ئه‌ڤرۆنيۆز:

به‌رنامێ سه‌ره‌دانا شاندێ حوكمه‌تا هه‌رێما كوردستانێ بۆ لايه‌نێن سياسى ده‌ستپێكر وئه‌ڤرۆ شاندێ حوكمه‌تێ ل گه‌ل ئێكگرتوويا ئيسلامى كۆمبوو.

ئه‌ڤرۆ دوشه‌مبى پشتى كۆمبوونا جڤاتا وه‌زيران، نێچيرڤان بارزانى سه‌رۆك وه‌زيرێن هه‌رێما كوردستانێ وجێگرێ وى قوباد تالبانى، سه‌ره‌دانا ئێكگرتووبا ئيسلامى كوردستان كر ول گه‌ل سه‌لاحه‌دين محه‌مه‌د به‌هائه‌دين ئه‌ميندارێ گشتيێ ئێكگرتوو كۆمبوون.

نێچيرڤان بارزانى دبه‌رپه‌رێ خوه‌ ل فيسبووكى دبێژيت، مه‌ كۆمبوونه‌كا به‌رهه‌مدار ل گه‌ل سه‌لاحه‌دين محه‌مه‌مه‌د به‌هائه‌دين ئه‌ميندارێ گشتيێ ئێكگرتووى ئيسلامى كوردستان هه‌بوو، مه‌ به‌حسێ ره‌وشا نوكه‌ وپێشهاتان كر، بۆ ده‌ربازبوونا ڤێ ره‌وشێ مه‌ دووپاتى ل ئێكرێزيێ وته‌بايێ كر.

برياره‌ دڤێ هه‌قتيێ دا شاندێ حوكمه‌تا هه‌رێما كوردستانێ سه‌ره‌دانا لايه‌نێن دى يێن سياسى بكه‌ت، حوكمه‌تا هه‌رێمێ دڤێت بۆچوونا هه‌موو لايه‌نێن سياسى ل سه‌ر دانانا ژڤانه‌كێ بۆ هه‌لبژارتنان وه‌ربگريت، هه‌ڤده‌م به‌حس ل ره‌وشا سياسى ل هه‌رێمێ وچاره‌كرنا كێشێن دناڤبه‌را به‌غدا و هه‌رێمێ وپيدڤيا هه‌بوونا ئێك ده‌نگيا لايه‌نێن كوردى بۆ چاره‌كرنا وان كێشان .

ئه‌ڤرۆ نیۆز، نه‌وزاد هلۆرى:

حوكمه‌تا هه‌رێما كوردستانێ داخواز ژجڤاكێ نێڤده‌وله‌تى دكه‌ت كو ناڤبژیوانیێ دناڤبه‌را هه‌رێمێ و به‌غدا بكه‌ت بۆ راكرنا ئه‌وێ ئابلوقه‌یا ژلایێ حوكمه‌تا به‌غدا ل سه‌ر هه‌رێما كوردستانێ هاتیه‌ سه‌پاندن  و ب پێدڤى دزانیت ئه‌و ئابلوقه‌ بهێته‌ راكرن داكو زێده‌تر خزمه‌تا ئاواره‌ و په‌نابه‌ر و وه‌لاتیێن هه‌رێمێ بكه‌ن ب تایبه‌تى ڤه‌كرنا فرۆكخانان و زێده‌كرنا پشكا بودجا هه‌رێمێ.

ل گۆره‌ى نوچه‌یه‌كێ كو مالپه‌رێ حوكمه‌تا هه‌رێما كوردستانێ به‌لاڤكریه‌ تێدا هاتیه‌ : ( ئه‌و سزایێ كو ژلایێ به‌غدا ل سه‌ر هه‌رێما كوردستانێ دهێته‌كرن ، بنپێكرنه‌كا ئاشكرا یا قانون و رێسایێن نیڤده‌وله‌تى یه‌  و ئه‌ركێ حوكمه‌تا عیراقێ پاراستنا خه‌لكى یه‌ ب هه‌موو ئاواره‌یان ڤه‌ و پێدڤیه‌ عیراق مافێن مرۆڤى و ئازادیێن تاكه‌كه‌سى و جڤاكى بپارێزیت ،كێمكرنا پشكا بودجا هه‌رێمێ بێى كو پرس ب هه‌رێمێ بهێته‌كرن ، گرتنا هێلێن ئاسمانیێن هه‌رێمێ ژ وان سزایێن ب كۆمن دژى وه‌لاتیان دهێنه‌كرن)

زێده‌تر هاتیه‌: ( سزایێن عیراقێ بوویه‌ ئه‌گه‌ر كو رێگرى ل هه‌ڤكاریێن مرۆڤایه‌تى و پێدڤیێن رۆژانه‌یێن زێده‌تر ژ ملیۆنه‌ك و 500 هزار ئاواره‌ و په‌نابه‌ران بهێته‌كرن، ب هاتنا وه‌رزێ زڤستانێ ژى هنده‌ك ژ وان ئاواره‌ و په‌نابه‌ران و پشكه‌ك ژ خووشك و برایێن ئێزدى و مه‌سیحى و ئاوارێن كه‌ركوكێ و دوزخورماتو دێ بێ هه‌ڤكارى مینن كو ژلایێ رێكخراوێن سه‌ر ب نه‌ته‌وێن هه‌ڤگرتى و رێكخراوێن نه‌حكومیێن نیڤه‌ده‌وله‌تى دهاتنه‌كرن و پێشتر فروكخانێن هه‌رێمێ گه‌له‌ك خزمه‌ت بۆ گه‌هاندنا هاریكاریان كریه‌ ، ئه‌ڤه‌ زێده‌بارى د شه‌رێ دژى داعشێ ژى دا رۆله‌كێ به‌رچاڤ هه‌بوویه‌ ، گرتنا هێلێن ئه‌سمانى كارتێكرنه‌كا مه‌زن ل سه‌ر خودان پێشه‌یێن بیانى و گه‌هاندنا هاریكاریان هه‌بوویه‌ وب  ده‌هان كه‌س هێلاینه‌ بێ كار).

حوكمه‌تا هه‌رێما كوردستانێ داخوازێ ژ جڤاكێ نێڤده‌وله‌تى دكه‌ت كو ده‌ستهه‌لاتدارێن عیراقێ پالده‌ن تاكو بێى مه‌رج ئه‌وان ئابلوقه‌یان راكه‌ن يێن كو دژى هه‌رێما كوردستانێ هاتینه‌ دانان و گۆت ژى: ( ئه‌م بزاڤێن جڤاكێ نێڤده‌وله‌تى ب گرنگ دبینین بۆ راكرنا ئابلوقه‌یا ئاسمانى و وان سزایێن ب كومێن ل سه‌ر جڤاكى هاتینه‌ سه‌پاندن ، داكو خوه‌ دوور بكه‌ن ژ هه‌موو وان نه‌رێنیێن كو زیان ل سه‌ر خزمه‌تێن مرۆڤایه‌تى و ساخله‌مى و په‌روه‌رده‌ و خواندن و ئاسایشا خوراكى دبوارێ كارى و داهاتى ل هه‌رێما كوردستانێ درۆست دبن)

ئه‌ڤرۆ نيۆز، نه‌وزاد هلۆرى:

نڤيسينگه‌ها ئه‌میندارێ گشتیێ ئێكگرتوویا ئیسلامیا كوردستانێ راگه‌هاند كو ئه‌و دێ سكالایێ ل سه‌ر هه‌ردو ده‌زگه‌هێن رۆژنامه‌ڤانى (ژیان و لڤین) تۆماركه‌ت و ئاماژه‌ ب وێ یه‌كێ ژى كریه‌ كو دوور ژ راستیێ زمان درێژى ل سه‌ر ئێكگرتوو كرینه‌.

نڤیسینگه‌ها سه‌لاحه‌دین محه‌مه‌د بهائه‌دین ئه‌میندارێ گشتیێ ئێكگرتوویا ئیسلامیا كوردستانێ ئه‌ڤرۆ 20 چریا دویێ 2017 راگه‌هاندنه‌ك به‌لاڤكر و د تيدا هاتیه‌ كو ئه‌و وه‌كو ئێكگرتوو ب هوورى سه‌حا هه‌موو ده‌زگه‌هێن راگه‌هاندنێ و ره‌وشێ دكه‌ن و تیما قانوونى یا ئێكگرتووى راسپاردیه‌ كو سكالایێ ل سه‌ر هه‌ر جۆره‌ ناڤزراندن و سنوور به‌زاندنه‌كێ تۆمار بكه‌ن.

د راگه‌هاندنا وان دا زێده‌تر هاتیه‌ كو ئه‌و ب مافێ خوه‌ دزانن سكالایێن قانوونى ل سه‌ر هه‌ردو ده‌زگه‌هێن رۆژنامه‌ڤانى ” رۆژناما ژیان و مالپه‌را لڤین ” تۆمار بكه‌ن ، و ئاماژه‌ ب دوو نموونه‌یێن وان كر كو ئه‌و كىناڤزراندن و بنپێكرن بوویه‌ د هژمارا 20 یا رێكه‌فتى 19 چریا دوویێ 2017  یا روژناما ژیان و نوچه‌یه‌كێ چه‌وا شه‌كاریێ مالپه‌را لڤین بویه‌ وه‌كو د راگه‌هاندنا وان دا هاتى.

دوپات ل وێ یه‌كى ژى كر كو ئه‌و وه‌كو ئێكگرتوو ل مافێ خوه‌ خوه‌ش نابن و ل گۆره‌ى قانوون و سه‌روه‌ریا دادگه‌هان دێ قه‌له‌مێن وان كه‌سان گرێده‌ن داكو زێده‌تر سنوران نه‌به‌زینن و یاریان ب حورمه‌ت و حه‌ره‌ما كه‌سایه‌تى و سه‌ركردێن وان نه‌كه‌ن.