وەزیرێ دارایی و ئابۆری ل هەرێما كوردستانێ ڕاگەهاند: ب داهاتێ ناڤخوەییێ هەرێما كوردستانێ نەشێین مووچەیێ مەهانە یێ فەرمانبەرێن هەرێمێ بدەین، چونكە پێشتر مەهانە 720 ملیار دینار ژ داهاتێ پەترۆلا هەرێما كوردستانێ دهات و نوكە ئەو پارە نینە.
ئاوات شێخ جەناب، وەزیرێ دارایی و ئابۆری ل هەرێما كوردستانێ» ب داهاتێ ناڤخوەیی نەشێین موچەی دابین بكەین، ل دەمێ خوە مەهانە 720 ملیار دینار ژ داهاتێ پەترۆلێ دهات كو دبوو 80% ژ پارێ مووچەی و ئەوا دما ژ داهاتێ ناڤخوە دهاتە دابینكرن، نوكە داهاتێ ناڤخوەیی ب گۆرەی قانوونا بودجەی پێدڤیە ب تنێ 50% وەربگرین و داهاتێ پەترۆلێ نەمایە، لەوما نوكە ل گەل ئیراقێ ل سەر هێلین بۆ وێ چەندێ ل سەر داهاتێ پەترۆلێ و نە پەترۆلێ و بابەتێن دی هەموویان ئێكلا بكەین».
قانوونا بودجەیا ئیراقێ بۆ سالێن 2023، 2024 و 2025 و قەبارەیێ وێ بۆ هەر سالەكێ 198 ترلیۆن و 910 ملیار و 343 ملیۆن و 590 هزار دینارن، ژ وی گۆژمەی 16 ترلیۆن و 609 ملیار و 639 ملیۆن و 162 هزار دینار پشكا هەرێما كوردستانێ یە.
ل هەفتیا بۆری شاندەكێ حوكمەتا هەرێما كوردستانێ ل بەغدا، پشتی كۆمبوونێ ل گەل شاندێ حوكمەتا ئیراقی، ل ڕۆژا پێنجشەمبی 20/7/2023، ئومێد سەباح، سەرۆكێ دیوانا جڤاتا وەزیرێن هەرێما كوردستانێ ب بەرهەڤبوونا هەموو ئەندامێن شاندێ هەرێمێ، كۆنگرەیەكێ ڕۆژنامەڤانی ڕێكخست و گوت» ل گەل ئالیێن فەرمی یێن حوكمەتا ئیراقێ د كۆمبوونان داینە ل دۆر بجهئینانا قانوونا بودجەیا گشتی یا ئیراقێ، تێدا مە دوپاتی ل سەر دو بابەتان كر، یێ ئێكێ: پاراستنا مافێن دستووری یێن هەرێما كوردستانێ، یێ دویێ: گرەنتیكرنا پشكا بودجەیا هەرێما كوردستانێ و هەموو شایستەیێن دارایی یێن هەرێمێ».

عەزیز هەورامی:

پارتی دیموكراتی كوردستان داخوازا ئەنجامدانا هەلبژارتنێن پەرلەمانێ كوردستانێ دكەت و سەرۆكێ هەرێما كوردستانێ ژی داخواز ژ كۆمسیۆنا بلند یا سەربخوە یا هەلبژارتنان ل ئیراقێ كریە كو هەلبژارتنێن پەرلەمانێ كوردستانێ بڕێڤەببەت، هەڤدەم بەرپرسەكێ حزبا زەحمەتكێشێن كوردستانێ دبێژیت: پشتەڤانیێ ل وی ئالی دكەین ئەوێ داخوازا ئەنجامدانا هەلبژارتنان دكەت.
گۆران جەلال، ئەندامێ مەكتەبا سیاسی یا حزبا زەحمەتكێشێن كوردستانێ بۆ رۆژنامەیا (ئەڤرۆ) گوت» ئەم وەكو حزبا زەحمەتكێشێن كوردستانێ ل گەل وێ چەندێ بووین هەلبژارتنێن پەرلەمانێ كوردستانێ ل دەمێ خوە بهێنە ئەنجامدان و ل گەل درێژكرنا ژیێ پەرلەمانی نەبووین، مە وەكو حزبێن چەپ یاداشتەك دابوو هەرسێ سەرۆكایەتیێن هەرێما كوردستانێ و مە داخوازكربوو هەلبژارتن نەهێنە گیروكرن، ئەوبوو پشتی درێژكرنا ژیێ پەرلەمانی دادگەها فیدرالی یا ئیراقی هەلوەشاندن و هەرێما كوردستانێ تووشی ڤالاهیا دستووری كر، وێ چەندێ ژی زیان بۆ پرۆسەیا سیاسی ل كوردستانێ هەبوو».
گۆران جەلال گوت ژی» حزبا زەحمەتكێشان و لژنەیا هەڤپشك یا هێزێن چەپێن كوردستانێ دووپاتكر كو هەلبژارتن نەهێنە پاشئێخستن و هەر هێز و ئالیەكێ سیاسی پێنگاڤان بۆ ئەنجامدانا هەلبژارتنان ب هاڤێژیت دێ پشتەڤانیێ لێكەین و داخوازێ ژ حزبێن دی یێن كوردستانی دكەین پشتەڤانیێ ل ئەنجامدانا هەلبژارتنان بكەن و ئێدی زێدەتر هەرێما كوردستانێ تووشی ڤالاهیا دستووری نەهێتە كرن».
خۆیاكر ژی» د داخۆیانیێن مەكتەبێن سیاسی وسەركردایەتیێن حزبان باس ل وێ چەندێ دكەین ل گەل ئەنجامدانا هەلبژارتنانە، بەلێ دەمێ هەلبژارتن نەهێنە كرن چەندین ئەگەران بۆ دئینن، هەلبژارتن مافەكێ تمام یێ وەلاتیانە و شەرعیەتێ ب دەستهەلاتێ ددەن و ئەنجامدانا هەلبژارتنان پێگەهێ حوكمڕانیێ ب هێز دكەت».

پارتێن کوردی یێن باکورێ کوردستانێ ل باژێرێ ئامەدێ د داخۆیانیەکێ دا دیار کرن، سەد سال ل سەر پەیمانا رەش یا لۆزانێ دەرباز دبن، د سەد سالێن بۆری دا هێزێن داگیرکەرێن کوردستانێ هەموو رێ بۆ ژناڤبرنا کوردان بکارئینان و نەشیان کوردان ژناڤ ببەن، نها دەم یێ هاتی یێن بووینە ئەگەرێ پارچەبوونا کوردستانێ داخوازا لێبۆرینێ ژ گەلێ کورد بکەن.

هژمارەک زێدە ژ پارتی و هێزێن سیاسی یێن باکورێ کوردستانێ ل باژێرێ ئامەدێ کۆمبوون و پشتی کۆمبوونێ ژی د پرێس کۆنفرانسەکێ دا هەلوەستێ خوە ل هەمبەر دەربازبوونا سەد سالان ل سەر پەیمانا لۆزانێ دیار کرن و راگەهاندن، گەلێ کورد چو دەمەکێ پەیمانا لۆزانێ ناس نەکریە و ناکەت، چونکی پەیمانا لۆزانێ بێی داخوازیا کوردان هاتە ئیمزا کرن و پەیمانا لۆزانێ بۆ ئەگەری پارچەکرنا کوردستانێ و کوردان ژی ل هەمبەر پەیمانا لۆزانێ ل هەر چار پارچان دەست ب خەبات و بەرخوەدانێ کرن و ب هزاران قارەمانێن کوردستانێ جانێ خوە فیدا کرن و ئەڤرۆکە ئێدی چو رامانا وێ پەیمانێ نەمایە.
د ڤێ دەربارێ دا بایرام بۆزیەل سەرۆکێ گشتی یێ پارتیا سوسیالیست یا کوردستانێ ژی راگەهاند، کوردان چو دەمەکێ پەیمانا لۆزانێ ناس نەکریە، خەبات و قوربانیدانا گەلێ مە ل هەر چار پارچێن کوردستانێ ل دژی پەیمانا لۆزانێ و ئەنجامێن وێ بوویە، ئەڤرۆکە یێن بووینە ئەگەرێ وێ پەیمانێ و پارچەکرنا کوردستانێ دڤێت نها ب فەرمی داخوازا لێبۆرینێ ژ گەلێ مە بکەن، هەروەسا دڤێت نەتەوەیێن ئێکگرتی و وەلاتێن ئێکەتیا ئۆرۆپا ژی هەست ب بەرپرسیاریا خوە یا دیرۆکی بکەن و پشتەڤانیێ ل مافێن رەوا یێن گەلێ کوردستانێ بکەن، چونکی ژ بەر وێ پەیمانێ سەد سالن زۆلم و زۆرداری ل گەلێ کورد دهێتە کرن و ئەڤرۆکە گەلێ کورد، گەلێ هەری مەزنە ل ڤێ جیهانێ کو خوەدانا دەولەتا خوە نینە، ئەو یەک ژی شەرمەکا مەزنە بۆ هەموو جیهانێ و یێن کو بەحسێ مافێن مرۆڤی دکەن.
پشکداربوویێن کۆنفرانسێ هەروەسا داخواز ژ هەموو هێزێن سیاسی یێن کوردستانێ ژی کرن، ئێدی پێکڤە دەست ب قۆناغەکا نوو بکەن، چونکی چو رامانا پەیمانا لۆزانێ نەمایە و پێدڤیا کوردان ب ئێکگرتنێ یا هەی، سەدسال ل سەر پەیمانا لۆزانێ دەرباز بووینە و نها چو رامانا وێ پەیمانێ نەمایە، کوردان پەیمانا لۆزانێ ناس نەکرینە و ناکەن ژی، ژ بەر هندێ نها پتر ژ هەر دەمەکێ دڤێت هەموو هێزێن سیاسی یێن کوردستانێ ل هەر چار پارچێن کوردستانێ پێکڤە دەست ب قۆناغەکا نوو بکەن، پێدڤیا هێزێن کوردستانێ ب ستراتیژیەکا هەڤپشک یا نەتەوی هەیە، چونکی سەد سالێن بۆری سەلماندن هەتا کورد ئێکگرتی و بهێز نەبن نەشێن بگەهنە مافێن خوە یێن رەوا.

هەولێر، قائید میرۆ

دوماهیا حەفتیا بۆری وەزیرێ هێزێن چەكدارێن فرەنسا سەرەدانا هەرێما كوردستانێ كرو هەژمارەكا دیداران ئەنجامدا، شرۆڤەكارەكێ سیاسی ژی دبێژیت، سەرەدانا وەزیرێ هێزێن چەكدارێن فرەنسا و دیدارا نافهاتی دگەل سەرۆك بارزانی بۆ دەڤەرێ یا گرنگ بوو هەروەسا ئاشكراكر، كوردان دیرۆكەكا درێژ دگەل فرەنسا هەیە و سەرۆك بارزانی ژی ڕۆل ل پەیوەندیێن د ناڤبەرا كورد و فرەنسا دا هەبوویە.
د. نەژدەت ئاكرەیی، شرۆڤەكارێ سیاسی بۆ ڕۆژنامەیا (ئەڤرۆ) گوت « سەرەدانا وەزیرێ هێزێن چەكدارێن فرەنسا بۆ هەرێما كوردستانێ وێ راستیێ خۆیا دكەت، كو هێشتا هەرێما كوردستانێ پێگەهەكێ تایبەت هەیە ل دەف فرەنسا و هەڤپەیمانێن نێڤدەولەتی، سەرەدانا وەزیرێ فرەنسی گرێدایی لڤینێن تیرۆرستێن داعشێ و هندەك لڤینانە كو ل دەڤەرێ پەیدابووینە، چونكە نوكە دەڤەرێ هندەك لڤین بخوەڤە دیتینە و دەڤەرەكا گەرمە، هەرێما كوردستانێ بەردەوام فاكتەرێ سەقامگیریێ بوویە بۆ دەڤەرێ و وەلاتێن دەوروبەر، فرەنسا ژی ئێكە ژوان ئەندامێن كاریگەرێن جڤاتا ئاسایشا نێڤدەولەتی و ئێكەتیا ئەورۆپا و یا ئاشكرایە فرەنسا سیاسەتەكا نەرم هەیە ل جیهانێ، سێباستیان لوكۆغنوا وەزیرێ هێزێن چەكدارێن فرەنسا ژی پۆستەكێ گرنگ هەیە و بەری نوكە ژی چەندین پۆستێن گرنگ هەبووینە ل فرەنسا، بیگومان نوكە هەرێما كوردستانێ دەڤەرەكا تەنایە و ڤێ سەقامگیریا هەرێمێ كارتێكرن ل سەر ڕەوشا ئیراقێ و دەڤەرێ ژی هەیە، ئەڤەژی بوویە ئەگەر وەلاتێن جیهانێ و یێن بهێز وەكو فرەنسا و بریتانیا و ئەلمانیا پێداچوونێ ب بادەكا دەڤەرێ بكەن و سەرەدانێن دهێنە ئەنجامدان بۆ هەرێما كوردستانێ، ب دیتنا سەرەدانا چەند ڕۆژێن بۆری یا وەزیرێ هێزێن چەكدارێن فرەنسا بۆ هەرێمێ گرنگیا خوە هەیە بتایبەتی كۆمبوونێن وی دگەل سەرۆك بارزانی و سەرۆكێ هەرێما كوردستانێ».
د. نەژدەت ئاكرەیی گۆت ژی» د سەرەدانا خوە دا بۆ هەرێما كوردستانێ، وەزیرێ هێزێن چەكدارێن فرەنسا دگەل سەرۆك بارزانی كۆمبوویە، ئەڤەژی بۆ وێ چەندێ ڤەدگەڕیت سەرۆك بارزانی وەك مەرجەع بۆ كوردستانێ چو پڕۆژە و بڕیار بێی وەرگرتنا بۆچوونا سەرۆك بارزانی سەرناگرن و ژبلی كو سەرۆك بارزانی مەرجەعە بۆ هەرێما كوردستانێ ژئالیەكێ دیڤە زێدەتری پێنجی سالان سەرۆك بارزانی ئەزموونا سیاسی هەیە ل دەڤەرێ، لەوڕاژی پرس كرن ب سەرۆك بارزانی و وەرگرتنا بۆچوونا سەرۆكی بۆ شارەزاییا سەرۆك بارزانی ڤەدگەڕیت د سیاسەتا جیهانێ و دەڤەرێ دا، كوردان دیرۆكەكا درێژ یا پەیوەندیان دگەل وەلاتێ فرەنسا هەیە و جهێ دەستێن سەرۆك بارزانی ژی یێ دیارە د پەیوەندیێن د ناڤبەرا كورد و فرەنسا دا».

پارێزگەرێ پێشتر یێ كەركووكێ ڕادگەهینیت، هەلوەشاندنا بڕیارێن جڤاتا سەركردایەتیا شۆڕەشێ یا سەردەمێ بەعس یا هەلوەشیای پێنگاڤەكا گرنگە بۆ بجهئینانا مادەیێ 140 و ڤەگەراندنا ئەردێن جۆتیاران بۆ خودانێن وان یێن ڕەسەن.
عەبدولرەحمان مستەفا، پارێزگەرێ پێشتر یێ كەركووكێ سەبارەت هەلوەشاندنا بڕیارێن جڤاتا سەركردایەتیا شۆڕەشێ یا سەردەمێ بەعس یا هەلوەشیای گوت» پێنگاڤەكا گرنگە ب تایبەتی سەبارەت ب مادەیێ 140 و كەركووك و كێشەیا جوتیارێن كورد ل دەڤەرێن كوردستانی یێن دەرڤەی ئیدارەیا هەرێما كوردستانێ».
گوت ژی»پێدڤی بوو پشتی سالا 2033 ئەو بڕیارە ل ئیراقا نوو هاتبانە هەلوەشاندن، ب تایبەتی ژ ئەگەرێ وان بڕیانهەموو ئیراق و وەلاتیێن ئیراقی تووشی نەهامەتیێ و مالوێرانیێ ببوون».
عەبدولرەحمان مستەفا زێدەتر گوت» ل دەمێ خوە كو ئەو بڕیارە دەرچووین، ب تمامی دژی بەرژەوەندیێن ئیراقێ و گەلێ وێ بوون، كو دو جۆر بوون هندەك ژوان هێزا قانوونی هەیە و پێدڤیە ژ ئالیێ جڤاتا نوونەران ڤە بهێنە هەلوەشاندن و هندەكێن دی ژ وان هێزا قانوونی نینە بۆ نموونە بڕیارێن تایبەت ب زەڤیێن جوتیارێن كورد، كو دەستهەلاتا جڤاتا وەزیرێن ئیراقێ یە ب هەلوەشینیت».
ناڤبری دوپاتكر كو پێدڤیە كورد بۆ هەر بابەتەكێ ژ وی جۆری ناڤمالا خوە ڕێكبێخن و هەموو فراكسیۆن و لیستێن كوردستانی دناڤ جڤاتا نوونەران دا د ئێكگرتی بن بۆ وێ چەندێ بشێن ل جڤاتا نوونەران كاریگەریێ دروست بكەن بۆ هەلوەشاندنا وان بڕیاران كو د ئەگەر دا زیان گەهشتینە كوردان، هەروەسا ب پێدڤی ژی زانی كورد ل جڤاتا نوونەرێن ئیراقێ فشارێ بێخنە سەر فراكسیۆنێن نەكوردی بۆ وێ چەندێ بشێن دەنگ ب هەلوەشاندنا وان بڕیارێن جڤاتا سەركردایەتیا شۆڕەشێ یا سەردەمێ بەعس یا هەلوەشیای بدەن.
پارێزگەرێ پێشتر یێ كەركووكێ ئاماژە ب وێ چەندێ كر كو بجئینانا بڕیارا هەلوەشاندنا بڕیارێن جڤاتا سەركردایەتیا شۆڕەشێ یا سەردەمێ بەعس یا هەلوەشیای، زەڤیێن دەست ب سەر داگرتی یێن كوردان دێ بۆ خودانێن وان هێنە زڤراندن كو د نوكە دا د دەستێ خەلكی دی دایە، كو ئەڤە ژی دێ ئێك بیت ژ پێنگاڤێن گرنگ یێن بجهئینانا مادەیێ 140 یێ دستووری یێ تایبەت ب كەركووكێ و دەڤەرێن كوردستانی یێن دەرڤەی ئیدارەیا هەرێما كوردستانێ.

وەزیرێ دارایی و ئابۆری ل حوكمەتا هەرێما كوردستانێ ڕاگەهاند: حوكمەتا هەرێمێ هەموو ئەو داخوازی بجهئیناینە یێن كو ژ ئالیێ بەغدا ژێ هاتینە كرن، بەلێ ژ نوكە و وێڤە دڤێت پرسیارا مووچەی ژ وەزارەتا دارایی یا ئیراقێ بهێتە كرن.
ئاوات شێخ جەناب، وەزیرێ دارایی و ئابۆری ل هەرێما كوردستانێ سەبارەت پرسا دانوستاندنان ل گەل بەغدا، گوت» هەموو ئەو داخوازیێن ل سەر حوكمەتا هەرێما كوردستانێ بوون، هەموو ب تمامی یێن هاتینە بجهئینان، بڕیارە كۆمبوونەكا دی ل گەل بەغدا بهێتە كرن و هیڤی دكەین ئەو كۆمبوون ب دلێ هەموو ئالیەكی بیت، هیچ بەهانەیەك نەمایە ل مە بگرن».
ئاوات شێخ جەناب گوت ژی» ئەو تشتێن ژ مە دهێنە داخوازكرن باوەرناكەم ل بەغدا هاتبنە بجهئینان، بەلێ هەرێما كوردستانێ گەلەك ب شەفافی هەموویان بجهـ دئینیت».
سەبارەت گیروبوونا مووچێن فەرمانبەرێن هەرێما كوردستانێ، وەزیرێ دارایی و ئابۆری ل هەرێما كوردستانێ دبێژیت» داهاتێ ناڤخوەیی تێرا مووچەی ناكەت، ژبەر كو چەند مەهەكن هنارتنا پەترۆلا هەرێما كوردستانێ هاتیە ڕاگرتن، پرسیاركرن سەبارەت مووچەی پێدڤیە ژ نوكە و وێڤە ئاراستەی وەزارەتا دارایی یا ئیراقێ بهێتە كرن».
بڕیاربوو دوهی ئێكشەمبی 23/7/2023 شاندەكێ حوكمەتا هەرێما كوردستانێ سەرەدانا بەغدا بكەت و ل گەل بەرپرسێن حوكمەتا ئیراقێ، ل دۆر بودجەی و مووچەی درێژیێ ب كۆمبوونێن خوە بدەن، بەلێ ئەو سەرەدان بۆ ئەڤرۆ دوشەمبی هاتە پاشئێخستن.
سەبارەت وێ چەندێ سیپان شێروانی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان گوت» سەرەدانا ڕۆژا ئێكشەمبی یا شاندێ هەرێما كوردستانێ بۆ بەغدا هاتە پاشئێخستن ودبیت ئەڤرۆ دوشەمبی یان سوباهی سێشەمبی ئەو سەرەدانا شاندێ هەرێما كوردستانێ بهێتە ئەنجامدان».
سیپان شێروانی دوپاتكر ژی» هەتا نوكە هیچ كێشەیەك ل بەردەم وێ سەرەدانا شاندێ هەرێما كوردستانێ بۆ بەغدا نینە و پاشئێخستنا وێ سەرەدانێ ژی بۆ وێ چەندێ دزڤریت كو هێشتا حوكمەتا ئیراقێ ڕێنمایێن بجهئینانا بودجەیا گشتی یا ئیراقێ دەرنەكربوون و ئەڤە ژی پێدڤی ب دەمێ زێدەتر بوو».
وی ئەندامێ جڤاتا نوونەرێن ئیراقێ ژ فراكسیۆنا پارتی ئەوژی ئاشكراكر» هەكە بەغدا پێگیری هنارتنا پشكا بودجەیا هەرێما كوردستانێ بیت، ئەگەر هەیە ل گەل بەلاڤكرنا مووچەیێ مەها حەفت ل ئیراقێ، ل هەرێما كوردستانێ ژی مووچەیێ مەهێن شەش و حەفت ل دووڤ ئێك بهێنە بەلاڤكرن».
جهێ ئاماژێ یە ل حەفتیا بۆری ژی شاندێ حوكمەتا هەرێما كوردستانێ ب سەرۆكایەتیا ئومێد سەباح، سەرۆكێ دیوانا جڤاتا وەزیرێن هەرێما كوردستانێ، بۆ هەمان مەبەست سەرەدانا بەغدا كربوو و ل گەل بەرپرسێن حوكمەتا ئیراقێ هەژمارەكا كۆمبوون و دیداران ئەنجام دابوو.
ئەڤە د دەمەكی دایە كو ل 12/6/2023 جڤاتا نوونەرێن ئیراقێ ب پتریا دەنگێن پەرلەمانتاران، پڕۆژەیێ قانوونا بودجەیا گشتی یا ئیراقێ پەسەندكربوو، ل ڕۆژا 21/6/2023، لەتیف ڕەشید، سەرۆك كۆمارێ ئیراقێ قانوونا بودجەیا گشتی یا ئیراقێ ئیمزا كربوو و پاشی ل ڕۆژنامەیا وەقائیعا ئیراقێ هاتبوو بەلاڤكرن، هەروەسا بڕیاربوو دوهێ ئێكشەمبی وەزارەتا دارایی یا ئیراقێ ڕێنمایێن بجهئینانا بودجەی بدەتە وەزارەتان.

دهۆك، لەزگین جوقی

بەرپرسێ‌ پشكا هەلبژارتنان ل لقێ‌ 14 یێ‌ پارتی ل نەینەوا ڕاگەهاند: كورد وئەرەب و هەموو پێكهاتەیێن ئایینێ‌ ونەتەوەیێ‌ دێ‌ د ناڤ لیستا پارتی‌ دا هێنە بەربژاركرن بۆ هەلبژارتنێن جڤاتا پارێزگەها نەینەوا و نوكە دەست ب بەرهەڤیان هاتیە كرن».
مەناف حەسەن، بەرپرسێ‌ پشكا هەلبژارتنان ل لقێ‌ 14 یێ‌ پارتی ل نەینەوا گوت» حوكمەتا ئیراقێ دگەل جڤاتا نوونەران و كۆمیسیۆنێ‌ كێشەیەك بۆ دەنگدانا ئاوارەیان پەیداكریە ئەوژی بڕیار هاتەدان ئاوارە نەمینن وهەموو كەمپ بهێنە دائێخستن بتنێ‌ خەلكێ‌ شنگالێ ماف هەیە ل كەمپان دەنگێن خوە بدەن وەكو دی ئاوارەیێن مووسل و بەغدا وسەلاحەدین و تكریت نەشێن ل كوردستانێ‌ دەنگێن خوە بدەن ئەڤە دێ‌ ل رۆژا دەنگدانێ‌ كێشەیان بۆ خەلكی دروست كەت «.
مەناف حەسەن پتر گوت» نوكە ئەم كاردكەین ئاوارە بشێن ل نێزیكترین بنگەهێ‌ دەنگدانێ‌ ل هەولێر و دهۆكێ‌ خوە تۆماربكەن و ل ڕۆژا دەنگدانێ‌ دەنگێ‌ خوە ل وی بنگەهێ‌ بدەن داكو دەنگێن ئاوارەیان نەهێنە سۆتن».
خۆیاكر ژی» پارتی چو هەڤپەیمانی ل گەل ئالیێن سیاسی ل نەینەوا دروست نەكرینە لێ‌ دەرگەهێن پارتی د ڤەكرینە وهیچ كێشەیەك نینە و ئەم د بەرهەڤین وەكو كورد پتر هەڤكاری ل نەینەوا د ناڤبەرا ئالیێن سیاسی یێن كوردستانی دا هەبیت ومە پێ‌ خوەشە كورد ب ئێك لیست بەشداربن و هەتا نوكە ئەم وەكو پارتی كارێ خوە ئەنجام ددەین وبەرهەڤیان بۆ هەلبژارتنان دكەین».
هەروەسا گوت» هەموو پێكهاتەیێن ئایینی‌ ونەتەوەیی دێ‌ د ناڤ لیستا پارتێ‌ دا هێنە بەربژاركرن بۆ هەلبژارتنێن جڤاتا پارێزگەها نەینەوا».
دیاكر ژی» ل پارێزگەها نەینەوا دو ملیۆن و 707 هزار و501 كەسان مافێ‌ دەنگدانێ هەیە كو دێ‌ 753 بنگەهیێن دەنگدانێ‌ هێنە ڤەكرن كو دبنە شەش هزار و 48 ویستگەهێن دەنگدانێ‌ و ملیۆنەك و 740 هزار و381 كەسان خوە ب بایۆمەتری تۆماكرینە وهەتا نوكە ملیۆنەك و 610 هزار و 987 كارتێن بایۆمەتری یێن ل سەر دەنگدەران هاتینە بەلاڤكرن وئەم ل گەل كۆمسیۆنێ‌ بزاڤێ دكەین رێژەیەكا باش یا خەلكی بشكداریێ‌ د هەلبژارتنان دا بكەن».

سەرۆك مەسعود بارزانی ل سەلاحەدین پێشوازی ل سێباستیان لوكۆرنوی وەزیرێن هێزێن چەكدارێن فرەنسا و شاندەكێ دگەلدا كر.
د دیدارەكێ دا ڕەوشا سیاسی یا جیهانی و دەڤەرێ و ئیراقێ هاتە باسكرن و سەرەرای ئاماژەدان ب دۆستایەتیا دیرۆكی دناڤبەرا گەلێ كوردستانێ و گەلێ فرەنسا، دوپاتی ل پێشڤەبرنا دۆستایەتی و پەیوەندی و هەماهەنگیا د ناڤبەرا هەردو ئالیان دا هەی هاتیە كرن.
هەر د وێ دیدارێ دا باس ل گەفێن داعشێ و هزرا توندرەوی ل سەر ئیراقێ و دەڤەرێ هاتە كرن.

سەرۆكێ هەرێما كوردستانێ، نێچیرڤان بارزانی ل گەل سێباستیان لوكۆرنوی، وەزیرێ هێزێن چەكدارێن فرەنسا کۆمبووو پشتی كۆمبوونێ كۆنفرانسەكێ ڕۆژنامەڤانی یێ هەڤپشك هاتە سازكرن و تێدا سەرۆكێ هەرێما كوردستانێ دیاركر» مە كۆمبوونەكا باش ئەنجامدا و تێدا مە مە باس ل شەڕێ داعشێ و بەرهنگاریا تیرۆرێ و توندرەویێ كر، هەروەسا ئەم هەردو ئالی د هەڤڕا بووین كو هێشتا داعش مەترسیەكا ڕاستەقینەیە ل سەر ئاسایش و سەقامگیریا ئیراقێ و دەڤەرێ». هەروەسا گوت ژی» مە سوپاسیا فرەنسا كر بۆ پشتەڤانی و دۆستایەتیا وێ یا بەردەوام ل گەل گەلێ كوردستانێ و گەلێ كوردستانێ ژی چو جاران پشتەڤانیا فرەنسا د قۆناغێن جودا دا ژبیر ناكەت».