پشتی هێرشا مووشەكی یا لەشكرێ پاسدارێن ئیرانێ ل سەر هەولێرێ كو بوو ئەگەرێ شەهیدبوون و برینداربوونا هەژمارەكا وەلاتیێن سڤیل، راگەهاندنا ئەرەبی ب گرنگی ڤە باس ل شەرمزاركرن و كارڤەدانێن ئەوێ هێرشێ دكەن ل سەر ئاستێ جەماوەری و حكومی ل هەرێما كوردستانێ و ئیراقێ.
مالپەڕێ (سكای نیوز ئەرەبی) د راپۆرتەكێ دا ل دۆر هێرشا ئیرانێ ل سەر هەولێرێ بەلاڤكر» ئیراق ئەو ئاخڤتنێن ئیرانێ بۆ بەهانە ئینان بۆ هێرشا خوە ل سەر هەولێرێ ب نەڕاست د هەژمێریت» و ل سەر زارێ بەرپرسێن وەزارەتا دەرڤە یا ئیراقێ و لژنەیا ڤەكۆلینێ یا فیدرالی ل دۆر روودانێ ئاماژە ب ئەوێ چەندێ دكەت « ب شێوەیەكی مەیدانی مە سەرەدانا جهێ روودانێ كر و هیچ بنگەهەكێ مۆسادا ئیسرائیلی نەبوو، بەلكو جهێ ئاكنجیبوونێ بوو».
هەروەسا مالپەرێ (الجزیرە نت) سەبارەت ئەوێ هێرشێ بەلاڤكر «ئیراق ل جڤاتا ئاسایشا نێڤدەولەتی دێ سكالایێ ل سەر ئیرانێ تۆمار كەت» وئاماژە ب ئەوێ چەندێ كریە كو بەغدا هێرشا لەشكرێ پاسدارێن ئیرانێ ب پێشێلكرنا سەروەری و قانوونێن نێڤدەولەتی د هەژمێریت و بەهانەیێن تەهرانێ ژی بۆ هەبوونا بنگەهێن ئیسرائیلی ل هەرێما كوردستانێ رەت دكەت.
رۆژنامەیا (العرب) ژی د راپۆرتەكا خوە دا باس ل ئەوێ چەندێ كریە» هەرچەندە ل سەر ئاستێ فەرمی حوكمەتا ئیراقێ ب توندی هێرشا مۆشەكی یا ئیرانێ ل سەر هەولێرێ شەرمزاركریە، بەلێ ئالیێن چارچۆڤەیێ هەماهەنگیێ بۆ شەرمزاركرنا ئەوان هێرشان تووشی ئیحراجەكا مەزن بووینە و هەتا نوكە ژی ب شێوەیەكێ راستەوخوە هیچ بەیاننامەیەك بۆ شەرمزاركرنا ئەوان هێرشان نەبوو، د دەمەكی دا پێشتر هەلوەستێ توند بەرامبەر هێرش و تۆپبارانێن لەشكرێ توركیا هەبوو».
مالپەرێ (بی بی سی ئەرەبی) ژی ب گرنگی ڤە باس ل روودانا هێرشا ئیرانێ و كارڤەدانا وێ كریە و د پشكەكێ دا ب ناڤێ ( بەرسڤەكا ب هێز ل دۆر توپبارانكرنا هەولێرێ) ئاماژە ب رەتكرنا دیدارا حسێن ئەمیر عەبدوللاهیان، وەزیرێ دەرڤەیێ ئیرانێ ژ ئالیێ مەسرور بارزانی، ڤە سەرۆكێ حوكمەتا هەرێما كوردستانێ ل كۆڕبەندی ئابۆریێ جیهانی ل داڤۆس ل سویسرا و خوەنیشادانێن جەماوەری ل باژێرێن هەرێما كوردستانێ دكەت.
ژ ئالیێ خوەڤە، رۆژنامەیا (العربی الجدید) دووڤچونەكا رۆژنامەڤانی بۆ پرسا هێرشێن مۆشەكی یێن ئیرانی ل سەر هەولێرێ كریە و ئاشكرا كریە كو ئیران چاڤەڕێی ئەوێ شەرمزاركرنا جەماوەری و كارڤەدانا توند نەبوو، لەوما ل بەغدا بزاڤێن دبلۆماسی دەستپێكریە بۆ دەربازكرنا ئەوان فشارێن ل سەر تەهرانێ دروست بووین.
ئەوێ رۆژنامەیێ باس ل كۆمبوونێن ئەڤێ دووماهیێ یێن بالیۆزێ ئیرانێ ل ئیراقێ ل گەل بەرپرسێن بلند یێن حوكمەتا ئیراقێ كریە و بەلاڤكر» ل رۆژێن بهێن دا ژی دا كەسایەتیێن سیاسی و لەشكری یێن دی یێن ئیرانێ ژی دێ سەرەدانا بەغدا كەن بۆ دانوستاندنێ ب ئاراستەیا هێمنكرنا رەوشێ، پشتی كو تورەییەكا مەزن ل جادەیا هەرێما كوردستانێ و ئیراقێ دروستبووی بۆ پێشێلكرنا سەروەریا وەلاتێ ئەوان».
مالپەڕێن (الحدث) و (العربیە) ل شەڤا هێرشا ل سەر هەولێرێ، دووڤچون بۆ روودانێ كریە و گازیكرنا بالیۆزێ ئیرانێ ژ ئالیێ وەزارەتا دەرڤە یا ئیراقێ ڤە بۆ ئەوێ چەندێ ب شێوەیەكێ فەرمی نەرازیبوونێ دیاربكەت ل بەرامبەر هێرشێن مۆشەكی یێن ئیرانێ ل سەر هەولێرێ وەكو ئێك ژ هەلوەستێن توند یێن حوكمەتا ئیراقێ بەرامبەر ئیرانێ باسكریە و بەیاننامەیا جڤاتا ئاسایشا هەرێما كوردستانێ ژی بۆ رەتكرنا بەهانەیێن ئیرانێ بۆ ئارمانجگرتنا بنگەهەكێ مۆسادا ئیسرائیلی ل هەرێما كوردستانێ، جهێ سەرنجا ئەوان هەردو مالپەران بوو وەكو ئێك ژ كارڤەدانان.
رۆژنامەیا (الشرق اڵاوسط) یا لەندەنی ژی ل دۆر بێ هەلوەستیێ ل شەرمزاركرنا هێرشێن سەر هەولێرێ ئاماژە ب ئەوێ چەندێ كر» سەركردەیێن شیعی ل گەل ئەوێ چەندێ دا نینن كو ئیران هێرشێن مۆشەكی ل سەر هەرێما كوردستانێ ئەنجام بدەت و باس ل ئەوێ چەندێ ژی كریە، تەهران دخوازیت فشارێن ئەمریكا ل سەر حوسیێن یەمەنێ ب ڤەكرنا بەرەیەكێ دی كێمتر بكەت و ئالۆزیێن دەریا سۆر ڤەگوهۆزیت بۆ نێزیك سنۆرێن خوە».
مالپەرێ (الحرة) سەبارەت سكالایا ئیراقێ ل جڤاتا ئاسایشا نێڤدەولەتی ل سەر هێرشێن ئیرانێ سەرنج بۆ ئەوێ چەندێ راكێشایە كو ئێكەمین جارە نەرازیبوونا بەغدا بەرامبەر تەهرانێ د دەمێ بۆری دا بگەهیتە ئەوی ئاستی و ب پێشڤەچوونەكا نوو د پەیوەندیێن د ناڤبەرا هەردو وەلاتان دا دانایە، دوپاتی ل ئەوێ چەندێ ژی هاتیە كرن كو دوبارەبوونا هێرشێن ئیرانێ و رێزنەگرتن ل سەروەریا ئەوی وەلاتی وەكریە نەرازیبوون ببنە فشارەكا مەزن ل سەر حوكمەتا ئیراقێ لەوما نەچارە پێرابوون و هەلوەستێ جوداتر بەرامبەر ئیرانێ بگریتە بەر.

چاڤدێرێن سیاسی دیار دکەن، دامەزراندنا کۆمارا کوردستانێ بەری ٧٨ سالان نیشا ددەت کوردان هەردەم بزاڤا ڤێ یەکێ یا کری کو ل سەر ئاخا خوە ئازاد بژین، لێ مخابن د ئاستێ هەرێمی و نێڤدەولەتی دا هەردەم دژبەریا کوردان یا هاتیە کرن، لێ خەباتا کوردان بۆ ئازادیێ و ئاڤاکرنا دەولەتا کوردی هەتا نها ژی یا بەردەوامە.

د. حەکیم محەمەدی چاڤدێرێ سیاسی ل رۆژهەلاتێ کوردستانێ دیار کر، بەری ٧٨ سالان ب سەرۆکاتیا پێشەوا قازی محەمەد کوردان بریارەکا گەلەک گرنگ و دیرۆکی دا، کوردان بۆ هەموو جیهانێ دیار کر وان دڤێت ل سەر ئاخا خوە ب رەنگەکێ ئازاد بژین، بریارا دیرۆکی یا راگەهاندنا کۆمارا کوردستانێ رەتکرنا پیلانێن دوژمنان بوو، بزاڤا گەلێ کورد بۆ ئازادیێ و دیموکراسیێ بوو، چونکی کۆمارا کوردستانێ د ناڤ دلێ سیستەمێ پاشایەتی یێ ئیرانێ دا هاتە دامەزراندن و وی دەمی کوردان بۆ هەموو جیهانێ سەلماند ئەو ل گەل پێشکەفتنێ و دیموکراسیێ و پێکڤەژیانێ نە و گۆت: (لێ مخابن ئەم کورد ناڤ خوە دا ئێکگرتی نەبوون و ناکۆکیێن وان گەلەک هەبوون و هەم ژی د ئاستێ هەرێمی و نێڤدەولەتی دا گەلەک دژبەریا کۆمارا کوردستانێ هاتە کرن، پیلان ل دژی کۆمارا کوردستانێ هاتنە گێران و کورد ژی وی دەمی لاواز بوون و نەشیان ل هەمبەر ئێرشێن تەهرانێ خوەراگر بن و ژ بەر ڤێ یەکێ ژی کۆمارا کوردستانێ ل باژێرێ مهابادێ ژناڤچوو).
کەریم سەدیقی چاڤدێرێ سیاسی ژی دیار کر، براستی ئەڤرۆکە رۆژەکا گەلەک گرنگ و گەشە د دیرۆکا گەلێ کوردستانێ دا، ب سەرۆکاتیا پێشەوا قازی محەمەد و ب پشکداریا بارزانیێ نەمر و هەڤالێن وی کۆمارا کوردستانێ بەری ٧٨ سالان ل باژێرێ مهابادێ هاتە ئاڤاکرن، ئەو یەک پێنگاڤەکا گەلەک گرنگ بوو، کۆمارا کوردستانێ وی دەمی پێدڤی ب پشتەڤانیا دەرڤە هەبوو، لێ رەوشەکا گەلەک جودا ل دەڤەرێ هەبوو و هێزێن جیهانی ژی ژ بەر بەرژەوەندیێن خوە یێن ل گەل تەهرانێ پشتەڤانی ل کۆمارا کوردستانێ نەکرن و ژ بەر ڤێ یەکێ ژی د دەمەکێ کورت دا کۆمار ژناڤچوو و گۆت: (لێ کۆمارا کوردستانێ ئێکە ژ دەستکەفتێن نەتەوەیی یێن گەلێ کوردستانێ و هەموو کورد ئەڤرۆکە شانازیێ ب کۆمارا کوردستانێ دکەن، کوردان بەری ٧٨ سالان ئەڤ پەیامە دا جیهانێ کو ئەو بندەستیێ، تەپەسەریێ قەبوول ناکەن و وان دڤێت ب رەنگەکێ ئازاد بژین، خەباتا کوردان هەتا نها ژی بۆ ئازادیێ یا بەردەوامە و هێڤیدارین د دەمەکێ نێزیک دا کورد ژی وەکو هەموو گەلێن دی یێن جیهانێ بگەهنە مافێن خوە و دەولەتا کوردی بهێتە ئاڤاکرن).
ب هەلکەفتا ٧٨ سالیا دامەزراندنا کۆمارا کوردستانێ ل باژێرێ مهابادێ یێ رۆژهەلاتێ کوردستانێ، هژمارەک زێدە ژ پارتێن سیاسی یێن کوردستانێ، کەسایەتیێن سیاسی و چالاکڤانێن سیاسی و جڤاکی ب داخۆیانیێن جودا جودا دیار کرن دڤێت هەموو پارتێن سیاسی وانەیێن پێدڤی ژ ئەگەرێن ژناڤچوونا کۆمارا کوردستانێ وەربگرن و نها ب دل و جان پشتەڤانیێ ل هەرێما کوردستانێ و دەستکەفتێن کوردان بکەن.

سەرۆكێ ئەوێ لژنەیا جڤاتا نوونەرێن ئیراقێ كو سەرەدانا مالا شەهید پێشڕەو دزەیی كری، رادگەهینیت، ئەو خانی جهێ ئاكنجیبوونا وەلاتیێن سڤیل بوو، نەكو بنگەهەكێ سیخوڕی بوو.
دوهی ئێكشەمبی 21/1/2024، لژنەیەكا تایبەت یا جڤاتا نوونەرێن ئیراقێ كو ژ هەژمارەكا ئەندامێن هەردو لژنەیێن ئاسایش و بەرگریێ و پەیوەندیێن دەرڤە پێكهاتبوو، گەهشتبوو هەرێما كوردستانێ و پاشی ل گەل رێبەر ئەحمەد، وەزیرێ ناڤخوە ل هەرێما كوردستانێ سەرەدانا خانیێ شەهید پێشڕەو دزەیی كربوو، ئارمانجا سەرەدانێ، ڤەكۆلین بوو ل دۆر ئەوێ هێرشا ژ ئالیێ لەشكرێ پاسدارێن ئیرانێ ڤە ل سەر ئەوی خانی هاتیە كرن.
عەباس زاملی، سەرۆكێ ئەوێ لژنەیا تایبەت یا جڤاتا نوونەرێن ئیراقێ د كۆنفرانسەكێ رۆژنامەڤانی دا گۆت: خانیێ پێشڕەو دزەیی ب چەند مووشەكان بوویە ئارمانج كو ب دیتنا من مووشەكێن بالیستی بوون و زیانێن مەزن پەیدا كرینە».
عەباس زاملی گوت ژی» ئەو خانی جهێ ئاكنجیبوونا وەلاتیێن سڤیل بوو و هیچ ئاماژەیەك نینە كو بنگەهەكێ سیخوڕی بیت».
ناڤبری ئاماژە ب ئەوێ چەندێ ژی كر» هێرشێن مووشەكی یێن ئیرانێ ل سەر هەرێما كوردستانێ هیچ بەهانەیەك بۆ نینە و پێشێلكرنا سەروەریا ئیراقێیە. هەكە ب راست بنگەهەكێ سیخوڕی یێ هەر وەلاتەكی ل ناڤ هەرێما كوردستانێ هەبیت، ئیران دشیا ب رێكا هەردو حوكمەتێن هەرێما كوردستانێ و ئیراقێ ب دانوستاندنێ ئەوی بابەتی چارەسەر بكەت، نەكو هێرشا مووشەكی بكەتە سەر خانیێن وەلاتیێن سڤیل».
هەڤدەم شاخەوان عەبدوللا، جێگرێ سەرۆكێ جڤاتا نوونەرێن ئیراقێ كو ل گەل لژنەیا جڤاتا نوونەران سەرەدانا خانیێ شەهید پێشڕەو دزەیی كربوو، د ئەوی كۆنفرانسێ رۆژنامەڤانی دا گۆت: مە وەكو جڤاتا نوونەرێن ئیراقێ داخواز ژ حوكمەتا فیدرالی كریە پێنگاڤێن كریاری بۆ رێكگرتنێ ل ئەوان هێرشێن بەردەوام ل سەر هەرێما كوردستانێ دهێنە كرن بلەزتر بكەت و پێدڤیە سنۆرەك بۆ ئەوان هێرشان بهێتە دانان كو خەلكێ سڤیل دبیتە ئارمانج».
شاخەوان عەبدوللا گۆت ژی» جادەیا ئیراقێ و هەرێما كوردستانێ ژی چاڤەڕێی زێدەتر ژ جڤاتا نوونەران و حوكمەتا ئیراقێ دكەت بۆ ئەوێ چەندێ ئێدی هەلوەستێ وێ ب شەرمزاركرنێ ب دوماهی نەهێت، بەلكو پێنگاڤێن كریاری و نێڤدەولەتی بهاڤێژیت بۆ ئەوێ چەندێ ئەڤ هێرشە دوبارە نەبن و ب دوماهی بهێن».
جێگرێ سەرۆكێ جڤاتا نوونەرێن ئیراقێ دوباتكر» ئەم وەكو جڤاتا نوونەران پشتەڤانیێ ل هەموو ئەوان پێنگاڤان دكەین كو محەمەد شیاع سۆدانی، سەرۆك وەزیرێن ئیراقێ ل دۆر هێرشا مووشەكی ل سەر هەولێرێ هاڤێتین».
هەروەسا گۆت: ژ نوكە و پێڤە خەلكێ ئیراقێ ژ مە قەبوول ناكەت هەلوەستێ مە ل دۆر ئەوان هێرشێن ژ ئالیێ ئیرانێ ڤە ل سەر هەرێما كوردستانێ دهێنە كرن تنێ شەمزاركرن بیت، بەلكو پێدڤیە پێنگاڤێن كریاری بگرینە بەر».
ژ ئالیێ خوەڤە رێبەر ئەحمەد، وەزیرێ ناڤخوە ل حوكمەتا هەرێما كوردستانێ گۆت: مە هەموو پێزانینێن پێدڤی ل دۆر خانیێ شەهید پێشڕەو دزەیی و هێرشا مووشەكی یا لەشكرێ پاسدارێن ئیرانێ ل سەر هەولێرێ یێن داناینە بەر دەستێ لژنەیا جڤاتا نوونەرێن ئیراقێ».
رێبەر ئەحمەد دوپاتكر ئەو جهێ ژ ئالیێ لەشكرێ پاسدارێن ئیرانێ ڤە بوویە ئارمانج جهێ ئاکنجحبوونا سڤیلانە و خانیێ سەرمایەدارەكێ سەركەفتی و ب رێز یێ باژێرێ هەولێرێ یە. دەمێ چەندین سالان بوو خێزانا وی تێدا دژیا و ئەوان هیچ پەیوەندی ب پرسێن سیاسی و لەشكری ڤە نەبوو. هەموو ئەو بنەمایێن دهێنە باسكرن، دبێ بنەمانە.

هەلەبجە، عەزیز هەورامی:

چاڤدێرەكێ سیاسی دبێژیت، ئیران شەڕی ب هەرێما كوردستانێ د فرۆشیت د دەمەكی دا ل بەرەیێن شەڕی ل گەل ئەمریكا و ئیسرائیلێ ل یەمەن و غەزە و ئیراقێ شكەستن ئینایە، هەروەسا ئاماژەكر كو ئیرانێ دڤیا ب ئەوێ هێرشا خوە یا ترسنۆك خوە دیار بكەت، بەلێ رایا گشتیێ جیهانی و ناڤخوەیا ئیرانی ئەو كریارا پاسدارێن ئیرانێ شەرمزاركر.
دلشاد نامق، چاڤدێرێ سیاسی بۆ رۆژنامەیا (ئەڤرۆ) گوت» بەردەوامیا هێرشێن ئیرانی ل سەر هەولێرا پایتەختا كوردستانێ، پشكەكە ژ هنارتنا كێشەیێن خوە بۆ دەرڤەی سنۆرێن خوە، ئەو كێشەیا خویناوی ئەوا د ناڤبەرا ئیرانێ و ئەمریكا دا هەی وەكریە هێرشێ ل سەر هەولێرێ بكەت».
گۆت ژی: بەهانەیا ئیرانێ بۆ هێرشكرنێ ل سەر هەولێرێ گەلەك یا لاوازە و نەشیایە باوەریێ هەتا بۆ دۆستێن خوە ژی ل دۆر ئەوێ هێرشێ دروست بكەت، و نوكە نزانیت دێ چاوا خوە ژ ئەوێ رەوشا تێكەفتی ژ ئەگەرێ ئەوێ كریارا تیرۆرستی رزگار بكەت.
پتر گۆت: شەهیدكرنا زارۆكێن د بن ئێك سالیێ دا و هێرشكرن ل سەر خانیێن وەلاتیێن سڤیل، ب ناڤێ هێرشكنێ ل سەر بنگەهێ مۆسادێ شكەستن و لاوازیا لەشكرێ پاسدارێن ئیرانێ دیاردكەت».
هەروەسا دبێژیت» هێرشا لەشكرێ پاسدارێن ئیرانێ خوە نمایشكرن و ڤەشارتنا شكەستنێن خوە بوو، كو ل گەلەك ژ سیاسەتێن خرابێن خوە شكەستن ئینایە، شەڕێ غەزە د ناڤبەرا حەماس و ئیسرائیلێ دا، تەپبارانكرنا حوسیان ژ ئالیێ ئەمریكا و بریتانیا ڤە، شكەستن بۆ ئیرانیان دهێنە هەژمارتن كو ئیرانێ ئەو دو دەولەتە خستینە ئەوی شەڕی كو زیانێن مەزن گەهشتینێ».
خۆیاكر» گەلێن ئیرانێ هیچ باوەریەك ب حوكمەت و لەشكرێ وەلاتێ خوە نەمایە، ئەو پرۆپاگندەیێن دبێژن كو ل هەولێرێ بارەگەهێ مۆسادێ توپبارانكریە، ب تمامی یا بێ بنەما بوو، گەلێ ئیرانێ ژی كارێ ترسنۆك یێ لەشكرێ پاسدارێن وەلاتێ خوە شەرمزار دكەن كو ژن و زارۆك و زەلامێن سڤیل شەهید و بریندار كرینە.

سەرۆك مەسعود بارزانی پێشوازی ل ئەلینا رۆمانۆسكی، بالیۆزا ئەمریكا ل ئیراقێ كر. ددیدارەكێ دا بالیۆزا ئەمریكا پشتەڤانیا وەلاتێ خوە بۆ گەلێ كوردستانێ ژ بەر توپبارانكرنا بێ بنەما یا لەشكرێ پاسدارێن ئیرانێ بۆ سەر هەرێما كوردستانێ راگەهاند و دیاركر ئەوێن بووینە قوربانی خەلكێ سڤیلن.
سەرۆك بارزانی ئاماژەكر كو هێرشا لەشكرێ پاسداران ستەمەكا مەزن بوو ل هەموو گەلێ كوردستانێ هاتیە كرن و پێشێلكرنا سەروەریا ئیراقێ و هەرێما كوردستانێ بوو، بەلێ ئەو جۆرە هێرشە ئیرادەیا گەلێ كوردستانێ ناشكێنن بەلكو ب هێزتر دكەن و ئاماژەكر كو دخوازین مە پەیوەندیێن دۆستانە و ب هێز ل گەل وەلاتێن دەوروبەر هەبن، بەلێ ناچینە ژێر بارێ سەپاندنا بڕیارێن تاكلایەنە و خوەسەپاندنێ. ژ پێخەمەت وێ چەندێ ژی دا دەست ژ بهایێن پیرۆز یێن گەلێ مە و دۆزا وی یا رەوا ل بن هیچ هێرشەك و فشارەكێ بەرنادەین.

سەرۆك مەسعود بارزانی پێشوازی ل ستیڤن هین، بالیۆزێ بریتانیا ل ئیراقێ كر و د دیدارەكێ دا، بالیۆزێ بریتانیا پشتەڤانیا وەلاتێ خوە بۆ خەلك و هەرێما كوردستانێ دیاركر ل بەرانبەر ئەوێ هێرشا بێ بنەما كو ژ ئالیێ لەشكرێ پاسدارێن ئیرانێ ڤە ل سەر هەرێمێ هاتیە كرن. سەرۆك بارزانی سوپاسیا هەڤسۆزی و هەڤخەمیا حوكمەتا بریتانیا كر و دوپاتكر كو هەردەم دخوازین پەیوەندیێن دۆستانە و ب هێز یێن هەرێمێ و ئیراقێ ل گەل وەلاتێن دەوروبەر ل سەر بنەمایێ رێزگرتنا هەڤپشك بیت، هەروەسا دیاركر كو ئەو هێرشا ئیرانی ل سەر هەولێرێ ب بهانەیێن نەراست و بێ بنەما بوون و پێشێلكرنا سەروەریا ئیراقێ و هەرێمێ بوو.

سەرۆكێ هەرێما كوردستانێ، نێچیرڤان بارزانی ل هەولێرێ پێشوازی ل سەرۆكێ ئیستۆنیا ئالار كاریس كر و د كۆنگرەكێ رۆژنامەڤانی دا، سەرۆكێ هەرێمێ راگەهاند: مە باس ل پەیوەندیێن ئیستۆنیا ل گەل ئیراقێ و هەرێمێ و دەلیڤەیێن هاریكاریێن هەڤپشك و گرنگیا پاراستنا ئارامی و سەقامگیریا دەڤەرا مە كر، و مە سوپاسیا گەل و حوكمەتا ئیستۆنیا كر كو د چارچۆڤەیێ هەڤپەیمانیا نێڤدەولەتی دا هاریكاریا هەرێما كوردستانێ كریە. ژ ئالیێ خوەڤە سەرۆكێ ئیستۆنیا دیاركر كو یێ دلخوەشە وەكو ئێكەمین سەرۆكێ ئیستۆنیا ب فەرمی سەرەدانا هەرێما كوردستانێ بكەن و ئاماژەكر كو خەلكێ هەرێمێ ژ روویێ ئابۆری و سیاسی د پێشكەفتی نە.

د دەمێ سێ رۆژان دا، مەسرور بارزانی، سەرۆكێ حوكمەتا هەرێما كوردستانێ ل كۆڕبەندێ ئابۆری یێ جیهانی (داڤۆس 2024) چەندین دیدار و كۆمبوونێن گرنگ ل گەل سەركردەیێن جیهانی ئەنجامدان و جارەكادی پەیوەندیێن هەرێما كوردستانێ د گۆپیتكا دبلۆماسیەتێ دا د كۆڕ و كۆڕبەندێن جیهانی دا دوپاتكر.
بۆ پشكداریكرنێ د كۆڕبەندێ ئابۆری یێ جیهانی یێ 54 دا ل داڤۆس ل وەلاتێ سویسرا، ل رۆژا 15/1/2024، مەسرور بارزانی، سەرۆكێ حوكمەتا هەرێما كوردستانێ گەهشتبوو ئەوی وەلاتی و ل رۆژا پاشتر ژی دەست ب دیدار و كۆمبوونێن خوە ل گەل سەرۆك و سەركردەیێن جیهانێ كر و د دەمێ سێ رۆژان دا، 45 دیدار و كۆمبوون ئەنجامدان.
سەرەدانا سەرۆكێ حوكمەتا هەرێمێ بۆ داڤۆس و كۆمڤەبوونا پشكەكا مەزن یا سەركردەیێن جیهانێ ل كۆڕبەندێ ئابۆریێ جیهانی ل سویسرا یا هەڤدەم بوو ل گەل هێرشا مووشەكی یا لەشكرێ پاسدارێن ئیرانێ بۆ سەر باژێرێ هەولێرێ ل شەڤا 15/1/2024 كو ببوو ئەگەرێ شەهیدبوونا چار وەلاتیێن سڤیل و برینداربوونا شەش كەسێن دی. ئەڤە ژی بوو دەلیڤەیەك جارەكادی وەلاتێن جیهانێ ب شێوەیەكێ راستەوخوە پشتەڤانی و هەڤسۆزیا خوە بۆ هەرێما كوردستانێ دوپات بكەن و هەڤخەمیا خوە بگەهیننە سەرۆكێ حوكمەتا هەرێما كوردستانێ.
هەڤدەم سەرۆكێ حوكمەتا هەرێما كوردستانێ، مەسرور بارزانی د چارچۆڤەیێ كۆڕبەندێ داڤۆس و دیدار و كۆمبوونێن خوە یێن گرنگ دا دوپاتی ل هەلوەستێن حوكمەتا هەرێما كوردستانێ كر. ل گەل ئەوێ چەندێ ژی دا، مالا كوردستانێ و كۆڕبەندێ داڤۆس كرە پلاتفۆرمەك بۆ گەهاندنا پەیاما حوكمەتا هەرێما كوردستانێ و كۆمڤەكرنا مەزنترین پشتەڤانی و هەڤسۆزی بۆ گەلێ كوردستانێ.
د گرنگترین دیدارێن مەسرور بارزانی، سەرۆكێ حوكمەتا هەرێما كوردستانێ دا ل داڤۆس، ل گەل هەر ئێك ژ ئیمانوێل ماكرۆن، سەرۆكێ فڕەنسا، كاتالین نۆڤاك، سەرۆكا هنگاریا، ئەنتۆنیۆ گۆتێرێش، سكرتێرێ گشتیێ رێكخراوا نەتەوەیێن ئێكگرتی، ڤاهاگن جاچاتوریان، سەرۆك كۆمارێ ئەرمەنستانێ، مارك رووتە، سەرۆك وەزیرێن هولەندا، هان دوك سوو، سەرۆك وەزیرێن كۆریا باشوور، نەجیب میقاتی، سەرۆك وەزیرێن لوبنان، بشر ئەلخەساونە، سەرۆك وەزیرێن ئوردن، شێخ محەمەد بن عەبدولرەحمان ئەلسانی، سەرۆك وەزیرێن قەتەر و جاسم محەمەد ئەلبدێوی، ئەمیندارێ گشتیێ جڤاتا هاریكاریا وەلاتێن كەنداڤی كۆمبوو.
هەروەسا سەرۆكێ حوكمەتا هەرێما كوردستانێ د چارچۆڤەیێ پشكداریكرنێ ل كۆڕبەندێ داڤۆس، جودا ل گەل هەر ئێك ژ ئەنتۆنی بلینكن، وەزیرێ دەرڤە یێ ئەمریكا، دەیڤید كامیرۆن، وەزیرێ دەرڤە یێ بریتانیا، جەیك سولیڤان، شیرەتكارێ ئاسایشا نیشتمانی یا ئەمریكا، یان لیڤاسكی، وەزیرێ دەرڤە یێ كۆمارا چیك، ئیلینا ڤالتۆنن، وەزیرا دەرڤە یا فینلەندا، گیر پیدرسن، نوونەرێ تایبەت یێ سكرتێرێ گشتیێ نەتەوەیێن ئێكگرتی بۆ سووریێ، عەیدەرۆس زوبەیدی، جێگرێ سەرۆكێ جڤاتا سەركردایەتیا یەمەن، بەندەر ئەلخورەیف، وەزیرێ پیشەسازی و سامانێ كانزایی یێ سعودی، شێخ سەلمان بن خەلیفە ئال خەلیفە، وەزیرێ دارایی و ئابۆرێ نیشتمانی یێ بەحرێنی كۆمبوو.
ل رۆژا 17/1/2024، مەسرور بارزانی، سەرۆكێ حوكمەتا هەرێما كوردستانێ د پەیامەكێ دا ل تۆرا جڤاكی یا ئێكس (تویتەرا بەرێ) راگەهاندبوو» دێ بەردەوام بین. ژ ئەڤرۆ ئەم دێ دو جاركی كاركەین ل سەر پڕۆژەیێن خوە ل سیكتەرێن بانكی، پارەدانا دیجیتالی، وزێ، چاندنێ و پیشەسازیێ. كوردستان یا بەر ب وەرچەرخانێ دچیت».

بسپۆرەكێ زانستێن سیاسی ل زانكۆیا سەلاحەدین ل هەولێرێ رادگەهینیت: پشكدارییا سەرۆك وەزیرێن هەرێما كوردستانێ مەسرور بارزانی د كۆڕبەندێ ئابۆرییێ جیهانی دا ل داڤۆس ل سەر ئاستێ سیاسی و ئابۆری گرنگە، ب تایبەتی ئەوێن خودانێن بڕیارا سیاسی و ئابۆری ل ‌سەر ئاستێ نێڤدەولەتیدا پشكدارییێ د وی كۆربەندی دا دكەن. ‌
د. نەوزاد هێتۆتی، بسپۆرەكێ زانستێن سیاسی ل زانكۆیا سەلاحەدین بۆ رۆژنامەیا (ئەڤرۆ) گوت» پشكدارییا هەرێما كوردستانێ د ‌ كۆڕبەندێ داڤۆس ‌دا ل ‌سەر هەردو ئاستێن سیاسی و ئابۆری گەلەك یا گرنگە، چونكی هەتا نوكە كێشەیێن ناڤبەرا بەغدا و هەولێرێ د بەردەوامن و نەهاتینە چارەسەركرن، هەرێما كوردستانی دشێت مفای ژ ئەوان دەلیڤان ببینیت‌ و جارەكا دیتر ل‌ داڤۆس ئەوان بابەتان بێخیتە هەمبەری پشكداربوویان».
گۆت ژی» كۆڕبەندێ ئەڤسالە تایبەتمەندییا خوە هەیە ب ‌تایبەتی كو ل سەر‌ ئاستێ جیهانێ شەڕێ رووسیا و ئۆكرانیا یێ بەردەوامە و شەڕێ غەززە و ململانێ و ئالۆزییێن دەڤەرا كەنداڤی ژی ب‌ توندی سەرهەلداینە، بڕێڤەچوونا ئەڤی كۆڕبەندی‌ ژ ‌ئالیەكێ دیڤە یێ‌ هەڤدەمە ل ‌گەل نەسەقامگیرییا ئابۆری ل سەر ئاستێ جیهانێ، د ئەڤی چارچۆڤەیی ‌دا پشكدارییا هەرێما كوردستانێ ل سەر هەردو ئاستێن سیاسی و ئابۆری گەلەك گرنگییا خوە هەیە».
ل رۆژا دوشەمبی، مەسرور بارزانی، سەرۆكێ حوكمەتا هەرێما كوردستانێ ب سەرۆكاتییا شاندەكێ بۆ پشكداریكرنێ د كۆڕبەندێ ئابۆرییێ جیهانی دا ل داڤۆس گەهشتە وەلاتێ سویسرا و دێ چەندین دیدار و كۆمبوونێن گرنگ دناڤا وی كۆربەندی دا ئەنجام دەت.

بەرپرسەكێ وەزارەتا پێشمەرگەی رادگەهینیت: ئەمریكا دێ یا بەردەوام بیت د پرسا مەشق و پڕچەككرنا هێزا پێشمەرگێ كوردستانێ دا.
پێشمەرگە، هەڤپەیمانێ گرنگ یێ ئەمریكا د شكاندنا داعشێ دا ل ئیراقێ، ئەو هێزا وەكو تاكە هێز رۆلێ كاریگەر هەبوو د ئازادكرنا گەلەك دەڤەران ژ داعشێ یێن ژ ئەگەرێ شكەستن و رەڤینا لەشكرێ ئیراقێ كەفتینە بن دەستێ داعشێ، ژ وێرێ هاریكاریێن مادی و لوجستی یێن ئەمریكا بۆ پێشمەرگەی زێدەتر چوونە پێشڤە.
لیوا هۆشمەند حەیدەر، جێگرێ سەرۆك ئەركان بۆ ئیدارە و میرە ل وەزارەتا پێشمەرگەی گوت» كێمكرنا هاریكاریان بۆ پێشمەرگەی ب رازیبوونا حوكمەتا ئەمریكا و هەرێما كوردستانێ یە، رێككەفتن هاتیە كرن كو سال ب سال هاریكاری بۆ پێشمەرگەی كێم ببن، بەلێ ئەو كێمبوونە هاریكاریا لوجستی ڤەناگریت، بەلكو مەشق و راهێنان و پڕچەككرنا هێزا پێشمەرگەی دێ یا بەردەوام بیت».
لیوا هۆشمەند گوت ژی» كێمكرنا هاریكاریان كاریگەریەكا ب وی شێوەی ناكەتە سەر هێزا پێشمەرگەی، چونكە حوكمەتا هەرێما كوردستانێ بەرهەڤی كریە كو ل دەمێ ب دووماهی هاتنا رێككەفتنا د ناڤبەرا هەرێمێ و ئەمریكا دا، ئەو ڤالاهیا دروست دبیت دێ پڕكەت».
ئەمریكا هەتا سالا 2026 یاداشتنامەیەكا تێكگەهشتنێ ل گەل حوكمەتا هەرێما كوردستانێ هەیە بۆ هنارتنا هاریكاریێن مادی و لۆجستی بۆ هێزا پێشمەرگەی، هەڤدەم ب گۆڕەی رێككەفتنا د ناڤبەرا هەردو ئالیان دا سال ب سال هنارتنا هاریكاریان بۆ پێشمەرگەی دێ كێم بیت، بەلێ كێمكرنا هاریكاریێن مادی بۆ هێزا پێشمەرگەی، هاریكاریێن لۆجستی ناگریت، بەلكو مەشق و راهێنان و پڕچەككرنا هێزا پێشمەرگەی دێ بەردەوام بیت».
ژ ئالیێ خوەڤە، سەعید هەركی، ئەندامێ لژنەیا پێشمەرگەی ل خولا پێنجی یا پەرلەمانێ كوردستانێ گوت» ئەمریكا و پێشمەرگەی پێدڤی ب هەڤدو هەیە، هەروەسا مانا ئەمریكا بۆ مەشقكرنا هێزا پێشمەرگەی گەلەك یا پێدڤیە».
یاداشتنامەیا تێكگەهشتنێ د ناڤبەرا وەزارەتا پێشمەرگەی ل حوكمەتا هەرێما كوردستانێ و وەزارەتا بەرگریا ئەمریكی ل سالا 2016 هاتبوو ئیمزاكرن و ل مەها چریا دویێ سالا 2022 هاتبوو نووكرن، ب گۆڕەی وێ تێكگەهشتنێ وەزارەتا بەرگریا ئەمریكی (پنتاگۆن) مەهانە 20 ملیۆن دۆلاران و چەندین چەك و كەرەستە و تەقەمەنیێن شەڕی و مەشق و راهێنانێ پێشكێشی هێزێن هەڤپشك یێن پێشمەرگەی دكەت و دێ هاریكار بیت بۆ ئێكگرتنا هەردو هێزێن 70 و 80 و دروستكرنا هێزەكا هەڤپشك یا پێشمەرگەی.