دیدار/ دلۆڤان ئاكرەیی

ئەنداما كۆمیتەیا ناڤەندییا پارتی دیموكراتی كوردستان و هەڤدەم هاریكارا بەرپرسێ مەكتەبا رێكخستنا پارتی ل پارێزگەها سلێمانی و هەلەبجە و راپەرێن، د. ئەشواق جاف ل دۆر بەرهەڤییێن پارتی دیموكراتی كوردستان و دەستنیشانكرنا بەربژاران بۆ هەلبژارتنێن جڤاتا نوونەرێن ئیراقێ بۆ رۆژنامەیا (ئەڤرۆ) دیاركر» مە وەك پارتی دیموكراتی كوردستان دەست ب ئامادەكارییان بۆ هەلبژارتنێن جڤاتا نوونەرێن ئیراقێ كریە و گاڤ ژی هاڤێتینە بۆ ڤێ مەبەستێ و پشكا هەلبژارتنێن پارتی ل هەموو لقان دەست ب وەرگرتنا سیفییان كریە و د نوكەدا ناڤ و سیفییێن وان د قۆناغا خواندن و دیڤچونێدانە و جودا ژ ڤێ كار بۆ دەرئێخستنا كارتا دەنگدەران دهێتە كرن كو وەلاتی بچن بۆ وەرگرتن و نووكرنا كارتێن خوە یێن هەلبژارتنان».
سەبارەت بۆچوونا پارتی بۆ ئێك لیستییێ د هەلبژارتنێن جڤاتا نوونەرێن ئیراقێدا گۆت» بێگومان كۆمبوونەك بۆ ڤێ مەبەستێ هاتیە كرن و ئەنجامێ وێ بۆ لێژنەیا بلند هاتیە هنارتن و ئارمانجا پارتی یا زەلالە كو ل دەڤەرێن كوردستانی یێن دەرڤەی ئیدارەیا هەرێما كوردستانێ هەبوونا ئێك لیستیێ ل وان دەڤەران گەلەك گرنگییا خوە یا هەی چونكی ئێكدەنگ ژی ل وان دەڤەران یێ گرنگە ژ بەر كو هەڤڕكییا ئالیێن بیانی و یێن نە كوردی دهێتە كرن و ب پاراستنا دەنگێن كوردان د شێین كورسییان ل جڤاتا نوونەرێن ئیراقێ ب دەستبێخین كو هەم نوونەراتییا هەرێما كوردستانێ و هەم دەڤەرێن دەرڤەی ئیدارەیا هەرێما كوردستانێ بكەین و ڤی پێگەهی ب هێز بكەین».
خویاكر ژی» د ناڤا هەرێما كوردستانێدا كورسی هاتینە دیاركرن و هەر ئالییەكێ كوردی هەكە ب ئێك لیست ژی نەبیتن نابیتە كێشە چونكی كورسی هاتینە دیاركرن و هەموو ئالیێن كوردستانی د ناڤا خودا هەڤركییا هەڤدو دكەن و هەر ئالییەكێ كوردی ڤان كورسییان ببەت دێ بیتە نوونەرێ خەلكێ كوردستانێ ل جڤاتا نوونەرێن ئیراقێ و ئەم وەك پارتی ل گەل ئێك لیستییا ئالیێن سیاسینە ل دەڤەرێن دەرڤەی ئیدارەیا هەرێما كوردستانێ و ب ئێك لیستییا ئالیێن كوردی ل ڤان دەڤەران دێ شێین دلێ خەلكێ وان دەڤەران خوەش كەین».
سەبارەت ب جوداهی و گرنگییا ئێك لیستیێ و فرە لیستییا كوردان ل وان دەڤەران گۆت «د راستیدا ل دەڤەرێن كوردستانی یێن دەرڤەی ئیدارەیا هەرێما كوردستانێ ئێك لیستی ل فرەهییا لیستان گرنگترە چونكی ل دووڤ سیستەمێ هەلبژارتنان دبیت هندەك ژ دەنگێن كوردان بمینن و نەهێنە هەژمارتن و ئێك لیستی بۆ هەموو ئالیێن كوردستانی گرنگترە».
ل دۆر لیستێن جودا ژ بلی پارتی گوت» هەكە ئالیێن سیاسی یێن كوردی حەزا لیستەكا جودا هەبوو بێی پارتی ئەڤە پرۆسەیەكا دیموكراسی و ئازادییە و هەر ئالییەكێ سیاسی یێ ئازادە ل دانا بڕیارێ بۆ هەلبژارتنان بەلێ بەرژەوەندییا گەلێ كورد و كوردستانێ د ئێك لیستدایە ل دەڤەرێن دەرڤەی ئیدارەیا هەرێما كوردستانێ چونكی ئێك دەنگ بۆ گەلێ كورد گەلەكە «.

سەرۆك بارزانی، ل سالڤەگەرا (51) یا سێدارەدان و شەهیدكرنا لەیلا قاسم و هەڤالێن وێ، پەیامەك بەلاڤكر و راگەهاند: لەیلا قاسم نموونەیا قەهرەمانییا كچا كورد و سیمبولا ئازادیخوازییا مرۆڤێ كوردە.
دوهی دوشەمبی 12/5/2025، سەرۆك بارزانی ل سالڤەگەرا (51) یا سێدارەدان و شەهیدكرنا لەیلا قاسم و هەڤالێن وێ، پەیامەك ل پێگەهێ تایبەتێ خوە، ل تۆرا جڤاكییا (ئێكس) بەلاڤكر وگۆت» لەیلا قاسم نموونەیا قەهرەمانییا كچا كورد و سیمبولا ئازادیخوازییا مرۆڤێ كوردە، ئەو بەر ب روویێ ستەمكاراندا هات و پشتا خوە دا ژیانێ و شەهید بوو، بەلێ بندەستی قەبوول نەكر».
سەرۆك بارزانی د پەیاما خوە دا ئاماژە ب وێ چەندێ دا» ل سالڤەگەرا (51) یا سێدارەدان و شەهیدكرنا لەیلا قاسم و هەڤالێن وێ، هزاران سلاڤان بۆ گیانێ وان یێ پاقژ و بۆ گیانێ هەموو شەهیدێن رێكا ئازادیێ دهنێرین».

دوهی دوشەمبی 12/5/2025، نێچیرڤان بارزانی، سەرۆكێ هەرێما كوردستانێ د پەیامەكێدا دا راگەهاند: پێشوازیێ ل بڕیارا پەكەكێ بۆ خوەهەلوەشاندنێ و چەكدانانێ دكەین، هەروەسا دیاركر ژی: ئەڤە پێنگاڤەكا چارەنڤیسسازە و رێكێ بۆ دیالۆگەكا راستەقینە ڤەدكەت كو پێكڤەژیانێ و ئارامیێ ل توركیا و سەرانسەری دەڤەرێ ب هێز دكەت.
دەقێ پەیاما سەرۆكێ هەرێما كوردستانێ:
پێشوازیێ ل بڕیارا پەكەكێ بۆ خوەهەلوەشاندنێ و چەكدانانێ و چوون وێ ل دووڤ گازیا بەرێز ئۆجەلانی دكەین و ب پێنگاڤەكا چارەنڤیسساز دزانین كو بەرپەرەكێ نوو ل دەڤەرێ ڤەدكەت. ئەڤ پێنگاڤە، نیشانا پێگەهشتنا سیاسییە و رێكێ بۆ دیالۆگەكا راستەقینە ڤەدكەت كو پێكڤەژیانێ و ئارامیێ ل توركیا و سەرانسەری دەڤەرێ ب هێز دكەت.
نوكە دەمێ وێ چەندێیە و چاڤێ هەموویان لێ یە ئەڤ پێنگاڤا گرنگ ب پێنگاڤێن دی یێن ئەرێنی و پێدڤی ژ هەموو ئالیێن پەیوەندیدار بهێتە بەرسڤدان. ئەڤە دەلیڤەیەكا دروست وگونجای پەیدا دكەت و دبیتە بنەمایێ ئاشتییەكا هەردەمی و گشتگیر كو دوماهیێ ب دەهان سالێن توندوتیژیێ و ئازار و مەینەتێ دئینیت و دەڤەرێ بەر ب ئاسۆیێ نوو یێ پێشكەفتنێ دبەت.
سەرەرای رێز و پێزانینێ بۆ رۆلێ سەرۆك ئەردۆغانی یێ پشتەڤانیكرنێ و بزاڤێن وی بۆ سەرئێخستنا ڤێ پرۆسەیێ، دوپات دكەین كو هەرێما كوردستانێ وەك هەردەم پشتەڤانیێ ل هەموو بزاڤان بۆ چارەسەركرنا ناكۆكییان ب شێوەیەكێ ئاشتییانە دكەت و هیڤیدارین ئەڤ دەستپێشخەرییە ببیتە خالا وەرچەرخانەكا ئێكلاكەر. هەروەسا بەرهەڤییا خوە یا تمام دیار دكەین ژبۆ بەردەوامیێ د پێشكێشكرنا هەر جۆرە هاریكارییەكێ بۆ سەركەفتنا ڤێ دەلیڤەیا دیرۆكی.

دوهی دوشەمبێ 12/5/2025 نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ، سالڤەگەرا 32 یا دامەزراندنا بنگەهێ لالش یێ ڕەوشەنبیری و جڤاكی پیرۆز كر.
نێچیرڤان بارزانی، د پەیاما خوە دا گۆت» سالڤەگەرا 32 ێ یا دامەزراندنا بنگەهێ لالش یێ ڕەوشەنبیری، ب گەرمی ل هەموو خوشك و برایێن ئێزدی پیرۆز دكەم. كار و خزمەت و بەرهەمێن بنگەهێ لالش، ب ڕێز و پێزانینڤە د هەلسەنگینم. دەستخوەشیێ ل تیما ڕێڤەبەر و هەموو كارمەندێن بنگەهی دكەم. هیڤیا سەركەفتنا بەردەوام بۆ وان دخازم».
گۆت ژی»د ڤێ بیرهاتنێدا دیسا تەكەزێ ل سەر هەموو پشتەڤانییا خوە بۆ كار و چالاكیێن بنگەهێ لالش دكەم. وەك هەردەم دێ هاریكار بم دا یێ بەردەوام بیت و وەك كانییەكا زەلال كو دهوڕتە د ڕووبارێ رەوشەنبیرییا كوردیدا، خزمەتەكا باشتر یا رەوشەنبیریا كوردی و بتایبەتی ئێزدیاتیێ بكەت».
دیاركر ژی» هەر د ڤێ هەلكەفتنێدا خوشك و برایێن خوە یێن ئێزدی و هەموو پێكهاتەیێن كوردستانێ ژ هەر ئۆل و نەتەوەیەكێ بن، پشتڕاست دكەم كو هەردەم دێ پشتەڤان و پارێرڤانێ مافێن وان بم و كوردستان بۆ مە هەموویان دێ هەر مینیت وەلاتێ پڕرەنگی و هەڤدو قەبوولكرنێ و پێكڤەژیانا ئاشتییانە».
ژ ئالیێ خوەڤە مەسرور بارزانی، سەرۆكێ حوكمەتا هەرێما كوردستانێ د پەیاما خوە دا گۆت»سالڤەگەرا 32 یا دامەزراندنا بنگەهێ لالش یێ رەوشەنبیری و جڤاكی، ل سەرۆك و ئەندامێن دەستەیا بلند و هەموو خوشك و برایێن ئێزدی پیرۆز دكەم و هیڤییا پێشكەفتن و بەردەوامبوونێ بۆ وان دخوازم».
گۆت ژ ی»بنگەهێ لالش خزمەتكا بەرچاڤ یا كولتوور و هونەرێ ڕەسەنێ كوردی و داب و نەریتێن جڤاكا ئێزیدی كریە و رۆلەكێ گرنگ د هێزكرنا برایەتیێ و پێكڤەژیانێ دا د ناڤبەرا پێكهاتەیێن كوردستانێ دا هەیە».

دوهی دوشەمبی 12/5/2025، مەسرور بارزانی، سەرۆكێ حوكمەتا هەرێما كوردستانێ، كارگەها چیمەنتۆی و وێستگەها كارەبا دابین ڤەكر.
پاشی سەرۆكێ حوكمەتا هەرێمێ پەیڤەك پێشكێشكر و تێدا گۆت» كێمتر ژ دو سالان ئەم ل ڤێرێ بووین و د دەمێ خوەدا نوكە ئەنجامی دبینین، جهێ دەستخوەشیێیە كو ب راستی كارەكێ ب ڤی شێوەی و ب ڤی جۆری و ب ڤێ لەزاتیێ هاتیە ئەنجامدان. جهێ سەربلندیێ و شانازیێیە كو دبینین شیانێن ناڤخوەیی ل گەل هاریكارییا دۆستێن مە ل دەرڤە كو دشێن كەرتی پیشەسازی ب ڤی جۆری ل كوردستانێ ئاڤا بكەن و دەستپێكەك بیت بۆ پێنگاڤێن مەزنتر ژی ل پاشەڕۆژێ».

دەقێ پەیڤا سەرۆكێ حوكمەتا هەرێما كوردستانی:

گەلەك خوەشحالم ئەڤرۆ ل گەل هەوە پشكداربین ل رێوڕەسمێ ڤەكرنا ڤێ كۆمپانییا مەزن، ئەڤ جهە كو بەری دو سالان ئەم هاتین و مە بەرێ بنیاتێ دروستكرنا كارگەها چیمەنتۆی دانا كو ژ ئالیێ (دابین گرۆپ) و (پاوەر چاینا) هەم هاتیە دیزاینكرن و هەم ئەركێ بجهئینانێ ژی ل ستوویێ وان بوو.
كێمتر ژ دو سالان ئەم ل ڤێرێ بووین و د دەمێ خوە دا نوكە ئەنجامی دبینین، جهێ دەستخوەشیێیە كو ب راستی كارەكێ ب ڤی شێوەی و ب ڤی جۆری و ب ڤێ لەزاتیێ هاتیە ئەنجامدان. جهێ سەربلندیێ و شانازیێیە كو دبینین شیانێن ناڤخوەیی ل گەل هاریكارییا دۆستێن مە ل دەرڤە كو دشێن كەرتێ پیشەسازی ب ڤی جۆرێ ل كوردستانێ ئاڤا بكەن و دەستپێكەك بیت بۆ پێنگاڤێن مەزنتر ژی ل پاشەڕۆژێ.
جهێ دلخوەشیێیە دبینین ل ڤێرێ گرنگییەكا مەزن ب بابەتێ ژینگەهپارێزیێ هاتیە دان و فیلتەرێ ڤێ هەموو دویكێلێ و ڤێ هەموو گازێ كو بەرۆڤاژی دا بیتە كێشەیەكا سرۆشتی، نوكە ئەڤە هاتیە چارەسەركرن. دەستخوەشیێ ل ئەنجامدەرێن ڤی پڕۆژەی دكەم كو بابەتێ ژینگەهپارێزیێ ل بەرچاڤ وەرگرتی و هیڤیدارم هەموو جهێن دی ژی ئەڤە ل بەرچاڤ بیت و پشكەكا سەرەكییا كار و پیشەیا وان ئەو بیت كا چاوان ئەم رێزێ ل سرۆشتێ خوە بگرین و ژێنگەها خوە بپارێزین.
بەرهەمێ ڤێ كارگەهێ زێدەتر ژ دو ملیۆن و نێزیكی 100 هزار تەنێن چیمەنتۆیە سالانە كو بێگومان ئەڤە پشكەكا مەزن یا پێدڤیێن هەرێما كوردستانێ و ل سەر ئاستێ ئیراقێ ژی دابین دكەت. چەندین پڕۆژەیێن دی ژی یێن هەڤشێوە ل كوردستانێ یێن هەین، ئەڤە ژی ئاماژێ ب وێ چەندێ ددەت كو كوردستان جهەكێ گونجایە بۆ پێشڤەبرنێ ب كەرتێ پیشەسازی و ئەم دێ بەردەوام بین ل هاندان و پشتەڤانیكرنا كەرتێ تایبەت بۆ بجهئینانا وان جۆرە پڕۆژەیان كو بكەڤنە د خزمەتا خەلكێ كوردستانێدا.
جهێ دلخوەشیێیە دیسان، مە گوهلێبووی كو زێدەتر ژ هزار و 200 دەلیڤەیێن كاری بۆ خەلكێ دەڤەرێ هاتیە پەیداكرن، ئەڤە ژی پشكەكا دی ژ سۆزێن حوكمەتا هەرێما كوردستانێ كو بۆ پشتەڤانیكرنا كەرتێ تایبەت هاتبوونە دان، ئەم دەلیڤەیێن كاری ژی بۆ خەلكێ هەرێما كوردستانێ دابین دكەین، دەستخوەشیێ ل هەوە دكەم بۆ ڤان كارێن جوان یێن هوون دكەن.
هەر ل تەنیشت ڤی پڕۆژەیێ مەزن، پڕۆژەیەكێ دی یێ گەشتیاریێ مەزن ل ڤێرێ یێ هەی ئەوژی بەنداڤا گۆمەسپانە، ئانكو ئەو سۆزێن حوكمەتا هەرێما كوردستانێ داین بۆ پێشڤەبرنا كەرتێن چاندنێ و پیشەسازیێ و گەشتوگوزارێ، ئەم بەرهەمێن وان هێدی هێدی یێن دبینین و پشكەكا زۆر ژێ دهێنە بجهئینان. بەلێ ئەڤە دەستپێكە و پێنگاڤێن بەراهیێ نە، كوردستان گەلەك یا زەنگینە و بیاڤێ زێدەتر ژی یێ هەی كو ئەم بشێین ل هەموو دەڤەرێن دی یێن كوردستانێ، ل هەموو جهێن دی، ل هەموو باژێر و باژێركان، گرنگیێ ب پێشئێخستنا ژێرخانەیا ئابووری بدەین، ل وان جهێن پێدڤی ب كەرتێ پیشەسازی بیت دێ گرنگیێ پێ دەین، ل وان جهێن پێدڤی ب كەرتێ گەشتگوزاری بیت دێ گرنگیێ پێ دەین و كەرتێ چاندنێ ژی هەروەكو هوون ژی دزانن دەمەكێ زۆرە مە وەبەرئێنانەكا مەزن یا كری و مە جوتیار یێن هانداین كو ئەوژی بەردەوام بن د پێشئێخستنا كەرتێ چاندنێدا.
سیاسەتا حوكمەتا هەرێما كوردستانێ بۆ هەمەجۆركرن و بەرفرەهكرنا داهاتێ هەرێما كوردستانێ و پێشئێخستنا ژێرخانەیا ئابووری، سیاسەتەكا دروست و رەوا بوویە و دێ بەردەوام د وێ چەندێدا كو پەیوەندیێن خوە دا ل گەل وەلاتێن دۆست و هەڤسنور و دەرڤە ژی زێدەتر بكەین، تاكو زێدەتر گرنگیێ ب پێشئێخستنا كوردستانێ بدەین و ڤەژاندن ل هەرێما كوردستانێ رۆژ ل دووڤ رۆژێ زێدەتر بەر ب پێشڤە بچیت.
تاكو ئارامی و تەناهی ل دەڤەرێ بەردەوام بیت، كوردستان بێگومان دێ زێدەتر پێنگاڤان بەر ب پێشكەفتنێ هاڤێژیت و هەموو ئومێدا مە ئەوە كو خەلكێ مە، خەلكێ كوردستانێ، ئەو كەسێن سەرەدانا كوردستانێ ژی دكەن، ب ئارامی و ب تەناهی بژین و بەر ب پاشەڕۆژەكا گەشتر بچن.
جارەكادی دەستخوەشیێ ل ئەنجامدەرێن ڤی پڕۆژەیێ مەزن دكەم، دەستخوەشیێ ل (دابین گرۆپ و پاوەر چاینا) دكەم، هیڤیدارم هەردەم سەركەفتی بن و چاڤەڕێ دكەین پڕۆژەیێن هەڤشێوە و پڕۆژەیێن دی ژی ل دەڤەرێن دی یێن ڤێ كوردستانا مە یا خوەشتڤی بهێنە بجهئینان.

سەرۆك بارزانی سالڤەگەرا دامەزراندنا بنگەهێ لالش یێ رەوشەنبیری و جڤاكی پیرۆز دكەت و دبێژیت: خزمەتەكا بەرچاڤ یا جڤاكێ ئێزدیاتیێ كریە و كار بۆ پاراستنا داب و نەریت و كەلتوورێ گەلێ كوردستانێ كریە.
دوهی ئێكشەمبی 11/5/2025، سەرۆك بارزانی د پەیامەكێدا، سالڤەگەرا 32 یا دامەزراندنا بنگەهێ لالش یێ رەوشەنبیری و جڤاكی ل سەرۆك، ئەندامێن دەستەیا بلند، كادرێن بنگەهی و هەموو هەڤوەلاتیێن ئێزدی پیرۆزكر.
سەرۆك بارزانی د پەیاما خوە دا ئاماژە ب وێ چەندێ كر» ل سالێن بۆری، بنگەهێ لالش ب رێكا كار، چالاكی، كۆنفرانس، پڕۆژە، فەستیڤالێن زەنگین، چاپكرنا پرتووكان، هاریكارییا رزگاربوویێن ژ دەستێ داعشێ و چەندین كارێن رەوشەنبیری، هونەری و راگەهاندنێ، خزمەتەكا بەرچاڤ یا جڤاكێ ئێزدیاتیێ كریە و كار بۆ پاراستنا داب و نەریت و كەلتوورێ گەلێ كوردستانێ كریە».

دوهی ئێكشەمبی 11/5/2025، مەسرور بارزانی، جێگرێ سەرۆكێ پارتی دیموكراتی كوردستان، د چارچۆڤەیێ سەرەدانەكێدا بۆ دهۆكێ ل گەل مەكتەبا رێكخستنا پارێزگەها دهۆكێ یا پارتی كۆمبوو.
د كۆمبوونێدا، جێگرێ سەرۆكێ پارتی ئاماژە ب وێ چەندێ كر كو پارتی ب رێبەرییا سەرۆك بارزانی، ئەڤرۆ مەزنترین و ب هێزترین حزبا كوردستانێ وئێراقێیە و خودان دیرۆكەكا پڕ سەروەرییە، لەوما دڤێت ئەندام و كادر و لایەنگرێن پارتی ل ئاتستێ مەزنییا پارتیدا بن و هەردەم ل گەل حەماوەری و خواست و داخوازیێن رەوا یێن خەلكێ كوردستانێ بن.
جێگرێ سەرۆكێ پارتی، دوپاتكر ژی كو پارتی حزبا هەموو دەڤەرێن كوردستانێیە و خەلكێ بەهدینان ژی، قوربانییەكا مەزن ژ پێخەمەت كوردستانێ دایە و پێگەهەكێ تایبەت ل دەف پارتی یێ هەی، لەوما پێدڤییە بەرپرسێن پارتی، زێدەتر خزمەتا خەلكی بكەن.

سەرۆكێ حوكمەتا هەرێما كوردستانێ راگەهاند: د پرسا مووچەیاندا، حوكمەتا هەرێما كوردستانێ هەموو پێگیریێن خوە یێن بجهئیناین و داخواز ژی ژ حوكمەتا فیدرالی كر، مووچەیان نەكەتە پرسەكا سیاسی. هەروەسا دیاركر ژی كو هەتا دووماهییا سالا بهێت پڕۆژەیێ (رۆناهی) یێ كارەبا 24 ساتی دێ هەموو گوند و باژێران ڤەگریت.
دوهی ئێكشەمبی 11/5/2025، مەسرور بارزانی، سەرۆكێ حوكمەتا هەرێما كوردستانێ د چارچۆڤەیێ سەرەدانەكێدا بۆ كارەبا 24 ساتی ل تاخێ بەرۆشكێ ل باژێرێ دهۆكێ د داخۆیانییەكا رۆژنامەڤانیدا باسێ پڕۆژەی و مووچەیێن مەها نیسانێ یێن فەرمانبەرێن هەرێما كوردستانێ كر.
ل دۆر مووچەیێن مەها نیسانێ یێن فەرمانبەرێن هەرێما كوردستانێ، مەسرور بارزانی، سەرۆكێ حوكمەتا هەرێمێ گۆت» بزاڤێن مە ل گەل حوكمەتا فیدرالی بۆ دابینكرنا مافێن خەلكێ هەرێما كوردستانێ د بەردەوامن. سوپاسییا خۆڕاگری و بێهنفرەهییا فەرمانبەران و خەلكێ هەرێما كوردستانێ دكەم كو هەتا نوكە گەلەك بێهنفرەه بووینە، بەلێ پێدڤییە ئەوژی بزانن، حوكمەتا فیدرالییە هەتا نوكە مووچە نە هنارتین».
سەرۆكێ حوكمەتا هەرێما كوردستانێ دوپاتكر» د پرسا مووچەیێن فەرمانبەران، حوكمەتا هەرێما كوردستانێ هەموو ئەركێن خوە یێن بجهئیناین، هیڤیدارین حوكمەتا فیدرالی ژی بهێتە پێش و ئەو ژی ئەركێ خوە بجهبینیت و ئێدی بابەتێ مووچەیان نەكەنە پرسەكا سیاسی و وەك فشار ل دژی هەرێما كوردستانێ بكارنەئینن. هیڤیدارین ب زووترین دەم بهێنە خەرجكرن و ئەم ژی چاڤەڕێ دكەین».
هەتا نوكە وەزارەتا داراییا ئیراقێ مووچەیێن مەها نیسانێ یێن فەرمانبەرێن هەرێما كوردستانێ نەهنارتینە، سەرەرای وێ چەندێ زێدەتر ژ 20 رۆژایە لیستا مووچەیێن وێ مەهێ یێن فەرمانبەرێن هەرێمێ ل رۆژا 22/4/2025 ژ ئالیێ تیما تەكنیكییا وەزارەتا دارایی و ئابوورێ ل هەرێما كوردستانێ رادەستی ژمێریارییا وەزارەتا داراییا حوكمەتا فیدرال هاتیە كرن.
ل هەمان رۆژ، پشكا گەنجینەیا فیدرالی ژ داهاتێ نەپەترۆلیێ هەرێما كوردستانێ بۆ مەها ئادارا ئەڤسالە، كو گۆژمەیێ وی 48 ملیار و 205 ملیۆن و 765 هزار دینارن، ب شێوەیێ كاش كەفتە سەر هەژمارا بەنكییا وەزارتا داراییا حوكمەتا فیدرالی ڤە ل لقێ هەولێرێ یێ بەنكا ناڤەندییا ئیراقێ.
ل دۆر كارەبا 24 ساتی ژی، سەرۆكێ حوكمەتا هەرێمێ دیاركر كو بهایێ كارەبێ بۆ پترییا هەڤوەلاتییان دێ یێ گونجای بیت و كێمتر بیت ژ وی بهایێ نوكە یێ كارەبا موەلیدەیان و كارەبا نیشتمانێ پێكڤە و گۆت»هەمبەركرن ب پێشتر، د پڕۆژەیێ رۆناهیدا، هەڤوەلاتیێن هەرێما كوردستانێ دێ خودان كارەبا 24 ساتی بن و دێ كێمتر پارەی ب كارەبێ دەن».
هەڤدەم داخواز ژ هەڤوەلاتییان كر، زێدەبوونێ د خەرجكرنا كارەبێدا نەكەن و ل گەل حوكمەتێ د هاریكار بن.
سەرۆكێ حوكمەتا هەرێما كوردستانێ ل تاخێ بەرۆشكێ سەرەدانا هەژمارەكا مالان و دۆكانان و فرۆشگەهان و سەمۆنخانەیان كر كو دەمەكە د چارچۆڤەیێ پڕۆژەیێ (رۆناهی) كارەبا وان بوویە 24 ساتی و ژ نێزیك گوه ل سەرنج و تێبینیێن هەڤوەلاتییان ل دۆر پڕۆژەی گرت.
ل دۆر بەرفرەهبوونا پڕۆژەیێ (رۆناهی) یێ كارەبا 24 ساتی، مەسرور بارزانی ئاماژە ب وێ چەندێ كر» هەتا دووماهییا سالا 2025، ناڤەندێن باژێرێن دهۆك، هەولێر و سلێمانیێ ب تمامی دێ كارەبا 24 ساتی هەبیت. پاشی هەتا دووماهییا سالا داهاتی، دێ ئەڤ پڕۆژە هەموو گوند و باژێرێن هەرێما كوردستانێ ڤەگریت».
حوكمەتا هەرێما كوردستانێ ل دۆر سەرەدانا سەرۆكێ حوكمەتا هەرێمێ بەلاڤكر» هەڤوەلاتییان خوەشحالییا خوە ب ئەنجامدانا پڕۆژەیێ (رۆناهی) نیشادا و دەستخوەشی ل حوكمەتا هەرێمێ كر بۆ بجهئینانا ڤی پڕۆژەیێ نیشتمانی كو هەموو هەرێما كوردستانێ ڤەدگریت».
رۆناهی، پڕۆژەیەكێ نیشتمانیێ حوكمەتا هەرێما كوردستانێیە كو بڕیارە هەتا دووماهییا سالا 2026 كارەبا 24 ساتی بگەهینیتە هەموو هەڤوەلاتیێن هەرێمێ، ناڤەندێن باژێرێن دهۆك، هەولێر و سلێمانیێ هەتا دووماهییا سالا 2025 ب تمامی دێ كارەبا 24 ساتی هەبیت و هەتا دووماهییا 2026 هەموو باژێرك و گوندێن كوردستانێ دێ بنە خودان كارەبا 24 ساتی.
ل دووڤ پێزانین و ئامارێن تیما پڕۆژەیێ (رۆناهی) هەتا ئەڤرۆ 600 هزار هەڤوەلاتیێن هەرێما كوردستانێ یێن بووینە خودان كارەبا 24 ساتی. د ڤێ مەهێدا زێدەتر ژ 500 هزار هەڤوەلاتیێن دی ل هەولێرێ و دهۆكێ و سلێمانیێ دێ مفادار بن ژ كارەبا بێ ڤەقەتییان و ب ڤێ چەندێ ژی هەژمارا هەڤوەلاتیێن مفادار دێ گەهیتە زێدەتر ژ ئێك ملیۆن كەسان، هەروەسا زێدەتر ژ 500 موەلیدەیێن ئەهلی یێن هاتینە ڤەمراندن و هەتا دووماهییا سالا 2027 زێدەتر ژ 7 هزار موەلیدەیێن تایبەت دێ هێنە ڤەمراندن و حوكمەتا هەرێما كوردستانێ بەرپرسیارەتییا تمام ژ داینكرنا كارەبا 24 ساتی ل ستوویێ خوە دگریت كو ل ڤێ حەفتیێ جڤاتا وەزیرێن هەرێما كوردستانێ دێ دەنگی ل سەر بهایێ نوو یێ كارەبێ دەت.
بنەمایێن دیاركرنا بهایێن كارەبێ دێ وەكو خوە مینن كو مال و بازرگان دێ كێمتر پارەی دەن، ب تایبەتی ئەوێن كێمتر بكاردئینن، هەروەسا د پڕۆژەیێ (رۆناهی) دا هەڤوەلاتی دێ پارەیێن كێمتر دەن د دەمەكیدا 24 ساتان كارەب یا هەی و هەڤوەلاتی ب خوە بەرپرسە ژ كارئینانا كارەبا خوە، چەند كێمتر بكاربینیت، دێ كێمتر پارە هێت، هەروەسا بڕیارە حوكمەت پشتەڤانییا زێدەتر یا وان مالان و یەكەیێن بازرگانی یێن بچووك بكەت، ب تایبەت بۆ ئەوێن كارەبایەكا كێكتر بكاردئینن.

برێكارێ بەرێ یێ وەزارەتا داراییا ئیراقێ، ئاشكراكر: هنارتنا مووچەیان بۆ هەرێما كوردستانێ د دەستهەلاتا وەزیرا داراییا ئیراقێدا نینە، بەلكو دەستهەلاتا سەرۆك وەزیرێن ئیراقێدایە.
رێباز حەملان، برێكارێ بەرێ یێ وەزارەتا داراییا ئیراقێ گۆت» كێشەیا نە هنارتنا مووچەیێن هەرێما كوردستانێ یا سیاسییە، نێزیكی 20 رۆژە لیستا مووچەیێن مەها نیسانێ یێن هەرێما كوردستانێ یا هاتیە هنارتن بۆ بەغدا و یا هاتیە پەسەندكرن ژی».
بریكارێ بەرێ یێ وەزارەتا داراییا ئیراقێ گۆت ژی» وەزارەتا داراییا فیدرالی، هیچ تێبینییەك ل سەر لیستا مووچەیێن مەها نیسانێ یا فەرمانبەرێن هەرێما كوردستانێ نینە، تنێ یا راگەهاندی كو فەرمان یا پێ هاتیە دان تەمویلا مووچەی بۆ هەرێما كوردستانێ بكەن».
ل دۆر میكانیزمێن هنارتنا مووچەیان بۆ هەرێما كوردستانێ، رێباز حەملانی ئاشكراكر» میكانیزم ب وی شێوەیە ل دەستپێكێ دڤێت سەرۆك وەزیرێن ئیراقێ، فەرمانێ بدەتە وەزیرا دارایی مووچەیێن هەرێما كوردستانێ ب هنێریت، بەلێ هەتا نوكە ئەو كارە نەهاتیە كرن».
دیاركر» هنارتنا مووچەیان بۆ هەرێما كوردستانێ د دەستهەلاتا وەزیرا داراییا ئیراقێدا نینە، بەلكو دەستهەلاتا سەرۆك وەزیرێن ئیراقێیە، هەكە سەرۆك وەزیران فەرمانێ بدەت بۆ هنارتنا مووچەیان، وەزیرا دارایی ب هیچ شێوەیەكی نەشێت رەت بكەت».
هەڤدەم خویاكر ژی» بەغدا بەردەوام مووچەی وەك كارەتەكا فشارا سیاسی بەرانبەر هەرێما كوردستانێ بكاردئینیت و ئیراقێ كێشەیا نەختینەیێ نینە و ئەو ئاخڤتنێن سەبارەت وێ چەندێ دهێنە كرن د دوورن ژ راستیێ».
ل دۆر حوكمەتا هەرێما كوردستانێ، رێباز حەملانی گۆت» حوكمەتا هەرێمێ ل سالا 2025 هەر چ تێبینی و سەرنج و داخوازییا بەغدایێ هەی، یێن بجهئیناین و دیوانا چاڤدێرییا داراییا فیدرالی ژی دانپێدان یا ب وێ راستیێ كری».

سەرۆك بارزانی د دیدارەكا تایبەتدا ل گەل كەنالێ (شەمس) ل بەرنامەیێ»The Capitol Hill Show» كو ژ ئالیێ رۆژنامەڤان ( تیم كنستانتین) هاتە پێشكێشكرن، پێزانیێن دیرۆكی یێن گرنگ و بۆچوونێن خوە بۆ رەوشا نوكە و داهاتییا كوردستانێ بەرچاڤكرن.
سەرۆك بارزانی د وێ دیدارێدا ئاماژەكر كو مەلا مستەفا بارزانی وەكو سەركردە، كاریگەرییەكا مەزن ل سەر ئاڤاكرنا كەسایەتییا وی هەبوو، هەروەسا دیاركر دەمێ بابێ وی چوویە ئێكەتییا سوڤیەتی، ژیێ وی تنێ شەش مەه بوو، دەمێ زڤری ژی ژیێ وی ببوو 12 سال، بەلێ هەر زوو زانی ژ پێخەمەت دۆزا گەلێ خوە پەنا بۆ وی وەلاتی بربوو.
سەرۆك بارزانی گۆت ژی» كورد ب درێژییا دیرۆكێ، تووشی ئازار و ئەشكەنجێ بووینە و د دەمێ دیرۆكا خەباتا نەتەوەییدا كارەساتێن مەزن ب سەردا هاتینە، بۆ نموونە: ئەنفال و جینۆساید وهێرشێن كیمیاوی، بەلێ خالەكا گرنگ یا هەی كو گەلێ كورد سەرەرای هەموو وان دوژمنكارییان هیچ دەمەكی بێ ئومێد نەبوویە، بەلكو هەردەم یێ گەشبین و ئومێدەوار بوو كو دێ گەهیتە ئارمانجێن خوە، ئەڤە ژی بۆ بەرخوەدانا هەموو گەلێ كورد دزڤریت و ژ پێخەمەت ڤێ چەندێ ژی خەلكەكێ زۆر گیانێ خوە بەخشی، ئەو رەوشا هەی ژی بەرهەمێ خەبات و خوینا هزاران كەسێن گیانێ خوە بەخشی و ئەڤ رەوشە جهێ شانازیێیە، ب تایبەت كو منەتا هیچ كەسەكی تێدا نینە و بەرهەمێ خوینا شەهیدانە».
سەرۆك بارزانی باس ل وێ چەندێ ژی كر» كورد نەتەوەیەكە ژ كەڤندا هەبوونا دیرۆكی ل ڤێ دەڤەرێ یا هەی هەتاكو گەلەك بەری نەتەوەیێن دی یێن دەڤەرێ ل ڤێرێیە، بەلێ ب درێژییا دیرۆكێ ستەم لێ هاتیە كرن ب تایبەتتر پشتی شەڕێ جیهانیێ ئێكێ، ب شێوەیەكی بێی كو پرس پێ بهێتە كرن، هاتە پارچەكرن. هەڤپەیمانێن سەركەفتی د وی شەڕیدا بۆ جارا ئێكێ د چارچۆڤەیێ رێككەفتنا سیڤەر دا ماف ب كوردان دان، بەلێ پاشتر ل پەیمانا لۆزان پەشێمان بوون، راستییا ڤێ پارچەكرنێ رەوشەكا تەحل بۆ كوردان دروستكر و بجه هێلا. كورد دزانن گوهۆڕینا ڤێ رەوشێ یا ب ساناهی نینە، بەلێ رامانا وێ چەندێ نینە ژ مافێن خوە بهێنە بێبەهركرن. گەلێ كورد وەكو نەتەوە ستەمەكا مەزن لێ هاتیە كرن، بەلێ ژ بەر كو یێ ئاشتیخوازە، ناخوازیت ئەڤ رەوشا تەحل ب زۆری بهێتە گوهۆڕین، بەلكو دخوازیت ل گەل مللەت و نەتەوەیێن دەڤەرێ پێكڤە ژیانەكا بەختەوەر و ب شێوەیەكێ دیموكراسی و ئاشتییانە مافێن خوە بكاربینیت، بلا د چارچۆڤەیێ وان دەولەتاندا ژی بمینیت كو ب سەردا هاتیە پارچەكرن، بەلێ نابیت هەتا هەتایێ ژ مافێن خوە بێبەهر ببیت».
سەرۆك بارزانی ل دۆر سووریێ و پێشهاتێن وی وەلاتی گۆت» ئەو گوهۆڕینا ل وی وەلاتی روودای، یا پێشبینیكری بوو، بەلێ نە ب وێ لەزاتیێ، ئەوا روودای گوهۆڕینەكا مەزنە و وەرچەرخانەیەكا دیرۆكییە ل دەڤەرێ، پاشخانەیا سەركردایەتییا نوو یا سووریێ دزانین، بەلێ دەمێ دەستهەلات وەرگرتی، پەیاما ئەرێنی بۆمە هنارت، هەرچەندە هەتا نوكە مە پەیوەندییا راستەوخوە نینە، بەلێ ب شێوەیەكێ نەراستەوخوە مە پەیوەندی یێن هەین، پەیاما وان بۆمە یا ئەرێنییە، كو دخوازن ئاشتی ل وەلاتێ وان بەرقەرار بییت و شەڕ نەبیت و دخوازن ل گەل كوردان بگەهنە تێكگەهشتنێ، ل سەر ڤی بنەمای مە بزاڤ ل گەل كوردێن سووریێ كر وان ئێك هەلوەست هەبیت و ئێك بوچوون بۆ داخوازیێن كوردان ژ حوكمەتا نوو یا سووریێ هەبیت. ل 26 نیسانا 2025 كۆنفرانسەك ل قامشلۆ هاتە گرێدان، كورد د وی كۆنفرانسیدا رێككەفتن كو ئێك هەلوەست هەبیت و ب ئێك هەلوەستی ژی بچنە دیمەشقێ، ئەم ژی پشتەڤانیێ ل وێ چەندێ دكەین كو چارەسەرییا كێشەیان ب ئاشتییانە بهێتە كرن».
سەرۆك بارزانی سەبارت پەیوەندیێن د ناڤبەرا هەرێما كوردستانێ و ئیرانێدا دیاركر ل مهابادێ كو باژێرەكێ كوردییە یێ ژدایكبووی و گۆت» ب گشتی ئیران دەولەتەكا گرنگ یا دەڤەرێیە و هەڤسنوورا هەرێما كوردستانێیە كو چ جاران نەخواستییە كێشە ل گەل ئیرانێ هەبیت، بەلێ دڤێت پەیوەندی ل سەر بنەمایێ رێزگرتنا دو ئالییانە و بەرژەوەندیێن هەڤپشك بیت. هەرێما كوردستانێ هیچ دەمەكی ناخوازیت كێشە ل گەل ئیرانێ هەبن، بەلێ د هەمان دەمدا ناخوازیت نە ئیران و نە هیچ وەلاتەكێ دی دەستێ خوە بێخیتە د ناڤ كاروبارێن ناڤخوەییدا. هندەك جاران گرفت كەفتینە د پەیوەندییاندا، بەلێ نوكە د ئاسایی نە و د باشن و ناخوازین كەس دەستێوەردانێ د كاروبارێن مە یێن ناڤخوەییدا بكەت».
هەڤدەم ل دۆر پەیوەندیێن د ناڤبەرا ئەمریكا و ئیرانێدا ژی، سەرۆك بارزانی راگەهاند» چارەسەركرنا كێشەیان د ناڤبەرا دو وەلاتاندا یان ژی د ناڤبەرا ئالییاندا ل سەر بنەمایێ دانوستاندنێ گەلەك باشترە ژ وێ چەندێ پەنا بۆ شەڕی بهێتە برن وەك ئامرازەك بۆ چارەسەریێ. هەرێما كوردستانێ ئومێدەوارە ئەنجامەكێ باش بۆ دانوستاندنێن د ناڤبەرا ئەمریكا و ئیرانێدا هەبیت، كو بەرژەوەندییا گەلێ ئیرانێ و هەموو گەلێن دەڤەرێ تێدا بیت و ببیتە ئەگەرێ زڤراندنا تەناهی و ئارامییا دەڤەرێ، ئانكو رێككەفتنەك نەبیت ل سەر حیسابا خەلكێ دی».
سەرۆك بارزانی ل دۆر هەلوەستێ سەرۆكێ ئەمریكا، دۆنالد ترەمپ، كو دبێژیت دڤێت ئیران یا ڤالا بیت ژ ئەتۆمی. گۆت» ئەز د بابەتێ ئۆتۆمیدا گەلەك یێ شارەزا نینم و ئایا ب چ شێوەیەكی یە؟ بەلێ جارەكادی دبێژین ئەم ل گەل وێ چەندێ داینە كێشە ب دانوستاندنان بهێنە چارەسەركرن، دوپات دكەین ژی، ئەڤە رێككەفتنەك نەبیت كڕین و فرۆشتنا خەلكێ دی تێدا بیت».
سەرۆك بارزانی د بەرسڤا پرسیارەكا گرێدای ب پەیوەندیێن هەرێما كوردستانێ و ئەمریكا ڤە گۆت» دڤێت ئەم ب ویژدان بین، ئەو رەوشا تە نوكە دیتی، هەكە تە بەری 20 یان30 سالان دیتبا، دا هەولێرەكا دی بینی، ل سالا 1991 هەكە ئەمریكا نەبا، ئەو دەلیڤەیە بۆمە پەیدا نەدبوو، كو ئەم بشێین وەلاتێ خوە ئاڤا بكەین و بایێ ئازادیێ هەلكێشین، ئەمریكا و هەڤپەیمانێن وێ بوون دەڤەرا دژەفڕین دانای. جارەكادی ئەمریكا ل شەڕێ داعشێ ل سالا 2014 پشتەڤانییا هەرێما كوردستانێ كر و پشتەڤانییەكا گەلەك كاریگەر بوو و پێشمەرگەی شیا ئەفسانەیا داعشێ بشكێنیت، بەلێ د گەل ڤێ چەندێ ژی دا ڤان پەیوەندییان ئەڤرازی و نڤیشی تێدا هەبوو، پەیوەندیێن مە د باشن، بەلێ چاڤێ مە ل وێ چەندێیە باشتر ژی بن».
سەرۆك بارزانی ل دۆر كەسایەتییا دۆنالد ترەمپی، گۆت» مخابن من هەتا نوكە نەدیتییە، بەلێ ب پشتڕاستیڤە شێوازێ كاركرنا وی ژ سەرۆكێن بەری وی یێ جودایە، هیڤیدارین ترەمپ و گەلێ ئەمریكا سەركەفتی بن، هندەك تشتێن ترەمپی گەلەك ب دلێ منن، بۆ نموونە هندەك بڕیار دەركرن، ئەز پشتەڤانیێ لێ دكەم و ب دیتنا من ئەو بڕیار گەلەك د جهێ خوەدا بوون».
پرسا غەزە ئێك بوو ژ وان پرس و تەوەرێن سەرۆك بارزانی د دیدارێدا رۆناهی ئێخستییە سەر بزاڤێن ئەمریكا و مسرێ و هەڤپشكێن وان بۆ ئاگربەستێ و گۆت» یا دیارە ئەوا ب ئەمریكا دهێتە كرن ل سەرانسەرێ جیهانێ، ب كەسەكێ دی ناهێتە كرن، ژ بەر وێ چەندێ ئەڤ شەڕێ هەی كارەساتە و هەكە چارەسەرییا ئاشتییانە ل دەڤەرێ ب ئەمریكا نەهێتە كرن، باوەر ناكەم ب هیچ ئالییەكێ دی بهێتە كرن، هەرێما كوردستانێ پێ خوەشە و پشتەڤانیێ ل هەر پێنگاڤەكێ دكەت بۆ وێ چەندێ چارەسەرییا ئاشتییانە پەیدا ببیت».
د بەرسڤا پرسیارا كەنالێ (شەمس) دا، ئایا غەزە چاوان دشێت چاڤ ل هەرێما كوردستانێ بكەت، كو سەرەرای وێ چەندێ تووشی ستەمێ بوویە، بەلێ نوكە خودانا ئابوورەكێ باشە؟ سەرۆك بارزانی گۆت» خەلكێ كوردستانێ خودان فەرهەنگەكا زەنگینە، كو پێك دهێت ژ پێكڤەژیانێ و قەبوولكرنا هەڤدو، ب درێژییا دیرۆكێ ل كوردستانێ كێشەیەك نەبوویە ل سەر پرسا ئایینی یان مەزهەبی ل گەل هیچ مللەتەكێ دی و ئایین و مەزهەبەكێ دی، ئەڤە ژی بۆ كوردستانێ گەلەك هاریكار بوویە، بۆ وێ چەندێ چەندین كێشەیێن مەزن دەرباز بكەت، بۆ نموونە رژێما ئیراقێ ل سالێن حەفتییان و هەشتییان ژ چەرخێ بیستێ هەموو تشتەك دژی كوردستانێ كر ( ئەنفال، كو بوو ئەگەرێ بێسەروشوینبوونا 180 هزار كوردان، هەروەسا كیمیاباران، كو د چەند چركەیاندا پێنج هزار ژن و زارۆك ل هەلەبجە شەهید بوون، هەتا سەرانسەری كوردستانێ ب چەكێ كیمیاوی بۆمبەبارانكر، بەلێ ئەوا هەلبەجە زیانەكا گەلەك مەزن بوو، بەری وان روودانان، فەیلی، چونكە كورد بوون، رژێما ئیراقێ 12 هزار گەنجێن فەیلی بێسەروشوینكرن، هەروەسا هەشت هزار بارزانی هاتنە بێسەروشوینكرن، ئانكو سەرجەمێ گشتی 182 هزار كەس ل كوردستانێ هاتنە بێسەروشوینكرن، كو گەلەك ژ وان ژن و زارۆك بوون)، بەلێ ل سەرهلدانا ئادارا 1991 خەلكێ كوردستانێ كو لەشكرێ ئیراقێ ل شەڕێ كوەیتێ شكەست، تۆلڤەكرن ل گەل نەكر، بەرۆڤاژی هەموو ئەو سەربازێن تاوان ل دژی كرین، ئازاد كرن، ئەڤە تشتەكێ گەلەك مەزن بوو و من ب خوە پێشبینی نەدكر گەلێ كورد ب ڤی رادەی و ئەندازەی یێ ب لێبۆرین بیت و پێگیری وێ فەرهەنگا خوە بیت، ب راستی تو هندەك جاران تووشی شەڕان دبی، لەوما نەچاردبی بەرگریێ بكەی، د دەمەكیدا شەڕ ژ هەموو تشتەكی خرابترە، بەلێ یا ژ شەڕی خرابتر ئەوە مرۆڤ خوە رادەست بكەت و ل بەرانبەر زۆرداری خوە ب دەستڤە بدەت، بەلێ تو بچی شەڕەكی دروست بكەی، شاشییەكا مەزنە، ئەم هیچ دەمەكی نەچووینە شەڕی دروست بكەین، بەلكو مە بەرگرییا كری و مە تۆلڤەكرن ژی نەكریە و مە پەنا بۆ تۆلڤەكرنێ ژی نەبریە، بەلكو گەلێ مە بەردەوام لێبۆرین ل دەف هەبوو، ئەو دشێن ژ ڤێ چەندێ مفای ژ ئەزموونا كوردستانێ وەربگرن».
سەبارەت كلیلا سەركەفتنا ئابووری ل هەرێما كوردستانێ، سەرۆك بارزانی گۆت» پێدڤییە ل سەر هەر كەسەكی وەلاتێ خوە خوەش بڤێت، خەلكێ هەرێما كوردستانێ ژی یا سەلماندی كو وەلاتێ خوە خوەش دڤێت. حوكمەتا هەرێما كوردستانێ و ئەوێن ل كەرتێ تایبەتدا كار دكەن، هەمویان بزاڤكریە وەلاتێ خوە ئاڤەدان بكەن. بۆ زانین چار هزار و 500 گوندێن كوردستانێ هەتا سەرهلدانا 1991 ژ ئالیێ رژێما ئیراقێ ڤە هاتبوونە وێرانكرن و هەموو خەلكێ وان هاتبوونە دەربەدەركرن. هندەك جاران دەمێ من ل وان گوندان دنێری، من باوەر نەدكر بشێین ڤی وەلاتی ئاڤەدان بكەین، نوكە دەمێ وان جهان دبینم، مرۆڤ باوەر ناكەت ئەڤ هەموو گوند و دەڤەرە یێن هاتینە ئاڤەدانكرن، ب راستی ژی ئەڤە هەموو ب هیممەتا خەلكی بوو كو هەڤدەم دۆستێن مە ژی هاریكارییا مە كر. مە وەلاتەكێ گەلەك زەنگین یێ هەی، بەلێ مە دەلیڤە نەبوو مفای ژ ڤێ زەنگینییا وەلاتێ خوە وەربگرین. بۆ نموونە ئیراق كو ل سەر پەترۆلا كوردستانێیە و وەكو دەولەت هاتیە دامەزراندن، مە خێر ژ ڤێ پەترۆلێ نەدیت، هەموو دبوو پارە و بۆمب و تانك و فرۆكە پێ دهاتنە كڕین و ئەم پێ تۆپباران دكرین. پشتی ژناڤچوونا رژێما ئیراقێ ل سالا 2003، دەلیڤەیەكا زێرین بۆ هەموو ئیراقێ هاتە پێش، ئەم ژی ب هەموو هێزا خوە چووینە بەغدایێ و ب بڕیارا پەرلەمانێ كوردستانێ و ب هاریكارییا هەڤپەیمانان و دۆستان ئیراقەكا نوو دروست بكەین، تاكو گەهشتە وێ چەندێ ل سالا 2005 دستوورەك بۆ ئیراقێ بهێتە دانان، كو بۆ وی دەمی و بۆ نوكە ژی ئەڤ دستوورە گەلەك یێ باشە هەكە بهێتە بجهئینان، بەلێ مخابن پێگیری دستووری نەبوون. ئەو پێشكەفتنا هوون دبینن ئەڤرۆ كوردستان تێدا، یا بێ ئاستەنگ و گرفت نەبوو، ب تایبەتی كو بەغدایێ ژ 2014 و وێڤە بودجەیا هەرێما كوردستانێ یا بڕی، بهایێ پەترۆلێ هاتە خوار، پاشی كۆرۆنا هات، بەری وێ ژی شەڕێ داعشێ ل سەر كوردستانێ هات، ئەڤە هەموو هۆكار و ئاستەنگ بوون بۆ وێ چەندێ ئەڤ پێشكەفتنا هەی هەتا رادەیەكی ب راوەستیت و سست ببیت و وەكو بەرێ نەمینیت، كو مە بۆ د خواست، بەلێ ل گەل ڤێ چەندێ ئەڤە بۆ هیممەتا خەلكی دزڤریت، كو هەرچەندە ئاستەنگ گەلەك بوون، بەلێ خەلك د ئاڤەدانكرنا وەلاتێ خوەدا نە راوەستییا».
سەبارەت سەرنجا كەنالێ (شەمس) ل دۆر پێشكەفتنا وارێ پەروەردەیی ل هەموو هەرێما كوردستانێ، سەرۆك بارزانی دیاركر» پێشكەفتنا هەر وەلاتەكێ گرێدایە ب ئاستێ زانستی، زانست ژی بێی پەروەردە، پەروەردە ژی بێی قوتابخانە و زانكۆ نابیت، هەتاكو ل سەردەمێ شۆڕەشا ئیلۆنێ كو رەوشا شۆڕەشێ و كوردستانێ ب گشتی یا باش نەبوو، بەلێ ل بن تۆپبارانكرنا فرۆكەیێن حوكمەتا ئیراقێ خواندن یا بەردەوام بوو و شكەفت ببوونە قوتابخانە و زارۆك تێدا فێری زانستێ و پەروەردەیێ دكرن، ئەم هەست ب گرنگییا خواندنێ دكەین و مللەتەكێ خویندەوار دشێت پێش بكەڤیت و یێ نەخویندەوار دێ هەر یێ پاشڤەمای بیت».
ب ئینانا ناڤێ سەرۆكێ ئەمریكی یێ بەرێ جۆرج بۆش ژ ئالیێ كەنالێ (شەمس) ڤە، تەوەرەكێ دی یێ پرسیاران بوو كو ئاراستەی سەرۆك بارزانی هاتیە كرن و د بەرسڤێدا گۆت» سەرۆك بۆش جهێ رێز و سوپاسیێیە بۆ من و بۆ هەموو مللەتێ كورد، دۆستەكێ گەلەك ب رێز و مەزنە».
د بەرسڤا پرسیارەكێدا سەبارەت كەلتوورێ كوردی، سەرۆك بارزانی گۆت» ژ بەر كو دەلیڤە ب كوردان د وارێن سیاسی، بازرگانی و وارێن دی نەدهاتە دان ب ئازادی كار بكەت، لەوما سەرنجا مەزن ئێخستە سەر كەلتووری، كو د ڤێ چەندێ دا هەتا رادەیەكی رێك لێ نەهاتە گرتن وەك وارێن دی ئەوێن رێك لێ هاتیە كرن، ب راستی ژی كورد خودان كەلتوورەكێ زەنگینە كو هندەك ژی یێ تایبەتمەندە ب وی ب خوەڤە».
سەرۆك بارزانی ئاماژە كر ژی» من باوەرییەكا تمام یا هەی، مافێ چارەنڤیس، مافەكێ سروشتیێ نەتەوەیا كوردە، دخوازم رۆژەك بهێت كورد ژی وەكو هەر نەتەوەیەكێ دی ئازاد و سەربخوە بیت، بەلێ ئایا ئەڤە 10 سالێن دی یان 100 سالێن دی دێ ب دەستڤەهێت؟ نزانم و خودێ دزانیت».
سەرۆك بارزانی رۆهنكر ژی» د ژیانا خوە دا من ئێك تشت ژی نەكریە كو من باوەری پێ نەبیت، ژ بەر وێ چەندێ هزر دكەم ژ چ پەشێمان ببم، كو هیچ تشتەك نینە لێ پەشێمان ببم، بەلێ هەكە مرۆڤ بزڤریتە پێش، گەلەك تشت یێن هەین ئەوا نوكە دزانم، وی دەمی من زانیبا، دبیت ب شێوەیەكێ دی من رەفتار ل گەل كربا، ب گشتی خوەشترین قۆناغ دشێم بێژم دەمێ سەرهلدانا ئادارا 1991 بوو، كو دەلیڤەیەكا دی بۆ خەلكێ كوردستانێ هاتە پێش ژ ستەما زۆرداران رزگار بوو و ئەڤە رەوشە ژێ پەیدابوو، كو ئەو جوانترین قۆناغ بوو. بەری وێ ژی دەمێ ئەز زارۆك، كو ژیێ من 10- 12 سال بوو، ل سالا 1958 بابێ من ژ ئێكەتییا سوڤیێەتی زڤری و مامێ من شێخ ئەحمەدێ بارزانی ژ زیندانێ هاتیە ئازادكرن و جارەكادی رێ ب مالێن مە هاتە دان بزڤرینە جهێن خوە ل دەڤەرا بارزان، ئەو دەمە ژی گەلەك یێ خوەش بوو، بەلێ وی دەمی ئەز یێ بچووك بووم، بەلێ قۆناغا سەرهلدانێ گەلەك یا خوەش بوو».