ئه‌ڤرۆ نيوز:
سه‌فين دزه‌يى په‌يڤدارێ حوكمه‌تا هه‌رێمێ راگه‌هاند رۆژا 1 شه‌مبى ، 1-5-2016، ب هه‌لكه‌فتا رۆژا جيهانيا كرێكاران ل هه‌موو دام و ده‌زگه‌هێن حوكمه‌تا هه‌رێمێ بهێنڤه‌دانا فه‌رمى يه.
دياركر ژى رۆژا شه‌مبى ل ناڤه‌ندێن خواندنێ و ل دام و ده‌زگه‌هێن سه‌ر ب وه‌زاره‌تا ساخله‌ميێ ڤه، بهێنڤه‌دان نينه.
ئەڤرۆ نیوز، رۆژھات لوقمان:
ئەفسەرێ پشکا ھاتنوچوونا قەزا ئامێدیێ بۆ ئەڤرۆ نیوز گۆت: “ئەڤرۆ ل دەمژمێر 18:00 ئێڤاری روودانەکا ھاتنوچوونێ ل سەر رێیا سەرەکی دھۆک ـ ئامێدیێ نێزیک کومەلگەھا (کوانێ) روودایە و د ئەنجام دا سێ کەس بریندار بوون.
رائیدێ ھاتنوچوونێ بەیار ئیبراھیم ژ پشکا ھاتنوچوونا قەزا ئامێدیێ دیارکر ژیکو ترومبێل ژ جورێ تەکسی و پیکەم مەرزیا بووینە و ھەرسێ بریندار سووارێن تەکسیێ بووینە و گۆتژی: “روودان ژ ئەنجامێ نە پێگریا رێنمایێن ھاتنوچوونێ بوویە و ھەر ب زوو ھەرسێ بریندار ھاتنە رەوانەکرن بۆ نەخوشخانا تەنگاڤیان ل دھوکێ”.
ئەڤرۆ نیوز، زنار تۆڤی:
شیرەتکارێ سەرۆک بارزانی بۆ کاروبارێن سیایی محەمەد جۆمعە د فێسبۆکێ دا ئەڤ نووچە بەلاڤکریە و تێدا دیارکریە،کو ناتۆیێ داخواز ژ سەرۆکێ ھەرێمێ مەسعود بارزانی کریە کو پێشمەرگە ببیتە بەشەک ژ ھێزا ناتۆیێ،ئەو ڤێ چەندێ ب پێنگاڤەکا مەزن دبینیت و وەسا دیاردکەت کو ئێدی پێشمەرگە دێ بیتە بەشەک ژ ھێزێن مەزن یێن جیھانی،گۆتیەژی ئەڤ دەسکەفتە ھەمی ب سایا سیاسەتا حەکیمانە یا سەڕۆک بارزانی بدەستڤە ھاتینە.
ئه‌ڤرۆ نيوز:
ڤيان ده‌خيل ئه‌نداما په‌رله‌مانێ عيراقێ راگه‌هاند پشتى پتر ژ شه‌ش هه‌يڤان وان به‌لگه‌نامه خرڤه‌كرين، ئه‌ڤرۆ په‌رله‌مانێ عيراقێ، پرسا وێرانكرنا شنگال خسته ده‌نگدانێ و وه‌كو ده‌ڤه‌ره‌كا وێرانكرى ناساند.
ڤيان ده‌خيل ئه‌نداما په‌رله‌مانێ عيراقێ راگه‌هاند كو شنگال 85% وێران بوويه و ئه‌ڤ بريارا په‌رله‌مانێ عيراقێ دێ بيته ئه‌گه‌رێ پتر ئاڤه‌دانكرنا شنگالێ و ڤه‌گه‌راندنا ژيانێ بۆ ده‌ڤه‌رێن زيان ڤێ كه‌فتى.
ئه‌ڤرۆ نيوز:
نێچيرڤان بارزانى سه‌رۆكێ حوكمه‌تا هه‌رێما كوردستانێ ئه‌ڤرۆ راگه‌هاند: به‌رى نوكه مه يا گوتى چ گاڤا ره‌وشا هه‌رێما كوردستانێ ژ ئاليێ دارايى ڤه باش ببيت دێ گوهۆرينان د مووچێ فه‌رمانبه‌ران دا كه‌ين، به‌لێ داهاتێ هه‌رێما كوردستانێ هێشتا نه‌گه‌هشتيه وى ئاستى كو بشيێن ده‌ستكاريا مووچان بكه‌ت.
د ماوێ چوويى دا، حكومه‌تا هه‌رێمێ مووچێ فه‌رمانبه‌ران ب رێژا 15 بۆ 75% پاخشت و ڤێ چه‌ندێ وه‌لاتىبارێ ژيانا وه‌لاتيان گران كريه.
ئه‌ڤرۆ نيوز:
حوكمه‌تا عيراقێ نڤيسينگه‌هێن كه‌نالێ ئه‌لجه‌زيره ل عيراقىێ داخستن ب تومه‌تا وێ يه‌كێ كو پێشێليا رێنماييێن حوكمه‌تا عيراقێ كرينه ئه‌ڤێن سالا 2014 ده‌ركه‌فتين ل دۆر رومالكرنا ده‌زگه‌هێن راگه‌هاندنێ ل ده‌مێ شه‌رێ ل دژى ئيرهابێ.
ژ ئاليێ خوڤه، كه‌نالێ ئه‌لجه‌زيره، د به‌ياننامه‌كێ دا، حێبه‌تيا خوه به‌رامبه‌ر ڤێ بريارا حوكمه‌تا عيراقىێ نيشادا كو وان پێگيرى ب سياسه‌تا خوه يا راگه‌هاندنێ د پرسا كاروبارێن عيراقێ دا كريه.
ئەڤرۆ نیوز، نەوزاد زادە ھلۆری:
ل سەر داخوازیا وەزارەتا دەرڤەیا ئیرانێ مەسعود بارزانی ناڤەراستا ھەیڤا پێنج یا ئەڤ سالە دێ سەرەدانا تەھرانا پایتەختا کومارا ئیسلامی یا ئیرانێ کەت.
ژێدەرەکێ بەرپرس ل بالیوزخانەیا کومارا ئیسلامی یا ئیرانێ ل بەغدا بو خەندان گۆت: (سەرەدانا بارزانی لسەر داخوازیا وەزارەتا دەرڤەیا ئێرانێ یە و بارزانی دێ پرسا دەڤەرێ و شەرێ داعشێ و شەرێ ئازادکرنا موسل و پرسا راکێشانا بوریا پەترولێ دناڤبەرا ھەرێم و ئیرانێ ل گەل مەزنە بەرپرسێن ئیرانێ گەنگەشە کەت).
ب ئاخفتنا ئەوی ژێدەری : بارزانی د سەرەدانا خودا دێ چاڤ ب ھەر ئێک ژ حەسەن روحانی سەروک کومارێ ئیرانێ ، و عەلی لاریجانی سەروکێ پەرلەمانی ، و محەمەد جەواد زەریف وەزیرێ دەرڤەیێ ئیرانێ و ئیرەج مەسجدی بەرپرسێ دوسەیەیا عیراقێ ل سوپایێ پاسداران کەڤیت.
ل بارا ئەگەرا دیدارا بارزانی و قاسم سلێمانی ئەوی ژێدەری ئاماژە ب وێ یەکێ کر کو ئەگەر ل دەما سەرەدانا بارزانی دا بو ئیرانێ قاسم سلێمانی ل نافخوەیا ئیرانێ بیت دێ چاڤ ب بارزانی کەڤیت و پرسا عیراق و شەرێ ئازادکرنا موسل گەنگەشە کەت.
بەرپرسێ بالیوزخانەیا ئیرانێ بارزانی ب دوستێ دێرین و وەفادارێ ئیرانێ ناڤبر و راگەھاند: (بەرپرسێن ئیرانێ رێزەکا تایبەت بو بارزانی و تالەبانی ھەیە ژبەرڤێ د ئاستەکێ بلند دا دێ پێشوازیێ ل بارزانی ھێتەکرن).
دوماھی سەرەدانا بارزانی بو تەھرانێ دزڤریت بو ئوکتوبەرا سالا 2011 کو ل گەل بەرپرسێن بلندێن وی وەلاتی ژ وان عەلی خامنەیی رێبەرێ شورشا کومارا ئیسلامی یا ئیرانێ کۆمببوو.
ئەڤرۆ نیوز، نەوزاد زادە ھلۆری:
نەوشێروان موستەفا رێکخەرێ گشتیێ تەڤگەرا گۆڕانێ د ئێکەم لێداوان دا پشتی ڤەگەریانێ بو ھەرێما کوردستانێ گۆت: (سوپاس بو ھەموو خەلکێ کوردستانێ بو ڤیانا وان و سوپاسیا ھەموو وان بەرێزان و رۆژنامەڤانان دکەم کو ھاتینە پێشوازیا من).
نەوشێروان موستەفایی گوت ژی : ( ھەر گورانکاریەکا نوو بھێتەکرن و ھەر بوچوونەکا نوو ژی ھەبیت دێ ب زاردەڤێ ئاخفتنکەرێ فەرمیێ تەڤگەرا گۆرانێ راگەھینین).
پشتی ڤەگەریانا وی بو باژێرێ سلێمانیێ نەوشێروان موستەفا چاڤ ب ھژمارەکا بەرپرس و ھەلسوراوێن دیارێن تەڤگەرا گۆرانێ کەفت.
دلاوەر حاجی عوسمان ھەلسوراوێ تەڤگەرا گۆران کو ئێک بوو ژ بەرھەڤبوویێن دیدارا وی بو خەندان دیارکر کو کاک نەوشێروان موستەفا یێ گەشبینە ب چارەسەرکرنا بارودوخێ ھەرێما کوردستانێ و مەژی گەشبینی ب روخسارێن وی ڤە ددیت).
دلاوەر حاجی عوسمان گوت ژی : ( ب ئومێدین کو نەوشێروان موستەفا پشتی ڤەگەریانێ دێ ئەگەرەک بیت بو چارەسەرکرنا بارودوخێ ھەرێما کوردستانێ و ب ئاخفتنا دوست و دوژمنان نەوشێروان موستەفا زەلامێ رۆژێن گران و دوژوارە).
نەوشێروان موستەفا رێکخەرێ گشتیێ تەڤگەرا گۆرانێ ل سپێدەیا ئەڤرۆ پێنجشەمبی ب رێیا فروکخانەیا نیڤدەولی یا سلێمانیێ ڤەگەریا ھەرێما کوردستانێ.
ل گورەی خشتەیێ ئوفیسا ھێلا ئەسمانی یا عیراقێ ئەو فروکەیا نەوشێروان موستەفا پێ ڤەگەریایی ل دەمژمێر 10:55 خولەک ب دەما لەندەن و 12:55 ب دەما ھەرێما کوردستانێ بناڤێ (IA240) فروکخانەیا گاتویک یا لەندەنی دەرچوویە و سپێدەیا ئەڤرۆ گەھشتیە فروکخانا سلێمانیێ.
نەوشێروان موستەفا رێکخەرێ گشتیێ تەڤگەرا گۆران لرۆژا 22/9/2015 ب مەرەما وەرگرتنا چارەسەریێن نوشداری سەرەدانا ئەلمانیا کربوو ، و پشتی چارەسەریا نوشداری بەریتانیا ئاکنجی بوو.
ئەڤرۆ نیوز:
ل سنوورێ پارێزگەھا ھەولێرێ فەرمانا دەستەسەرکرنێ بۆ مەزنترین وەبەرھێنەر ھاتە دەرکرن و ئەندامەکا جڤاتا پارێزگەھێ ژی پشتڕاست کر، وەبەرھێنەرەکێ دھۆکێ ژی پارێ وەلاتیان بریە و فەرمانا دەستەسەرکرنێ بۆ ھاتیە دەرکرن.
خانزاد وەسو، ئەنداما جڤاتا پارێزگەھا ھەولێرێ بۆ رۆژناما ئەڤرۆ گۆت “جڤاتا پارێزگەھا ھەولێرێ بەردەوام یا دووڤچوونێ بۆ ئاریشێن وەبەرھێنانێ دکەت و بۆ ڤێ مەرەمێ مە گازی کریە رێڤەبەرێ گشتیێ وەبەرھێنانا ھەولێرێ بۆ لێپرسینێ ل وەبەرھێنەرێن کەمتەرخەم و کەیسێن ئەڤان وەبەرھێنەرێ پارێ خەلکی خوارین، چەندین پڕۆژە ھاتینە راگرتن و خوەدیێن وانا رەڤینە و فەرمانا دەستەسەکرنێ ژلایێ دادگەھێ بۆھاتیە دەرکرن، چونکە ھژمارەکا زۆرا وەلاتیان سکالا تۆمارکرینە و گازندا خوە ئینایە جڤاتا پارێزگەھێ بۆ وەرگرتنا مافێ خوە یێ ژلایێ وەبەرھێنەرا ھاتیە خوارن.
خانزادێ گۆتژی “فەرمانا دەستەسەرکرنێ بۆ مەزنترین وەبەرھێنەرێ کوردستانێ ب ناڤێ نزار حەنا دەرچوویە و نوکە رەڤیە بۆ دەرڤەی وەلاتی، ئەڤی وەبەرھێنەری د چەندین پڕۆژەیان دا گەندەلی کریە و ھەموو ژی پڕۆژێن زۆر مەزن بوویە ل سەر ئاستێ کوردستانێ، ھەتا ئەردێ مزگەفتێ کریە پڕۆژە و ھەموو پڕۆژە ب زێدەگاڤی چێ کرینە، د دەمێ لێپرسینێ دا بۆ تمامکرنا پڕۆژان ب توندی گۆتیە یێ بەرھەڤ نینم چ خزمەتگوزاریان دابین بکەم، ھەروەسا فەرمانا دەستەسەرکرنێ بۆ وەبەرھێنەرەکێ پارێزگەھا دھۆکێ دەرچوویە ب ناڤێ سەردار ئاکرەیی، کو ئاکرەیی پڕۆژەیەک بێ مۆلەت چێ کریە و پارێ وەلاتیان بریە و رەڤیە”.
نيشاندان