نوکە یا دیار نینه،کانێ دێ دوماهی بریار یا چاوا بیت؟،ئەرێ پشتی هه‌لبژارتنان دێ سوننی ده‌ستبه‌رداری وی پۆستی بن بۆ كوردان یان ژی دەستان ژێ نابەردەن،لێ هێشتا گەلەک دەم بۆ ڤێ پرسێ یێ مایی.
ئەڤرۆ نیوز:
د.عەبدوللا ئیبراهیم، رێڤەبەرێ نەخۆشخانا تەنگاڤیان ل دهۆکێ بو نۆش نیوز دیارکر ل سەنتەرێ باژێرێ دهۆکێ 18 روودان ل ئێڤاریا نەوروزێ پەیدابووینە و گۆت: حەفت ژوان تەقتەقوشک یێن ددەستان دا پەقین کو چار ژوان دەستێن وان د بێ سەرۆبەرن و پێدڤی ب نشتەرگەریانە و پێنج کەس ژی ب گۆلەیێن ئاگری برینداربووینە کو ئێک ژوان ب سەری کەتیە و نوکە دنشتەرگەریێ دایە، دیارکرژی کو شەش روودانێن ترومبێلا ژی گەهشتینە نەخۆشخانێ کو چار لێکدانن و دو ژی هنگافتن کو نوکە رەوشا وان باشە.
نيشاندان