ئەڤرۆ نیوز ، نەوزاد ھلۆری:
ئەمنیدارێ گشتیێ ئێکگرتوویا ئیسلامی یا کوردستانێ دیارکر کو دەما ریفراندۆمێ زور گونجایە و گەلێ کوردستانێ ب کەرنەڤالێن خوە ئەڤ یەک سەلماند، و درۆستبوونا قەیران و گرتنا سنوران و شەر و ئالوزیان ب کرنا ریفراندۆمێ بتنێ چەند ئاخفتنەکێن سیاسیێن درۆستکرینە.
سەلاحەددین بھائەددین ئەمنیدارێ گشتیێ ئێکگرتوویا ئیسلامی یا کوردستانێ دەمەک بەریا نھا د پرێسکونفرانسەکێ دا ل ھەولێر دیارکر کو ئەو وەکو ئێکگرتوو ھەردەم د مەسەلێن دیموکراسی و مەدەنی دا دەستپێشخەربوینە و گۆت ژی: (ئەم وەکو ئێکگرتوو ب ھەموو قەناعەتا خوڤە پشکداریێ د سەرئێخستنا ریفراندۆمێ بوینە و مە سوپاسیێن کەسێ ژی نەڤێن و چوو مزایدان ژی ناکەین و سەربخوە بونا کوردستانێ و پشکداریکرنا سەرئێخستنا وێ شانازیەکا مەزنە بەری کو ئەرکێ مە بیت وەکو ئێکگرتوو ، و ئەم وەکو ئێکگرتوو دپرسێن نیشتمانی دا ھەردەم دەستپێشخەربوین )
زێدەتر گۆت: ( دوست و دوژمنێن مە چاڤەرێ نە کا قوناغا پشتی ریفراندۆمێ دێ چ روودەت و پێدڤی ناکەت دنھادا ئەم خەلکێ خوە ب ترسینین و و نابیت ئەم ریفراندۆمێ تێکەلی بابەتێن دن بکەین و تشتەک نورمالە کو رەخنە ل دەم و شێوازێ ریفراندۆمێ بھێتەگرتن بەلی َنابیت کو ھندەک کەس و لایەن بھانەیان بینن بو ئەنجامنەدانا ریفراندۆمێ و خەلکی ب بابەتێن مینا گرتنا سنوران و درۆستبوونا شەر و ئالوزیان و قەیرانان ڤە ب ترسینن و دنیا ھوسا بێ خودان نینە ھەرکەس و لایەنێ ڤیا ھێرشێ کوردستانێ بکەت و چوو تشتێن پلان بو دارشتی نینن)
ئەمنیدارێ گشتیێ ئێکگرتوویا ئیسلامی یا کوردستانێ د درێژاھیا پرێسکونفرانسا خوە دا دیارکر ژی کو ئەگەر ریفراندۆم نەھێتەکرن دێ بێئومێدیەکا دن بو گەلێ کوردستانێ ل گەل ھەموو ئەو بێئومێدیێن کو نھا ھەیی درۆست بیت و گۆت ژی: ( ھەر ھەلویست و تشتەکێ پشتی ریفراندۆمێ ھەبیت ژی مینا گرتنا سنوران دی یا دەمکی بیت و زیانا وێ بەری کو بومە بیت دێ بو وان بیت یێن ب گرتنا سنوران رادبن)

ئەڤرۆ نیوز ، ھلۆری:
ئەنجومەنا بلند یا ریفراندۆمێ د کونگرەیەکێ رۆژنامەڤانی دا بنەمایێن دەولەتا کوردستانێ راگەھاندن و تێدا بەلگەنامەیا سیاسیی یا ھەموو پێکھاتەیێن ئاینی و نەتەوەیێن کوردستانێ ھاتەخواندن و کو ھەموو بنەمایێن دەولەتا کوردستانێ تێدابوون.
ل گورەی بەلگەنامەیا ئەنومەنا بلند یا ریفراندۆمێ کو د کونگرەیەکێ رۆژنامەڤانی دا ژلایی دکتور خەلیل ئیبراھیم ئەندامێ سەرکرداتیا ئێکگرتوویا ئیسلامی یا کوردستانێ و ئەندامێ ئەنجومەنا بلند یا ریفراندۆمێ ھاتیە خواندن ئەو بەلگەنامە وەکو پشکەک ژ دەستوورێ ئایندەیێ کوردستانێ دھێتە دیتن کو ژ ١٥ ماددەیان پێکدھێت ، و تێدا ھەموو مافێن ئاین و نەتەوەیێن کوردستانێ ھاتینە دابینکرن و ھەموو ئەو پێکھاتە بخوە لسەر ڤێ یەکێ پێکھاتینە و رێکەفتن لسەر کریە و ئەوان ئەڤ یەک ب باشترین بنەمایێن مافێن خوە داناینە و سەررداتیا سیاسیا ھەرێما کوردستانێ گەرنتیا بھکرنا ھەموو ئەوان ماددەیان دێ کەت.

ئەڤرۆ نیوز ، نەوزاد ھلۆری:
ل سنوورێ پارێزگەھا دھۆکێ ھەموو بەرھەڤیێن ب رێڤەچوونا ریفراندۆم بو سەربخوەی یا کوردستانێ ھاتینەکرن ، رێڤەبەرێ کومسیوونا بلند یا سەربخوەی یا ھەلبژاردن و راپرسیێ ل دھوکێ ژی دیارکر کو ئەو چاڤەرێ سوبەھی دکەن کو وەلاتی بھێنە سەر سندوقێن دەنگدانێ.
سالح بەندی رێڤەبەرێ کومسیوونا بلند یا سەربخوەی یا ھەلبژاردن و راپرسیێ ل دھوکێ بۆ ئەڤرۆ نیوز گۆت: ( ل سنوورێ پارێزگەھا دھۆکێ ھەموو بەرھەڤیێن ب رێڤەچوونا ریفراندۆمێ ھاتینەکرن ژلایێ لوجیستیکی و ئەمن و ئاسایشێ ڤە و چوو ئاریشەەیک ژی نینە و تنێ ئم چاڤەرێ دەمی دکەین کو سوبەھی وەلاتی بچنە سەر سندوقێن دەنگدانێ و بریارێ ل چارەنڤیسێ خوە بدەن)
زێدەتر گۆت: ( ل ھەموو سنوورێ پارێزگەھا دھۆک ٧٤٤ ھزار و ٧٣٦ دەنگدەرێن وەلاتی و چوار ھزار و ٤٩٧ دەنگدەرێن پێشمەرگە ھەنە ، و ٢٥٦ بنگەھێن دەنگدانێ و ھزار و ٥٧٥ وێستگەھێن دەنگدانێ ھاتینە دانان ، و دناڤا ١٥ کەمپان ژی دا ھەموو بەرھەڤیێن دەنگدانێ ھاتینەکرن و ل ھەر کەمپەکێ ژی بنگەھەک یان دوو بنگەە ھاتینەدانان و ١٧٥ ھزار و ٢٤ ئاوارەیان مافێ دەنگدانێ دناڤ کەمپان دا ھەیە و ١٤٠ ھزار و ١٥٥ ئاوارەیان ژی ل دەرڤەیێ کەمپان مافێ دەنگدانێ ھەیە و ٢٤ بنگەھێن دەنگدانێ بو ئاوارەیان ل دەرڤەیێ کەمپان ھاتینە دانان )

ئەڤرۆ نیوز ، نەوزاد هلوری:
ئەڤرۆ سەرۆکێ هەرێما کوردستانێ دیارکر کو ریفراندۆم بریارا گەلێ کوردستانێ یە و د دەستێ چوو پارت و کەسان دا نەمایە و کەفتە دەست گەلێ کوردستانێ و دێ ل دەما دیارکری دا هێتە ئەنجامدان.
ل گۆرەی نوچەیەکێ کو مالپەرا سەرۆکاتیا هەرێما کوردستانێ بەلاڤکریە ، ئەڤرو مەسعود بارزانی سەرۆکێ هەرێما کوردستانێ ل گەل برۆبو ئوبێرت بالیوزێ فەرەنسا ل عیراقێ کومبوو و تێدا دانوستاندن لسەر چەند پرسەکان کرن ژ وانان پرسا ریفراندۆمێ.
بالیوزێ فەرەنسا ل عیراقێ دیارکر کو وەلاتێ وی ل دژی خواستا گەلێ کوردستانێ نینە و دخوازن کو پەیوەندیێ دیرۆکی یێن دناڤبەرا گەلێ کوردستانێ و فەرەنسا بەر ب پیشڤە بچن و فەرەنسا وەکو بنەما دژی ریفراندۆمێ نینە بەلێ ئەو ل وێ باوەریێ نە کو دەمێ وێ هاریکار نینە و دبیت کارتێکرنێ ل شەرێ دژی داعشێ بکەت.

د بەرامبەر دا مەسعود بارزانی سەرۆكێ هەرێما كوردستانێ ب هویری هەموو سەدەمێن کو بوینە ئەگەرا وێ یەکێ کو گەلێ کوردستانێ پشتی نەمانا؟چوو ئومێدان ب بەغدا بریارا ئەنجامدانا ریفراندۆمێ ئەنجام بدەت بو وان روونکرن و گۆت: ( گەلێ کوردستانێ روژا 25 ئیلونێ دێ چیتە سەر سندوقێن دەنگدانێ و دێ بوچونا خوە راگەهینن)
بارزانی دیارکر ژی کو چوو جاران دەرگەهێ دانوستاندنان ناهێنەگرتن و ئەڤرۆ ژی شاندەکا هەرێمێ سەرەدانا بەغدا کریە داکو بابەتی بو هەموو لایەن روون بکەن و گۆت ژی: ( پشتی ڤێ یەکێ ژی دەرگەهێ دانوستاندنان ڤەکریە و ئەم بەرهەڤین کو ل گەل بەغدا ب ئەجێندا و دلەکێ ڤەکری لسەر هەموو بابەتێن مینا سنوور ، پەترۆل ، ئاڤ ، غاز و هەموو بابەتێن دن دانوستاندنان بکەین و ب رێیەکا ئاشتی و تێگەهشتی ببینە دوو هەڤسویێن باش)