ئەندامەكێ كۆمیتەیا ناڤین یا پارتی دیموكراتی كوردستان دیار كر كو پارتی بۆ هەر بزاڤەكا چارەسەركرنا قەیرانان ئامادیە، لێ هێشتا بەرهەڤی بۆ كۆمبوونا گۆپیتكێ نەهاتینە كرن چونكی ئەو كۆمبوونە ل دووماهیێ دهێتە سازكرن و پێتڤی ب بڕیارێن بنەڕەتییە دیسان ناڤهاتی ئەو تۆهمەتێن كو دبێژن جوداهی د ناڤبەرا پارێزگەهان دا دهێتە كرن رەت كر و دیار كر كو بەلاڤکرنا بودجەی ل سەر بنەمایێ جوگرافی و رێژەیا ئاكنجییان و داهاتی دهێتە دیاركرن زێدەباری هندێ كو ئێكەتیێ بابەتێ وەزارەتا ناڤخۆ وەك بەهانە بكارئینایە بۆ داخوازییا چەندین پۆستێن دی یێن بلند وەك سەرۆكایەتییا هەرێمێ و سەرۆكاتییا جڤاتا دادوەریێ.
مەحەمەد خورشید، ئەندامێ كۆمیتەیا ناڤین یا پارتی گۆت «پارتی ئامادەیا خۆ یا تەمام دیاركریە بۆ هەر بزاڤەكێ كو ببیتە ئەگەرێ چارەسەركرنا قەیرانان و كۆمبوونا گۆپیتكێ بەردەوام ل دووماهیێ دهێتە كرن پشتی كو بڕیارێن دووماهیێ ل سەر بابەتان دهێنە دان لەوما هێشتا بەرهەڤكاری بۆ وێ نەهاتینە كرن و دیار نینە كا كەنگی و ل كیڤە دێ هێتە ئەنجامدان و پارتی چ ئاستەنگان ل پێش كۆمبوونان ل گەل چو ئالییەكی نابینیت و سەركردایەتییا پارتی بەردەوام ل گەل بەرپرسێن ئالیێن دی كۆم دبیت».
سەبارەت ب كاراكرنا پەرلەمانی ناڤهاتی ئاشكرا كر» چونكی ئالی ل دەرڤەی پەرلەمانی ناگەهنە رێككەفتنان بلا پەرلەمان بهێتە كاراكرن و فراكسیۆنێن د ناڤ پەرلەمانی دا بەرپرس بن ژ راپەڕاندنا كارێن خەلكی و بڕێڤەبرنا رۆلێ تەشریعی و چاڤدێریێ و ئێكەتی دبێژیت بلا پەرلەمان و حوكمەت پێكڤە وەك ئێك پاكێج بن بەلێ دو سالە ل سەر ڤێ چەندێ رێك نەكەفتینە لەوما رێكا باشتر كاراكرنا پەرلەمانییە و پاشی گەنگەشەكرن ل سەر پێكئینانا حوكمەتێ».
دەربارەی داخویانیێن ئێكەتیێ ل دۆر هەبوونا 41 كورسییان ل پەرلەمانی» گۆت هەكە دشێن بلا پێكڤە ل گەل ئالیێن دی زۆرینەیەكا (50+ 1) پێكبینن و كارێ پەرلەمانی بكەن و كابینەیا دەهێ پێكبینن هەكە خەلكی دەنگ دابیتە وان پێدڤییە رێز ل دەنگێ خەلكی بهێتە گرتن بەلێ هەكە ئێكەتیێ زانیبا دشێت ڤێ چەندێ بكەت دا كەت».
سەبارەت ب پۆستێن حوكمەتێ مەحەمەد خورشید دیار كر» بابەتێ وەزارەتا ناڤخۆ تنێ وەك بەهانە هاتییە بكارئینان چونكی ئێكەتی نوكە داخوازییا چەندین پۆستێن دی یێن بلند دكەت وەك سەرۆكایەتییا هەرێمێ و سەرۆكایەتییا جڤاتا دادوەری و درێژكرنا دەمێ گەنگەشەیان ژ ئالیێ ئێكەتیێ ڤە و هندەك ئەگەرێن دەرەكی وەك كارتێكرنا شەڕێ ئیران و ئەمریكا بوونە ئەگەرێ ڤێ قەیرانێ».
ل دۆر تۆهمەتێن جوداهیێ د بەلاڤكرنا پرۆژەیان دا وی ئەندامێ كۆمیتەیا ناڤین یا پارتی رۆهنكر» حوكمەت جوداهیێ ناكەت و یا هەموو خەلكی یە و بەلاڤكرنا بودجەی و پرۆژەیان ل سەر بنەمایێ جوگرافی و رێژەیا ئاكنجییان و رێژەیا داهاتی دهێتە دیاركرن و بۆ نموونە داهاتێ سلێمانیێ كێمترە ژ 35% بۆ حوكمەتێ بەلێ داهاتێ دەڤەرێن دی زێدەترە ژ 75% و دیسان رێژەیا ئاكنجییێن دهۆكێ و هەولێرێ پترە ژ 60% و تریلیۆنەك و 865 ملیار دینار بۆ سنۆرێ سلێمانیێ تنێ ل پرۆژەیێن رێك و جادەیان هاتییە خەرجكرن».

زنار تۆڤی:

بەختیار عزەت دەرگەلەیی، چاڤدێرێ سیاسی و نڤیسەر ل وەلاتێ ئەمریكا بۆ رۆژنامەیا (ئەڤرۆ) دیاكر: چەندین رێكخراوێن كوردی ل ئەمریكا نامەیەك بۆ عەلی زەیدی، سەرۆك وەزیرێن ئیراقێ ب هەلكەفتا سەرەدانا وی بۆ ئەمریكا هنارتییە و تێدا هاتییە، سەرێ رێزێ بۆ هەوە یێن هێژا د چەمینین كو هوون هێژایی ڤی پۆستێ بەرپرسیارەتییا دیرۆكینە، یێ كو هەوە وەرگرتی بۆ قووناغەكا نوو ژ پێشكەفتنا ئیراقا كورد و ئەرەب و هەموو تەخ وچینین دی یێن گەلێ مە، كو هوون ئاگەهداری وان هەموو قوربانیێن مەزنن یێن كو گەلێ كورد داین ژ پێخەمەت مافین خۆ یێن رەوا.
د نامەیا رێكخراوێن كوردی ل ئەمریكا بۆ زەیدی هاتیە ژی» ل دەف هەوە یا ئاشكرایە كو پرسا كوردان بەردەوام بوویە هەر ژ دەستپێكا دامەزراندنا دەولەتا ئیراقێ و هەتا ئەڤرۆ، ل گەل بزاڤێن كەسێن باش یێن ڤی وەلاتی بۆ چارەسەركرنێ، بەلێ مخابن چارەسەری چو جاران ئەو نەبوون یێن كو هیڤی ل سەر دهاتە كرن، كو هیڤییا هەموو تەخ وچین و نەتەوەیێن ڤی نیشتیمانی ئەوە كو هەموو كێشە ل گەل حوكمەتا هەرێما كوردستانێ بهێنە چارەسەركرن، كو چارەسەركرنا وان دێ بیتە هێز و سەروەری بۆ وەلاتی و ئێكگرتنا هەموو شیانێن گەلێ ئیراقێ د سەردەمێ هەوە دا، داكو ئەم هەموو پێكڤە كار بكەین بۆ ئاشتی، برایەتی و ئێكریزیێ، بۆ پڕكرنا وان ڤالاهیێن كو د دەمێ بۆری دا بووینە پرس و بێ چارەسەری و ب هەلاویستی ماینە، ژ پێخەمەت خۆشی و سەربلندییا ئیراقەكا فیدرالی یا خۆشتڤی».
ئەو رێكخراو ژی ئەڤەنە:
سەنتەرێ جڤاتا كوردی ل كالیفۆرنیا
كۆمەلا برێڤەبرنا رەڤەندا كوردی ل ئەمریكا
سەنتەرێ كورد ل دالاس
ژۆرا بازرگانی یا كوردی و ئەمریكی
رەڤەندا كوردی ل ویلایەتا تێنیسی
سەنتەرێ ئەمریكی و كوردی ل واشنتۆنا پایتەخت
ناڤەندا رەڤەندا كوردستانی ل ویلایەتا واشنتۆنێ

دهۆك ،لەزگین جوقی

شێروان دووبەردانی، ئەندامێ لیژنا ئاسایش و بەرگریێ ل جڤاتا نوونەرێن ئیراقێ ژ فراكسیۆنا پارتی دوپاتكر كو هەلوەستێ وی یێ بنەجه ژ پێگیرییا وی ب بەرگریكرنێ ژ مافێن هەموو وەلاتیێن پارێزگەها نەینەوا ب هەموو پێكهاتە، نەتەوە و تەخ و چینێن وان ڤە دهێت، ئەڤ چەندە ژی ل سەر بنەمایێ دەستوور و یاسایێ یە، و رەتكرنا هەر پێنگاڤەكێ كو ببیتە ئەگەرێ زیانگەهاندنێ ب مافێن هەر ئالییەكی یان دەستكاریكرنا پرەنسیپێ دادپەروەری و وەكهەڤیێ د ناڤبەرا وەلاتییان دا.
دووبەردانی گۆت «پارێزگەها نەینەوا هەر یا وەسا بوو و دێ هەر مینیتە نموونەیا فرەهییێ و پێكڤەژیانێ، و ئەركێ مە هەموویانە ئەڤێ فرەهییێ بپارێزین و بەرگریێ ژ مافێن هەموو پێكهاتەیێن وێ بكەین. ئەم چو جاران قەبوول ناكەین چو پێرابوون دەستكارییا مافێن دەستووری یان یاسایی یێن چو پێكهاتەیان بكەن، و دێ بەردەوام بین ل سەر بجهئینانا ئەركێ خۆ د بەرگریكرنێ ژ مافێن رەوا یێن هەموو وەلاتییان دا، و دێ دوور بین ژ هەر بەرژەوەندییەكا سیاسی یان یا بەرتەنگ».
زێدەباری وێ چەندێ گۆت كو دڤێت دۆسێیا ئاڤادانكرنێ ل دووڤ چارچۆڤەیێن یاسایی بهێتە چارەسەركرن، ب شێوەیەكێ كو بگونجیت ل گەل بڕیارێن دادوەرییا ئیراقێ. د هەمان دەم دا پشتەڤانییا خۆ دیار كر بۆ مافێ وان وەلاتیێن خودان سەنەدێن یاسایی و دروست دا كو پێرابوونێن ئاڤادانكرنێ ل دۆور رێڕەوێن كارگێڕی تەمام بكەن، ب شێوەیەكێ كو پاراستنا مافان مسۆگەر بكەت و بەرژەوەندییا گشتی بپارێزیت و دادپەروەریێ د ناڤبەرا هەموو وەلاتیێن پارێزگەهێ دا دیار بكەت.
دووبەردانی دوپاتی ل سەر هندێ كر كو هەر دۆسێیەكا پەیوەندی ب مافێن وەلاتییان ڤە هەبیت، دڤێت ب رێیا كەنالێن فەرمی یێن یاسایی بهێتە ئێكلاكرن، ب شێوەیەكێ كو سەروەرییا یاسایێ بهێز بكەت و پرەنسیپێ وەكهەڤیێ بچەسپینیت. هەروەسا دیار كر كو پاراستنا مافان بجه ناهێت هەكە ب رێیا پەنابرنا بۆ یاسایێ و رێزگرتن ل بڕیارێن دادوەری یێن كارپێكری نەبیت.

پشتی سپێدەهییا ئەینییا بۆری چەندین دەڤەرێن هەرێما كوردستانێ بوونە ئارمانجا هێرشێن مووشەكی یێن ئیرانی. سەرۆكاتییا هەرێما كوردستانێ و سەرۆكاتییا جڤاتا وەزیرێن هەرێما كوردستانێ د دوو بەیاننامەیێن جودا دا ب توندی ئەو هێرشێن ل سەر هەرێما كوردستانێ پرۆتەستۆ كرن وئاماژە كرن كو ئەڤ هێرشە گەفێن راستەوخۆنە ل سەر ئارامییا وەلاتی.
سەرۆكاتییا هەرێما كوردستانێ ئاماژە ب وێ چەندێ كر كو ب ئارمانجگرتنا هەرێما كوردستانێ و دەستپێكرنا توندوتیژیێ پێشهاتەكا مەترسیدار و بنپێكرنا سەروەرییا ئیراقێ یە.
د پشكەكا دی یا بەیاننامەیێ دا هاتییە ئەڤ هێرشە گەفێ ل ئارامییا وەلاتی دكەن و ئاستەنگان دئێخنە پێشبەری بزاڤێن ئاشتیێ ل دەڤەرێ.
سەرۆكاتیا جڤاتا وەزیرێن هەرێما كوردستانێ ژی بەیاننامەیەك ل دۆر هێرشێن كۆمارا ئیسلامییا ئیرانێ بەلاڤ كر و تێدا هاتییە هێرشێن بێ بهانە یێن كۆمارا ئیسلامییا ئیرانێ بۆ سەر هەرێما كوردستانێ پرۆتەستۆ دكەین. دكەین
حوكمەتا هەرێما كوردستانێ هۆشداری دا كو بەردەوامییا ڤان جۆرە هێرشان ئارامییا تەمامییا دەڤەرێ تێك ددەت و داخواز ژ كۆمارا ئیسلامییا ئیرانێ كر كو ب زووترین دەم دوماهیێ ب ڤان هێرشان بینیت هەروەسا داخواز ژ حوكمەتا ئیراقا فیدرال و جڤاكا نێڤدەولەتی كرن كو بەرپرسیارا خۆ هەلگرن و بزاڤێن جدی بدەن بۆ وێ چەندێ كو سنۆرەك بۆ ڤان بنپێكرنێن دبنە ئەگەرێ پێشێلكرنا سەروەرییا ئاخا هەرێما كوردستانێ، بهێتە دانان.
ل سپێدەیا ئەینییا بۆری ب چەندین درۆن و مووشەكان هێرش ل سەر هەولێرێ و سلێمانیێ هاتە كرن و دەزگەهێ ئاسایشێ هەرێما كوردستانێ ژی راگەهاند كو ب حەفت مووشەكان هێرش ل سەر سنۆرێ سلێمانیێ و كۆمەلا زەحمەتكێشێن كوردستانێ هاتییە كرن كو بوویە ئەگەرێ شەهیدبوونا 9 پێشمەرگەیان و برینداربوونا سێ یێن دی .
دژەتیرۆرا كوردستانێ ژی ل دۆر هێرشێن سەر هەولێرێ ئاماژە ب وێ چەندێ دا كو ل سپێدەییا ئەینیێ هێزێن هەڤپەیمانان هەشت درۆنێن بۆمبڕێژكری ل ئەسمانی هەولێرێ تێك شكاندینە و ئێخستینە خوارێ و خۆشبەختانە چو زیانێن گیانی لێ پەیدانەبووینە.

مەسرور بارزانی، سەرۆكێ حوكمەتا هەرێما كوردستانێ ل دەوحەیا پایتەختێ قەتەرێ پشكداری د رێوڕەسمێن بەهییا شێخ حەمەد بن خەلیفە ئال سانی میرێ بەرێ یێ دەولەتا قەتەرێ دا كر و ژ ئالیێ شێخ تەمیم بن خەلیفە ئال سانی میرێ قەتەرێ ڤە پێشوازی لێ هاتە كرن.
سەرۆكێ حوكمەتێ ب ناڤێ خۆ و حوكمەتا هەرێمێ سەرەخۆشی ئاراستەی میرێ قەتەرێ و مالباتا وی و گەلێ قەتەرێ كر و هیڤییا وێ چەندێ خواست خودایێ مەزن گیانێ وەغەركری ب بەهەشتێ شاد بكەت و ئارامیێ و ب هەموویان ب بەخشیت ژ ئالیێ خۆ ڤە میرێ قەتەرێ سوپاس و پێزانینێن خۆ بۆ هەڤخەمییا سەرۆكێ حوكمەتێ و پشكداریا وی دبەهییا وان دا دەربڕی.

پشتی كو هەرێما كوردستانێ د رۆژێن بۆری دا كەفتییە بەر پێلەكا توند یا هێرشێن مووشەكی و درۆنی یێن كۆمارا ئیسلامییا ئیرانێ، كارڤەدانێن نێڤدەولەتی دژی ڤان هێرشان رۆژ ب رۆژ بەرفرهەتر دبن، د ڤی چارچۆڤەی دا ژی، ئەمریكا و وەلاتێن كەنداڤێ و كۆمكارا عەرەبی ب شێوازەكێ جودا جودا هەلوەستێن خۆ یێن توند راگەهاندینە و داخوازا پاراستنا سەروەرییا ئیراقێ و هەرێما كوردستانێ دكەن.
وەزارەتا دەرڤەیا ئەمریكایێ: هێرشێن ئیرانێ بنپێكرنا سەروەرییا ئاخا ئیراقێ یە و دڤێت ب دووماهی بهێن
وەزارەتا دەرڤەیا ئەمریكایێ هێرشێن مووشەكی و درۆنی یێن ئیرانێ ل سەر هەولێرێ پرۆتەستۆكرن و ئەڤ هێرشە ب بنپێكرنا سەروەرییا ئاخا ئیراقێ ناڤ كرن.
وەزارەتا دەرڤەیا ئەمریكایێ هەروەسا گۆت ئەڤ جۆرە هێرشە ب رامانا بنپێكرنەكا ئاشكرا و رۆهن یا سەروەرییا ئاخا ئیراقێ دهێت
ئەڤ كارڤەدانا توند یا ئەمریكا پشتی وێ چەندێ دهێت كو هەرێما كوردستانێ رووبڕووی پێلەكا نوو یا هێرشێن درۆنی و مووشەكی بووی كو بوویە ئەگەرێ تێكدانا ئاسایش و ئارامییا دەڤەرێ و وەزارەتا دەرڤەیا ئەمریكا دوپاتی ل سەر وێ چەندێ كر كو ئەڤ بنپێكرنە دژی سەروەرییا ئاخا ئیراقێ نە و هەلوەستێ ئەمریكا ل هەمبەر ڤان هێرشان توند و ئێكلاكەرە.
وەزارەتا دەرڤەیا قەتەرێ: پشتەڤانییا پێرابوونێن هەرێما كوردستانێ بۆ پاراستنا سەروەری و ئاسایشا خۆ دكەین
ژ ئالیێ خۆڤە وەزارەتا دەرڤەیا قەتەرێ ب توندی هێرشێن ئیرانێ بۆ سەر هەرێما كوردستانێ پرۆتەستۆكرن و راگەهاند كو ئەڤ هێرشە بنپێكرنا سەروەرییا ئیراقێ و هەرێما كوردستانێ یە و بنپێكرنا ئاشكرا یا بنەمایێن یاسایا نێڤدەولەتی یە ودوپاتی ل پێدڤییا دوورئێخستنا دەڤەرێ ژ لێكەفتێن ڤان جۆرە هێرشێن بێ بهانە كر. هەروەسا داخازا بەردەوامبوونێ ل سەر رێڕەوێ دانوستاندنان ورێكێن دبلۆماسیێ و هێمنكرنا گرژییان كر ب شێوازەكێ كو هەڤكار بیت د چەسپاندنا ئاسایش و ئارامیێ دا ل سەر هەردوو ئاستێن هەرێمی و نێڤدەولەتی.
وەزارەتا دەرڤەیا قەتەرێ هەڤسۆزییا تەمام یا وەلاتێ خۆ ل گەل ئیراقێ و هەرێما كوردستانێ دوپات كر و پشتەڤانییا خۆ بۆ تەمامییا وان پێرابوونان نیشا دا یێن كو ل پێناڤی پاراستنا سەروەری و ئاسایشا خۆ دا وەردگرن.
وەزارەتا دەرڤە یا ئیماراتێ: هێرشێن ئیرانێ یێن هەرێما كوردستانێ كرینە ئارمانج ب توندی پرۆتەستۆ دكەین
وەزارەتا دەرڤە یا ئیماراتێ ژی هێرشێن درۆنی و مووشەكی ل سەر هەرێما كوردستانێ ب دەستدرێژی و بنپێكرنەكا ئاشكرا یا سەروەرییا ئیراقێ و هەرێما كوردستانێ هەژمارت و ئاماژەكر كو ئەو هێرشە گەفەكا راستەوخۆیە ل سەر ئاسایش و ئارامییا ئیراقێ و هەرێمێ وهەڤسۆزییا تەمام یا وەلاتێ ئیماراتێ ل گەل ئیراقێ و حوكمەتا هەرێما كوردستانێ دەربری و پشتەڤانییا خۆ بۆ تەمامییا وان پێنگاڤان دوپات كر كو دبنە ئەگەرێ پاراستنا ئاسایش و ئارامیێ و پارێزگاریكرنێ ل سەروەرییا ئاخا ئیراقێ و هەرێما كوردستانێ.
كۆمكارا ئەرەبی: هێرشێن ئیرانێ بۆ سەر هەرێما كوردستانێ بنپێكرنا ئاشكرا یا یاسایێن نێڤدەولەتی یە
نەبیل فەهمی سكرتێرێ گشتیێ كۆمكارا ئەرەبی د لتەنگییا خۆ ل دۆر زێدەبوونا هێرشێن نەڕەوا یێن ئیرانێ دەربرین و ئاماژە كر كو ئەو هێرشێن د ڤان دووماهییان دا بەحرەین و ئوردن و قەتەر و كوێت گرتینە ڤە و ژێرخانێن ستراتیژی كرینە ئارمانج نیشانا رێبازەكا شەڕەنگێزییا مەترسیدارن هەروەسا ب توندی هێرشێن ل دووڤ ئێك یێن سەر هەرێما كوردستانێ پرۆتەستۆ كرن و راگەهاند ئەڤ كارێن تەهرانێ نە تنێ بنپێكرنا سەروەرییا دەولەتانە نە بەلكو بەرۆڤاژی هەموو یاسایێن نێڤدەولەتی و بنەمایێن جیرانییا باشە و نیشانا خواندنەكا شاش یا تەهرانێ یە بۆ واقعێ دەڤەرێ.
نەبیل فەهمی داخواز ژ ئیرانێ كر سەربازی راگریت و ئێدی ب رێیا بالێن سەربازی یێن خۆ گرژیێ بەلاڤ نەكەت و بزڤڕیتە سەر مێزا دانوستاندنان و پێگیری سۆزێن نێڤدەولەتی بیت. سكرتێرێ گشتیێ كۆمكارا ئەرەبی هەڤسۆزییا تەمام یا رێكخراوا خۆ بۆ وان دەولەتان دوپات كر یێن رووبڕووی هێرشان بووین و پشتەڤانییا خۆ بۆ هەموو وان پێرابوونان دەربرین یێن وەلاتێن ئەرەبی بۆ پاراستنا سەروەری و بەرژەوەندیێن خۆ وەردگرن.
سپێدەیا رۆژا ئەینیێ هێزێن هەڤپەیمانان هەشت درۆنێن بۆمبڕێژكری ل ئەسمانی هەولێرێ ژناڤبرن و ئێخستنە خارێ بێی كو چو زیانێن گیانی لێ بكەڤن هەروەسا شەڤا چارشەمبییا بۆری ژی هێرشەكا هەڤشێوە ل سەر پایتەختا هەرێما كوردستانێ هاتە كرن و د وێ هێرشێ دا ژی هێزێن هەڤپەیمانییا نێودەولەتی شیابوون هەشت فڕۆكەیێن بێ فڕۆكەڤان یێن بۆمبڕێژكری یێن دی ل ئەسمانی هەولێرێ ژناڤ ببەن كو دیسان چو زیان لێ نەكەفتن.

سەرۆكێ هەرێما كوردستانێ د پەیامەكێ دا ب هەلكەفتا رۆژا نیشتمانی یا فەرەنسایێ گەرمترین پیرۆزباهی ئاراستەی سەرۆككۆمار و گەلێ فەرەنسایێ كر و سەرۆكێ هەرێمێ دووپاتی ل سەر پێگەهێ دیرۆكی و ستراتیژی یێ پاریسێ كر وەك دۆستەكا دلسۆز و هەڤپشكەكا جهێ باوەرییاگەلێ كورد كو ل دژوارترین قووناغان دا بەردەوام پشتەڤانی ل ئاشتیێ و ئارامیێ و هەرێما كوردستانێ كریە.
ل رۆژا سێشەمبی 14/7/2026 نێچیرڤان بارزانی، سەرۆكێ هەرێما كوردستانێ د تۆڕا جڤاكییا (ئێكس) دا پەیامەك ل دۆر رۆژا نیشتمانی یا فەرەنسایێ بەلاڤ كر و نڤیسییە د رۆژا نیشتمانی یا فەرەنسایێ دا ل گەل گەلێ فەرەنسا بهایێن ئازادیێ و وەكهەڤیێ و برایەتیێ و دیموكراسیێ بلند رادگرین كو د ڤێ رۆژا دیرۆكی دا بەرجەستە دبن.
نێچیرڤان بارزانی د پەیاما خۆ دا دبێژیت» گەرمترین پیرۆزباهی ئاراستەی ئیمانوێل ماكرۆن، سەرۆككۆمارێ فەرەنسایێ و گەلێ وێ وەلاتی دكەم» و دووپاتی ل وێ دكەت كو «فەرەنسا بەردەوام دۆستەكا دلسۆز و هەڤپشكەكا جهێ باوەرییا هەرێما كوردستانێ بوویە و بەردەوام مەزنترین پێزانینێن مە بۆ فەرەنسایێ هەنە كو ل دژوارترین قووناغان دا بەردەوام پشتەڤانا مە و پێگری چەسپاندنا ئاشتیێ و ئارامیێ و بهایێن هەڤپشك بوویە.
سەرۆكێ هەرێما كوردستانێ داخوازا وێ چەندێ كر كو دۆستینییا بەردەوام د ناڤبەرا فەرەنسا و هەرێما كوردستانێ دا هەردەم بەر ب گەشەكرنا پتر پێنگاڤان بهاڤێژیت.

نێچیرڤان بارزانی، سەرۆكێ هەرێما كوردستانێ ل گەل هەژمارەكا سەركردە و بەرپرسێن بلند یێن وەلاتێن دەڤەرێ و جیهانێ ل دەوحەیا پایتەختێ قەتەرێ پشكداری د رێوڕەسمێن بەهییا (شێخ حەمەد بن خەلیفە ئال سانی) میرێ بەرێ یێ دەولەتا قەتەرێ كر و ژ ئالیێ (شێخ تەمیم بن حەمەد ئال سانی) میرێ دەولەتا قەتەرێ ڤە پێشوازی لێ هاتە كرن.
نێچیرڤان بارزانی ب ناڤێ خۆ و هەرێما كوردستانێ بەهیداری و هەڤسۆزییا خۆ ئاراستەی میرێ دەولەتا قەتەرێ و مالباتا وی و گەلێ قەتەرێ كر و هیڤییا وێ چەندێ خواست خودایێ مەزن گیانێ وەغەركری ب دلۆڤانی ومیهرەبانییا خۆ شاد بكەت و هەدارێ و ئارامی ب هەموویان ب بەخشیت.
ژ ئالیێ خۆ ڤە میریێ قەتەرێ سوپاس و پێزانینێن خۆ ئاراستەی سەرۆكێ هەرێما كوردستانێ كر بۆ بەرهەڤبوون و پشكداریكرنێ د رێوڕەسمێن بەهیێ دا، هەروەسا هەڤخەمییا هەرێما كوردستانێ ل گەل دەولەتا قەتەرێ بلند هەلسەنگاند.

مەسرور بارزانی، سەرۆكێ حوكمەتا هەرێما كوردستانێ ب هەلكەفتا مالئاڤاهیكرنا خووشكا شێخ نەهرۆ شێخ محەمەد كەسنەزانی سەرۆكێ تەریقەتا عەلییا قادری كەسنەزانی ل جیهانێ، پەیامەكا سەرەخۆشیێ ئاراستەی ناڤهاتی كر د پەیاما سەرۆكێ حوكمەتا هەرێما كوردستانێ دا هاتییە» بۆ مالئاڤاهییا خووشكا هەوە یا بەرێز خاتین سەردەشت شێخ محەمەد بەهیداری و سەرەخۆشیێ ل هەوە دكەم وهەڤپشكێ خەما هەوە مە، خودایێ مەزن گیانێ وێ ب بەهەشتێ شاد بكەت و هەدار و ئارامیێ ژی ب مالباتا هەوە یا بەرێز ب بەخشیت».

نڤیسینگەها سەرۆكێ حوكمەتا هەرێما كوردستانێ راگەهاند كو د چارچۆڤەیا هەماهەنگییا د ناڤبەرا مەسرور بارزانی، سەرۆكێ حوكمەتا هەرێما كوردستانێ و عەلی زەیدی، سەرۆك وەزیرێن ئیراقێ دا بۆ رووبڕووبوونا گەندەلیێ رێژەیا 358 كیلۆگرامێن زێڕێ دەستبسەرداگرتی رادەستی حوكمەتا فیدرال هاتە كرن.
نڤیسینگەها سەرۆكێ حوكمەتا هەرێما كوردستانێ بەیاننامەیەك ل دۆر هاریكاری و هەماهەنگییا د ناڤبەرا مەسرور بارزانی سەرۆكێ حوكمەتا هەرێمێ و عەلی زەیدی سەرۆك وەزیرێن ئیراقێ بەلاڤ كر و تێدا هاتییە كو د چارچۆڤەیا وێ هاریكاری و هەماهەنگییا بهێز و بەردەوام دا سەرۆكێ حوكمەتا هەرێمێ وەزارەتا ناڤخۆ و دەزگەهێن جڤاتا ئاسایشێ راسپاردن كو ل گەل ئالیێن پەیوەندیدارێن حوكمەتا فیدرال بۆ رووبڕووبوونا گەندەلیێ و لێپرسینێ ژ گەندەلكاران كار بكەن.
نڤیسینگەها سەرۆكێ حوكمەتا هەرێما كوردستانێ ئاماژە ب وێ چەندێ دا كو د دەمێ بۆری دا ژی د ئەنجامێ وێ هەماهەنگییا د ناڤبەرا هەردو ئالییان دا د چارچۆڤەیا هەوا رووبڕووبوونا گەندەلیێ و پاراستنا سامانێ گشتی دا شیان پێرابوونێن پێدڤی بەرامبەر گەندەلكاران وەربگرن و دەستەسەر بكەن و رێژەیەكا مەزن یا پارە و زێڕ و مولك و سامانان بزڤڕینن بۆ گەنجینەیا گشتی و هەروەسا دووپاتی ل سەر وێ چەندێ كر كو د ڤی چارچۆڤەی دا و د دوماهییا كارێ خۆ دا ئالیێن پەیوەندیدارێن حوكمەتا هەرێمێ رێژەیا 358 كیلۆگرامێن زێڕێ دەستبسەرداگرتی رادەستی دەستەیا دەسپاكییا ئیراقا فیدرال كر.
نڤیسینگەها سەرۆكێ حوكمەتا هەرێمێ راگەهاند كو حوكمەتا هەرێما كوردستانێ دێ بەردەوام بیت ل سەر هاریكاری و هەماهەنگیێ ل گەل حوكمەتا فیدرال بۆ رووبڕووبوونا گەندەلكاران و سنۆر دانان بۆ ب هەدەردانا سامانێ گشتی و پێشئێخستنا دەسپاكیێ و سەروەرییا یاسایێ.