ئەڤرۆ نیوز ، زنار تۆڤی :

لدووڤ راپرسیەكێ کو دامەزراوەیا گالوپ ئەنجامدایە، تێدا دەرکەفتیە کو دەربارەی هەبوونا هەست و سۆزا رەشبینیێ ل سەر ئاستێ جیهانێدا عێراق ب پلا ئێکێ دهێت.

د راپرسیەكا دامەزراوەیا گالوپ Gallup كو ل سەر ئاستێ جیهانێ هاتیە ئەنجامدان، پیڤەرێ هەستا رەشبینیێ و گەشبینیێ لدەف خەلکێ وەلاتان هاتیە دیار كرن،کو د وێ راپرسیێ دا 149 هزار كەسان ژ 142 وەلاتێن جیهانێ پشکداری تێدا كریە.

د وان ئەنجاماندا دەركەفتیە كو وەلاتیێن عێراقێ ژ رووێ هەبوونا هەست و سۆزێن نەرێنی و رەشبینیێ ڤە ل پلا ئێکێ دهێن،دویەم وەلات ژی سوودان و ئیران ل پلا سێیێ دهێت،پشتی وان لیبیریا و ئەفریقیا ناڤەراست ل پلێن چارێ و پێنجێ دهێن.

هەروەسا ژ روویێ گەشبینیێ و هەبوونا هەست و سۆزێن ئەرێنی، پاراگوای ل پلا ئێکێ دهێت و كۆستاریكا ل پلا دویێ و پەنەما ل پلا سێیێ و فیلیپین ل پلا چارێ و ئۆزبەكستان ل پلا پێنجێ دهێت.

ئه‌ڤرۆنيوز:

حوكمه‌تا ئه‌مريكى ليسته‌كێ به‌لاڤ دكه‌ت وتێدا عيراقێ ب ده‌وله‌ته‌كا ژناڤچووى دهه‌ژمێريت.

ل دووڤ ده‌نگوباسه‌كێ ئاژانسا(فرانس پرێس)، ئه‌مريكا هنده‌ك وه‌لاتێن جيهانێ خستينه‌ دچار ئاستان دا، كو ب گۆره‌ى وان ئاستان، داخواز ژ هاولاتيێن خوه‌ دكه‌ت خوه‌ ژگه‌شتكرنێ  بۆ وان وه‌لاتان بپارێزن.

دئاستێ چارێ يێ وێ ئاگه‌هداركرنێ دا، ئه‌مريكا داخواز ژهاولاتيێن خوه‌ دكه‌ت گه‌شتكرنێ بۆ وه‌لاتێن عيراق،ئيران، ئه‌فغانستان، ئه‌فريقيا ناڤه‌راست، ليبيا، مالى، سۆمال، باشوورێ سوودانێ، سووريێ ويه‌مه‌نێ نه‌كه‌ن.

ئه‌گه‌رێ وێ داخوازيێ ژى، هه‌روه‌كو حوكمه‌تا ئه‌مريكى راگه‌هاندى ئه‌وه‌ كو ئه‌و وه‌لاتانه‌ ده‌ڤه‌رێن شه‌رى نه‌ ل جيهانێ وده‌وله‌تێن ژناڤچووينه‌.

ئه‌و هوشداريا ئه‌مريكا بۆ هاولاتيێن خوه‌ يا هه‌ڤده‌مه‌ ل گه‌ل گه‌فێن به‌رده‌وام يێن ميليشيێن حه‌شدا شه‌عبى ل هاولاتى وسه‌ربازێن ئه‌مريكى، چه‌ندين جاران ژى وێنێ ئالايێ ئه‌مريكا ل جادێن عيراقێ هاتينه‌ نه‌خشاندن وب به‌رهه‌ڤبوونا به‌رپرسێن حوكمه‌تا به‌غدا وميليشيێن حه‌شدا شه‌عبى، رێ وره‌سم بۆ سڤكاتيكرنێ ب ئه‌مريكا وئيسرائيلێ ژى يێن هاتينه‌ ئه‌نجامدان.

ئه‌ڤرۆنيوز:

وه‌زيرێ ده‌رڤه‌ يێ عيراقێ، ئيبراهيم جه‌عفه‌رى، راگه‌هاند عيراق گرنگيێ دده‌ته‌ ڤه‌كرنا ده‌رگه‌هێ وه‌به‌رهێنانێ وده‌مێ وه‌لاتێن ده‌وروبه‌ر ده‌ست ب وه‌به‌رهێنانێ ل عيراقێ دكه‌ن، دێ پشكا توركيا يا پتر بيت.

ئيبراهيم جه‌عفه‌رى دچارچۆڤێ كۆمبوونه‌كێ دا ل گه‌ل مه‌ولۆد جاوش ئوگلۆ وه‌زيرێ ده‌رڤه‌ يێ توركى گۆت ژى” يا گرنگه بۆ هه‌ردو وه‌لاتان‌ ده‌رگه‌هه‌كێ دى يێ سنورى دناڤبه‌را وان دا بهێته‌ ڤه‌كرن، ژبه‌ركو دێ بيته‌ پالده‌ره‌ك بۆ پتر ب هێزكرنا په‌يوه‌نديان”.

ريڤه‌به‌رێ گشتيێ وه‌زيرێ پلاندانانێ ل عيراقێ، قوسه‌ى عه‌بدولفه‌تاح، دكۆنگرێ ئاڤادانكرنا عيراقێ ل كوێتێ راگه‌هاندبوو كو عيراق پێدڤى ب كۆژمێ 22 مليار دۆلارايه‌ ب شێوه‌كێ ب له‌ز و 66 مليار دۆلاران دقۆناغێن بهێت دا ژبۆ ئاڤه‌دانكرنا ده‌ڤه‌رێن رزگارى ژ ده‌ستێ داعشێ.

ژلايێ خوه‌ڤه‌ توركيا بريار دابوو كوژمێ پێنج مليار دۆلاران پێشكێش بكه‌ت وه‌كو قه‌ر وده‌ليڤێن وه‌به‌رهێنانێ ل عيراقێ وب ڤێ چه‌ندێ توركيا بوويه‌ وه‌لاتێ ئێكێ يێ پتر پاره‌ بۆ ئاڤه‌دانكرنا عيراقێ ته‌رخانكرى وكۆنگرێ ئاڤه‌دانكرنا عيراقێ دا ل كوێتێ.

ئەڤرۆ نیوز ، زنار تۆڤی :

بریاره‌ وه‌زاره‌تا بەرەڤانیا عێراقێ 13 فرۆكێن دیتر یێن شەری ژ جۆرێ F16 یێن ئه‌مریكى وەربگریت،کو لدووڤ گرێبه‌ستەکا تایبه‌ت عێراقێ ئەو فرۆکە کرینە و ب ڤێ چەندێ عێراق دێ بیته‌ خودانا 35 فرۆکێن شەری ژ ڤی جۆری‌.

ئه‌ڤرۆ سێشه‌مبی‌ 20 شواتا 2018 جه‌نه‌رال ئه‌ندرۆ كرۆفت جێگرێ فه‌رماندێ هێزێن هەڤپه‌یمانێن نێڤده‌وله‌تى ل دژی‌ داعشێ راگه‌هاندیە کو عێراق دێ 13 فرۆكێن دیتر یێن شەری ژ جۆرێ F16 د ئەڤ سالەدا وه‌رگریت.
ئه‌ندرۆ كرۆفت گوتیە ژی هەڤپه‌یمانیا نێڤده‌وله‌تى كار ل ‌سه‌ر ب هێزكرنا هێزێن ئەسمانى یێن عێراقێ دکەت،داکو بشێن ژ نوکە وێڤە ئەو ب خوە فێری مه‌شق و راهێنانان و فێری ب كارئینانا فرۆکێن F16 ببن.

هەروەسا دیارکریە د نوکە دا پشکەک ژ فرۆكڤانێن عێراقی ل بنگەهێ سه‌ربازى ل به‌له‌د ل‌ پارێزگەها سه‌لاحه‌دین دهێنە مه‌شقدان و وانه‌یان ژی ل سەر ئەندازەیا فرۆکەڤانیێ دخوینن.

ئەڤرۆ نیوز ، زنار تۆڤی:

بۆ خولا چارێ یا پەرلەمانی عێراقێ، نێزیكی حەفت هزار كەسان ژ 88 حزب و هەڤپەیمانان خوە كاندید كرینە بۆ ب دەستڤەئینانا 329 كورسیێن پەرلەمانی،کو بریارە ل 12 ئەیارا داهاتیدا بهێنە ئەنجامدان.

لدووڤ زانیاریان كۆمسیۆنا بلند یا سەربەخۆیا هەلبژارتنان،ب تنێ ل باژێرێ بەغدا هزار و 985 كەسان خوە كاندید كریە ل سەر لیستا 40 حزب و هەڤپەیمانیان بۆ ب دەستڤەئینانا 71 كورسیان،کو كورسیەکێ كۆتا بۆ مەسیحیان و كورسیەکێ كۆتا بۆ سابیئەیانە.

دەربارەی پارێزگەها بەسرە 522 كەسان ژ 28 حزب و هەڤپەیمانیان خوە كاندید كرینە بۆ  ب دەستڤەئینان 25 كورسیان،ل مووسلێ ژی 907 كەسان خوە كاندید كرینە لژ 44 حزب و هەڤپەیمانیان بۆ ب دەستڤەئینانا 34 كورسیان كو كورسیەكێ كۆتا بۆ مەسیحیانە و ئێک بۆ ئێزیدیان و ئێک ژی بۆ شەبەكانە.
ل كەركووكێ ژی هژمارا كورسیان 13 نە، 291 كەسان ل سەر 31 حزب و هەڤپەیمان خوە كاندید كریە،کو کورسیەکێ كۆتا بۆ مەسیحیانە،دەربارەی هەولێرێ ژی كو هژمارا كورسیان 16 كورسینە، 173 كەسان ژ 27 حزب و هەڤپەیمانیان خوە كاندید كرینە،كو كورسیەکێ كۆتا بۆ مەسیحیانە.
ل سلێمانیێ ژی هژمارا كورسیان 18 کورسینە، 211 كەسان ژ 26 حزب و هەڤپەیمانیان خوە كاندید كریە،ل پارێزگەها دهۆكێ ژی کو هژمارا كورسیان 12 نە و كورسییەكێ كۆتا بۆ مەسیحیانە، 115 كەسان ژ 24 حزب و هەپەیمانیان خوە كاندید كرینە.
هەروەسا ل دووڤ زانیاریێن كۆمسیۆنێ ل پارێزگەها دیالا كو هژمارا كورسیان 14 كورسینە، 259 كەسان ژ 36 حزب و هەڤپەیمانیان خوە كاندید كرینەە، بۆ پارێزگەها سەلاحەدین ژی كو هژمارا كورسیان 12 كورسینە، ژ 33 حزب و هەڤپەیمانیان 332 كەسان خوە كاندید كرینە و ململانێ دكەن،دەربارەی پارێزگەها ئەنبار، ل 32 حزب و هەڤپەیمانیان 383 كەسان خوە كاندید كرینە و ململانێ ب دەستڤەئینانا 15 كورسیان ل سەر پشكا ڤێ پارێزگەهێ دكەن.
لدووڤ زانیاریان كاندیدێن پارێزگەها بابل گەهشتینە 338 كەسان ژ 26 حزب و هەڤپەیمانیان بۆ ب دەستڤەئینانا 17 كورسیان،ل پارێزگەها كەربەلایە، هژمارا كاندیدان گەهشتیە 197 كەسان ژ 25 حزب و هەڤەیمانیان، كێبرکێ ل سەر ب دەستڤەئینانا 11 كورسیان دکەن.
ل پارێزگەها نەجەف،کو هژمارا كورسیان 12 نە، 244 كەسان ژ 29 حز و هەڤپەیمانان خوە كاندید كرینە، ل میسان ژی هژمارا كورسیان 10 کورسینە و 21 حزب و هەڤپەیمانیان ژ 105 كەسان خوە كاندید كرینە،ل پارێزگەها دیوانیە 191 كەسان ژ 25 حزب و هەڤپەیمانیان خوە كاندید كرینە بۆ ب دەستڤەئینانا 11 كورسیان،ل پارێزگەها واست ژی 33 حزب و هەڤپەیمانیان 180 كاندید هەنە بۆ ب دەستڤەئینانا 12 كورسیان،کو ئێک بۆ كوردێن فەیلیە.
ژێدەرێن كۆمسیۆنێ ئەو ژی دیارکریە،ل پارێزگەها زیقار كو هژمارا كورسییان 19 کورسینە،ژ 24 حزب و هەڤپەیمانیان 279 كەسان خوە كاندید كرینە، هەڤدەم ل پارێزگەها موسەنا ژی کو هژمارا كورسیان حەفتە، 22 حزب و هەڤپەیمانیان 102 كەسان خوە کاندید کرینە.