ئەڤرۆ نیوز، نەوزاد ھلۆری:
دوسیا ڤەکێشان و مانەڤا ھێزێن تورکی ل عیراقێ ب شێوەیەکێ دیارکری ل باشیکێ دووبارە بوویە بابەتێ رۆژەڤێ و رەنگە کارتێکرنێ ل پەیوەندیێن تورکیا و عیراقێ بکەت، تورکیا دووپات ل وێ یەکێ دکەت ھەتا کو ھێزێن پەکەکێ ل ھنده‌ك دەڤەرێن عیراقێ ھەبن ھێزێن وان ژ باشیکێ ناھێنە ڤەکێشان.

بەرپرسەکێ عیراقی بۆ (العربی الجدید) دیارکر کو ھێزێن تورکیا ل باشیکێ چو پلانێن ڤەکێشانێ نینن و د رژدن کو ل باشیکێ بمینن، ئەو ئەگەرا ڤێ یەکێ ژی دزڤرینن بۆ ھەبوونا پەکەکێ ل باکوور و باکوورێ رۆژئاڤایێ مووسل ب به‌ھانەیا وێ یەکێ کو ل تورکیا نێزیکە. دھێتە چاڤەرێکرن ل بارا ئەڤی بابەتی وەزیرێ دەرڤەیێ تورکیا سەرەدانا بەغدا بکەت و ل گەل کاربدەستێن عیراقێ کوم ببیت و چەند بابەتێن گرنگ بەحس بکەت ژ وان دوسیا نەھاتنا چو ھێزێن چەکدار و گەرنتیکرنا ھاتنا وان ھێزان ژ عیراقێ بۆ ناڤخوەیا تورکیا.

تورکیا بەرامبەر ڤەکێشانا ھێزێن خوە ب تایبەتی ل باشیکێ، چەند مەرجەک دیارکرینە ژ وانان دەرکرنا ھێزێن پەکەکێ ل ھەموو عیراقێ ژبەرکو پەکەکە ل عیراقێ بەردەوام خوە رێکدئێخن و جار جار ل عیراقێ دھێنە ناڤا تورکیا و کریارێن توندوتیژی ئەنجام ددەن ، و تورکیا ب پێدڤی دزانین کو ھێزێن خوە زێدەتر ل باشیکێ بھێلیت داکو زێدەتر ئەمن و ئاسایشێ ب تورکیا بدەت و رێگریێ ل ھاتنا پەکەکێ بکەت بو ناڤا تورکیا.

وەزیرەکێ حوکمەتا عیراقێ راگەیاند کو ھێزێن شیعە و سەرکردەیێن میلشیاتان گڤاشتەکا زۆر ل سەر ھێزێن تورکیا کریە کو خوە ژ باشیکێ ڤەکێشن و پێدڤی ب ئەوان نینە، ئەڤ یەک رەنگە ببیتە خالەکا دى یا دەستپێکرنا کێشان د ناڤبەرا تورکیا و عیراقێ دا.

ئەڤە د دەمەکێ دایە کو عیراق ناخوازیت پەیوەندیێن خوە ل گەل تورکیا ئالوز بکەت ئەو ژی ژ بەر ھەبوونا دوسیا ھەرێما کوردستانێ و پرسا ھێزێن کوردان ل سوریا و کودەنگیا وەلاتێن جیھانێ ب ئارمانجا چارەسەرکرنا کێشەیێن د ناڤبەرا ھەرێم و عیراقێ.

ئه‌ڤرۆنيوز:

ئه‌مريكا پشته‌ڤانيا خوه‌ بۆ ئه‌نجامدانا هه‌لبژارتنين عيراقێ دژڤانێ خوه‌دا ل 12 گۆلانا 2018 دياركر وهوشدارى دا كو پاشخستنا وێ پرۆسێ پێشهاته‌كا مه‌ترسيداره‌.

باليۆزخانا ئه‌مريكا ل عيراقێ دبه‌ياننامه‌كێ دا كو ل به‌غدا به‌لاڤكرى راگه‌هاند” ئه‌مريكا پشته‌ڤانيێ ل ئه‌نجامدانا هه‌لبژارتنين عيراقێ دكه‌ت وبۆ وێ چه‌ندێ ژى هاريكاريێ دێ پێشكێش بكه‌ت كو هه‌موو هاولاتى ده‌نگێ خوه‌ بده‌ن ژوان ژى 2 مليۆن و 600 هزار هاولاتيێن ئاواره‌”.

 باليۆزخانا ئه‌مريكا به‌رهه‌ڤيا خوه‌ دياركر بۆ هاريكاريا كۆمسيۆنا هه‌لبژارتنان ل عيراقێ ب شه‌ش شيره‌تكارێن نێڤده‌وله‌تى يێن تايبه‌تمه‌ند دهه‌لبژارتنان دا تاكو دپشته‌ڤان بن بۆ وێ چه‌ندێ كو ئاواره‌ بشێن ب رێيا ده‌نگدانا ئه‌لكترۆنى ده‌نگێ خوه‌ بده‌ن، ل گه‌ل باشكرنا ئيداره‌كرنا پرۆسێ ل ده‌ڤه‌رێن هاتينه‌ رزگاركرن وچه‌ند پرسێن دى يێن تايبه‌ت ب هه‌لبژارتنان ڤه‌.

جڤاتا وه‌زيرێن عيراقێ، رۆژا 12 /5/2018 بۆ ئه‌نجامدانا هه‌ردو هه‌لبژارتنێن جڤاتا نوونه‌ران وجڤاتێن پاريزگه‌هين عيراقێ يا دياركرى وزێده‌تر ژ 200 حزب وهه‌ڤپه‌يمانى بۆ هه‌لبژارتنان يێن هاتينه‌ تۆماركرن، هه‌رچه‌نده‌ هه‌تا نوكه‌ ئه‌و ژڤانه‌ يێ جيگير نينه‌ وجڤاتا نوونه‌رين عيراقێ ب رێيا ده‌نگدانا نهێنى دێ وێ پرسێ ئێكلا كه‌ت.

فراكسيۆنێن جڤاتا نوونه‌رێن عيراقێ ل دۆر ژڤانێ هه‌لبژارتنان ب سه‌ر دو بۆچوونان به‌لاڤبووينه‌، هنده‌ك ل گه‌ل ئه‌نجامدانا هه‌لبژارتنان دانه‌ ل ژڤانێ دياركرى وهنده‌ك ژى داخوازا پاشحستنا هه‌لبژارتنان دكه‌ن تاكو ئاواره‌ ڤه‌گه‌رنه‌ جهين خوه‌ هه‌تاكو ل ده‌ڤه‌رێن رزگاركرى ژ داعشێ ژى بهێنه‌ ئه‌نجامدان.