ئه‌ڤرۆنيۆز:
ئێڤاريا ئه‌ڤرۆ هژماره‌كا وينين نوو يێن كوسرت ره‌سول عه‌لى جێگرێ ئيكێ يێ سكرتێرێ گشتيێ ئێكه‌تى نيشتمانى كوردستان به‌لاڤبوون كو ل نه‌خوه‌شخانه‌كا به‌رلين پايته‌ختێ ئه‌لمانيا هاتينه گرتن .
ئه‌و وينه ژلايێ كۆر و كه‌سێن نێزيكى كوسره‌ت ره‌سول عه‌لى هاتينه به‌لاڤكرن وئاماژێ ب وێ چه‌ندێ دكه‌ن كو ئه‌و وێنه يين ئه‌ڤرۆ نه (21/11/2017) كو تێدا هه‌ر ئێك ژ درباز كوسره‌ت ره‌سول ودكتۆر دارا نوشدارێ تايبه‌تێ كوسره‌تى وچه‌ند كه‌سه‌كێن نێزيكى كوسره‌تى ده‌ردكه‌ڤن.
به‌رى چه‌ند رۆژان ره‌وشا ساخله‌مى يا كوسره‌ت ره‌سول تێكچوبوو وله‌ز گه‌هاندبوو نه‌خوه‌شخانه‌كا باژێرێ سلێمانيێ ونوشداران راگه‌هاندبوو كو كێشه دريڤيكێن وى دا يێن هه‌ين وپاشى ب مه‌ره‌ما چاره‌سه‌ريا زێده‌تر ، هاته هنارتن بۆ ئه‌لمانيا ونوكه يێ ل ئێك ل نه‌خوه‌شخانێن به‌رلينا پايته‌ختا وى وه‌لاتى.
ئه‌ڤرۆنيۆز:
دكۆمبوونا خوه يا دوهى دا، جڤاتا پارێزگه‌ها دهۆكێ برياردا لژنه‌كێ بۆ دووڤچوونا بابه‌تێ گرتنا جادا ل به‌رامبه‌ر ئۆتێلا ركسۆس پێكبينيت.
نازك ئامێدى، ئه‌نداما جڤاتا پارێزگه‌ها دهۆكێ دبه‌رپه‌رێ خوه ل سه‌ر فيسبووكى به‌لاڤكريه، دوێ كۆمبوونێ دا پتريا ئه‌ندامێن جڤاتا پارێزگه‌هێ نه‌رازيبوونا خوه ل سه‌ر خرابكرنا قوتابخانا سه‌لاحه‌دين ( په‌يماگه‌ها هونه‌رين جوان يا كه‌ڤن) دياركريه.
نازكى نڤيسيه ژى، كۆمبوونێ چه‌ندين ته‌وه‌رێن دى بخوه‌ڤه گرتن ئه‌وژى بريار هاته دان دوكانێن فرۆتنا مريشكێن ساخ ب چه‌ند مه‌رجان بهێنه ڤه‌كرن، هه‌روه‌سا دووڤچوونا بابه‌تێ ته‌سويا ئه‌ردى بهێته كرن وئه‌گه‌رين گيرۆبوونا كارى بهينه زانين.
داواكارێ گشتى ل دهۆكێ ب نڤيسارا هژمار 29 ل 15/11/2017 كو هاتيه ئاراسته‌كرن بۆ دادگه‌ها ڤه‌كۆلينا دهۆكێ، ديار كربوو كو رۆژانه گه‌له‌ك سكالا ژلايێ وه‌لاتيێن سه‌نته‌رێ پارێزگه‌هێ دهۆكێ بۆ دهێن ل دۆر وێ سه‌رپيچيا خودانێ ئۆتێلا ركسۆس ل سه‌ر رێيا خزمه‌تگوزارى ئه‌وا دكه‌ڤيته به‌رامبه‌ر جادا سه‌دى ل نێزيك رێڤه‌به‌ريا هاتنوچوونا به‌رێ.
داواكارێ گشتى دوێ نڤيسارا خوه‌دا داخوازا پێرابوونێن پێدڤى دكه‌ت كو خودانێ ئۆتێلێ پێگير بكه‌ن سه‌رپێچى بهێته راكرن تاكو وه‌لاتى بشێن وێ رێيا گرتى ژلايێ خودانێ ئۆتێلێ ڤه بكاربينن، كو بۆ به‌رژه‌وه‌نديا خوه يا تايبه‌ت گرتيه، چونكى رێ ژلايێ باژێرڤانيا دهۆكێ يا هاتيه چێكرن بۆ به‌رژه‌وه‌نديا گشتى وگرتنا وێ دهێته هژمارتن سه‌رپێچى ل سه‌ر مافێ گشتى وئه‌ڤ سه‌رپێچيا زيق ول به‌رده‌م چاڤێن هه‌موويان، ته‌حه‌ديه‌كه بۆ وه‌لاتيێن دهۆكێ.
ئه‌ڤرۆنيۆز:
وه‌زاره‌تا خواندنا بلند وڤه‌كۆلينێن زانستى ل هه‌رێما كوردستانێ راگه‌هاند، وه‌كو قۆناغا ئێكێ بريار يا هاتيه دان بۆ مه‌زاختنا نێزيكى حه‌فت مليۆن دۆلارێن ئه‌مريكى وه‌كو ليستا نه‌هێ يا شايسته‌ى دارايى بۆ ده‌رچوويێن به‌رنامێتواناسازى، كو تێدا 826 ده‌رچووێن تواناسازيێ دێ ژێ مفادار بن.
عه‌باس ئه‌كره‌م، په‌يڤدارێ وه‌زاره‌تا خواندنا بلند دبه‌ياننامه‌كێ دا راگه‌هاند، لژنا به‌لاڤكرنا شايستێن دارايى يێن به‌رنامێ تواناسازى بريار دايه ب مه‌زاختنا ليستا نه‌هێ يا شايستێن دارايى بۆ ده‌رچوويێن به‌رنامێ تواناسازى ئه‌وێن خواندنا خوه ب سه‌ركه‌فتيانه ب دووماهى ئيناى.
عه‌باسى گۆت ژى، كوژمێ پاره‌ى ئه‌وێ دێ بۆ ليستا نه‌هێ يا شايستێن دارايى بۆ ده‌رچوويێن به‌رنامێ تواناسازى هێته مه‌زاختن دگه‌هيته شه‌ش مليۆن و553 هزار و610 دۆلارێن ئه‌مريكىو826 ده‌رچوويێن به‌رنامێ تواناسازى دێ ژێ مفادار بن، كو وه‌كو قۆناغا ئێكێ 50% ژ سه‌رجه‌مێ شايستێن دارايى بۆ به‌ربژارێن ده‌رچوويێن تواناسازى دێ هينه مه‌زاختن.
وه‌زاره‌تا خواندنا بلند وڤه‌كۆلينێن زانستى، هه‌موو ده‌رچوويێن به‌رنامێتواناسازى ئاگه‌هدار دكه‌ت ئه‌وێن ناڤێن وان دليستا هژمار (9) يا سالا 2017 دا هاتى وهژمارا وان 826 كه‌سه, سه‌ره‌دانا وه‌زاره‌تێ بكه‌ن.
ئه‌ڤرۆنيۆز:
ترومبێله‌كا مينرێژكرى ئه‌ڤرۆ سێشه‌مبى ل تاخێ له‌شكرى ل قه‌زا خورماتوو په‌قى ول دووڤ پێزانينێن ده‌ستپێكى هژماره‌كا وه‌لاتيان هاتنه كوشتن وبرينداركرن.
شه‌لال عه‌دبول قايمقامێ خورماتوو بۆ ده‌زگه‌هێن راگه‌هاندنێ گۆت، په‌قين ل تاخه‌كێ عه‌ره‌بێن سونى يا روودايى وهه‌تا نوكه 19 كه‌س يێن هاتينه كوشتن و50 كه‌س ژى يێن برينداربووين.
ئه‌ڤرۆنيۆز:
ئه‌ڤرۆ شاندێ حوكمه‌تا هه‌رێما كوردستانێ سه‌ره‌دانا هه‌ر ئێك ژ بزاڤا گۆران وئێكه‌تيا نيشتمانى كوردستانى وحزبا سوشياليستا ديموكراتى كوردستان ل باژيرێ سلێمانيێ كر، نێچيرڤان بارزانى پشتى وان سه‌ره‌دانان بۆ رۆژنامه‌ڤانان گۆت، ئه‌م ل سه‌ر هنده‌ك بنه‌مايان دهه‌ڤرِاينه.
نێچيرڤان بارزانى سه‌رۆك وه‌زيرێن هه‌رێما كوردستانێ، بۆ رۆژنامه‌ڤانان راگه‌هاند، ل گه‌ل لايه‌نان ل سه‌ر دو بۆ سێ بنه‌مايێن گرنگ دهه‌ڤراينه، وه‌و دژى دو ئيداره‌ييێ، پێدڤيه دانوستاندن ل گه‌ل به‌غدا بهێته كرن، نابيت هه‌ر لايه‌نه‌ك ب تنێ دانوستاندنان بكه‌ت. ئه‌ڤه ژى بۆ هه‌رێما كوردستانێ پرنسيبێن گرنگن.
دياركر ژى، دو پێشنياز بۆ ده‌ربازبوونا ڤى ره‌وشى يێن هه‌ين، يا ئيكێ ب زووترين ده‌م هه‌لبژارتن بهێنه كرن، يا دويێ حوكمه‌ته‌كا ده‌مكى بهێته دامه‌زراندن هه‌تاكو ئه‌نجامدانا هه‌لبژارتنان، گۆت ژى، دێ ل گه‌ل هه‌موو لايه‌نان ئاخڤين بۆ وێ چه‌ندێ بزانين باشترين رێيا چارێ چيه، پاشى ئه‌م ب خوه وه‌كو حوكمه‌ت دێ بريارێ ده‌ين كا ب چ شێوه‌كى ره‌فتارێ بكه‌ين، پشتى سه‌ره‌دانا هه‌موو لايه‌نان ژى دكه‌ين، دێ ئه‌نجامێن كۆمبوونێن خوه بۆ خه‌لكێ كوردستانێ رۆهن كه‌ين.
سه‌باره‌ت داخوازيێن بزاڤا گۆران، نێچيرڤان بارزانى گۆت، مه كاغه‌زه‌ك ژ گۆران وه‌رگرتيه ومه سۆز يا داى كو ڤه‌خواندنێ بۆ بكه‌ين، روونشتنێن مه دێ دبه‌رده‌وام بن ژى.
سه‌رۆك وه‌زيرێن هه‌رێمێ ئاشكراكر ژى كو هه‌تا نوكه ژڤانێ سه‌ره‌دانا شاندێ هه‌رێما كوردستانێ بۆ به‌غدا يێ ديار نينه، وه‌كو حوكمه‌ت دێ چينه به‌غدا وهه‌موو ئه‌و لايه‌نێن سياسى يێن دحوكمه‌تێ دا پشكدار دێ دناڤ شاندێ حوكمه‌تێ بۆ به‌غدا دپشكداربن.
ل دۆر شيانێن حوكمه‌تا هه‌ريمێ بۆ دابينكرنا مووچێن فه‌رمانبه‌ران، گۆت، هندى بشێين دێ مووچێن فه‌رمانبه‌ران دابين كه‌ين، هه‌كه مه نه‌شيا دێ ب ئاشكرايێ ل گه‌ل خه‌لكێ خوه ئاخڤين وبۆ رۆهن كه‌ين.
ئه‌ڤرۆنيۆز:
ژێده‌ره‌كى ل جڤاتا وه‌زيران ل دۆر چاوانيا ده‌ستپێكرنا بلندكرنا مووچه‌ى وپله بلندكرنا فه‌رمانبه‌ران، رۆهنكرنه‌كێ دده‌ت وئاشكرا دكه‌ت كو پله بلندكرنا فه‌رمانبه‌ران دێ ل سالا 2018 ده‌ستپێكه‌ت.
رێڤه‌به‌رێ فه‌رمانگه‌ها كارگيرى ودارايى ل سه‌رۆكاتيا جڤاتا وه‌زيران، هوشه‌نگ شيخ محه‌مه‌د، بۆ باس گۆت، نوكه تنێ سه‌رمووچه بۆ فه‌رمانبه‌ران دهێته كرن وپله بلندكرن يا راوه‌ستيايه، گۆت ژى، ل سالا 2016 وهه‌تا نوكه پله بلندكرنا فه‌رمانبه‌ران، يان ئه‌وا پێ دهێته گۆتن بلندكرنا مووچه‌ى، هاتبوو راوه‌ستاندن، تنێ كار ب سه‌رمووچه‌ى دهێته كرن، هه‌كه بودجا په‌سه‌ندكرى هه‌بيت ل سالا داهاتى، دێ پله بلندكرن ڤه‌بيت.
حوكمه‌تا هه‌رێمێ ل سالا 2015 بريارا راگرتنا پله بلندكرنا فه‌رمانبه‌ران ده‌ركربوو، به‌لێ دكۆمبوونه‌كا جڤاتا وه‌زيران دا بجهئينانا بريارێ هاتبوو راگرتن ول سالا 2016 هاته بجهئينان، نوكه تنێ سه‌رمووچێ سالانه بۆ فه‌رمانبه‌ران دهێته بجهئينان.
هوشه‌نگ شێخ محه‌مه‌د گۆت ژى، بۆ پله بلندكرنێ چه‌ند پێدڤيه‌ك يێن هه‌ين كو دڤێت ل به‌رچاڤ بهێنه وه‌گرتن، يا ئێكێ ئه‌وه دڤێت بودجا په‌سه‌ندكرى هه‌بيت، هه‌روه‌سا دڤێت ميلاكێ په‌سه‌ندكرى ژى هه‌بيت، ل گه‌ل ل به‌رچاڤ وه‌رگرتنا هنده‌ك رينماييێن تايبه‌ت ب پله به‌رزكرنێ ڤه.
خوياكر ژى، هه‌كه ل سالا داهاتى، بودجا هه‌رێما كوردستانێ ل په‌رله‌مان بهێته په‌سه‌ندكرن، راسته‌وخوه ده‌رگه‌هێ پله بلندكرن ل دووڤ شايسته‌بوونا فه‌رمانبه‌ران دێ هێته ڤه‌كرن.
پله به‌رزكرنا فه‌رمانبه‌ران هه‌يڤانه مه‌زاختنا ئێك مليار دينار دئێخيته سه‌ر حوكمه‌تێ، كو سالانه دبيته 12 مليار دينار.
ئه‌ڤرۆنيۆز:
ئه‌ڤرۆ شاندێ حوكمه‌تا هه‌رێما كوردستانێ ب سه‌رۆكاتيا نێچيرڤان بارزانى سه‌رۆك وه‌زيرێن هه‌رێمێ وجێگرێ وى قوباد تاله‌بنى ،ل گه‌ل بزاڤا گۆران كۆمبوو، شاندێ گۆران هژماره‌كا داخوازيان پێشكێشكرى حوكمه‌تێ كرن.
دوێ كۆمبوونێ دا، بزاڤا كۆران پرۆژه‌كێ نوو خسته به‌رده‌ست شاندێ بلند يێ حوكمه‌تا هه‌رێمێ، كو هنده‌ك داخوازى د وى پرۆژه‌ى دا هه‌بوون، ئێك ژوان داخوازيان ب زووترين ده‌م ژڤانه‌ك بۆ هه‌لبژارتنێن داهاتى يێن هه‌ريمێ بهێته دياركرن وزێده‌تر هه‌لبژارتن نه‌هێنه پاشخستن، ديسا داخوازكريه كو پێدڤيه تێكراييه‌كا نيشتمانى دناڤبه‌را لايه‌نێن سياسى ل هه‌رێمێ هه‌بيت هه‌تاكو دانوستاندنێ ل گه‌ل به‌غدا بكه‌ن.
داخوازيێن دى يێن بزاڤا گۆران ژحوكمه‌تێ كرىن، ل دووڤ رووداو، هه‌كه كابينا نوكه يا به‌رده‌وامبيت، بهێته بچووككرن وهنده‌ك وه‌زاره‌ت بهێنه كێمكرن، كو ب شێوێ حوكمه‌ته‌كا ده‌مكى يا كار برێكه‌ر بيت هه‌تاكو هه‌لبژارتنان.
دلشاد شه‌هاب شيره‌تكارێ سه‌رۆك وه‌زيرێن هه‌رێمێ پشتى كۆمبوونێ بۆ رۆژنامه‌ڤانان گۆت، دكۆمبوونێ دا مه به‌حس ل وێ چه‌ندێ كر كو دشياندايه ئه‌م ل سه‌ر پرسێن چاره‌نڤيسساز ودانوستاندنێ ل گه‌ل به‌غدا هه‌ڤ ده‌نگ بين، دياركر ژى كو سه‌ره‌دانێن مه بۆ لايه‌نێن سياسى دێ دبه‌رده‌وام بن.
شاندێ حوكمه‌تا هه‌رێما كوردستانێ ب سه‌رۆكاتيا نێچيرڤان بارزانى دوهى دوشه‌مبى ده‌ست ب به‌رنامێ سه‌ره‌دانێن خوه بۆ لايه‌نێن سياسى ل هه‌ريمێ كريه كو وێ رۆژێ سه‌ره‌دانا ئێكگرتوو ئيسلامى كربوو، ل دووڤ هنده‌ك ژێده‌رێن رۆژنامه‌ڤانى، شاندێ حوكمه‌تێ هنده‌ك خال وداخوازى يێن هه‌ين ودێ ئێخيته به‌رده‌ستێ هه‌موو لايه‌نێن سياسى، ئێك ژوان خالان تێكراييا لايه‌نانه ل سه‌ر دياركرنا ژڤانه‌كى بۆ هه‌لبژارتنێن داهاتى يێن خۆلا پێنجێ يێ په‌رله‌مانێ كوردستانێ وسه‌رۆكێ هه‌رێمێ وجڤاتێن پارێزگه‌هان.
ديسا مه‌ره‌ما حوكمه‌تا هه‌رێمێ ئه‌وه ژى كو ئه‌و شاندێ دهنێريته به‌غدا، بۆچوونا هه‌موو لايه‌نێن سياسى يێن هه‌رێمێ ڤێ هه‌بيت وتێكراييه‌كا نيشتمانى هه‌بيت.
ئه‌ڤرۆ نيوز، لەزگین جوقی:
رێڤەبەرێ گشتیێ ساخلەمیا پارێزگەھا دھۆکێ دیارکر کو ئەڤرۆ 21ى چريا دويێ 2017 گرێبەستەک د گەل خاچا سور یا نێڤدەولەتی ھاتە ئێمزاکرن ل دووڤ گرێبەستێ ژی بۆ ماوێ دو سالان دێ خاچا سور پشتەڤانیا ساخلەمیا دھۆکێ ب دابینکرنا دەرمانان و مەشق و راھێنانا ستافێ ساخلەمیی كه‌ت.
د. نزار عسمەت تەیب رێڤەبەرێ گشتیێ ساخلەمیا پارێزگەھا دھۆکێ گۆت: “پرۆژێ پشتەڤانیا خزمەتێن چارەسەریێ و خوەپاراستنێ ژ نەخۆشێن دوومدرێژ ل بنگەھێن تەندروستی یێن دەستپێکێ ل قەزا سێمێلی سەر پارێزگەھا دھۆکێ ڤە ب تایبەتی ژی بنگەھێ شاریا و بنگەھێ ئاشتی و بنگەھێ خانکێ و بنگەھێ گولان بۆ ماوی دو سالان دێ خاچا سور یا نێڤدەولەتی ل دووڤ گرێبەستێ ھاریکاریا ساخلەمیێ کەت”.
ئاماژه ب وێ چه‌ندێ ژى كر كو خه‌لكىض دهۆك ل گه‌ل ئاوه‌ره و په‌نابه‌ران دێ ژ پرۆژێ خاچا سور يا نێڤده‌وله‌تى و ساخله‌ميا دهۆك مفادار بن، “پرۆژه بۆ پتر خزمه‌تكرنا نه‌خۆشێن دوومدرێژ هاتيه ئيمزا كرن”.
ئاشکرا ژى کر کو بۆ ماوی دو سالان دێ خاچا سور یا نێڤدەولەتی ھەڤکاریێ کەت بۆ دابینکرنا دەرمانان و مەشق و راھێنانانان ب ستافێ ساخلەمیێ و گۆت: “ئەم د بزاڤێن بەردەوام داینە بۆ پێشڤەبرنا خزمەتێن ساخلەمیێ پتر خزمەتکرنا خەلکێ دھۆکێ نوکە دەست ب پرۆژەى ھاتیە کرن ھەتا دو سالان دێ یێ بەردەوام بیت”.
ئەڤرۆ نيوز:
یوڤال ستینیتز وزیرێ وزێ یێ ئیسرائیلێ راگەھاند کو وەلاتێ وی ب نھێنی ل گەل سعوودیا ل دۆر شەرێ ل دژی ئیرانێ دانوستاندنان دکەت و دیار کر ژی گەلەک وەلاتێن عەرەبی داخواز ژ مە و سعوودیا دکەن کو شەرێ ئیرانێ بکەین و ئەو ژی دێ ھاریکاریا مە کەن، لێ ھێشتا دانوستاندن د ناڤبەرا مە و سعوودیا دا د بەردەوامن.
ناڤبری ئەو یەک ژی دیار کر کو رەوشا نھا ژ ئالیێ مە و سعوودیا ڤە ناھێتە قەبوول کرن و دڤێت ئەم سنورەکێ بۆ زێدەگاڤیێن ئیرانێ دانێین.
نيشاندان