ئه‌ڤرۆ نیوز:
ترومبێله‌كا ژ جۆرێ ڤان ل باژارێ بارسێلۆنا یێ هه‌رێما كاتالۆنیا یا ئسپانیا دا ناڤ قه‌ره‌بالغه‌كا خه‌لكی، پتری 13 كه‌سان كوشتن و بده‌هان كه‌س بریندار كرن.
پۆلیسێن بارسێلۆنا دیار كر كو ئه‌و كریار كریاره‌كا تیرۆرستی یه و ژ خه‌لكێ وی باژاری خواست نێزیكی پلاسا كاتالۆنیا كو جهێ روودانێ یه نه‌بن.
شۆفێرێ هێرش كری ب پییا ره‌ڤییه.
ئەڤرۆ نیوز ، نەوزاد ھلۆری:
ئەڤرۆ ل گوندەکێ ناحیا رووڤیا یا سەر ب قەزا بەردەڕەش د روودانەکا ھاتن و چوونێ دا 60 سەرێن پەزی ھاتنە کوشتن.
فەلاح بەردەسووری شایەتحال و وەلاتیەکێ گوندێ بەردەسور یا سەر ب ناحیا رووڤیایە بۆ ئەڤرۆ نیوز گۆت: ( ئەڤرۆ پشتی نیڤرو لسەر رێیا گشتی دناڤبەرا پرا چەمە و ناحیا رووڤیا ل نێزیک گوندێ بەردەسوور ژ ئەگەرا روودانەکا ھاتن و چۆنێ 45 سەرێن پەزێ شڤانەکێ گوندێ مە ھاتنە کوشتن)
زێدەتر گۆت: ( روودان ژ ئەگەرا ترومبێلەکا بارھەلگر روودایە دەما کو شڤانی دڤیا پەزێ خوە دەربازی لایدیێ جاددێ بکەت بەلێ ژ بەرکو ئەو ترومبێل گەلەک بلەز دھات نەشیا کونترولکر بکەت و د ئەنجام دا ئەڤ روودانە ھاتە روودان )
ل گورەی تەخمینێن ئەوی وەلاتی نێزیکێ 15 ملیون دیناران زیان ب ئەوی شڤانی کەفتیە ، ئەڤە سەرەرای کو ئەو شڤان کەسەکێ ھەژار و دەستکورتە.
دھێتە زانین ئەڤ سالە ئەڤ روودانە دبیتە سێەم روودانا کوشتنا سەرێن پەزی و پێشتر د دوو روودانان دا ل سنوورێ قەزا شێخان 40 سەرێن پەزی و و قەزا بەردەرەش ژی 30 سەرێن پەزی ھاتبوونە کوشتن.
ئەڤرۆ نیوز ، ھلۆری:
سپێدەیا ئەڤرۆ سەرۆکێ ھەرێما کوردستانێ مەسعود بارزانی پێشوازی ل رێبەرێ گشتیێ تەڤگەرا ئیسلامی یا کوردستانێ کر و ل گورەی نوچەیەکێ مالپەرا سەرۆکاتیا ھەرێما کوردستانێ دانوستاندن لسەر چەند پرسەکێن گرنگ ھاتیەکرن ژ وانان پرسا ریفراندۆمێ.
مەسعود بارزانی سەرۆکێ ھەرێما کوردستانێ مەسعود بارزانی ئەڤرۆ سپێدێ پێشوازی عیرفان عەبدولعەزیز رێبەرێ گشتیێ تەڤگەرا ئیسلامی یا کوردستانێ کر و د کومبوونەکێ دا بەحس ل ھەلویستێ تەڤگەرا ئیسلامی ل بارا پرسا ریفراندۆمێ ھاتەکرن و رێبەرێ ئیسلامی ژی ئەڤ بریارە ب بریارەک گرنگ ھەلسەنگاند و پشتەڤانیا خوە ژی بو سەرئێخستنا ریفراندۆمێ دوپات کر.
د درێژاھیا کومبوونێ دا بارزانی دیارکر کو بریارا لایەنێن سیاسی ۆ ئەنجامدانا ریفراندۆمێ بریارەک مێژوویی یە و رێگرتن ل خون رشتن و دووبارە نەبوونا کارەساتێن مەزنتر ، و ھەرێما کوردستانێ فاکتەرێ سەقامگیری بوویە ل دەڤەرێ و پشتی ریفراندۆمێ ژی دێ ھەر مینیت فاکتەرەکێ ب ھێز بو سەقامگیریا کوردستانێ و پاشەروژەکا گەش چاڤەرێ خەلکێ کوردستانێ دکەت ژبەرکو بارودوخێ کوردستانێ و ھەرێمان و نیڤدەولی وەکو قوناقێن بووری نینە ، و گەلێ کوردستانێ ب ئیرادەکا بھێز دێ دوزا خوە بەر ب پێشڤە بەتن.
ئەڤرۆ نیوز ، نەوزاد ھلۆری:
چەند خولەکەکان بەری نھا ئاگرەکێ مەزن بەربویە ئێک ژ کارگەھێن مەزن ل دھوکێ.
دڤی واریدا بێوار عەبدولعەزیز بەرپرسێ بەرەڤانیا باژێری ل دھوکێ بۆ ئەڤرۆ نیوز گۆت: ( نھا ئاگر بەربوویە ئێک ژ کارگەھێن مەزن ل پشت پێشانگەھێن ترومبێلا و تیمێن بەرەڤانیا باژێری ژی مژولێ کونترولکرنا ئاگری نە)
زێدەتر گۆت: ( ھەتا نھا ناھێتە زانین کا ئەگەرا ئاگری چی یە و زیان چەندە ، بەلێ پشتی کو ئاگر دھێتە کونترولکرن دی َڤەکولین لسەر ھێتەکرن)
ئەڤرۆ نیوز ، عەزیز هەورامانی:
ئەڤرۆ ل سنوورێ دەڤەرا راپەرین وەلاتیەک کو کارێ گوهرینا پاران دکر دناڤا ترۆمبێلا وی ب کوشتی هاتە دیتن ، پولیسێن گەرمان ژی ددەن دیارکرن کو ئەوان دەست ب ڤەکوێینێ کریە.
دڤی واریدا جەمال قدوری ئافتنکەرێ پولیسێن گەرمیان بۆ ئەڤرۆ نیوز گۆت: ( سپێدەهیا ئەڤرۆ ئەم هاتینە ئاگەهدارکرن کو وەلاتیەک دناڤا ترومبێلا وی دا هاتیە کوشتن ، پشتی کو تیمێن مە گەهشتینە جهێ روودانێ دیار بو کو ئەو کەسێ هاتیە کوشتن بناڤێ ئەمیر سابرە و کارێ گوهرینا پاران دکەت ل گوندێ ئەلمانی ل قەزا کەلارێ دکر)
زێدەتر گۆت: (هەتا نها ناهێتە زانین بکوژێ ئەوی کەسی کی یە ، بەلێ مە دەست ب ڤەکولینێ کریە، دنهادا تەرمێ وی کەسی بو نەخۆشخانا داد هاتیە رەوانەکرن)
ئه‌ڤرۆ نيوز:
کۆتلەیێن ناڤا پەرلەمانێ عێراقێ دخوازن ب زۆرینە مادەیەکێ قانوونا ھەلبژارتنێن پارێزگەھێن عێراقێ دەربازبکەن و بەری ئەنجامدانا ھەلبژارتنێن جڤاتا پارێزگەھا کەرکووکێ پۆستێن پارێزگەھێ بھێنە بەلافکرن، نوونەرەکا کوردژی دبێژیت، ئەڤە غەدرەکادیە ل کەرکووکێ دھێتەکرن دخوازن حالەتەکێ تایبەت بدەنە کەرکووکێ.
دکتۆر ئەشواق جاف، پەرلەمانتارا پارتی ل پەرلەمانێ عێراقێ بۆ رۆژناما ئەڤرۆ گۆت: د کۆمبوونێن بۆری یێن پەرلەمانی ئەم شیاین نیسابا قانوونی دناڤ پەرلەمانی دا بشکێنین و ھەرپێنج فڕاکسیۆنێن کوردستانی پێکڤە ھۆلا پەرلەمانی بجە ھێلا، ژبەر کو کۆتلەیێن پەرلەمانی دخواست بڕگەیەکێ ناڤا قانوونا ھەلبژارتنێن جڤاتێن پارێزگەھێن عێراقێ پەسەند و ب زۆرینە دەرباز بکەن، ئەڤژی ددەمێ ھەلبژارتنێن جڤاتێن پارێزگەھان دا کەرکووک بھێتە جوداکرن ل پارێزگەھێن دی یێن عێراقێ.
دکتۆر ئەشواق جاف دیارکر، کۆتلەیێن پەرلەمانی دخوازن بەری ھەلبژارتن بۆ جڤاتا پارێزگەھا کەرکووکێ بھێتەکرن پۆستێن ئیدارەیا پارێزگەھا کەرکووکێ بھێنە بەلافکرن، ئەڤەژی زیانەکا مەزن دێ ب کوردان گەھینیت و غەدرەکا دیە ل کەرکووکێ دھێتەکرن، چونکە کورد ل کەرکووکێ زۆرینەیە، بەلێ ھەکە ئەڤێ پرسێ بینە ھۆلا پەرلەمانی ئەم ل بەغدا بووینە کەمینە، لەوڕا نابیت ب چو شێوەیەکی بھێتە قەبوولکرن مادێ 37 یێ قانوونا ھەلبژارتنێن جڤاتێن پارێزگەھێن عێراقێ ب زۆرینە بھێتە پەسەندکرن، ھەروەسا دڤێت بۆ کۆمبوونا داھاتی فڕاکسیۆنێن کوردستانی سەرەدانا کۆتلەیێن پەرلەمانی بکەن و رێککەفتن بھێتەکرن.
کەریم بەحری، شارەزایێ قانوونی بۆ رۆژناما ئەڤرۆ گۆت: پێدڤیە ھەلبژارتنێن جڤاتا پارێزگەھا کەرکووکێ ل گەل پارێزگەھێن عێراقێ بھێتە ئەنجامدان و خەلکێ کەرکووکێ مافێ خۆ ھەیە نوونەرێن خوە بۆ جڤاتا پارێزگەھێ دیاربکەن، ژبەرکو ھەتا نوکە تنێ ئێک جار ھەلبژارتن بۆ جڤاتا پارێزگەھا کەرکووکێ ھاتیەکرن و ھەر جارێ ئاریشەیەک بۆ ھەلبژارتنێن کەرکووکێ پەیداکریە، عێراقێ مەرەمێن سیاسی ھەنە بەھانەیا بۆ جڤاتا پارێزگەھا کەرکووکێ دبینیت، دڤێت ھەرێما کوردستانێ پتر فشاران پەیدابکەت بۆسەر بەغدا و ئیدارە و جڤاتا پارێزگەھا کەرکووکێ دشێن ل دادگەھێ سکالایێ تۆمار بکەن ل سەر حوکمەتا عێراقێ، چونکە بدیتنامن ھەکە سکالا بھێتە تۆمارکرن و دادگا بشێوەیەکێ دروست بڕیارا خوە بدەت ئەزێ پشتڕاستم دێ کەرکووکێ یا سەرکەفتی بیت دڤی چوارچوڤەی دا و دێ د بەرژەوەندیا خەلکێ کەرکووکێ دا تەمامبیت.
ئەڤرۆ نیوز ، نەوزاد ھلۆری:
سەرۆکێ حکومەتا ھەرێما کوردستانێ د چارچوڤێ کونفرانسەکێ پەروەردەیی دا ل ھەولێر دیارکر کو سەرەرای کو بودجا وەزارەتا پەروەردێ ھاتیەبرین بەلێ ل گەل ڤێ یەکێ ژی گورانکاریێن مەزن د پروسەیا پەروردێ دا ھاتینەکرن ، و بو ئایندە ژی حکومەتا ھەرێمێ پێنگاڤێن باشتر بۆ پروسەیا پەروەردێ ھەنە.
ئەڤرۆ سپێدێ نێچیرڤان بارزانی سەرۆکێ حکومەتا ھەرێما کوردستانێ د چارچوڤێ کونفرانسێ ڤەکولینا خەرجی و مفایێن پەروەردەیی ل ھەولێر دیارکر کو کەرتێ پەروەردێ رۆژ ب روژێ بەر ب باشتر ڤە دچیت و گۆت: (گرنگیدان ب سیستەمێ پەروەردە و فێرکرنێ و دابینکرنا پێدڤیێن ماموستا و قوتابی و قوتابخانان و گرنگیدان ب ئاستێ زانستیێ ماموستایان و ئەنجامدانا ڤەکولینان و کارێن دەستی و کێمکرنا نەخواندەواریێ ژ گرنگترین کارێن حکومەتا ھەرێما کوردستانێ بون بو کەرتێ پەروەردەێ ، ئەڤە سەرەرای کو بودجا وەزارەتا ھاتیە برین بەلێ ل گەل ڤێ یەکێ ژی وەزارەتا پەروەردەێ شیایە تا رادەیەکێ باش لسەر ئەوان ئاریشەیان زال بیت)
زێدەتر گۆت: (حکومەتا ھەرێما کوردستانێ رێژەیەکا زورا قوتابخانە درۆستکرینە و ئەڤ یەک ژی بوویە سەدەم کو رێژەیا نەخواندەواریێ ب رێژەیەکا بەچاڤ بەر ب کێمبوونێ ڤە بچیت ، نھا د بەرنامەیێ حکومەت و وەزارەتا پەروەردێ دایە کو گرنگیەکا زێدەتر ب کەرتێ پەروەردێ ب دەت ئەو ژی ب رێیا دانانا سیستەمەکێ پەروەردەیێ جیھانی لسەر بنەمایێن زانستی ژبەرکو سیستەمەکێ پێشکەفتی دێ جڤاکەک ساخلەم و باشتر ئاڤا کەت)
ئەڤرۆ نیوز ، نەوزاد ھلۆری:
ئەڤرۆ ل پارێزگەھا کەرکوک باندەکێ بکوژان ھاتنەگرتن کو تومەتبارن ب کوشتنا شەش کەسان و چەند تاوانەکێن دن ، و ، ژلایەکی َدن ڤە ھەر ئەڤرۆ چەند گومانلێکریەک ژی گرتینە.
عەمید سەرحەد قادر رێڤەبەرێ پولیسێن قەزا و ناحیێن سەر ب پارێزگەھا کەرکوک د کونگرەیەکێ رۆژنامەڤانی دا دیارکر کو ئەوان باندەکێ بکوژارن گرتیە و گۆت ژی: ( لرۆژا ١٣/٨/٢٠١٧ ل سنوورێ قەرەھنجیر تەرمەک ھاتەدیتن و پشتی کو پولیسان دەست ب ڤەکولینێ کری د ئەنجام دا شیان دوو کەسان بگرن ، و پاشان بەرامبەر دادوەرێ ڤەکولینێ دانپێدان ب تاوانا خوە کر ئەڤە زێدەباری کو ھەردەم تریاک دکێشا و د فروت ژی )
زێدەتر گۆت: ( ئەوان ھەردوو کەسان دانپێدان ژی کر کو ئەوان ژبلی ھەولاتیێ قەرەھنجیر دھەمان دەم دا پێنج وەلاتیێن دن ژی کوشتینە )
ژلایەکێ دن ڤە سەرحەد قادری گوت: ( د ھەوەکا لێگەریانێ دا ٢٥ گومانلێکری ل سنوورێ دوبز ب تومەتا دەست ھەبوون ھاتینە گرتن )
ئەڤرۆ نیوز ، نەوزاد ھلۆری:
ئێڤاریا ئەڤرۆ ئاگر بەربوویە مالیدەیێن کارەبێ ل سەنتەرێ باژێرێ دھوکێ و د ئەنجام دا چەند مالیدەیەک ھاتنە سوون و زیانێن زورێن ماددی پشتخوە ھێلان.
دڤی واریدا بێوار عەبدولعەزیز بەرپرسێ راگەھاندنا بەرەڤانیا باژێری ل دھوکێ بو ئەڤرۆ نیوز گۆت: (ژ ئەگەرا شوتەکا کارەبێ ، ئاگر بەربوویە مالیدەیێن تاخێ بەرشکێ و د ئەنجام دا پێنج مالیدە ب تەمامی ھاتنە سووتن و دوو ژی زیان یا گەھشتیێ بەلێ نەھاتینە سووتن و زیانێن زورێن ماددی پشتخوە ھێلاینە)
زێدەتر گۆت: ( ئاگر ژلایێ تیمێن بەرەڤانیا باژێری ھاتیە کونترولکرن و سوپاس بو خودێ چوو زیانێن گیانی نەبوون ، بەلکو بتنێ زیانێن ماددی ھەبوون)
ل رێکەفتی ١/٧/٢٠١٧ ھەتا نھا ل سەنتەرێ باژێرێ دھوکێ چوار روودانێن ئاگری یێن زیاندار دروست بووینە.
فوتو ، ئارام حسين
ئەڤرۆ نیوز ، نەوزاد ھلۆری:
سەرۆکێ بەرسڤدانا راپورتێن نیڤدەولی یا سەر ب حکومەتا ھەرێما کوردستانێ دوماھی ھژمارا رزگارکریێن کوردێن ئێزدی ئەوێن کو ژلایێ داعش ھاتینەگرتن راگەھاندن و دیارکر کو حکومەتا ھەرێما کوردستانێ ل گەل جھێن پەیوەندیدار بەردەوامە بو رزگارکرا وان.
دیندار زێباری سەرۆکێ بەرسڤدانا راپورتێن نیڤدەولی یا سەر ب حکومەتا ھەرێما کوردستانێ د رێیا راگەھاندنەکێ دا ل بارا دوماھی ھژمارا رزگارکریێن کوردێن ئێزدی گۆت: (ژ روژا داعش ھاتیە دەڤەرێن کوردستانێ و کوردێن ئێزدی رەڤاندین ھەتا نھا حکومەتا ھەرێما کوردستانێ یا بەردەوامە لسەر رزگارکرنا کوردێن ئێزدی و بو ڤێ مەرەمێ لژنەکا تایبەت دانایە و بودجەک ژی بو تەرخانکریە ، ھژمارا ئێزدیان ل عیراقێ ب گشتی ٥٥٠ ھزار کەسن ، و ژ ئەنجامێ شەرێ داعش نێزیکێ ٣٦٠ ھزار ژ وان ئاوارە بووینە و ھزار ٢٩٣ کەس ژی ھاتینە شەھیدکرن و شەش ھزار ٤١٧ کەس ژی ھاتینە رەڤاندن و کو ئەو ژی سێ ھزار ٥٤٧ ئافرەت و دوو ھزار ٨٧٠ زەلام بوون ، ھەتا ژ وانان نھا سێ ھزار ٩٢ کەس ھاتینە رزگارکرن و بزاڤ ژی بەردەوامن )
زێدەتر گۆت: (کوردستان ھەردەم جھێ پێکڤەژیانا ئولی و نەتەوەیی بوویە و حکومەت ب ھەموو ھەول و بزاڤێن خوە گرنگیێ ب گەشەپێدانا سکتەرێن رەوشەنبیری و ھونەری و کەلتووری و پێکڤەژیانێ ل کوردستانێ ددەت و نھا د وەزارەتا رەوشەنبیری دا دوو رێڤەبەریێن گشتی یێن رەوشەنبیری تایبەت ب پێکھاتەیان ھاتینە ڤەکرن)
نيشاندان