ئه‌ڤرۆنيوز:
رێڤه‌به‌ريا گشتى يا حه‌ج وعومرێ ل هه‌رێما كوردستانێ ئه‌ڤرۆ سێشه‌مبى 13/2/2018 ئاگه‌هداريه‌ك ئاراسته‌ى وان وه‌لاتيێن ناڤێن بۆ حه‌جا ئه‌ڤ ساله 2018 هاتى دكه‌ت كو پێدڤيه هه‌ر ژنوكه ده‌ست ب مامه‌لێن ده‌ركرنا پاسه‌پۆرتێ بكه‌ن.
رێڤه‌به‌ريا ناڤبرى دياركر ژى” پێدڤيه ب كێمى ده‌مێ زێده‌تر ژ ساله‌كێ مابيت ژ ديرۆكا ب سه‌رڤه‌چوونا پاسه‌پۆرتێ، ل ده‌مێ وه‌رگرتنا ڤيزێ”.
ئه‌ڤرۆنيوز:
برياره فراكسيۆنێن كوردستانى ل جڤاتا نوونه‌رێن عيراقێ بۆ جارا دويێ ل گه‌ل حه‌يده‌ر عه‌بادى سه‌رۆك وه‌زيرێن عيراقێ كۆمبن، سه‌رۆكێ فراكسيۆنا پارتى ژى دبێژيت وه‌سا دياره عه‌بادى داخوازيێن كوردان بجه نائينيت.
عه‌ره‌فات كه‌ره‌م، سه‌رۆكێ فراكسيۆنا پارتى ديموكراتى كوردستان ل جڤاتا نوونه‌رێن عيراقێ گۆت” به‌رى دو رۆژان سه‌ليم جبوورى سه‌رۆكێ جڤاتا نوونه‌ران سه‌ره‌دانا فراكسيۆنێن كوردستانى كر ل دۆر داخوازيێن هه‌رێما كوردستانێ سه‌باره‌ت به‌هرا هه‌رێمێ ژبودجا گشتى يا عيراقێ بۆ سالا 2018″.
عه‌ره‌فاتى دداخۆيانيه‌كا رۆژنامه‌ڤانى دا گۆت ژى” سه‌لێم جبوورى سۆز دا فراكسيۆنێن كوردستانى كو دده‌مێ چه‌ند رۆژێن بهێت دا كۆمبوونه‌كێ دناڤبه‌را سه‌رۆكاتيا جڤاتا نوونه‌ران وسه‌رۆك وه‌زيرێن عيراقێ وسرۆكێن فراكسيۆنێن كوردستانى بۆ دووماهى جار ل دۆر پرسا به‌هرا هه‌رێما كوردستانێ ژ بودجا عيراقێ”.
سه‌رۆكێ فراكسيۆنا پارتى ئاماژه دا كو سه‌رۆكێ جڤاتا نوونه‌ران وهژماره‌كا فراكسيۆنێن دى يێن جڤاتا نوونه‌ران پشته‌ڤانيێ ل داخوازيا فراكسيۆنێن كوردستانى دكه‌ن وهه‌ر دوهى ژى سه‌رۆكێ جڤاتا نوونه‌ران ب شێوه‌كێ فه‌رمى بودجا 2018 هاته ره‌تكرن.
ئاشكراكر ژى” پێناچيت عه‌بادى داخوازيێن كوردان ل دۆر بودجا 2018 بجهبينيت، له‌وما ئه‌وژى وه‌كو كورد نه‌چارن فشارێ بێخنه سه‌ر سه‌رۆكاتيا جڤاتا نوونه‌ران وفراكسيۆنێن دى يێن جڤاتا نوونه‌ران ب مه‌ره‌ما وى چه‌ندێ كو بودجا 2018 ب وى شێوێ نوكه هاتيه ئاراسته‌كرن بۆ جڤاتا نوونه‌ران، نه‌هێته ده‌ربازكرن وپه‌سه‌ندكرن”.
ئه‌ڤرۆنيوز:
سه‌رۆكێ باژێرڤانيا ئه‌نقه‌ره، مسته‌فا تونا، راگه‌هاند كو وى ئيمزا ل سه‌ر پێشنيازا گوهۆرينا ناڤێ وێ جادا باليۆزخانا ئه‌مريكى لێ هه‌ى ل ئه‌نقه‌ره بۆ ناڤێ (تايێ زه‌يتوونێ).
پشكا عه‌ره‌بى يێ مالپه‌رێ يه‌نى شه‌فه‌ق يێ توركى، ئه‌ڤرۆ سێشه‌مبى 13/2/2018 به‌لاڤكر كو توناى وێنه‌كێ خوه ل سه‌ر به‌رپه‌رێ خوه يێ تويته‌رى به‌لاڤكر ده‌مێ ئيمزايێ ل سه‌ر وێ پێشنيازێ دكه‌ت وگۆتيه كو ئه‌ڤرۆ دێ وێ پێشنيازا گوهارتنا ناڤێ جادێ ئاراسته‌ى جڤاتا باژێرڤانيا ئه‌نقه‌ره كه‌ين”.
دهێته زانين كو (تايێ زه‌يتوونێ) ناڤێ وێ ئۆپه‌راسيۆنا له‌شكرى يه ئه‌وا توركيا دژى ( يه‌په‌كێ) ل عفرينێ ل باكوورێ سووريێ ئه‌نجامدده‌ت وتوركيا چه‌ندين جاران ره‌خنه ل ئه‌مريكا كريه كو پشته‌ڤانيێ ل چه‌كدارێن يه‌په‌كێ دكه‌ت.
ئه‌ڤرۆنيوز:
مالپه‌ره‌كێ عيراقى به‌لاڤكر، سه‌رۆك وه‌زيرێن عيراقێ حه‌يده‌ر عه‌بادى ل سه‌ر ڤه‌كرنا لقێ جڤاتا خزمه‌تا فيدرالى ل هه‌رێما كوردستانێ رازيبوويه.
ئاژانسا (عين العراق نيوز) ژزارده‌ڤێ ژێده‌ره‌كى ژ په‌رله‌مانێ كوردستانێ به‌لاڤكر” عه‌بادى ل سه‌ر وى بابه‌تى رازى بوو تاكو دامه‌زراندن ژده‌رچويێن زانكۆ وپه‌يمانگه‌هێن كوردستانێ بگريت”.
دياركر” مه‌زاختنا مووچێن فه‌رمانبه‌رێن هه‌رێما كوردستانێ وڤه‌گۆهاستنا ميلاكاتان بۆ به‌غدا، دێ رێ ل به‌رامبه‌ر ڤه‌كرنا لقێ جڤاتا خزمه‌تێ ل هه‌رێما كوردستانێ خوه‌ش كه‌ت”.
ئه‌ڤرۆنيوز:
سه‌رۆكێ حزبا ( ده‌عوه يا ئازاد) يا توركى، زه‌كه‌ريا يابيجى ئوگلۆ، دپه‌يڤه‌كێ دا ل دكۆنگرێ گشتى يا حزبا خوه ل ويلايه‌تا بورسا، گۆت” توركيا شه‌رێ چه‌كدارێن ( په‌يه‌دێ وپه‌كه‌كێ) ل عفرينێ ناكه‌ت، چونكى ئه‌و چه‌كدار سه‌ربازێن ئه‌مريكا نه”.
ئوگلۆى، ل دووڤ ئاژنسا ئه‌نادوول يا توركى، گۆت ژى” ئۆپه‌راسيۆنا تايێ زه‌يتوونێ هاته ئه‌نجامدان وه‌كو به‌رسڤه‌ك بۆ بزاڤێن ئه‌مريكا بۆ دامه‌زراندنا هێزه‌كا ئه‌منى يا سنورى كو ژ 30 هزار چه‌كدارێن هێزێن سوريا ديموكراتى پێك دهێت كو پتريا وێ هێزێ چه‌كدارێن (په‌يه‌دێ وپه‌كه‌كێ) نه”.
دياركر”حوكمه‌تا توركيا ل دۆر هاڤێتنا وێ پێنگاڤێ، هوشدارى دابوو ئه‌مريكا كو ره‌فتارا ئه‌مريكا ل گه‌ل (په‌يه‌دێ وپه‌كه‌كێ) ل گه‌ل پرنسيبێن هه‌ڤپه‌يمانيێ دناڤبه‌را توركيا وئه‌مريكا ناگه‌نجيت وهه‌ر ده‌مێ ئه‌و هێزا ئه‌منى يا سنورى بهێته دامه‌زراندن، دێ توركيا لێده‌ت”.
خوياكر ژى” ئه‌مريكا سه‌رپه‌رشتيا مه‌شقدانا (په‌يه‌دێ) يا كرى وچه‌ك ژى يێ دايێ وئاراسته‌ى ئارمانجى ژى كر ويا گرنگ نينه ناڤێ ل سه‌ر وان چه‌كداران هاتيه دانان وكێشه ژى ل ده‌ڤه‌رێ ب دووماهى ناهێن، هندى ئه‌مريكا يا به‌رده‌وام بيت ل سه‌ر پشته‌ڤانيا په‌يه‌دێ”.
ئه‌ڤرۆنيوز:
نێچيرڤان بارزانى، سه‌رۆك وه‌زيرێن هه‌رێما كوردستانێ، ئه‌ڤرۆ سێشه‌مبى 13/2/2018، ده‌ست ژكاركێشانا سێ وه‌زيرێن ب سه‌ر ئێكگرتوو ئيسلامى ژحوكمه‌تا هه‌رێما كوردستانێ په‌سه‌ندكر.
سه‌لاحه‌دين محه‌مه‌د به‌هائه‌دين ئه‌ميندارێ گشتيێ ئێكگرتووى ئيسلامى ل رۆژا 16/1/2018، خوه‌ڤه‌كێشانا ئێگرتوو ئيسلامى ژحوكمه‌تا هه‌رێما كوردستانێ راگه‌هاندبوو.
وه‌زيرێن ده‌ست ژكاركێشاى ژى كو دكۆمبوونه‌كا جڤاتا وه‌زيران نامێن ده‌ست ژكاركێشانا خوه به‌رچاڤ كربوون، هه‌ر ئێك ژ محه‌مه‌د قادر هاوديانى وه‌زيرێ كار وكاروبارێن جڤاكى ومه‌ولود باوه موراد وه‌زيرێ هه‌رێمێ بۆ كاروبارێن په‌رله‌مانى ووه‌زيرێ ڤه‌گۆهاستنێ وگه‌هاندنێ ب وه‌كاله‌ت وغازى سه‌عيد وه‌زيرێ هه‌رێمێ بۆ كاروبارێن كۆچ وكۆچبه‌ران.
ئه‌ڤرۆنيوز:
پشكا ژمێريارى ل رێڤه‌به‌ريا په‌روه‌ردا دهۆك يا رۆژهه‌لات ئاگه‌هداريا ريڤه‌به‌رێن وان قوتابخانان دكه‌ت يێن مامۆستايێن وانه‌بێژ لێ هه‌ين كو پارێ هه‌يڤه‌كێ يا مامۆستايێن وانه‌بێژ يێ هاتى.
دياركر ژى” داخوازێ ژ رێڤه‌به‌رێن وان قوتابخانان دكه‌ين يێن وانه‌بێژ لێ هه‌ين، سه‌ره‌دانا پشكا ژمێرياريێ ل په‌روه‌ردا دهۆك يا رۆژهه‌لات بكه‌ن بۆ وه‌رگرتنا پارێ مامۆستايێن وانه‌بێژ يێن هه‌يڤا 10 سالا 2017″.
ئه‌ڤرۆنيوز:
سه‌رۆك وه‌زيرێن عيراقێ حه‌يده‌ر عه‌بادى برياردا هه‌ردو فرۆكخانێن هه‌رێما كوردستانێ بۆ وه‌لاتيێن دچنه عومرێ بهێنه ڤه‌كرن.
ل دووڤ نڤيساره‌كا فه‌رمى يا نڤيسينگه‌ها سه‌رۆك وه‌زيرێن عيراقێ كو ل 1/2/2018 بۆ ده‌ستهه‌لاتا فرۆكه‌ڤانيا مه‌ده‌نى ل عيراقێ هاتيه ئاراسته‌كرن، تێدا هاتيه كو سه‌رۆك وه‌زيران يا رازيبووى ل سه‌ر هاتن وچوونا فرۆكێن وه‌لاتيێن دچنه عومرێ تێدا ل هه‌ردو فرۆكخانێن هه‌وليري وسلێمانيێ يێن نێڤده‌وله‌تى ومه ب هژمارا گه‌شتان ئاگه‌هداركه‌ن.
ئه‌ڤرۆنيوز:
رۆژنامه‌كا ئه‌مريكى، ئه‌ڤرۆ سێشه‌مبى 13/2/2018، به‌لاڤكر كو واشنتۆن ب چو شێوه‌كى پاره‌ى بۆ ئاڤه‌دانكرنا عيراقێ نا به‌خشيت، به‌لكو چاڤه‌رێ دكه‌ت وه‌لاتێن كه‌نداڤى هاريكاريا عيراقێ بكه‌ن.
داگيركرنا چه‌ندين ده‌ڤه‌ران ل عيراقێ ژلايێ داعشێ ڤه ل 2014 وپاشى شه‌رێ ده‌ركرنا وێ رێكخستيا تيرۆرستى ژ ده‌ڤه‌رێن دبن ده‌ستێ وێ ڤه، زيانه‌كا مه‌زن گه‌هانده ژێرخانا ئابوورى ل عيراقێ كو ب گوژمێ پتر ژ 45 مليار دۆلاران دهێته خه‌ملاندن.
رۆژناما (وول ستريت جورنال) يا ئه‌مريكى، د راپۆرته‌كا خوه دا ب ره‌خنه‌ڤه ئاماژه ب وێ چه‌ندێ دا كو ل عيراقێ، حه‌فت پارێزگه‌هێن باكوور ورۆژئاڤايێ وێ كه‌فتنه دبن هه‌وا كاڤركرنا داعشێ، به‌لێ حوكمه‌تا به‌غدا ژده‌ستپێكا ژناڤبرنا داعشێ وهه‌تا نوكه چو پێنگاڤه‌ك بۆ راستڤه‌كرنا ره‌وشا وان ده‌ڤه‌ران نه‌هاڤێتيه وهه‌تاكو دپرسا ڤه‌گه‌راندنا ئاواران ژى بۆ ده‌ڤه‌رێن وان يێن ره‌سه‌ن، شكه‌ستن يا ئيناى.
رۆژناما ناڤبرى به‌لاڤكر ژى كو دچارچۆڤێ كۆنگرێ ئاڤه‌دانكرنا عيراقێ دا ئه‌وێ ل كوێتێ دهێته ئه‌نجامدان، چاڤه‌رێ دهێته كرن راپۆرتا هه‌لسه‌نگاندنا زيانێن داعشێ بهێته به‌رچاڤكرن كو ژلايێ به‌نكا نێڤده‌وله‌تى وحه‌كمه‌تا عيراقێ ڤه هاتيه به‌رهه‌ڤكرن، بۆ وێ چه‌ندێ لايه‌نێن به‌خشينه‌ر ووه‌به‌رهێنه‌رژ نێزيك ڤه ئاگه‌هدارى ره‌وشێ ببن.
راپۆرتا هه‌لسه‌نگاندنێ ئاماژه دايه بۆ ئاڤه‌دانكرنا ده‌ڤه‌رێن وێرانكرى ل حه‌فت پارێزگه‌هێن عيراق، پێدڤى ب كۆژمێ 88مليار دۆلاران هه‌يه، به‌لێ هه‌ر ژ نوكه ئه‌مريكا يا راگه‌هاندى كو هاريكاريا عيراقێ ناكه‌ت، به‌لكو پشت به‌ستنێ ب به‌خشينێن وه‌لاتێن كه‌نداڤى دكه‌ت.
رۆژناما ئه‌مريكى پێشبنيێ دكه‌ت كو وه‌لاتێن كۆمبه‌خش ژى وى كۆژمێ مه‌زن يێ پاره‌ى نه‌ده‌ن، به‌لكو ئه‌و وه‌لات ئه‌ركێن خوه ب رێيا كۆمپانيێن كه‌رتێ تايبه‌ت ئه‌نجام بده‌ن، بۆ وێ چه‌ندێ كۆمپانيێن وان وه‌به‌رهێنانێ ل عيراقێ بكه‌ن، به‌لێ ژبه‌ر نه‌بوونا ئێمناهيێ ل ده‌ڤه‌رێن جودا ل عيراقێ، دبيت وه‌به‌رهێنان ژى ب رێژه‌كا وه‌سا نه‌هێته كرن.
ئه‌ڤرۆ نيوز:
مه‌كته‌با سياسى يا پارتى ديموكراتى كوردستان سه‌ره‌خۆشيێ ل بنه‌مالا خودێ ژێ رازى نه‌جمه‌دين يوسڤى دكه‌ت ئه‌ڤه ژى ده‌قێ وێ يه:
پرسەوسەرەخۆشی مەکتەبی سیاسی پارتی دیموکراتی کوردستان
بۆ کۆچی دوایی کەسایەتی تێکۆشەر و نیشتمان پەروەر (نەجمەدین یوسفی)
بەڕێزان خانەوادەی کەسایەتی نیشتمان پەروەر و ھەڤاڵی تێکۆشەر(نەجمەدین یوسفی)
بە داخ و پەژارەیەکی زۆرەوە ھەواڵی کۆچی دوایی کەسایەتی تێکۆشەر و ناودار و کادیر و سەرکردەی دڵسۆزی رێبازی پارتی و بارزانی (نەجمەدین یوسفی) مان پێگەیشت، بەو بۆنە خەمناکەوە پرسەو سەرەخۆشی خۆمان ئاراستەی بەڕێزتان و تێکرای کەس و کاری خوالێخۆشبوو و ھەڤاڵانی پارتیمان دەکەین، خۆمان بە ھاوبەشی خەمتان دەزانین و ئومێدەوارین خوای گەورە سەبروئارامی ودڵنەوایی بە ئێوەو ھەموو لایەک ببەخشێ.
نەجمەدین یوسفی لەساڵی 1957 لە شاری بەغدا پەیوەندی بە پارتیمانەوە دەکات و دواتر لە سەرەتاکانی ھەڵگریسانی شۆڕی مەزنی ئەیلول دەچێتە ناو ریزەکانی شۆڕش وەکو پێشمەرگە و کادیرێکی بوێر لە بەر لێھاتوویی دەکرێتە ئەندامی ناوچە و دواتر لەساڵی 1963 بەرپرسیاریەتی لیژنەی ناوچەی ئامێدی پێدەسپێردرێت و پاشانیش دەبێتە کارگێری لقی یەکی پارتیمان.
ھەڤاڵی خوالێخۆشبوو لە ساڵی 1979 وەکو ئەندامی کۆمیتەی ناوەندی پارتیمان دەستنیشان دەکرێت و بەرپرسیاریرتی لقی یەک وەردەگرێت. جیالەوە لە ساڵانی ھەشتاکان چەندین ئەرک و بەرپرسیاریەتی لە دەڤەرەکانی خرێنە و لۆلان و شنۆ و دۆڵی بالیسان و سنوری لقی دووی پارتیمان بەو پەڕی لێھاتووی و دڵسۆزییەوە رادەپەڕێنێت.
خوالێخۆشبوو کەسایەتیەکی خاوەن ھەڵوێست و وەفادار بوو بەرامبەر رێبازی بارزانی نەمرو کاروانی شۆڕش و خەباتی رزگاریخوازی گەلی کورد لەو پێناوەشدا لە خزمەت و تێکۆشان بەردەوامبوو، لە چەند ساڵی رابردووشدا خزمەتێکی بەرچاوی پێشکەش بە چەندین خانەوادەی سەربەرزی شەھیدان و پێشمەرگە بریندار و پەککەوتەکانی شەڕی رووبەڕوبوونەوەی تیرۆرستانی داعش کردووە. بەداخەوە لەدەستدانی زیانێکی گەورەبوو.
جارێکی دیکە سەرەخۆشی لە خۆمان و ئێوە و تەواوی بنەماڵەی ھەڤاڵی کۆچکردومان دەکەین و داواکارین لە خوای گەورە بەبەھەشتی بەرین شاد بکات..
اناللە وانا الیە راجعون
مەکتەبی سیاسی
پارتی دیموکراتی کوردستان
نيشاندان