ئه‌ڤرۆ نيوز:
رێكه‌وت حه‌مه ره‌شيد وه‌زيرێ ساخله‌ميا حكومه‌تا هه‌رێما كوردستانێ راگه‌هاند كو وه‌زاره‌تا وان نێزيكى 100 مليار ديناران يا ده‌ينداره كو ده‌ينێن كومپانيان ل سه‌ر وانن و ئه‌ڤ ده‌ينه ژى يێن سالێن 2014 و 2015 و 2016 نه.
رێكه‌وت حه‌مه ره‌شيد وه‌زيرێ ساخله‌ميا حكومه‌تا هه‌رێما كوردستانێ سه‌باره‌ت دياردا چوونا نه‌خوشايان بۆ ده‌رڤه‌ى وولاتى بۆ وه‌رگرتنا چاره‌سه‌ريێ راگه‌هاند : چوونا نوشداران بۆ ده‌رڤه‌ى وولاتى تشته‌كێ ئاسايى يه، رامانا وێ يه‌كێ ناگه‌هينيت كو نه‌خوشخانێن كوردستانێ د خرابن.
ئه‌ڤرۆ نيوز:
سوبه‌هى رۆژا په‌يوه‌نديكرنا ( موباشرا) ماموستايانه ب قوتابخانان و ئێكه‌تيا ماموستايێن كوردستانێ داخوازێ ژ هه‌موو ماموستايان دكه‌ت سوبه په‌يوه‌نديێ ب قوتابخانان بكه‌ت. به‌رهه‌م مسته‌فا ئه‌ندامێ سكرتاريه‌تا ئێكه‌تا ماموستايێن كوردستانێ راگه‌هاند ئه‌ڤ يه‌كه وێ چه‌ندێ راناگه‌هينيت كو ئێكه‌تيا ماموستايان ده‌ستبه‌ردارى مافێن خوه بووينه، به‌لكو چاڤه‌رێ بجهئينانا داخوازيێن ماموستايان ژ حكومه‌تێ دكه‌ن. 11 ڤێ هه‌يڤێ ئێكه‌تيا ماموستايان ب فه‌رمى داخواز ژ حوكمه‌تێ كريه پێداچوونێ د سيسته‌مێ پاشخستنا مووچێ ماموستايان دا بكه‌ن، ئه‌گه‌ر نه دێ مه‌ترسى كه‌ڤيته سه‌ر ژ ناڤچوونا پرۆسا خواندنێ ل هه‌رێمێ.
ئه‌ڤرۆ نيوز:
بڕياره ل ده‌سپێكا هه‌يڤا ئيلۆنا ئه‌ڤ ساله فه‌ريزا حه‌جێ ل وه‌لاتێ سعوديێ ده‌سپێبكه‌ت و بۆ ڤێ مه‌ره‌مێ ژى نێزيكى سێ مليۆن و نيڤ كه‌سان پشكداريێ تێدا بكه‌ن.
مه‌ريوان نه‌قشه‌به‌ندى سه‌رپه‌رشتێ تيما راگه‌هاندنا وه‌زاره‌تا ئه‌وقافێ ل باژێرێ سعوديێ بۆ ئه‌ڤرۆ نيوز گۆت: “ئه‌ڤ ساله نێزيكى دو مليۆن و 400 هزار كه‌سان ب ره‌نگه‌كێ فه‌رمى دێ پشكداريێ د رێ و ره‌سمێن فه‌ريزا حه‌جێ دا كه‌ن”، دا زانين ژى كو نێزيكى مليۆن كه‌سان ژى ب قاچاخى و بێ رێ پێ بهێته دان دێ هه‌مان ئه‌رك ئه‌نجام ده‌ن.
زێده‌تر گۆت: “بۆ ب رێڤه‌چوونا ڤێ پرۆسێ ژى ب ره‌نگه‌كێ سه‌ركه‌فتى 17 هزار كه‌س و سێ هزار ترۆمبێل و ئاليه‌تێن جودا و 35 هه‌ليكوپته‌ر و حه‌فت هزار كاميران جودا ل ئه‌ردو ئه‌سمانان دێ د كارى دا بن”.
ئەڤرۆ نيوز:
بەرپرسەکێ وەزارەتا پێشمەرگەی یا حوکمەتا ھەرێما کوردستانێ راگەھاند کو وەزارەتا دارایی و ئابووری یا حوکمەتا ھەرێما کوردستانێ رازی بوویە کو ژ بلی دەرمالێن زارۆ و خێزانێ دەرمالا باوەرنامێ ژی بۆ ھێزێن پێشمەرگەی بھێتە مەزاختن.
لیوا قارەمان کەمال، جێگرێ سەرۆکێ دەستەیا ئەرکان ل وەزارەتا پێشمەرگەی یا حوکمەتا ھەرێما کوردستانێ دیار کر کو بەری نوکە دەرمالێن خێزانێ و زارۆیان بۆ پێشمەرگان دھاتنە مەزاختن و ھەتا نوکە ژی ئەڤ چەندە یا بەردەوامە، بەلێ دەرمالا باوەرنامێ نەدھاتە مەزاختن و بۆ باس گۆت: “وەزارەتا دارایی و ئابووری نڤیسارەک ئاراستەیی مە کریە و تێدا دیارکریە کو ئەو د رازینە دەرمالا باوەرنامێ بۆ پێشمەرگەی ل گەل مووچەی بھێتە مەزاختن”.
د کۆمبونەکا جڤاتا وەزارەتا پێشمەرگەی دا، رازەمەندیا وەزارەتا دارایی پەسەندکریە و داخواز ژ ھەموو بەرپرسێن کارگێری و دارایی یێن وەزارەتا ناڤبری ھاتیە کرن کار ل سەر ڤێ چەندێ بکەن.
ناڤھاتی ئاماژە دا وێ چەندێ کو دەرمالا باوەرنامێ بۆ ھێزێن پێشمەرگەی دێ وەکو یا فەرمانبەران ھێتە مەزاختن و گۆت: “بۆ باوەرناما سێیێ بنەرەت 15%، بۆ باوەرناما شەشێ ئامادەیی 25%، بۆ باوەرناما پەیمانگەھێ 35%، بۆ باوەرناما بەکالۆریۆسێ 45%، بۆ باوەرناما ماستەرێ 65%، بۆ باوەرناما دکتۆرایێ 75%”.
ئەڤرۆ نيوز:
ئەندامەکێ لژنا باژێرڤانیێ ل پەرلەمانێ کوردستانێ راگەھاند کو بەلاڤکرنا پارچێن ئەردی ل سەر فەرمانبەر و کرێداران پێدڤێ یا ب سێ قووناغان ھەی و گۆت: “نوکە قووناغا ئێکێ یا ب دووماھی ھاتی و کار یێ بۆ ب دووماھی ئینانا قووناغا دویێ دھێتەکرن”.
بەھزاد زێباری، ئەندامێ لژنا باژێرڤانیێ ل پەرلەمانێ کوردستانێ ئاشکرا کر کو کارکرن بۆ بەلاڤکرنا پارچێن ئەردی ل سەر فەرمانبەر و کرێداران یا بەردەوامە و نوکە قووناغا ئێکێ یا ب دووماھی ھاتی ئەو ژی کۆمکرنا پێزانین و ئاماران بوو و بۆ مالپەرێ فەرمی یێ پارتی دیمۆکراتی کوردستان گۆت: “نوکە کار یێ بۆ قووناغا دویێ دھێتەکرن ئەو ژی دەستنیشانکرنا پارچێن ئەردی یە ل پارێزگەە و قەزا و ناحیان و ھەتا نوکە گەلەک پارچێن ئەردی ھاتینە دەستیشانکرن دا کو ل سەر فەرمانبەر و کرێداران دا بھێنە بەلاڤکرن”.
ناڤھاتی ئاماژە دا وێ چەندێ کو ھەر دەمێ قووناغا دەستنیشانکرنا پارچێن ئەردی ب دووماھی ھات دێ قووناغا سێیێ دەست پێ کەت ئەوژی بەلاڤکرنا پارچێن ئەردی یە ل سەر فەرمانبەر و کرێداران ل دووڤ خال و رێزبەندیێ.
ل دووماھیێ ئەندامێ لژنا باژێرڤانیێ ل پەرلەمانێ کوردستانێ خویا کر کو بڕیارا بەلاڤکرنا پارچێن ئەردی ژ جڤاتا وەزیران دەرکەفتیە، بەلێ پێدڤی یا ب دەمی ھەی، چونکی ھوورکاری گەلەکن ژبەر ڤێ چەندێ دەم بۆ دیارکرنا پارچێن ئەردی ژ لایێ وەزارەتا باژێرڤانی و گەشتوگۆزارا ھەرێما کوردستانێ ڤە دڤێت.
ئه‌ڤرۆ نيوز:
سەرۆکێ کۆتلا برایەتی و پێکڤەژیانێ ل جڤاتا پارێزگەھا نەینەوا بۆ رۆژناما ئەڤرۆ دیار کر کو دوھی رۆژا 30/8/2016 جڤاتا پارێزگەھا نەینەوا ل بارەگایی خوە ل ناحیا ئەلقوش کۆمبوونەک ئەنجامدا و تێدا بڕیار ھاتە دان 200 ھزار خانی ل دەڤەرێن رزگارکری بۆ وان کەسێن تیرۆرستێن داعش خانیێن وان خرابکرین بھێنە ئاڤاکرن.
سەیدو چەتۆ، سەرۆکێ کۆتلا برایەتی و پێکڤەژیانێ ل جڤاتا پارێزگەھا نەینەوا ئاشکرا کر کو ئاڤاکرنا ڤان خانیان دێ ھاریکاری بیت د گەل ھەموو لایەنان و گۆت: “دێ لژنەک ھێتە پێکئینان بۆ دەستنیشانکرنا خانیێن ژ لایێ تیرۆرستێن داعش ڤە ھاتینە پەقاندن و سەرەرایی ڤێ چەندێ دێ بزاڤ ھێنەکرن ل دەمەکێ نێزیک ل ھەموو یەکێن ئیداری یێن پێشمەرگێ کوردستانێ رزگارکرین دەست ب ئاڤاکرنا خانیان بۆ وەلاتیێن زەرەرمەند بھێتەکرن دا کو خەلک بشێن ڤەگەرنە سەر مال و مولکێ خوە”.
ناڤھاتی ئاماژە دا وێ چەندێ کو دەلیڤێن کاری ب رێیا پرۆژێن وەبەرھێنانێ دێ بۆ وەلاتیان ھێنە دیتن و گۆت: “کۆمپانیەکا ناڤخۆ دێ ب ئاڤاکرنا 200 ھزار خانیان رابیت و ئەڤ خانیە دێ ل سەر ھەموو قەزا و ناحیا و کۆمەلگەھان ھێنە بەلاڤکرن و بتنێ دێ بۆ وان کەسان بن یێن کو خانیێن وان ژ لایێ تیرۆرستێن داعش ڤە ھاتینە پەقاندن و ھەموو مەزاختیێن خانی دێ د ستوویێ حوکمەتا عیراقێ دا بن و بۆ ڤێ مەرەمێ بڕیار ھاتەدان ھەموو رێڤەبەریێن قەزا و ناحیان دەست ب ئەنجامدانا ئامارەکێ بکەن بۆ دەستنیشانکرنا ئەردێ وەبەرھێنانێ داکو پرۆژێن وەبەرھێنانێ بھێنە چێکرن ب رێیا وان پرۆژان دەلیڤێن کاری بۆ وەلاتیان بھێنە دیتن”.
ئەڤرۆ نيوز:
وەزیرێ ساخلەمیێ یێ حوکمەتا ھەرێما کوردستانێ دیار کر کو بەری ھاتنا جەژنا قوربانی دەرمالێ ھەستیاری و ئێشگریێ دێ بۆ ھێتە مەزاختن.
د. رێکەوت حەمە ڕەشید، وەزیرێ ساخلەمیێ یێ حوکمەتا ھەرێما کوردستانێ خویا کر، بڕیارە پشتی بەلاڤکرنا مووچێ ھەر ھەیڤەکێ، دەرمالێ ھەستیاری و ئێشگریێ بۆ پشکەکا کارمەند و نۆشدارێن ساخلەمیێ دێ ھێتە مەزاختن و بۆ SNN گۆت: “بۆ ھەیڤا تەموزێ ژی بەری ھاتنا جەژنا قوربانی ئەو دەرمالە دێ ھێتە مەزاختن”.
وەزیری ئاماژە ب وێ چەندێ ژی کر، وەزارەتا دارایی ئەو ئاگەھدارکرینە کو لیستا کارمەند و نۆشدارێن ئێشگر رەوانەی گەنجینان بکەن، دا کو ئەو دەرمالە پشتی بەلاڤکرنا مووچەی بۆ وان بھێتە مەزاختن.
دا زانین ژی کو نۆشدارێ موقیم و موقیم ئەقدەم بۆ ھەر ھەیڤەکێ 70 ھزار دینار وەکو دەرمالە دێ ھێنە دان، دیسا بۆ نۆشدارێن بسپۆر 120 ھزار دینار، بۆ کارمەندێن ساخلەمیێ ژی 32 ھزار دینار، نۆشدارێ پلەبەند 50 ھزار دینار و بۆ کارمەندێ کارگێری ژی 30 ھزار دینار دێ ھێنە مەزاختن.
ئەڤرۆ نيوز:
جێگرێ سەرۆکێ لژنا ناڤخوە ل پەرلەمانێ کوردستانێ دیار کر کو د کۆمبوونا بھێت یا لژنا روو ب رووبوونا قەیرانان دا بڕیار ل دۆر نەھێلانا پاشکەفتکرنا مووچێ یەکا زێرەڤانی دێ ھێتەدان.
نازم ھەرکی، جێگرێ سەرۆکێ لژنا ناڤخوە ل پەرلەمانێ کوردستانێ ئاشکرا کر، وان پێشنیارەک دایە وەزارەتا ناڤخوە یا حوکمەتا ھەرێما کوردستانێ کو پێدڤیە پاشکەفتکرنا مووچێ یەکا زێرەڤانی نەمینیت و بۆ مالپەرێ فەرمیێ پارتی دیموکراتی کوردستان گۆت: “پتریا زێرەڤانێن سەر ب یەکا زێرەڤانی ڤە نوکە د سەنگەرێن شەری دانە و مل بملێ برایێن خوە یێن پێشمەرگە بەرگریێ ژ وەلاتێ خوە دکەن، لەو دڤێت پاشکەفتکرنا مووچێ وان ژی نەمینیت”.
ھەرکی ئاماژە ب وێ چەندێ ژی کر، وان لژنەک دروستکر و سەرەدانا سەنگەرێن شەری کر و گۆت: “مە ھژمارا زێرەڤانێن سەر ب یەکا زێرەڤانی ڤە یێن ل سەنگەرێن شەری دیار کر و بۆ وەزارەتا دارایی ھاتە ھنارتن، پاشی بۆ جڤاتا وەزیران ژی ھاتە ھنارتن و رازیبوون ل سەر ھاتیە دان”.
نازمی خویا ژی کر، بڕیارە د کۆمبوونا بھێت یا لژنا روو ب رووبوونا قەیرانان دا، بڕیار بھێتەدان کو ئەو زێرەڤانێن د سەنگەرێن شەری دا وەکو پێشمەرگان بھێنە ھژمارتن، دیسا مووچێ وان نەھێتە پاشکەفتکرن و مووچێ وان ب تەمامی بۆ بھێتە مەزاختن.
ناڤبری دا زانین کو ئەو زێرەڤانێن د سەنگەرێن شەری دا نەبن، رێژا پاشکەفتکرنا مووچێ وان بۆ 20% دێ ھێتە کێمکرن، ئانکو 60% مووچێ وان دێ بۆ ھێتە مەزاختن، ئەڤە ژی د دەمەکی دایە کو نوکە یەکا زێرەڤانی 40% مووچێ وان بۆ دھێتە مەزاختن و 60% یا مووچێ وان دھێتە پاشکەفتکرن.
نيشاندان