ئەڤرۆ نیوز:
وەزارەتا ناڤخوەیا عیراقێ بڕیاردایە، ھەر ئاوارەکێ عیراقی ل ھەر پارێزگەھەکێ ئاکنجیبوویە، دشێت ناسناما خوە یا بارێ باژێڕی ڤەگۆھێزیت وێ پارێزگەھێ و ئەندامەکێ جڤاتا پارێزگەھا کەرکووکێ ژی دبێژیت، مە بڕیاردایە فەرمانگەھێن باژێڕی ب چو شێوەکی ڤێ بریارێ بجە نەئینن و پتری نیف ملیۆن ئاوارێن عەرەب ل کەرکووکێ یێن ھەین، دەمێ ناسناما باژێڕی ڤەگوھێزێن دێ دەنگی ژی دەن.
ئەحمەد عەسکەری، سەرۆکێ لیژنا ناڤخوە و ئاسایشێ ل جڤاتا پارێزگەھا کەرکووکێ بۆ رۆژناما ئەڤرۆ گۆت” وەزارەتا ناڤخوەیا عیراقێ بێی ڤەگەڕیان بۆ چو لایەکی، بڕیارەک دەرکریە و گورەی وێ بریارێ، ھەموو ئاوارێن عیراقێ ل ھەر باژێڕەکی ئاکنجینە دشێن ناسنامێن خوە یێن بارێ باژێڕی بۆ ھەمان باژێڕ ڤەگوھێزێن، ئەڤ بڕیارا وەزارەتا ناڤخوەیا عیراقێ دژی دستوورێ عیراقێ یە، ب تایبەتی مادێ 140 و نابیت ب چو شێوەکی گۆھۆڕین ل دەڤەرێن مادێ 140 بھێتەکرن، ژ بەر کو وان دەڤەران ئاریشە ل سەرە و نابیت ب حەزا خوە بڕیار بۆ بھێنە دەرکرن، گورەی مادێ 23 ێ یێ جڤاتێن پارێزگەھان، نابیت دەستکاری ل پارێزگەھا کەرکووکێ بھێتەکرن ھەتا رەوشا کەرکووکێ ئێکلا دبیت و مادێ 140 دھێتە بجھئینان، پێدڤی بوو وەزارەتا ناڤخوەیا عیراقی ددەمێ دەرکرنا ڤێ بڕیارێ دا ،پارێزگەھا کەرکەووکێ و دەڤەڕێن دەرڤەی ئیدارا حوکمەتا ھەرێما کوردستانێ دەرکربان ژ ڤێ بڕیارێ و ئەف دەڤەر ڤەنەگرتبان”.
عەسکەری گۆت ژی” جڤاتا پارێزگەھا کەرکووکێ ژی بڕیارەک دەرکریە و ھەموو فەرمانگەھێن حوکمەتێ ل باژێڕێ کەرکووکێ ھاتینە ئاگەھدارکرن، کو ب چو شێوەکی نابیت بڕیارا وەزارەتا ناڤخوەیا عیراقێ بھێتە بجھئینان، چونکی پتری 500 ھزار ئاوارێن عیراقی و عەرەب ل باژێڕێ کەرکووکێ یێن ھەین و نابیت ناسنامێن وان بھێنە ڤەگوھاستن بۆ سەر پارێزگەھا کەرکووکێ ڤە، نوکە ئاوارە یێن بووینە ھەڤپشکێن کەرکووکیان ل بەلاڤکرنا ئاڤێ و کارەبێ و خوارنێ و ھەتا کریا خانیان وان گەلەک یێن گرانکرین، تنێ ئەڤە مابوو ل دەنگدانێ ژی ببنە ھەڤالێن مە و دەنگێ خوە ژی ل گەل خەلکێ کەرکووکێ بدەن، ئەڤ بڕیارە مەترسیە ل سەر کەرکووکێ و ھژمارەکا مەزن یا ئاریشان دێ بۆمە پەیداکەت و ھندەک پرسێن گرنگ دێ کەڤنە بەردەست، بەلێ ئەم ناھێلین سەربگریت”.
نيشاندان